ᕉᒪᒥᐅᓄᑦ 9

ᒎᑎ ᐃᓄᖁᑎᖏᓪᓗ

1ᓱᓕᔪᒥᒃ ᐅᖃᕐᐳᖓ ᙭ᔅᑑᓯᒥ, ᓴᒡᓗᓇᖓ; ᐃᓱᒪᒪ ᐃᒃᐱᒋᔭᖓᑕ ᑐᑭᓯᑎᑉᐹᖓ ᐊᓂᕐᓂᐅᑉ ᐃᑦᔪᕐᓁᑦᑑᑉ ᓇᓗᓁᕐᓯᓂᖓᒍᑦ, 2ᕿᒃᓵᖕᓂᕐᔪᐊᖃᕋᒪ ᐃᓗᒃᑯᓪᓗ ᐋᓐᓂᐊᕈᑎᒋᓪᓗᒍ. 3ᓇᖕᒥᓂᖅ ᐊᒡᓛᑦ ᓇᕐᕈᓇᕐᓯᑎᑕᐅᔪᒪᒐᔭᕐᐳᖓ ᙭ᔅᑑᓯᒥᓪᓘᓐᓃᑦ ᐊᕕᑎᑕᐅᖔᕐᓗᖓ ᐃᓅᖃᑎᒃᑲ ᐱᑦᔪᑎᒋᓪᓗᒋᑦ, ᔫᑎᐅᖃᑎᒃᑲ ᑎᒥᒃᑯᑦ ᐃᓚᒋᔭᒃᑲ. 4#ᒨᓯᓯ ᐂᑉᐸᖏᑦ 4:22.ᑖᒃᑯᐊ ᐃᓴᕆᐊᓕᒥᐅᖑᕗᑦ; ᕿᑐᕐᖓᐅᓂᕐᒥᒡᓗ ᐱᖃᕐᐳᑦ, ᓂᕐᑐᕐᓇᕐᓂᕐᒥᒃ ᖃᐅᔨᑎᓯᒪᕔᑦ; ᐊᖏᖃᑎᒌᖕᓂᕐᒥᒡᓗ ᐱᑎᓯᒪᓪᓗᒋᑦ, ᐱᖁᔭᓂᒃ ᑐᓂᓯᕕᒋᓯᒪᕔᑦ, ᑐᒃᓯᐊᖃᑦᑕᕐᓂᕐᒥᒡᓗ ᐊᑐᕐᐳᑦ, ᐊᖏᕐᕕᒋᓯᒪᓪᓗᓂᖏᓪᓗ; 5ᑭᖑᕚᕆᔭᐅᕗᑦ ᐱᒋᐊᕐᕕᐅᓚᐅᕐᑐᓄᑦ ᓯᕗᓕᕕᓂᑦᑎᓐᓄᑦ, ᔫᑎᐅᓪᓗᑎᒡᓗ, ᙭ᔅᑑᓯᐅᑉ ᑎᒥᑖᕐᓂᖓᓄᑦ ᐃᓅᖃᑎᒋᔭᐅᕗᑦ. ᑖᓐᓇ ᒎᑎᐅᔪᖅ ᑕᒤᓐᓄᑦ ᓂᕐᑐᕐᑕᐅᓕ ᐃᓱᖃᖏᑦᑐᒧᑦ. ᐋᒥᓐ.

6ᒎᑎᐅᑉ ᐅᖃᐅᓯᖏᑦ ᓱᓕᖏᓐᓂᕋᕐᓗᒋᑦ ᐅᖃᓐᖏᓚᖓ; ᑕᒪᕐᒥᒃ ᐃᓴᕆᐊᓕᒥᐅᑦ ᑭᖑᕚᕆᖏᒻᒪᒋᑦ ᐃᓴᕆᐊᓔᑎᐅᔪᑦ. 7#ᒨᓯᓯ ᓯᕗᓪᓖᑦ 21:12.ᐂᑉᕋᕼᐋᒻᓗ ᕿᑐᕐᖓᕆᔧᓐᓇᕆᓐᖏᓔᑦ ᑭᖑᕚᕆᔭᕋᓗᐊᓂ, ᒎᑎ ᐅᖃᕐᓯᒪᒐᓗᐊᕐᑎᓪᓗᒍ, “ᐂᓴᑭᒃᑯᑦ ᑭᖑᕚᑎᑦ ᐱᔪᒫᕐᐳᑦ.” 8ᐅᓇ ᑐᑭᓕᒃ ᑎᒥᒃᑯᑦ ᑭᖑᕚᖑᔪᑑᖏᑦᑐᑦ ᒎᑎᐅᑉ ᕿᑐᕐᖓᕆᖕᒪᒋᑦ; ᐊᖏᕐᓯᒪᓂᒃᑯᓪᓕ ᕿᑐᕐᖓᐅᔪᑦ ᐂᑉᕋᕼᐋᒻᒧᑦ ᑭᖑᕚᖑᓂᕋᕐᑕᐅᖕᒪᑕ. 9#ᒨᓯᓯ ᓯᕗᓪᓖᑦ 18:10.ᐊᖏᕈᑎ ᐃᒫᒃ ᐅᖃᕐᓯᒪᖕᒪᑦ, “ᒫᓐᓇᑐᑦ ᑍᒤᓪᓗᐊᓕᕐᑎᓪᓗᒍ ᐅᑎᕈᒫᕐᐳᖓ ᓵᕋ ᐃᕐᓂᖃᓕᕈᒫᕐᐳᖅ.”

10ᑕᒪᓐᓇᑐᐊᖅ ᑍᒤᓐᖏᓚᖅ, ᕇᐱᑲᓕ ᕿᑐᕐᖓᕐᑖᕐᒪᑦ ᒪᕐᕉᖕᓂᒃ ᐊᖑᒻᒥᑦ ᐊᑕᐅᓯᕐᒥᑦ, ᓯᕗᓕᑦᑎᓐᓂᑦ ᐂᓴᑭᒥᑦ, 11#ᒨᓯᓯ ᓯᕗᓪᓖᑦ 25:23.ᓱᓕ ᐃᓅᓚᐅᕐᑎᓐᓇᒋᒃ ᐱᐅᔪᒥᒡᓘᓐᓃᑦ ᐱᐅᖏᑦᑐᒥᒡᓘᓐᓃᑦ ᓱᓕ ᐊᑐᓚᐅᕐᑎᓐᓇᒋᒃ, ᒎᑎᐅᑉ ᓂᕈᐊᕐᓯᓂᖓ ᕾᖁᔨᓂᕐᒥᒍᑦ ᑲᔪᓯᖁᓪᓗᒍ, ᐱᓂᐊᕐᓂᕐᒥᒃ ᐱᑦᔪᑎᖃᕐᑎᓐᓇᒍ ᕾᖁᔨᓂᖓᓕ ᐱᑦᔪᑎᒋᓪᓗᒍ, 12ᕇᐱᑲ ᐅᖃᐅᑦᔭᐅᓚᐅᕐᐳᖅ, “ᐊᖓᔪᒃᓯᐅᑉ ᓄᑲᓂ ᐱᔨᑦᓯᕈᒫᕐᐹ.” 13#ᒪᓚᑬ 1:2,3.ᑎᑎᕋᕐᓯᒪᖕᒪᑦ, “ᔧᑯ ᓇᒡᓕᒋᓚᐅᕐᐸᕋ, ᐄᓴᓕ ᐆᒥᒋᓪᓗᒍ.”

14ᖃᓄᕐᓕ ᐅᖃᕐᑐᒃᓴᐅᓕᕐᐱᑖ? ᒎᑎᐅᑉ ᐱᓂᐊᕐᓂᖓ ᐸᓯᔭᒃᓴᐅᓂᖃᕐᐹ? ᑍᒤᖏᒻᒪᕆᒃᐳᖅ! 15#ᒨᓯᓯ ᐂᑉᐸᖏᑦ 33:19.ᒨᓯᓯᒧᑦ ᐅᖃᓚᐅᕐᒪᑦ, “ᓂᑲᒋᔪᒫᕐᐸᒃᑲ ᓂᑲᒋᔪᒪᔭᒃᑲ, ᓇᒡᓕᒋᔪᒫᕐᐸᒃᑲᓗ ᓇᒡᓕᒋᔪᒪᔭᒃᑲ.” 16ᑍᒤᒻᒪᑦ ᐃᓅᑉ ᐱᔪᒪᔭᖓᓂᒃ ᐱᑦᔪᑎᖃᓐᖏᓚᖅ ᐱᓇᓱᐊᓗᐊᕐᓂᖓᓂᒡᓘᓐᓃᑦ, ᒎᑎᐅᓪᓕ ᓂᑲᒍᓱᖕᓂᖓᓂᒃ ᑐᓐᖓᕕᖃᕐᐳᖅ. 17#ᒨᓯᓯ ᐂᑉᐸᖏᑦ 9:16.ᒎᑎᐅᑉ ᐅᖃᐅᓯᖏᑦ ᐰᕉᒧᑦ ᐅᖃᕐᒪᑕ, “ᒪᑭᑎᓚᐅᕐᐸᒋᑦ ᐊᑐᕈᒪᓪᓗᑎᑦ ᐱᔪᓐᓇᕐᓂᕋ ᓴᖅᑭᑎᑦᓱᒪᓪᓗᒍ ᐃᓕᖕᓂᒃ ᐊᑐᕐᓗᖓ, ᐊᑎᕋ ᐅᖃᐅᑎᒋᔭᐅᖁᓪᓗᒍ ᓄᓇᕐᔪᐊᓕᒫᒥ.” 18ᑍᒤᒻᒪᑦ ᒎᑎ ᓂᑲᒍᓱᒃᐳᖅ ᓂᑲᒋᔪᒪᔭᒥᓂᒃ, ᓯᑎᔫᑎᓪᓗᒋᓪᓗ ᐃᓱᒪᖏᑦ ᓯᑎᑎᑦᓱᒪᔭᓂ.

ᒎᑎᐅᑉ ᓂᓐᖓᖕᓂᖓ ᓂᑲᒍᓱᖕᓂᖓᓗ

19ᐅᕙᓐᓄᑦ ᐅᖃᕋᔭᓕᕐᐳᓯ ᐃᒫᒃ, “ᓱᖕᒪᓖᓐᓇ ᓱᓕ ᓈᒻᒪᖏᑦᑐᓂᒃ ᓇᓂᓯᕙᒃᐹ? ᑭᐊᓗ ᐱᔪᒪᔭᖓ ᐊᑭᕋᕐᑐᕈᓐᓇᕐᐸᐅᒃ?” 20#ᐂᓮᐊᓯ 29:16; 45:9.ᐃᓅᒃ, ᐃᕝᕕᓪᓕ ᑭᓇᐅᕖᑦ, ᒎᑎᒥᒃ ᑭᐅᒪᔪᓐᓇᕋᕕᑦ? ᒪᕐᕋᖅ ᓴᓇᔭᐅᔪᖅ ᓴᓇᔨᒥᓄᑦ ᐅᖃᕈᓐᓇᕐᐹ, “ᓱᖕᒪᑦ ᑍᒫᒃ ᓴᓇᕕᖔ?” 21ᒪᕐᕋᕐᒥᒃ ᐃᓗᓕᖁᑎᓕᐅᕐᑐᖅ ᐃᓱᒪᒥᓂᒃ ᓴᓇᔭᕆᐊᖃᓐᖏᓛᖅ, ᒪᕐᕋᕐᒥᑦ ᑕᕝᕙᓐᖓᑦᓮᓐᓇᖅ ᐂᑉᐸᖓ ᐱᒻᒪᕆᐊᓗᖕᓄᑦ ᑭᓯᐊᓂ ᐊᑐᕐᑕᐅᔪᒃᓴᐅᓂᐊᕐᑎᓪᓗᒍ ᐂᑉᐸᖓᓗ ᖃᐅᑕᒫᕐᓯᐅᑕᐅᓗᓂ ᐊᑐᒐᒃᓴᓕᐊᕆᓗᒍ?

22ᒎᑎᐅᑉ ᓂᓐᖓᖕᓂᓂ ᑕᑯᔭᐅᖁᒐᒥᐅᒃ ᐱᔪᓐᓇᕐᓂᓂᓗ ᖃᐅᔨᔭᐅᖁᒐᒥᐅᒃ, ᐃᓗᓕᖅᑯᑎᓕᐊᖑᓯᒪᔪᑦ ᐊᑯᓂ ᕿᓄᐃᓵᕈᑎᒋᕔᑦ ᓂᓐᖓᖕᓂᖓᓄᑦ ᐊᓯᕈᕐᑕᐅᔪᒃᓴᐅᓪᓗᑎᒃ ᓴᓇᔭᐅᓯᒪᔪᑦ, 23ᓂᕐᑐᕐᓇᕐᓂᕐᔪᐊᖓᑕ ᐊᒥᒐᖏᑦᑐᐊᓘᓂᖓ ᓇᓗᓁᕐᑕᐅᖁᓪᓗᒍ ᓂᑲᒋᔭᐅᔭᕆᐊᓕᖕᓄᑦ, ᐅᐸᓗᖕᒊᕈᑎᒋᓯᒪᔭᒥᓄᑦ ᓯᕗᓂᖓᒍᑦ ᓂᕐᑐᕐᓇᕐᓯᑎᑕᐅᓚᖁᓪᓗᒋᑦ. 24ᐅᕙᒍᑦᑕᐅᖅ ᕾᖁᓯᒪᕚᑎᒍᑦ, ᔫᑎᓂᑐᐊᖑᖏᑦᑐᖅ ᔫᑎᐅᖏᑦᑐᓂᓪᓕᑦᑕᐅᖅ. 25#ᕼᐆᓯᐊ 2:23.ᕼᐆᓯᐊᒃᑯᑦ ᐅᖃᕐᓯᒪᖕᒪᑦ,

“ᐃᓄᖁᑎᒋᓚᐅᓐᖏᑕᒃᑲ ᐃᓄᖁᑎᓐᓂᒃ ᑍᓕᕈᒫᕐᐸᒃᑲ,

ᓇᒡᓕᒋᔭᐅᓚᐅᕐᓯᒪᖏᑦᑐᓪᓗ ᓇᒡᓕᒋᔭᓐᓂᒃ ᑍᓕᕈᒫᕐᐸᒃᑲ.”

26 # ᕼᐆᓯᐊ 1:10. “ᑕᕝᕙᓂᑦᓮᓐᓇᖅ ᐅᖃᐅᑦᔭᐅᕝᕕᕕᓂᕐᒥᖕᓂ, ‘ᐃᓄᖁᑎᒋᓐᖏᓚᑦᓯ,’

ᑍᔭᐅᓕᕈᒫᕐᐳᑦ ‘ᒎᑎᐅᑉ ᐆᒤᓐᓇᕐᑑᑉ ᕿᑐᕐᖓᖏᓐᓂᒃ.’”

27 # ᐂᓮᐊᓯ 10:22,23. ᐂᓮᐊᓯ ᓂᓪᓕᐊᓚᐅᕐᐳᖅ ᐃᓴᕆᐊᓕᒥᐅᓄᑦ: “ᐃᓴᕆᐊᓕᒥᐅᑦ ᐃᓄᖏᑦ ᓯᐅᕋᕐᑎᑐᑦ ᐃᒪᐅᑉ ᓯᓈᓃᑦᑐᑎᑐᑦ ᐅᓄᕐᑎᒋᒐᓗᐊᕐᐸᑕ, ᐊᒥᐊᒃᑯᑐᐊᖏᑦ ᐅᓄᖏᑦᑐᑦ ᐱᐅᓕᔭᐅᔪᒫᕐᐳᑦ. 28ᐊᑕᓂᖅ ᐊᑭᓂᐊᕈᒫᕐᒪᑦ ᓄᓇᕐᔪᐊᕐᒥᒃ ᓱᒃᑲᑦᑐᐊᓗᖕᒥᒃ ᖃᓄᐃᓕᔭᐅᒋᐊᓪᓚᕐᕕᖃᖏᑦᑐᒥᒃ.” 29#ᐂᓮᐊᓯ 1:9.ᐂᓮᐊᓯᓗ ᓇᓚᐅᑦᓯᓚᐅᕐᐳᖅ ᐅᖃᕐᓗᓂ, “ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᑭᖑᕚᕇᒃᓴᓕᐊᕆᓚᐅᖏᑉᐸᑎᒍᑦ, ᓱᑑᒪᒥᐅᑎᑐᑦ ᒍᒨᕋᒥᐅᑎᑐᓪᓗ ᑍᒤᑕᐅᒐᔭᓚᐅᕐᐳᒍᑦ.”

ᐃᓴᕆᐊᓕᒥᐅᑦ ᐅᖃᐅᓰᓪᓗ ᑐᓴᕈᒥᓇᕐᑐᑦ

30ᖃᓄᕐᓕ ᑕᕝᕙ ᐅᖃᕐᑐᒃᓴᐅᓕᕐᐱᑖ? ᔫᑎᐅᖏᑦᑐᑦ ᐃᓗᐊᕐᓯᑎᑕᐅᓂᕐᒥᒃ ᕿᓂᓚᐅᖏᑦᑐᑦ ᐃᓗᐊᕐᓯᑎᑕᐅᓯᒪᓕᕐᐸᑕ, ᑕᕝᕙ ᐃᓗᐊᕐᑑᓂᕋᕐᑕᐅᓂᕐᒥᑦ ᐅᒃᐱᕐᓂᑯᑦ ᐱᔪᒥᒃ. 31ᐃᓴᕆᐊᓕᒥᐅᓪᓕ ᐃᓗᐊᕐᓯᑎᑕᐅᓂᕐᒥᒃ ᕿᓂᓚᐅᕐᑐᑦ ᐱᖁᔭᓂᒃ ᑐᓐᖓᕕᖃᕐᓂᒃᑯᑦ ᐃᓗᐊᕐᓯᑎᑕᐅᓚᐅᓐᖏᓚᑦ ᐱᖁᔭᑎᒍᑦ ᐱᔪᒥᒃ. 32ᓱᖕᒪᑦ ᐃᓗᐊᕐᓯᑎᑕᐅᓚᐅᓐᖏᓚᑦ? ᐅᒃᐱᕐᓂᑯᑦ ᕿᓂᓚᐅᖏᒻᒪᑕ, ᐱᓂᐊᕐᓂᒃᑯᓪᓕ ᕿᓂᓚᐅᕐᒪᑕ. ᑍᒤᒻᒪᑦ ᐹᓪᓚᓚᐅᕐᐳᑦ ᐅᔭᕋᖕᒧᑦ ᓈᑎᑕᐅᓪᓗᑎᒃ. 33#ᐂᓮᐊᓯ 28:16.ᐊᒡᓚᖕᓂ ᑎᑎᕋᕐᓯᒪᖕᒪᑦ,

“ᑕᑯᒋᑦ, ᓮᐅᓂᒥ ᐅᔭᕋᖕᒥᒃ ᐃᓕᓯᕗᖓ ᐃᓄᖕᓂᑦ ᐹᓪᓚᒍᑕᐅᔪᒫᕐᑐᒥᒃ,

ᑖᒃᑯᓂᖓ ᐅᔭᕋᒃ ᐅᕐᕈᑎᑦᓯᔪᒫᕐᐳᖅ; ᑖᑦᓱᒧᖓᓗ ᐅᒃᐱᕐᑐᖅ ᑲᓐᖑᓱᒃᑎᑕᐅᓂᐊᓐᖏᓚᖅ.”

Currently Selected:

ᕉᒪᒥᐅᓄᑦ 9: EAIB

Highlight

Copy

Compare