ᕉᒪᒥᐅᓄᑦ 4

ᐂᑉᕋᕼᐋᒻ ᐊᑦᔨᐅᑎᑕᐅᓂᖓ

1ᐂᑉᕋᕼᐋᒻ ᓯᕗᓕᕆᔭᕗᑦ ᖃᓄᖅ ᐅᖃᐅᓯᕆᔪᓐᓇᕐᐱᑎᒎ? ᓱᓇᒥᒃ ᑎᒥᒃᑯᑦ ᓇᓂᓯᓚᐅᕐᐸ? 2ᐂᑉᕋᕼᐋᒻᓕ ᐱᓂᐊᑦᓯᐊᕐᓂᕐᒥᓄᑦ ᐸᓯᔭᒃᓴᐅᔪᓐᓃᕐᑎᑕᐅᓚᐅᕈᓂ, ᐃᒻᒥᓂᒃ ᓂᕐᑐᕈᑎᒃᓴᖃᕋᔭᓚᐅᕐᐳᖅ, ᓂᕐᑐᕐᓇᑎᑕᐅᒐᔭᓐᖏᓚᕐᓕ ᒎᑎᐅᑉ ᓵᖓᓂ. 3#ᒨᓯᓯ ᓯᕗᓪᓖᑦ 15:6; ᒐᓔᑎ 3:6.ᖃᓄᕐᓕ ᐊᒡᓔᑦ ᐅᖃᕐᐹᑦ? “ᐂᑉᕋᕼᐋᒻ ᒎᑎ ᐅᒃᐱᕆᕚ, ᑕᒪᑐᒧᖓ ᒎᑎᐅᑉ ᐃᓗᐊᕐᑑᓂᕋᓚᐅᕐᐹ.” 4ᐃᓄᒃ ᐱᓇᓱᐊᕐᓂᕐᒥᓄᑦ ᑮᓇᐅᔭᕐᑖᕐᐸᖕᒪᑦ, ᑮᓇᐅᔭᕐᑖᖏᓪᓗ ᑐᓂᕐᕈᓯᐊᑐᐃᓐᓇᐅᓂᕋᕐᑕᐅᓐᖏᓚᑦ ᐊᑭᓕᕐᑕᐅᓂᒃᓴᒥᓄᑦ ᐱᖕᒪᒋᑦ. 5ᐃᓄᒡᓕ ᐅᒃᐱᕐᑐᖅ ᐱᓇᓱᐊᕐᓂᕐᒥᓄᑦ ᐱᓇᓂ; ᑕᑎᖃᕐᓗᓂᓗ ᒎᑎᒥᒃ ᐱᐅᖏᑦᑐᓕᔪᓂᒃ ᐸᓯᔭᒃᓴᐅᔪᓐᓃᕐᑎᑦᓯᔪᒥᒃ, ᐅᒃᐱᕐᓂᕐᒥᓄᑦ ᐃᓗᐊᕐᑑᓂᕋᕐᑕᐅᕗᖅ. 6ᑍᕕᑎᑦᑕᐅᖅ ᐅᖃᕆᕗᖅ ᑍᒫᑦᓮᓐᓇᖅ, ᐃᓄᒃ ᖁᕕᐊᓱᒍᑎᒃᓴᖃᕐᓂᕋᕐᓗᒍ ᒎᑎᒧᑦ ᐃᓗᐊᕐᑑᓂᕋᕐᑕᐅᔪᖅ, ᐱᓂᐊᑦᓯᐊᕐᓂᕐᒧᑦ ᐱᑦᔪᑎᖃᕋᓂ:

7 # ᐃᓐᖏᕈᑦ 32:1,2. “ᓮᒪᓇᕐᑐᒦᐳᑦ ᑍᒃᑯᐊ

ᐱᐅᖏᑦᑐᓕᓂᖏᓐᓂᒃ ᐃᓱᒪᒋᔪᓐᓁᕐᕕᐅᔪᑦ,

ᐊᔪᕐᓂᖏᓪᓗ ᐃᓱᒪᓇᕈᓐᓃᕐᑎᑕᐅᔪᑦ;

8ᐃᓄᒃ ᓮᒪᓇᕐᑐᒦᐳᖅ,

ᐊᑕᓂᐅᑉ ᐊᔪᕐᓂᖃᕈᓐᓃᕐᓂᕋᕐᑕᖓ.”

9ᖁᕕᐊᓱᒍᑎᒃᓴᖃᕐᓂᖅ ᑕᒪᓐᓇ ᑍᕕᑎᐅᑉ ᐅᖃᐅᓯᕆᔭᖓ ᑭᐱᔭᐅᓯᒪᔪᓄᑐᐊᖅ ᑐᕌᖓᕚ ᐅᕝᕙᓗ ᑭᐱᔭᐅᓯᒪᖏᑦᑐᓄᑦ ᑐᕌᖓᒋᕚ? ᐃᒫᒃ ᐅᖃᕋᑦᑕ ᐂᑉᕋᕼᐋᒻ ᐅᒃᐱᕐᓂᒃᑯᑦ ᐃᓗᐊᕐᓯᑎᑕᐅᓂᕋᑕᐅᓚᐅᕐᐳᖅ. 10ᓱᓇ ᐱᑦᔪᑎᒋᓪᓗᒍ ᑍᒤᓚᐅᕐᐹ? ᑍᒤᓚᐅᕐᐹ ᑭᐱᔭᐅᓯᒪᓕᕐᑎᓪᓗᒍ ᐅᕝᕙᓗ ᑭᐱᔭᐅᓚᐅᕐᑎᓐᓇᒍ? ᑭᐱᔭᐅᔭᕇᕐᓯᒪᑎᓪᓗᒍ ᑍᒤᓚᐅᓐᖏᓚᖅ, ᑭᐱᔭᐅᓚᐅᕐᑎᓐᓇᒍᓕ ᑍᒤᓚᐅᕐᐳᖅ. 11#ᒨᓯᓯ ᓯᕗᓪᓖᑦ 17:10.ᑭᐱᔭᐅᓂᖓᓕ ᓇᓗᓁᒃᑯᑕᐅᓚᐅᕐᐳᖅ ᓇᓗᓁᕐᓯᑦᔪᑕᐅᓪᓗᓂᓗ ᐃᓗᐊᕐᑑᓂᕋᕐᑕᐅᖕᒪᑦ ᐅᒃᐱᕐᓂᖅ ᐱᑦᔪᑎᒋᓪᓗᒍ, ᑭᐱᔭᐅᓚᐅᕋᓂ ᓱᓕ ᐱᓚᐅᕐᑕᒥᓄᑦ ᑕᒤᓐᓄᑦ ᐅᒃᐱᕐᑐᓄᑦ ᐊᑖᑕᒋᔭᐅᖁᓪᓗᒍ ᑭᐱᔭᐅᓯᒪᖏᑦᑑᒐᓗᐊᓄᑦ ᐃᓗᐊᕐᑑᓂᕋᕐᑕᐅᓂᕐᒥᒃ ᐱᖃᑕᐅᖁᓪᓗᒋᑦ. 12ᐊᑖᑕᒋᔭᐅᒋᕗᕐᓗ ᑭᐱᔭᐅᓯᒪᔪᓄᑦ ᑭᐱᔭᐅᓯᒪᓂᖏᑦ ᐱᑦᔪᑎᒋᓇᒋᑦ ᐅᒃᐱᕐᓂᒥᒍᓪᓕ ᐂᑉᕋᕼᐋᒻᑐᑦ ᓯᕗᓕᕕᓂᑦᑎᑐᑦ ᑭᐱᔭᐅᓚᐅᖅᑳᕋᓂ ᐃᓅᓯᕆᓚᐅᕐᑕᖓᓂᒃ ᒪᓕᖕᓂᖏᓐᓄᑦ.

ᒎᑎᐅᑉ ᐊᖏᕐᓯᒪᓂᖓ ᐱᑖᕆᔭᐅᕗᖅ ᐅᒃᐱᕐᓂᕐᒧᑦ ᑲᔪᓯᓂᒃᑯᑦ

13 # ᒨᓯᓯ ᓯᕗᓪᓖᑦ 17:4-6; 22:17,18; ᒐᓔᑎ 3:29. ᐂᑉᕋᕼᐋᒻ ᑭᖑᕚᖏᓪᓗ ᒎᑎᐅᑉ ᐊᖏᕐᕕᒋᓚᐅᕐᐰᑦ, ᓯᓚᕐᔪᐊᕐᒥᒃ ᐱᒃᓴᖃᕐᑎᓐᓂᐊᕐᓂᕋᕐᓗᒋᑦ ᐱᖁᔭᓂᒃ ᓈᓚᑦᓯᐊᕐᓂᕐᒥᖕᓄᑦ ᐱᑦᔪᑎᖃᕋᑎᒃ ᐃᓗᐊᕐᑑᓂᕋᕐᑕᐅᓂᕐᒥᒍᓪᓕ ᐅᒃᐱᕐᓂᕐᒥᖕᓄᑦ. 14#ᒐᓔᑎ 3:18.ᐱᖁᔭᓂᒡᓕ ᒪᓕᑦᓯᐊᕐᓂᕐᒧᑦ ᒎᑎᐅᑉ ᐊᖏᕐᓯᒪᓂᖓᓂᒃ ᐱᑎᑕᐅᒐᔭᕐᐸᑕ, ᐅᒃᐱᕐᓂᖅ ᑕᕝᕙ ᐊᑐᕈᓐᓃᕐᐳᖅ, ᒎᑎᐅᓪᓗ ᐊᖏᕐᓯᒪᓂᖓ ᐊᑐᕈᓐᓃᕐᓗᓂ. 15ᐱᖁᔧᑦ ᓈᓚᒃᑕᐅᖏᑉᐸᑕ ᒎᑎᐅᑉ ᓂᓐᖓᐅᓯᖓᓂᒃ ᓴᖅᑭᑎᑦᓯᖕᒪᑕ, ᐱᖁᔭᖃᖏᑦᑐᓂᓕ ᐱᖁᔭᓂᒃ ᓈᓚᖏᓐᓂᕐᑕᖃᓐᖏᓚᖅ.

16 # ᒐᓔᑎ 3:7. ᑍᒤᒻᒪᑦ ᒎᑎᐅᑉ ᐊᖏᕈᑖ ᐅᒃᐱᕐᓂᕐᒥᒃ ᑐᓐᖓᕕᖃᕐᐳᖅ, ᓇᓗᓁᕐᓯᒪᑦᓯᐊᖁᓪᓗᒍ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᑭᓯᐊᓂ ᐱᔭᐅᔪᓐᓇᕐᓂᖓᓂᒃ ᐂᑉᕋᕼᐋᒻ ᑭᖑᕚᓕᒫᖏᓐᓄᑦ, ᐱᖁᔭᓂᒃ ᒪᓕᒃᑐᓄᑦ ᑖᒃᑯᓄᖓᑑᖏᑦᑐᖅ ᐊᓯᖏᓐᓄᓪᓗᑦᑕᐅᖅ ᐂᑉᕋᕼᐋᒻᑐᑦ ᐅᒃᐱᕐᓂᖃᕐᑐᓄᑦ: ᐂᑉᕋᕼᐋᒻ ᑕᒪᑦᑕ ᐊᑖᑕᒋᒐᑦᑎᒍ, 17#ᒨᓯᓯ ᓯᕗᓪᓖᑦ 17:5.ᐊᒡᓔᑦ ᐅᖃᕐᒪᑕ, “ᐃᓅᖃᑎᒌᒡᔪᐊᓄᑦ ᐊᒥᓱᓄᑦ ᐊᑖᑕᒋᔭᐅᓕᕐᑎᑉᐸᒋᑦ.” ᒎᑎᐅᑉ ᓵᖓᓂ ᑖᑦᓱᒪ ᐅᒃᐱᕐᕕᒋᔭᖓᑕ, ᑖᑦᓱᒪ ᑐᖁᖓᔪᑦ ᐆᒻᒪᕐᑎᑉᐰᑦ ᐱᖁᔨᓂᕐᒥᓄᓪᓗ ᓴᖅᑭᔮᓚᐅᖏᑦᑐᓂᒃ ᓴᖅᑭᑎᑦᓯᓯᒪᓪᓗᓂ. 18#ᒨᓯᓯ ᓯᕗᓪᓖᑦ 15:5.ᓂᕆᐅᖕᓂᖃᓚᐅᕐᐳᖅ ᐅᒃᐱᕐᓂᒃᑯᑦ ᓂᕆᐅᒋᔭᒃᓴᑕᖃᕐᑎᓐᓇᒍ, ᐊᑖᑕᒋᔭᐅᔪᒫᕐᓂᕐᒥᓂᒃ ᐃᓅᖃᑎᒌᒡᔪᐊᓄᑦ ᐊᒥᓱᓄᑦ; ᐅᖃᐅᑦᔭᐅᓚᐅᕋᒥ, “ᑍᒫᒃᑕᐅᖅ ᑭᖑᕚᑎᑦ ᐅᓄᕐᑐᕐᔪᐊᖑᔪᒫᕐᐳᑦ.” 19#ᒨᓯᓯ ᓯᕗᓪᓖᑦ 17:17.ᐅᒃᐱᕐᓂᕐᒥ ᓴᓐᖐᓕᓚᐅᓐᖏᓚᖅ ᑎᒥᓂ ᐃᓱᒪᒋᓗᒍ, ᑐᖁᖓᔪᑐᑦ ᑍᒤᑲᓴᓕᕋᓗᐊᕐᓗᓂ ᐊᕐᕌᒍᖃᓕᓚᐅᕋᒥ 100 ᖃᓂᒋᔮᓂ, ᓄᓕᐊᓂ ᓵᕋ ᐃᓱᒫᓘᑎᒋᓚᐅᓐᖏᓛ ᕿᑐᕐᖏᓱᐃᑦᑑᑎᓪᓗᒍ. 20ᐅᒃᐱᕈᓱᑎᐊᖏᓐᓂᕐᒥᒃ ᓴᖑᑦᔪᑎᖃᓚᐅᓐᖏᓚᖅ ᒎᑎᐅᑉ ᐊᖏᕈᑎᒋᓯᒪᔭᖓᓂᒃ, ᐅᒃᐱᕐᓂᒥᒍᑦ ᓴᓐᖏᔫᓕᕐᐸᓪᓕᐊᓚᐅᕐᐳᖅ ᒎᑎᒥᒃ ᓂᕐᑐᕐᓇᕐᑎᑦᓯᓂᕐᒥᓄᑦ, 21ᓱᓕᔪᕐᓴᑦᓯᐊᓚᐅᕐᐳᖅ ᒎᑎ ᐊᖏᕈᑎᒋᓯᒪᔭᒥᓂᒃ ᑲᔪᓯᑦᓯᐊᕈᓐᓇᕐᓂᖓᓂᒃ. 22ᑍᒤᒻᒪᑦ ᐂᑉᕋᕼᐋᒻ ᐅᒃᐱᕐᓂᒃᑯᑦ, “ᐃᓗᐊᕐᓯᑎᑕᐅᓂᕋᑕᐅᓚᐅᕐᐳᖅ.” 23ᐅᖃᐅᓯᕐᓕ ᐃᒤᓕᔪᖅ, “ᐃᓗᐊᕐᑑᓂᕋᕐᑕᐅᓚᕐᐳᖅ.” ᑎᑎᕋᕐᑕᐅᓯᒪᕗᖅ ᑖᓐᓇᑐᐊᖅ ᐱᑦᔪᑎᒋᓇᒍ, 24ᐅᕙᒍᓪᓕᑦᑕᐅᖅ ᐱᑦᔪᑎᒋᓪᓗᑕ. ᒎᑎᒧᑦ ᐃᓗᐊᕐᑑᓂᕋᕐᑕᐅᖁᓪᓗᑕ ᑖᑦᓱᒧᖓ ᐅᒃᐱᕐᑐᒍᑦ ᑐᖁᒥᑦ ᒪᑭᑎᑦᓯᓯᒪᓂᖓᓂᒃ ᐊᑕᓂᑦᑎᓐᓂᒃ ᔩᓱᓯᒥᒃ, 25#ᐂᓮᐊᓯ 53:4,5.ᑖᓐᓇ ᑐᖁᑕᐅᓚᐅᕐᐳᖅ ᐊᔪᕐᓂᕗᑦ ᐱᑦᔪᑎᒋᓪᓗᒋᑦ ᒪᑭᑎᑕᐅᓚᐅᕆᕗᖅ ᒎᑎᒧᑦ ᐸᓯᔭᒃᓴᐅᔪᓐᓃᖁᓪᓗᑕ.

Currently Selected:

ᕉᒪᒥᐅᓄᑦ 4: EAIB

Highlight

Copy

Compare