ᕉᒪᒥᐅᓄᑦ 11
11
ᒎᑎᐅᑉ ᓂᑲᒍᓱᖕᓂᖓ ᐃᓴᕆᐊᓕᒥᐅᓂᒃ
1 #
ᐱᓕᐱ 3:5. ᐊᐱᕆᓕᕐᐳᖓᓕ, ᒎᑎᐅᑉ ᓇᕐᕈᒋᓕᕐᐰᑦ ᐃᓄᖁᑎᓃ? ᑍᒤᓐᖏᓚᖅ! ᐅᕙᖓᑦᑕᐅᖅ ᐃᓴᕆᐊᓕᒥᐅᖑᕗᖓ, ᐂᑉᕋᕼᐋᒻᒧᓪᓗ ᑭᖑᕚᕆᔭᐅᓪᓗᖓ, ᐱᓐᔭᒥᓂᒃᑯᑦ ᐃᓚᒌᓂᖏᓐᓂ ᑭᖑᕚᕆᔭᐅᕗᖓ. 2ᒎᑎᐅᑉ ᐃᓄᖁᑎᓂ ᓇᕐᕈᒋᓕᓐᖏᓔᑦ ᐱᒋᐊᕐᓂᖓᓂᑦ ᓂᕈᐊᕐᓯᒪᒐᒥᒋᑦ. ᖃᐅᔨᒪᓐᖏᓚᑏᑦ? ᐊᒡᓔᑦ ᐅᖃᐅᓯᖃᕐᒪᑕ ᐃᓔᑦᔭᐅᑉ ᑐᒃᓯᐊᕐᓂᕆᓚᐅᕐᑕᖓᓂᒃ ᒎᑎᒧᑦ ᐃᓴᕆᐊᓕᒥᐅᑦ ᐸᓯᓪᓗᓂᒋᑦ ᐃᒤᓕᓚᐅᕐᒪᑦ: 3#ᐊᑕᓃᑦ ᓯᕗᓪᓖᑦ 19:10,14.“ᐊᑕᓃᖅ, ᓇᓚᐅᑦᑍᔪᖁᑎᑎᑦ ᑐᖁᕋᕐᐰᑦ, ᑐᓂᕐᕈᓯᕐᕕᖁᑎᑎᓪᓗ ᓯᖁᑦᑎᕐᓗᒋᑦ, ᐅᕙᖓᑐᐊᖅ ᐊᒥᐊᒃᑰᓕᕐᐳᖓ, ᑐᖁᓐᓇᓱᐊᕐᐹᖓᓗ.” 4#ᐊᑕᓃᑦ ᓯᕗᓪᓖᑦ 19:18.ᖃᓄᕐᓕ ᒎᑎᐅᑉ ᑭᐅᓚᐅᕐᐸᐅᒃ? “ᓴᐳᑦᔨᓯᒪᕗᖓ ᐃᓄᖕᓂᒃ 7,000ᓂᒃ ᑐᒃᓯᐊᕐᕕᖃᓚᐅᖏᑦᑐᓂᒃ ᒎᑎᓐᖑᐊᒧᑦ ᐰᓕᒧᑦ.” 5ᑍᒫᑦᓮᓐᓇᕐᑕᐅᖅ ᒫᓐᓇ ᐊᒥᐊᒃᑯᑕᖃᕆᕗᖅ, ᒎᑎᐅᑉ ᐱᔪᓐᓇᕐᑎᑦᓯᓂᕐᒥᒍᑦ ᓂᕈᐊᕐᓯᒪᔭᖏᓐᓂᒃ. 6ᐱᑦᓯᐊᕐᓂᕐᒥ ᐱᔪᓐᓇᕐᑎᑦᓯᓂᕐᒥᒍᑦ ᐱᓇᓱᐊᕈᓂ, ᑕᕝᕙ ᐱᓂᐊᕐᓂᕐᒥᒃ ᑐᓐᖓᕕᖃᕐᓗᓂ ᐱᓇᓱᐊᓐᖏᓚᖅ; ᑍᒤᓐᖏᑐᐊᕐᐸᓪᓕ ᑕᕝᕙ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᐱᔪᓐᓇᕐᑎᑦᓯᓂᐅᔪᓐᓃᕋᔭᕐᐳᖅ.
7ᖃᓄᕐᓕ ᑍᒪ? ᐃᓴᕆᐊᓕᒥᐅᑦ ᕿᓂᕐᑕᒥᖕᓂᒃ ᐱᖏᒻᒪᑕ, ᒎᑎᐅᓪᓕ ᓂᕈᐊᕐᓯᒪᔭᖏᑕ ᑭᓯᒥ ᐅᓄᖏᑦᑐᑦ ᓇᓂᕚᑦ; ᐊᓯᖏᓪᓕ ᐱᔭᕐᓂᖏᑦᑑᓇᓱᐊᕐᐳᑦ. 8#ᒨᓯᓯ ᑕᓪᓕᒪᖏᑦ 29:4; ᐂᓮᐊᓯ 29:10.ᑎᑎᕋᕐᓯᒪᖕᒪᑦ, “ᒎᑎᐅᑉ ᑐᓂᓯᕕᒋᕔᑦ ᐊᓂᕐᓂᕐᒥᒃ ᐋᖓᔮᕐᑐᑐᑦ ᑍᒤᓐᓇᕐᑐᒥᒃ, ᐃᔨᒥᖕᓄᑦ ᑕᑯᖁᓇᒋᑦ ᓯᐅᑎᒥᖕᓄᓪᓗ ᑐᓴᖁᓇᒋᑦ, ᐅᓪᓗᒥᒧᑦ ᑎᑭᓪᓗᒍ.” 9#ᐃᓐᖏᕈᑦ 69:22,23.ᑍᕕᑎᓗ ᐅᖃᕐᒥᖕᒪᑦ,
“ᓂᕆᕝᕕᖏᑦ ᓂᒐᕐᕕᐅᓕᕐᓕᑦ ᒥᑭᒋᐊᕐᕕᐅᓕᕐᓗᑎᒃᓗ,
ᐹᓪᓚᒡᕕᒃᓴᐅᓕᕐᓕᑦ ᓱᒋᐊᕐᑕᐅᑦᔪᑎᒃᓴᐅᓗᑎᒡᓗ ᑖᒃᑯᓄᖓ;
10ᐃᔨᖏᑦ ᑕᒃᐲᑎᑕᐅᓕᑦ ᑕᑯᖁᓇᒋᑦ,
ᕿᒥᕐᓗᖏᑦ ᐱᕆᖓᓕᕐᓗᑎᒃ ᐃᓱᖃᖏᑦᑐᒧᑦ.”
11ᐊᐱᕆᓕᕐᐳᖓ, ᐹᓪᓚᒃᓯᒪᕚᑦ ᒪᑭᒃᑲᓐᓂᕐᓂᐊᕈᓐᓃᕐᓗᑎᒃ? ᑍᒤᓐᖏᓚᖅ! ᐃᒫᒡᓕ ᐊᔪᕐᑐᓕᓯᒪᓂᖏᓐᓄᑦ ᐱᐅᓕᔭᐅᓂᖅ ᔫᑎᐅᖏᑦᑐᓄᑦ ᐱᑎᑕᐅᕗᖅ, ᐃᓴᕆᐊᓕᒥᐅᑦ ᑐᓱᓂᕐᒧᑦ ᓯᓇᓕᖁᓪᓗᒋᑦ. 12ᔫᑎᑦ ᐊᔪᕐᑐᓕᓂᖏᑦ ᓯᓚᕐᔪᐊᕐᒥᐅᓂᒃ ᐊᖏᔪᒥᒃ ᓮᒻᒪᕐᑎᑦᓯᑦᔪᑕᐅᒃᐸᑕ, ᐊᓂᕐᓂᒃᑯᓪᓗ ᐱᔭᒃᓴᒥᖕᓂᒃ ᐊᓯᐅᔨᓂᖓᑦ ᔫᑎᐅᖏᑦᑐᓄᑦ ᐊᖏᔪᒥᒃ ᓮᒻᒪᕐᑎᑦᓯᑦᔪᑕᐅᒃᐸᑦ, ᑕᕝᕙᓕ ᐊᑕᖏᕐᑐᒥᒃ ᐱᖃᑕᐅᓕᑐᐊᕈᑎᒃ ᐊᖏᓂᕐᓴᒥᒃ ᓮᒻᒪᕐᑎᑕᐅᔪᒫᕐᐳᑦ!
ᔫᑎᐅᖏᑦᑐᑦ ᐱᐅᓕᔭᐅᓂᒃᓴᖓᑦ
13ᐃᓕᑦᓯᓕ ᔫᑎᐅᖏᑦᑐᓯ ᐅᖃᕐᕕᒋᕙᑦᓯ; ᐋᐴᓯᑕᓕᐅᒐᒪ ᔫᑎᐅᖏᑦᑐᓄᑦ, ᑕᒪᓐᓇ ᐱᔨᑦᓯᕐᓂᕋ ᓂᕐᑑᑎᒋᓂᐊᕐᐸᕋ. 14ᔫᑎᐅᖃᑎᒃᑲ ᑐᓱᓵᕐᓗᒋᑦ ᐱᔭᐅᖏᓐᓂᕐᓕᐅᓕᖁᓪᓗᒋᑦ, ᓇᓪᓕᐊᑦ ᐱᐅᓕᔭᐅᔪᓐᓇᓯᖁᓪᓗᒍ. 15ᓇᕐᕈᓂᖏᓐᓄᑦ ᓯᓚᕐᔪᐊᕐᒥᐅᑦ ᒎᑎᒥᒃ ᐃᓚᓐᓈᖃᓕᕐᑎᑕᐅᒃᐸᑕ, ᖃᓄᐃᓕᕋᔭᕐᐸᓪᓖ ᐃᓚᓕᐅᕆᓕᕐᐸᑕ? ᐃᓅᓯᕐᑖᕐᑎᑦᓯᒐᔭᕐᐳᑦ ᑐᖁᒥᑦ.
16ᓂᐊᖂᔭᖅ ᓯᕗᓪᓕᕐᐹᖅ ᑐᓂᕐᕈᑕᐅᔪᖅ ᒎᑎᒧᑦ ᐃᑦᔪᕐᓁᑉᐸᑦ, ᓂᐊᖂᔭᒃᓴᓕᒫᕐᑕᐅᖅ ᑕᕝᕙ ᐃᑦᔪᕐᓁᑦᑑᒋᕗᖅ; ᓇᐹᕐᑑᑉ ᐊᒫᖏᑦ ᐃᑦᔪᕐᓁᑉᐸᑕ, ᐊᕙᓚᖓᔪᖏᑦᑕᐅᖅ ᑕᕝᕙ ᐃᑦᔪᕐᓁᑦᑑᒐᔭᕆᕗᑦ. 17ᓇᐹᕐᑑᓪᓕ ᐊᕙᓚᖓᔪᖏᑕ ᐃᓚᖏᑦ ᓇᑲᓯᒪᒃᐸᑕ, ᓇᐹᕐᑐᑉ ᐅᕐᓱᒃᓴᓕᖕᓂᒃ ᐸᐅᕐᖓᖃᕐᑑᑉ ᐊᕙᓚᖓᔪᖏᑦ ᐃᕕᕐᑎᑕᐅᒃᐸᑕ ᓇᑲᓯᒪᔫᑉ ᐃᓂᖓᓄᑦ; ᑕᕝᕙ ᐅᕐᓱᒃᓴᓕᖕᓂᒃ ᐸᐅᕐᖓᓕᐅᑉ ᐃᑦᑎᖓᓂᒃ ᐱᖃᑕᐅᓂᐊᕐᐳᑦ ᐱᕈᑦᓯᐊᕐᓇᕐᑐᒥᒃ. 18ᑍᒤᒻᒪᑦ ᓇᕐᕈᓕᕐᓂᐊᕐᓇᒃ ᓇᐹᕐᑑᑉ ᐊᕙᓚᖓᔪᖏᓐᓂᒃ ᓇᑲᓯᒪᔪᓂᒃ. ᓂᕐᑑᑎᓕᕈᕕᑦ ᐃᖅᑲᐅᒪᒋᑦ ᓇᐹᕐᑐᒥᒃ ᓂᕆᑎᑦᓯᖏᓐᓇᕕᑦ, ᓇᐹᕐᑑᓪᓕ ᐊᒫᖏᓐᓂᑦ ᓂᕆᑎᑕᐅᑐᐃᓐᓇᕐᐳᑎᑦ.
19ᐅᖃᕋᔭᕐᐳᑎᓪᓕ, “ᓇᐹᕐᑑᑉ ᐊᕙᓚᖓᔪᖏᑦ ᓇᑲᓚᐅᕐᐳᑦ ᑕᕝᕗᖓ ᐃᓂᖓᓄᑦ ᐃᓕᔭᐅᔪᓐᓇᖁᓪᓗᖓ.” 20ᑕᒪᓐᓇ ᓱᓕᕗᖅ. ᑍᒃᑯᐊᓕ ᓇᑲᑕᐅᓚᐅᕐᐳᑦ ᐅᒃᐱᖏᓐᓂᖏᓐᓄᑦ, ᐃᕝᕕᓪᓕ ᓇᖏᕐᐳᑎᑦ ᐅᒃᐱᕐᓂᒃᑯᑦ ᑭᓯᐊᓂ. ᑍᒤᒻᒪᑦ ᐱᐅᔪᕆᓕᕐᓂᐊᕐᓇᒃ, ᓯᕘᕋᓗᑎᓪᓕ ᓂᑯᕕᖓᒋᑦ. 21ᓇᐹᕐᑑᑉ ᐊᕙᓚᖓᔪᑐᖃᖏᑦ ᒎᑎᐅᑉ ᐊᓐᓂᕆᓚᐅᖏᒻᒪᒋᑦ, ᐃᕝᕕᑦᑕᐅᖅ ᐊᓐᓂᕆᒐᔭᖏᓐᓂᕚᑎᑦ. 22ᑕᕝᕙ ᒎᑎᐅᑉ ᐱᑦᓯᐊᕐᓂᖓ ᐃᓕᕋᓇᕐᓂᖓᓗ ᑕᕝᕘᓇ ᑕᑯᕙᕗᑦ; ᐃᓕᕋᓇᕐᓂᖓ ᐅᕐᕈᓯᒪᔪᓄᑦ, ᒎᑎᐅᓪᓗ ᐱᑦᓯᐊᕐᓂᖓ ᐃᓕᖕᓄᑦ, ᐱᑦᓯᐊᕐᓂᖓᓃᖏᓐᓇᕈᕕᑦ; ᑍᒤᖏᒃᑯᕕᓪᓕ ᓇᑲᑕᐅᔪᒫᕆᕗᑎᑦ. 23ᑍᒃᑯᐊ ᐅᒃᐱᖏᑦᑑᓇᓱᐊᕈᓐᓃᕐᐸᑕ, ᐅᑎᕐᑎᑕᐅᔪᒫᕆᕗᑦ, ᒎᑎ ᐱᔪᓐᓇᕐᓂᖃᕐᒪᑦ ᐅᑎᕐᑎᑦᓯᔪᓐᓇᕐᓗᓂ ᐃᓂᒋᓚᐅᕐᑕᖏᓐᓄᑦ. 24ᐃᕝᕕᓪᓕ ᓇᑲᑕᐅᓯᒪᔪᑎᑦ ᓇᐹᕐᑐᒥᑦ ᐅᕐᓱᒃᓴᓕᖕᓂᒃ ᐃᒻᒥᓂᒃ ᐱᕈᕐᑐᓂᑦ, ᐃᓚᒋᔭᐅᓇᒡᓗ ᓇᐹᕐᑐᒧᑦ, ᑕᕝᕙᓐᖓᓪᓗ ᐱᕈᕐᓯᒪᓇᒃ, ᐃᕕᕐᑎᑕᐅᓯᒪᑐᐃᓐᓇᕐᓗᑎᑦ ᓇᐹᕐᑐᒧᑦ ᐅᕐᓱᒃᓴᓕᖕᓂᒃ, ᐱᔭᕆᐊᑭᓐᓂᕐᓴᒻᒪᕆᐅᒐᔭᕐᐳᕐᓕ ᓇᐹᕐᑑᑉ ᑖᑦᓱᒪ ᐊᕙᓚᖓᔪᖏᑦ ᓇᑲᓯᒪᔪᑦ ᐃᓂᒋᓚᐅᕐᑕᒥᖕᓄᑦ ᐃᕕᕐᑎᑦᓴᕆᐊᖏᑦ ᓇᐹᕐᑐᒧᑦ ᑖᑦᓱᒧᖓ.
ᒎᑎᐅᑉ ᓂᑲᒍᓱᖕᓂᖓ ᐃᓄᓕᒫᓂᒃ
25ᒪᑐᒥᖓ ᓇᓗᓇᕐᑐᒥᒃ ᑐᑭᓯᖁᕙᑦᓯ, ᐅᒃᐱᕐᑑᖃᑎᒃᑳ, ᐃᓕᑦᓯᓐᓂᒃ ᓯᓚᑐᓇᓱᒋᖁᓇᓯ: ᐃᓴᕆᐊᓕᒥᐅᑦ ᓯᑎᑎᑕᐅᓂᖓ ᓄᖑᔪᒫᕐᒪᑦ ᔫᑎᐅᖏᑦᑐᑦ ᒎᑎᒧᐊᕐᑐᑦ ᐅᓄᕐᓂᖏᑦ ᓈᒻᒪᓕᕐᐸᑕ, 26#ᐂᓮᐊᓯ 59:20,21.ᑕᕝᕙ ᐃᓴᕆᐊᓕᒥᐅᓕᒫᑦ ᐱᐅᓕᔭᐅᔪᒫᕐᐳᑦ; ᑎᑎᕋᕐᓯᒪᖕᒪᑦ,
“ᐱᐅᓕᔨ ᓮᐅᓂᒥᑦ ᑎᑭᑦᓱᒫᕐᐳᖅ,
ᒎᑎᖃᖏᓐᓂᕐᓗ ᐲᔭᕈᒫᕐᐹ ᔧᑰᑉ ᑭᖑᕚᖏᓐᓂᑦ.
27 #
ᐂᓮᐊᓯ 27:9. ᐃᒫᒡᓗ ᐊᖏᖃᑎᒌᒍᑎᓕᐅᕈᒫᕐᐳᖓ ᑖᒃᑯᓄᖓ,
ᐊᔪᕐᓂᖏᑦ ᐲᔭᕈᒃᑭᑦ.”
28ᐅᖃᐅᓰᑦ ᑐᓴᕈᒥᓇᕐᑐᑦ ᐱᑦᔪᑎᒋᓪᓗᒋᑦ ᒎᑎᒥᒃ ᐊᑭᕋᕐᑐᕐᑎᐅᕗᑦ, ᐱᑦᔪᑎᒋᓪᓗᓯ; ᓂᕈᐊᕐᑕᐅᓯᒪᓂᖏᓪᓕ ᐱᑦᔪᑎᒋᓪᓗᒋᑦ ᓇᒡᓕᒋᔭᐅᕗᑦ ᓯᕗᓕᕕᓂᖏᑦ ᐱᑦᔪᑎᒋᓪᓗᒋᑦ. 29ᒎᑎᐅᑉ ᑐᓂᕐᕈᑎᓂ ᕾᖁᔨᓂᓂᓗ ᐊᓯᑦᔨᕐᓯᒪᖏᒻᒪᒋᑦ. 30ᐃᓕᑦᓯᑦᑕᐅᖅ ᒎᑎᒥᒃ ᓈᓚᖏᑦᑑᓚᐅᕋᑦᓯ ᒫᓐᓇᓕ ᓂᑲᒋᔭᐅᓚᕿᕗᓯ ᑍᒃᑯᐊ ᓈᓚᖏᓐᓂᖏᓐᓄᑦ, 31ᑍᒃᑯᐊ ᒫᓐᓇ ᒎᑎᒥᒃ ᓈᓚᖏᓐᓂᖓᑦ ᐱᑦᔪᑎᖃᕐᐳᖅ ᓂᑲᒋᔭᐅᓚᐅᕐᓂᑦᓯᑐᑦ ᓂᑲᒋᔭᐅᓕᕈᒫᕐᒥᖕᒪᑕ. 32ᒎᑎᐅᑉ ᐃᓄᓕᒫᑦ ᓈᓚᖏᓐᓂᕐᒦᑎᓚᐅᕐᐰᑦ, ᑕᒪᕐᒥᒃ ᓂᑲᒋᔪᒪᓪᓗᒋᑦ.
ᒎᑎᒥᒃ ᓂᕐᑐᐃᓂᖅ
33 #
ᐂᓮᐊᓯ 55:8. ᐊᖏᔪᕐᔪᐊᖑᕗᖅ ᒎᑎᐅᑉ ᐊᔪᕐᓴᖏᑦᑐᕐᔫᓂᖓ! ᐃᑎᔪᕐᔪᐊᖑᓪᓗᓂᓗ ᓯᓚᑐᓂᖓ ᖃᐅᔨᒪᓂᕐᔪᐊᖓᓗ! ᑖᑦᓱᒪ ᑐᑭᑖᕆᓯᒪᔭᖏᑦ ᑭᐊ ᓇᓗᓁᔭᕈᓐᓇᕐᐰᑦ ᐱᓂᐊᕐᓂᖏᓪᓗ ᑭᐊ ᑐᑭᓯᔪᓐᓇᕐᐰᑦ?
34 #
ᐂᓮᐊᓯ 40:13. “ᑭᐊ ᐊᑕᓂᐅᑉ ᐃᓱᒪᖓ ᖃᐅᔨᒪᕙᐅᒃ
ᐅᕝᕙᓗ ᑭᐊ ᐃᓱᒪᓕᐅᕈᓐᓇᕐᐸᐅᒃ?
35 #
ᔫᐱ 41:11. ᑭᐊᓗ ᑐᓂᕐᕈᒻᒥᒃ ᑐᓂᓯᕕᒋᓯᒪᕙᐅᒃ,
ᐊᑭᓖᔭᕆᐊᖃᓕᕐᑎᓪᓗᓂᐅᒃ?”
36 #
1 ᑯᕆᓐᑎ 8:6. ᑖᑦᓱᒪᓐᖓᑦ ᑖᑦᓱᒨᓇᓗ ᓱᓇᓕᒫᑦ ᐱᓐᖑᕐᑎᑕᐅᓯᒪᖕᒪᑕ, ᑖᓐᓇ ᓂᕐᑐᕐᑕᐅᓕ ᐃᓱᖃᖏᑦᑐᒧᑦ. ᐋᒥᓐ.
Currently Selected:
ᕉᒪᒥᐅᓄᑦ 11: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
