ᐃᓐᖏᕈᑎᑦ 92
92
ᐃᓐᖏᕈᓯᖅ ᐊᑕᓂᖅ ᓂᕐᑐᕐᑕᐅᖁᓪᓗᒍ
ᐃᓐᖏᕈᓯᖅ ᓴᐸᑎ ᐱᑦᔪᑎᒋᓪᓗᒍ
1ᐊᑕᓂᖅ ᖁᔭᒋᓗᒍ ᑕᒪᓐᓇ ᐱᐅᔫᕗᖅ,
ᐊᑏᓪᓗ ᓂᕐᑐᕐᓗᒍ ᐃᓐᖏᕐᕕᒋᓗᑎᑦ ᖁᑦᓯᖕᓂᕐᐹᖑᔪᑎᑦ.
2ᐅᓪᓛᒃᑯᑦ ᓇᓗᓁᕐᓗᒍ ᓇᒡᓕᖕᓃᑦ ᓱᖁᓯᔪᐃᑦᑐᖅ,
ᐅᓐᓄᒃᑯᓪᓗ ᑲᔪᓯᑦᓯᐊᕐᓃᑦ ᐅᖃᐅᓯᕆᓗᒍ,
3ᓂᓪᓕᐊᔪᓐᓇᕐᑐᓂᒃ ᐊᑐᕐᓗᓂ ᑯᑭᑦᑕᐸᐅᑎᓂᒃ ᓄᖃᕐᑎᓕᖕᓂᒃ,
ᑯᑭᑦᑕᐸᐅᑎᐅᔭᓂᒡᓗ ᕼᐋᕐᐱᓂᒃ, ᓂᐱᑦᓯᐊᕆᒃᑐᓂᒡᓗ ᑯᑭᑦᑕᐹᓂᒃ ᓔᕆᓂᒃ.
4ᐊᑕᓃᖅ ᐱᓇᓱᐊᕐᓂᕐᓄᑦ ᖁᕕᐊᓱᒃᑎᓐᓇᕕᖓ,
ᐱᓇᓱᐊᕐᓯᒪᓃᑦ ᐱᑦᔪᑎᒋᓗᒍ ᐃᓐᖏᕐᓂᐊᕐᐳᖓ ᖁᕕᐊᓱᒡᓗᖓ.
5ᐊᑕᓃᖅ ᐱᓇᓱᐊᕐᓂᑎᑦ ᐃᓛᒃ ᐊᖏᔪᕐᔪᐊᖑᕗᑦ!
ᐃᓱᒪᑎᓪᓗ ᐃᑎᔪᕐᔪᐊᖑᓪᓗᑎᒃ!
6ᐃᒃᐱᒍᓱᖏᑦᑑᑉ ᑕᒪᓐᓇ ᖃᐅᔨᒪᓐᖏᓛ,
ᓯᓔᑦᑑᓪᓗ ᑐᑭᓯᔪᓐᓇᕋᓂᐅᒃ.
7ᐱᐅᖏᑦᑐᑦ ᐱᕈᓕᕐᐸᑕ ᐃᕕᒃᓱᒃᑲᑎᑐᑦ,
ᐊᔪᕐᑐᓕᔪᓪᓗ ᑕᒪᕐᒥᒃ ᓴᖅᑭᓕᕐᐸᑕ ᐱᕈᕐᕕᐅᓕᕐᑐᑎᑐᑦ,
ᑖᒃᑯᐊ ᓯᕗᓂᒃᓴᖃᓕᕇᕐᐳᑦ ᐊᓯᕈᕐᑕᐅᕕᒃᓴᒥᖕᓂᒃ ᐃᓱᖃᖏᑦᑐᒧᑦ.
8ᐃᕝᕕᓪᓕ ᐊᑕᓃᖅ ᖁᑦᓯᖕᓂᕐᐹᖑᕗᑎᑦ ᐃᓱᖃᖏᑦᑐᒧᑦ.
9ᑕᑯᓚᐅᒃᑭᑦ ᐊᑭᕋᕐᑐᕐᑎᑎᑦ ᐊᑕᓃᖅ,
ᑕᑯᒋᑦ ᐊᑭᕋᕐᑐᕐᑎᑎᑦ ᓄᖑᔪᒫᕐᐳᑦ; ᐱᐅᖏᑦᑐᓕᒫᑦ ᐊᕕᑎᑕᐅᓗᑎᒃ.
10ᓇᒡᔪᒐᓕ ᐊᖏᔪᕈᕐᑎᓚᐅᕐᐸᑦ ᐃᒻᒧᒃᓯᐅᒐᐅᑉ
ᐸᖕᓂᖓᑐᑦ ᓴᓐᖏᑎᒋᓕᕐᑎᓪᓗᒍ;
ᐅᕐᓱᒥᒡᓗ ᓄᑖᒥᒃ ᑯᕝᕕᕆᓚᐅᕐᐸᕐᒪ.
11ᐊᑭᕋᕐᑐᕐᑎᒪ ᑲᑕᖕᓂᖏᓐᓂᒃ ᑕᑯᓯᒪᓕᕐᐳᖓ;
ᐱᐅᖏᑦᑐᑦ ᐊᑭᕋᕐᑐᕐᑐᑦ ᐅᕙᓐᓂᒃ ᓱᒋᐊᕐᑕᐅᓂᒃᓴᖏᓐᓂᒃ
ᓇᖕᒥᓂᖅ ᑐᓴᕐᓯᒪᕗᖓ.
12ᐃᓱᐊᕐᑐᓕᔪᑦ ᐱᕈᕐᓂᐊᕐᐳᑦ ᓇᐹᕐᑐᑎᑐᑦ ᐹᒥᑎᑐᑦ,
ᐱᕈᕐᓂᐊᕐᐳᑦ ᓇᐹᕐᑐᑎᑐᑦ ᓰᑕᕆᑎᑐᑦ ᓕᐸᓇᓂᒦᑦᑐᑎᑐᑦ.
13ᑲᓐᖓᕐᓲᑎᒋᔭᐅᓯᒪᖕᒪᑕ ᐊᑕᓂᐅᑉ ᐃᒡᓗᖓᓂ,
ᐱᕈᓕᕐᓂᐊᕐᐳᑦ ᒎᑎᑦᑕ ᐃᒡᓗᖓᑕ ᐊᕙᑖᓃᑦᑐᒥ.
14ᐃᓄᑐᖃᐅᓕᕋᓗᐊᕈᑎᒃ ᓱᓕ ᐱᕈᕐᑐᖃᕈᒫᕐᐳᑦ,
ᓄᑖᖑᐃᓐᓇᕐᓂᐊᕐᐳᑦ ᐱᕈᕐᕕᐅᑦᓯᐊᕐᓗᑎᒡᓗ,
15ᓇᓗᓁᕐᓯᖁᓪᓗᒋᑦ ᐊᑕᓂᖅ ᐃᓱᐊᕐᑑᖕᒪᑦ;
ᕾᕐᑐᕆᔭᕋ, ᑖᑦᓱᒪᓂᓗ ᐃᓱᐃᓐᓂᕐᑕᖃᓐᖏᓚᖅ.
Currently Selected:
ᐃᓐᖏᕈᑎᑦ 92: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
