ᐃᓐᖏᕈᑎᑦ 55
55
ᒎᑎᒥᒃ ᑕᑎᖃᕐᓂᖅ ᐃᓚᓐᓇᕆᔭᒧᑦ ᐸᓯᔭᐅᓂᖅ ᐱᓪᓗᒍ
ᑍᕕᑎᐅᑉ ᐃᓐᖏᕈᑖ
1ᑐᒃᓯᐊᕐᓂᕋ ᓈᓚᓚᐅᕈᒃ ᒎᑏ,
ᑲᒪᒋᓐᖏᓯᕐᑐᕐᓂᐊᕐᓇᒍᓗ ᕿᓄᓂᕋ.
2ᑐᓴᓚᐅᓐᖓ ᑭᐅᓗᖓᓗ;
ᐃᓱᒪᒋᔭᒪ ᐃᓱᐊᓐᖏᑎᒻᒪᖓ ᐃᓱᒪᔮᕐᓗᖓᓗ,
ᐅᖁᒤᒃᓴᕐᓂᕐᒧᓪᓗ ᓂᐱᖅᑯᕐᑐᓪᓗᖓ ᓂᓪᓕᐊᕗᖓ.
3ᐊᑭᕋᕐᑐᕐᑎᒪ ᓂᐱᖏᑦ ᐱᑦᔪᑎᒋᓪᓗᒋᑦ,
ᐱᐅᖏᑦᑐᓕᔪᓪᓗ ᐊᑭᕋᕐᑐᕐᓂᖏᑦ ᐱᓪᓗᒋᑦ;
ᐅᕙᓐᓄᑦ ᐅᖁᒤᒃᓴᕐᓂᕐᒥᒃ ᐱᑎᑦᓯᖕᒪᑕ,
ᓂᓐᖓᐅᒪᓂᕐᒧᑦ ᖀᒥᒋᖕᒪᖓ.
4ᐆᒻᒪᑎᒐ ᐊᖏᔪᒥᒃ ᐋᓐᓂᐊᕐᐳᖅ ᐃᓗᓐᓂ,
ᑐᖂᓪᓗ ᑲᑉᐱᐊᓇᕐᓂᖓᑕ ᐅᕐᕈᕝᕕᒋᕚᖓ.
5ᓯᕘᕋᓂᐅᑉ ᓴᔪᖕᓂᐅᓪᓗ ᑎᑭᒻᒪᖓ,
ᑲᑉᐱᐊᓱᒃᔪᐊᕐᓂᐅᓪᓗ ᓵᓚᒋᕚᖓ.
6ᐅᖃᕐᐳᖓᓕ, “ᑕᕝᕙᑐᖅ ᑑᕕᐅᑉ ᐃᓴᕈᖏᖕᓂᒃ ᐃᓴᕈᖃᕐᓚᖓ!
ᐊᕗᖓ ᑎᖏᒐᔭᕐᐳᖓ ᑕᕾᕐᓯᕆᐊᕐᑐᕐᓗᖓ.
7ᐅᖓᓯᒃᑐᒧᑦ ᕿᒫᒐᔭᕐᐳᖓ, ᐃᓄᖃᖏᑦᑐᒥᓗ ᐃᓂᖃᓕᕐᓗᖓ. ᓰᓚ
8ᑐᐊᕕᕐᓗᖓ ᕿᒫᔪᒪᒐᔭᕐᐳᖓ ᐊᓄᕆᕐᔪᐊᒥᑦ ᓯᓚᕐᓂᕐᓗᒃᔪᐊᒥᓪᓗ.”
9ᐱᐅᖏᑦᑐᓕᔪᑦ ᐊᓯᕈᓚᐅᒃᑭᑦ, ᐊᑕᓃᖅ, ᐅᖃᐅᓯᒃᓴᒥᒡᓗ ᓇᓗᓕᕐᑎᓪᓗᒋᑦ.
ᑕᑯᓯᒪᒐᒪ ᑲᑉᐱᐊᓱᒃᑎᑦᓯᔪᓂᒃ ᐊᒃᓱᕈᕐᑎᑕᐅᔪᓂᒡᓗ ᐃᒡᓗᒐᓴᒡᔪᐊᓂᒃ.
10ᐅᓪᓗᖅ ᐅᓐᓄᐊᕐᓗ ᓈᓪᓗᒍ ᐊᕙᓗᕐᔪᐊᖏᓐᓂ ᐅᑎᕐᑕᕐᐳᑦ;
ᐱᐅᖏᑦᑐᓕᓂᐅᑉ ᓵᓚᖃᕈᒪᓂᐅᓪᓗ ᐃᓚᒋᕔᑦ.
11ᐊᓯᕈᐃᓂᖅ ᐊᑯᓐᓂᖓᓐᓃᑉᐳᖅ;
ᓵᓚᓯᐊᖃᕐᓂᖅ ᐅᐃᕕᕆᒃᓯᓂᕐᓗ ᐊᖅᑯᑎᖏᓐᓂᑦ ᕿᒪᕉᑎᓐᖏᓚᖅ.
12ᐊᑭᕋᓐᓂᑦ ᐅᖃᕐᓂᕐᓘᑕᐅᒍᒪ; ᐊᑐᕈᓐᓇᕋᔭᕐᐸᕋ;
ᐊᑭᕋᕐᑐᕐᑎᒐᓗ ᐅᕙᓐᓂᒃ ᓵᓚᖃᕋᓱᐊᕐᐸᑦ,
ᑖᑦᓱᒪᓐᖓᑦ ᐃᔨᕈᓐᓇᕋᔭᕐᐳᖓ.
13ᐃᕝᕕᐅᕗᕐᓕ, ᐃᓅᕗᑎᑦ ᐅᕙᑦᑐᑦ,
ᐱᖃᑎᒋᓪᓗᑎᑦ, ᐃᓚᓐᓇᕆᓪᓗᑎᑦ ᖃᓂᓐᓂᕐᐹᖅ.
14ᐅᖃᖃᑎᒌᓚᐅᕐᑐᒍᒃ ᖁᕕᐊᓇᕐᑐᒥᒃ ᑲᑐᑦᔨᖃᑎᒌᖕᓂᕐᒥᒃ,
ᐱᓱᖃᑎᒌᒃᓗᓄᒡᓗ ᐃᓄᒋᐊᒃᑐᕐᔪᐊᑦ ᐃᓚᒋᓪᓗᒋᑦ
ᒎᑎᐅᑉ ᐃᒡᓗᖓᓄᑦ.
15ᑐᖁᒧᑦ ᑕᕝᕔᓐᓇᖅ ᑎᒍᔭᐅᓕᑦ;
ᑐᖁᖓᔪᑦ ᐃᓂᖓᓄᑦ ᐂᓕᕐᓕᑦ,
ᐱᐅᖏᑦᑐᓕᓂᐅᑉ ᐃᓂᒋᖕᒪᒋᑦ.
16ᐅᕙᖓᓕ, ᒎᑎ ᓂᓪᓕᐊᕕᒋᔪᒪᕙᕋ,
ᐊᑕᓂᐅᓪᓗ ᓴᐳᑎᓂᐊᕐᐹᖓ.
17ᐅᓐᓄᒃᑯᑦ, ᐅᓪᓛᒃᑯᓪᓗ, ᐅᓪᓗᑯᓪᓗ
ᑐᒃᓯᐊᕈᒪᕗᖓ, ᓂᓪᓕᐊᓗᖓᓗ ᓂᐱᖃᕐᓗᖓ
ᐅᖁᒤᒃᓴᕐᓂᕐᒧᑦ ᕿᐊᓗᖓ, ᓂᐱᒐᓗ ᑐᓴᕐᓂᐊᕐᐹ.
18ᑕᕐᓂᕋ ᐱᐅᓕᕚ ᖃᓄᐃᓕᔭᐅᓇᖓ
ᐅᓇᑕᕐᓂᕐᒥᑦ ᐅᕙᓐᓂᒃ ᓵᓚᖃᕋᓱᐊᕐᓂᕐᒥᑦ,
ᐅᓄᕐᒪᑕ ᐅᕙᓐᓂᒃ ᓵᓚᖃᕋᓱᒃᑐᑦ.
19ᒎᑎ ᑐᓴᕐᓂᐊᕐᐳᖅ, ᑲᑉᐱᐊᓱᒃᑎᓐᓂᐊᕐᐰᓪᓗ,
ᑍᒪᓐᖓᓂᕐᔪᐊᖅ ᐃᓂᒥᓂ ᐃᓂᖃᕐᒪᑦ;
ᑍᒃᑯᐊ ᐊᓯᑦᔨᕐᑍᓕᒐᒥᒃ, ᒎᑎᒥᒃ ᓯᕗᕋᓐᖏᓚᑦ. ᓰᓚ
20ᐊᒡᒐᓂ ᐃᓕᕔᑦ ᐃᓂᓐᓄᑦ ᐱᑦᓯᐊᕐᑎᒥᓄᑦ;
ᐊᖏᖃᑎᒌᒍᑎᓂᓗ ᓯᖁᒥᑉᐰᑦ.
21ᐅᖃᐅᓯᖏᑦ ᐱᐊᖕᓂᕐᓴᐅᕗᑦ ᐸᑕᒥᑦ,
ᐅᓇᑕᕈᒪᓂᕐᓕ ᐆᒻᒪᒥᐅᑕᕆᕚᑦ;
ᐅᖃᐅᓯᖏᑦ ᐃᓱᐊᕐᓯᑎᑦᓯᓂᕐᓴᐅᕗᑦ ᐅᕐᓱᒥᑦ,
ᑭᓯᐊᓂ ᓴᕕᒡᔪᐊᒥᒃ ᑎᒍᒥᐊᕐᐳᑦ.
22ᐅᖁᒤᒃᓴᐅᑎᒋᔭᑎᑦ ᐊᑕᓂᕐᒧᑦ ᑐᓂᒃᑭᑦ,
ᑖᑦᓱᒪ ᑕᕝᕙ ᓴᐳᑎᓂᐊᕐᐹᑎᑦ;
ᐃᓄᐃᑦ ᓱᓕᑦᓯᐊᕋᓱᐊᕐᑐᑦ ᓵᓚᒋᔭᐅᑎᓚᐅᕐᓯᒪᓂᐊᓐᖏᓔᑦ.
23ᐃᕝᕕᓪᓕ ᒎᑏ, ᐃᑎᕐᓴᒧᑦ ᐊᓯᕈᕐᑕᐅᕕᖕᒧᑦ ᐱᑎᑦᓱᒫᕐᐸᑎᑦ;
ᑐᖁᑦᓯᔪᒪᔪᑦ ᐅᐃᕕᕆᒃᓯᔪᓪᓗ ᐃᓄᐃᑦ
ᐅᓪᓗᒃᓴᖏᑕ ᐊᕝᕙᖏᓐᓂᒡᓘᓐᓃᑦ ᐃᓅᓂᐊᖏᓚᑦ;
ᐅᕙᖓᓕ ᐃᓕᖕᓂᒃ ᑕᑎᖃᕐᓂᐊᕐᐳᖓ.
Currently Selected:
ᐃᓐᖏᕈᑎᑦ 55: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
