ᐃᓐᖏᕈᑎᑦ 18
18
ᒎᑎᐅᑉ ᐊᐅᓚᑦᓯᓂᖓ ᐱᐅᓕᔨᐅᓂᖓᓗ
ᐊᑕᓂᐅᑉ ᐱᔨᖓᑕ ᑍᕕᑎᐅᑉ ᐃᓐᖏᕈᑖ, ᑕᕝᕙᓂ ᐅᖃᓪᓚᓚᐅᕐᒪᑦ ᐊᑕᓂᕐᒧᑦ ᓴᐳᑎᓚᐅᕐᒪᒍ ᐊᑭᕋᕐᑐᕐᑎᓕᒫᖏᓐᓂᑦ ᓴᐅᓕᐅᓪᓗ ᐱᔪᓐᓇᕐᓂᖓᓂᑦ.
ᓴᒧᐃᓕ ᐂᑉᐸᖏᑦ 22:1-51
1ᐊᑕᓃᖅ, ᓇᒡᓕᒋᕙᒋᑦ ᐱᔪᓐᓇᐅᑎᒋᒐᒃᑭᑦ.
2ᐊᑕᓂᖅ ᕾᕐᑐᕆᕙᕋ, ᓴᐳᑦᔨᔨᒋᓪᓗᒍᓗ;
ᒎᑎᒐ ᓴᓐᖏᔫᑦᔪᑎᒐ, ᑖᑦᓱᒥᖓ ᑕᑎᖃᕐᓂᐊᕐᐳᖓ;
ᓴᐴᓗᑕᕆᒐᒃᑯ; ᐱᐅᓕᔭᐅᕕᒃᓴᒪᓗ ᓴᒃᑯᒋᖕᒪᒍ,
ᕿᒫᕕᒃᓴᕆᒐᒃᑯ ᓵᓚᐅᓂᐊᖏᑦᑐᖅ.
3ᐊᑕᓂᖅ ᓂᓪᓕᐊᕕᒋᔪᒪᕙᕋ, ᑖᓐᓇ ᓂᕐᑐᕐᑕᐅᔪᒃᓴᑐᐊᖅ;
ᓴᐳᑎᔭᐅᓂᐊᕐᐳᖓ ᐊᑭᕋᕐᑐᕐᑎᓐᓂᑦ.
4ᑐᖂᑉ ᕿᓚᕈᑎᖏᑦ ᐊᕙᑎᓐᓃᑉᐳᑦ,
ᒎᑎᖃᖏᑦᑐᓪᓗ ᐅᓄᕐᑐᕐᔪᐊᑦ ᐅᕙᓐᓄᑦ ᕾᔪᑦ, ᑲᑉᐱᐊᓱᒃᑎᑉᐹᖓ.
5ᑐᖁᖓᔪᑦ ᐃᓂᖓᑕ ᕿᒃᓵᖕᓇᕐᓂᖓ ᐊᕙᑎᓐᓃᒻᒪᑦ;
ᑐᖂᓪᓗ ᓂᒐᖓᑕ ᓵᓐᖓᖕᒪᖓ.
6ᐃᓗᖏᕐᑐᕐᓂᓐᓂ ᐊᑕᓂᖅ ᓂᓪᓕᐊᕕᒋᕙᕋ,
ᓂᐱᖅᑯᕐᑐᕗᖓᓗ ᒎᑎᓐᓄᑦ;
ᑐᒃᓯᐊᕐᕕᒡᔪᐊᖁᑎᒥᓂᑦ ᓂᐱᒐ ᑐᓴᕐᐹ,
ᓂᐱᖅᑯᕐᑐᓪᓗᖓ ᓂᓪᓕᐊᓂᕋ ᓯᐅᑎᖏᖕᓄᑦ ᑎᑭᑉᐳᑦ.
7ᓄᓇᓗ ᓴᔪᒃᐱᓗᒃᐳᖅ,
ᖃᖅᑬᓪᓗ ᑐᓐᖓᕕᖏᑦ ᓴᔪᒡᓗᑎᒃ,
ᐊᐅᓚᕗᑦ, ᓂᓐᖓᐅᒪᑎᓪᓗᒍ.
8ᐳᔪᖅ ᐊᓂᕗᖅ ᓱᕐᓗᖏᖕᓂᑦ,
ᐃᑯᒪᓗ ᓄᖒᑦᓯᔪᖅ ᖃᓂᖓᓂᑦ ᐊᓂᕗᖅ;
ᐊᐅᒤᓪᓗ ᐃᑯᒪᔪᑦ ᑕᕝᕙᓐᖓᑦ ᐱᕗᑦ.
9ᕿᓔᓪᓗ ᐊᒻᒧᒃᑎᓚᐅᕆᕔᑦ, ᐊᖅᑲᕐᓗᓂᓗ,
ᑖᕐᑐᕐᔪᐊᖅ ᐃᑎᒐᖏᑕ ᐊᑖᓃᓪᓗᓂ.
10ᐱᓐᖑᕐᑎᓯᒪᔪᒥᓗ ᐃᓴᕈᓕᖕᒥ ᐃᑭᒪᕗᖅ, ᑎᖏᓪᓗᓂᓗ;
ᐊᓄᕆᐅᑉ ᐃᓴᕈᖏᖕᓂᒃ ᖃᖓᑕᒍᑎᖃᕐᐳᖅ.
11ᑖᕐᑐᖅ ᐃᔨᕐᓯᒪᕝᕕᒋᕚ;
ᐅᓕᒃᓯᒪᓪᓗᓂ ᐃᒪᕐᔪᐊᓂᒃ ᑖᕐᑐᓂᒃ,
ᓄᕗᔧᓪᓗ ᑖᕐᑐᕐᔪᐊᑦ ᐃᔨᕐᓯᒪᕝᕕᒋᕔᑦ.
12ᖃᐅᒪᔪᕐᔪᐊᒧᓪᓗ ᓵᖓᓃᑦᑐᒧᑦ,
ᓄᕗᔧᑦ ᐊᖕᒪᕐᐳᑦ ᓇᑕᖅᑯᕐᓇᓕᕐᓗᑎᒡᓗ,
ᐊᐅᒪᓂᒃ ᐃᑯᒪᓕᖕᓂᒃ.
13ᑕᕝᕙ ᐊᑕᓂᖅ ᐃᒃᑐᓚᐅᕐᑎᑦᓯᕗᖅ ᕿᓚᖕᒥ,
ᖁᑦᓯᖕᓂᕐᐹᖑᔫᓪᓗ ᓂᐱᖓ ᑐᓴᕐᓴᐅᓪᓗᓂ,
ᓇᑕᖅᑯᕐᓇᕐᑎᒍᑦ ᐊᐅᒫᓗᒃᑎᒍᓪᓗ ᐃᑯᐊᓚᔪᑎᒍᑦ.
14ᖃᕐᔪᒥᓄᓪᓗ ᐱᑎᒃᓴᓚᐅᕐᐳᖅ ᐊᑭᕋᕐᑐᕐᑐᑦ ᐊᕕᑎᓪᓗᒋᑦ,
ᖃᐅᒻᒫᓪᓚᒃᑐᓄᑦ ᐅᓄᕐᑐᓄᑦ ᓵᓚᒋᕔᑦ.
15ᐃᒪᕐᔪᐊᓪᓗ ᐃᖏᕐᕋᓂᖏᑕ ᐊᖅᑯᑎᖏᑦ ᑕᑯᒃᓴᐅᓚᐅᕐᐳᑦ,
ᓄᓇᕐᔪᐊᓪᓗ ᑐᓐᖓᕕᖏᑦ ᓴᖅᑭᑎᓚᐅᕐᐰᑦ,
ᐊᑕᓃᖅ ᓱᐊᖕᓂᕐᓄᑦ, ᓱᕐᓗᒃᐱᓪᓗ ᐊᓂᕐᓂᖓᑕ ᓱᐱᓂᖏᖕᓄᑦ.
16ᑕᑉᐹᓐᖓᑦ ᑎᓕᓯᓚᐅᕐᐳᖅ, ᐂᓪᓗᖓᓗ,
ᓄᓱᓚᐅᕐᐹᖓᓗ ᐃᒪᕐᔪᐊᓂᑦ.
17ᓴᐳᑎᓚᐅᕐᐹᖓᓗ ᐊᑭᕋᕐᑐᕐᑎᓐᓂᑦ ᓴᓐᖏᔪᓂᑦ;
ᐊᑭᕋᕐᑐᕐᑎᓐᓂᑦ ᐅᕙᓐᓂᑦ ᓴᓐᖏᓂᕐᓴᐅᓗᐊᕐᑐᓂᑦ.
18ᑖᒃᑯᓄᖓ ᐅᐸᒃᑐᕐᑕᐅᓚᐅᕋᒪ ᐅᖁᒤᒃᓴᕐᑎᓪᓗᖓ,
ᐊᑕᓂᕐᓕ ᐃᑲᔪᕐᑎᒋᓚᐅᕐᐸᕋ.
19ᐂᑎᓚᐅᕐᐹᖓᓗ ᐃᓂᒃᓴᒧᑦ ᐱᕕᑐᔪᒧᑦ,
ᓴᐳᑎᓪᓗᖓᓗ ᖁᕕᐊᒋᒐᒥᖓ.
20ᐊᑕᓂᐅᑉ ᐊᑭᓕᕐᐹᖓ ᐱᓇᓱᐊᑦᓯᐊᕐᓂᓐᓄᑦ; ᐸᓯᔭᒃᓴᐅᖏᓐᓂᓐᓄᓪᓗ;
ᐊᒡᒐᖕᒪᓗ ᓴᓗᒪᑦᓯᐊᕐᓂᖏᓐᓄᑦ, ᑐᓂᓯᕕᒋᓚᐅᕐᐹᖓ ᑐᓂᔪᒪᔭᒥᓂᒃ.
21ᐊᖅᑯᑎᖏᑦ ᐊᑐᐃᓐᓇᕋᒃᑭᑦ ᐱᐅᖏᑦᑐᓕᓂᕐᒧᓪᓗ ᒎᑎᒥᒃ ᕿᒤᓚᐅᖏᓐᓇᒪ.
22ᐃᖅᑲᕐᑐᐃᓂᖏᑦ ᓵᓐᓃᑦᓮᓐᓇᕐᒪᑕ, ᒪᓕᒐᒃᓴᐅᖁᔭᖏᓪᓗ ᑐᓄᓚᐅᖏᓐᓇᒃᑭᑦ.
23ᐸᓯᔭᒃᓴᐅᓂᖃᓚᐅᓐᖏᓚᖓ ᓵᖓᓂ, ᐱᐅᖏᑦᑐᓕᓂᕐᒧᓪᓗ ᓵᓐᖓᓚᐅᖏᓐᓇᒪ.
24ᐊᑕᓂᐅᑉ ᐊᑭᓕᕐᕕᒋᓚᐅᕐᐹᖓ, ᐱᐅᔪᒥᒃ ᐱᓂᐊᕐᓂᕋ ᒪᓕᒡᓗᒍ,
ᐊᒡᒐᒪᓗ ᓴᓗᒪᓂᖏᓐᓄᑦ ᑕᑯᓐᓇᕐᑕᖓᒍᑦ.
25ᓂᑲᒍᓱᒃᑐᓄᑦ ᓴᖅᑭᓐᓂᐊᕐᐳᑎᑦ ᓂᑲᒍᓱᕐᑑᓗᑎᑦ,
ᐸᓯᔭᒃᓴᐅᖏᑦᑐᓄᓪᓗ ᐸᓯᔭᒃᓴᐅᖏᓪᓗᑎᑦ ᓴᖅᑭᓐᓂᐊᕆᕗᑎᑦ.
26ᓴᓗᒪᑦᓯᐊᕐᑐᓄᑦ, ᓴᓗᒪᑦᓯᐊᕐᓗᑎᑦ ᓴᖅᑭᓐᓂᐊᕐᐳᑎᑦ,
ᓯᓔᕐᕆᒃᓯᓇᓱᐊᕐᑐᓄᑦ, ᐃᓕᕋᓇᕐᓗᑎᑦ ᓴᖅᑭᓐᓂᐊᕐᐳᑎᑦ,
27ᐃᓄᐃᑦ ᒥᑭᒡᓕᑎᕐᓯᒪᔪᑦ ᐱᐅᓕᓂᐊᕐᐸᑎᑦ,
ᐱᐅᔪᕆᔪᓂᒡᓗ ᑕᐅᑦᑐᖃᕐᑐᑦ ᑲᑕᒃᑎᓐᓂᐊᕐᐸᑎᑦ.
28ᖃᐅᒻᒪᖅᑯᑎᒐ ᐃᑭᑎᓐᓂᐊᕐᐸᑦ;
ᐊᑕᓂᐅᑉ ᒎᑎᒪ ᑖᕐᑐᒦᓐᓂᕋ, ᖃᐅᒻᒪᒃᑎᓐᓂᐊᕐᐹ.
29ᐃᑲᔪᕐᑎᒌᒡᓗᑎᒃ ᐅᓇᑕᕐᑐᕐᓮᑦ ᐅᓄᕐᑐᑦ ᐅᐸᒃᑐᕈᓐᓇᕐᐹᖓ,
ᒎᑎᒐᓕ ᐂᑉᐸᕆᓗᒍ ᐊᕙᓗᕐᔪᐊᑉ ᐅᖓᑖᓄᑦ ᒥᓯᒍᓐᓇᕐᐳᖓ.
30ᒎᑎᐅᓪᓕ ᐱᓂᐊᕐᓂᖏᑦ ᐋᖅᑭᑦᓯᐊᕐᓯᒪᕗᑦ;
ᐊᑕᓂᐅᓪᓗ ᐅᖃᐅᓯᖏᑦ ᓇᓗᓁᕐᑕᐅᓯᒪᕗᑦ ᐆᒃᑐᕐᑕᐅᓂᒃᑯᑦ
ᓴᐴᓗᑕᐅᓪᓗᑎᒃᓗ ᑕᑎᖃᑦᑐᓄᑦ ᑕᒤᓐᓄᑦ.
31ᑭᓇ ᒎᑎᐅᕚ? ᐊᑕᓂᐅᑉ ᐊᓯᐊ.
ᑭᓇᓘ ᕾᕐᑑᕙ, ᒎᑎᑦᑕ ᐊᓯᐊ?
32ᒎᑎᑦᑕ ᐊᑎᑎᑉᐹᖓ ᓴᓐᖏᓂᕐᒥᒃ ᓄᑭᑖᕐᑎᓪᓗᓂᖓ,
ᐊᖅᑯᑎᒐᓗ ᐊᑲᐅᓯᑦᓯᐊᕐᑎᑉᐹ.
33 #
ᕼᐊᐸᑲ 3:19. ᐃᑎᒐᒃᑲ ᑐᒃᑐᖓᔫᑉ ᐃᑎᒐᖏᑎᑐᑦ ᑍᒤᑎᑉᐰᑦ,
ᐃᓂᖃᕐᑎᑉᐹᖓᓗ ᖁᑦᓯᒃᑐᓂ.
34ᐊᒡᒐᒃᑲ ᐃᓕᓐᓂᐊᕐᑎᑉᐰᑦ ᐅᓇᑕᕐᓂᕐᒥᒃ,
ᑕᓖᒃᑲᒃ ᕿᓗᓯᔪᓐᓇᖁᓐᓗᒋᒃ ᐱᑎᒃᓯᒥᒃ ᑲᓐᓄᔭᒥᒃ.
35ᓴᐴᓗᑕᕐᒥᒃ ᑐᓂᓯᕕᒋᒋᕙᕐᒪ, ᐱᐅᓕᔭᐅᓂᐅᑉ ᓴᐴᓗᑕᖓᓂᒃ;
ᐊᒡᒐᖕᓄᓪᓗ ᑕᓕᕐᐱᖕᓄᑦ, ᒪᑭᑕᑎᑉᐸᕐᒪ,
ᐱᑦᓯᐊᕐᓂᕕᓪᓗ ᓂᑲᒍᓱᒃᑑᑉ ᐊᔪᖏᑦᑐᕐᔪᐊᓐᖑᕐᑎᑉᐹᖓ.
36ᐊᖅᑯᑎᒐ ᐃᓱᐊᕐᓯᑎᑉᐸᑦ; ᐃᑎᒐᒃᑲ ᖁᐊᔭᕿᖁᓇᒋᑦ.
37ᐊᑭᕋᕐᑐᕐᑎᒃᑲ ᕿᒫᔪᑦ ᒪᓕᓚᐅᕐᐸᒃᑲ, ᐊᖑᓪᓗᒋᓪᓗ;
ᐅᑎᕆᐊᓚᐅᓐᖏᓚᖓᓗ ᑕᒪᕐᒥᒃ ᓄᖑᓚᐅᖏᓐᓂᖏᓐᓂ.
38ᐅᕐᕈᑎᓚᐅᕐᐸᒃᑲ ᒪᑭᒍᓐᓁᓪᓕᓪᓗᑎᒃ;
ᐃᑎᒐᒪ ᐊᑖᓂ ᐅᕐᕈᕗᑦ.
39ᓴᓐᖏᓂᕐᒥᒃ ᑐᓂᒐᕕᖓ ᐅᓇᑕᕈᑎᒃᓴᓐᓂᒃ;
ᐊᑭᕋᕐᑐᕐᑎᒃᑲ ᐹᒻᒪᒃᑎᕐᑎᑉᐸᑎᑦ ᐃᑎᒐᓐᓄᑦ.
40ᐊᑭᕋᕐᑐᕐᑎᒃᑲ ᕿᒫᑎᑉᐸᑎᑦ,
ᓄᖒᑦᓯᖁᓪᓗᖓ ᐅᕙᓐᓂᒃ ᐆᒥᓱᒃᑐᓂᒃ.
41ᑖᒃᑯᐊ ᓂᓪᓕᐊᕗᑦ ᐃᑲᔪᕐᑕᐅᔪᒪᓂᕐᒥᒃ, ᐃᑲᔪᕐᑎᒃᓴᕐᓯᐊᕋᑎᒡᓗ.
ᐊᑕᓂᕐᒧᑦ ᐊᒡᓛᑦ ᓂᓪᓕᐊᕗᑦ, ᑖᒃᑯᓂᖓᓕ ᑭᐅᓐᖏᓚᖅ.
42ᐊᓇᐅᓕᓚᕐᐸᒃᑲ ᐳᔪᕐᓗᒃᑐᑦ ᒥᑭᔫᑕᐅᓕᕐᓗᑎᖅ ᑎᒃᑕᐅᕗᓪᓗ ᐊᓄᕆᒧᑦ;
ᐃᒋᓚᐅᕐᐸᒃᑲᓗ ᓴᓂᕐᑎᑐᑦ ᐊᖅᑯᒻᒧᑦ ᐃᒋᑕᐅᔪᑎᑐᑦ.
43ᓴᐳᑎᓚᐅᕐᐸᕐᒪ ᐃᓄᖕᓂᑦ ᐅᓇᑕᕆᐊᕐᑐᕐᓂᖏᓐᓂᑦ;
ᐃᓅᖃᑎᒌᒡᔪᐊᓄᓪᓗ ᐊᖓᔪᖅᑳᓐᖑᕐᑎᓚᐅᕐᐸᕐᒪ;
ᐃᓄᐃᑦ ᑕᑯᓚᐅᕐᓯᒪᖏᑕᒃᑲ ᐱᔨᑦᓯᕐᓂᐊᕐᐳᑦ ᐅᕙᓐᓂᒃ.
44ᓂᐱᓐᓂᒃ ᑐᓴᑐᐊᕋᒥᒃ ᓈᓚᑦᓯᐊᕐᐳᑦ;
ᓄᓇᑦᑕᓗ ᐊᓯᐊᓂᑦ ᐱᓯᒪᔪ ᐃᒻᒥᖕᓂᒃ ᒪᓂᕗᑦ ᐅᕙᓐᓄᑦ.
45ᓄᓇᐅᑉ ᐊᓯᐊᓂᑦ ᐱᓯᒪᔪᑦ ᓴᐱᓕᕐᐳᑦ,
ᑲᑉᐱᐊᓱᒡᓗᑎᒃᓗ ᐃᔨᕐᓯᒪᕕᖕᒥᖕᓂᑦ ᐊᓂᓪᓗᑎᒃ.
46ᐊᑕᓂᖅ ᐃᓅᕗᖅ! ᕾᕐᑐᕋ ᓂᕐᑐᕐᑕᐅᓕ!
ᐱᐅᓕᔭᐅᓂᕐᒪ ᒎᑎᖓ ᐊᖏᔪᕈᕐᑎᑕᐅᓕ.
47ᒎᑎᐅᑉ ᐊᑭᓂᐊᕈᑎᕚᖓ,
ᐃᓄᐃᓪᓗ ᒪᓂᑎᑉᐰᑦ ᐃᑎᒐᒪ ᐊᑖᓄᑦ;
48ᓴᐳᑎᕚᖓᓗ ᐊᑭᕋᕐᑐᕐᑎᓐᓂᑦ.
ᒪᑭᑎᑉᐸᕐᒪᓗ ᐃᓄᖕᓂᑦ ᐅᕙᓐᓄᑦ ᐊᑭᕋᕐᑐᕋᓱᐊᕐᑐᓂᑦ;
ᓴᐳᑎᓚᐅᕐᐸᕐᒪ ᑲᑉᐱᐊᓇᕋᓱᐊᕐᑐᓂᑦ.
49 #
ᕉᒪᒥᐅᓄᑦ 15:9. ᑍᒤᒻᒪᑦ, ᖁᔭᒋᔪᒪᕙᒋᑦ, ᐃᓅᖃᑎᒌᒡᔪᐃᑦ ᓇᓗᔪᑦ ᐊᑯᓐᓂᖓᓂ,
ᐊᑏᓪᓗ ᓂᕐᑐᕈᑎᓂᒃ ᐃᓐᖏᕐᕕᒋᔪᒪᕙᕋ.
50ᐊᖓᔪᖅᑳᔪᐊᖁᑎᒥᓂᒃ ᓴᐳᑦᔨᓂᖓ ᐊᖏᔪᐊᓘᕗᖅ,
ᐅᕐᓱᕐᑎᕐᓯᒪᔭᒥᓄᑦ ᓇᒡᓕᒍᓱᖕᓂᓂ ᓴᖅᑭᑎᑉᐹ,
ᑍᕕᑎᒧᑦ ᑭᖑᕚᖏᓐᓄᓪᓗ ᐃᓱᖃᖏᑦᑐᒧᑦ.
Currently Selected:
ᐃᓐᖏᕈᑎᑦ 18: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
