ᓲᓗᒨᓂᐅᑉ ᐅᖃᓪᓚᖕᓂᖏᑦ 29
29
1ᓇᓪᓕᐊᑦ ᐋᖅᑭᒋᐊᕐᑕᐅᖃᑦᑕᕐᑐᖅ, ᓯᑎᓇᓱᐊᕈᓂ,
ᑕᕝᕔᓐᓇᖅ ᐊᓯᕈᕐᑕᐅᔪᒫᕐᐳᖅ ᐋᖅᑭᒋᐊᕐᑕᐅᕕᖃᕈᓐᓃᕐᓗᓂ.
2ᐃᓱᐊᕐᑐᑦ ᐱᔪᓐᓇᕐᓂᖃᕐᓗᑎᒃ ᐊᐅᓚᑦᓯᓕᑐᐊᕐᒪᑕ, ᐃᓄᐃᑦ ᖁᕕᐊᓱᒃᐸᒃᐳᑦ;
ᐱᐅᖏᑦᑐᓕᔪᑦ ᐊᖓᔪᖅᑲᐅᓕᑐᐊᕐᒪᑕ, ᐃᓄᐃᑦ ᐊᓂᕐᓴᐅᒥᕙᒃᐳᑦ.
3ᓯᓚᑐᓂᕐᒥᒃ ᐃᓪᓕᕆᔭᓕᐅᑉ ᐊᑖᑕᓂ ᖁᕕᐊᓱᒃᑎᑉᐹ,
ᐊᕐᓇᓂᒡᓕ ᐊᑐᒐᕐᓂᒃ ᐃᓅᖃᑎᓕᐅᑉ ᐊᔪᕐᓴᖏᓐᓂᓂ ᑐᓂᐅᖅᑲᐅᑎᒋᕔᑦ.
4ᐊᖓᔪᖅᑳᕐᔪᐊᖅ ᐊᑦᔨᒌᒃᑎᑦᓯᓂᒃᑯᑦ ᓄᓇᓕᖕᒥᒃ ᐋᖅᑭᒃᓱᐃᕗᖅ,
ᐊᑭᓕᕐᑕᐅᓂᑐᐃᓐᓇᒃᑯᓪᓕ ᐱᓇᓱᐊᑐᖅ ᓄᓇᓕᖕᒥᒃ ᐊᓯᕈᐃᕗᖅ.
5ᓯᓚᖅᑲᑎᒥᓂᒃ ᓂᕐᑐᐃᓐᖑᐊᕐᑐᖅ ᐱᐅᒋᔭᐅᔪᒪᒧᑦ
ᓄᓗᐊᓂᒃ ᓂᖏᑎᑦᓯᕗᖅ ᐃᑎᒐᖕᒥᓄᑦ.
6ᐱᐅᖏᑦᑐᓕᔪᖅ ᐊᔪᕐᓂᕐᒥᓄᑦ ᒥᑭᒋᐊᕐᑎᑉᐳᖅ,
ᐃᓱᐊᕐᑐᓕᔪᕐᓕ ᐃᓐᖏᕐᐳᖅ ᖁᕕᐊᓱᒡᓗᓂᓗ.
7ᐃᓱᐊᕐᑑᑉ ᐊᔪᕐᓴᕐᑐᑦ ᖃᓄᐃᓕᐅᕐᑕᐅᔭᕆᐊᖃᕐᓂᖏᑦ ᖃᐅᔨᒪᑦᓯᐊᕐᐰᑦ,
ᐱᐅᖏᑦᑐᕐᓕ ᑕᒪᑐᒥᖓ ᖃᐅᔨᒪᓂᕐᒥᒃ ᑐᑭᓯᐅᒪᓐᖏᓚᖅ.
8ᒥᑕᐅᑎᒃᓴᕐᑏᑦ ᐃᒡᓗᒐᓴᖕᓂᒃ ᐊᑲᐅᓐᖏᓕᐅᕐᑎᑦᓯᕗᑦ,
ᓯᓚᑐᔪᓪᓕ ᓂᓐᖓᐅᒪᓂᕐᒥᒃ ᕿᒫᑎᑦᓯᕗᑦ.
9ᓯᓚᑐᔪᖅ ᐂᕙᖃᑎᖃᕐᐸᑦ ᓯᓔᑦᑐᒥᒃ,
ᓯᓔᑦᑐᖅ ᓂᓐᖓᒃᐳᖅ ᐃᔪᕐᓗᓂᓗ, ᑖᑦᓱᒪᓂ ᓮᓕᓂᕐᑕᖃᓐᖏᓚᖅ.
10ᐊᖑᑏᑦ ᑐᖁᑦᓯᔪᒪᔪᑦ ᐆᒥᓱᒃᐳᑦ ᐸᓯᔭᒃᓴᐅᖏᑦᑐᓂᒃ,
ᐊᔪᕐᑐᓕᔪᑦ ᐃᓱᐊᕐᑑᑉ ᐃᓅᓯᖓᓂᒃ ᐃᓱᓕᑎᑦᓯᔪᒪᕗᑦ.
11ᓯᓔᑦᑐᖅ ᓴᖅᑭᑎᑦᓯᕗᖅ ᐃᒃᐱᒋᔭᒥᓂᒃ ᓂᓐᖓᐅᒪᓂᕐᒥᒃ,
ᓯᓚᑐᔫᓪᓕ ᓂᐱᖃᕋᓂ ᓄᖅᑲᕐᑎᑉᐹ.
12ᐊᐅᓚᑦᓯᔨ ᓱᓕᖏᑦᑐᓂᒃ ᓈᓚᓕᕐᐸᑦ,
ᐱᔨᖏᑦ ᐃᓘᓐᓇᑎᒃ ᐱᐅᔪᓐᓃᕐᐳᑦ.
13ᐊᔪᕐᓴᕐᑐᖅ ᐅᖁᒤᒃᓴᕐᑎᑦᓯᔪᕐᓗ ᐃᒫᒃ ᐊᑦᔨᒌᓐᓂᖃᕐᐴᒃ:
ᑕᒪᕐᒥᒃ ᐊᑕᓂᐅᑉ ᐃᔨᖏᒃ ᑕᑯᓐᓇᕐᓂᕐᒥᒃ ᑐᓂᓯᕕᒋᓯᒪᖕᒪᒋᒃ.
14ᐊᖓᔪᖅᑳᕐᔪᐊᖅ ᐊᑦᔨᒌᒃᑐᒥᒃ ᐊᔪᕐᓴᕐᑐᓂᒃ ᐃᖅᑲᕐᑐᐃᒃᐸᑦ,
ᑖᑦᓱᒪ ᐃᒃᓯᕙᐅᑕᕐᔪᐊᖓ ᐃᓱᖃᖏᑦᑐᒧᑦ ᐃᓕᖓᔪᒫᕐᐳᖅ.
15ᐊᓇᐅᑕᐅᑉ ᐋᖅᑭᒃᓯᒋᐊᕐᓂᖓ ᓯᓚᑐᓂᕐᒥᒃ ᑐᓂᓯᕗᖅ,
ᓄᑕᕋᕐᓕ ᑲᒪᒋᔭᐅᖏᑦᑐᖅ ᐊᓈᓇᒥᓂᒃ ᑲᓐᖑᓱᒃᑎᑦᓯᕗᖅ.
16ᐱᐅᖏᑦᑐᓕᔪᑦ ᐊᐅᓚᑦᓯᓕᑐᐊᕐᒪᑕ, ᐱᕋᔭᖕᓂᖅ ᐊᖏᒡᓕᒋᐊᕐᐸᒃᐳᖅ,
ᐃᓱᐊᕐᑐᓪᓕ ᑕᑯᔪᒫᕐᐳᑦ ᑖᒃᑯᐊ ᑲᑕᖕᓂᖏᓐᓂᒃ.
17ᐃᕐᓃᑦ ᐋᖅᑭᒋᐊᕈᒃ, ᑕᕝᕙ ᑕᕾᕐᓯᕐᑎᑦᓱᒫᕐᐹᑎᑦ;
ᑕᕝᕙ ᐆᒻᒪᑏᑦ ᑖᑦᓱᒪ ᖁᕕᐊᓱᒃᑎᑦᓱᒫᕐᐹ.
18ᓇᓚᐅᑦᑍᓂᖃᖏᑉᐸᑦ ᐃᓄᐃᑦ ᓄᖅᑲᖓᓂᖃᓐᖏᓚᑦ,
ᖁᕕᐊᓱᒃᐳᕐᓕ ᑖᓐᓇ ᐱᖁᔭᓂᒃ ᓈᓚᒃᑐᖅ.
19ᐱᔨ ᐋᖅᑭᒋᐊᕐᑕᐅᔪᓐᓇᓐᖏᓚᖅ ᐅᖃᐅᓯᑐᐃᓐᓇᒃᑯᑦ;
ᑐᑭᓯᒐᓗᐊᕈᓂ, ᐱᖁᔭᐅᓂᕐᒥᓂᒃ ᒪᓕᓐᖏᓚᖅ.
20ᐊᖑᒻᒥᒃ ᑕᑯᕖᑦ ᐅᖃᕐᓴᕅᑦᑐᒥᒃ?
ᓯᓔᑦᑐᖅ ᓂᕆᐅᖕᓂᖃᕐᓂᕐᓴᐅᕗᖅ ᑖᑦᓱᒪᓐᖓᑦ.
21ᐱᔨᒥᓂᒃ ᓱᕈᓯᐅᓂᖓᓂᑦ ᐱᑦᓯᐊᖃᑦᑕᕐᑐᖅ
ᑭᖑᓂᖓᒍᑦ ᑭᖑᕐᖑᑦᔨᔨᑖᕆᔪᒫᕐᐹ ᑖᑦᓱᒪ.
22ᐊᖑᑦ ᓂᓐᖓᐅᒪᔪᖅ ᐊᑭᕋᕐᑐᓕᕐᑎᑦᓯᕗᖅ,
ᐊᖑᓪᓗ ᓂᓐᖓᐅᒪᓂᒃᑯᑦ ᐱᒋᐊᕐᑐᖅ ᐊᔪᕐᑐᓕᑎᑦᓯᕗᖅ.
23ᐊᖑᑦ ᐱᐅᔪᕆᓂᕐᒥᖕᓄᑦ ᑲᓐᖑᓱᒃᑎᑕᐅᔪᒫᕐᐳᖅ,
ᐱᐅᔪᕆᖏᑦᑐᕐᓕ ᐊᓂᕐᓂᕐᒥᒍᑦ ᐅᐱᒋᔭᐅᓕᕈᒫᕐᐳᖅ.
24ᑎᒡᓕᒃᑎᒥᒃ ᐱᖃᑎᓕᒃ ᐃᓅᓯᕐᒥᓂᒃ ᐆᒥᓱᒃᐳᖅ;
ᓱᓕᔪᒥᒃ ᐅᖃᕈᒪᒐᓗᐊᕐᓗᓂ, ᓴᖅᑭᑦᓯᔪᓐᓇᓐᖏᓚᖅ.
25ᐃᓄᖕᒥᒃ ᓯᕘᕋᔪᖅ ᐊᑦᓱᖏᕐᑕᐅᑎᑉᐳᖅ ᐃᒻᒥᓂᒃ,
ᐊᑕᓂᕐᒥᒡᓕ ᑕᑎᖃᕐᑐᖅ ᓴᐳᑎᔭᐅᕗᖅ.
26ᐅᓄᕐᑐᑦ ᐊᐅᓚᑦᓯᔨᒧᑦ ᐱᐅᒋᔭᐅᔪᒪᓂᕐᒥᒃ ᕿᓂᕐᐳᑦ,
ᐊᖑᑎᐅᓪᓕ ᐱᑦᓯᐊᕐᑕᐅᓂᖓ ᐊᑕᓂᕐᒥᑦ ᐱᕗᖅ.
27ᐃᓱᐃᑦᑐᓕᔪᖅ ᐱᐅᒋᔭᐅᓐᖏᓚᖅ ᐃᓱᐊᕐᑐᒧᑦ,
ᐃᓱᐊᕐᑐᕐᓗ ᐱᐅᒋᔭᐅᓐᖏᓚᖅ ᐃᓱᐃᑦᑐᒧᑦ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 29: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
