ᐅᐸᑍᐊᑉ ᐊᒡᓚᖏᑦ 1
1
1ᐅᑯᐊ ᑕᕝᕙ ᐅᐸᑍᐊᐅᑉ ᑕᑯᑎᑕᐅᑦᔪᑎᖏᑦ. ᐃᒫᒃ ᐊᑕᓂᖅ ᒎᑎ ᐅᖃᕐᐳᖅ ᐄᑐᒥ ᐱᓪᓗᒍ.
ᐊᑕᓂᐅᑉ ᓱᒋᐊᕈᒫᕐᐹ ᐄᑐᒥ
ᑐᓴᕐᓯᒪᕗᒍᑦ ᐅᖃᐅᓯᕐᒥᒃ ᐊᑕᓂᕐᒥᑦ ᐱᔪᒥᒃ,
ᐅᖃᕆᐊᕐᑐᕐᑐᒃᓴᖅ ᑎᓕᔭᐅᕗᖅ ᐃᓅᖃᑎᒌᒡᔪᐊᑦ ᐊᑯᕐᖓᓐᓄᑦ ᐅᖃᐅᑦᔭᐅᓪᓗᓂᓗ:
“ᒪᑭᓕᕆᑦᓯ! ᐅᓇᑕᕆᐊᕐᓚᕗᑦ ᐄᑐᒥ!”
2“ᑕᑯᒋᑦ ᒥᑭᓐᓂᕐᐸᐅᓕᕐᑎᑦᓱᒫᕐᐸᒋᑦ ᐃᓅᖃᑎᒌᒡᔪᐊᑦ ᐊᑯᕐᖓᓐᓂ;
ᑕᒤᓐᓄᑦ ᓇᕐᕈᒋᔭᐅᕕᒃᔪᐊᓕᕈᒫᕐᐳᑎᑦ.
3ᐆᒻᒪᑎᕕᑦ ᐱᐅᔪᕆᓂᖓᑕ ᐅᐃᕕᕆᕚᑎᑦ,
ᐃᕝᕕᑦ ᐃᓂᖃᕐᑐᑎᑦ ᕾᕐᑑᑉ ᖁᖕᓇᔪᖏᓐᓂ;
ᐳᕐᑐᔪᒥ ᐃᓂᖃᕐᑐᑎᑦ;
ᐆᒻᒪᑎᖕᓂ ᐅᖃᕐᑐᑎᑦ: ‘ᑭᐊ ᓄᓇᒧᑦ ᑲᑕᒃᑎᑦᓱᓐᓇᕐᐹᖔ?’
4ᓇᒃᑐᕋᓕᒃᑎᑐᑦ ᖁᒻᒧᐊᒃᑲᓗᐊᕈᕕᑦ,
ᐃᕙᕕᖃᕋᓗᐊᕈᕕᓪᓗ ᐅᓪᓗᕆᑦᔭᑦ ᐊᑯᕐᖓᓐᓂ,
ᑕᕝᕙᓐᖓᑦ ᑲᑕᒃᑎᑦᓱᒫᕐᐸᒋᑦ,” ᐊᑕᓂᖅ ᐅᖃᕐᐳᖅ.
5“ᑎᒡᓕᒃᑏᑦ ᑎᑭᓐᓂᐊᕐᐹᑎᑦ,
ᑎᒡᓕᒐᕐᕕᒋᓗᑎᓪᓗ ᐅᓐᓄᐊᒥ,
ᑕᕝᕙ ᓇᑲᑕᐅᔪᒫᕐᐳᑎᑦ!
ᑎᒡᓕᒃᑏᑦ ᐱᔪᒪᔭᓕᒫᒥᖕᓂᒃ ᐱᑐᐃᓐᓇᕐᓂᐊᓐᖏᓚᑦ?
ᕔᓂᓕᒃᓴᓂᒃ ᑲᑎᕐᓱᐃᔪᑦ ᑎᑭᓐᓇᔭᕐᐹᑎᑦ,
ᕔᓂᓕᒃᓴᑦ ᐱᐅᖏᓐᓂᕐᓗᑯᖏᓐᓂᒃ ᐱᒃᓴᓂᒃ ᕿᒤᒐᔭᓐᖏᓛᑦ?
6ᐄᓴᐅᑉ ᐱᖁᑎᖏᑦ ᑎᒡᓕᒐᕐᑕᐅᕗᑦ,
ᐱᕕᐊᕐᓇᕐᑐᖁᑎᖏᑦ ᐃᔨᕐᑐᐊᖏᑦ ᓇᓂᔭᐅᕗᑦ.
7ᐊᖏᖃᑎᒋᓚᐅᕐᑕᓕᒫᕕᑦ ᓯᓔᕐᕆᕚᑎᑦ ᓄᓇᐅᑉ ᑭᒡᓕᖓᓄᑦ ᐊᐅᓪᓚᕐᑎᓪᓗᑎᑦ;
ᐃᓕᖕᓄᑦ ᐱᑦᓯᐊᓚᐅᕐᑐᑦ ᓵᓚᒋᕚᑎᑦ;
ᓂᕆᖃᑎᒋᔭᑎᑦ ᒥᑭᒋᑦᔨᕐᐳᑦ ᐃᓕᖕᓄᑦ;
ᓇᓪᓕᐊᓐᓂᒡᓘᓐᓃᑦ ᒪᓗᒍᓱᒃᑐᖃᓐᖏᓚᖅ.”
8ᐊᑕᓂᖅ ᐅᖃᕐᐳᖅ, “ᐅᓪᓗᒥ ᑖᑦᓱᒪᓂ ᐃᓕᓯᒪᔪᑦ ᐲᔭᕐᓂᐊᓐᖏᓚᒃᑳ? ᐄᑐᒥᒥᑦ,
ᓯᓚᑐᔪᓪᓗ ᐄᓴᐅᑉ ᖃᖅᑲᖏᓐᓃᑦ?
9ᐱᒃᓴᕐᑐᔪᖁᑎᑎᓪᓗ ᓯᐊᒻᒪᕐᑎᑕᐅᔪᒫᕐᐳᑦ,
ᐆ ᑏᒪᓐ, ᑲᑉᐱᐊᓱᒃᑐᐊᓘᔪᒫᕐᐳᑦ,
ᑕᒪᕐᒥᒃ ᑐᖁᑕᐅᔪᒫᕐᐳᑦ ᐄᓴᐅᑉ ᖃᖅᑲᖓᓂ, ᐃᓄᐊᕐᑕᐅᓗᑎᒃ.”
ᐄᑐᒥᐅᑉ ᓱᒋᐊᕐᑕᐅᑦᔪᑎᖏᑦ
10“ᐊᑲᐅᖏᑦᑐᓕᓂᕆᓚᐅᕐᑕᑎᑦ ᓄᑲᕐᓄᑦ ᔧᑯᒧᑦ ᐱᑦᔪᑎᒋᓪᓗᒋᑦ,
ᑲᓐᖑᓱᖕᓂᕐᒧᑦ ᐅᓕᒃᑕᐅᔪᒫᕐᐳᑎᑦ,
ᓄᖑᑕᐅᓗᑎᓪᓗ ᐃᓱᖃᖏᑦᑐᒧᑦ.
11ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᕿᒫᑦᑍᓕᓗᑎᑦ ᓇᖏᕈᒫᕐᐳᑎᑦ,
ᓄᓇᓕᑐᖃᐅᖏᑦᑐᑦ ᐊᒃᓗᐃᑦᔪᑎᑦᓯᓐᓂᒃ ᐊᐅᓪᓚᕈᑦᔨᔪᒫᕐᒪᑕ,
ᓄᓇᓕᑐᖃᐅᖏᑦᑐᓪᓗ ᐃᑎᕈᑎᒃ ᐃᑎᕐᑕᕐᕕᖏᑎᒍᑦ,
ᔨᕉᓴᓕᒻᓗ ᐃᒻᒥᕋᐅᑎᒋᔪᒫᕐᐹᑦ ᓇᓚᐅᑦᑖᕈᑎᒃᑯᑦ,
ᐃᕝᕕᓪᓗ ᑍᒃᑯᑎᑐᓇᖅ ᑍᒤᖃᑕᐅᔪᒫᕐᐳᑎᑦ.
12ᓄᑬᓪᓗ ᖁᕕᐊᓲᑎᒋᔭᒃᓴᕆᓚᐅᓐᖏᓚᑦ ᐱᓂᕐᓗᒃᑕᐅᕕᐊᓂ;
ᔫᑕᐅᑉ ᑭᖑᕚᖏᑦ ᖁᕕᐊᓲᑎᒋᓂᐊᕐᓇᒋᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ;
ᐱᐅᔪᕆᔪᒃᓴᐅᓚᐅᓐᖏᓚᑎᑦ ᐅᓪᓗᖏᑕ ᑲᑉᐱᐊᓱᒃᑎᑕᐅᕕᖏᓐᓂ.
13ᐃᓄᖁᑎᒪ ᐃᑎᕐᑕᕐᕕᖓᓄᑦ ᐃᑎᕐᑐᒃᓴᐅᓚᐅᓐᖏᓚᑎᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ,
ᐃᓛᒃ ᑲᑉᐱᐊᓱᖕᓂᖏᓐᓂᒃ ᒥᑕᐅᑎᒃᓴᖃᑕᐅᔪᒃᓴᐅᓚᐅᓐᖏᓚᑎᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ,
ᐱᖁᑎᖏᓐᓂᒡᓗ ᐱᓇᓱᒃᑐᒃᓴᐅᓚᐅᓐᖏᓚᑎᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ.
14 #
ᐂᓮᐊᓯ 34:5-17; 63:1-6; ᔨᕆᒤᐊ 49:7-22; ᐃᓯᑭᐊᓕ 25:12-14; 35:1-15; ᐂᒨᓯ 1:11,12; ᒪᓚᑬ 1:2-5. ᓇᖏᕐᓂᐊᕐᓇᒃ ᐊᖅᑯᓯᓂᕐᓂ ᑭᐳᓐᖓᔫᖕᓂ ᕿᒫᔪᑦ ᑭᐱᔪᒪᓗᒋᑦ;
ᑎᒍᔭᐅᑎᓐᓂᐊᕐᓇᒋᓪᓗ ᑖᒃᑯᐊ ᐊᒥᐊᒃᑯᒋᔭᖏᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ.”
ᒎᑎᐅᑉ ᐃᓅᖃᑎᒌᒡᔪᐊᓕᒫᑦ ᐃᖅᑲᕐᑐᕈᒫᕐᐰᑦ
15“ᐊᑕᓂᐅᑉ ᐅᓪᓗᖓ ᖃᒡᓕᖕᒪᑦ ᐃᓅᖃᑎᒌᒡᔪᐊᓕᒫᓄᑦ;
ᐃᕝᕕᑦ ᐱᓂᐊᓚᐅᕋᕕᑦ, ᑍᒫᒃ ᐱᓂᐊᕐᕕᐅᔪᒫᕐᐳᑎᑦ;
ᐱᓂᐊᕐᓂᑎᑦ ᐅᑎᕈᒫᕐᐳᑦ ᓂᐊᖁᕐᓄᑦ.
16ᐃᒥᓚᐅᕋᕕᑦ ᖃᖅᑲᖁᑎᓐᓂᑦ ᐃᑦᔪᕐᓁᑦᑐᒥᑦ,
ᑍᒫᒃ ᐃᓅᖃᑎᒌᒡᔪᐊᓕᒫᑦ ᐊᕙᑎᑦᓯᓐᓃᑦᑐᑦ ᐃᒥᕈᒫᕆᕗᑦ;
ᐃᓛᒃ ᐃᒥᕈᒫᕐᐳᑦ ᑐᐊᕕᕐᓗᑎᒃ ᐄᓗᒍᓗ,
ᑍᒤᓚᐅᕐᓯᒪᖏᑦᑐᑎᑐᓪᓗ ᐃᓕᖓᔪᒫᕐᐳᑦ.”
ᐃᓴᕆᐊᓕᒥᐅᑦ ᓵᓚᖃᕐᓂᖓ
17“ᖃᖅᑲᒥ ᓮᐅᓂᒥ ᕿᒫᓯᒪᔪᖃᕈᒫᕐᐳᖅ,
ᐃᑦᔪᕐᓁᑦᑑᔪᒫᕐᐳᕐᓗ ᑖᓐᓇ ᖃᖅᑲᖅ;
ᔧᑰᓪᓗ ᑭᖑᕚᖏᑕ ᓄᓇᒋᓚᐅᕐᑕᑎᒃ ᐅᑎᕐᑎᑦᓱᒫᕆᕔᑦ.
18ᔧᑰᑉ ᑭᖑᕚᖏᑦ ᐃᑯᐊᓚᔪᒫᕐᐳᑦ,
ᔫᓯᐱᐅᓪᓗ ᑭᖑᕚᖏᑦ ᐃᑯᒪᐅᔪᒫᕐᓗᑎᒃ;
ᐄᓴᐅᓪᓗ ᑭᖑᕚᖏᑦ ᑭᑉᐸᑯᑎᑐᑦ ᑍᒤᑦᓱᒫᕐᐳᑦ;
ᐊᒥᐊᒃᑯᖃᕈᒫᓐᖏᓚᓪᓗ ᐄᓴᐅᑉ ᑭᖑᕚᖏᑦ;
ᐊᑕᓂᖅ ᑍᒫᒃ ᐅᖃᕐᒪᑦ.
19ᔫᑕᐅᑉ ᓯᕿᓂᖓᑕ ᓇᓛᓂᒥᐅᑦ ᐄᓴᐅᑉ ᖃᖅᑲᖓ ᐱᑖᕆᔪᒫᕐᐹᑦ,
ᐱᓕᔅᑍᓂᒥᐅᓪᓗ ᐱᑖᕆᔭᐅᔪᒫᕐᐳᖅ ᓯᕿᓂᐅᑉ ᓂᐱᕕᐊᑕ ᓇᓛᓂᒥᐅᑕᕐᓄᑦ;
ᐃᓴᕆᐊᓕᒃᑯᓪᓗ ᓄᓇᑖᕈᒫᕐᐳᑦ ᐃᕗᕅᒥᒃ ᓴᒥᐊᕆᐊᒥᒡᓗ;
ᐱᓐᔭᒥᓂᑯᑦ ᐃᓄᖏᑕ ᓄᓇᑖᕆᔪᒫᕐᐹᑦ ᒋᓕᐊᑎ.
20ᕼᐋᓚᒧᑦ ᐊᐅᓪᓚᕈᑦᔭᐅᓯᒪᔪᑦ ᐃᓴᕆᐊᓕᐅᑉ ᑭᖑᕚᖏᑦ ᓄᓇᑖᕈᒫᕐᐳᑦ
ᑬᓇᓂᒥᐅᑦ ᐊᑯᕐᖓᓐᓃᑦᑐᓂᒃ ᔨᕆᐸᑦ ᑎᑭᓪᓗᒍ,
ᔨᕉᓴᓕᒥᓪᓗ ᐊᐅᓪᓚᕈᑦᔭᐅᓯᒪᔪᑦ ᓯᑉᕼᐊᕋᒦᑦᑐᑦ
ᓄᓇᑖᕈᒫᕐᐳᑦ ᐃᒡᓗᒐᓴᖕᓂᒃ ᓯᕿᓂᐅᑉ ᓇᓛᓃᑦᑐᓂᒃ ᓂᒋᑉᒥ.
21ᓴᐳᑦᔨᔨᒃᓴᑦ ᒪᔪᐊᕈᒫᕐᐳᑦ ᓮᐅᓂᐅᑉ ᖃᖅᑲᖓᓄᑦ
ᐄᓴᐅᑉ ᖃᖅᑲᖓᓃᑦᑐᑦ ᐊᐅᓚᓐᓂᐊᕐᓗᒋᑦ,
ᐊᑕᓂᐅᕕᒡᓗ ᑖᓐᓇ ᐊᑕᓂᐅᑉ ᐱᒋᔪᒫᕐᐹ.”
Currently Selected:
ᐅᐸᑍᐊᑉ ᐊᒡᓚᖏᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
