ᒨᓯᓯ ᓯᑕᒪᖏᑦ 35
35
ᓕᕔᑎᑦ ᓄᓇᖁᑎᑖᕆᒋᐊᖃᕐᑕᖏᑦ
1 #
ᔮᓱᐊ 21:1-42. ᐊᑕᓂᐅᑉ ᒨᓯᓯ ᐅᖃᕐᕕᒋᕚ ᒧᐊᐱᐅᑉ ᓇᑎᕐᓇᖓᓂ ᔪᐊᕐᑕᓂᐅᑉ ᓴᓂᐊᓂᑎᓪᓗᒋᑦ ᔨᕆᑰᑉ ᐊᑭᐊᓂ, ᐅᖃᕐᓗᓂ: 2“ᐃᓴᕆᐊᓕᒥᐅᑦ ᐱᖁᒃᑭᑦ ᑐᓂᓯᖁᓗᒋᑦ ᓕᕔᑎᓄᑦ ᐃᒡᓗᒐᓴᒡᔪᐊᓂᒃ ᐃᓂᒋᓂᐊᕐᑕᖏᓐᓂᒃ ᓄᓇᖁᑎᑖᕆᔭᖏᓐᓃᑦᑐᓂᒃ, ᓕᕔᑎᓪᓗ ᓄᓇᖁᑎᑖᕐᑎᑦᓴᕆᐊᖃᕐᐸᓯ ᐃᒡᓗᒐᓴᒡᔪᐊᕐᑖᖏᑕ ᖃᓂᒋᔭᖏᓐᓃᑦᑐᓂᒃ. 3ᐃᒡᓗᒐᓴᒡᔪᐊᓂᒃ ᐃᓂᖃᕐᓂᐊᕐᒪᑕ; ᓄᓇᖓᓂᓗ ᐆᒪᔪᖁᑎᖏᑦ ᐃᒻᒧᕐᓯᐅᒐᖁᑎᖏᑦ, ᐆᒪᔪᖁᑎᖏᑦ ᐅᓄᕐᑐᑦ ᐃᓂᖃᕐᓂᐊᕐᒪᑕ, ᐆᒪᔪᖁᑎᖏᓪᓗ ᓱᓇᑐᐃᓐᓁᑦ. 4ᐃᒡᓗᒐᓴᒡᔪᐊᖏᑕ ᑭᒡᓕᖓ, ᑐᓂᔭᒃᓴᕆᕙᑦ ᓕᕔᑎᓄᑦ, ᐃᒡᓗᒐᓴᒡᔪᐊᖏᑕ ᐊᕙᓗᖓᓂᑦ ᓯᓚᑖᓄᑦ ᐆᒃᑑᑎᓂᒃ 500ᓂᒃ ᐊᖏᓂᖃᕆᐊᖃᕐᐳᖅ ᑬᕙᓪᓚᒃᓯᓯᒪᓗᓂ ᐃᒡᓗᒐᓴᖕᓂᒃ ᑲᓱᕐᓗᒍ. 5ᐆᒃᑐᕐᓯᔭᕆᐊᖃᕐᐳᓯᓗ ᐃᒡᓗᒐᓴᒡᔪᐊᑦ ᓯᕿᓂᖓᑕ ᓄᐃᕕᐊᑕ ᓯᓚᑖᒍᑦ ᐆᒃᑑᑎᓂᒃ 1,000ᓂᒃ ᓯᕿᓂᖓᓂᓗ 1,000ᓂᒃ, ᓂᐱᕕᐊᓂᓗ 1,000ᓂᒃ, ᐅᓐᓄᐊᓪᓗᐊᖓᓂᓗ 1,000ᓂᒃ. ᐃᒡᓗᒐᓴᒡᔪᐊᑦ ᕿᑎᖓᓃᑦᓴᕆᐊᖃᕐᐳᑦ. ᑖᒃᑯᐊ ᐆᒪᔪᖁᑎᖏᓐᓄᑦ ᐃᓂᒋᔭᐅᓗᑎᒃ ᐃᒡᓗᒐᓴᖏᓐᓂ. 6ᐃᒡᓗᒐᓴᒡᔪᐊᓂ ᓕᕔᑎᓄᑦ ᑐᓂᓂᐊᕐᑕᑦᓯᓐᓂ ᐃᒡᓗᒐᓴᒡᔪᐊᓂᒃ 6ᓂᒃ ᓇᓗᓁᕐᓯᔭᕆᐊᖃᕐᐳᓯ, ᓇᓪᓕᐊᑦ ᐱᔮᕆᖏᓪᓗᑎᒃ ᐃᓄᐊᕈᑎᒃ ᕿᒫᕕᒋᔪᓐᓇᕐᑕᖏᓐᓂᒃ. ᐊᒻᒪ ᓱᓕ ᐃᓚᓗᒋᑦ ᐃᒡᓗᒐᓴᒡᔪᐊᓂᒃ 42ᓂᒃ. 7ᑲᑎᓪᓗᒋᑦ ᐃᒡᓗᒐᓮᑦ ᓕᕔᑎᓄᑦ ᑐᓂᔭᓯ 48ᖑᔭᕆᐊᖃᕐᐳᑦ; ᑖᒃᑯᐊ ᐆᒪᔪᖁᑎᖏᑕ ᓄᓇᑖᕆᔭᖏᓐᓄᑦ ᐃᓚᓕᐅᑎᔭᕆᐊᖃᕐᐳᑦ. 8ᐃᒡᓗᒐᓮᓪᓗ ᑐᓂᔭᓯ ᐃᓴᕆᐊᓕᒥᐅᑦ ᓄᓇᖁᑎᑖᕆᔭᖏᓐᓂᑦ ᐱᔭᕆᐊᖃᕐᐳᑦ; ᑭᖑᕚᖑᖃᑎᒌᓂᑦ ᐅᓄᕐᓂᕐᓴᓂᑦ ᑐᓂᓯᔭᕆᐊᖃᕐᐳᓯ ᐅᓄᕐᓂᕐᓴᓂᒃ; ᑭᖑᕚᖑᖃᑎᒌᓂᓪᓗ ᐅᓄᖏᓐᓂᕐᓴᓂᑦ ᒥᑭᓂᕐᓴᓂᒃ ᑐᓂᓯᔭᕆᐊᖃᕐᐳᓯ. ᑭᖑᕚᖑᖃᑎᒌᓕᒫᑦ ᐊᑐᓂᑦ ᐃᒡᓗᒐᓴᖕᓂᒃ ᑐᓂᓯᔭᕆᐊᖃᕐᐳᑦ ᓕᕔᑎᓄᑦ, ᓄᓇᖁᑎᑖᕆᔭᑎᒃ ᐊᑐᓂᑦ ᐊᖏᓂᖏᑦ ᒪᓕᒡᓗᒋᑦ.”
ᐃᒡᓗᒐᓮᑦ ᕿᒫᕕᒃᓴᐅᔪᑦ
ᒨᓯᓯ ᑕᓪᓕᒪᖏᑦ 19:1-13; ᔮᓱᐊ 20:1-9
9 #
ᒨᓯᓯ ᑕᓪᓕᒪᖏᑦ 19:2-4; ᔮᓱᐊ 20:1-9. ᐊᒻᒪ ᐊᑕᓂᐅᑉ ᒨᓯᓯ ᐅᖃᕐᕕᒋᒋᕚ, ᐅᖃᕐᓗᓂ, 10“ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᐃᒤᓕᓗᑎᑦ: ‘ᔪᐊᕐᑕᓂᒥᒃ ᐃᑳᕈᑦᓯ ᓄᓇᒧᑦ ᑬᓇᓂᒧᑦ, 11ᓇᓗᓁᕐᓯᔭᕆᐊᖃᕐᐳᓯ ᐃᒡᓗᒐᓴᒡᔪᐊᓂᒃ ᕿᒫᕕᒃᓴᐅᔪᓐᓇᕋᔭᕐᑐᓂᒃ, ᓇᓪᓕᐊᑦ ᐃᓄᖕᒥᒃ ᑐᖁᑦᓯᒃᐸᑦ ᐱᔮᕆᖏᓪᓗᓂ ᕿᒫᕕᒋᒐᔭᕐᑕᖓᓂᒃ. 12ᐃᒡᓗᒐᓮᑦ ᑍᒤᑦᑐᑦ ᕿᒫᕕᒋᒐᔭᕋᑦᓯᐅᒃ ᐊᑭᓂᐊᕋᓱᐊᕐᑐᒥᑦ, ᐃᓄᖕᒥᒃ ᑐᖁᑦᓯᔪᖅ ᑐᖁᑕᐅᑲᐅᑎᒋᖁᓇᒍ ᐃᓅᖃᑎᒌᒡᔪᐊᑦ ᐃᖅᑲᕐᑐᐃᔨᖏᑕ ᓵᖓᓂ ᓇᖏᓚᐅᕐᑎᓐᓇᒍ. 13ᐃᒡᓗᒐᓮᓪᓗ ᑐᓂᔭᓯ ᐃᓚᖏᓐᓂᒃ, ᐃᒡᓗᒐᓴᖕᓂᒃ ᕿᒫᕕᒃᓴᓂᒃ ᐱᖓᓲᔪᕐᑐᓂᒃ ᐋᖅᑭᒃᓯᔪᒃᓴᐅᕗᓯ. 14ᐃᒡᓗᒐᓴᖕᓂᒃ ᑍᒤᑦᑐᓂᒃ ᐱᖓᓱᓂᒃ ᐋᖅᑭᓯᔪᒃᓴᐅᕗᓯ ᔪᐊᕐᑕᓂᐅᑉ ᐊᑭᐊᓂ ᑕᒫᓂ ᓇᔪᕐᑕᑦᑎᓐᓂ, ᑬᓇᓂᐅᓪᓗ ᓄᓇᖓᓂ ᐱᖓᓱᓂᒃ ᐃᒡᓗᒐᓴᒡᔪᐊᓂᒃ ᐋᖅᑭᒃᓯᔪᒃᓴᐅᕗᓯ, ᐃᒡᓗᒐᓴᒡᔪᐊᓂᒃ ᕿᒫᕕᒃᓴᓂᒃ. 15ᑖᒃᑯᐊ ᐃᒡᓗᒐᓮᑦ ᕿᒫᕕᒃᓴᐅᔭᕆᐊᖃᕐᐳᑦ ᐃᓴᕆᐊᓕᒥᐅᓄᑦ, ᐃᓅᖃᑎᑐᖃᕆᓐᖏᑕᑦᓯᓐᓄᑦ, ᑕᒫᓂᓗ ᓄᓇᖃᕐᑐᓄᑦ ᐃᓚᒋᓐᖏᑕᑦᓯᓐᓄᑦ, ᓇᓪᓕᐊᑦ ᐱᔮᕆᖏᓪᓗᓂ ᐃᓄᖕᒥᒃ ᑐᖁᑦᓯᒃᐸᑦ ᕿᒫᔪᓐᓇᖁᓪᓗᒍ.
16“‘ᐃᓄᒡᓕ ᓴᕕᕋᔭᖕᒧᑦ ᐊᓇᐅᓯᒃᐸᑦ, ᑐᖁᑦᓯᓗᓂᓗ, ᑖᓐᓇ ᐃᓄᐊᕐᑑᕗ; ᐃᓄᐊᕐᑐᕐᓗ ᑐᖁᑕᐅᓪᓚᕆᒋᐊᖃᕐᐳᖅ. 17ᐅᔭᕋᖕᒧᓪᓕ ᒥᓗᕐᐸᒍ ᑎᒍᒥᐊᕐᑕᒥᓄᑦ, ᑐᖁᒍᑕᐅᓪᓗᐊᕐᑐᒧᑦ ᑐᖁᒃᐸᑦ, ᑍᒤᓕᐅᕐᑐᖅ ᐃᓄᐊᕐᑑᕗᖅ, ᐃᓄᐊᕐᑐᕐᓗ ᖁᓚᕐᓇᖏᑦᑐᒥᒃ ᑐᖁᑕᐅᔭᕆᐊᖃᕐᐳᖅ. 18ᕿᔪᖕᒥᒡᓕ ᓱᒋᐅᑎᖃᕐᓗᓂ ᐊᓇᐅᒃᐸᒍ, ᑐᖁᒍᑕᐅᓪᓗᐊᕐᑐᒧᑦ, ᑐᖁᒃᐸᑦ, ᑍᒤᓕᐅᕐᑐᖅ ᐃᓄᐊᕐᑑᕗᖅ, ᐃᓄᐊᕐᑐᕐᓗ ᖁᓚᕐᓇᖏᑦᑐᒥᒃ ᑐᖁᑕᐅᔭᕆᐊᖃᕐᐳᖅ. 19ᐊᑭᓂᐊᕐᑑᑉ ᐊᐅᒃ ᐃᒻᒥᓄᑦ ᐱᑎᒻᒪᒍ ᐃᓄᐊᕐᑐᖅ ᑐᖁᑦᓴᕆᐊᖃᕐᐹ; ᑲᑎᒍᓂᐅᒡᓗ, ᑐᖁᑦᓴᕆᐊᖃᕐᓗᒍ.
20“‘ᓇᓕᐊᓪᓕ ᓂᓐᖓᐅᒪᓂᕐᒧᑦ ᐃᓄᖕᒥᒃ ᐊᔭᒃᓯᒃᐸᑦ, ᐃᔨᕐᓯᒪᓗᓂᓗ ᐅᑕᖅᑭᓗᒍ, ᒥᓗᕆᐊᕐᓗᒍ ᓱᓇᑐᐃᓐᓇᕐᒧᑦ, ᑖᓐᓇᓗ ᑐᖁᒃᐸᑦ, 21ᐆᒥᓱᖕᓂᕐᒧᓪᓗ ᐱᒋᐊᕐᐸᒍ ᐊᒡᒐᒥᓄᑦ ᑑᕐᓗᒍ ᑐᖁᓪᓗᒍᓗ, ᑍᒤᓕᐅᕐᓯᔪᖅ ᑐᖁᑕᐅᓪᓚᕆᒋᐊᖃᕐᐳᖅ. ᐃᓄᐊᕐᑑᖕᒪᑦ; ᐊᐅᖕᒥᒡᓗ ᐊᑭᓂᐊᕐᑑᑉ ᐃᓄᐊᕐᓯᒪᔪᖅ ᑐᖁᑕᒃᓴᕆᕚ ᑲᑎᒍᓂᐅᒃ.
22“‘ᑭᓯᐊᓂᓕ, ᐊᔭᑳᓪᓚᒃᐸᒍ ᐆᒥᓱᖕᓂᕐᒨᖏᑦᑐᖅ, ᐃᒋᑦᓯᕕᒋᒃᐸᒍᓗ ᐃᔨᕐᓯᒪᓗᓂ ᐅᑕᖅᑭᖏᑉᐸᒍ, 23ᐅᔭᕋᖕᒥᒡᓗ ᓱᒋᐅᑎᖃᖏᓪᓗᓂ, ᐃᓅᑉ ᑐᖁᒃᔪᑎᒋᓪᓗᐊᕐᑕᖓᓂᒃ, ᑕᑯᖏᓪᓗᓂᐅᒃ ᒥᓗᕐᐸᒍ, ᑖᓐᓇᓗ ᑐᖁᒃᐸᑦ, ᐊᑭᕋᕆᓗᓂᐅᒃ ᐱᖏᑉᐸᑦ ᐋᓐᓂᕋᓱᐊᖏᓪᓗᓂᐅᒡᓗ, 24ᑕᕝᕙ ᐃᓅᖃᑎᒌᒡᔪᐊᑦ ᐃᖅᑲᕐᑐᐃᔨᖏᑦ ᐃᖅᑲᕐᑐᐃᔭᕆᐊᖃᓕᕐᐳᑦ ᐃᓄᐊᕐᑐᒥᒃ ᐊᐅᖕᒥᒡᓗ ᐊᑭᓂᐊᕈᒪᔪᒥᒃ ᐃᖅᑲᕐᑐᐃᓃᑦ ᐅᑯᐊ ᒪᓕᒡᓗᒋᑦ. 25ᐃᓅᖃᑎᒌᒡᔪᐊᑦ ᓴᐳᑎᔭᕆᐊᖃᕐᐹᑦ ᐃᓄᐊᕐᑐᖅ ᐊᐅᖕᒥᒃ ᐊᑭᓂᐊᕈᒪᔪᒥᑦ, ᐃᓅᖃᑎᒌᒡᔪᐊᑦ ᐅᑎᕐᑎᑦᓴᕆᐊᖃᕐᐹᑦ ᐃᒡᓗᒐᓴᒡᔪᐊᓄᑦ ᕿᒫᕕᒃᓴᓄᑦ ᕿᒫᕕᒋᓯᒪᔭᖓᓄᑦ, ᑕᕝᕙᓂᓗ ᐃᓂᖃᓕᕐᓗᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦ ᐅᕐᓱᒧᑦ ᐃᑦᔪᕐᓁᑦᑐᒧᑦ ᒥᖑᐊᕐᑕᐅᓯᒪᔪᖅ ᑐᖁᓚᐅᖏᓐᓂᖓᓂ. 26ᐃᓄᐊᓚᐅᕐᑐᕐᓕ ᖃᖓᑐᐃᓐᓇᖅ ᐃᒡᓗᒐᓴᒡᔪᐊᑦ ᕿᒫᕖᑦ ᑭᒫᕕᒋᓯᒪᔭᒥ ᓯᓚᑖᓄᐊᕐᐸᑦ, 27ᐊᐅᒡᓗ ᐱᓪᓗᒍ ᐊᑭᓂᐊᕈᒪᔫᑉ ᖃᐅᔨᒃᐸᒍ ᐃᒡᓗᒐᓴᒡᔪᐊᑦ ᕿᒫᕖᑦ ᓯᓚᑖᓃᑦᑐᖅ, ᑕᕝᕙ ᐊᐅᒃ ᐱᓪᓗᒍ ᐊᑭᓂᐊᕈᒪᔫᑉ ᐃᓄᐊᓚᐅᕐᑐᖅ ᑐᖁᒍᓐᓇᕐᐹ, ᐊᐅᖕᒧᓪᓗ ᑕᒪᑐᒧᖓ ᐸᓯᔭᒃᓴᐅᒐᔭᓐᖏᓚᖅ. 28ᑖᓐᓇ ᐃᒡᓗᒐᓴᒡᔪᐊᓂ ᕿᒫᕕᖕᒥ ᐃᓂᖃᑦᓮᓇᕆᐊᖃᕐᒪᑦ ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖓᑦ ᑐᖁᓚᐅᖏᓐᓂᖓᓂ. ᑐᓂᕐᕈᓯᕐᑎᑦᔨᓪᓕ ᐊᖓᔪᖅᑳᖓᑕ ᑐᖁᓂᖓᑕ ᑭᖑᓂᖓᒍᑦ, ᐃᓄᐊᓚᐅᕐᑐᖅ ᓄᓇᖁᑎᑖᕆᓚᐅᕐᑕᒥᓄᑦ ᐅᑎᕈᓐᓇᕐᓯᕗᖅ. 29ᑕᒪᒃᑯᐊ ᐃᖅᑲᕐᑐᐃᔨᒧᑦ ᒪᓕᒐᒃᓴᐅᔭᕆᐊᖃᕐᐳᑦ ᐃᓕᑦᓯᓐᓄᑦ ᑭᖑᕚᑦᓯᓐᓄᓪᓗ ᑐᕌᖓᓗᑎᒃ ᐃᓂᒋᔭᑦᓯᓐᓂ.
30 #
ᒨᓯᓯ ᑕᓪᓕᒪᖏᑦ 17:6; 19:15. “‘ᓇᓪᓕᐊᑦ ᐃᓄᖕᒥᒃ ᑐᖁᑦᓯᔪᖅ, ᐃᓄᐊᕐᑐᖅ ᑐᖁᑕᐅᔭᕆᐊᖃᕐᐳᖅ ᖃᐅᔨᔪᕕᓃᑦ ᐅᖃᐅᓯᖏᑦ ᒪᓕᒡᓗᒋᑦ; ᐊᑕᐅᓯᐅᓪᓕ ᖃᐅᔨᔪᕕᓂᐅᑉ ᐅᖃᐅᓯᖏᑦ ᓈᒻᒪᒃᓯᑎᑦᓯᓐᖏᓚᑦ ᐃᓄᑉ ᑐᖁᑦᓯᔪᕕᓂᐅᑉ ᑐᖁᑕᐅᔭᕆᐊᖃᕐᓂᖓᓄᑦ. 31ᓱᓕᓗ ᐃᓅᑉ ᐊᑭᓕᐅᑎᒃᓴᖓᓂᒃ ᐊᑭᓖᓇᓱᐊᕆᐊᖃᓐᖏᓚᓯ ᐃᓄᐊᕐᓯᒪᔫᑉ ᑐᖁᑕᐅᖏᑦᔪᑎᒃᓴᖓᓂᒃ, ᑖᓐᓇ ᑐᖁᑕᐅᓪᓚᕆᒋᐊᖃᕐᒪᑦ. 32ᐊᑭᓖᔭᕆᐊᖃᓐᖏᓚᓯᓗ ᐃᒡᓗᒐᓴᒡᔪᐊᓄᑦ ᕿᒫᕕᖕᓄᑦ ᕿᒫᓯᒪᔪᒥᒃ, ᓄᓇᖁᑎᒋᓚᐅᕐᑕᒥᓄᑦ ᐅᑎᖁᓗᒍ ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖓ ᑐᖁᓚᐅᖏᓐᓂᖓᓂ. 33ᓄᓇ ᐃᓂᒋᔭᓯ ᐃᑦᔪᕐᓇᕐᑑᓕᖁᓇᒍ; ᐊᐅᑉ ᓄᓇ ᐃᑦᔪᕐᓇᕐᓯᑎᒻᒪᒍ, ᓄᓇᓗ ᓱᓇᒧᑦ ᓴᓗᒻᒪᕐᑎᑕᐅᔪᓐᓇᕋᓂ, ᐊᐅᒃ ᑯᕕᔭᐅᓯᒪᔪᖅ ᑕᒪᐅᖓ ᐱᓪᓗᒍ, ᑭᓯᐊᓂ ᐊᐅᖕᒥᒃ ᑯᕕᓯᓚᐅᕐᑑᑉ ᓴᓗᒻᒪᕐᑎᑦᓱᓐᓇᕐᒪᒍ. 34ᓄᓇ ᐃᓂᒋᓂᐊᑕᕐᓯ ᓴᓗᒤᓕᑎᑦᓴᕆᐊᖃᓐᖏᓚᓯᐅᒃ, ᐊᑯᓐᓇᑦᓯᓐᓂᑦᑕᐅᖅ ᐃᓂᖃᕋᒪ; ᐅᕙᖓ ᐊᑕᓂᖅ ᐃᓴᕆᐊᓕᒥᐅᑦ ᐊᑯᕐᖓᓐᓂ ᐃᓂᖃᕐᐳᖓ.’”
Currently Selected:
ᒨᓯᓯ ᓯᑕᒪᖏᑦ 35: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
