ᒨᓯᓯ ᓯᑕᒪᖏᑦ 31
31
ᒥᑎᐊᓂᒥᐅᑦ ᓵᓚᐅᓂᖓ
1ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ: 2“ᒥᑎᐊᓂᒥᐅᑦ ᐊᑭᒋᐊᓕᕐᓯᒋᒃ ᐃᓴᕆᐊᓕᒥᐅᑦ ᐱᓪᓗᒋᑦ. ᐱᔭᕇᕐᐸᑕ ᐃᓅᔪᓐᓃᕐᓂᐊᓕᕋᕕᑦ.”
3ᑍᒤᒻᒪᑦ ᒨᓯᓯᐅᑉ ᐃᓄᐃᑦ ᐅᖃᕐᕕᒋᕔᑦ, ᐅᖃᕐᓗᓂ, “ᐃᓚᓯ ᐃᓚᖏᑦ ᐅᓇᑕᐅᑎᓂᒃ ᐊᑎᓕᕐᓕᑦ, ᐊᑭᓂᐊᕆᐊᕐᑐᕐᓗᑎᒃ ᒥᑎᐊᓂᒥᐅᓂᒃ ᐊᑕᓂᖅ ᐊᑭᓂᐊᕈᑎᔭᕐᑐᕐᓗᒍ ᒥᑎᐊᓂᒥᐅᓄᑦ. 41,000ᓂᒃ ᑭᖑᕚᖑᖃᑎᒌᓂᑦ ᐊᑐᓂᑦ ᐃᓴᕆᐊᓕᒥᐅᓂᑦ ᑎᓕᓯᓂᐊᕐᐳᓯ ᐅᓇᑕᕆᐊᕐᓂᐊᕐᑐᓂᒃ.”
5ᐅᓇᑕᕆᐊᕐᑐᒃᓮᑦ ᐸᕐᓇᓚᐅᕐᐳᑦ ᐃᓴᕆᐊᓕᒥᐅᑦ ᐊᕕᒃᑐᕐᓯᒪᔪᑦ ᑭᖑᕚᖑᖃᑎᒌᑦ ᐊᑐᓂᑦ ᑎᓕᓯᓪᓗᑎᒃ 1,000ᓂᒃ, ᑲᑎᓪᓗᒋᑦ 12,000ᐅᓚᐅᕐᐳᑦ. 6ᑕᕝᕙ ᒨᓯᓯᐅᑉ ᐅᓇᑕᕆᐊᕐᑎᓚᐅᕐᐰᑦ 1,000ᓂᒃ ᑭᖑᕚᖑᖃᑎᒌᑦ ᐊᑐᓂᑦ; ᐅᓇᑕᕆᐊᕐᑎᑉᐰᑦ ᐃᓚᖃᕐᓗᑎᒃ ᐱᓂᕼᐋᓯᒥᒃ ᐃᓕᓯᕆᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᓂᒃ, ᐃᑦᔪᕐᓁᑦᑐᓂᒃ ᓇᒃᓴᕐᓗᓂ ᑎᑦᑐᓚᐅᑎᒥᒡᓗ ᓇᓗᓁᕐᓯᑦᔪᑎᒥᒃ. 7ᒥᑎᐊᓂᒥᐅᓂᒃ ᐅᓇᑕᖃᑎᖃᓚᐅᕐᐳᑦ, ᐊᑕᓂᐅᑉ ᒨᓯᓯᒥᒃ ᐱᖁᔨᓂᖓ ᒪᓕᒡᓗᒍ, ᐊᖑᑎᓕᒫᑦ ᑐᖁᑉᐰᑦ. 8ᒥᑎᐊᓂᒥᐅᓪᓗ ᐊᖓᔪᖅᑳᕐᔪᐊᖏᑦ ᑐᖁᑉᐰᑦ ᑐᖁᑕᐅᔪᑦ ᐃᓚᒋᓪᓗᒋᑦ ᐅᑯᐊ- ᐃᕕ, ᕆᑭᒻ, ᔫᕆ, ᕼᐊᕐ, ᐊᒻᒪᓗ ᕆᐸ, ᑕᓪᓕᒪᑦ ᒥᑎᐊᓂᒥᐅᑦ ᐊᖓᔪᖅᑳᕐᔪᐊᑦ. ᐸᓛᒻ-ᑕᐅᖅ ᐱᐅᕆᐅᑉ ᐃᕐᓂᖓ ᓴᕕᒃᔪᐊᒧᑦ ᑐᖁᓚᐅᕆᕚᑦ.
9ᐃᓴᕆᐊᓕᒥᐅᑦ ᒥᑎᐊᓂᒥᐅᓂᒃ ᐊᕐᓇᓕᒫᓂᒃ ᑎᒍᓯᓚᐅᕐᐳᑦ ᐊᐅᓪᓚᕈᑎᓪᓗᒋᑦ, ᕿᑐᕐᖓᑯᓗᖏᓪᓗ, ᐆᒪᔪᖁᑎᓕᒫᖏᓪᓗ, ᓰᐱᖁᑎᖏᓪᓗ, ᐱᖁᑎᓕᒫᖏᓪᓗ. 10ᐃᒡᓗᒐᓴᒡᔪᐊᖁᑎᖏᑦ ᐃᑯᒪᒧᑦ ᐃᑯᐊᓪᓚᒃᑎᓪᓗᒋᑦ ᐊᖏᕐᕋᕆᔭᖏᑦ, ᐃᒡᓗᒐᓴᒡᔪᐊᖏᑕᓗ ᓴᐳᓗᑕᖏᑦ. 11ᐱᖁᑎᓕᒫᖏᑦ ᑎᒍᓚᐅᕐᐰᑦ, ᐃᓄᖏᓪᓗ ᐆᒪᔪᖁᑎᖏᓪᓗ. 12ᑎᒍᔭᑎᒃ ᐃᓄᐃᑦ, ᐆᒪᔪᓪᓗ, ᐱᖁᑎᖏᓪᓗ ᒨᓯᓯᒧᑦ ᐂᑦᔪᑎᓚᐅᕐᐰᑦ, ᑐᓂᕐᕈᓯᕐᑎᑦᓯᔨᒧᓪᓗ ᐃᓕᓯᕆᒧᑦ, ᐃᓴᕆᐊᓕᒥᐅᓄᓪᓗ ᑲᑎᒪᔪᕐᔪᐊᓄᑦ, ᓇᑎᕐᓇᒥ ᒧᐊᐱᒥ ᑕᖕᒫᕐᓯᒪᔪᓄᑦ ᔪᐊᕐᑕᓂᐅᑉ ᓯᓈᓂ ᔨᕆᑰᑉ ᐊᑭᐊᓂ.
ᐅᓇᑕᕐᑐᒃᓮᑦ ᐅᑎᕐᓂᖓᑦ
13ᒨᓯᓯ, ᑐᓂᕐᕈᓯᕐᑎᑦᓯᔨᓗ ᐃᓕᓯᕆ, ᐃᓴᕆᐊᓕᒥᐅᓪᓗ ᓯᕗᓕᕐᑎᖏᑕ ᐸᕐᕆᐊᓚᐅᕐᐰᑦ ᑕᖕᒫᕐᓯᒪᕕᐅᑉ ᓯᓚᑖᓄᑦ. 14ᒨᓯᓯᓕ ᓂᓐᖓᐅᒪᓕᓚᐅᕐᐳᖅ ᐅᓇᑕᕐᑐᒃᓮᑦ ᐊᖓᔪᖅᑳᖏᓐᓄᑦ, 1,000ᓄᑦ ᐊᖓᔪᖅᑳᖑᔪᓄᑦ 100ᓄᓪᓗ ᐊᖓᔪᖅᑳᖑᔪᓄᑦ, ᐅᓇᑕᕆᐊᕐᓯᒪᓚᐅᕐᑐᓄᑦ. 15ᒨᓯᓯᐅᓪᓗ ᐅᖃᐅᑎᕔᑦ, “ᐊᕐᓁᑦ ᑐᖁᓴᖏᑉᐱᓯᐅᒃ? 16#ᒨᓯᓯ ᓯᑕᒪᖏᑦ 25:1-9.ᑕᑯᒋᑦ, ᐊᕐᓁᑦ ᐅᑯᐊ ᐃᓴᕆᐊᓕᒥᐅᓂᒃ ᐱᐅᖏᑦᑐᓕᑎᑦᓯᓚᐅᕐᑐᑦ, ᐸᓛᒻᒥᐅᑉ ᐱᖁᔨᓂᖓᒍᑦ, ᐱᐅᖏᑦᑐᓕᖁᔨᓪᓗᓂ ᐊᑕᓂᕐᒧᑦ ᐱᐅᕆᒥ, ᓂᖓᐅᑦᔭᐅᓯᒪᓂᕐᒥᒡᓗ ᑐᖁᓮᔪᒥᒃ ᐱᔪᖃᓕᓚᐅᕐᐳᖅ ᐊᑕᓂᐅᑉ ᐃᓄᒋᐊᒃᑐᕐᔪᐊᖁᑎᖏᓐᓂ. 17ᑍᒤᒻᒪᑦ ᒫᓐᓇ ᓱᕈᓰᑦ ᐊᖑᑎᑦ ᑐᖁᓕᕐᓯᒋᑦ, ᐊᕐᓁᓪᓗ ᐊᖑᒻᒥᒃ ᐱᖃᑎᖃᓚᐅᕐᓯᒪᔪᓕᒫᑦ. 18ᓂᕕᐊᕐᓯᐊᓪᓕ ᐃᓅᑎᓪᓗᒋᑦ ᐱᑖᕆᓕᕐᓯᐅᒃ ᐊᖑᒻᒥᒃ ᐱᖃᑎᖃᓚᐅᕐᓯᒪᖏᑦᑐᑦ. 19ᐃᓕᑦᓯᓗ ᑕᖕᒫᕐᓯᒪᕕᐅᑉ ᓯᓚᑖᓃᑦᓴᕆᐊᖃᕐᐳᓯ ᐅᓪᓗᓂᒃ 7ᓂᒃ; ᑭᓇᑯᑐᐃᓐᓁ ᐃᓄᖕᒥᒃ ᑐᖁᑦᓯᓚᐅᕐᑐᑦ, ᑐᖁᑕᐅᓯᒪᔪᒥᒡᓗ ᐊᒃᑐᕐᓯᓚᐅᕐᑐᑦ, ᐃᓕᑦᓯᓐᓂᒃ ᓴᓗᒻᒪᕐᓴᕆᐊᖃᕐᐳᓯ ᑎᒍᓯᒪᔭᓕᒫᓯᓗ ᐅᓪᓗᐃᑦ ᐱᖓᔪᐊᓐᓂᒃ ᐅᓪᓗᐃᓪᓗ 7ᖓᓂᒃ. 20ᐊᓐᓄᕌᓕᒫᑦ ᓴᓗᒻᒪᕐᓴᕆᐊᖃᕐᐳᑦ, ᐆᒪᔪᐃᓪᓗ ᐊᒥᕕᓂᖏᑦ ᐊᓐᓄᕌᓕᐊᕆᓯᒪᔪᓕᒫᑦ, ᒎᑦᓯᓪᓗ ᒥᖅᑯᖏᓐᓂᑦ ᓄᕕᕐᓴᕐᓯᒪᔪᑦ, ᕿᔪᐃᓪᓗ ᓴᓇᓯᒪᔪᑦ.”
21ᑐᓂᕐᕈᓯᕐᑎᑦᓯᔨᐅᑉ ᐃᓕᓯᕆᐅᑉ ᐊᖑᑎᑦ ᐅᓇᑕᕆᐊᓚᐅᕐᑐᑦ ᐅᖃᐅᑎᕔᑦ, “ᑕᒪᑦᔭ ᐱᖁᔭᖅ ᐊᑕᓂᐅᑉ ᐊᑐᕐᑕᐅᖁᔭᖓ ᒨᓯᓯᒃᑯᑦ: 22ᑭᓯᒥ ᒎᓗᐃᑦ, ᓯᐅᓪᕕᕇᓪᓗ, ᖃᑯᕐᓖᓪᓗ, ᓴᕕᕋᔧᓪᓗ, ᐊᒥᕐᑍᓪᓗ, ᑯᓯᕐᓯᐊᓪᓗ, 23ᓱᓇᑐᐃᓐᓁᑦ ᐃᑯᒪᒧᑦ ᓄᖑᑕᐅᔪᓐᓇᖏᑦᑐᑦ, ᐃᑯᐊᓚᔪᒃᑰᕐᑎᑦᓴᕆᐊᖃᕐᐸᓯ, ᓴᓗᒻᒪᕐᓂᐊᕐᒪᑕ; ᓴᓗᒻᒪᕐᓴᕐᓂᐊᕐᐳᑦ ᐃᒥᕐᒧᑦ ᓴᓗᒻᒪᕐᓴᐅᑎᓕᐊᕆᓯᒪᔪᒧᑦ. ᐊᓯᖏᓪᓕ ᐃᑯᒪᒧᑦ ᓄᖑᑕᐅᔪᓐᓇᕐᑐᑦ ᐃᒪᕐᒧᑦ ᓴᓗᒻᒪᕐᓴᕆᐊᖃᕐᐸᓯ. 24ᐊᓐᓄᕌᓯ ᐅᐊᓴᕆᐊᖃᕐᐸᓯ ᐅᓪᓗᐃᑦ 7ᖓᓂ ᓴᓗᒻᒪᕐᓗᓯᓗ, ᑭᖑᓂᖓᒍᑦ ᑕᖕᒫᕐᓯᒪᔪᓄᑦ ᐃᑎᕈᓐᓇᕐᓯᓂᐊᕐᐳᓯ.”
ᐱᖁᑎᑦ ᑎᒍᔭᐅᓚᐅᕐᑐᑦ ᐊᒡᒍᕐᑕᐅᓂᖏᑦ
25ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ: 26“ᓈᓴᕐᓯᒋᒃ ᑎᒍᔭᕕᓂᓕᒫᑦ, ᐃᓄᐃᑦ ᐆᒪᔪᓪᓗ, ᐃᕝᕕᓪᓗ, ᑐᓂᕐᕈᓯᕐᑎᑦᓯᔨᐅᔪᕐᓗ ᐃᓕᓯᕆ, ᑭᖑᕚᖑᖃᑎᒌᓪᓗ ᓯᕗᓕᕐᑎᖏᑦ. 27ᑎᒍᔭᕕᓂᓕᒫᑦ ᒪᕐᕈᐃᓕᓗᒋᑦ, ᐊᒡᒍᕐᓗᒋᑦ ᐅᓇᑕᕆᐊᓚᐅᕐᑐᓄᑦ, ᐅᓇᑕᖃᑕᐅᓚᐅᕐᑐᓄᑦ, ᐃᓄᒋᐊᒃᑐᕐᔪᐊᓄᓪᓗ. 28ᐅᓇᑕᕆᐊᕐᓯᒪᓚᐅᕐᑐᑦ, ᑐᓂᔭᒃᓴᒥᖕᓂᒃ ᐊᑕᓂᕐᒧᑦ ᓴᓂᕐᕔᔭᕆᐊᖃᕐᐳᑦ, ᐱᑖᒥᖕᓂᑦ 500ᓂᑦ ᐊᑕᐅᓯᕐᒥᒃ, ᐃᓄᖕᓂᒃ, ᐃᒻᒧᕐᓯᐅᒐᓂᒡᓗ, ᓯᐅᑎᖅᑯᕐᑐᔪᓂᒡᓗ, ᓰᐱᓂᒡᓗ, ᒎᑦᓯᓂᒡᓗ ᐆᒪᔪᓂᒡᓗ ᐊᓯᖏᓐᓂᒃ. 29ᑖᒃᑯᐊ ᐊᕝᕙᖏᑦ ᑎᒍᒃᑭᑦ, ᑐᓂᓗᒋᓪᓗ ᑐᓂᕐᕈᓯᕐᑎᑦᓯᔨᒧᑦ ᐃᓕᓯᕆᒧᑦ ᐃᓵᒃᑕᕈᑎᑐᑦ ᑐᓂᕐᕈᑕᐅᖁᓪᓗᒋᑦ ᐊᑕᓂᕐᒧᑦ. 30ᐃᓴᕆᐊᓕᒥᐅᓪᓗ ᐱᔭᒃᓴᖏᓐᓂᑦ 50ᓂᑦ ᑕᒫᑦ ᐊᑕᐅᓯᕐᒥᒃ ᑎᒍᓯᔭᕆᐊᖃᕐᐳᑎᑦ, ᐃᓄᖕᓂᒃ, ᐃᒻᒧᒃᓯᐅᒐᓂᒡᓗ, ᓯᐅᑎᖅᑯᕐᑐᔪᓂᒡᓗ, ᓰᐱᓂᒡᓗ, ᐆᒪᔪᓕᒫᓪᓗ, ᓕᕔᑎᓄᑦ ᑐᓂᓗᒋᑦ ᐊᑕᓂᐅᑉ ᑐᐱᕐᔪᐊᖁᑎᖓᓂ ᑲᒪᔨᐅᔪᓄᑦ.” 31ᒨᓯᓯᓗ ᐃᓕᓯᕆᓗ ᑐᓂᕐᕈᓯᕐᑎᑦᓯᔨᐅᔪᖅ ᑍᒫᒃ ᐱᓇᓱᐊᕐᐴᒃ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ.
32ᓵᓚᖃᕐᓂᕐᒧᑦ ᑎᒍᔭᐅᔪᑦ, ᐊᖑᑎᑦ ᐅᓇᑕᓚᐅᕐᓗᑎᒃ ᑎᒍᓚᐅᕐᑕᖏᑦ ᐅᓄᕐᓂᖃᓚᐅᕐᐳᑦ ᓰᐱᑦ 675,000ᐅᓚᐅᕐᐳᑦ, 33ᐃᒻᒧᒃᓯᐅᒊᑦ 72,000ᐅᓪᓗᑎᒃ, 34ᓯᐅᑎᖅᑯᕐᑐᔪᑦ 61,000ᐅᓪᓗᑎᒃ, 35ᐃᓄᐃᑦ 32,000ᐅᓪᓗᑎᒃ, ᐊᕐᓁᑦ ᐊᖑᒻᒥᒃ ᐱᖃᑎᖃᓚᐅᕐᓯᒪᖏᑦᑐᑦ. 36ᐊᕝᕙᖏᑦ ᐅᓇᑕᕆᐊᓚᐅᕐᑐᓂᑦ ᐱᑖᕆᔭᐅᓚᐅᕐᑐᑦ ᐅᓄᕐᓂᑲᓚᐅᕐᐳᑦ ᓰᐲᑦ 337,000ᓂᒃ, 37ᑖᒃᑯᓇᓐᖓᑦ ᐊᑕᓂᕐᒧᑦ ᑐᓂᔭᐅᔪᑦ, 675ᖑᓚᐅᕐᐳᑦ; 38ᐃᒻᒧᒃᓯᐅᒊᑦ 36,000ᐅᓚᐅᕐᐳᑦ, ᑖᒃᑯᓇᓐᖓᑦ ᐊᑕᓂᕐᒧᑦ ᑐᓂᔭᐅᔪᑦ 72ᖑᓚᐅᕐᐳᑦ. 39ᓯᐅᑎᖅᑯᕐᑐᔪᑦ 30,500ᐅᓚᐅᕐᐳᑦ, ᑖᒃᑯᓇᓐᖓᑦ ᐊᑕᓂᕐᒧᑦ ᑐᓂᔭᐅᔪᑦ 61ᖑᓚᐅᕐᐳᑦ. 40ᐃᓄᐃᑦ 16,000ᐅᓚᐅᕐᐳᑦ, ᑖᒃᑯᓇᓐᖓᑦ ᐊᑕᓂᕐᒧᑦ ᑐᓂᔭᐅᔪᑦ 32ᖑᓚᐅᕐᐳᑦ. 41ᒨᓯᓯᐅᑉ ᑐᓂᔭᒃᓮᑦ ᐊᑕᓂᕐᒧᑦ ᐃᓵᒃᑕᕈᑕᐅᓗᑎᒃ ᑐᓂᕐᕈᑕᐅᔪᑦ ᑐᓂᕐᕈᓯᕐᑎᑦᓯᔨᒧᑦ ᐃᓕᓯᕆᒧᑦ ᑐᓂᓚᐅᕐᐰᑦ, ᑍᒫᒃ ᐊᑕᓂᐅᑉ ᒨᓯᓯ ᐱᖁᓚᐅᕐᒪᒍ.
42ᐃᓴᕆᐊᓕᒥᐅᑦ ᐊᕝᕙᖏᑦ ᐱᔭᕆᐊᖃᕐᑕᖏᑦ, ᒨᓯᓯᐅᑉ ᐊᒡᒍᓚᐅᕐᑕᖏᑦ ᐊᖑᑎᓂᑦ ᐅᓇᑕᕆᐊᓚᐅᕐᑐᓂᑦ; 43ᑖᒃᑯᐊ ᐊᕝᕙᖏᑦ ᐃᓴᕆᐊᓕᒥᐅᓄᑦ ᑐᓂᔭᐅᔪᑦ ᐅᓄᕐᓂᖃᓚᐅᕐᐳᑦ: ᓰᐱᑦ 337,000ᐃᑦ, 44ᐃᒻᒧᒃᓯᐅᒊᑦ 36,000ᐃᑦ, 45ᓯᐅᑎᖅᑯᕐᑐᔪᑦ 30,500ᐃᑦ, 46ᐊᒻᒪᓗ ᐃᓄᐃᑦ 16,000ᐃᑦ. 47ᐃᓴᕆᐊᓕᒥᐅᓄᑦ ᑐᓂᔭᐅᔪᓂᑦ, ᒨᓯᓯ ᑖᒃᑯᓇᓐᖓᑦ ᐊᑐᓂᑦ ᑎᒍᓯᓚᐅᕐᐳᖅ 50ᐅᓈᕐᑎᕐᑐᓂᒃ, ᐃᓄᖕᓂᒃ, ᐆᒪᔪᓂᒡᓗ, ᑐᓂᓪᓗᒋᓪᓗ ᓕᕔᑎᓄᑦ, ᐊᑕᓂᐅᑉ ᑐᐱᕐᔪᐊᖁᑎᖓᓂᒃ ᑲᒪᔨᐅᔪᓄᑦ, ᑍᒫᑦ ᒨᓯᓯ ᐊᑕᓂᐅᑉ ᐱᖁᓚᐅᕐᒪᒍ.
48ᐅᓇᑕᕐᑐᒃᓴᓕᒫᓄᑦ ᐊᖓᔪᖅᑳᖑᔪᑦ, ᐊᖓᔪᖅᑳᓪᓗ 1,000ᓄᑦ, ᐊᖓᔪᖅᑳᓪᓗ 100ᓄᑦ, ᒨᓯᓯᒧᑦ ᕾᓚᐅᕐᐳᑦ; 49ᐅᖃᕐᓗᑎᒃ, “ᐱᔨᑎᑦ ᓈᓮᓚᐅᕐᐳᑦ ᐅᓇᑕᕐᑐᒃᓴᖁᑎᒥᖕᓂᒃ, ᑭᓇᒥᒡᓘᓐᓃᑦ ᐊᓯᐅᔪᖃᓐᖏᓚᖅ. 50ᑍᒤᒻᒪᑦ ᐊᑕᓂᕐᒧᑦ ᑐᓂᕐᕈᑎᑦᑎᓐᓂᒃ ᑐᓂᓯᔭᕐᑐᕋᑦᑕ, ᐊᖑᑎᓕᒫᑦ ᓇᓂᓚᐅᕐᑕᒥᖕᓂᒃ ᒎᓗᒥᑦ ᓴᓇᓯᒪᔪᓂᒃ; ᓂᕕᓐᖓᑖᓂᒃ, ᑕᓕᐊᕐᓂᒡᓗ, ᓇᒡᒍᐊᕐᒥᖕᓂᒡᓗ, ᓯᐅᑎᕈᑎᓂᒡᓗ, ᐅᔭᒥᖕᓂᒡᓗ, ᐅᕙᒍᑦ ᐃᓱᒪᒋᔪᓐᓁᕐᕕᐅᔪᒪᓪᓗᑕ ᐊᑕᓂᐅᑉ ᓵᖓᓂ.” 51ᑍᒤᒻᒪᑦ ᒨᓯᓯᐅᑉ ᐃᓕᓯᕆᐅᓪᓗ ᑐᓂᕐᕈᓯᕐᑎᑦᓯᔨᐅᑉ ᒎᓗᐃᑦ ᐱᓚᐅᕐᐰᑦ ᑖᒃᑯᓇᓐᖓᑦ, ᑕᑯᒥᓇᕐᓴᐅᑎᓕᒫᑦ ᓴᓇᓯᒪᔪᑦ. 52ᒎᓗᓕᒫᑦ ᑐᓂᔭᖏᑦ ᐊᑕᓂᕐᒧᑦ, ᐅᓇᑕᕐᑐᒃᓴᓄᑦ 1000ᓄᑦ ᐊᖓᔪᖅᑳᓄᑦ 100ᓄᓪᓗ ᐊᖓᔪᖅᑳᓄᑦ, ᐊᑭᖃᓚᐅᕐᐳᑦ 16,750ᓂᒃ ᓴᑯᓪᔅᓂᒃ. 53ᐅᓇᑕᕐᑐᒃᓮᑦ ᓵᓚᖃᓚᐅᕐᓗᑎᒃ ᓇᖕᒥᓂᕐᑖᕆᓪᓗᒋᑦ ᐱᓚᐅᕐᑕᒥᖕᓂᒃ. 54ᒨᓯᓯᐅᑉ ᐃᓕᓯᕆᐅᓪᓗ ᑐᓂᕐᕈᓯᕐᑎᑦᓯᔨᐅᑉ ᒎᓗᐃᑦ ᐱᓚᐅᕐᐰᑦ ᐅᓇᑕᕐᑐᒃᓴᓄᑦ 1000ᓄᑦ ᐊᖓᔪᖅᑳᓂᑦ 100ᓄᓪᓗ ᐊᖓᔪᖅᑳᓂᑦ, ᐃᓕᓪᓗᒋᓪᓗ ᑐᐱᕐᔪᐊᒧᑦ ᑲᑎᒪᕕᖕᒧᑦ ᐃᓴᕆᐊᓕᒥᐅᓂᑦ ᐃᖅᑲᐅᒪᑦᔪᑎᒃᓴᐅᖁᓪᓗᒋᑦ ᐊᑕᓂᐅᑉ ᓵᖓᓂ.
Currently Selected:
ᒨᓯᓯ ᓯᑕᒪᖏᑦ 31: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
