ᒨᓯᓯ ᓯᑕᒪᖏᑦ 23
23
ᐸᓛᒻ ᒎᑎᒥᑦ ᐅᖃᕐᑎᑕᐅᓂᖓ ᓯᕗᓪᓕᕐᐹᖅ
1ᐸᓛᒻᓗ ᐰᓚᒃᒧᑦ ᐅᖃᕐᐳᖅ, “ᓴᓐᓇᑎᓚᐅᓐᖓ ᑐᓂᕐᕈᓯᕐᕕᖕᓂᒃ 7ᓂᒃ ᐅᕙᓂ, ᐊᑐᐃᓐᓇᕈᐃᓗᑎᓪᓗ 7ᓂᒃ ᐃᒻᒧᒃᓯᐅᒐᕐᓂᒃ ᐊᖑᓴᓪᓗᕐᓂᒃ, 7ᓂᒡᓗ ᓰᐱᑦ ᐊᖑᓴᓪᓗᖏᓐᓂᒃ.” 2ᐰᓚᒃ ᑍᒤᓕᐅᓚᐅᕐᐳᖅ ᐸᓛᒻ ᐅᖃᐅᓯᕆᔭᖓᑐᑦ, ᐰᓚᒡᓗ ᐸᓛᒻᓗ ᑐᓂᕐᕈᓯᕐᓗᑎᒃ ᐃᒻᒧᒃᓯᐅᒐᕐᒥᒃ ᓰᐱᒥᒡᓗ ᐊᖑᓴᓪᓗᕐᒥᒃ ᑐᓂᕐᕈᓯᕐᕕᖕᓂ ᐊᑐᓂᑦ. 3ᐸᓛᒻ ᐰᓚᒃᒧᑦ ᐅᖃᓕᕐᐳᖅ, “ᑐᓂᕐᕈᓯᕐᕕᒃᐱᑦ ᓴᓂᐊᓂ ᓇᖏᕆᑦ, ᐊᕗᓐᖓᕐᓂᐊᕋᒪ; ᐃᒻᒪᖄ ᐊᑕᓂᖅ ᕾᓂᐊᕐᐳᖅ ᑲᑎᔭᕐᑐᕐᓗᖓ, ᖃᓄᑐᐃᓐᓇᖅ ᐅᕙᓐᓄᑦ ᐅᖃᕐᐸᑦ ᐅᖃᐅᑎᓂᐊᕐᐸᒋᑦ.” ᑍᒫᒃ ᐂᓕᕐᐳᖅ ᐳᕐᑐᔪᑉ ᐊᓯᐊᓄᑦ. 4ᒎᑎᐅᑉ ᑕᕝᕙ ᑲᑎᕚ, ᐸᓛᒻ ᐅᖃᕐᓗᓂ, “ᐊᑐᐃᓐᓇᕈᕐᓯᓚᐅᕐᐳᖓ ᑐᓂᕐᕈᓯᕐᕕᖕᓂᒃ 7ᓂᒃ, ᑖᒃᑯᓇᓂᓗ ᑐᓂᕐᕈᓯᕐᓗᖓ ᐃᒻᒧᒃᓯᐅᒐᕐᓂᒃ ᐊᖑᓴᓪᓗᕐᓂᒃ ᓰᐱᓂᒡᓗ ᐊᖑᓴᓪᓗᕐᓂᒃ ᐊᑐᓂᑦ.”
5ᐊᑕᓂᐅᑉ ᐸᓛᒻ ᐅᖃᐅᓯᒃᓴᖃᕐᑎᑉᐹ ᐅᖃᐅᑎᓪᓗᒍᓗ, “ᐰᓚᒃᒧᑦ ᐅᑎᓕᕆᑦ, ᐃᒫᒡᓗ ᐅᖃᕐᓗᑎᑦ.” 6ᑍᒫᒃ ᐅᑎᕐᕕᒋᕚ, ᓇᖏᕐᑐᖅ ᑐᓂᕐᕈᒥ ᐃᑯᐊᓚᓯᒪᔪᑦ ᓴᓂᐊᓂ, ᑖᓐᓇ ᐃᓚᖃᕐᓗᓂ ᒧᐊᐱᒥᐅᑦ ᐊᖓᔪᖅᑳᖁᑎᖏᓐᓂᒃ.
7ᒎᑎᒥᑦ ᐅᖃᐅᓯᒃᓴᓂᒃ ᐅᖃᐅᓯᕆᓕᕐᐰᑦ ᐅᖃᕐᓗᓂ:
“ᐰᓚᒃ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑕ ᑕᒪᐅᓐᖓᕐᑎᓚᐅᕐᐹᖓ ᐊᕌᒥᒥᑦ,
ᓯᕿᓂᐅᑉ ᓄᐃᕕᐊᓂᒥᐅᑦ ᖃᖅᑲᖏᓐᓂᑦ:
‘ᕾᒋᑦ, ᔧᑯ ᐱᐅᖏᑦᑐᒧᑦ ᐱᔭᐅᖁᓗᒍ ᐅᖃᐅᓯᕆᒍᒃ ᐱᑦᔪᑎᒋᓗᖓ,
ᕾᒋᑦ, ᐃᓴᕆᐊᓕ ᐱᐅᖏᓐᓂᕋᕈᒃ!’
8ᖃᓄᖅ ᒎᑎᐅᑉ ᐱᐅᖏᓐᓂᕋᓐᖏᑕᖓ ᐱᐅᖏᑦᑐᒧᑦ ᐱᔭᐅᖁᓗᒍ ᐅᖃᕈᓐᓇᕐᐳᖓ?
ᖃᓄᖅ ᐊᓯᕈᐃᖁᔨᓗᖓ ᐅᖃᕈᓐᓇᕐᐳᖓ ᐊᑕᓂᐅᑉ ᐊᓯᕈᖁᓯᒪᓐᖏᑕᖓᓂᒃ?
9ᐃᓐᓈᕈᐃᑦ ᖄᖏᓐᓂᑦ ᐅᔭᕋᓱᒃᔪᖕᓂᑦ ᑕᑯᕙᒃᑲ,
ᐱᖑᐃᑦ ᖄᖏᓐᓂᑦ ᑕᐅᑐᒃᐸᒃᑲ;
ᑖᕙᓂ! ᐃᓄᐃᑦ ᑕᖕᒫᕐᓯᒪᔪᑦ ᐃᓄᑑᓪᓗᑎᒃ,
ᐃᓅᖃᑎᒌᒡᔪᐊᓂᒃ ᐊᓯᒥᓂᒃ ᐃᓚᖃᕆᐊᒥᒃ ᐃᓱᒪᓇᑎᒃ.
10ᔧᑰᑉ ᐳᔪᕐᓗᒃᑎᑐᑦ ᐅᓄᕐᓂᖏᑦ ᑭᐊ ᓈᓴᕈᓐᓇᕐᐰᑦ,
ᐃᓴᕆᐊᓕᒥᐅᑦ ᐊᕝᕙᖏᑕ ᐊᕝᕙᖏᑦ ᑭᐊ ᓈᓴᕈᓐᓇᕐᐰᑦ?
ᑐᖁᓛᕐᐳᖓ ᐃᓗᐊᕐᑐᑦ ᑐᖁᑦᔪᓯᖏᑎᑐᑦ,
ᑍᒃᑯᐊᑎᑐᑦ ᐃᓱᓕᓐᓂᕋ ᑍᒤᑦᓱᒫᕐᓕ!”
11ᐰᓚᒃᓗ ᐸᓛᒻᒧᑦ ᐅᖃᓕᕐᐳᖅ, “ᖃᓄᐃᓕᐅᓕᕐᐱᖔ? ᐊᑭᕋᒃᑲ ᐱᐅᖏᑦᑐᒧᑦ ᐱᔭᐅᖁᓗᒋᑦ ᐅᖃᖁᔭᒋᑦ ᑕᑯᒋᑦ, ᐊᖏᔪᐊᓗᖕᒥᒃ ᓮᒻᒪᕐᑎᑉᐸᑎᑦ!”
12ᑖᓐᓇ ᐅᖃᓕᕐᐳᖅ, “ᐅᖃᕆᐊᖃᓐᖏᓚᖔ ᐊᑕᓂᐅᑉ ᐅᕙᓐᓄᑦ ᐅᖃᐅᓯᐅᖁᔭᖓᓂᒃ?”
ᐸᓛᒻ ᒎᑎᐅᑉ ᐅᖃᐅᓯᐅᖁᔭᖏᓐᓂᒃ ᐅᖃᕐᓂᖓᑕ ᐂᑉᐸᖓ
13ᐰᓚᒃ ᑖᑦᓱᒧᖓ ᐅᖃᕐᐳᖅ, “ᐂᖃᑎᒋᓚᐅᓐᖓ ᐊᓯᐊᓄᑦ ᑖᕙᓐᖓᑦ ᑕᑯᓂᐊᕋᕕᒋᑦ, ᓯᓈᓃᑦᑐᑦ ᑭᓯᐊᓂ ᑕᑯᓂᐊᕐᐸᑎᑦ, ᑕᑯᔧᓐᓇᕆᓂᐊᓐᖏᓚᑎᑦ; ᐱᐅᖏᑦᑐᒧᑦ ᐱᔭᐅᖁᓗᒋᑦ ᐅᖃᐅᓯᕆᓂᐊᕐᐸᑎᑦ ᑍᑲᓐᖓᑦ ᐱᑦᔪᑎᒋᓗᖓ.” 14ᓇᑎᕐᓇᒧᑦ ᐂᖃᑎᒋᕚ ᐊᑎᓕᖕᒧᑦ ᓲᕕᒻᒥᒃ, ᖃᖅᑲᐅᑉ ᐱᔅᒐᐅᑉ ᖄᖓᓂ, ᑐᓂᕐᕈᓯᕐᕕᓕᐅᕐᓗᓂᓗ 7ᓂᒃ, ᑐᓂᕐᕈᓯᕐᐳᖅ ᐃᒻᒧᒃᓯᐅᒐᕐᓂᒃ ᐊᖑᓴᓪᓗᕐᓂᒃ ᓰᐱᓂᒡᓗ ᐊᖑᓴᓪᓗᕐᓂᒃ ᐊᑐᓂᑦ ᑐᓂᕐᕈᓯᕐᕕᖕᓂ.
15ᐰᓚᒃᒧᓪᓗ ᐅᖃᕐᐳᖅ, “ᑐᓂᕐᕈᑎᕕᑦ ᓴᓂᐊᓂ ᓇᖏᓚᐅᕆᑦ ᐊᕗᖓ ᐂᓂᐊᕋᒪ ᐊᑕᓂᖅ ᑲᑎᔭᕐᑐᕐᓗᒍ.”
16ᐊᑕᓂᐅᑉ ᐸᓛᒻ ᑲᑎᕚ ᐅᖃᐅᓯᒃᓴᒥᒡᓗ ᑐᓂᓯᕕᒋᓪᓗᒍ, ᐅᖃᕐᓗᓂᓗ, “ᐰᓚᒃᒧᑦ ᐅᑎᓕᕆᑦ, ᐃᒫᒡᓗ ᐅᖃᕐᓗᑎᑦ.” 17ᑕᕝᕙ ᐅᑎᕐᕕᒋᕚ ᑕᕝᕙᓃᓚᐅᕐᐳᖅ, ᑐᓂᕐᕈᑎᒥ ᓴᓂᐊᓂ ᓇᖏᕐᑐᖅ, ᒧᐊᐱᒥᐅᑦ ᐊᖓᔪᖅᑳᖁᑎᖏᑦ ᐃᓚᒋᓪᓗᒋᑦ. ᐰᓚᑭᐅᑉ ᐊᐱᕆᕚ, “ᖃᓄᖅ ᐊᑕᓂᖅ ᐅᖃᕐᐸ?”
18ᐸᓛᒻ ᒎᑎᐅᑉ ᐅᖃᐅᓯᕆᖁᔭᖓᓂᒃ ᐅᖃᓕᕐᐳᖅ, ᐅᖃᕐᓗᓂ:
“ᐰᓚᒃ ᒪᑭᓕᕆᑦ, ᓈᓚᒡᓗᑎᓪᓗ!
ᑐᓵᓚᐅᓐᖓ, ᔨᐴᕆᐅᑉ ᐃᕐᓂᖓ!
19ᒎᑎ ᐃᓄᒃᑎᑐᑦ ᐱᐅᓯᖃᖏᒻᒪᑦ, ᓴᒡᓗᔪᓐᓇᕋᓂ,
ᐃᓄᐃᓪᓘᓐᓃᑦ ᐃᕐᓂᖏᑎᑐᑦ, ᖃᕿᐊᓕᕆᐊᖃᕋᓂ.
ᐅᖃᓚᐅᕐᓯᒪᕚ, ᐱᓇᓱᐊᕐᓂᐊᖏᑕᒥᓂᒃ?
ᐅᖃᓚᐅᕐᓯᒪᕙᓘᓐᓃ, ᑲᔪᓯᑎᓐᓂᐊᖏᑕᒥᓂᒃ?
20ᑕᑯᒋᑦ, ᑐᓂᓯᕕᐅᔪᖓ ᐱᖁᔨᓂᕐᒥᒃ ᓮᒻᒪᕐᑎᑦᓯᖁᓪᓗᖓ;
ᓮᒻᒪᕐᑎᑦᓯᓯᒪᖕᒪᑦ, ᓮᒻᒪᕐᑎᑦᓯᓂᖓᓗ ᓴᖑᑎᑦᓱᓐᓇᕐᓇᒍ.
21ᔧᑰᑉ ᐱᐅᖏᑦᑐᓕᓂᖏᑦ ᑲᒪᒋᓐᖏᓔᑦ,
ᐃᓴᕆᐊᓕᒥᐅᓪᓗ ᐊᔪᕐᑐᓕᓂᖏᓐᓂᒃ ᑕᑯᓚᐅᓐᖏᓚᖅ.
ᐊᑕᓂᐅᑉ ᒎᑎᖓᑕ ᐃᓚᒋᖕᒪᒋᑦ,
ᐊᖓᔪᖅᑳᕐᔪᐊᑉ ᓂᐱᕐᔪᐊᒧᑦ ᓂᓪᓕᐊᓂᖓᑕ ᐃᓚᒋᕔᑦ.
22ᒎᑎᐅᑉ ᐊᐅᓪᓚᕐᑎᓚᐅᕐᐰᑦ ᐄᑦᔨᑉᑎᒥᑦ;
ᓴᓐᖏᓂᖃᕐᐳᖅ ᐃᒻᒧᒃᓯᐅᒐᕐᑐᑦ ᓄᔪᐊᕐᑐᑐᑦ.
23ᔧᑯ ᐊᖓᒃᑯᒧᑦ ᐊᑭᕋᕐᑐᕐᑕᐅᔪᓐᓇᓐᖏᓚᖅ,
ᐃᓴᕆᐊᓕᒥᐅᑦ ᐊᖓᒃᑰᓇᓱᐊᕐᓂᕐᒧᑦ ᐊᑭᕋᕐᑐᕐᑕᐅᔪᓐᓇᓐᖏᓚᑦ.
ᐃᓴᕆᐊᓕ ᐱᑦᔪᑎᒋᓪᓗᒍ, ‘ᑕᑯᓕᕆᑦ, ᒎᑎᐅᑉ ᐱᓇᓱᐊᕐᓯᒪᔭᖏᓐᓂᒃ!’
24ᑕᑯᒋᑦ, ᐃᓄᐃᑦ ᒪᑭᑉᐳᑦ ᓲᕐᓗ ᐊᕐᓇᓪᓗᕐᑎᑐᑦ ᓛᔭᑐᑦ,
ᒪᑭᓪᓗᓂᓗ ᓛᔭᐅᑉ ᒪᑭᑦᔪᓯᖓᑐᑦ;
ᓇᓪᓚᕐᓂᐊᕋᓂᓗ ᓂᑭᒃᓴᕐᓯᐅᕐᑕᒥᓂᒃ ᓂᕆᓚᐅᖅᑳᕋᓂ,
ᑐᖁᑕᒥᓗ ᐊᐅᖓᓂᒃ ᐃᒥᓚᐅᖅᑳᕋᓂ.”
25ᐰᓚᒡᓗ ᐅᖃᕐᐳᖅ ᐸᓛᒻᒧᑦ, “ᐱᐅᖏᑦᑐᒧᑦ ᐱᔭᐅᖁᔨᓂᖃᓐᖏᓚᖅ, ᓮᒻᒪᕐᑎᑕᐅᓂᖃᕋᓂᓘᓐᓃᑦ!”
26ᐸᓛᒻᓕ ᐰᓚᒃ ᑭᐅᕚ, “ᐅᖃᐅᑎᓚᐅᓐᖏᓚᒌᑦ, ‘ᐊᑕᓂᐅᑉ ᐅᖃᐅᓯᕆᖁᔭᓕᒫᖏᓐᓂᒃ, ᐅᖃᕆᐊᖃᕐᓂᓐᓂᒃ?’”
27ᐰᓚᒃᓗ ᐸᓛᒻᒧᑦ ᐅᖃᓕᕐᐳᖅ, “ᐊᑏ ᕾᓚᐅᕆᑦ, ᐊᓯᐊᓄᑦ ᐂᖃᑎᒋᔪᒪᒐᒃᑭᑦ; ᐃᒻᒪᖄ ᒎᑎᐅᑉ ᓈᒻᒪᒋᓂᐊᕐᐹ ᑍᑲᓐᖓᑦ ᐱᐅᖏᑦᑐᒧᑦ ᑎᑭᑕᐅᖁᓗᒋᑦ ᐅᖃᐅᓯᐅᖁᓗᒋᑦ.” 28ᑍᒫᒃ ᐰᓚᒃ ᐸᓛᒻ ᐂᑎᑉᐹ ᖃᖅᑲᐅᑉ ᐱᐅᕆᐅᑉ ᖄᖓᓄᑦ, ᓄᓇᒧᑦ ᐊᕗᖔᓗᒃ ᓱᓇᖃᔪᐃᑦᑑᑉ ᐅᖓᑖᓄᑦ ᑕᑯᒃᓴᐅᔪᒧᑦ. 29ᐸᓛᒻ ᐰᓚᒃᒧᑦ ᐅᖃᕐᐳᖅ, “ᓴᓇᑦᔪᑎᓚᐅᓐᖓ ᑐᓂᕐᕈᓯᕐᕕᖕᓂᒃ 7ᓂᒃ, ᐊᑐᐃᓐᓇᕈᐃᓗᑎᓪᓗ ᐃᒻᒧᒃᓯᐅᒐᕐᓂᒃ ᐊᖑᓴᓪᓗᕐᓂᒃ 7ᓂᒃ 7ᓂᒡᓗ ᓰᐱᓂᒃ ᐊᖑᓴᓪᓗᕐᓂᒃ.” 30ᐰᓚᒃᓗ ᑍᒤᓕᐅᓚᐅᕐᐳᖅ ᐸᓛᒻ ᐅᖃᐅᓯᕆᔭᖓ ᒪᓕᒡᓗᒍ, ᑐᓂᕐᕈᓯᕐᓗᓂᓗ 7ᓂᒃ ᐃᒻᒧᒃᓯᐅᒐᕐᓂᒃ ᐊᖑᓴᓪᓗᕐᓂᒃ ᓰᐱᓂᒡᓗ ᐊᖑᓴᓪᓗᕐᓂᒃ ᑐᓂᕐᕈᓯᕐᕕᖕᓂ ᑖᒃᑯᓇᓂ ᐊᑐᓂᑦ.
Currently Selected:
ᒨᓯᓯ ᓯᑕᒪᖏᑦ 23: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
