ᒫᑎᐅᓯᐅᑉ ᐊᒡᓚᖏᑦ 20
20
ᐱᓇᓱᐊᕐᑏᑦ ᐱᕈᕐᓰᕕᖕᒥ ᐅᐂᓂᓕᒃᓴᒥ
1“ᒎᑎᐅᑉ ᐊᑕᓂᐅᕕᖓ ᐊᑦᔨᖃᕐᐳᖅ ᐊᖑᒻᒥᒃ ᐅᓪᓛᒻᒪᕆᒃᑯᑦ ᕿᓂᕆᐊᕐᑐᒥᒃ ᐃᓄᖕᓂᒃ ᐱᓇᓱᐊᕐᑎᒃᓴᒥᓂᒃ ᐸᐅᕐᒐᓂᒃ ᐅᐂᓂᒃᓴᐅᓂᐊᕐᑐᓂᒃ ᐱᕈᕐᓰᕕᖁᑎᒥᓂ. 2ᐱᓇᓱᐊᕐᑎᑦ ᐊᖏᖃᑎᒋᔭᕇᕋᒥᒋᑦ ᐊᑭᓕᐅᑕᐅᓲᒥᒃ ᐊᑭᓕᕈᒪᓪᓗᒋᑦ, ᓯᐅᓪᕕᕆᒥᒃ ᐊᑕᐅᓯᕐᒥᒃ ᐅᓪᓗᒧᑦ ᐊᑕᐅᓯᕐᒧᑦ, ᑎᓕᕔᑦ ᐸᐅᕐᒐᓂᒃ ᐅᐂᓂᒃᓴᐅᓂᐊᕐᑐᓂᒃ ᐱᕈᕐᓰᕕᖁᑎᒥᓂ ᐱᓇᓱᐊᕆᐊᕐᑐᖁᓪᓗᒋᑦ. 3ᑭᖑᓂᖓᒍᑦ 9ᒧᐊᕐᑎᓪᓗᒍ ᐊᓂᒋᕗᖅ, ᑕᑯᓪᓗᓂ ᐊᖑᑎᓂᒃ ᓂᐅᕕᕐᕕᖕᓂ ᓇᖏᑐᐃᓐᓇᕐᑐᓂᒃ ᐱᓇᓱᐊᒐᒃᓴᖃᖏᓐᓇᒥᒃ. 4ᑕᕝᕙ ᐅᖃᐅᑎᕔᑦ, ‘ᐃᓕᑦᓯᑦᑕᐅᖅ ᐱᓇᓱᐊᕆᐊᕐᑐᓕᕆᑦᓯ ᐸᐅᕐᒐᓂᒃ ᐅᐂᓂᒃᓴᐅᓂᐊᕐᑐᓂᒃ ᐱᕈᕐᓰᕕᖁᑎᓐᓂᑦ, ᐊᑭᓕᕐᓂᐊᕐᐸᑦᓯ ᐊᑭᓕᐅᑕᐅᕙᒃᑐᑎᑐᑦ.’ 5ᐊᓱᐃᓛᒃ ᑖᒃᑯᐊ ᐱᓇᓱᐊᕆᐊᕐᑐᕐᐳᑦ. ᑕᕝᕙ ᑭᖑᓂᖓᒍᑦ ᑍᒫᑦᓮᓐᓇᖅ ᕿᓂᕆᐊᕆᕗᖅ 12ᒧᐊᕐᑎᓪᓗᒍ ᐅᓪᓗᒃᑯᑦ, ᐊᒻᒪ ᐅᓐᓄᓴᒃᑯᑦ 3ᒧᐊᕐᑎᓪᓗᒍ ᑍᒤᓕᐅᕆᕗᖅ. 65ᒧᐊᓕᕐᑎᓪᓗᒍᓕ ᓂᐅᕕᕐᕕᖕᒧᑦ ᐊᖅᑯᑎᒦᑦᑐᒧᐊᕆᕗᖅ, ᑕᑯᓪᓗᓂ ᐊᖑᑎᓂᒃ ᑕᕝᕙᓂ ᓇᖏᑐᐃᓐᓇᕐᑐᓂᒃ. ᑖᒃᑯᐊ ᐊᐱᕆᕔᑦ, ‘ᓱᖕᒪᑦ ᐅᓪᓗᓕᒫᖅ ᑕᕝᕙᓃᑐᐃᓐᓇᕐᐱᓰ ᐱᓇᓱᐊᕋᓯ?’ 7ᑖᒃᑯᐊ ᑭᐅᕚᑦ, ‘ᐱᓇᓱᒋᐊᕐᑐᖁᔭᐅᓗᑕ ᑎᓕᔭᐅᓚᐅᖏᓐᓇᑦᑕ.’ ᑖᑦᓱᒪ ᐅᖃᐅᑎᕔᑦ, ‘ᐱᓇᓱᐊᕆᐊᕐᑐᓕᕆᑦᓯ ᐸᐅᕐᒐᓂᒃ ᐅᐂᓂᒃᓴᐅᓂᐊᕐᑐᓂᒃ ᐱᕈᕐᓰᕕᖕᒥ.’
8 #
ᒨᓯᓯ ᐱᖓᔪᖏᑦ 19:13; ᒨᓯᓯ ᑕᓪᓕᒪᖏᑦ 24:15. “ᐅᓐᓄᖕᒪᑦ ᐱᕈᕐᓰᕕᖁᑎᓕᒃ ᐱᓇᓱᐊᕐᑎᓄᑦ ᐊᖓᔪᖅᑲᐅᑎᑕᒥᓄᑦ ᐅᖃᕐᐳᖅ, ‘ᐱᓇᓱᐊᕐᑏᑦ ᕾᖁᓗᒋᑦ ᐊᑭᓕᓕᒃᑭᑦ ᐊᑭᓕᐅᑕᐅᓲᒥᒃ, ᑭᖑᓪᓕᕐᐸᐅᓪᓗᑎᒃ ᐱᓇᓱᐊᓯᒋᐊᖅᑲᐅᔪᓂᑦ ᐱᒋᐊᖅᑳᕐᓗᑎᑦ ᓯᕗᓪᓕᕐᐸᐅᖅᑲᐅᔪᓄᑦ ᑎᑭᓪᓗᒋᑦ.’ 9ᐊᖑᑎᑦ ᐱᓇᓱᐊᕆᐊᓯᖅᑲᐅᔪᑦ 5ᖑᓕᕐᑎᓪᓗᒍ, ᐊᑭᓕᕐᑕᐅᕗᑦ ᓯᐅᓪᕕᕆᒥᒃ ᐊᑕᐅᓯᕐᒥᒃ ᐊᑐᓂᑦ. 10ᑭᖑᓂᖓᒍᑦ ᑖᒃᑯᐊ ᐊᖑᑏᑦ ᓯᕗᓪᓕᕐᐸᐅᓪᓗᑎᒃ ᑎᓕᔭᐅᖅᑳᖃᐅᔪᑦ ᐊᑭᓕᕐᑕᐅᓕᕋᒥᒃ, ᐊᖏᓂᕐᓴᒥᒃ ᐊᑭᓕᕐᑕᐅᓂᐊᕋᓱᒋᕗᑦ; ᐊᑐᓂᓪᓕ ᑐᓂᓯᕕᐅᒋᕗᑦ ᓯᐅᓪᕕᕆᒥᒃ ᐊᑕᐅᓯᕐᒥᒃ. 11ᑮᓇᐅᔭᕐᑖᒥᖕᓂᒃ ᐱᔭᕇᕋᒥᒃ ᐅᖃᖃᑦᑕᐅᑎᓕᕐᐳᑦ ᓈᒻᒪᒃᓴᕋᑎᒃ ᐱᓇᓱᐊᕐᑎᑦᓯᔨᒋᔭᒥᖕᓂᒃ. 12ᐅᖃᕐᓗᑎᒃ, ‘ᐅᑯᐊ ᐊᖑᑏᑦ ᑭᖑᓪᓕᕐᐸᐅᓪᓗᑎᒃ ᑎᓕᔭᐅᖅᑲᐅᔪᑦ ᐃᑲᕐᕋᒥᒃ ᐊᑕᐅᓯᑐᐃᓐᓇᕐᒥᒃ ᐱᓇᓱᐊᕋᑖᕐᑐᑦ, ᐅᕙᑦᑎᑎᑐᓪᓗᐊᑐᐃᓐᓇᖅ ᐊᑭᓕᕐᐸᑎᑦ! ᐅᕙᒍᓪᓕ ᐅᓪᓗᓕᒫᕋᓗᒃ ᐱᓇᓱᐊᕐᑐᒍᑦ ᓯᕿᓂᖅ ᐅᖅᑰᔪᐊᓘᑎᓪᓗᒍ’ 13ᑖᑦᓱᒪ ᓇᖕᒥᓂᓕᐅᑉ ᐱᕈᕐᓰᕕᖕᒥᒃ ᑭᐅᕔᑦ, ‘ᐱᖃᓐᓇᕆᔭᒃᑳ ᓯᓔᕐᕆᓐᖏᓚᑦᓯ; ᐊᖏᖃᑎᒌᖅᑲᐅᓐᖏᓚᒎᑦ ᐅᓪᓗᓕᒫᖅ ᐱᓇᓱᐊᖁᓪᓗᓯ ᓯᐅᓪᕕᕆᒥᒃ ᐊᑕᐅᓯᕐᒥᒃ ᐊᑭᓕᕐᑕᐅᓂᐊᕐᓗᓰ? 14ᐊᑭᓕᐅᑎᒋᔭᐅᔪᑦ ᑮᓇᐅᔭᕐᑖᓯ ᐱᓗᓯᐅᒃ ᐊᖏᕐᕋᓕᕆᑦᓯ; ᐊᖑᑦ ᑭᖑᓪᓕᕐᐸᐅᓪᓗᓂ ᑎᓕᖅᑲᐅᔭᕋ ᑐᓂᓯᕕᒋᔪᒪᕙᕋ ᐃᓕᑦᓯᖕᓄᑦ ᐊᑭᓕᐅᑎᒋᔭᒪ ᐊᑦᔨᖓᓂᒃ. 15ᐃᓱᒪᕐᓱᕆᐊᖃᓐᖏᓚᖔ ᓇᖕᒥᓂᖅ ᑮᓇᐅᔭᓐᓂᒃ? ᐅᕝᕙᓗ ᐊᑦᔨᒌᒃᑎᑦᓯᑐᐃᓐᓇᕐᓂᓐᓄᑦ ᐱᑦᓯᐊᕐᑕᐅᓇᓱᒋᔪᓐᓃᕐᐱᓰ?’
16 #
ᒫᑎᐅᓯ 19:30; ᒫᑯᓯ 10:31; ᓘᑲᓯ 13:30. “ᑍᒤᒻᒪᑦ ᑭᖑᓪᓖᑦ ᓯᕗᓪᓕᐅᔪᒫᕐᐳᑦ, ᓯᕗᓪᓖᓪᓗ ᑭᖑᓪᓕᐅᔪᒫᕐᐳᑦ.”
ᔩᓱᓯᐅᑉ ᑐᖁᑕᐅᓂᒃᓴᒥᓂᒃ ᐅᖃᐅᓯᖃᕐᓂᖓ ᐱᖓᔪᖓᓐᓂᒃ
ᒫᑯᓯ 10:32-34; ᓘᑲᓯ 18:31-34
17ᔩᓱᓯ ᔨᕉᓴᓕᒻᒧᐊᕐᓂᐊᓕᕋᒥ, ᐃᓕᓐᓂᐊᕐᑎᓂ 12 ᐊᖅᑯᒻᒥᑦ ᐊᕙᓚᐅᑎᓪᓗᒋᑦ, ᐱᓱᒃᐸᓪᓕᐊᓗᑎᒃ ᐅᖃᐅᑎᓕᕐᐰᑦ ᑖᒃᑯᑑᑎᓪᓗᒋᑦ. 18“ᑕᑯᒋᑦ, ᔨᕉᓴᓕᒻᒧᐊᓕᕐᐳᒍᑦ; ᑕᕝᕙᓂ ᐃᓅᑉ ᐃᕐᓂᖓ ᐂᑦᑑᑕᐅᓛᕐᐳᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ ᐱᖁᔭᓂᒡᓗ ᐃᓕᓮᔨᐅᔪᓄᑦ, ᑖᒃᑯᐊ ᑐᖁᑕᒃᓴᓐᖑᕐᑎᓐᓛᕐᐹᑦ. 19ᑐᓂᕐᕈᑎᒋᓛᕐᐹᓪᓗ ᔫᑎᐅᖏᑦᑐᓄᑦ, ᒥᑕᐅᑎᒋᔭᐅᖁᓪᓗᒍ, ᑏᒐᕐᑐᕐᑕᐅᓗᓂᓗ ᑭᑭᐊᕐᑐᕐᑕᐅᓛᕐᐳᖅ, ᐅᓪᓗᐃᓪᓕ ᐱᖓᔪᐊᓐᓂ ᒪᑭᓛᕐᐳᖅ.”
ᓯᐱᑎᐅᑉ ᓄᓕᐊᖓᑕ ᕿᓄᓂᖓ
ᒫᑯᓯ 10:35-45
20ᑕᕝᕙ ᓯᐱᑎᐅᑉ ᓄᓕᐊᖓ ᔩᓱᓯᒧᐊᕐᐳᖅ ᐃᕐᓂᕐᒥᓂᒃ ᒪᕐᕉᖕᓂᒃ ᐃᓚᖃᕐᓗᓂ, ᓵᖓᓄᑦ ᐅᑯᕗᖅ, ᐱᔪᒪᔭᒥᓂᒃ ᐅᖃᕈᒪᓪᓗᓂ.
21ᔩᓱᓯᐅᑉ ᐅᖃᐅᑎᕚ, “ᓱᓇᒥᒃ ᐱᔪᒪᕖᑦ?”
ᐊᕐᓇᖅ ᐅᖃᕐᐳᖅ, “ᐱᖁᔨᓚᐅᕆᑦ ᐊᖓᔪᖅᑳᕐᔪᐊᓐᖑᕈᕕᑦ ᐅᑯᐊᒃ ᐃᕐᓃᒃᑲᒃ ᐃᒃᓯᕙᖁᓗᒋᒃ ᐊᑕᓂᐅᕕᖕᓂ ᐂᑉᐸᖓ ᑕᓕᕐᐱᖕᓂ ᐂᑉᐸᖓᓗ ᓴᐅᒥᖕᓂ.”
22ᔩᓱᓯᐅᑉ ᑭᐅᕚᒃ, “ᐊᐱᖅᑯᓯᕆᔭᑦᓯᖕᓂᒃ ᖃᐅᔨᒪᓐᖏᓚᓯᒃ, ᐃᒥᐅᑎᒥᒃ ᐃᒥᕐᓂᐊᕐᑕᓐᓂᒃ ᐃᒥᕈᓐᓇᕐᐱᓰᒃ?”
ᑖᒃᑯᐊᒃ ᑭᐅᕚ, “ᐃᒥᕈᓐᓇᕐᐸᕗᒃ.”
23ᔩᓱᓯᐅᑉ ᐅᖃᐅᑎᕚᒃ “ᐃᒥᕐᓂᐊᕐᑕᓐᓂᑦ ᐃᒥᕈᓐᓇᕋᓗᐊᕐᐳᓯᒃ, ᑭᓯᐊᓂᓕ ᑕᓕᕐᐱᓐᓂ ᓴᐅᒥᓐᓂᓗ ᐃᒃᓯᕙᔪᒃᓴᓂᒃ ᐅᕙᖓ ᐃᓂᑖᕐᑎᑦᓯᔪᓐᓇᓐᖏᓚᖓ, ᐊᑖᑕᒪ ᐅᐸᓗᖕᒊᕐᓯᒪᔭᖏᓐᓄᑦ ᑭᓯᐊᓂ ᐃᓂᒃᓴᕆᔭᐅᕗᑦ.”
24ᐃᓕᓐᓂᐊᕐᑎᑦ ᐃᓚᖏᑦ ᖁᓕᑦ ᑕᒪᑐᒥᖓ ᑐᓴᕋᒥᒃ, ᑖᒃᑯᖕᓂᖓ ᓄᑲᕇᖕᓂᒃ ᐊᑲᐅᒃᓴᕈᓐᓃᕐᐳᑦ. 25#ᓘᑲᓯ 22:25,26.ᔩᓱᓯᐅᑉ ᕾᖁᓪᓗᒋᑦ ᐅᖃᐅᑎᕔᑦ, “ᖃᐅᔨᒪᕗᓯ ᔫᑎᐅᖏᑦᑐᑦ ᐊᖓᔪᖅᑳᖏᑦ ᐃᓄᖁᑎᒥᖕᓄᑦ ᐱᔪᓐᓇᕐᓂᖃᕐᒪᑕ, ᑕᓯᐅᕐᑎᖏᑦ ᓲᖑᓂᖃᒻᒪᕆᒡᓗᑎᒃ. 26#ᒫᑎᐅᓯ 23:11; ᒫᑯᓯ 9:35; ᓘᑲᓯ 22:26.ᐃᓕᑦᓯᓕ ᐊᑯᓐᓇᑦᓯᓐᓂ ᑍᒤᓕᐅᖃᑦᑕᐅᑎᔪᒃᓴᐅᓐᖏᓚᓯ; ᓇᓪᓕᓯ ᐊᖓᔪᖅᑳᖑᔪᒪᔪᖅ ᐃᓕᑦᓯᓐᓄᑦ ᐱᔨᒋᔭᐅᔪᒃᓴᐅᕗᖅ; 27ᓇᓪᓕᓯᓗ ᐊᑯᓐᓇᑦᓯᓐᓂ ᓯᕗᓪᓕᕐᑎᐅᔪᒪᔪᖅ ᑖᓐᓇ ᓯᐊᓛᕆᔭᐅᔪᒃᓴᐅᕗᖅ. 28ᐃᓅᑉ ᐃᕐᓂᖓ ᑎᑭᓚᐅᓐᖏᓚᖅ ᐱᔨᑦᓯᕐᑕᐅᔭᕐᑐᕐᓗᓂ ᐱᔨᑦᓯᕆᐊᕐᑐᕐᓗᓂᓕ, ᐃᓅᓯᕐᒥᓂᒡᓗ ᑐᓂᓯᓗᓂ ᐃᓄᐃᑦ ᐊᒥᓱᑦ ᐊᑭᓖᑦᔪᑎᓪᓗᓂᒋᑦ ᐅᑎᕐᑎᑕᐅᑦᔪᑎᒃᓴᖏᓐᓄᑦ.”
ᔩᓱᓯᐅᑉ ᐊᖑᑏᖕᓂᒃ ᒪᕐᕉᖕᓂᒃ ᑕᐅᑐᓕᕐᑎᑦᓯᓂᖓ
ᒫᑯᓯ 10:46-52; ᓘᑲᓯ 18:35-43
29ᔩᓱᓯ ᐃᓕᓐᓂᐊᕐᑎᖏᓪᓗ ᔨᕆᑰᒥᑦ ᐊᐅᓪᓚᓕᕐᑎᓪᓗᒋᑦ, ᐃᓄᒋᐊᕐᑐᕐᔪᐊᑦ ᒪᓕᒃᓴᕐᐳᑦ. 30ᑕᑯᒋᑦ, ᐊᖑᑏᒃ ᒪᕐᕉᒃ ᑕᐅᑐᖏᑦᑑᒃ ᐊᖅᑯᑎᐅᑉ ᓴᓂᐊᓂ ᐃᒃᓯᕙᔫᒃ, ᑐᓴᕐᐴᒃ ᔩᓱᓯᐅᑉ ᐊᖅᑯᓵᕐᓂᖓᓂᒃ, ᑕᕝᕙ ᕾᒐᓛᓕᕐᐴᒃ, “ᑍᕕᑎᐅᑉ ᐃᕐᓂᖓ, ᓈᒃᑭᒋᑎᒍᒃ!”
31ᐃᓄᒋᐊᕐᑐᕐᔪᐊᓂᑦ ᐃᓂᕐᑎᕐᑕᐅᕘᒃ, ᓂᐱᖃᖁᔭᐅᓇᑎᒃ; ᑖᒃᑯᐊᒡᓕ ᓂᐱᖅᑯᕐᑐᓯᒃᑲᓐᓂᑐᐃᓐᓇᕐᓗᑎᒃ#20:31 ᓂᐱᕆᒃᓯᒋᐊᓪᓚᑐᐃᓐᓇᕐᐳᒃ ᕾᒐᓛᓕᕐᐴᒃ, “ᐊᑕᓃᖅ, ᑍᕕᑎᐅᑉ ᐃᕐᓂᖓ, ᓈᒃᑭᒋᑎᒍᒃ!”
32ᔩᓱᓯ ᓄᖅᑲᕐᓗᓂ ᑖᒃᑯᖕᓂᖓ ᕾᖁᔨᓕᕐᐳᖅ, ᐅᖃᕐᓗᓂ, “ᐅᕙᓐᓅᑦ ᖃᓄᖅ ᐱᓇᓱᐊᕐᕕᐅᔪᒪᕕᓯ?”
33ᑖᒃᑯᐊᒃ ᑭᐅᕘᒃ, “ᐊᑕᓃᖅ, ᐃᓕᖕᓄᑦ ᑕᐅᑐᓕᕐᑎᑕᐅᔪᒪᕗᒍᒃ!”
34ᔩᓱᓯᐅᑉ ᓇᒡᓕᒋᓕᕐᓗᒋᒃ ᐃᔨᖏᒃᑎᒍᑦ ᐊᒃᑐᕐᐹᒃ; ᑕᕝᕔᓐᓇᖅ ᑕᑯᔪᓐᓇᕐᓯᕘᒃ, ᔩᓱᓯᒥᒃ ᒪᓕᓕᕐᓗᑎᒡᓗ.
Currently Selected:
ᒫᑎᐅᓯᐅᑉ ᐊᒡᓚᖏᑦ 20: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
