ᒫᑎᐅᓯᐅᑉ ᐊᒡᓚᖏᑦ 12
12
ᓴᐸᑎᐅᑉ ᒥᒃᓵᓄᑦ ᐊᐱᕐᓲᑎ
ᒫᑯᓯ 2:23-28; ᓘᑲᓯ 6:1-5
1 #
ᒨᓯᓯ ᑕᓪᓕᒪᖏᑦ 23:25. ᑕᒪᑐᒪ ᑭᖑᓂᖓᒍᑦ ᐊᑯᓂᐅᓗᐊᕐᑎᓐᓇᒍ ᔩᓱᓯ ᐱᓱᓕᕐᐳᖅ ᓂᐊᖂᔭᒃᓴᓂᒃ ᐱᕈᕐᓰᕕᒃᑯᑦ ᓴᐸᑎᐅᑎᓪᓗᒍ, ᐃᓕᓐᓂᐊᕐᑎᖏᑦ ᑳᒃᑎᓪᓗᒋᑦ, ᑍᒤᒻᒪᑦ ᓂᐊᖂᔭᒃᓮᑦ ᐱᕈᕐᑐᖏᑕ ᓄᕗᖏᓐᓂᒃ ᑎᒍᓯᖃᑦᑕᓕᕐᐳᑦ, ᐱᕈᕐᑐᖏᓐᓂᒡᓗ ᓂᕆᓪᓗᑎᒃ. 2ᐹᕆᓯᓪᓗ ᑕᒪᑐᒥᖓ ᑕᑯᒐᒥᒃ, ᔩᓱᓯᒧᑦ ᐅᖃᕐᐳᑦ, “ᑕᑯᒋᑦ, ᐃᓕᓐᓂᐊᕐᑎᑎᑦ ᑍᒤᓕᐅᕐᑎᓪᓗᒋᑦ ᓴᐸᑎᒥ ᐊᑐᖁᔭᐅᖏᑦᑐᒥᒃ ᐊᑐᕐᐳᑦ!”
3 #
ᓴᒧᐃᓕ ᓯᕗᓪᓖᑦ 21:1-6. ᔩᓱᓯᐅᑉ ᑭᐅᕔᑦ, “ᐊᑐᐊᕐᓯᓚᐅᕐᓯᒪᓐᖏᓚᓰ ᑍᕕᑎᐅᑉ ᐱᓂᐊᕐᓂᕆᓚᐅᕐᑕᖓᓂᒃ, ᑍᑦᓱᒪᓂ ᓇᖕᒥᓂᖅ ᐅᓇᑕᕐᑐᒃᓴᖁᑎᖏᓪᓗ ᑳᓕᕐᑎᓪᓗᒋᑦ? 4#ᒨᓯᓯ ᐱᖓᔪᖏᑦ 24:9.ᒎᑎᐅᑉ ᐃᒡᓗᖓᓄᑦ ᐃᑎᓚᐅᕐᐳᖅ, ᓂᕆᓪᓗᓂᓗ ᒎᑎᒧᑦ ᑐᓂᔭᐅᓯᒪᔪᓂᒃ ᓂᐊᖂᔭᓂᒃ, ᐱᖁᔭᑎᒍᑦ ᓂᕆᔭᕆᐊᖃᖏᒃᑲᓗᐊᕐᓗᓂ ᐅᓇᑕᕐᑐᒃᓴᖁᑎᖏᓪᓗ, ᑐᓂᕐᕈᓯᕐᑎᑦᓯᔩᑦ ᓂᕆᔭᕆᐊᖃᕐᑐᑑᓚᐅᕐᒪᑕ ᑖᒃᑯᓂᖓ ᓂᐊᖂᔭᓂᒃ. 5#ᒨᓯᓯ ᓯᑕᒪᖏᑦ 28:9,10.ᐅᕝᕙᓗ ᐊᑐᐊᕐᓯᓚᐅᕐᓯᒪᓐᖏᓚᓰ ᓴᐸᑎᐅᓕᕌᖓᑦ ᑐᓂᕐᕈᓯᕐᑎᑦᓯᔩᑦ ᑐᒃᓯᐊᕐᕕᒃᔪᐊᕐᒥ ᓴᐸᑎᐅᑉ ᐱᖁᔭᖓᓂᒃ ᓱᕅᕙᖕᒪᑕ? ᑍᒤᒐᓗᐊᕐᑎᓪᓗᒋᓪᓕ ᑕᒪᑐᒥᖓ ᐸᓯᔭᒃᓴᐅᑦᔪᑎᖃᓐᖏᓛᑦ? 6ᐅᖃᐅᑎᕙᑦᓯᓕ ᑕᒫᓃᑦᑐᖃᕐᐳᖅ ᑐᒃᓯᐊᕐᕕᒃᔪᐊᒥᑦ ᐊᖏᓂᕐᓴᐅᔪᒥᒃ. 7#ᒫᑎᐅᓯ 9:13; ᕼᐆᓯᐊ 6:6.ᒎᑎᐅᑉ ᐅᖃᐅᓯᖏᓐᓂ ᐅᖃᕐᓯᒪᔪᑦ ᖃᐅᔨᒪᒍᑦᓯᒋᒃ ᖃᓄᖅ ᑐᑭᖃᕐᒪᖔᑕ, ᐃᒤᓕᔪᑦ, ‘ᓂᑲᒍᓱᖕᓂᖅ ᐱᔪᒪᔭᕆᕙᕋ, ᐆᒪᔪᓂᒃ ᑐᓂᕐᕈᓯᕐᓂᐅᖏᑦᑐᖅ.’ ᑖᑦᓱᒪ ᑐᑭᖓ ᑐᑭᓯᒍᑦᓯᐅᒃ, ᐸᓯᔭᒃᓴᐅᖏᑦᑐᓂᒃ ᐸᓯᔭᒃᓴᓐᖑᕐᑎᑦᓯᓇᓱᐊᕋᔭᓐᖏᓚᓯ; 8ᐃᓅᑉ ᐃᕐᓂᖓ ᓴᐸᑎᒧᑦ ᐊᑕᓂᐅᖕᒪᑦ.”
ᐊᖑᑦ ᓄᑭᖃᖏᑦᑐᓂᒃ ᐊᒡᒐᓕᒃ
ᒫᑯᓯ 3:1-6; ᓘᑲᓯ 6:6-11
9ᑕᕝᕙᓐᖓᑦ ᔩᓱᓯ ᕿᒪᕉᑎᒐᒥ, ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓄᐊᕐᐳᖅ. 10ᑕᑯᒋᑦ, ᑕᕝᕙᓂ ᐊᖑᑎᑕᖃᕐᐳᖅ ᓄᑭᖃᖏᑦᑐᓂᒃ ᐊᒡᒐᓕᖕᒥᒃ. ᐃᓄᐃᑦ ᐃᓚᖏᑦ ᑕᕝᕙᓃᑉᐳᑦ ᔩᓱᓯᒥᒃ ᐊᑭᕋᕐᑐᕈᑎᒃᓴᒥᖕᓂᒃ ᐱᑦᔪᑎᒃᓴᓯᐅᕈᒪᓪᓗᑎᒃ, ᑍᒤᒻᒪᑦ ᔩᓱᓯ ᐊᐱᕆᕚᑦ, “ᐱᖁᔭᑦᑎᓐᓂᒃ ᐊᑭᕋᕐᑐᕐᐹ ᓴᐸᑎᐅᑎᓪᓗᒍ ᐃᓄᖕᒥᒃ ᐋᖅᑭᒃᓯᔪᖃᕐᐸᑦ?”
11 #
ᓘᑲᓯ 14:5. ᔩᓱᓯᐅᑉ ᐅᖃᐅᑎᕔᑦ, “ᓇᓪᓕᓯᓕ ᖃᓄᖅ ᐱᒐᔭᕐᐹ ᓰᐱᖁᑎᖃᕐᑑᑉ, ᓴᐸᑎᐅᑎᓪᓗᒍ ᓰᐱᖁᑎᖓ ᐃᑎᕐᓴᒧᑦ ᐃᓗᑐᔪᒧᑦ ᑲᑕᒃᐸᑦ, ᑎᒍᓗᒍ ᖃᕝᕕᕐᑎᓐᓇᓱᐊᕋᔭᓐᖏᓚᐅᒃ? 12ᐃᓄᒃ ᖃᓄᖅ ᓰᐱᒥᑦ ᐱᓪᓚᕆᐅᓂᕐᓴᐅᑎᒋᕙ! ᑍᒤᒻᒪᑦ, ᐱᖁᔭᕗᑦ ᐱᑦᓯᐊᖁᔨᕗᑦ ᓴᐸᑎᐅᑎᓪᓗᒍ.” 13ᑕᕝᕙ ᐊᖑᒻᒧᑦ ᓄᑭᖃᖏᑦᑐᓂᒃ ᐊᒡᒐᓕᖕᒧᑦ ᐅᖃᕐᐳᖅ, “ᐊᒡᒐᑎᑦ ᐃᓵᒃᑭᑦ.”
ᑕᕝᕙ ᐊᖑᑎᐅᑉ ᐊᒡᒐᓂ ᐃᓵᒃᐰᑦ, ᐋᖅᑭᑦᓯᐊᕐᓗᑎᒡᓗ, ᐃᒡᓗᖏᑎᑐᑦ. 14ᑕᕝᕙ ᐹᕆᓯᑦ ᑕᕝᕙᓐᖓᑦ ᕿᒪᕉᑎᓗᑎᒃ ᐃᓱᒪᒃᓴᕐᓯᐅᖃᑎᒌᓕᕐᐳᑦ ᖃᓄᖅ ᔩᓱᓯᒥᒃ ᑐᖁᑦᓯᔪᓐᓇᕐᒪᖔᕐᒥᒃ.
ᒎᑎᐅᑉ ᐱᔨᓂ ᓂᕈᐊᕐᓯᒪᔭᖓ
15ᔩᓱᓯ ᑐᓴᕋᒥ ᑐᖁᑕᐅᓇᓱᐊᕐᓂᕐᒥᓂᒃ, ᑕᕝᕙᓐᖓᑦ ᓇᔪᕐᑕᒥᓂᑦ ᕿᒪᕉᑎᕗᖅ; ᐃᓄᒐᓴᒡᔪᐊᓂᓪᓗ ᒪᓕᒡᑕᐅᕗᖅ, ᖃᓂᒪᔪᓕᒫᓪᓗ ᖃᓂᒻᒪᓯᖏᓐᓂᑦ ᐋᖅᑭᒃᐰᑦ. 16ᐃᓂᕐᑎᕐᐰᑦ ᐃᓄᖕᓄᑦ ᐅᖃᐅᓯᕆᔭᐅᔪᒪᓇᓂ. 17ᑕᒪᓐᓇ ᔩᓱᓯᐅᑉ ᐱᓂᐊᕐᓂᕆᕚ ᓇᓚᐅᑦᑍᔪᖅ ᐂᓮᐊᓯᒃᑯᑦ ᐅᖃᐅᓯᐅᓯᒪᔪᑦ ᓇᓚᐅᑦᓯᓕᖁᓪᓗᒋᑦ ᐃᒤᓕᔪᑦ:
18 #
ᐂᓮᐊᓯ 42:1-4. “ᑕᑯᒋᑦ, ᑕᕝᕙ ᐱᔨᒐ, ᓂᕈᐊᕐᓯᒪᔭᕋ, ᓇᒡᓕᒋᔭᕋ, ᖁᕕᐊᒋᑦᓯᐊᕐᑕᕋᓗ.
ᐊᓂᕐᓂᕋ ᑐᓂᓛᕐᐸᕋ ᑖᑦᓱᒧᖓ,
ᐅᖃᐅᓯᖃᕈᒫᕐᐳᖅ ᐊᑦᔨᒌᒃᑎᑦᓯᓗᓂ ᔫᑎᐅᖏᑦᑐᓄᑦ.
19ᐂᕙᖃᑎᖃᕈᒫᓐᖏᓚᖅ ᕾᒐᓛᕈᒫᕋᓂᓗ,
ᐊᖅᑯᑎᓂ ᓂᐱᖓ ᑐᓵᔭᐅᔪᒫᓐᖏᓚᖅ.
20ᓇᑲᑦᓯᔪᒫᓐᖏᓚᖅ ᐃᕕᒡᔪᐊᒥᒃ ᓂᐅᖓᔪᒥᒃ,
ᖃᒥᑦᓯᔪᒫᓐᖏᓚᕐᓗ ᖁᓪᓕᐅᑉ ᒪᓂᖓᓂᒃ ᐸᓕᓕᕐᑐᒥᒃ.
ᓴᐱᓕᕈᒫᓐᖏᓚᕐᓗ ᐊᑦᔨᒌᒃᑎᑦᓯᓂᕐᒥᒃ ᓵᓚᖃᕐᑎᑦᓯᓚᐅᖅᑳᕋᓂ;
21ᔫᑎᐅᖏᑦᑐᓕᒫᓪᓗ ᐊᑎᕐᒥᒍᑦ ᓂᕆᐅᒋᔭᒃᓴᖃᓕᕐᑎᑦᓱᒫᕐᐰᑦ.”
ᔩᓱᓯᓗ ᐱᐅᓪᓯᐹᐱᓗ
ᒫᑯᓯ 3:20-30; ᓘᑲᓯ 11:14-23
22ᐃᓄᐃᑦ ᐃᓚᖏᑦ ᔩᓱᓯᒧᐊᕈᑦᔨᕗᑦ ᑕᐅᑐᖏᑦᑐᒥᒃ ᐊᖑᒻᒥᒃ, ᐅᖃᕈᓐᓇᖏᑦᑐᒥᒡᓗ ᐊᓂᕐᓂᕐᓗᖕᒧᑦ ᐃᓗᒻᒥᕐᑕᐅᓯᒪᒐᒥ, ᑖᓐᓇ ᔩᓱᓯᐅᑉ ᐋᖅᑭᒃᐹ, ᐊᖑᑦ ᐅᖃᕈᓐᓇᕐᓯᕗᖅ ᑕᐅᑐᓕᕐᓗᓂᓗ. 23ᐃᓄᒋᐊᒃᑐᕐᔪᐊᓕᒫᑦ ᑲᒪᓂᐊᕐᐳᑦ ᔩᓱᓯᐅᑉ ᐱᓂᐊᕐᓂᕆᔭᖓᓂᒃ, ᐅᖃᕐᓗᑎᒃ, “ᐅᓈ ᑍᕕᑎᐅᑉ ᐃᕐᓂᕆᓐᖏᑕᕋᓗᐊᖓ?” 24#ᒫᑎᐅᓯ 9:34; 10:25.ᐹᕆᓯᑦ ᑕᒪᑐᒥᖓ ᑐᓴᕋᒥᒃ, ᐅᖃᕐᐳᑦ, “ᐅᓇ ᔩᓱᓯ ᐊᓂᕐᓂᕐᓗᖕᓂᒃ ᐃᓄᖕᒥᑦ ᐊᓂᑎᑦᓯᖃᑦᑕᕐᑐᖅ ᐊᓂᕐᓂᕐᓗᐃᑦ ᐊᖓᔪᖅᑳᖓᓐᓄᑦ ᐱᐅᓪᓯᐹᐱᒧᑦ ᐱᔪᓐᓇᕐᓂᖃᕐᑎᑕᐅᓪᓗᓂ ᑍᒤᓕᐅᖃᑦᑕᕐᑐᖅ.”
25ᔩᓱᓯᐅᑉ ᖃᐅᔨᒪᒐᒥᒋᑦ ᖃᓄᖅ ᐃᓱᒪᖃᕐᒪᖔᑕ, ᐅᖃᐅᑎᕔᑦ, “ᓄᓇᓖᑦ ᐊᖓᔪᖅᑳᕐᔪᐊᖃᕐᑐᑦ ᐊᑕᐅᓯᕐᒥᒃ ᐊᒡᒍᕐᓗᑎᒃ#12:25 ᐊᕕᐅᖃᕐᓗᑎᒃ ᐃᒻᒥᖕᓄᑦ ᐅᓇᑕᓕᕈᑎᒃ ᐊᖓᔪᖅᑲᐅᕕᒃ ᐊᑯᓂᐅᖏᑦᑐᖅ ᓄᖑᒃᑲᔭᕐᐳᖅ, ᓄᓇᓖᓪᓗ, ᐅᕝᕙᓗ ᐃᓚᒌᑦ ᐃᒡᓗᒥᐅᖃᑎᒌᑦ ᐊᒡᒍᕐᓗᑎᒃ,#12:25 ᐊᕕᐅᖃᕐᓗᑎᒃ ᐃᒻᒥᖕᓄᑦ ᐅᓇᑕᓕᕈᑎᒃ ᐊᑕᐅᓯᐅᔪᓐᓃᕋᔭᕐᐳᑦ. 26ᓵᑖᓇᓯᐅᓪᓗ ᓵᑖᓇᓯᐅᖃᑎᓂ ᐊᓂᑎᒃᑯᓂᐅᒃ, ᐃᒻᒥᓂᒃ ᓯᖁᑦᑎᕐᓗᓂ ᐊᒡᒍᕋᔭᕐᐳᖅ; ᖃᓄᕐᓕ ᑍᒪ ᐊᑕᓂᐅᕕᖓ ᑲᔪᓯᔪᓐᓇᕋᔭᕐᐸ? 27ᐊᓂᕐᓂᕐᓗᐃᑦ ᐊᓂᑎᒍᒃᑭᑦ ᐱᐅᓪᓯᐹᐱᒃᑯᑦ, ᒪᓕᒃᑎᓯᓕ ᑍᒪ ᓇᐅᒃᑯᑦ ᐊᓂᑎᑦᓯᖃᑦᑕᕐᐸᑦ ᐊᓂᕐᓂᕐᓗᖕᓂᒃ? ᑍᒤᒻᒪᑦ ᒪᓕᒡᑎᓯ ᐃᖅᑲᕐᑐᐃᔨᒋᔪᒫᕐᐸᓯ. 28ᒎᑎᐅᓪᓕ ᐊᓂᕐᓂᖓᒍᑦ, ᐊᓂᕐᓂᕐᓗᐃᑦ ᐊᓂᑎᒍᒃᑭᑦ, ᑕᕝᕙ ᒎᑎᐅᑉ ᐊᑕᓂᐅᕕᖓᓄᑦ ᑎᑭᑕᐅᓯᒪᓕᕐᐳᓯ.
29“ᐅᕝᕙᓗ ᖃᓄᖅ ᓴᓐᖏᔪᐊᓘᑉ ᐃᒡᓗᖓᓄᑦ ᐃᑎᕐᑐᖃᕈᓐᓇᕐᐹ? ᐱᖁᑎᖏᓐᓂᒡᓗ ᐊᕐᓵᕐᓗᒍ, ᑭᓯᐊᓂ ᓴᓐᖏᔪᐊᓗᒃ ᕿᓚᒃᓱᖅᑳᕐᓗᒍ; ᑕᕝᕙ ᐃᒡᓗᖓᑕ ᐱᖁᑎᖏᓐᓂᒃ ᐊᕐᓵᕐᓯᔪᓐᓇᕐᓯᒐᔭᕐᐳᖅ.
30 #
ᒫᑯᓯ 9:40. “ᐱᓇᓱᐊᖃᑎᒋᓐᖏᑕᕋ ᐅᕙᓐᓂᒃ ᐊᑭᕋᕐᑐᕐᐳᖅ; ᐅᕙᓐᓂᒡᓗ ᑲᑎᕐᓱᐃᖃᑎᖃᖏᑦᑐᖅ ᐊᕕᑎᕆᕗᖅ. 31ᑍᒤᒻᒪᑦ ᐅᖃᐅᑎᕙᑦᓯ, ᐃᓄᐃᑦ ᐊᔪᕐᑐᓕᓂᕐᒥᖕᓂᑦ ᖃᓄᐃᑦᑐᑐᐃᓐᓇᓂᑦ, ᒎᑎᒥᒡᓘᓐᓃᑦ ᐅᖃᕐᓂᕐᓗᒃᓯᒪᒐᓗᐊᕐᐸᑕ ᐃᓱᒪᒋᔪᓐᓁᕐᕕᐅᔪᓐᓇᕐᐳᑦ, ᐊᓂᕐᓂᕐᒥᒡᓕ ᐃᑦᔪᕐᓁᑦᑐᒥᒃ ᐅᖃᕐᓂᕐᓘᑦᔨᔪᖅ ᐃᓱᒪᒋᔪᓐᓁᕐᑕᐅᓂᐊᓐᖏᓚᖅ. 32#ᓘᑲᓯ 12:10.ᓇᓪᓕᐊᓪᓗ ᐊᑭᕋᕐᑐᕐᑐᖅ ᐃᓅᑉ ᐃᕐᓂᖓᓂᒃ ᐃᓱᒪᒋᔪᓐᓁᕐᑕᐅᓂᐊᕐᐳᖅ; ᓇᓪᓕᐊᓪᓕ ᐊᑭᕋᕐᑐᕐᐸᑦ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓱᒪᒋᔪᓐᓁᕐᑕᐅᓂᐊᓐᖏᓚᖅ, ᒫᓐᓇ ᓇᓪᓕᐅᑦᑐᒥ ᐱᔪᒫᕐᑐᒥᓗ.”
ᓇᐹᕐᑐᖅ ᐱᕈᕐᑐᖏᓪᓗ
ᓘᑲᓯ 6:43-45
33 #
ᒫᑎᐅᓯ 7:20; ᓘᑲᓯ 6:44. “ᓇᐹᕐᑐᖅ ᐱᐅᒃᐸᑦ ᐸᐅᕐᖓᖏᑦ ᐱᐅᓂᐊᕆᕗᑦ; ᓇᐹᕐᑐᖅ ᐱᐅᖏᑉᐸᑦ ᐸᐅᕐᖓᖏᑦ ᐱᐅᖏᓐᓂᐊᕆᕗᑦ; ᓇᐹᕐᑐᖅ ᐱᕈᕐᑐᖏᑎᒍᑦ ᖃᐅᔨᒪᔭᐅᕙᒃᐳᖅ. 34#ᒫᑎᐅᓯ 3:7; 23:33; ᓘᑲᓯ 3:7; ᒫᑎᐅᓯ 15:18; ᓘᑲᓯ 6:45.ᐃᓕᑦᓯ ᖁᒡᓗᒋᐊᖑᔪᓯ ᖃᓄᖅ ᐱᐅᔪᓂᒃ ᐅᖃᕈᓐᓇᕐᐱᓰ? ᐱᐅᖏᑦᑑᑎᓪᓗᓯ, ᐆᒻᒪᑎᐅᑉ ᑕᑕᑦᔪᑎᖓᓂᒃ ᐃᓄᒃ ᐅᖃᐅᓯᖃᓲᖑᕘᖅ. 35ᐃᓄᒃ ᐱᐅᔪᖅ ᐱᐅᔪᓂᒃ ᓴᖅᑭᑎᑦᓯᕙᒃᐳᖅ ᐱᐅᔪᓂᒃ ᑲᑎᕐᓯᕕᖕᒥᓂᑦ; ᐃᓄᒡᓕ ᐱᐅᖏᑦᑐᖅ ᐱᐅᖏᑦᑐᓂᒃ ᓴᖅᑭᑎᑦᓯᕙᒃᐳᖅ ᐱᐅᖏᑦᑐᓂᒃ ᑲᑎᕐᓯᕕᖕᒥᓂᑦ.
36“ᐅᖃᐅᑎᕙᑦᓯ, ᐃᖅᑲᕐᑐᕐᑕᐅᕕᐅᑉ ᐅᓪᓗᖓᓂ ᐃᓄᓕᒫᑦ ᓴᖅᑭᑎᑦᓯᔭᕆᐊᖃᕈᒫᕐᐳᑦ ᐊᑑᑎᖃᖏᑦᑐᓂᒃ ᐅᖃᐅᓯᕆᓚᐅᕐᓯᒪᔭᒥᖕᓂᒃ. 37ᐅᖃᐅᓯᑦᓯᓐᓄᑦ ᐸᓯᔭᒃᓴᐅᖏᓐᓂᕋᕐᑕᐅᔪᒫᕐᐳᓯ, ᐅᖃᐅᓯᑦᓯᓄᓪᓗ ᐸᓯᔭᒃᓴᓐᖑᕐᑎᑕᐅᔪᒫᕐᐳᓯ.”
ᑲᒪᓇᕐᑐᒥᒃ ᐊᒃᓱᕈᕐᓗᑎᒃ ᓴᖅᑭᑎᑦᓯᕕᐅᔪᒪᔪᑦ
ᒫᑯᓯ 8:11-12; ᓘᑲᓯ 11:29-32
38 #
ᒫᑎᐅᓯ 16:1; ᒫᑯᓯ 8:11; ᓘᑲᓯ 11:16. ᑕᕝᕙ ᐱᖁᔭᓂᒃ ᐃᓕᓮᔩᑦ, ᐹᕆᓯᓪᓗ ᐃᓚᖏᑦ ᐅᖃᕐᐳᑦ, “ᐃᓕᓮᔩ, ᑲᒪᓇᕐᑐᓕᑎᓪᓗᑎ ᑕᑯᓐᓇᕈᒪᔪᒍᑦ.”
39 #
ᒫᑎᐅᓯ 16:4; ᒫᑯᓯ 8:12. ᔩᓱᓯᐅᑉ ᐅᖃᐅᑎᕔᑦ, “ᐅᓪᓗᒥᐅᔪᖅ ᐃᓄᐃᑦ ᐱᐅᖏᑦᑐᓕᔪᑦ ᒎᑎᖃᖏᑦᑐᓪᓗ ᑲᒪᓇᕐᑐᓕᓂᕐᓂᒃ ᑕᑯᔪᒪᕗᑦ; ᑲᒪᓇᕐᑐᓕᓂᕐᒥᒃ ᑐᓂᓯᕕᐅᓂᐊᓐᖏᓚᑦ ᓇᓚᐅᑦᑍᔪᑉ ᔫᓇᐅᑉ ᑲᒪᓇᕐᑐᓕᓂᖓᑕ ᐊᓯᐊᓂᒃ. 40#ᔫᓇ 1:17.ᔫᓇ ᐃᒪᕐᒥᐅᑖᓘᑉ ᐃᓗᐊᓃᓚᐅᕐᒪᑦ ᐅᓪᓗᓂᒃ ᐱᖓᓱᓂᒃ ᐅᓐᓄᐊᓂᒡᓗ ᐱᖓᓱᓂᒃ, ᑍᒫᒃᑕᐅᖅ ᐃᓅᑉ ᐃᕐᓂᖓ ᐅᓪᓗᓂᒃ ᐱᖓᓱᓂᒃ ᐅᓐᓄᐊᓂᒡᓗ ᐱᖓᓱᓂᒃ ᓄᓇᕐᔪᐊᑉ ᐃᑎᓂᖓᑕ ᐃᓗᐊᓃᑦᓱᒫᕆᕗᖅ. 41#ᔫᓇ 3:5.ᐃᖅᑲᕐᑐᕐᑕᐅᕕᒃ ᓇᓪᓕᐅᑎᒃᐸᑦ ᓂᓂᕕᒥᐅᑦ ᐃᓄᖏᑦ ᒪᑭᑦᓱᒫᕐᐳᑦ ᒫᓐᓇ ᐃᓅᔪᓂᒃ ᐃᖅᑲᕐᑐᐃᓗᑎᒃ ᐃᒋᑕᒃᓴᕈᕐᑎᑦᓯᓗᑎᒡᓗ; ᐊᔪᕐᓂᕐᒥᖕᓂᑦ ᖃᕿᐊᓕᓚᐅᕐᒪᑕ ᔫᓇ ᓇᓚᐅᑦᑍᔪᖅ ᐅᖃᓪᓚᒃᑎᓪᓗᒍ ᑐᓴᕋᒥᒃ; ᑕᑯᒋᑦ, ᐅᖃᐅᑎᕙᑦᓯ, ᑕᕝᕙᓃᑦᑐᖃᕐᐳᖅ ᔫᓇᒥᑦ ᐊᔪᖏᓐᓂᕐᓴᐅᔪᒥᒃ! 42#ᐊᑕᓃᑦ ᓯᕗᓪᓖᑦ 10:1-10; ᑯᕉᓂᑲ ᐂᑉᐸᖏᑦ 9:1-12.ᐃᖅᑲᕐᑐᕐᑕᐅᕕᒃ ᓇᓪᓕᐅᑎᒃᐸᑦ ᓰᐸᒥᐅᑦ ᐊᖓᔪᖅᑳᕐᔪᐊᖓ ᐊᕐᓇᖅ ᒪᑭᑦᓱᒫᕐᐳᖅ ᒫᓐᓇ ᐃᓅᔪᓂᒃ ᐃᒋᑕᒃᓴᓐᖑᕐᑎᑦᓯᓗᓂ; ᑖᓐᓇ ᐅᖓᓯᒃᑐᐊᓗᖕᒧᑦ ᐃᖏᕐᕋᓚᐅᕐᒪᑦ ᓄᓇᒥᓂᑦ, ᑐᓵᔭᕐᑐᕐᓗᓂ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓯᓚᑐᓂᖓᓂᒃ, ᑕᑯᒋᑦ, ᐅᖃᐅᑎᕙᑦᓯ ᑕᕝᕙᓃᑦᑐᖃᕐᐳᖅ ᓲᓗᒨᓂᒥᑦ ᐊᔪᖏᓐᓂᕐᓴᐅᔪᒥᒃ!”
ᐊᓂᕐᓂᕐᓘᑉ ᓵᑖᓇᓯᒥᓐᖔᕐᓯᒪᔫᑉ ᐅᑎᕐᓂᖓ
ᓘᑲᓯ 11:24-26
43“ᐊᓂᕐᓂᕐᓗᒃ ᐃᓄᖕᒥᑦ ᐊᓂᒐᒥ, ᓄᓇᒃᑯᑦ ᐸᓂᕐᑐᒃᑯᑦ ᐃᖏᕐᕋᕗᖅ ᐃᓂᒃᓴᒥᓂᒃ ᕿᓂᕐᓗᓂ, ᓇᓂᓯᔪᓐᓇᖏᒃᑯᓂᓕ, 44ᐃᒻᒥᓄᑦ ᐅᖃᕐᐳᖅ, ‘ᐃᒡᓗᒧᑦ ᕿᒪᓚᐅᕐᑕᓐᓄᑦ ᐅᑎᕐᓂᐊᓕᕐᐳᖓ.’ ᐅᑎᕋᒥ, ᐃᒡᓗ ᑕᑯᕚ ᐃᓗᓕᖃᖏᑦᑐᖅ, ᓴᓗᒪᑦᓯᐊᕐᓗᓂ, ᐋᖅᑭᑦᑎᐊᕐᓯᒪᓕᕐᑐᖅ. 45ᑕᕝᕙ ᐊᓂᕗᖅ ᑕᕝᕙᓐᖓᑦ ᐊᓂᕐᓂᕐᓂᒃ 7ᓂᒃ ᐃᒻᒥᓂᑦ ᐱᐅᖏᑦᑑᓂᕐᓴᐅᔪᓂᒃ ᐃᓚᖃᓕᕐᓗᓂ, ᑕᕝᕗᖓᓗ ᑎᑭᓐᓇᒥᒃ ᑕᕝᕙᓂ ᐃᓂᖃᓕᕐᐳᑦ; ᑕᒪᑐᒪᓗ ᑭᖑᓂᖓᒍᑦ ᐃᓄᒃ ᑖᓐᓇ ᓯᕗᕐᖓᓂᑦ ᐱᐅᖏᓐᓂᕐᓴᐅᓕᕐᐳᖅ. ᑍᒤᑦᓱᒫᕆᕗᑦᑕᐅᖅ ᐅᓪᓗᒥ ᐃᓅᔪᓄᑦ ᐱᐅᖏᑦᑐᓄᑦ.”
ᔩᓱᓯᐅᑉ ᐊᓈᓇᖓ ᖃᑕᓐᖑᑎᖏᓪᓗ
ᒫᑯᓯ 3:31-35; ᓘᑲᓯ 8:19-21
46ᔩᓱᓯ ᓱᓕ ᐅᖃᓪᓚᒃᑎᓪᓗᒍ ᐃᓄᖕᓄᑦ, ᑕᑯᒋᑦ, ᔩᓱᓯᐅᑉ ᐊᓈᓇᖓ ᖃᑕᓐᖑᑎᖏᓪᓗ ᑕᕝᕗᖓ ᑎᑭᑉᐳᑦ, ᐃᒡᓘᑉ ᓯᓚᑖᓃᓕᕋᒥᒃ, ᔩᓱᓯ ᐅᖃᐅᑦᔭᐅᖁᕚᑦ ᐅᖃᖃᑎᖃᕈᒪᓪᓗᑎᒃ. 47ᑕᕝᕙ ᐃᓄᐃᑦ ᐃᓚᖓᓐᓄᑦ ᔩᓱᓯ ᐅᖃᐅᑦᔭᐅᕗᖅ, “ᑕᑯᒋᑦ, ᐊᓈᓁᓪᓗ ᖃᑕᓐᖑᑎᑎᓪᓗ ᓯᓚᒥ ᓇᖏᕐᐳᑦ, ᐃᓕᖕᓂᒃ ᐅᖃᖃᑎᖃᕈᒪᓪᓗᑎᒃ.”
48ᔩᓱᓯᐅᑉ ᑭᐅᕔᑦ, “ᑭᓈ ᐊᓈᓇᒐ, ᑭᓇᒃᑯᓪᓘ ᖃᑕᓐᖑᑎᒃᑲ?” 49ᔩᓱᓯ ᐃᓕᓐᓂᐊᕐᑎᒥᓄᑦ ᑎᒃᑯᐊᕐᓗᓂ ᐅᖃᕐᐳᖅ, “ᑕᑯᒋᑦ! ᐅᑯᐊ ᑕᕝᕙ ᐊᓈᓇᒃᑲ ᖃᑕᓐᖑᑎᒃᑲᓗ! 50ᓇᓪᓕᐊᑦ ᐊᑖᑕᒪ ᕿᓚᖕᒦᑦᑑᑉ ᐱᓂᐊᕐᑕᐅᖁᔭᖓᓂᒃ ᐱᓇᓱᐊᕐᑐᖅ, ᑖᓐᓇ ᖃᑕᓐᖑᑎᒋᕙᕋ, ᓇᔭᒋᓪᓗᒍᓗ, ᐊᓈᓇᒋᕙᕋ.”
Currently Selected:
ᒫᑎᐅᓯᐅᑉ ᐊᒡᓚᖏᑦ 12: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
