ᔨᕆᒤᐊᐅᑉ ᐅᒡᒍᐊᕐᖕᓂᖏᑦ 3
3
ᓱᒋᐊᖅᑕᐅᓂᖅ, ᓵᖏᐊᕐᖕᓂᕐᓗ, ᓂᕆᐅᒋᔭᒃᓴᖃᕐᖕᓂᕐᓗ
1ᐅᕙᖓ ᑕᑯᓯᒪᕗᖓ ᐋᓐᓂᐊᑎᑕᐅᓂᕐᖕᒥᒃ.
ᑖᑦᓱᒪ ᓂᓐᖓᐅᒪᓂᖓᑕ ᐊᓇᐅᑕᖓᓂᒃ!
2ᐅᖁᒤᑦᑐᒧᑦ ᐊᔭᐅᖅᐹᖓ
ᑖᖅᑐᒧᑦ ᖃᐅᒪᓂᖃᖏᑦᑐᒧᑦ.
3ᐅᕙᓐᓄᑐᐊᖅ ᐊᒡᒐᓂ ᓵᑉᐰᑦ,
ᐋᓐᓂᖅᓯᖅᑕᐅᔪᑎᑐᑦ ᑍᒤᑉᐳᖓ ᐅᓪᓗᓕᒫᖅ.
4ᐅᕕᓂᒐᓗ ᑎᒥᓕᒫᕋᓗ ᐃᓄᑐᖃᖅᑎᑐᑦ ᑕᐅᑦᑐᖃᓕᖅᑎᑉᐹ
ᓴᐅᓂᒃᑲᓗ ᓇᒡᒍᖅᓗᒋᑦ.
5ᐊᔪᓕᖅᑎᑉᐹᖓ ᑎᒍᔭᐅᓯᒪᔪᑎᑐᑦ ᖁᕕᐊᓇᖏᑦᑐᒧᑦ ᐅᖁᒤᒃᓴᕐᖕᓇᖅᑐᒧᓪᓗ.
6ᑖᖅᑐᒥ ᐃᓂᖃᖅᑎᑉᐹᖓ ᑐᖁᓯᒪᔪᑦ ᐃᓂᖓᓃᑦᑐᑎᑐᑦ.
7ᐊᕙᓗᓕᐅᕈᑦᔭᐅᓯᒪᔪᑎᑐᑦ ᑍᒤᑦᑐᒦᑎᒻᒪᖓ ᕿᒫᕕᒃᓴᖃᕈᓐᓃᖅᐳᖓ
ᐊᖅᓵᖅᑑᔭᓄᓪᓗ ᕿᓚᒃᓱᖅᐹᖓ.
8ᑐᒃᓯᐊᕋᓗᐊᕋᒪ ᐃᑲᔪᖅᑕᐅᔪᒪᓪᓗᖓ, ᑐᒃᓯᐊᕐᖕᓂᕋ ᒪᑐᕚ.
9ᐊᑐᕐᖕᓂᐊᖅᑕᕋ ᓴᓇᓯᒪᔪᓂᒃ ᐅᔭᕋᓕᖅᓱᖅᓗᒍ ᓴᐱᕚ,
ᐊᖅᑯᑏᓪᓗ ᐊᑐᕐᖕᓂᐊᖅᑕᒃᑲ ᓴᖑᐃᖅᑎᓪᓗᓂᒋᑦ.
10ᐅᑕᖅᑭᕚᖓ ᓇᓄᖅᑎᑐᑦ
ᐹᒻᒪᖓᓪᓗᓂ ᐆᒪᔪᕐᖕᓂᐊᖅᑕᒥᓂᒃ ᐅᑕᖅᑭᔪᑎᑐᑦ
ᓛᔭᑎᑐᓪᓗ ᐃᔨᖅᓯᒪᔪᑎᑐᑦ.
11ᐊᖅᑯᑎᒋᔭᓐᓂᑦ ᐅᓂᐊᖅᓗᓂᖓ ᐅᒋᐊᖅᓴᖅᐹᖓ
ᕿᒤᓐᓇᖅᓗᓂᖓᓗ ᐃᓱᖃᖏᑦᑐᒧᑦ.
12ᐱᑎᒃᓵᕐᖕᓂᐊᖅᑐᑎᑐᑦ ᖃᕐᔪᓄᑦ ᐆᒃᑕᕐᕕᒃᓴᓕᐊᕆᕚᖓ.
13ᐱᑎᒃᑲᒥᖓ ᐳᑐᒥᓵᖅᐹᖓ ᑎᒥᒐ.
14ᐃᓄᖕᓄᑦ ᐃᔪᕿᓴᐅᑎᑐᐃᓐᓇᐅᓕᖅᐳᖓ
ᒥᑕᐅᑎᒋᔭᐅᔪᒃᓴᑐᐃᓐᓇᐅᓕᖅᓗᖓᓗ.
15ᐋᓐᓂᐊᕈᑎᒃᓮᓐᓇᕐᖕᓂᒃ ᒪᒪᖏᑦᑐᓂᒃ ᐃᒥᒐᒃᓴᖃᖅᑎᑉᐹᖓ.
16ᑮᓇᕋ ᓄᓇᒧᑦ ᐊᐳᖅᑕᖅᑎᒻᒪᒍ ᑭᒍᑎᒃᑲ ᓱᕋᒃᑎᖅᐳᑦ ᐅᔭᖅᑲᓄᑦ,
ᑐᓪᓕᕋᖅᓗᓂᖓᓗ ᐊᕐᔭᓕᓂᕐᖕᓃᑎᑉᐹᖓ.
17ᓮᒪᓇᖅᑐᒦᓚᐅᖅᓯᒪᔪᓐᓁᕋᒪ ᐊᒡᓛᑦ ᐱᒃᓴᖃᑦᓯᐊᕐᖕᓂᖅ ᐳᐃᒍᖅᐸᕋ.
18ᐅᖃᓕᖅᐳᖓᓕ, ᐃᓅᓯᑦᓯᐊᒥᒃ ᖃᐅᔨᒪᔭᖃᓐᖏᓕᕋᒪ
ᐊᑕᓂᖅ ᓂᕆᐅᒡᕕᒋᔪᓐᓃᖅᐸᕋ.
19ᐅᑯᒤᒃᓴᕐᖕᓂᕋ ᐃᓱᒪᒋᓕᕌᖓᒃᑯ, ᓇᒧᓐᖓᕐᕕᒃᓴᖃᖏᓐᓂᕋᓗ,
ᓱᖓᖅᑎᑐᑦ ᖃᒃᑭᓐᓇᖅᑐᑎᑐᑦ ᑍᒤᑉᐳᖅ.
20ᑕᕐᖕᓂᕐᖕᒪ ᐃᓱᒪᒋᑦᓮᓐᓇᖅᐹ ᐅᖁᒤᒃᓴᕐᖕᓂᕐᖕᒧᓪᓗ ᑲᑕᒃᐸᓪᓕᐊᑐᐃᓐᓇᖅᐳᖓ.
21ᐃᖅᑬᔭᕌᖓᒪᓕ ᓂᕆᐅᒋᔭᒃᓴᖅᑖᖅᐸᒃᑭᕗᖓ:
22ᐊᑕᓂᐅᑉ ᓂᒡᓕᒍᓱᖕᓂᖓ ᑲᔪᓯᑦᓮᓐᓇᖅᐳᖅ,
ᓂᑲᒍᓱᖕᓂᖓ ᓄᖅᑲᓚᐅᖅᓯᒪᓐᖏᓚᖅ,
23ᐅᓪᓛᑎᑐᑦ ᓄᑖᓐᖑᖅᑎᑕᐅᕕᕾᓐᓇᐅᔭᕐᖕᒪᑦ ᓱᕐᕋᔪᐃᑦᑑᓃᑦ ᐊᖏᔫᖕᒪᑦ.
24ᑕᕐᖕᓂᕋ ᐅᖃᖅᐳᖅ, “ᐊᑕᓂᖅ ᐊᓯᖃᓐᖏᓚᖅ,
ᑖᑦᓱᒪᓂ ᓂᕆᐅᒡᕕᒃᓴᖃᖅᐳᖓ.”
25ᐊᑕᓂᖅ ᐱᐅᔪᒥᒃ ᐱᓂᐊᕐᕕᖃᖅᐳᖅ ᑖᑦᓱᒥᖓ ᐅᑕᖅᑭᔪᓄᑦ,
ᑕᕐᖕᓂᕐᖕᒥᒍᑦ ᕿᓂᖅᑐᓄᑦ.
26ᐊᑕᓂᐅᑉ ᐱᐅᓕᒃᓯᓂᒃᓴᖓ ᐅᑕᖅᑭᐊᕆᓗᒍ ᐱᐅᓂᖅᓴᐅᕗᖅ ᓂᐰᑦᑑᓗᓂ.
27ᐃᓄᒃ ᐃᓅᓱᒃᑑᓂᕐᖕᒥᓂᑦ ᐱᔭᕐᖕᓂᖏᑦᑐᒥᒃ ᖃᐅᔨᕙᒌᕈᓂ ᐱᐅᓂᖅᓴᐅᕗᖅ.
28ᓂᐰᑦᑑᓗᑕ ᐃᓄᑑᓗᑕ ᐃᒃᓯᕙᒃᔪᒃᓴᐅᕗᒍᑦ ᐊᑕᓂᐅᑉ ᑍᒤᑎᑉᐸᒍ.
29ᐅᑯᓗᑕ ᓇᖕᒥᓂᖅ ᑐᓂᔪᒃᓴᐅᕗᒍᑦ,
ᓂᕆᐅᒋᔭᒃᓴᖃᖁᓪᓗᑕ.
30ᐋᓐᓂᖅᑎᒋᔧᑦ ᒪᓂᑐᐃᓐᓇᕈᒃ ᓈᒻᒪᒋᑐᐃᓐᓇᖅᓗᒍᓗ.
31ᐊᑕᓂᖅ ᓇᕐᕈᒋᔭᖃᓐᖏᓚᖅ ᐃᓱᖃᖏᑦᑐᒧᑦ.
32ᕿᒃᓵᒃᑎᓚᐅᕋᓗᐊᖅᓗᓂᑎᒍᑦ, ᐃᓚᑦᓱᒍᓱᒍᒫᖅᐳᖅ
ᓇᒡᓕᒍᓱᖕᓂᖓ ᐃᓱᖃᖏᑦᑑᖕᒪᑦ.
33ᐱᔪᒪᔭᓂ ᒪᓕᒡᓗᒍ ᐋᓐᓂᐊᑎᑦᓯᑐᐃᓐᓇᕈᒪᓐᖏᓚᖅ ᕿᒃᓵᒃᑎᑦᓯᑐᐃᓐᓇᕈᒪᓇᓂᓗ.
34ᑎᒍᔭᐅᓯᒪᔪᑎᑑᓕᖅᑎᓪᓗᒍ ᐊᓂᕐᖕᓂᕗᑦ ᐊᑕᓂᐅᑉ ᖃᐅᔨᒪᕔᑦ.
35ᖃᐅᔨᒪᖕᒪᑦ ᐱᔪᓐᓇᕐᖕᓂᖅᑖᖅᑎᑕᐅᓯᒪᓂᕗᑦ
ᒪᓕᒡᓗᒍ ᐱᓇᓱᐊᕈᓐᓇᖅᑎᑕᐅᖏᑦᑕᕌᖓᑦᑕ ᖁᑦᓯᖕᓂᖅᐹᖑᔪᒧᑦ.
36ᖃᐅᔨᒪᕗᕐᓗ ᓇᓛᒎᖅᑐᒥᒃ ᐃᖅᑲᖅᑐᖅᑕᐅᖏᑦᑕᕌᖓᑦᑕ, ᐊᑕᓂᐅᑉ ᐊᖏᖅᓯᒪᖏᑕᖓᓂᒃ.
37ᐅᖃᐅᓯᕆᔭᑦᑎᓐᓂᒃ ᐊᑑᑎᔪᓐᓇᕋᔭᓐᖏᓚᒍᑦ ᐊᑕᓂᐅᑉ ᑍᒤᑎᖏᑉᐸᒍ.
38ᖁᑦᓯᖕᓂᖅᐹᖑᔫᑉ ᐱᖁᔨᓂᖓᓄᑦ ᐱᐅᔪᑦ ᓈᒻᒪᖏᑦᑐᓪᓗ ᐊᑑᑎᕙᒃᑭᕗᑦ.
39ᐊᑲᐅᒃᓴᖏᓪᓗᑕ ᐅᖃᖅᐸᒃᑐᒃᓴᐅᕕᑖ ᐊᔪᖅᑐᓕᓂᑦᑎᓐᓄᑦ ᓱᒋᐊᖅᑕᐅᔭᕌᖓᑦᑕ?
40ᐱᐅᓯᕆᔭᕗᑦ ᕿᒥᕐᕈᓗᒋᑦ ᖃᐅᔨᓴᓚᐅᖅᓚᕗᑦ, ᐊᑕᓂᕐᖕᒧᓪᓗ ᐅᑎᖅᓗᑕ.
41ᐆᒻᒪᑎᕗᑦ ᐅᒃᑯᐃᑦᓯᐊᖅᓗᒋᑦ ᒎᑎᒧᑦ ᐅᖃᖅᓗᑕᓗ,
42“ᐊᔪᖅᑐᓕᓚᐅᖅᐳᒍᑦ ᐃᓕᖕᓄᑦ ᐊᑕᓃᖅ,
ᐊᑭᕋᖅᑐᖅᓯᒪᒐᑦᑎᒋᓪᓗ ᐃᓱᒪᒋᔪᓐᓁᕐᕕᒋᓯᒪᓐᖏᓚᑦᑎᒍᑦ.
43ᓂᓐᖓᕕᒡᔪᐊᕐᖕᓂᕐᖕᒧᑦ ᑎᑭᑕᐅᒐᕕᑦ ᐅᕙᑦᑎᓐᓂᒃ ᒪᓕᒡᓗᑎᑦ
ᓂᑲᒋᓇᑕ ᑐᖁᕋᖅᑕᐅᑎᓚᐅᖅᐸᑦᑎᒍᑦ.
44ᓂᓐᖓᓗᐊᕐᖕᓂᕐᖕᓄᑦ ᓄᕗᔭᒧᑦ ᐅᓕᒃᑕᐅᓯᒪᔫᔮᓕᓚᐅᖅᐳᒍᑦ
ᓄᕗᔭᐅᓪᓗ ᐃᑦᔪᓗᐊᕐᖕᓂᖓᓄᑦ ᑐᒃᓯᐊᖕᓂᕗᑦ ᑐᓴᕈᓐᓁᓪᓕᓚᐅᖅᐸᑎᑦ.
45ᓯᓚᕐᔪᐊᕐᖕᒥᐅᓄᑦ ᐃᒋᑦᓯᕕᒃᓴᕆᔭᐅᔪᑎᑐᑦ ᑍᒤᑦᑑᑎᓚᐅᖅᐸᑦᑎᒍᑦ ᐃᓄᐃᑦ ᐊᑯᕐᖓᓐᓂ.
46ᐊᑭᕋᓕᒫᕗᑦ ᖃᓂᑎᒃ ᒪᑐᐃᖅᐹᑦ ᐊᑭᕋᖅᑐᖅᓗᑕ.
47ᑲᑉᐱᐊᓇᖅᑐᑎᒍᑦ ᐊᓯᕈᖅᑕᐅᓇᖅᑐᑎᒍᓪᓗ ᐊᑑᑎᓚᐅᖅᐳᒍᑦ,
ᓯᕘᕋᓇᖅᑐᒥᒃ ᐊᑦᑕᕐᖕᓇᖅᑐᓂᓗ ᐃᓅᕕᖃᓚᐅᖅᐳᒍᑦ.
48ᐃᔩᒃᑲᒃ ᕿᐊᓂᕐᖕᒧᑦ ᖁᕝᕕᓂᒃ ᑰᑐᐃᓐᓇᓕᖅᐴᒃ
ᐃᓄᖁᑎᒪ ᐊᓯᕈᖅᑕᐅᓂᖏᑦ ᐱᓪᓗᒋᑦ.
49ᐃᔩᒃᑲᒃ ᑯᕕᔪᓐᓃᕈᓐᓁᓪᓕᕘᒃ.
50ᐊᑕᓂᕐᖕᒧᑦ ᑕᑯᔭᐅᓚᐅᖏᓐᓂᓐᓂ ᕿᓚᖕᒥᑦ.
51ᐃᔨᒪ ᕿᒃᓵᒃᑎᑉᐹᖓ
ᐊᕐᖕᓇᖁᑎᕗᑦ ᐃᒡᓗᒐᓴᒡᔪᐊᓂ ᑕᑯᔭᒃᑲ ᐱᓪᓗᒋᑦ.
52ᑎᖕᒥᐊᑎᑐᑦ ᐱᔭᐅᓇᓱᒃᐳᖓ ᐊᑭᕋᓄᑦ ᐱᑦᔪᑎᒃᓴᖃᕋᑎᒃ.
53ᐃᑎᖅᓴᒧᑦ ᐃᒋᓪᓗᖓ ᑐᖁᓐᓇᓱᐊᖅᐹᖓ ᐅᔭᕋᖕᓄᑦ ᒥᓪᓗᖅᓗᖓ.
54ᐃᒪᕐᖕᒧᑦ ᑎᑭᑕᐅᒐᒪ ᐃᓅᕕᒃᓴᖃᕋᓱᒋᔪᓐᓃᓚᐅᖅᐳᖓ.
55ᐊᑕᓃᖅ, ᐃᓗᖏᖅᑐᖅᓗᖓ ᕿᓄᕕᒋᓚᐅᖅᐸᒋᑦ ᐃᑎᖅᓴᒦᕝᕕᒋᔭᓐᓂᑦ.
56ᐊᔪᐃᓐᓇᖅᓗᖓ ᕿᓄᓕᕋᒪ ᑐᓴᖅᑕᐅᔪᒪᓪᓗᖓ ᑐᓴᕈᓐᓇᓚᐅᖅᐳᑎᑦ.
57ᕿᓄᕕᒋᒐᒃᑭᑦ ᖃᒡᓕᓪᓗᑎᑦ ᐅᖃᓚᐅᖅᐳᑎᑦ, ‘ᑲᑉᐱᐊᓱᖏᓪᓗᑎᑦ.’
58ᓴᐳᑎᔭᖅᑐᓚᐅᖅᐸᕐᖕᒪ, ᐊᑕᓃᖅ; ᐱᐅᓕᓪᓗᖓᓗ.
59ᓯᕐᖕᓂᒋᓚᐅᓐᖓ ᖃᐅᔨᒪᒐᕕᑦ ᓱᓕᖏᑦᑐᒥᒃ ᐊᑲᐅᖏᑦᑐᒥᒡᓗ ᐱᓂᐊᕐᕕᐅᓯᒪᓂᓐᓂᒃ.
60ᖃᐅᔨᒪᓪᓗᑎᓪᓗ ᐊᑭᕋᖅᑐᖅᑎᒪ ᐅᓄᕐᖕᓂᖏᓐᓂᒃ,
ᑎᖅᓕᓈᕆᔪᒪᓪᓗᑎᒡᓗ ᐋᖅᑭᒃᓱᐃᓯᒪᕙᖕᓂᖏᓐᓂᒃ.
61ᐊᑕᓃᖅ ᐊᑭᕋᖅᑐᕋᓱᖕᓂᖏᑦ ᑐᓴᖅᓯᒪᒐᕕᒋᑦ,
ᑎᖅᓕᓈᕆᓪᓗᑎᒡᓗ ᐱᓂᖅᓗᐃᓇᓱᐊᖃᑦᑕᖕᓂᖏᑦ.
62ᐅᓪᓗᓕᒫᖅ ᖃᓄᐃᓕᓗᑎᒃ ᓱᒃᑯᐃᒐᔭᕐᖕᒪᖔᕐᖕᒥᒃ ᑐᑭᑖᕋᓱᐊᖃᑦᑕᖅᐳᑦ.
63ᑕᑯᓚᐅᒃᑭᑦ, ᐅᕙᓐᓂᒃ ᒥᑕᐅᑎᖃᖅᐳᑦ ᖃᓄᓕᒫᖅ ᐃᓐᖏᕈᓯᓕᐊᒥᒃᑎᒍᓪᓗ ᐊᒡᓛᑦ.
64ᐊᑕᓃᖅ ᓱᒋᐊᓚᐅᒃᑭᑦ ᐱᓂᐊᕐᖕᓂᖏᑦ ᒪᓕᒡᓗᒋᑦ.
65ᐆᒥᒋᔭᒃᓴᓐᖑᖅᑎᓪᓗᒋᑦ ᖁᕕᐊᓇᖏᑦᑐᒧᐊᖅᑎᓚᐅᒃᑭᑦ.
66ᓂᓐᖓᕕᒃᔪᐊᕐᖕᓂᕐᖕᓄᑦ ᓇᓂᓗᒋᑦ ᓄᖑᑕᐅᑎᓚᐅᒃᑭᑦ.”
Currently Selected:
ᔨᕆᒤᐊᐅᑉ ᐅᒡᒍᐊᕐᖕᓂᖏᑦ 3: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.