ᔮᓱᐊᑉ ᐊᒡᓚᖏᑦ 17
17
ᒫᓇᓯᐅᑉ ᑭᖑᕚᖏᑕ ᐊᕝᕙᖏᑦ ᓯᕿᓂᐅᑉ ᓂᐱᕕᐊᓃᑦᑐᑦ
1ᓄᓇᐅᑉ ᐃᓚᖓ ᔪᐊᕐᑕᓂᐅᑉ ᑰᖓᑕ ᓯᕿᓂᖓᑕ ᓂᐱᕕᐊᓃᑦᑐᖅ ᓇᓚᐅᑦᑖᕈᑎᒃᑯᑦ ᑐᓂᔭᐅᕗᖅ ᐃᓚᒌᓄᑦ ᔫᓯᐱᐅᑉ ᐃᕐᓂᖓᓄᑦ ᐊᖓᔪᕐᓯᕐᒧᑦ ᒫᓇᓯᐅᑉ ᑭᖑᕚᖏᓐᓄᑦ. ᒪᑬᕆ ᒫᓇᓯᐅᑉ ᐊᖓᔪᕐᓯᕐᐹᖁᑎᖓ, ᒋᓕᐊᑎᐅᑉ ᐊᑖᑕᖓ, ᓄᓇᑖᕐᑎᑕᐅᓚᐅᕐᐳᖅ ᔪᐊᕐᑕᓂᐅᑉ ᑰᖓᑕ ᓯᕿᓂᖓᑕ ᓄᐃᕕᐊᓃᑦᑐᒥᒃ ᒋᓕᐊᑎᒥᒃ ᐹᓴᓂᒥᒡᓗ, ᑖᓐᓇ ᐅᓇᑕᕐᓂᕐᒥᒃ ᐱᓯᑎᐅᓚᐅᕐᒪᑦ. 2ᓄᓇᓖᑦ ᔪᐊᕐᑕᓂᐅᑉ ᑰᖓᑕ ᓯᕿᓂᖓᑕ ᓂᐱᕕᐊᓃᑦᑐᖅ ᑐᓂᔭᐅᕗᖅ ᒫᓇᓯᐅᑉ ᐃᓚᖏᓐᓄᑦ ᓄᓇᑖᓚᐅᖏᑦᑐᓄᑦ ᐅᑯᓄᖓ: ᐊᐰᔨᕆ, ᕼᐃᓕᒃ, ᐊᔅᕅᐊᓪ, ᓯᑭᒻ, ᕼᐃᕙᕐ, ᓯᒤᑕᓗ; ᑖᒃᑯᐊ ᐊᖑᑏᑦ ᒫᓇᓯᐅᑉ ᑭᖑᕚᕆᓚᐅᕐᐰᑦ ᔫᓯᐱᐅᑉ ᐃᕐᓂᖓᑕ, ᓯᕗᓕᕐᑎᒋᔭᐅᓪᓗᑎᒡᓗ ᐃᓚᒥᖕᓄᑦ. 3ᔨᓘᕕᕼᐊᑦ ᕼᐃᕙᕐ ᐃᕐᓂᕆᕚ, ᑖᓐᓇ ᒋᓕᐊᑎᐅᑉ ᐃᕐᓂᖓ, ᑖᓐᓇ ᒪᑬᕆᐅᑉ ᐃᕐᓂᖓ, ᑖᓐᓇ ᒫᓇᓯᐅᑉ ᐃᕐᓂᖓ, ᐃᕐᓂᖃᓚᐅᓐᖏᓚᖅ, ᐸᓂᖃᓚᐅᕐᐳᕐᓕ ᐅᑯᓂᖓ ᒪᕼᐊᓚ, ᓄᐊ, ᕼᐅᒡᓚ, ᒥᐅᓪᑲ, ᑏᕐᔭᓗ. 4#ᒨᓯᓯ ᓯᑕᒪᖏᑦ 27:1-7.ᑖᒃᑯᐊ ᐃᓕᓯᕆᒧᐊᕐᐳᑦ ᑐᓂᕐᕈᓯᕐᑎᑦᓯᔨᒧᑦ ᔮᓱᐊᒧᓪᓗ ᓈᓂᐅᑉ ᐃᕐᓂᖓᓄᑦ ᓯᕗᓕᕐᑎᓄᓪᓗ, ᐅᖃᕐᓗᑎᒡᓗ, “ᐊᑕᓂᐅᑉ ᒨᓯᓯ ᐱᖁᓚᐅᕐᐹ ᑐᓂᔭᐅᖁᓪᓗᑕ, ᓄᓇᒥᒃ ᐃᓚᕗᓪᓗ ᓄᓇᑖᕆᓂᐊᕐᑕᑦᑎᓐᓂᒃ.” ᑕᕝᕙ ᐊᑕᓂᐅᑉ ᑎᓕᓯᓂᕆᓚᐅᕐᑕᖓ ᒪᓕᒡᓗᒍ ᓄᓇᒥᒃ ᑐᓂᔭᐅᕗᑦ ᐊᖑᑎᓄᑦ ᐱᖃᓯᐅᑦᔭᐅᓪᓗᑎᒃ ᐊᑖᑕᖓᑦᑕ ᖃᑕᓐᖑᑎᖏᓐᓄᑦ. 5ᑍᒤᒻᒪᑦ ᒫᓇᓯ ᑐᓂᔭᐅᒃᑲᓐᓂᓚᐅᕐᐳᖅ ᓄᓇᓕᖕᓂᒃ ᖁᓕᓂᒃ, ᒋᓕᐊᑎᐅᓪᓗ ᐹᓴᓂᐅᓪᓗ ᔪᐊᕐᑕᓂᐅᑉ ᑰᖓᑕ ᐊᑭᐊᓃᑦᑐᑦ ᐊᓯᖏᓐᓂᒃ. 6ᑖᒃᑯᐊ ᐊᕐᓁᑦ ᑭᖑᕚᖏᑦ ᐊᖑᑎᓄᑦ ᑐᓂᔭᐅᔪᓂᒃ ᓄᓇᒥᒃ ᑭᖑᕐᖑᑦᔨᖃᑕᐅᓚᐅᕐᒪᑕ, ᒋᓕᐊᑎᐅᓪᓕ ᓄᓇᖓ ᑐᓂᔭᐅᕗᖅ ᒫᓇᓯᐅᑉ ᑭᖑᕚᖏᑕ ᐃᓚᖏᓐᓄᑦ.
7ᒫᓇᓯᐅᑉ ᓄᓇᖁᑎᖓ ᑎᑭᐅᒪᕗᖅ ᐋᓱᕆᒥᑦ ᒥᒃ-ᒥᑖᔅᒧᑦ, ᓯᑭᒻᒥᐅᑉ ᓯᕿᓂᖓᑕ ᓄᐃᕕᐊᓃᑦᑐᒥᑦ ᓄᓇᐅᑉ ᑭᒡᓕᖓ ᑲᔪᓯᕗᖅ ᐅᓪᓗᓪᓗᐊᑉ ᓇᓛᓄᑦ ᐃᓐ-ᑕᐳᐊᑉ ᐃᓄᖏᑦ ᐃᓚᓕᐅᑎᓪᓗᒋᑦ. 8ᐃᓐ-ᑕᐳᐊᑉ ᓄᓇᖓᑕ ᖃᓂᒋᔭᖓᓃᑦᑐᑦ ᒫᓇᓯᒧᑦ ᐱᒋᔭᐅᕗᖅ, ᑕᐳᐊᓪᓕ ᓄᓇᖁᑎᖓᑕ ᑭᒡᓕᖓᓃᑦᑐᖅ ᐱᒋᔭᐅᕗᖅ ᐃᕗᕅᑎᐅᑉ ᑭᖑᕚᖏᓐᓄᑦ. 9ᓄᓇᖁᑎᖓ ᑭᒡᓕᖃᕐᐳᖅ ᑕᐅᓄᖓ ᑲᓇᐅᑉ ᑰᖓᓄᑦ, ᐃᒡᓗᒐᓮᑦ ᓯᕿᓂᐅᑉ ᓇᓛᓃᑦᑐᑦ ᐱᒋᔭᐅᕗᑦ ᐃᕗᕅᑎᒧᑦ, ᒫᓇᓯᐅᑉ ᓄᓇᖁᑎᖓᑕ ᐃᓗᐊᓃᒃᑲᓗᐊᕐᑎᓪᓗᒋᑦ, ᒫᓇᓯᐅᑉ ᓄᓇᖁᑎᖓ ᑭᒡᓕᖃᕐᐳᖅ ᑰᖕᒧᑦ ᐅᓐᓄᐊᓪᓗᐊᒧᑦ ᐃᓱᖃᕐᓗᓂ ᒥᑎᑎᕇᓂᐊᑉ ᑕᕆᐅᖓᓄᑦ. 10ᐃᕗᕅᑎᐅᑉ ᓄᓇᑯᑎᖏᑦ ᓯᕿᓂᐅᑉ ᓇᓛᓃᑉᐳᑦ, ᒫᓇᓯᐅᓪᓗ ᓄᓇᖁᑎᖏᑦ ᐅᓐᓄᐊᓪᓗᐊᑉ ᓇᓛᓃᓪᓗᑎᒃ, ᒥᑎᑎᕇᓂᐊᑉ ᑕᕆᐅᖓᓄᑦ ᓄᓇᖁᑎᖓ ᐃᓱᖃᕐᓗᓂ; ᓄᓇᖁᑎᖓ ᐱᒋᐊᒃᑲᓐᓂᕐᓗᓂ ᐋᓱᕆᒥᑦ ᐅᓐᓄᐊᓪᓗᐊᑉ ᓯᕿᓂᐅᑉ ᓂᐱᕕᐊᑕᓗ ᐊᑯᓐᓂᖓᓃᑦᑐᒧᑦ ᐃᓴᑳᕆᒧᑦ. 11ᐃᓴᑳᕆᐅᓪᓗ ᐋᓱᕆᐅᓪᓗ ᓄᓇᖓᑕ ᐃᓗᐊᓂ, ᒫᓇᓯᐅᑉ ᐱᒋᕔᑦ ᐱᑦ-ᓰᓐ ᓄᓇᓕᖁᑎᖏᓪᓗ, ᐃᑉᓖᒻᓗ ᐃᓚᖃᕐᓗᓂ ᓄᓇᓕᖕᓂᒃ ᖃᓂᒋᔭᖓᓃᑦᑐᓂᒃ, ᐅᑯᐊᓗ ᑐᐊᕆ, ᐃᓐ-ᑐᐊᕆ, ᑖᓇᒃᓗ ᓄᓇᓖᓪᓗ ᖃᓂᒋᔮᓃᑦᑐᑦ, ᒥᒌᑐᓗ ᓄᓇᓖᓪᓗ ᖃᓂᒋᔭᖓᓃᑦᑐᑦ. 12#ᐃᓗᐊᕐᓮᔩᑦ 1:27,28.ᒫᓇᓯᐅᓪᓕ ᑭᖑᕚᖏᑦ ᓄᓇᖃᕐᑐᓂᒃ ᐃᒡᓗᒐᓴᓕᖕᓂᒃ ᓯᖏᑦᓯᔪᓐᓇᓚᐅᓐᖏᓚᑦ; ᑍᒤᒻᒪᑦ ᑬᓇᓂᒥᐅᑦ ᓄᓇᕾᓐᓇᓚᐅᕐᐳᑦ ᓄᓇᒥᖕᓂ. 13ᐃᓴᕆᐊᓕᒥᐅᑦ ᓲᖑᓯᕙᓪᓕᐊᒐᓗᐊᕐᑎᓪᓗᒋᑦ ᑬᓇᓂᒥᐅᓂᒃ ᓯᖏᑦᓯᔪᓐᓇᓚᐅᓐᖏᓚᑦ, ᑭᓯᐊᓂᓕ ᐃᖅᑲᓁᔭᕐᑎᒋᔭᐅᓚᐅᕐᐳᑦ ᐱᔪᒪᖏᒃᑲᓗᐊᕐᑎᓪᓗᒋᑦ, ᓄᓇᖏᓐᓂᑦ ᓯᖏᑕᐅᓪᓚᕆᒐᑎᒃ.
ᐃᕗᕅᑎᒃᑯᑦ ᒫᓇᓯᑯᓪᓗ ᑭᖑᕚᖏᑕ ᓯᕿᓂᐅᑉ ᓂᐱᕕᐊᓃᓐᓂᕐᓮᑦ ᓄᓇᑖᒃᑲᓐᓂᕈᒪᓂᖏᑦ
14ᔫᓯᐱᐅᑉ ᑭᖑᕚᖏᑦ ᔮᓱᐊᒧᑦ ᐅᖃᓚᐅᕐᐳᑦ ᐅᖃᕐᓗᑎᒃ, “ᓱᖕᒪᑦ ᓇᓚᐅᑦᑖᕈᑎᒃᑯᑦ ᓄᓇᐅᑉ ᐃᓔᓐᓇᖓᓂᒃ ᑐᓂᓚᐅᕐᐱᑎᒎᑦ? ᐃᓚᖏᓐᓂᒡᓗ ᐱᖃᖃᑕᐅᑎᑐᐃᓐᓇᕐᓗᑕ ᓄᓇᒥᒃ, ᐊᑕᓂᕐᒧᑦ ᐱᑦᓯᐊᕐᕕᐅᓯᒪᓂᑦᑎᓐᓄᑦ ᐃᓄᒋᐊᒃᑐᐊᓘᑎᓪᓗᑕ.”
15ᔮᓱᐊ ᑭᐅᕗᖅ, “ᐃᓄᒋᐊᒃᑐᐊᓗᒐᑦᓯ, ᓄᓇᑖᕋᓱᓕᕆᑦᓯ ᓇᐹᕐᑐᓕᖕᒥ ᓇᐹᕐᑐᐃᑦ ᐲᔭᕐᓗᒋᑦ ᐱᕆᔧᑎᒥᐅᓪᓗ ᕆᐰᒥᐅᓪᓗ—ᐃᓄᒃᐰᑦ—ᓄᓇᖁᑎᖓᓂᒃ ᐊᕐᓵᕐᓗᒋᑦ, ᐃᕗᕅᒻ ᖃᖅᑲᖏᑦ ᒥᑭᓗᐊᕐᐸᑕ ᐃᓕᑦᓯᓐᓄᑦ.”
16ᔫᓯᐱᐅᑉ ᑭᖑᕚᖏᑦ ᑭᐅᕗᑦ, “ᖃᖅᑲᔮᑦ ᒥᑭᓗᐊᕐᐳᑦ ᐅᕙᑦᑎᓐᓄᑦ; ᑬᓇᓂᒥᐅᓪᓕ ᒪᓂᖅᑲᒦᑦᑐᑦ ᓴᕕᕋᔭᖕᓂᒃ ᐊᒃᓴᓗᐊᓕᖕᓂᒃ ᑲᓕᒐᖁᑎᖃᕐᐳᑦ, ᑕᒪᖏᒃ ᐱᑦ-ᓰᓐᒥᐅᑦ ᓄᓇᓖᓪᓗ ᖃᓂᒋᔭᖓᓃᑦᑐᑦ ᓄᓇᓖᓪᓗ ᔨᔭᕆᐅᓪ ᓇᕐᓴᖓᓃᑦᑐᓕᒫᑦ.”
17ᑕᕝᕙ ᔮᓱᐊ ᐅᖃᕐᐳᖅ ᔫᓯᐱᐅᑉ ᑭᖑᕚᖏᓐᓄᑦ, ᐃᕗᕅᒻᑯᓐᓄᑦ ᒫᓇᓯᒃᑯᓐᓄᓪᓗ ᓯᕿᓂᐅᑉ ᓂᐱᕕᐊᓃᓐᓂᕐᓴᓄᑦ, “ᐃᓄᒋᐊᒃᑐᐊᓘᒐᑦᓯ, ᐊᔪᖏᑦᑐᐊᓘᓪᓗᓯᓗ; ᓇᓚᐅᑦᑖᕈᑎᒃᑯᑦ ᐱᑖᕐᑐᒃᓴᐅᕗᓯ ᐊᑕᐅᓯᐅᖏᑦᑐᒥᒃ ᓄᓇᐅᑉ ᐊᕕᒃᑐᕐᓯᒪᓂᖓᓂᒃ. 18ᖃᖅᑲᔮᑦ ᐱᑖᕆᓂᐊᕐᐸᓯ, ᓇᐹᕐᑐᓕᐊᓘᒐᓗᐊᕐᑎᓪᓗᒍ, ᓇᐹᕐᑐᖏᑦ ᓇᑲᑎᕐᓗᒋᑦ ᐲᔭᕐᓂᐊᕐᐸᓯ, ᓄᓇᑖᕆᓗᒍᓗ ᐃᓱᐊᓂᑦ ᐃᓱᐊᓄᑦ; ᑬᓇᓂᒥᐅᑦ ᓯᖏᓐᓂᐊᕐᐸᓯ, ᓴᕕᕋᔭᖕᓂᒃ ᐊᒃᓴᓗᐊᓕᖕᓂᒃ ᑲᓕᒐᖃᕋᓗᐊᕐᑎᓪᓗᒋᑦ, ᐃᓄᖏᓪᓗ ᓲᖑᔫᒐᓗᐊᕐᑎᓪᓗᒋᑦ.”
Currently Selected:
ᔮᓱᐊᑉ ᐊᒡᓚᖏᑦ 17: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
