ᔪᐊᓇᓯᐅᑉ ᐊᒡᓚᖏᑦ 9
9
ᔩᓱᓯᐅᑉ ᑕᐅᑐᓕᖅᑎᑦᓯᓂᖓ ᐃᕐᖕᓂᐊᖑᓂᕐᖕᒥᓂᑦ ᑕᐅᑐᖏᑦᑐᒥᒃ
1ᔩᓱᓯ ᐱᓱᒃᓗᓂ, ᐊᖑᒻᒥᒃ ᑕᑯᕗᖅ ᐃᕐᖕᓂᐊᖑᓂᕐᖕᒥᓂᑦ ᑕᐅᑐᖏᑦᑐᒥᒃ. 2ᐃᓕᓐᓂᐊᖅᑎᖏᑕᓗ ᐊᐱᕆᕚᑦ, “ᐊᔪᕆᖅᑐᐃᔩ, ᓇᓪᓕᐊᑦᑕ ᐊᔪᖅᑐᓕᓂᖓᓄᑦ ᑖᓐᓇ ᑕᐅᑐᖕᓇᓂ ᐃᕐᖕᓂᐊᖑᓯᒪᕚ ᓇᖕᒥᓂᕐᓘᓐᓃᑦ ᐊᔪᖅᑐᓕᓂᕐᖕᒥᓄᑦ? ᐊᖓᔪᖅᑳᖏᑕᓘᓐᓃᑦ ᐊᔪᖅᑐᓕᓂᖏᓐᓄᑦ?”
3ᔩᓱᓯᐅᑉ ᑭᐅᕔᑦ, “ᑖᑦᓱᒪ ᑕᐅᑐᖏᓐᓂᖓ ᐊᔪᖅᑐᓕᓂᕐᖕᒥᓄᑦ, ᐊᖓᔪᖅᑳᖏᒃᑕᓘᓐᓃᑦ ᐊᔪᖅᑐᓕᓂᖏᓐᓄᑦ ᐱᑦᔪᑎᖃᓐᖏᓚᖅ, ᑕᐅᑐᖏᓚᕐᓕ ᒎᑎᐅᑉ ᐊᔪᒐᖃᖏᓐᓂᖓ ᑖᑦᓱᒨᓇ ᓴᖅᑭᖁᓪᓗᒍ. 4ᐅᓪᓘᓂᖓᓂ ᑎᓕᔨᒪ ᐱᓂᐊᕐᖕᓂᖏᑦ ᐱᓂᐊᒐᒃᓴᕆᕙᕗᑦ; ᐅᓐᓄᐊᖑᔪᒫᕐᖕᒪᑦ ᑭᐊᓘᓐᓃᑦ ᐱᓇᓱᐊᕐᕕᒋᔪᓐᓇᖏᑕᖓᓂᒃ. 5#ᒫᑎᐅᓯ 5:14; ᔪᐊᓇᓯ 8:12.ᓯᓚᕐᔪᐊᕐᖕᒦᓐᓂᓐᓂ, ᓯᓚᕐᔪᐊᕐᖕᒥᐅᑦ ᖃᐅᒪᓂᕆᕚᖓ.”
6ᑍᒫᒃ ᐅᖃᕇᕋᒥ, ᓄᓇᒧᑦ ᐅᕆᐊᖅᐳᖅ, ᓄᕙᒃ ᒪᕐᕋᕐᓗ ᑲᑎᓪᓗᒋᒃ ᐊᑯᑉᐹ; ᑕᐅᑐᖏᑦᑑᑉ ᐃᔨᖏᒃ ᑕᒪᑐᒧᖓ ᒥᖑᐊᖅᐹᒃ, 7ᐅᖃᐅᑎᓪᓗᒍ, “ᐃᕐᕈᖅᑐᕆᐊᖅᑐᓕᕆᑦ ᓮᓗᐊᑉ ᑕᓯᖓᓄᑦ.” ᓮᓗᐊ ᑐᑭᖃᖅᐳᖅ “ᑎᓕᔭᖅ.” ᑕᕝᕗᖓᓗ ᐂᕗᖅ ᐃᕐᕈᖅᑐᕐᓗᓂ ᑕᐅᑐᓕᕐᓗᓂᓗ ᐅᑎᖅᐳᖅ.
8ᓄᓇᖅᑲᑎᖏᑦ ᑕᕝᕙ, ᑖᑦᓱᒥᖓ ᑕᑯᖃᑦᑕᖅᓯᒪᔪᑦ ᑮᓇᐅᔭᓂᒃ ᑐᒃᓯᕋᖅᑎᐅᕙᓚᐅᕐᖕᒪᑦ, ᐅᖃᓕᖅᐳᑦ, “ᐅᓇ ᑖᓐᓇᐅᕙ ᐃᒃᓯᕙᓪᓗᓂ ᑐᒃᓯᕋᖅᑎᐅᕙᓚᐅᖅᑐᖅ?”
9ᐃᓚᖏᑦ ᐅᖃᖅᐳᑦ, “ᑖᓐᓇᑦᓮᓐᓇᕐᖑᓇ”; ᐃᓚᖏᑦ ᐅᖃᕆᕗᑦ, “ᑖᓐᓇᐅᖏᑦᑐᕐᖑᓇ ᑍᓐᓇᐅᔮᑐᐃᓐᓇᖅᑐᖅ.”
ᑖᓐᓇᓕ ᐅᖃᖅᐳᖅ, “ᑖᓐᓇᐅᕗᖓ.”
10ᑕᕝᕙ ᐅᖃᐅᑎᕚᑦ, “ᖃᓄᕐᓕ ᒫᓐᓇ ᑕᐅᑐᓕᖅᐲᑦ?”
11ᑖᓐᓇ ᑭᐅᕗᖅ, “ᐊᖑᑎᐅᑉ ᔩᓱᓯᒥᒃ ᐊᑎᓕᐅᑉ ᒪᕐᕋᖅ ᓴᓇᓚᐅᕐᓗᒍ ᐃᔩᒃᑲᒡᓗ ᒥᖑᐊᕐᓗᒋᒃ ᐅᖃᐅᑎᓚᐅᖅᐹᖓ, ‘ᓮᓗᐊᒧᐊᕐᓗᑎᑦ ᐃᕐᕈᖅᑐᕆᐊᖅᑐᓕᕆᑦ’; ᑕᕝᕙ ᐂᓚᐅᖅᐳᖓ ᐃᕐᕈᖅᑐᕇᕋᒪᓗ ᑕᐅᑐᓕᓚᐅᖅᐳᖓ.”
12ᑖᒃᑯᐊ ᐅᖃᐅᑎᕚᑦ, “ᑍᓐᓈ ᓇᓃᑉᐸ?”
ᑖᓐᓇ ᐅᖃᖅᐳᖅ, “ᖃᐅᔨᒪᓐᖏᓚᕋ.”
ᐹᕆᓯᑦ ᖃᐅᔨᓇᓱᐊᕐᖕᓂᖓᑦ ᐋᖅᑭᒃᑕᐅᔪᒥᒃ
13ᑕᕝᕙ ᐊᐱᖅᓱᓚᐅᖅᑐᑦ ᐹᕆᓯᓄᐊᕈᑎᕚᑦ ᑖᓐᓇ ᑕᐅᑐᓚᐅᖏᑦᑐᖅ. 14ᓴᐸᑎᐅᑎᓪᓗᒍ ᔩᓱᓯᐅᑉ ᒪᕐᕋᖅ ᓴᓇᓚᐅᕐᖕᒪᒍ ᑕᐅᑐᓚᐅᖏᑦᑐᕐᓗ ᑕᐅᑐᓕᖅᑎᓪᓗᓂᐅᒃ. 15ᑕᕝᕙ ᐹᕆᓯᑦᑕᐅᖅ ᑖᓐᓇ ᐊᐱᖅᓱᓕᕆᕚᑦ ᖃᓄᖅ ᑕᐅᑐᓕᓚᐅᕐᖕᒪᖔᑦ. ᑖᑦᓱᒪ ᐅᖃᐅᑎᕔᑦ, “ᒪᕐᕋᖅ ᑖᑦᓱᒪ ᐃᔨᓐᓄᑦ ᒥᖑᐊᕈᑎᒋᓚᐅᖅᐹ ᐃᒥᕐᖕᒧᑦ ᐃᕐᕈᖅᑐᕋᒪ, ᑕᐅᑐᓕᓚᐅᖅᐳᖓ.”
16ᑕᕝᕙ ᐹᕆᓯᑦ ᐃᓚᖏᑦ ᐅᖃᓕᖅᐳᑦ, “ᑖᓐᓇ ᐊᖑᑦ ᑍᒤᓕᐅᖅᑐᖅ ᒎᑎᒥᑦ ᐱᓐᖏᓚᖅ, ᓴᐸᑎᒥ ᐱᖁᔧᑦ ᒪᓕᖏᒻᒪᒋᑦ.”
ᐃᓚᖏᓪᓕ ᐅᖃᖅᐳᑦ, “ᖃᓄᕐᓕ ᐃᓄᒃ ᐊᔪᖅᑐᓕᔪᖅ ᑍᒫᒃ ᓇᓗᓁᒃᑯᑕᕐᖕᒥᒃ ᓴᖅᑭᑎᑦᓯᔪᓐᓇᖅᐹ?” ᑕᕝᕙᓃᑦᑐᓪᓗ ᐃᓱᒪᖃᑎᒌᒍᓐᓃᖅᐳᖅ ᐊᕕᒃᓯᒪᓕᕐᓗᑎᒃ.
17ᑕᕝᕙ ᐹᕆᓯᑦ ᑖᓐᓇ ᑕᐅᑐᓚᐅᖏᑦᑐᖅ ᐊᐱᕆᒃᑲᓐᓂᓕᖅᐹᑦ, “ᖃᓄᕐᓕ ᑕᓐᓇ ᐅᖃᐅᓯᕆᔪᓐᓇᖅᐱᐅᒃ ᐃᓕᖕᓂᒃ ᑕᐅᑐᓕᖅᑎᑦᓯᓚᐅᖅᑐᖅ?”
ᑖᑦᓱᒪ ᑭᐅᕔᑦ, “ᑖᓐᓇ ᓇᓚᐅᑦᑍᔫᕗᖅ.”
18ᔫᑎᓪᓕ ᐅᒃᐱᕆᓐᖏᓛᑦ ᑕᐅᑐᓚᐅᖏᓐᓂᖓ ᒫᓐᓇᓗ ᑕᐅᑐᓕᕐᖕᓂᖓ, ᑖᑦᓱᒪ ᑕᐅᑐᓕᖅᑑᑉ ᐊᖓᔪᖅᑳᖏᓐᓂᒃ ᕾᖁᔨᖅᑳᕋᑎᒃ. 19ᕾᖕᒪᑎᒡᓗ ᔫᑎᑦ ᐊᐱᕆᕗᑦ, “ᐅᓈ ᐃᕐᖕᓂᕆᕕᓯᒃᑯᒃ? ᑕᐅᑐᖕᓇᓂ ᐃᕐᖕᓂᐊᖑᓯᒪᓂᕋᖅᑕᓯᒃ; ᖃᓄᕐᓕᐅᓇ ᒫᓐᓇ ᑕᐅᑐᓕᖅᐸ?”
20ᑕᐅᑐᓕᖅᑑᑉ ᐊᖓᔪᖅᑳᖏᒃ ᑭᐅᕘᒃ, “ᖃᐅᔨᒪᕗᒍᒃ ᑖᓐᓇ ᐃᕐᖕᓂᕆᒐᑦᑎᒃᑯᒃ, ᖃᐅᔨᒪᓪᓗᓄᒡᓗ ᑕᐅᑐᖕᓇᓂ ᐃᕐᖕᓂᐊᖑᓯᒪᓂᖓᓂᒃ; 21ᖃᐅᔨᒪᓐᖏᓚᒍᒃᓕ ᖃᓄᖅ ᒫᓐᓇ ᑕᐅᑐᓕᕐᖕᒪᖔᑦ, ᖃᐅᔨᒪᓐᖏᓐᓂᕗᒍᒡᓗ ᑭᓇᒧᑦ ᑕᐅᑐᓕᖅᑎᑕᐅᖕᒪᖔᑦ. ᐊᐱᕆᓚᐅᖅᓯᐅᒃ; ᓱᕈᓯᐅᔪᓐᓃᕋᒥ ᐃᒻᒥᓂᒃ ᑭᐅᔪᓐᓇᖅᑐᖅ.” 22ᐊᖓᔪᖅᑳᖏᒡᓕ ᑍᒫᒃ ᐅᖃᖅᐴᒃ ᔫᑎᑦ ᓯᕘᕋᒋᒐᒥᒋᑦ, ᔫᑎᑦ ᐊᖏᖃᑎᒌᒃᓯᒪᓕᕐᖕᒪᑕ ᓇᓪᓕᐊᑦ ᙭ᔅᑑᓯᐅᓂᕅᒃᐸᑦ ᑖᑦᓱᒥᖓ, ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓐᓄᑦ ᐃᑎᕈᓐᓁᓪᓕᑎᑦᓯᔪᓐᓇᕐᖕᓂᖏᓐᓂᒃ. 23ᑍᒤᒻᒪᑦ ᐊᖓᔪᖅᑳᖏᒃ ᐅᖃᖅᐴᒃ, “ᓱᕈᓯᐅᔪᓐᓃᕐᖕᒪᑦ, ᐊᐱᖅᓱᓕᖅᓯᐅᒃ.”
24ᑕᕝᕙ ᑭᖑᓪᓕᕐᖕᒥ ᑕᐅᑐᓚᐅᖏᑦᑐᖅ ᕾᖁᓕᕆᕚᑦ, ᐅᖃᐅᑎᓪᓗᒍᓗ, “ᒎᑎ ᓂᖅᑐᓚᐅᕈᒃ; ᖃᐅᔨᒪᕗᒍᑦ ᐊᖑᑦ ᑖᓐᓇ ᐊᔪᖅᑐᓕᔫᖕᒪᑦ.”
25ᑖᑦᓱᒪ ᑭᐅᕔᑦ, “ᐊᔪᖅᑐᓕᔫᖕᒪᖔᑦ ᖃᐅᔨᒪᓐᖏᓚᕋ; ᐊᑕᐅᓯᕐᖕᒥᒡᓕ ᖃᐅᔨᒪᒐᓗᐊᖅᐳᖓ, ᑕᐅᑐᓚᐅᖏᓐᓇᒪ, ᒫᓐᓇᓗ ᑕᐅᑐᓕᕋᒪ.”
26ᑖᒃᑯᐊ ᐅᖃᐅᑎᕚᑦ, “ᖃᓄᖅ ᐱᓇᓱᐊᕐᕕᒋᓚᐅᖅᐹᑎᑦ? ᖃᓄᕐᓗ ᑕᐅᑐᓕᖅᑎᑉᐹᑎᑦ?”
27ᑖᑦᓱᒪ ᑭᐅᕔᑦ, “ᐅᖃᐅᑎᔭᕇᖅᑲᐅᕙᑦᓯ, ᓈᓚᒍᒪᖅᑲᐅᓐᖏᓚᓯᓕ, ᓱᖕᒪᑦ ᑐᓴᒃᑲᓐᓂᕈᒪᓕᕆᕕᓰ? ᑖᑦᓱᒧᖓ ᐃᓕᓐᓂᐊᖅᑎᐅᔪᒪᓕᕆᕕᓰ?”
28ᑕᕝᕙ ᐅᖃᕐᖕᓂᕐᓗᒡᕕᒋᓪᓗᒍ ᐅᖃᐅᑎᕚᑦ, “ᐃᕝᕕᑦ ᑖᑦᓱᒪ ᐃᓕᓐᓂᐊᖅᑎᒋᕚᑎᑦ, ᐅᕙᒍᓪᓕ ᒨᓯᓯᐅᑉ ᐃᓕᓐᓂᐊᖅᑎᒋᕚᑎᒍᑦ. 29ᖃᐅᔨᒪᕗᒍᑦ ᒎᑎᐅᑉ ᒨᓯᓯ ᐅᖃᖃᑎᒋᖃᑦᑕᓚᐅᕐᖕᒪᒍ, ᑍᓐᓇᓕ ᐊᖑᑦ, ᖃᐅᔨᒪᓐᖏᓚᕗᑦ ᓇᑭᑦ ᐱᓯᒪᖕᒪᖔᑦ.”
30ᑖᑦᓱᒪ ᑭᐅᕔᑦ, “ᑕᒪᓐᓇ ᑲᒪᓂᐊᕐᖕᓇᑦᓯᐊᖅᐳᖅ! ᖃᐅᔨᒪᖏᓐᓇᑦᓯ ᑖᓐᓇ ᓇᑭᑦ ᐱᓯᒪᖕᒪᖔᑦ, ᑖᑦᓱᒪᓗ ᑕᐅᑐᓕᖅᑎᓚᐅᖅᐹᖓ. 31ᖃᐅᔨᒪᕗᒍᓪᓕ ᒎᑎᐅᑉ ᐊᔪᕐᖕᓂᕐᖕᒦᑦᑐᑦ ᑐᓴᖏᒻᒪᒋᑦ; ᒎᑎᒥᒡᓕ ᑲᒪᑦᓯᐊᖅᑐᑦ ᐱᖁᔭᖓᓂᒡᓗ ᐊᑐᑦᓯᐊᖅᑐᑦ, ᒎᑎᐅᑉ ᑐᓴᕐᖕᒪᒋᑦ. 32ᓯᓚᕐᔫᑉ ᐱᒋᐊᕐᖕᓂᖓᓂᑦ ᑐᓴᐅᒪᔪᖃᓐᖏᓚᖅ ᐃᕐᖕᓂᐊᖑᓂᕐᖕᒥᓂᑦ ᑕᐅᑐᖏᑦᑐᒥᒃ ᑕᐅᑐᓕᖅᑎᑦᓯᔪᖃᓚᐅᖅᓯᒪᖕᒪᖔᑦ. 33ᑖᓐᓇᓕ ᒎᑎᒥᑦ ᐱᓯᒪᖏᒃᑯᓂ, ᓱᓇᒥᒡᓘᓐᓃᑦ ᐱᓇᓱᐊᕈᓐᓇᕋᔭᓐᖏᓚᖅ.”
34ᑖᒃᑯᐊ ᑭᐅᕚᑦ, “ᐊᔪᕐᖕᓂᕐᖕᒥ ᐃᕐᖕᓂᐊᖑᓯᒪᓪᓗᑎᑦ ᐱᕈᖅᓴᔭᐅᕕᒋᓪᓗᒍᓗ, ᐅᕙᑦᑎᓐᓂᒃ ᐊᔪᕆᖅᑐᐃᓇᓱᐊᖅᐲ?” ᔫᑎᓪᓗ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓐᓂᑦ ᐊᓂᑎᑉᐹᑦ.
ᐊᓂᕐᖕᓂᒃᑯᑦ ᑕᐅᑐᖏᓐᓂᖅ
35ᔩᓱᓯᓕ ᑐᓴᕋᒥ ᐊᓂᑎᑕᐅᓯᒪᓕᕐᖕᓂᖓᓂᒃ, ᑲᑎᒐᒥᐅᒡᓗ ᐅᖃᐅᑎᕚ, “ᐃᓅᑉ ᐃᕐᖕᓂᖓᓄᑦ ᐅᒃᐱᖅᐲᑦ?”
36ᑖᑦᓱᒪ ᑭᐅᕚ, “ᓇᓪᓕᐊᖑᖕᒪᖔᑦ ᐅᖃᐅᑎᓚᐅᓐᖓ, ᑖᑦᓱᒧᖓ ᐅᒃᐱᓕᖁᓪᓗᖓ.”
37ᔩᓱᓯᐅᑉ ᐅᖃᐅᑎᕚ, “ᑕᑯᓚᐅᖅᐸᑦ, ᑖᓐᓇᐅᕗᕐᓗ ᐅᖃᖃᑎᒋᔧᑦ.”
38ᑖᓐᓇ ᐅᖃᖅᐳᖅ, “ᐊᑕᓃᖅ ᐅᒃᐱᖅᐳᖓ”; ᓵᖓᓄᓪᓗ ᓰᖅᑯᖅᐳᖅ.
39ᔩᓱᓯ ᐅᖃᖅᐳᖅ, “ᐃᖅᑲᖅᑐᐃᔭᖅᑐᕐᓗᖓ ᓯᓚᕐᔪᐊᕐᖕᒧᑦ ᑎᑭᑉᐳᖓ, ᑕᐅᑐᖏᑦᑐᑦ ᑕᐅᑐᓕᖁᓪᓗᒋᑦ, ᑕᐅᑐᒃᑐᓪᓗ ᑕᐅᑐᒍᓐᓃᖁᓪᓗᒋᑦ.”
40ᐹᕆᓯᓪᓕ ᑕᕝᕙᓃᑦᑐᑦ ᐃᓚᖏᑦ, ᑕᒪᑐᒥᖓ ᐅᖃᖅᑎᓪᓗᒍ ᑐᓴᕋᒥᒃ ᐅᖃᐅᑎᕚᑦ, “ᑕᐅᑐᖏᓐᓂᕕᑖ?”
41ᔩᓱᓯᐅᑉ ᐅᖃᐅᑎᕔᑦ, “ᑕᐅᑐᖏᒃᑯᑦᓯ, ᐸᓯᔭᒃᓴᐅᓂᖃᕋᔭᓐᖏᓚᓯ; ᒫᓐᓇᓕ ᑕᐅᑐᖕᓂᕋᕋᑦᓯ, ᐸᓯᔭᒃᓴᐅᕗᓯ ᓱᓕ.”
Currently Selected:
ᔪᐊᓇᓯᐅᑉ ᐊᒡᓚᖏᑦ 9: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.