ᔪᐊᓇᓯᐅᑉ ᐊᒡᓚᖏᑦ 4
4
ᔩᓱᓯᐅᑉ ᐅᖃᖃᑎᖃᕐᖕᓂᖓ ᐊᕐᖕᓇᒥᒃ ᓴᒥᐊᕆᐊᕐᖕᒥᐅᑕᕐᖕᒥᒃ
1ᔩᓱᓯᓕ ᖃᐅᔨᓕᖅᐳᖅ ᐹᕆᓯᑦ ᑐᓴᐅᒪᓕᕐᖕᒪᑕ ᔩᓱᓯᐅᑉ ᐃᓕᓐᓂᐊᖅᑎᑖᖃᑦᑕᓕᕐᖕᓂᖓᓂᒃ ᐹᑉᑎᖅᑦᓯᖃᑦᑕᓂᖓᓂᒃᓗ ᐅᓄᕐᖕᓂᖅᓴᓂᒃ ᔪᐊᓇᓯᒥᑦ. 2ᔩᓱᓯᓕ ᓇᖕᒥᓂᖅ ᐹᑉᑎᑦᓯᓚᐅᖏᑦᑑᒐᓗᐊᖅ, ᐃᓕᓐᓂᐊᖅᑎᖏᓪᓕ ᑭᓯᒥ ᐹᑉᑎᑦᓯᖃᑦᑕᓚᐅᖅᐳᑦ, 3ᑕᕝᕙ ᔩᓱᓯ ᔫᑎᐊᒥᑦ ᐊᐅᓪᓚᖅᐳᖅ ᒐᓕᓕᐊᒧᓪᓗ ᐅᑎᓕᕐᓗᓂ. 4ᐊᖅᑯᑖᓂᓕ ᐊᖅᑯᓵᖅᓯᔭᕆᐊᖃᖅᐳᖅ ᓴᒥᐊᕆᐊᒥᒃ.
5 #
ᒨᓯᓯ ᓯᕗᓪᓖᑦ 33:19; ᔮᓱᐊ 24:32. ᓄᓇᓕᖕᓄᑦ ᓴᒥᐊᕆᐊᒦᑦᑐᒧᑦ ᓮᑲᕆᒥᒃ ᐊᑎᓕᖕᒧᑦ ᑎᑭᑉᐳᖅ, ᐱᕈᖅᓰᕕᖕᒧᑦ ᔧᑰᑉ ᐃᕐᖕᓂᕐᖕᒥᓄᑦ ᔫᓯᐱᒧᑦ ᑐᓂᓚᐅᖅᑕᖓᑕ ᖃᓂᒋᔭᖓᓃᑦᑐᒧᑦ. 6ᔧᑰᑉ ᐃᒥᖅᑕᕐᕕᖓ ᑕᕝᕙᓃᑉᐳᖅ, ᔩᓱᓯ ᐱᓱᖕᓂᕐᖕᒥᓄᑦ ᒥᕐᖑᖅᑐᕋᒥ, ᐃᒥᖅᑕᕐᕕᐅᑉ ᓴᓂᐊᓄᑦ ᐃᖏᑉᐳᖅ. ᐅᓪᓗᖅ ᕿᑎᕋᓕᖅᑎᓪᓗᒍ.
7ᓴᒥᐊᕆᐊᒥᐅᑕᖅ ᐊᕐᖕᓇᖅ ᑕᕝᕗᓐᖓᖅᐳᖅ ᐃᒥᖅᑕᕐᓗᓂ. ᔩᓱᓯᐅᑉ ᐅᖃᐅᑎᕚ, “ᐃᒥᖅᑎᓚᐅᓐᖓ.” 8ᐃᓕᓐᓂᐊᖅᑎᖏᓪᓕ ᓄᓇᓕᖕᓄᑦ ᓂᕿᒃᓴᓂᒃ ᓂᐅᕕᕆᐊᖅᓯᒪᕗᑦ.
9 #
ᐄᓱᕋ 4:1-5; ᓂᕼᐃᒤᐊ 4:1,2. ᐊᕐᖕᓇᐅᑉ ᑭᐅᕚ, “ᔫᑎᐅᒐᕕᑦ, ᓴᒥᐊᕆᐊᕐᖕᒥᐅᑕᐅᒐᒪ ᓱᖕᒪᑦ ᐅᕙᓐᓄᑦ ᐃᒥᖅᑎᑕᐅᔪᒪᕖᑦ?” ᔫᑎᑦ ᓴᒥᐊᕆᐊᕐᖕᒥᐅᓂᒃ ᐃᓅᖃᑎᖃᕈᒪᖏᒻᒪᑕ.#4:9 ᐅᕝᕙᓘᓐᓃᑦ ᑐᑭᖃᕐᖕᒥᔪᖅ ᔫᑎᑦ ᖃᓪᓗᑎᒥᒃ ᐴᒍᑕᕐᖕᒥᒡᓗ ᑖᑦᓱᒥᖓᑦᓮᓐᓇᖅ ᐊᑐᕈᓐᓇᖏᒻᒪᑕ ᓴᒥᐊᕆᐊᕐᖕᒥᐅᑦ ᐊᑐᖅᑕᕕᓂᕆᒃᐸᒍ
10ᔩᓱᓯᐅᑉ ᑭᐅᕚ, “ᖃᐅᔨᒪᒍᕕᑦ ᒎᑎᐅᑉ ᑐᓂᕐᕈᑖᓂᒃ, ᑭᓇᐅᖕᒪᖔᓪᓗ ᐃᓕᖕᓄᑦ ᐃᒥᖅᑎᑕᐅᔪᒪᔪᖅ, ᑐᓂᓯᕕᐅᔪᒪᒐᔭᖅᐳᑎᑦ ᑖᑦᓱᒧᖓ, ᑖᑦᓱᒪᓗ ᑐᓂᓯᕕᒋᒐᔭᖅᐹᑎᑦ ᐃᒥᕐᖕᒥᒃ ᐃᓅᓯᖃᕐᖕᓇᖅᑐᒥᒃ.”
11ᐊᕐᖕᓇᐅᑉ ᐅᖃᐅᑎᕚ, “ᖃᓪᓗᑎᖃᓐᖏᓚᑎᓪᓘᓐᓃᑦ, ᐅᓇ ᐃᒥᖅᑕᕐᕕᒃ ᐅᓄᖔᓘᖓᖕᒪᑦ; ᓇᑭᓪᓕ ᐃᒥᕐᖕᒥᒃ ᐃᓅᓯᖃᕐᖕᓇᖅᑐᒥᒃ ᐱᒐᔭᕋᕕᑦ? 12ᐊᖏᓂᖅᓴᐅᕖᑦ ᓯᕗᓕᑦᑎᓐᓂᑦ ᔧᑯᒥᑦ? ᔧᑰᑉ ᐅᓇ ᐃᒥᖅᑕᕐᕕᒃ ᑐᓂᓚᐅᕐᖕᒪᒍ ᐅᕙᑦᑎᓐᓄᑦ, ᓇᖕᒥᓂᕐᓗ ᕿᑐᕐᖓᖏᓪᓗ ᐆᒪᔪᖁᑎᖏᓪᓗ ᑕᕝᕙᓐᖓᑦ ᐃᒥᖃᑦᑕᓚᐅᖅᐳᑦ.”
13ᔩᓱᓯᐅᑉ ᐅᖃᐅᑎᕚ, “ᓇᓪᓕᐊᑦ ᑕᕝᕙᓐᖓᑦ ᐃᒥᕐᖕᒥᑦ ᐃᒥᖅᑐᖅ ᐃᒥᕈᓕᕐᖕᓂᐊᕆᕗᖅ, 14ᓇᓪᓕᐊᓪᓕ ᐃᒥᕐᖕᒥᒃ ᑐᓂᔭᓐᓂᒃ ᐃᒥᕐᖕᓂᐊᖅᑐᖅ ᐃᒥᕈᓕᒃᑲᓐᓂᕐᖕᓂᐊᓐᖏᓚᖅ; ᐃᒥᖅ ᑐᓂᓂᐊᖅᑕᕋ ᑖᑦᓱᒧᖓ ᐃᓗᐊᓂᑦ ᑰᓕᕐᖕᓂᐊᖅᐳᖅ ᐃᓅᓯᖃᕐᖕᓇᖅᑐᒥᒃ ᓄᖑᓱᐃᑦᑐᒥᒃ.”
15ᐊᕐᖕᓇᐅᑉ ᐅᖃᐅᑎᕚ, “ᐃᒥᕐᖕᒥᒃ ᑕᒪᑐᒥᖓ ᑐᓂᓯᕕᒋᓐᖓ, ᐃᒥᕈᒃᑲᓐᓂᕐᖕᓂᐊᕈᓐᓃᕋᒪ, ᐃᒥᖅᑕᕐᕕᖕᒧᓪᓗ ᐅᕗᖓ ᐃᒥᖅᑕᕆᐊᖃᖃᑦᑕᕐᖕᓂᐊᕈᓐᓃᕋᒪ.”
16ᔩᓱᓯᐅᑉ ᐅᖃᐅᑎᕚ, “ᐊᖏᕐᕋᓕᕆᑦ ᐅᐃᑦ ᕾᖁᔭᖅᑐᕐᓗᒍ, ᐅᕗᖓ ᐅᑎᕐᖕᓂᐊᕐᖕᒥᒐᕕᑦ.”
17ᐊᕐᖕᓇᐅᑉ ᑭᐅᕚ, “ᐅᐃᖃᓐᖏᓚᖓ.”
ᔩᓱᓯᐅᑉ ᑭᐅᕚ, “ᓱᓕᕗᑎᑦ ᐅᖃᕋᕕᑦ, ‘ᐅᐃᖃᓐᖏᓚᖓ’; 18ᐅᐃᓂᖃᑦᑕᖅᓯᒪᒐᕕᑦ ᑕᓪᓕᒤᖅᑐᕐᓗᑎᑦ, ᒫᓐᓇᓗ ᐊᖑᑦ ᓇᔪᖅᑎᒋᔧᑦ ᐅᐃᒋᓪᓚᕆᖏᓐᓇᕕᐅᒃ; ᓱᓕᓪᓗᑎᑦ ᑕᒪᑐᒥᖓ ᐅᖃᖅᐳᑎᑦ.”
19ᐊᕐᖕᓇᐅᑉ ᐅᖃᐅᑎᕚ, “ᖃᐅᔨᕗᖓ ᓇᓚᐅᑦᑍᔫᒐᕕᑦ. 20ᓯᕗᓕᕗᑦ ᐅᕙᓂ ᖃᖅᑲᒥ ᒎᑎᒧᑦ ᑐᒃᓯᐊᖃᑦᑕᓚᐅᖅᐳᑦ; ᐃᓕᑦᓯᓕ ᔫᑎᐅᔪᓯ ᐅᖃᖅᐳᓯ ᔨᕉᓴᓕᒻᒥ ᑭᓯᐊᓂ ᒎᑎᒧᑦ ᐃᓄᐃᑦ ᑐᒃᓯᐊᕆᐊᖃᕐᖕᓂᕋᕐᓗᒋᑦ.”
21ᔩᓱᓯᐅᑉ ᐅᖃᐅᑎᕚ, “ᐊᕐᖕᓈᖅ ᐅᒃᐱᕆᓐᖓ, ᓇᓪᓕᐅᑎᔪᒫᖅᐳᖅ ᐃᓄᐃᑦ ᑕᕝᕙᓂ ᖃᖅᑲᒥ ᔨᕉᓴᓕᒻᒥᓘᓐᓃᑦ ᐊᑖᑕᒧᑦ ᑐᒃᓯᐊᖃᑦᑕᕈᓐᓃᕐᕕᒃᓴᖓᑦ. 22ᑐᒃᓯᐊᕐᕕᒋᔭᓯ ᖃᐅᔨᒪᖏᓐᓇᓯᐅᒃ; ᐅᕙᒍᓪᓕ ᖃᐅᔨᒪᕗᒍᑦ ᑐᒃᓯᐊᕐᕕᒋᔭᑦᑎᓐᓂᒃ, ᔫᑎᓂᑦ ᐱᐅᓕᔭᐅᓂᖅ ᐱᖕᒪᑦ. 23ᓇᓪᓕᐅᑎᔪᒫᖅᐳᕐᓕ, ᒫᓐᓇᓗ ᓇᓪᓕᐅᑎᓯᒪᓕᖅᐳᖅ, ᐊᑖᑕᒧᑦ ᑐᒃᓯᐊᖅᑐᑦ ᓱᓕᑦᓯᐊᖅᑐᒥᒃ ᑐᒃᓯᐊᖃᑦᑕᓕᕐᕕᒃᓴᓐᖓᑦ, ᐊᓂᕐᖕᓂᒃᑰᕐᓗᑎᒃ ᓱᓕᑦᓯᐊᖅᑐᒥᒃ, ᐊᑖᑕ ᑍᒪᓐᓇ ᑐᒃᓯᐊᖃᑦᑕᕈᓐᓇᖅᑐᓂᒃ ᕿᓂᕐᒪᑦ. 24ᒎᑎ ᐊᓂᕐᖕᓂᐅᖕᒪᑦ, ᑖᑦᓱᒧᖓ ᑐᒃᓯᐊᖅᑐᑦ ᐊᓂᕐᖕᓂᒃᑰᕐᓗᑎᒃ ᓱᓕᑦᓯᐊᖅᑐᒥᒃ ᑐᒃᓯᐊᖃᑦᑕᖅᑐᒃᓴᐅᖕᒪᑕ.”
25ᑕᕝᕙ ᐊᕐᖕᓇᐅᑉ ᐅᖃᐅᑎᕚ, “ᖃᐅᔨᒪᕗᖓ ᒥᓮᐊ, ᙭ᔅᑑᓯᒥᒃ ᑍᔭᐅᔪᖅ, ᑎᑭᑦᓱᒫᕐᖕᒪᑦ; ᑎᑭᒃᑯᓂᓗ, ᑖᑦᓱᒪ ᑐᑭᓯᑎᑦᓱᒫᖅᐹᑎᒍᑦ ᓱᓇᓕᒫᓂᒃ.”
26ᔩᓱᓯᐅᑉ ᑭᐅᕚ, “ᑖᓐᓇᐅᕗᖓ ᐅᖃᖃᑎᒋᔧᑦ.”
27ᑍᒫᒃ ᓱᓕ ᐅᖃᖅᑎᓪᓗᒍ ᐃᓕᓐᓂᐊᖅᑎᖏᑕ ᑎᑭᑉᐹᑦ. ᑲᒪᒻᒪᕆᒃᐳᓪᓗ ᔩᓱᓯᐅᑉ ᐊᕐᖕᓇᒥᒃ ᐅᖃᖃᑎᖃᕐᖕᓂᖓᓂᒃ, ᓇᓪᓕᐊᓐᓂᒡᓘᓐᓃᑦ ᐊᐱᕆᔪᖃᓐᖏᓚᖅ ᐊᕐᖕᓇᒧᑦ “ᓱᓇᒥᒃ ᐱᔪᒪᕖᑦ?” ᐅᕝᕙᓗ, ᔩᓱᓯᒧᑦ ᐊᐱᕆᔪᖃᓐᖏᓚᖅ, “ᓱᖕᒪᓄᓇ ᐊᕐᖕᓇᖅ ᐅᖃᖃᑎᒋᕕᐅᒃ?”
28ᑕᕝᕙ ᐊᕐᖕᓇᐅᑉ ᐃᒥᖅᑕᐅᑎᓂ ᕿᒪᒃᓗᓂᐅᒃ, ᓄᓇᓕᖕᓄᑦ ᐅᑎᖅᐳᖅ, ᐃᓄᐃᑦ ᑕᕝᕙᓃᑦᑐᑦ ᐅᖃᐅᑎᕔᑦ, 29“ᕾᓗᓯ ᐊᖑᑦ ᑕᑯᔭᖅᑐᖅᓯᐅᒃ ᐱᓂᐊᓚᐅᖅᓯᒪᔭᓕᒫᓐᓂᒃ ᐅᖃᐅᑦᔨᔨᒋᔭᕋ. ᙭ᔅᑑᓯᐅᖏᒻᒪᖔᑦ.” 30ᑕᕝᕙ ᐃᓄᐃᑦ ᓄᓇᓕᖕᓂᑦ ᐱᓪᓗᑎᒃ ᔩᓱᓯᐅᑉ ᓇᔪᖅᑕᖓᓄᐊᖅᐳᑦ.
31ᑎᑭᓚᐅᖅᑎᓐᓇᒋᓪᓕ ᔩᓱᓯ ᐃᓕᓐᓂᐊᖅᑎᖏᑕ ᐅᖃᐅᑎᕚᑦ, “ᐊᔪᕆᖅᑐᐃᔩ, ᓂᕆᑬᓐᓇᕆᑦ.”
32ᔩᓱᓯᐅᓪᓕ ᑭᐅᕔᑦ, “ᓂᕆᔭᒃᓴᖃᖅᐳᖓ ᖃᐅᔨᒪᓐᖏᑕᑦᓯᓐᓂᒃ.”
33ᑕᕝᕙ ᐃᓕᓐᓂᐊᖅᑎᖏᑦ ᐃᒻᒥᖕᓄᑦ ᐅᖃᖃᑦᑕᐅᑎᓕᖅᐳᑦ, “ᐅᓈ ᓂᕆᓂᐊᖅᑕᖓᓂᒃ ᑐᓂᓯᕕᐅᔪᕕᓃᖅ?”
34ᔩᓱᓯᐅᑉ ᐅᖃᐅᑎᕔᑦ, “ᓂᕆᔭᒃᓴᒃᑲ ᑕᕝᕙ ᑎᓕᔨᒪ ᐱᔪᒪᔭᖓᓂᒃ ᓈᓚᒡᓗᖓ, ᐱᓇᓱᐊᖅᑕᐅᖁᓯᒪᔭᖓᓗ ᐱᔭᕇᕐᓗᒍ. 35ᐅᖃᖅᐸᓐᖏᓚᓰ, ‘ᑕᖅᑮᑦ ᓱᓕ ᓯᑕᒪᐅᕗᑦ, ᑖᒃᑯᐊ ᓈᒃᐸᑕ ᑲᑎᖅᓱᐃᕕᖃᓛᕐᖕᓂᐊᖅᐳᖅ?’ ᐅᖃᐅᑎᕙᑦᓯᓕ, ᐱᕈᖅᓰᕕᒃ ᑕᑯᑦᓯᐊᓚᐅᖅᓯᐅᒃ; ᐱᕈᖅᑐᑦ ᐱᕈᕇᖅᐳᑦ ᖃᑯᖅᓯᓪᓗᑎᒃ ᑲᑎᖅᓱᖅᑕᐅᑐᐃᓐᓇᕆᐊᖃᓕᖅᐳᑦ. 36ᓇᑲᑎᕆᔪᕐᓕ ᐊᑭᓕᖅᑕᐅᓂᐊᖅᐳᖅ, ᑲᑎᖅᓱᐃᓪᓗᓂ ᐱᕈᖅᑐᓂᒃ ᐃᓅᓯᕐᖕᒧᑦ ᓄᖑᓱᐃᑦᑐᒧᑦ; ᑕᕝᕙ ᑲᓐᖓᖅᓱᐃᔪᖅ ᑲᑎᖅᓱᐃᔪᕐᓗ ᑍᒫᒃ ᖁᕕᐊᓱᖃᑎᒌᖕᓂᐊᖅᐳᒃ. 37ᐅᖃᐅᓯᐅᕙᒃᑐᖅ ᓱᓕᕗᖅ ᐃᒤᓕᔪᖅ; ‘ᐃᓄᒃ ᑲᓐᖓᖅᓱᐃᕗᖅ, ᐊᓯᐊᓕ ᑲᑎᖅᓱᐃᕗᖅ.’ 38ᑎᓕᓚᐅᖅᐸᑦᓯ ᐱᕈᖅᓰᕕᖕᒥ ᑲᑎᖅᓱᐃᖁᓪᓗᓯ ᐱᕈᕇᖅᑐᓂᒃ ᐱᓇᓱᐊᓚᐅᓐᖏᑕᑦᓯᓐᓂᑦ; ᐊᓯᓯ ᐊᒃᓱᕈᕐᓗᑎᒃ ᐱᓇᓱᐊᓚᐅᖅᐳᑦ, ᐃᓕᑦᓯᓗ ᐱᓇᓱᐊᖅᓯᒪᔭᖏᓐᓂᒃ ᐱᓇᓱᐊᓕᖅᐳᓯ.”
39ᓴᒥᐊᕆᐊᕐᖕᒥᐅᓪᓕ ᐊᒥᓱᑦ ᓄᓇᓖᑦ ᑕᕝᕙᓂ ᔩᓱᓯᒥᒃ ᐅᒃᐱᕈᓱᒃᐳᑦ ᐊᕐᖕᓇᐅᑉ ᐅᖃᓚᐅᓂᖓ ᐱᓪᓗᒍ, “ᐱᓂᐊᓚᐅᖅᓯᒪᔭᓕᒫᓐᓂᒃ ᐅᖃᐅᑦᔨᔨᒋᔭᕋ.” 40ᑍᒤᒻᒪᑦ ᑖᒃᑯᐊ ᓴᒥᐊᕆᐊᕐᖕᒥᐅᑦ ᔩᓱᓯᒧᑦ ᑎᑭᐅᑎᒐᒥᒃ, ᐊᔪᐃᓐᓈᕆᓕᖅᐹᑦ ᓯᓂᒃᑕᕐᕕᐅᔪᒪᓪᓗᑎᒃ; ᔩᓱᓯ ᐅᓪᓘᖕᓂᒃ ᒪᕐᕉᖕᓂᒃ ᑕᕝᕙᓂ ᐅᓪᓕᕗᖅ.
41ᐅᓄᕐᖕᓂᖅᓮᓪᓕ ᐅᒃᐱᓕᖅᐳᑦ ᐅᖃᐅᓯᖏᑦ ᐱᑦᔪᑎᒋᓪᓗᒋᑦ. 42ᐊᕐᖕᓇᒧᑦ ᐅᖃᖅᐳᑦ, “ᒫᓐᓇ ᐅᒃᐱᓕᖅᐳᒍᑦ ᐅᖃᐅᓯᖅᑎᑦ ᐱᑦᔪᑎᒋᑐᐃᓐᓇᕐᖕᓇᒋᑦ, ᐅᕙᒍᓪᓕ ᓇᖕᒥᓂᖅ ᑐᓴᕋᑦᑎᒍ, ᑐᑭᓯᓪᓗᑕᓗ ᐃᓛᒃ ᑖᓐᓇ ᓱᓕᔪᒥᒃ ᐱᐅᓕᔨᐅᖕᒪᑦ ᓯᓚᕐᔪᐊᕐᖕᒥᐅᓄᑦ.”
ᔩᓱᓯᐅᑉ ᐋᖅᑭᒃᓯᓂᖓ ᐊᖓᔪᖅᑳᑉ ᐃᕐᖕᓂᖓᓂᒃ
43ᐅᓪᓘᒃ ᒪᕐᕈᒃ ᐊᓂᒍᕐᖕᒪᑎᒃ ᒐᓕᓕᐊᒧᑦ ᐊᐅᓪᓚᖅᐳᖅ. 44#ᒫᑎᐅᓯ 13:57; ᒫᑯᓯ 6:4; ᓘᑲᓯ 4:24.ᔩᓱᓯ ᓇᖕᒥᓂᖅ ᐅᖃᓚᐅᕐᖕᒪᑦ, “ᓇᓚᐅᑦᑍᔪᖅ ᓄᓇᑐᖃᕐᖕᒥᓂ ᐅᐱᒋᔭᐅᖏᒻᒪᑦ.” 45#ᔪᐊᓇᓯ 2:23.ᒐᓕᓕᐊᒧᓪᓕ ᑎᑭᒻᒪᑦ, ᒐᓕᓕᐊᒥᐅᑦ ᑐᓐᖓᓱᒃᑎᑉᐹᑦ, ᑕᑯᓚᐅᕋᒥᒃ ᔨᕉᓴᓕᒻᒥ ᓇᓪᓕᐅᓐᓂᖅᓯᐅᖅᑎᓪᓗᒋᑦ ᔩᓱᓯ ᐱᓇᓱᐊᖅᑎᓪᓗᒍ, ᑖᒃᑯᐊᑦᑕᐅᖅ ᑕᕝᕙᓃᓚᐅᕋᒥᒃ.
46 #
ᔪᐊᓇᓯ 2:1-11. ᑭᖑᓂᖓᒍᑦ ᔩᓱᓯ ᑬᓇᒧᑦ ᒐᓕᓕᐊᒦᑦᑐᒧᑦ ᑎᑭᒃᑭᕗᖅ, ᐃᒥᕐᖕᒥᒃ ᐅᐂᓂᓐᖑᖅᑎᑦᓯᕕᒋᓚᐅᖅᑕᒥᓄᑦ. ᑲᐲᕐᓂᐊᒥᓗ ᐊᖓᔪᖅᑳᑉ ᐃᓚᖓᑦᑕ ᐃᕐᖕᓂᖓ ᖃᓂᒪᕗᖅ. 47ᑖᓐᓇ ᑐᓴᕋᒥ ᔩᓱᓯ ᔫᑎᐊᒥᓐᖔᕐᓗᓂ ᒐᓕᓕᐊᒧᑦ ᑎᑭᒻᒪᑦ, ᐅᐸᒃᐹ ᐊᔪᐃᓐᓇᕐᓗᓂᓗ ᑲᐲᕐᓂᐊᒧᐊᖁᕚ ᐃᕐᖕᓂᖓᓂᒃ ᐋᖅᑭᒃᓯᖁᓪᓗᒍ, ᑐᖁᑐᐃᓐᓇᕆᐊᖃᕐᓗᓂ ᖃᓂᒪᖕᒪᑦ. 48ᔩᓱᓯᐅᑉ ᐅᖃᐅᑎᕚ, “ᓇᓗᓁᒃᑯᑕᕐᖕᓂᒃ ᑲᒪᓇᖅᑐᓂᒡᓗ ᑕᑯᖏᒃᑯᑦᓯ ᐅᒃᐱᕈᒪᓐᖏᓚᓯ.”
49ᐊᖓᔪᖅᑳᑉ ᐅᖃᐅᑎᕚ, “ᐅᕙᑦᑎᓐᓄᐊᓚᐅᕐᓗᒃ ᕿᑐᕐᖓᕋ ᑐᖁᖏᓐᓂᖓᓂ.”
50ᔩᓱᓯᐅᑉ ᐅᖃᐅᑎᕚ, “ᐊᖏᕐᕋᓕᕆᑦ; ᐃᕐᖕᓃᑦ ᐃᓅᓂᐊᖅᐳᖅ.”
ᐊᖑᑦ ᔩᓱᓯᐅᑉ ᐅᖃᐅᓯᖓᓂᒃ ᐅᒃᐱᕈᓱᒃᑲᒥ ᐊᖏᕐᕋᓯᕗᖅ. 51ᐊᖏᕋᐅᓕᖅᑎᓪᓗᒍ ᐱᔨᖏᑕ ᐹᖅᐹᑦ ᐅᖃᐅᑎᓪᓗᒍ, “ᐃᕐᖕᓃᑦ ᖃᓄᐃᑦᓱᓐᓃᖅᐳᖅ.”
52ᑕᕝᕙ ᐊᐱᕆᕔᑦ ᖃᑦᓯᓐᖑᖅᑎᓪᓗᒍ ᐃᕐᖕᓂᖓ ᐱᐅᓯᕙᓪᓕᐊᓯᓚᐅᕐᖕᒪᖔᑦ, ᑖᒃᑯᐊ ᑭᐅᕚᑦ, “ᐃᑉᐸᒃᓴᖅ 1ᒧᐊᖅᑎᓪᓗᒍ ᐆᑎᕐᖕᓇᕈᓐᓃᓚᐅᖅᐳᖅ.” 53ᐊᑖᑕᖓᑕ ᖃᐅᔨᕚ ᑕᕝᕙᓂ ᐃᑲᕐᕋᒥ ᔩᓱᓯᐅᑉ ᐅᖃᐅᑎᓚᐅᕐᖕᒪᒍ, “ᐃᕐᖕᓃᑦ ᐃᓅᓂᐊᖅᐳᖅ”; ᐃᒻᒥᓂᒡᓗ ᐃᒡᓗᒥᐅᖃᑎᓕᒫᖏᓪᓗ ᐅᒃᐱᓕᖅᐳᑦ.
54ᑕᒪᓐᓇ ᑕᕝᕙ ᔩᓱᓯᐅᑉ ᓇᓗᓁᒃᑯᑕᖓᑕ ᐂᑉᐸᖓ ᔫᑎᐊᒥᓐᖔᕐᓗᓂ ᒐᓕᓕᐊᒧᐊᖅᓯᒪᓂᖓᑕ ᑭᖑᓂᖓᓂ.
Currently Selected:
ᔪᐊᓇᓯᐅᑉ ᐊᒡᓚᖏᑦ 4: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.