ᔨᕆᒤᐊᐅᑉ ᐊᒡᓚᖏᑦ 48
48
ᒧᐊᐱᒥᐅᑦ ᐊᓯᕈᕐᑕᐅᓂᖏᑦ
1 #
ᐂᓮᐊᓯ 15:1—16:14; 25:10-12; ᐃᓯᑭᐊᓕ 25:8-11; ᐂᒨᓯ 2:1-3; ᔨᐸᓁᐊ 2:8-11. ᒧᐊᐱᒥᐅᑦ ᐱᓪᓗᒋᑦ.
ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ:
“ᑲᑉᐱᐊᓐᓇᒦᒃ ᓂᐴᒥᐅᑦ, ᐊᓯᕈᕐᑕᐅᓂᐊᕋᑦᓯ!
ᑭᕆᐊᑍᒥᐅᑦ ᐱᔭᐅᔪᒫᕐᐳᑦ,
ᐱᔭᐅᑦᔧᕐᓯᒪᔪᑦ ᑲᓐᖑᓲᑎᒃᓴᖃᕐᓂᐊᕐᐳᑦ ᓱᕋᒃᑎᕐᑕᐅᔪᒫᕐᒪᑕ,
2ᒧᐊᐱᒥᐅᑦ ᓂᕐᑐᕐᓇᕐᓂᖓ ᐱᑕᖃᕈᓐᓃᕐᐳᑦ,
ᕼᐃᓴᐸᓂᒥᐅᓄᑦ ᐊᓯᕈᕈᑎᒃᓴᕐᓯᐅᕐᑕᐅᓂᐊᕐᒪᑕ,
ᐅᖃᕐᓗᑎᒃ, ‘ᐊᑏ ᓄᓁᕈᑎᓇᓱᐊᓚᐅᕐᓚᕗᑦ ᐃᓅᖃᑎᒌᒡᔪᐊᓂᑦ.’
ᒫᑦᒥᓂᒥᐅᑦ ᓄᓇᖓᑦ ᓂᐰᕉᑦᔭᐅᓂᐊᕐᐳᖅ,
ᐅᓇᑕᕐᑐᓄᑦ ᐱᔭᐅᓂᐊᕐᒪᑕ.
3ᕼᐅᕈᓁᒥᒥᑦ ᓂᓪᓕᐊᔪᑦ ᑐᓴᕐᓯᒋᒃ,
‘ᑲᑉᐱᐊᓇᕐᑐᒧᑦ ᑎᑭᑲᓪᓚᒡᕕᐅᖕᒪᑕ ᐊᓯᕈᕐᑕᐅᓇᕐᑐᒧᑦ!’
4ᒧᐊᐱᒥᐅᑦ ᐊᓯᕈᕐᑕᐅᕗᑦ;
ᒥᑭᑦᑐᖁᑎᖏᑦ ᕿᐊᖓᔭᒍᒫᕐᐳᑦ.
5ᓗᕼᐃᑎᓕᐊᕐᐳᑦ ᖁᕝᕕᐅᕐᓗᑎᒃ,
ᕼᐅᕈᓁᑉ ᐊᖅᑯᑎᖓᒍᑦ ᐱᓱᒃᐳᑦ
ᕿᐊᕕᒡᔪᐊᕐᓗᑎᒃ ᓄᓇᖓᑦ ᐊᓯᕈᕐᑕᐅᓯᒪᖕᒪᑦ.
6ᕿᒫᓕᕆᑦᓯ ᐃᓅᔪᒪᒍᑦᓯ!
ᓯᐅᑎᖅᑯᕐᑐᔪᑎᑐᑦ ᐸᖓᓕᓕᕆᑦᓯ ᓱᓇᖃᔪᐃᑦᑐᒥ.
7ᑕᑎᖃᓚᐅᕋᑦᓯ ᐱᔪᓐᓇᕐᓂᑦᓯᓐᓂᒃ ᐊᔪᕐᓴᖏᓐᓂᑦᓯᓐᓂᒡᓗ,
ᑎᒍᔭᐅᓗᓯ ᐊᐅᓪᓚᕈᑦᔭᐅᔪᒫᕆᕗᓯ;
ᒎᑎᒋᔭᓯ ᑭᒨᓯ ᓄᓇᒋᓐᖏᑕᒥᓄᑦ ᐊᐅᓪᓚᕈᑦᔭᐅᔪᒫᕆᕗᖅ,
ᑐᓂᕐᕈᓯᕐᑎᑦᓯᔨᖏᑦ ᐊᖓᔪᖅᑳᖁᑎᖏᓪᓗ ᐱᖃᓯᐅᑦᔭᐅᓗᑎᒃ.
8ᐊᓯᕈᐃᔨ ᑎᑭᑦᓱᒫᕐᒪᑦ ᓄᓇᓕᓕᒫᓄᑦ,
ᓄᓇᓕᖕᓂᒃ ᑎᑭᑕᐅᖏᑦᑐᖃᕐᓂᐊᓐᖏᓚᖅ,
ᓇᕐᓴᖅ ᓇᔪᕐᑕᓕᒫᖓᑦ ᐱᐅᔪᓐᓃᕐᑎᑕᐅᔪᒫᕐᐳᖅ,
ᓇᑎᕐᓈᕐᓗ ᐊᓯᕈᕐᑕᐅᖕᒥᓗᓂ, ᐊᑕᓂᖅ ᑍᒫᒃ ᐅᖃᕐᐳᖅ.
9ᒧᐊᐱᒥᐅᑦ ᑕᕆᐅᓕᕐᓱᕐᑕᐅᓕᕐᓕᑦ,
ᓄᓇᓕᕕᓂᑐᐃᓐᓇᐅᓕᕐᓂᐊᕐᒪᑦ
ᓄᓇᓕᖃᕐᕕᖏᑦ ᓱᓁᕈᑎᓂᐊᕐᒪᑕ ᐃᓄᖃᕈᓐᓃᕐᓗᑎᒃ.”
10ᓇᕐᕈᒋᔭᒃᓴᐅᕗᖅ ᐃᓄᒃ ᐊᑕᓂᕐᒧᑦ ᑐᓂᓯᒪᓗᓂ ᐱᓇᓱᐊᕈᒪᖏᑦᑐᖅ, ᑍᒫᒃᑕᐅᖅ ᓇᕐᕈᒋᔭᒃᓴᐅᒋᕗᖅ ᓴᕕᒡᔪᐊᒥᓂᒃ ᐊᐅᒥᑎᕆᔪᒪᖏᑦᑐᖅ.
ᒧᐊᐱᒥᐅᑦ ᓄᓇᖏᑕ ᐊᓯᕈᕐᑕᐅᓂᖏᑦ
11“ᒧᐊᐱᒥᐅᑦ ᑍᒪᓐᖓᑦ ᐸᒡᕕᓴᒃᑕᐅᓚᐅᕐᓯᒪᓐᖏᓚᑦ ᓄᓇᓕᓐᖑᓚᐅᕐᓯᒪᓐᓂᕋᒥᒃ, ᕔᓂᑎᑐᑦ ᐊᐅᓚᑎᑕᐅᓚᐅᕐᓯᒪᖏᑦᑐᑎᑐᑦ ᑯᕕᐅᕋᕐᑕᐅᓚᐅᕐᓯᒪᖏᑦᑐᑎᑐᓪᓗ, ᑎᒍᔭᐅᓗᓂ ᓄᓇᒋᓐᖏᑕᒥᓄᑦ ᐊᐅᓪᓚᕈᑦᔭᐅᓚᐅᕐᓯᒪᖏᓐᓇᒥ, ᕔᓂᐅᑉ ᑎᐱᖃᑦᓯᐊᕐᓂᖓᑕ ᐊᑦᔨᒋᕔᑦ, ᒪᒪᕐᓂᖓᑕ ᐊᓯᓐᖑᕐᓯᒪᖏᓐᓂᖓᑐᑦ.
12“ᑍᒤᒻᒪᑦ, ᑕᑯᒋᑦ, ᐅᓪᓗᐃᑦ ᓇᓪᓕᐅᑎᔪᒫᕐᐳᑦ, ᐊᑕᓂᖅ ᐅᖃᕐᐳᖅ, ᑎᓕᓯᔪᒫᕋᒪ ᑯᕕᓯᔭᕐᑐᕐᑐᓂᒃ ᐴᖏᑕ ᐊᓯᖏᓐᓄᑦ, ᐃᒤᔧᓂᐊᕐᐳᑦ ᕔᓂᖃᐅᑎᕕᓃᓪᓗ ᐃᒪᖃᕈᓐᓃᕐᓂᐊᕐᐳᑦ ᐴᕕᓂᖏᓪᓗ ᓯᖁᒥᑕᐅᓗᑎᒃ. 13ᒧᐊᐱ ᑲᓐᖑᓲᑎᖃᓕᕈᒫᕐᐳᖅ ᒎᑎᒥᓂᒃ ᑭᒨᓯᒥᒃ, ᓲᕐᓗᑦᑕᐅᖅ ᐃᓴᕆᐊᓕᒥᐅᑦ ᑲᓐᖑᓲᑎᖃᓕᓚᐅᕐᒪᑕ ᒎᑎᓐᖑᐊᒥᒃ ᐱᑎᓕᒥᒃ ᑕᑎᖃᓗᐊᓚᐅᕐᓗᑎᒃ.
14ᖃᓄᖅ ᐅᖃᕈᓐᓇᕐᐱᓰ?
ᐅᓇᑕᕐᑎᐊᓘᓂᕋᕐᓗᓯ ᐅᓇᑕᕆᐊᒃᓴᕐᓗ ᐊᔪᖏᓐᓂᕋᕐᓗᓯ.
15ᒧᐊᐱᒥᐅᑦ ᐊᓯᕈᕐᑕᐅᔪᒫᕐᐳᑦ
ᓄᓇᓕᖁᑎᖏᓪᓗ ᐱᑖᕆᔭᐅᓗᑎᒃ,
ᐊᖑᑎᖁᑎᖏᓪᓗ ᐱᕈᕇᕋᑖᑦ ᑐᖁᕋᕐᑕᐅᔪᒫᕐᐳᑦ,
ᐊᖓᔪᖅᑳᕐᔪᐊᖑᓂᕐᐹᖅ ᐅᖃᕐᐳᖅ,
ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓂᒃ ᐊᑎᖃᕐᑐᖅ.
16ᒧᐊᐱᐅᑉ ᐊᓯᕈᕐᑕᐅᕕᒃᓴᖓ ᖃᒡᓕᕙᓪᓕᐊᓕᕐᐳᖅ,
ᓄᓇᓕᐅᔪᓐᓃᕐᕕᒃᓴᖓᓗ ᑎᑭᓕᕐᐳᖅ.
17ᕿᐊᑦᔪᑎᒋᓯᐅᒃ ᐃᓕᑦᓯ ᖃᓂᒋᔭᖓᓂ ᓄᓇᖃᕐᑐᓯ,
ᖃᐅᔨᒪᔪᓯ ᐱᐅᒋᔭᐅᓂᕐᐹᖑᓂᖓᓂᒃ,
ᐊᐅᓚᑦᓯᓂᖓᑕ ᐊᔭᐅᑉᐱᐊᖁᑎᖓ ᓱᕋᒃᑕᐅᖕᒪᑦ,
ᐊᔭᐅᑉᐱᐊᖅ ᐃᓂᖁᓇᕈᑎᖓ ᓇᐱᔭᐅᕗᖅ.
18ᑎᐴᓂᒥ ᓄᓇᖃᕐᑐᓯ,
ᓂᕐᑐᕐᓇᕐᕕᑦᓯᓐᓂᑦ ᐊᖅᑲᕐᓗᓯ,
ᒪᓂᖅᑲᒥ ᓄᓇᔭᖃᖏᑦᑐᒥ ᐃᒃᓯᕚᓕᕆᑦᓯ,
ᒧᐊᐱᒥᐅᓂᒃ ᐊᓯᕈᐃᔭᕐᑐᕐᑐᓄᑦ ᑎᑭᑕᐅᓕᕐᐳᓯ,
ᐃᒡᓗᒐᓴᒡᔪᐊᖁᑎᓯ ᐱᔭᐅᑦᔧᕐᓯᒪᔪᑦ ᓯᖁᑦᑎᕐᑕᐅᓂᐊᕐᐳᑦ.
19ᐊᕈᐃᕆᒥ ᓄᓇᖃᕐᑐᓯ ᐊᖅᑯᑎᐅᑉ ᓯᓚᑖᓂ ᖃᐅᔨᓴᕆᑦᓯ,
ᐊᖑᑎᑦ ᕿᒫᔪᑦ ᐊᕐᓇᓪᓗ ᐊᓐᓇᒋᐊᕋᓱᒃᑐᑦ,
ᖃᓄᐃᑦᑐᖃᓕᕐᒪᖔᑦ ᐊᐱᕐᓱᕐᓯᒋᒃ.
20ᒧᐊᐱᒥᐅᑦ ᑲᓐᖑᓇᕐᑐᒥᒃ ᐊᑐᕐᐳᑦ
ᓄᓇᖓᑦ ᐊᓯᕈᕐᑕᐅᖕᒪᑦ,
ᓂᐹᕐᓗᓯ ᕿᐊᓕᕆᑦᓯ ᐋᕐᓄᓂᐅᑉ ᖃᓂᒋᔭᖓᓂ
ᒧᐊᐱᒥᐅᑦ ᐊᓯᕈᕐᑕᐅᖕᒪᑦ.
21“ᓇᑎᕐᓈᒥ ᓄᓇᖃᕐᑐᓄᑦ ᕼᐅᓗᓂᒥ, ᔧᕼᐋᓯᒥ, ᒥᕚ-ᑕᒥᓗ, ᐃᖅᑲᕐᑐᕐᑕᐅᕕᒃ ᓇᓪᓕᐅᑎᕗᖅ, 22ᑎᐴᓂᒥᐅᓄᑦ, ᓂᐴᒥᐅᓄᑦ, ᐱᑦ-ᑍᑉᓚᑍᒻᒥᐅᓄᓪᓗ, 23ᑭᕆᐊᑍᒥᐅᓄᑦ, ᐱᑦ-ᒐᒧᓪᒥᐅᓄᑦ, ᐱᑦ-ᒥᐅᓄᓪᓗ, 24ᑭᕆᐅᑎᒥᐅᓄᑦ, ᐳᔾᕋᒥᐅᓄᑦ, ᒧᐊᐱᒥᐅᓄᑦ ᓄᓇᓕᖁᑎᓕᒫᖏᓐᓄᓪᓗ; ᖃᓂᑦᑐᒦᑦᑐᓄᑦ ᐅᖓᓯᒃᑐᒦᑦᑐᓄᓪᓗ. 25ᒧᐊᐱᒥᐅᑦ ᓇᒡᔪᐃᕐᑕᐅᖕᒪᑕ, ᑕᓖᕐᑕᐅᓪᓗᑎᒡᓗ, ᐊᑕᓂᖅ ᐅᖃᕐᐳᖅ.”
ᒧᐊᐱᒥᐅᑦ ᓇᓗᖅᑯᑎᓕᕐᑎᑕᐅᓂᖓᑦ
26“ᐋᖓᔮᓕᕐᑎᑕᐅᓕᑦ, ᐊᑕᓂᕐᒥᑦ ᐱᔪᓐᓇᕐᓂᕐᓴᐅᓇᓱᒋᓕᓚᐅᕐᒪᑕ, ᒧᐊᐱᒥᐅᑦ ᒥᕆᐊᒥᓂᒃ ᓇᓪᓚᖓᕕᖃᓕᕐᓕᑦ, ᒥᑕᐅᑎᒋᔭᒃᓴᐅᓗᑎᒡᓗ. 27ᐃᓴᕆᐊᓕᒥᐅᑦ ᑍᒫᒃᑕᐅᖅ ᒥᑕᐅᑎᒋᔭᐅᑎᓚᐅᓐᖏᓚᑏᑦ? ᑎᒡᓕᒃᑎᓄᓪᓗ ᐱᔭᐅᑎᓪᓗᒋᑦ, ᐃᓕᕿᑕᒫᕐᓗᑎᓪᓗ ᐅᖃᐅᓯᕆᓕᕌᖓᕕᒋᑦ ᐱᕙᓚᐅᓐᖏᓚᑏᑦ?
28“ᒧᐊᐱᒥᐅᑕᐅᔪᓯ ᓄᓇᓖᑦ ᕿᒪᒡᓗᒋᑦ ᕾᕈᓱᖕᓂ ᐃᓂᖃᐅᓕᕆᑦᓯ ᑑᕕᑎᑐᑦ ᐃᓂᒃᓴᕐᓯᐅᓕᕆᑦᓯ, ᕾᕈᓱᐃᑦ ᐹᖏᓐᓂ ᐃᕙᕕᒃᓴᕐᓯᐅᕐᑐᑎᑐᑦ. 29ᒧᐊᐱᒥᐅᑦ ᐱᐅᔪᕆᔪᕐᔪᐊᖑᖕᒪᑕ, ᑐᓴᕐᓯᒪᕙᒃᑲ ᖃᓄᖅ ᐱᐅᔪᕆᓂᖃᕐᓂᖏᓐᓂᒃ, ᐱᔪᓐᓇᕋᓱᒋᓗᐊᕐᓂᖏᓪᓗ, ᐅᓇᖕᒥᓇᖏᓐᓇᓱᒃᑲᐅᓂᖏᓪᓗ, ᐃᒻᒥᖕᓂᒃ ᐃᓄᖏᑦ ᐃᓱᒪᒋᓗᐊᕐᒪᑕ. 30ᖃᐅᔨᒪᕙᒃᑲ ᐊᓯᒥᖕᓂᒃ ᓱᓇᐅᒃᓴᖏᓐᓂᖏᑦ, ᑭᓯᐊᓂᓕ ᐊᑐᕐᓇᕐᓂᖃᓐᖏᓚᑦ ᐊᑕᓂᖅ ᐅᖃᕐᐳᖅ, ᐅᓇᖕᒥᓇᖏᓐᓇᓱᖕᓂᖏᓪᓗ ᐊᑑᑎᖃᓐᖏᓚᑦ, ᐱᓂᐊᕐᓂᖏᑦ ᓱᓕᖏᒻᒪᑕ. 31ᑍᒤᒻᒪᑦ ᒧᐊᐱᒥᐅᑦ ᓂᐹᕈᑎᒋᒃᑭᑦ, ᒧᐊᐱᒥᐅᑦ ᐱᓪᓗᒋᑦ ᐃᓗᖏᕐᑐᕐᓗᖓ ᕿᐊᑦᔪᑎᒋᕙᒃᑲ, ᑭᕆ-ᕼᐃᕆᐅᑉ ᐊᖑᑎᖏᑦ ᕿᒃᓵᒍᑎᒋᕙᒃᑲ. 32ᕿᐊᑦᔪᑎᒋᕙᒋᑦ ᔧᔨᕆᐅᒥᐅᓂᑦ ᕿᐊᑦᔪᑎᒋᓂᕐᓴᕆᓪᓗᑎᑦ, ᕔᓂᒃᓴᐅᔪᑎᑦ ᓯᑉᒪᐅᑉ ᐊᕙᓚᖓᔪᖏᑦ ᑕᑭᔫᖕᒪᑕ ᑕᕆᐅᒧᑦ ᑎᑭᐅᒪᓪᓗᑎᒃ, ᔧᔭᐅᑉ ᐃᒪᖓ ᑎᑭᓪᓗᒍ, ᐊᓯᕈᐃᔨ ᑎᑭᓯᒪᖕᒪᑦ ᐸᐅᕐᖓᑎᑦ ᐱᕈᕇᑦᓯᐊᕐᑐᑦ ᓄᖑᑕᐅᕗᑦ. 33ᖁᕕᐊᓲᑎᒃᓴᖃᕈᓐᓃᕐᐳᓯ ᓯᕆᑦᔪᑎᒃᓴᖃᕈᓐᓃᕐᓗᓯᓗ, ᒧᐊᐱᒥᐅᑦ ᐱᕈᕐᑎᑦᓯᕕᖏᓐᓂᑦ ᐱᕈᕐᓰᕕᖁᑎᖏᓐᓂᓪᓗ, ᕔᓃᑦ ᐃᑦᑏᔭᕐᕕᖏᓐᓂᑦ ᐱᔪᑦ ᓄᖅᑲᕐᑎᓐᓇᒃᑭᑦ, ᖁᕕᐊᓱᖕᓂᕐᒧᑦ ᓂᐱᐊᓘᓪᓗᑎᒃ ᑐᓪᓕᕐᐸᓚᐅᕐᑐᑦ ᐱᑕᖃᕈᓐᓃᕐᒪᑕ ᓲᕐᓗ ᓂᐱᐊᓗᐃᑦ ᑐᓴᕐᓴᐅᒐᓗᐊᕐᐳᑦ, ᖁᕕᐊᓱᖕᓂᕐᒧᓪᓕ ᓂᓪᓕᐊᓂᐅᓐᖏᓚᑦ.
34“ᕿᐊᕙᓗᖏᑦ ᑐᓴᕐᑕᐅᔪᓐᓇᕐᐳᑦ ᕼᐃᓴᐸᓂᒥᐅᓂᑦ ᐃᓕᐊᓚᒥᐅᓄᑦ, ᔧᕼᐋᓯᒥᓗ, ᔪᐊᕆᒥᑦ ᕼᐅᕈᓁᒥᐅᑦ ᑎᑭᓪᓗᒋᑦ ᐃᒡᓚᑦ-ᓯᓕᓯᔭᒥᓗ, ᓂᒻᕆᒥᐅᓪᓘᓐᓃᑦ ᐃᒪᖁᑎᖏᑦ ᓴᓗᐊᕐᐳᑦ. 35ᒧᐊᐱᒥᐅᑦ ᑐᓂᕐᕈᓯᖃᑦᑕᕐᓂᖏᑦ ᑐᒃᓯᐊᕐᕕᒃᔪᐊᖁᑎᒥᖕᓂ ᓄᖅᑲᕐᑎᓐᓂᐊᕐᐸᒃᑲ, ᐃᑯᐊᓚᑦᓯᖃᑦᑕᕐᓂᖏᓪᓗ ᐳᔫᕐᑎᑦᓯᕕᖕᒥ ᒎᑎᒥᖕᓄᑦ, ᐊᑕᓂᖅ ᐅᖃᕐᐳᖅ.
36“ᒧᐊᐱᒥᐅᑦ ᐅᒡᒍᐊᕈᑎᒋᕙᒃᑲ ᐃᓗᕕᕐᓯᔪᓂ ᓱᐴᒐᕐᒥᒃ ᓂᓪᓕᐊᑎᑦᓯᔪᑎᑐᑦ ᐅᒡᒍᐊᕈᑕᐅᔪᑦ ᓂᓪᓕᐊᑎᑦᓯᓂᖏᑎᑐᑦ ᐅᒡᒍᐊᕈᑎᒋᕙᒃᑲ ᑭᕆ-ᕼᐃᕆᐅᑉ, ᐊᔪᕐᓴᖏᑦᑐᕐᔪᐊᓐᖑᕈᑎᒋᓚᐅᕐᑕᖏᑦ ᓄᖑᒻᒪᑕ. 37ᓂᐊᖁᓕᒫᑦ ᓄᔧᔭᕐᓯᒪᔪᐃᓐᓇᐅᓕᕐᐳᑦ, ᐅᒥᖃᕐᑐᓕᒫᓪᓗ ᐅᓐᖏᔭᕐᓯᒪᓕᕐᐳᑦ, ᐊᒡᒐᓕᒫᓪᓗ ᑭᓪᓕᐊᓯᒪᕗᑦ, ᕿᑎᕈᓯᕐᓯᒪᔪᐃᓐᓇᐅᓕᕐᓗᑎᒡᓗ ᐆᒪᔫᑉ ᒥᖅᑯᖏᓐᓂᒃ ᓴᓇᓯᒪᔪᓂᒃ. 38ᒧᐊᐱᒥᐅᑦ ᐃᒡᓗᖏᑕ ᖄᖏᓐᓂ, ᐃᓄᐃᓪᓗ ᓇᔪᕐᐸᒃᑕᖏᓐᓂ ᕿᐊᔪᕐᑕᖃᕐᑐᐃᓐᓇᐅᓕᕐᐳᑦ, ᒧᐊᐱᒥᐅᑦ ᓯᖁᒥᑕᐅᑎᓚᐅᕋᒃᑭᑦ ᒪᕐᕋᑎᑐᑦ ᐊᓐᓂᕆᔭᐅᔪᓐᓃᕐᑐᑎᑐᑦ, ᐊᑕᓂᖅ ᐅᖃᕐᐳᖅ. 39ᓱᕋᒃᓯᒪᕗᖅ ᓯᖁᒥᑦᓯᐊᕐᓗᓂ, ᓂᐹᔪᐊᓘᓪᓗᑎᒡᓗ, ᒧᐊᐱᒥᐅᑦ ᑐᓄᑦᓯᓕᕐᐳᑦ ᑲᓐᖑᓱᖕᓂᕐᒧᑦ, ᒧᐊᐱᒥᐅᑦ ᒥᑕᐅᑎᒋᔭᒃᓴᓐᖑᕐᒪᑕ, ᑲᑉᐱᐊᓲᑎᒃᓴᓐᖑᕐᓗᑎᒡᓗ ᓄᓇᓕᐅᖃᑎᓕᒫᖏᓐᓄᑦ.”
ᒧᐊᐱᒥᐅᑦ ᕿᒫᕕᒃᓴᖃᕈᓐᓃᕐᓂᖓᑦ
40ᐃᒫᒃ ᐊᑕᓂᖅ ᐅᖃᕐᐳᖅ, “ᑕᑯᒋᑦ ᓇᒃᑐᕋᓕᒃ ᐊᐅᕐᓵᕐᑐᖅ, ᐃᓴᕈᖏᒃᑕ ᐃᓵᖓᓂᖏᖕᓄᑦ ᒧᐊᐱᒥᐅᑦ ᐅᓕᒃᑕᐅᕗᑦ. 41ᐃᒡᓗᒐᓴᒡᔪᐊᑦ ᓵᓚᒋᔭᐅᓗᑎᒃ ᑎᒍᔭᐅᔪᒫᕐᐳᑦ, ᐱᔭᐅᑦᔧᕐᓯᒪᔫᒐᓗᐊᓪᓗ ᐱᔭᐅᓗᑎᒃ. ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᒧᐊᐱᒥᐅᑦ ᐅᓇᑕᕐᑐᒃᓴᖁᑎᖏᑕ ᐆᒻᒪᑎᖏᑦ ᐊᑦᔨᖃᕈᒫᕐᐳᑦ, ᐊᕐᓇᐅᑉ ᐃᕐᓂᓱᒃᑑᑉ ᐃᒃᐱᒋᔭᖓᑐᑦ ᐋᓐᓂᐊᓂᖃᕐᓗᑎᒃ. 42ᒧᐊᐱᒥᐅᑦ ᐃᓅᖃᑎᒌᒡᔪᐊᖏᑦ ᐊᓯᕈᕐᑕᐅᔪᒫᕐᐳᑦ ᐊᑕᓂᕐᒥᑦ ᐱᔪᓐᓇᕐᓂᕐᓴᐅᓇᓱᒋᓚᐅᕐᒪᑕ. 43ᒧᐊᐱᒥᐅᑦ ᐃᓄᖏᑦ ᓯᕗᓂᒃᓴᖃᕐᐳᓯ ᑲᑉᐱᐊᓇᕐᑐᒥᒃ, ᐃᑎᕐᓴᒥᒃ ᑲᑕᖕᓇᕐᑐᒥᒃ ᓂᒐᕐᑎᑕᐅᕕᒃᓴᓂᒡᓗ, ᐊᑕᓂᖅ ᐅᖃᕐᐳᖅ. 44ᕿᒫᓇᓱᐊᕐᑑᒐᓗᐊᑦ ᑲᑉᐱᐊᓇᕐᑐᒧᑦ ᐃᑎᕐᓴᒧᑦ ᑲᑕᖕᓂᐊᕐᐳᑦ, ᐃᑎᕐᓴᒥᓪᓗ ᒪᔪᕐᑑᒐᓗᐊᑦ ᓂᒐᕐᑎᑕᐅᓂᐊᕐᐳᑦ, ᒧᐊᐱᒥᐅᑦ ᐊᕐᕌᒍᖓ ᓇᓪᓕᐅᑎᓯᒪᖕᒪᑦ ᓱᒋᐊᕐᑕᐅᕕᒃᓴᖓᓄᑦ, ᐊᑕᓂᖅ ᐅᖃᕐᐳᖅ. 45ᕼᐃᓴᐸᓂᒥᐅᑦ ᑕᕐᕋᓕᓂᖏᓐᓂ ᕿᒫᓂᑯᐃᑦ ᐃᓂᒃᓴᕐᓯᓂᐊᓐᖏᓚᑦ, ᕼᐃᓴᐸᓂ ᐃᑯᐊᓚᔪᕐᑕᖃᕐᒪᑦ, ᓮᕼᐆᓂᒥᓪᓗ ᐃᑯᐊᓚᔪᒥᒃ ᐊᓂᐊᔪᖃᕐᒪᑦ, ᒧᐊᐱᒥᐅᓪᓗ ᖃᐅᖏᓐᓂᒃ ᐆᑎᑦᓯᓂᐊᕐᒪᑦ, ᐅᖃᐅᓯᕐᒥᒍᑦ ᐅᓇᖕᒥᓁᔭᕐᐸᒃᑐᕕᓃᑦ ᓴᐅᓂᖏᓐᓂᒃ ᐱᖃᓯᐅᑦᔨᓗᓂ. 46ᑲᑉᐱᐊᓐᓇᒦᒃ ᒧᐊᐱᒥᐅᑕᐅᔪᓯ, ᑭᒨᓯᒥᐅᑦ ᐃᓄᖏᑦ ᓄᖑᑕᐅᖕᒪᑕ, ᐃᕐᓂᓯᓗ ᑎᒍᔭᐅᓪᓗᑎᒃ ᐊᐅᓪᓚᕈᑦᔭᐅᖕᒪᑕ ᐸᓂᓯᓗ ᑎᒍᔭᐅᓪᓗᑎᒃ ᓯᐊᓛᕐᑖᖑᖕᒪᑕ.
47“ᑭᓯᐊᓂᓕ ᑍᒤᒐᓗᐊᕐᑎᓪᓗᒍ ᒧᐊᐱᒥᐅᑦ ᐱᔪᓐᓇᕐᓯᑎᑦᓯᐊᕈᒫᕆᕙᒃᑲ ᐅᓪᓗᓂ ᕾᔪᒫᕐᑐᓂ, ᐊᑕᓂᖅ ᐅᖃᕐᐳᖅ, ᑕᒪᓐᓇ ᒧᐊᐱᒥᐅᑦ ᐃᖅᑲᕐᑐᕐᑕᐅᓂᖓᑕ ᐃᓱᒋᕚ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 48: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
