ᔨᕆᒤᐊᐅᑉ ᐊᒡᓚᖏᑦ 39
39
ᔨᕉᓴᓕᐅᑉ ᓵᓚᒋᔭᐅᓂᖓ
1ᐃᒫᒃ ᑕᕝᕙ ᔨᕉᓴᓕᒻ ᐱᔭᐅᓚᐅᕐᐳᖅ ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ ᔫᑕᒥᐅᓄᑦ 9ᖓᓐᓂ ᑕᖅᑮᑦ 10ᒋᓕᕐᑕᖓᓐᓂ, ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑕ ᐅᓇᑕᕐᑐᒃᓴᖁᑎᓕᒫᖏᑦ ᔨᕉᓴᓕᒧᑦ ᐅᓇᑕᕆᐊᓚᐅᕐᐳᑦ ᐊᕙᑕᖏᕐᓯᒪᓕᓚᐅᕐᐹᓪᓗ. 2ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ 11ᒋᓕᕐᑕᖓᓂ ᑕᖅᑮᑦ ᓯᑕᒪᖓᓐᓂ ᐅᓪᓗᖏᑕ 9ᒋᓕᕐᑕᖓᓐᓂ ᔨᕉᓴᓕᐅᑉ ᐊᕙᓗᕐᔪᐊᖓ ᑭᓚᒃᑕᐅᕗᖅ ᐃᓗᒻᒧᑦ.
3ᔨᕉᓴᓕᐅᑉ ᐱᔭᐅᑦᔪᑖᓂ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᖓᔪᖅᑳᖁᑎᖏᑦ ᐃᓂᑖᕐᑐᓚᐅᕐᐳᑦ ᐃᑎᕐᑕᕐᕕᐅᑉ ᕿᑎᖓᓃᑦᑐᒥᒃ ᑍᔭᐅᔪᒥ ᐅᑯᐊ; ᓂᕐᒐᐅᓪ-ᓴᕆᔨᕆ, ᓴᒪᒐᕆ-ᓂᐳ, ᓴᕐᓯᑭᒻ ᕌᑉᓴᕆᔅ, ᓂᕐᒐᐅᓪᓴᕆᔨᕆ ᕌᑉᒪᒡ, ᑖᒃᑯᐊᓗ ᐊᓯᖏᑦ ᐊᖓᔪᖅᑳᖁᑎᒋᔭᐅᖕᒥᔪᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ.
4ᐊᖓᔪᖅᑳᕐᔪᐊᑉ ᔨᑎᑬᐊᐅᑉ ᐅᓇᑕᕐᑎᖁᑎᖏᑕᓗ ᑕᑯᒐᒥᑦᔪᒃ ᕿᒫᕗᑦ ᐅᓐᓄᐊᒃᑯᑦ ᐊᖓᔪᖅᑳᕐᔪᐊᑉ ᐱᕈᕐᓰᕕᖁᑎᖓ ᐊᓂᕕᒋᓪᓗᒍ ᐊᕙᓗᕐᔪᐊᒃ ᒪᕐᕉᒃ ᐃᑎᕐᑕᕐᕕᖓᒍᑦ ᐊᕌᐸᐅᑉ ᓄᓇᖓ ᑐᕌᕐᕕᒋᓪᓗᒍ. 5ᑲᐅᓪᑎᐊᒥᐅᓪᓕ ᐅᓇᑕᕐᑐᒃᓴᖁᑎᖏᑕ ᒪᓕᒃᑲᒥᑦᔪᒃ ᔨᑎᑬᐊ ᐊᖑᕚᑦ ᔨᕆᑰᑉ ᓇᑎᕐᓈᖑᓂᖓᓂ, ᑎᒍᒐᒥᑦᔪᒡᓗ ᐋᑉᐹᑦ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᕆᑉᓚᒦᑎᓪᓗᒍ ᕼᐊᒫᑎᐅᑉ ᓄᓇᖓᓂ ᔨᑎᑬᐊᓗ ᑐᖁᑕᒃᓴᐅᖁᕚᑦ. 6ᑕᕝᕙᓃᓪᓗᑎᒃ ᓱᓕ ᕆᑉᓚᒥ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᔨᑎᑬᐊᐅᑉ ᐃᕐᓂᖏᑦ ᑐᖁᑕᐅᑎᑉᐰᑦ ᔨᑎᑬᐊ ᑕᑯᓐᓇᕐᑎᓪᓗᒍ ᔫᑕᒥᐅᓪᓗ ᐊᖓᔪᖅᑳᖁᑎᖏᑦ. 7ᔨᑎᑬᐊᐅᓪᓗ ᐃᔨᖏᒃ ᖃᕐᑕᐅᑎᑉᐹᒃ ᐊᑦᓱᖏᕐᑕᐅᑎᓪᓗᒍᓗ ᐊᕐᓵᕐᑑᔭᓄᑦ ᐹᐱᓘᓂᒧᑦ ᐊᖏᕐᕋᐅᑎᔪᒪᓪᓗᒍ. 8ᑲᐅᓪᑎᐊᒥᐅᓪᓗ ᐊᖓᔪᖅᑳᕐᔪᐊᑉ ᐃᒡᓗᖓ ᐃᑯᐊᓪᓚᒃᐹᑦ ᐃᓄᐃᓪᓗ ᐃᒡᓗᖏᑦ, ᔨᕉᓴᓕᐅᓪᓗ ᐊᕙᓗᕐᔪᐊᖏᑦ ᓯᖁᑦᑎᕐᓗᒋᑦ. 9ᓂᐳᔭᕋᑕᓐ ᐊᖓᔪᖅᑳᕐᔪᐊᑉ ᐅᓇᑕᕐᑎᖁᑎᖏᑕ ᐊᖓᔪᖅᑳᖓᑦ ᐃᒡᓗᒐᓴᒡᔪᐊᓂ ᐊᒥᐊᒃᑰᔪᑦ ᑎᒍᓪᓗᓂᒋᑦ ᐊᐅᓪᓚᕈᑎᓚᐅᕐᐰᑦ ᐹᐱᓘᓂᒧᑦ ᐃᓚᒋᓪᓗᒋᑦ ᐃᒻᒥᖕᓂᒃ ᑐᓂᑦᔪᑎᒋᓚᐅᕐᑐᑦ ᑖᑦᓱᒧᖓ. 10ᓂᐳᔭᕋᑕᓐᓕ ᐅᓇᑕᕐᑎᓄᑦ ᐊᖓᔪᖄᖑᔪᖅ ᕿᒤᓚᐅᕐᐳᖅ ᔫᑕᒥᐅᓂᒃ ᐊᔪᕐᓴᕐᑐᓂᒃ ᑭᓱᖁᑎᖃᐅᖏᑦᑐᓂᒃ, ᑍᑦᓱᒪᓕ ᑕᕝᕙ ᓄᓇᖁᑎᑖᕐᑐᕐᑎᓚᐅᕐᐰᑦ ᕔᓂᓕᒃᓴᓂᒡᓗ ᐱᕈᕐᓰᕕᒃᑖᑎᓪᓗᒋᑦ.
ᔨᕆᒤᐊᐅᑉ ᑎᒍᔭᐅᓯᒪᔪᓐᓃᕐᑎᑕᐅᓂᖓ
11ᓂᐱᑯᓁᓴᓕ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᐊᖓᔪᖅᑳᖁᑎᒥᓂᒃ ᓂᐳᔭᕋᑕᓐᒥᒃ ᐊᖅᑯᑎᖃᕐᓗᓂ ᐱᖁᔨᑦᔪᑎᓕᐅᕐᐳᖅ ᔨᕆᒤᐊ ᐱᑦᔪᑎᒋᓪᓗᒍ ᐃᒫᒃ: 12“ᔨᕆᒤᐊ ᐱᒍᑦᓯᐅᒃ ᑲᒪᒋᑦᓯᐊᕐᓂᐊᕐᐸᓯ ᐱᔪᒪᔭᖏᓐᓂᒡᓗ ᐱᑎᑕᐅᓂᐊᕐᐳᖅ.” 13ᓂᐳᔭᕋᑕᓐ ᐊᖓᔪᖅᑳᖑᓂᕐᐹᖑᔪᖅ ᓂᐳᓴᔭᐸᓐᓗ ᐊᖓᔪᖅᑳᖑᖕᒥᔪᖅ, ᓂᕐᒐᐅᓪᓴᕆᔨᕆᓗ ᐊᖓᔪᖅᑳᒻᒪᕆᐅᖃᑕᐅᖕᒥᔪᖅ ᐊᓯᖏᓪᓗᑦᑕᐅᖅ ᐊᖓᔪᖅᑳᖑᖕᒥᔪᑦ ᐹᐱᓘᓂᒥ. 14ᔨᕆᒤᐊ ᑎᒍᔭᐅᓯᒪᕕᒋᔭᖓᓂᑦ ᐊᓂᑎᓪᓗᒍ, ᒋᑕᓔᐊᒧᑦ ᐊᕼᐂᑲᒥᐅᑉ ᐃᕐᓂᖓᓄᑦ ᑲᒪᒋᔭᐅᑎᑉᐹᑦ ᓴᕙᓂᐅᑉ ᐃᕐᖑᑕᖓᓄᑦ, ᑖᑦᓱᒧᖓᓗ ᐊᖏᕐᕋᕐᑎᑕᐅᕗᖅ ᐃᓅᖃᑎᒥᓃᖁᓪᓗᒍ.
ᐃᐱᒥᓕᑭᐅᑉ ᓂᕆᐅᒋᔭᒃᓴᕐᑖᕐᑎᑕᐅᓂᖓ
15ᔨᕆᒤᐊᓕ ᑎᒍᔭᐅᓯᒪᕕᖕᒥᓃᑎᓪᓗᒍ ᓱᓕ ᐊᑕᓂᕐᒧᑦ ᐅᖃᕐᕕᐅᓚᐅᕐᐳᖅ. 16ᐃᐱᑦ-ᒥᓕᑭ ᐃᑎᐅᐱᐊᒥᐅᑕᖅ ᐅᐸᒡᓗᒍ ᐅᖃᐅᑎᔭᕐᑐᕈᒃ ᐃᒫᒃ; ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ: “ᐅᖃᐅᓯᕆᓚᐅᕐᑕᒃᑲ ᐃᒡᓗᒐᓴᒡᔪᐊᑦ ᑖᒃᑯᐊ ᐊᓯᕈᕐᑕᐅᔪᒫᕐᓂᕋᕐᓗᒋᑦ ᑲᑉᐱᐊᓇᕐᑐᒃᑯᑦ ᐱᔪᓐᓇᑦᓯᐊᕐᓂᒃᑰᖏᑦᑐᖅ ᒫᓐᓇ ᓇᓚᐅᑦᓯᑎᓐᓂᐊᓕᕐᐸᒃᑲ ᓇᓚᐅᑦᓯᓕᕐᓂᖏᓪᓗ ᑕᑯᓂᐊᓕᕐᐸᓯ. 17ᐅᕙᖓᓕ ᐅᓪᓗᖅ ᑍᓐᓇ ᓇᓪᓕᐅᑎᒃᐸᑦ ᓴᐳᑎᔪᒪᕙᒋᑦ, ᐊᑕᓂᖅ ᐅᖃᕐᐳᖅ, ᑲᑉᐱᐊᒋᔭᕐᓄᑦ ᑎᒍᔭᐅᔪᒫᓐᖏᓚᑎᑦ. 18ᐱᐅᓕᓂᐊᕐᐸᒋᑦ, ᐅᓇᑕᕐᑐᓄᑦ ᑐᖁᑕᐅᓂᐊᓐᖏᓚᑎᑦ, ᐃᓅᑎᑕᐅᓂᐊᕐᐳᑎᓪᓕ ᐅᕙᓐᓂᒃ ᐅᒃᐱᕆᔭᖃᕋᕕᑦ, ᐊᑕᓂᖅ ᐅᖃᕐᐳᖅ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 39: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
