ᐃᓗᐊᕐᓮᔩᑦ ᐊᒡᓚᖏᑦ 6
6
ᒋᑎᐅᓂ
1ᐃᓴᕆᐊᓕᐅᑉ ᐃᓄᖏᑦ ᐱᐅᖏᑦᑐᐊᓗᖕᓂᒃ ᐱᓂᐊᕐᓂᖃᓕᓚᐅᕆᕗᑦ ᐊᑕᓂᐅᑉ ᓵᖓᓂ, ᑍᒤᒻᒪᑦ ᒥᑎᐊᓂᒥᐅᓄᑦ ᐊᐅᓚᑕᐅᑎᓚᐅᕐᐰᑦ ᐊᕐᕌᒍᓂᒃ 7ᓂᒃ. 2ᒥᑎᐊᓂᒥᐅᑦ ᓵᓚᖃᓚᐅᕐᒪᑕ ᐃᓴᕆᐊᓕᒥᐅᓂᒃ; ᒥᑎᐊᓂᒥᐅᑦ ᐱᑦᔪᑎᒋᓪᓗᒋᑦ ᐃᓴᕆᐊᓕᒥᐅᑦ ᐃᔨᕐᕕᖃᓕᓚᐅᕐᐳᑦ ᖃᖅᑲᓂ ᐃᓗᓕᐅᕆᓪᓗᑎᒃ, ᕾᕈᓱᖕᓂᓗ, ᕿᒫᕕᓕᐊᕆᓯᒪᔭᒥᖕᓂᓗ. 3ᑍᒪᓐᖓᓪᓗ ᐃᓴᕆᐊᓕᒥᐅᑦ ᐱᕈᕐᓰᔭᕐᑐᕌᖓᑕ ᓂᕿᒃᓴᒥᖕᓂᒃ, ᒥᑎᐊᓂᒥᐅᑦ ᐊᒪᓕᑬᑎᓪᓗ ᓯᐅᕋᕐᒥᐅᓪᓗ ᐅᐸᒍᑎᕙᓚᐅᕐᐳᑦ ᐅᓇᑕᕆᐊᕐᑐᕐᓗᑎᒃ. 4ᑕᖕᒫᕐᓯᒪᖃᑦᑕᓚᐅᕐᐳᑦ ᓄᓇᖓᓂ ᐅᑕᖅᑭᓪᓗᑎᒃ ᐱᕈᕐᓯᐊᖏᓪᓗ ᓱᕋᒃᑎᕐᐸᒡᓗᒋᑦ, ᒑᓴᐅᑉ ᓄᓇᖓ ᑎᑭᓪᓗᒍ. ᐃᓴᕆᐊᓕᒥᐅᑦ ᕿᒤᕕᒋᓇᒋᑦ ᐃᓅᒡᒍᑎᒃᓴᖏᓐᓂᒃ ᐊᕐᓵᕐᓯᕙᓚᐅᕐᐳᑦ, ᓰᐱᓂᒃ, ᐃᒻᒧᒃᓯᐅᒐᖁᑎᖏᓐᓂᒃ, ᓯᐅᑎᖅᑯᕐᑐᔪᖁᑎᖏᓐᓂᒡᓗ. 5ᑎᑭᖃᑦᑕᓚᐅᕐᒪᑕ ᐅᒫᔪᖁᑎᒡᒋᕐᓗᑎᒃ, ᑐᐱᒡᒋᕐᓗᑎᒡᓗ ᐱᒡᓕᕐᑕᐅᔮᕐᑐᑎᑐᑦ ᓈᓴᒐᒃᓴᐅᖏᑦᑐᑎᑐᑦ; ᑖᒃᑯᐊᓗ ᑳᒥᓕᖁᑎᖏᓪᓗ ᐅᓄᕐᓂᖏᑦ ᓈᓴᒐᒃᓴᐅᓚᐅᓐᖏᓚᑦ; ᑎᑭᓐᓇᒥᒃ ᓄᓇᒥᒃ ᐊᑑᑎᒃᓴᖃᕈᓐᓃᕐᑎᑦᓯᕙᓚᐅᕐᐳᑦ. 6ᐃᓴᕆᐊᓕᒥᐅᑦ ᓵᓚᐅᓂᕐᐸᐅᓕᓚᐅᕐᐳᑦ ᒥᑎᐊᓂᒥᐅᓂᑦ; ᐃᓴᕆᐊᓕᒥᐅᓪᓗ ᐃᑲᔪᕐᑕᐅᔪᒪᓪᓗᑎᒃ ᓂᓪᓕᐊᓕᓚᐅᕐᐳᑦ ᐊᑕᓂᕐᒧᑦ.
7ᐃᓴᕆᐊᓕᒥᐅᑦ ᐃᓗᖏᕐᓱᕐᓗᑎᒃ ᕿᓄᓕᕐᒪᑕ ᐊᑕᓂᕐᒧᑦ ᐃᑲᔪᕐᑕᐅᔪᒪᓪᓗᑎᒃ ᒥᑎᐊᓂᒥᐅᓂᑦ, 8ᐊᑕᓂᐅᑉ ᑎᓕᓯᕕᒋᓚᐅᕐᐰᑦ ᐅᖃᕐᑎᒥᓂᒃ ᐃᓴᕆᐊᓕᒥᐅᓄᑦ; ᐅᖃᐅᑎᓪᓗᒋᑦ, ᐊᑕᓂᖅ ᐃᓴᕆᐊᓕᐅᑉ ᒎᑎᖓ ᐃᒫᒃ ᐅᖃᕐᐳᖅ: “ᐊᐅᓪᓚᕐᑎᓚᐅᕐᐸᑦᓯ ᐄᑦᔨᑉᑎᒥᑦ ᓯᐊᓛᖑᕕᒋᓚᐅᕐᑕᑦᓯᓐᓂᑦ. 9ᓴᐳᑎᓚᐅᕐᐸᑦᓯᓗ ᐄᑦᔨᑉᑎᒥᐅᑦ ᐱᔪᓐᓇᕐᓂᖏᓐᓂᑦ, ᐃᓄᓕᒫᓂᓪᓗ ᐃᓕᑦᓯᓐᓂᒃ ᐊᑭᕋᕐᑐᓚᐅᕐᑐᓂᑦ. ᐊᐅᓪᓚᕐᑎᓚᐅᕐᐸᒃᑲᓗ ᑕᑯᓐᓇᕐᑎᓪᓗᓯ, ᓄᓇᖁᑎᕕᓂᖏᓐᓂᒡᓗ ᓄᓇᑖᕐᑎᓚᐅᕐᐸᑦᓯ. 10ᐅᖃᐅᑎᓚᐅᕐᐸᑦᓯ, ‘ᐅᕙᖓ ᐊᑕᓂᐅᕗᖓ ᒎᑎᓯ; ᐊᒧᕅᑎᑦ ᒎᑎᖏᓐᓂᒃ, ᐅᐱᒋᔭᖃᓕᕐᑐᒃᓴᐅᓐᖏᓚᓯ ᑖᒃᑯᐊ ᓄᓇᖏᓐᓂ ᒫᓐᓇ ᓄᓇᖃᓕᕐᑐᓯ.’ ᑭᓯᐊᓂᓕ ᓂᐱᓐᓂᒃ ᑐᓴᕐᑑᔮᓚᐅᓐᖏᓚᓯ.”
11ᐊᑕᓂᐅᓪᓕ ᐂᖏᓕᖓ ᕾᓚᐅᕐᐳᖅ ᐃᖏᓪᓗᓂᓗ ᓇᐹᕐᑑᑉ ᐆᒃᒥᒃ ᐊᑎᓕᐅᑉ ᐊᑖᓄᑦ ᓄᓇᒥ ᐅᐸᕋᒥ, ᔪᐊᓯᐅᑉ ᓄᓇᖁᑎᖓᓄᑦ, ᐊᐰᔭᕆᑎᐅᑉ ᑭᖑᕚᖓᓄᑦ. ᐃᕐᓂᖓ ᒋᑎᐅᓂ ᐹᓚᐅᒑᒃᓮᑦ ᓄᕗᖏᓂᒃ ᐲᔧᓚᐅᕐᐳᖅ ᐊᓇᐅᓕᕐᓗᒋᑦ ᕔᓂᒃᓴᓂᒃ ᐃᑦᑏᔧᕕᐅᑉ ᐃᓗᐊᓂ ᒥᑎᐊᓂᒥᐅᓂᑦ ᐃᔨᕐᓯᒪᓪᓗᓂ. 12ᑕᕝᕙᓂᓗ ᐊᑕᓂᐅᑉ ᐂᖏᓕᖓᑕ ᓴᖅᑭᕝᕕᒋᓚᐅᕐᐹ ᐅᖃᐅᑎᓪᓗᒍᓗ, “ᐊᑕᓂᐅᑉ ᐃᓚᒋᕚᑎᑦ, ᐊᖑᑕᐅᓪᓗᑎᑦ ᐅᓇᑕᕐᓂᕐᒧᑦ ᐊᔪᖏᑦᑐᕐᔪᐊᖑᔪᑎᑦ!”
13ᒋᑎᐅᓂᐅᑉ ᐅᖃᐅᑎᕚ, “ᕿᓄᕕᒋᕙᒋᑦ ᐅᐱᓐᓇᕐᑑᖅ, ᐊᑕᓂᐅᓪᓕ ᐃᓚᒋᒃᐸᑎᒍᑦ, ᓱᖕᒪᓪᓕ ᐃᒤᑦᑐᐊᓗᖕᒦᑉᐱᑕ? ᓇᐅᒡᓕ ᑍᒃᑯᐊ ᐊᑕᓂᐅᑉ ᐱᓂᐊᕐᓂᖏᑦ ᑲᒪᓇᕐᑐᑦ ᓯᕗᓕᑦᑕ ᐅᖃᐅᓯᕆᕙᓚᐅᕐᑕᖏᑦ, ᐅᖃᕐᐸᓚᐅᕐᒪᑕ, ‘ᐊᑕᓂᐅᑉ ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕐᒪᑎᒍᑦ?’ ᒫᓐᓇᓕ ᐊᑕᓂᐅᑉ ᑲᒪᒋᔪᓐᓃᕐᐹᑎᒍᑦ, ᑐᓐᓂᖅᑯᑎᒋᓪᓗᑕᓗ ᒥᑎᐊᓂᒥᐅᑦ ᐱᔪᓐᓇᕐᓂᖏᓐᓄᑦ.”
14ᐊᑕᓂᐅᓪᓕ ᓵᕝᕕᒋᓪᓗᒍ ᐅᖃᐅᑎᕚ, “ᐂᓕᕆᑦ ᐊᔪᖏᓐᓂᖅ ᒫᓐᓇ ᐱᔧᑦ ᐊᑐᕐᓗᒍ ᐃᓴᕆᐊᓕᒥᐅᑦ ᓴᐳᑎᔭᕐᑐᓕᒃᑭᑦ ᒥᑎᐊᓂᒥᐅᑦ ᐱᔪᓐᓇᕐᓂᖏᓐᓂᑦ; ᐅᕙᖓ ᒫᓐᓇ ᑎᓕᕙᒋᑦ.”
15ᒋᑎᐅᓂᐅᑉ ᑭᐅᕚ, “ᕿᓄᕗᖓ, ᐊᑕᓃᖅ, ᖃᓄᕐᓕ ᓴᐳᑦᔨᔪᓐᓇᕐᐳᖓ ᐃᓴᕆᐊᓕᒥᐅᓂᒃ? ᑭᖑᕚᖑᖃᑎᑦᑎᓐᓂᑦ ᐃᓚᒌᒃᑐᒍᑦ ᓴᓐᖐᓐᓂᕐᐹᖑᒐᑦᑕ ᒫᓇᓯᐅᑉ ᑭᖑᕚᖏᓐᓂ, ᐅᕙᖓᓗ ᓱᓇᐅᖏᓐᓂᕐᐹᖑᓪᓗᖓ ᐃᓚᑦᑎᓐᓂᑦ.”
16ᑕᕝᕙ ᐊᑕᓂᐅᑉ ᐅᖃᐅᑎᕚ, “ᐃᓚᒋᓂᐊᕐᐸᒋᑦ ᒥᑎᐊᓂᒥᐅᑦ ᓵᓚᒋᓂᐊᕐᐸᑎᑦ ᐃᓄᒃᑐᑦ ᐊᑕᐅᓯᕐᑐᑦ.”
17ᒋᑎᐅᓂᐅᑉ ᐅᖃᐅᑎᕚ, “ᖁᕕᐊᒋᒍᕕᖓ, ᓇᓗᓁᒃᑯᑕᕐᒥᒃ ᑐᓂᓯᕕᒋᓚᐅᓐᖓ ᐃᕝᕕᓪᓚᕆᐅᖕᒪᖔᕐᐱᑦ ᐊᑕᓃᖅ. 18ᐊᐅᓪᓚᕐᑍᓕᒋᑦ ᐅᕙᓐᖓᑦ ᐅᑎᓚᐅᖏᓐᓂᓐᓂ, ᑐᓂᕐᕈᑎᒃᓴᓐᓂᒃ ᐂᒃᓯᕐᓂᐊᕋᒪ, ᐃᓕᖕᓄᓪᓗ ᑐᓂᓗᒍ.”
ᑖᑦᓱᒪ ᐅᖃᐅᑎᕚ, “ᐅᑕᖅᑭᓂᐊᕐᐸᒋᑦ ᐅᑎᖅᑳᕐᑎᓐᓇᒃ.”
19ᒋᑎᐅᓂ ᐃᒡᓗᒥᓄᐊᕐᐳᖅ ᓂᕿᓕᐅᕐᓗᓂᓗ ᒎᑦᓯᐅᑉ ᓄᕐᕋᖓᓂᒃ, ᓂᐊᖂᔭᓕᐅᕐᓗᓂᓗ ᐳᕙᓪᓚᕐᓴᐅᑎᖃᖏᑦᑐᒥᒃ ᐅᖁᒤᓐᓂᕐᒥᒃ ᐄᕚᒥᒃ ᑍᔭᐅᔪᑐᑦ ᐊᖏᑎᒋᔪᒥᒃ; ᓂᕿ ᐃᕕᐅᔭᒧᐊᕐᐹ ᖃᔪᐊᓗ ᖃᑦᑕᕐᒧᐊᕐᓗᒍ, ᐋᓪᓗᒋᓪᓗ ᓇᐹᕐᑑᑉ ᐆᒃᒥᒃ ᐊᑎᓕᐅᑉ ᐊᑖᓃᑦᑐᒧ, ᑐᓂᓪᓗᒋᓪᓗ ᑖᑦᓱᒧᖓ. 20ᒎᑎᐅᓪᓗ ᐂᖏᓕᖓᑕ ᐅᖃᐅᑎᕚ, “ᓂᕿᓗ ᓂᐊᖂᔭᕐᓗ ᐅᔭᕋᐅᑉ ᖄᖓᓄᐊᒃᑭᑦ, ᖃᔪᕐᒥᒡᓗ ᑯᕝᕕᕆᓗᒋᑦ.” ᒋᑎᐅᓂ ᑍᒤᓕᐅᓚᐅᕐᐳᖅ. 21ᐊᑕᓂᐅᑉ ᐂᖏᓕᖓᑕ ᑎᒃᑯᐊᕐᐰᑦ ᐊᔭᐅᑉᐱᐊᑉ ᓄᕗᐊᓄᑦ ᑎᒍᒥᐊᕐᑕᒥᓄᑦ. ᐅᔭᕋᖕᒥᑦ ᐃᑯᒪ ᓴᖅᑭᑉᐳᖅ ᓂᕿ ᓂᐊᖂᔭᕐᓗ ᓄᖑᓪᓗᒋᑦ; ᐊᑕᓂᐅᓪᓗ ᐂᖏᓕᖓ ᑕᑯᒃᓴᐅᔪᓐᓃᕐᐳᖅ ᑕᕝᕙᓐᖓᑦ.
22ᒋᑎᐅᓂᓗ ᑐᑭᓯᓕᕐᐳᖅ ᐊᑕᓂᐅᑉ ᐂᖏᓕᖓᓂᒃ ᑕᑯᓂᕐᒥᓂᒃ; ᑲᑉᐱᐊᓱᖕᓂᕐᒧᓪᓗ ᐅᖃᕐᐳᖅ, “ᑕᑯᒋᑦ ᐊᑕᓃᖅ ᒎᑏ! ᐂᖏᓖᖁᑏᑦ ᑕᑯᕙᕋ ᑮᓇᕐᒥ ᑮᓇᕐᒧᑦ!”
23ᐊᑕᓂᐅᓪᓕ ᐅᖃᐅᑎᕚ, “ᐃᓱᒫᓗᖏᑦᓯᐊᕆᑦ; ᑲᑉᐱᐊᓱᖏᓪᓗᑎᑦ. ᑐᖁᓂᐊᓐᖏᓚᑎᑦ.” 24ᑍᒤᒻᒪᑦ ᒋᑎᐅᓂ ᑐᓂᕐᕈᓯᕐᕕᓕᐅᕐᐳᖅ ᐊᑕᓂᕐᒧᑦ ᐊᑦᑎᕐᓗᒍᓗ, “ᐊᑕᓂᖅ ᐃᓂᓪᓚᖓᑦᓯᐊᕐᓇᕐᐳᖅ.” ᐅᓪᓗᒥᒧᑦ ᓱᓕ ᓇᐸᕗᖅ ᐅᐸᕋᒥ, ᐃᓚᒌᑦ ᐊᐰᔭᕆᑎᑦ ᓄᓇᖁᑎᖓᓂ.
25ᐅᓐᓄᒃᑎᓪᓗᒍ ᐊᑕᓂᐅᑉ ᒋᑎᐅᓂ ᐅᖃᐅᑎᕚ, “ᐊᑖᑕᕕᑦ ᐃᒻᒧᒃᓯᐅᒐᖁᑎᖓᓂᒃ ᐊᖑᓴᓪᓗᕐᒥᒃ ᐱᓗᑎᑦ, ᐊᖑᓴᓪᓗᖁᑎᑦᓯ ᐂᑉᐸᖓᓂᒃ ᐊᕐᕌᒍᓕᖕᒥᒃ 7ᓂᒃ ᓇᒃᓴᕐᓗᒍ, ᐰᓕᒧᑦ ᑐᓂᕐᕈᓯᕐᕕᒃ ᐅᕐᕈᑎᒋᐊᕐᑐᕈᒃ, ᐊᑖᑕᕕ ᐱᖓ, ᓴᓂᐊᓃᑦᑐᕐᓗ ᓇᓗᓁᒃᑯᑕᖅ ᒎᑎᓐᖑᐊᒧᑦ ᐊᓯᕋᒧᑦ ᓇᑲᓪᓗᒍ. 26ᑐᓂᕐᕈᓯᕐᕕᖕᒥᒡᓗ ᓴᓇᒋᑦ ᐊᑕᓂᕐᒧᑦ ᒎᑎᖕᓄᑦ ᕿᒫᕕᐅᑉ ᖄᖓᓂ, ᐅᔭᕅᑦ ᐋᖅᑭᒃᓱᕐᓗᒋᑦ ᐋᖅᑭᒃᑎᒪᒋᐊᖃᕐᓂᖏᑦ ᒪᓕᑦᓯᐊᕐᓗᒋᑦ; ᐊᖑᓴᓪᓘᓪᓗ ᐂᑉᐸᖓ ᑎᒍᓗᒍ ᑐᓂᕐᕈᑎᒋᒍᒃ ᕿᔪᖃᕐᓗᑎᑦ ᓇᑲᓚᐅᕐᑕᕐᓂᒃ ᒎᑎᓐᖑᐊᑉ ᐊᓯᕋᐅᑉ ᓇᓗᓁᒃᑯᑕᖓᓂᑦ.” 27ᐊᓱᐃᓛᒃ ᒋᑎᐅᓂᐅᑉ ᐱᔨᓂ ᖁᓖᑦ ᐃᓚᒋᓪᓗᒋᑦ ᐊᑕᓂᐅᑉ ᐅᖃᐅᓯᕆᔭᖓᓂᒃ ᐱᓇᓱᐊᕐᐳᖅ; ᑲᑉᐱᐊᓱᒃᑲᒥ ᐃᓚᒥᓂᒃ ᐃᓄᖕᓂᒡᓗ ᓄᓇᓕᖕᓃᑦᑐᓂᒃ ᐅᓪᓗᒃᑯᑦ ᐱᓇᓱᐊᓐᖏᓚᖅ, ᐅᓐᓄᒃᑯᓪᓕ ᐱᓇᓱᐊᓚᐅᕐᐳᖅ.
28ᓄᓇᓕᖕᓃᑦᑐᓪᓕ ᐃᓄᐃᑦ ᐅᓪᓛᒻᒪᕆᒃᑯᑦ ᒪᑭᓐᓇᒥᒃ, ᑕᑯᕚᑦ ᐰᓕᒧᑦ ᑐᓂᕐᕈᓯᕐᕕᒃ ᓯᖁᑦᑎᕐᓯᒪᔪᖅ, ᐊᓯᕋᐅᓪᓗ ᓇᓗᓁᒃᑯᑕᖓ ᓴᓂᐊᓃᑦᑐᖅ ᓇᑲᓯᒪᔪᖅ ᐊᖑᓴᓪᓘᓪᓗ ᐂᑉᐸᖓ ᐃᑯᐊᓪᓚᒃᑕᐅᓯᒪᔪᖅ ᑐᓂᕐᕈᓯᕐᕕᓕᐊᖑᔪᕕᓂᕐᒥ. 29ᐃᒻᒥᖕᓄᑦ ᐊᐱᕐᓱᖃᑦᑕᐅᑎᓕᕐᐳᑦ, “ᑭᓇ ᑍᒤᓕᐅᕐᓂᕐᐹ?” ᖃᐅᔨᓴᕋᒥᒡᓗ ᐊᐱᕐᓱᕋᒥᒡᓗ ᖃᐅᔨᓕᕐᐳᑦ ᒋᑎᐅᓂ ᔪᐊᓯᐅᑉ ᐃᕐᓂᖓ ᑍᒤᓕᐅᕐᑐᕕᓂᐅᓂᖓᓂᒃ. 30ᔪᐊᓯᒧᓪᓗ ᐅᖃᕐᐳᑦ, “ᐃᕐᓃᑦ ᐊᓂᑎᓚᐅᕈᒃ ᑐᖁᓐᓂᐊᕋᑦᑎᒍᑦ! ᓱᒃᑯᑎᕐᓂᕐᒪᒍ ᐰᓕᒧᑦ ᑐᓂᕐᕈᓯᕐᕕᒃ ᓴᓂᐊᓃᑦᑐᕐᓗ ᓇᓗᓁᒃᑯᑕᖅ ᐊᓯᕋᒧᑦ ᓇᑲᓐᓂᕐᒪᒍ.”
31ᔪᐊᓯᐅᓪᓕ ᐅᐸᒃᑎᓂ ᐅᖃᐅᑎᕔᑦ, “ᐱᑦᔪᑦᔨᒐᓱᐊᕐᐱᓰ ᐰᓕᒥᒃ? ᓴᐳᑦᔨᓇᓱᐊᕐᐱᓯᓗ ᑖᑦᓱᒥᖓ? ᐱᑦᔪᑦᔨᒐᓱᐊᕐᑐᖅ ᑖᑦᓱᒥᖓ ᑐᖁᑕᐅᓂᐊᕐᐳᖅ ᐅᓪᓛᓐᖑᓚᐅᕐᑎᓐᓇᒍ. ᐰᓕ ᒎᑎᐅᒍᓂ, ᐃᒻᒥᓂᒃ ᓴᐳᑎᓕᕐᓕ, ᑖᑦᓱᒪ ᑐᓂᕐᕈᓯᕐᕕᖓ ᐅᕐᕈᑎᑕᐅᓯᒪᖕᒪᑦ.” 32ᑕᕝᕙᓐᖓᑦ ᐱᒋᐊᕐᓗᒍ ᒋᑎᐅᓂ ᑍᔭᐅᓕᕐᐳᖅ ᔨᕈᐸᐅᓪᒥᒃ, ᐃᒫᒃ ᑐᑭᓕᒃ, “ᐰᓕ ᐅᓇᑕᖃᑎᒋᓕᕐᓕᐅᒃ, ᑐᓂᕐᕈᓯᕐᕕᖓᓂᒃ ᐅᕐᕉᕋᕐᑎᑦᓯᓚᐅᕐᒪᑦ.”
33ᒥᑎᐊᓂᒥᐅᓕᒫᑦ, ᐊᒪᓕᑬᑎᓪᓗ, ᓯᕿᓂᐅᓪᓗ ᓇᓛᓂᒥᐅᑦ ᑲᑎᓕᕐᐳᑦ, ᔪᐊᕐᑕᓂᐅᓪᓗ ᑰᖓ ᐃᑳᕐᓗᒍ, ᑕᖕᒫᕐᐳᑦ ᔨᔭᕆᐅᓪ ᓇᕐᓴᖓᓄᑦ. 34ᐊᑕᓂᐅᓪᓗ ᐊᓂᕐᓂᖓᑕ ᒋᑎᐅᓂ ᐊᐅᓚᓕᕐᐹ, ᑎᑦᑐᓚᐅᑎᒥᒡᓗ ᓂᓪᓕᕐᑎᑦᓯᓪᓗᓂ, ᐊᐰᔨᕅᑏᑦ ᑭᖑᕚᖑᖃᑎᓂ ᕾᖁᕔᑦ ᒪᓕᖁᓪᓗᒋᑦ. 35ᑎᓕᓯᓪᓗᓂᓗ ᐅᖃᕆᐊᕐᑐᕐᑐᓂᒃ ᒫᓇᓯᐅᑉ ᑭᖑᕚᖏᑕ ᓄᓇᖁᑎᓕᒫᖓᓄᑦ; ᕾᖁᓪᓗᒋᑦ ᒪᓕᖁᒋᕔᑦ, ᑎᓕᓯᒋᕗᕐᓗ ᐅᖃᕆᐊᕐᑐᕐᑐᓂᒃ ᐋᓱᕆᐅᑉ ᑭᖑᕚᖏᓐᓄᑦ, ᓯᐳᓗᓂᐅᓪᓗ ᑭᖑᕚᖏᓐᓄᑦ, ᓈᑉᑕᓕᐅᓪᓗ ᑭᖑᕚᖏᓐᓄᑦ, ᑖᒃᑯᐊᑦᑕᐅᖅ ᕾᕗᑦ ᐃᓚᓕᐅᑎᓪᓗᑎᒃ.
36ᒋᑎᐅᓂᓕ ᐅᖃᕐᐳᖅ ᒎᑎᒧᑦ, “ᐃᓴᕆᐊᓕᓂᒃ ᓴᐳᑦᔨᓂᐊᕈᕕᑦ ᐊᑐᕐᓗᖓ ᐅᖃᐅᓰᑦ ᒪᓕᒡᓗᒍ. 37ᑕᑯᒋᑦ, ᓰᐱᐅᑉ ᒥᖅᑯᖓᓂᒃ ᓇᑎᕐᓇᒧᑦ ᐃᓕᓯᓂᐊᕐᐳᖓ, ᓂᐊᖂᔭᒃᓮᑦ ᓄᕗᖏᓐᓂᒃ; ᓰᐱᐅᑉ ᒥᖅᑯᖓ ᖃᐅᓯᕐᑐᑑᓂᐊᕐᐸᑦ, ᓄᓇ ᐸᓂᕐᑎᓪᓗᒍ ᖃᐅᔨᓂᐊᕐᐳᖓ ᐊᑐᕐᓂᐊᕋᕕᖓ ᓴᐳᑦᔨᖁᓪᓗᖓ ᐃᓴᕆᐊᓕᓂᒃ, ᐅᖃᐅᓰᑦ ᒪᓕᒡᓗᒍ.” 38ᐊᓱᐃᓛᒃ ᑍᒤᓚᐅᕐᐳᖅ, ᒋᑎᐅᓂ ᐅᓪᓛᒻᒪᕆᒃᑯ ᑐᐸᒐᒥ, ᓰᐱᐅᑉ ᒥᖅᑯᖓ ᓯᕝᕗᕐᓗᒍ ᐴᒍᑕᖅ ᐃᒥᕐᒥᒃ ᑕᑕᑉᐹ. 39ᒋᑎᐅᓂ ᐅᖃᓕᕆᕗᖅ ᒎᑎᒧᑦ, “ᓂᓐᖓᒡᕕᒋᑦᑍᓕᓐᖓ ᓱᓕ ᐊᑕᐅᓯᐊᕐᓗᖓ ᐅᖃᒃᑲᓐᓂᕐᓚᖓ; ᕿᓄᔪᖓ ᐊᑕᐅᓯᕐᒥᒃ ᓱᓕ ᐆᒃᑐᕋᒃᑲᓐᓂᕐᓚᖓ ᓰᐱᐅᑉ ᒥᖅᑯᖓᓂᒃ. ᑕᒪᑐᒪᓂ ᓰᐱᐅᑉ ᒥᖅᑯᖓ ᐸᓂᕐᑐᑑᓚᐅᕐᓕ ᓄᓇ ᖃᐅᓯᕐᑎᓪᓗᒍ.” 40ᒎᑎ ᑍᒤᓕᐅᓚᐅᕐᐳᖅ ᐅᓐᓄᐊᒥ ᑍᑦᓱᒪᓂ ᓰᐱᐅᑉ ᒥᖅᑯᖓ ᐸᓂᕐᑐᑑᓚᐅᕐᐳᖅ ᓄᓇ ᖃᐅᓯᕐᑎᓪᓗᒍ.
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 6: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
