ᐂᓮᐊᓯᐅᑉ ᐊᒡᓚᖏᑦ 54
54
ᐊᑕᓂᐅᑉ ᐃᓴᕆᐊᓕᒥᐅᓂᒃ ᓇᒡᓕᒍᓱᖕᓂᖓ
1 #
ᒐᓔᑎ 4:27. “ᐃᓐᖏᓕᕆᑦ ᕿᑐᕐᖏᓱᐃᑦᑑᒐᕕᑦ, ᕿᑐᕐᖓᕐᑖᓚᐅᕐᓯᒪᖏᑦᑐᑎᑦ ᐃᓐᖏᕐᓯᓗᑎᑦ ᕾᒐᓛᓕᕆᑦ ᖁᕕᐊᓱᖕᓂᕐᒧᑦ, ᐃᕐᓂᓱᖕᓂᐅᑉ ᐋᓐᓂᐊᓇᕐᓂᖓᓂᒃ ᖃᐅᔨᓚᐅᕐᓯᒪᖏᑦᑐᑎᑦ! ᕿᑐᕐᖏᓱᐃᑦᑐᖅ ᑭᖑᕚᖃᕐᓂᕐᓴᐅᓂᐊᕐᒪᑦ ᐅᐃᓕᖕᒥᑦ,” ᐊᑕᓂᖅ ᐅᖃᕐᐳᖅ. 2“ᑐᐲᑦ ᓂᕈᑦᑐᕆᐊᓕᕈᒃ, ᑐᐱᕐᐱᑦ ᓴᓂᕋᖏᑦ ᐅᖓᕙᕆᐊᓕᒃᑭᒃ; ᐱᐅᕐᓱᐊᖏᓪᓗᑎᑦ ᑐᐱᒃᓴᒥᒃ, ᓄᖃᕈᑎᑎᓪᓗ ᑕᑭᓕᒋᐊᕐᓗᒋᑦ ᐸᐅᒍᐊᖏᓪᓗ ᐊᑦᑕᕐᓁᓕᒋᐊᕐᓗᒋᑦ. 3ᐱᕕᑦᑐᕆᐊᕆᐊᖃᕐᓂᐊᕋᕕᐅᒃ ᓴᐅᒥᒧᑦ ᑕᓕᕐᐱᒧᓪᓗ, ᑭᖑᕚᒃᓴᑎᑦ ᐃᓅᖃᑎᒌᒡᔪᐊᓂᒃ ᓄᓁᕈᑦᔨᔪᒫᕐᒪᑕ ᐃᒡᓗᒐᓴᒡᔪᐊᖃᕐᕕᕕᓂᖏᓐᓂᓗ ᐃᓄᖃᔪᐃᑦᑑᓕᕐᑐᓂᒃ ᐃᒡᓗᒐᓴᒃᑖᕐᑐᕐᓗᓯ. 4ᑲᑉᐱᐊᓱᒃᑍᓕᒋᑦᓯ, ᑲᓐᖑᓇᕐᑐᒧᐊᕐᑎᑕᐅᓂᐊᓐᖏᓚᓯ; ᓇᓗᓕᕐᑎᑕᐅᓂᐊᓐᖏᓚᓯᓗ, ᑲᓐᖑᓱᒃᑎᑕᐅᓂᐊᕋᓯᓗ; ᐅᕕᒐᕐᑑᓂᑦᓯᓐᓄᑦ ᑲᓐᖑᓇᕐᑐᒦᓐᓂᕆᕙᓚᐅᕐᑕᓯ ᐳᐃᒍᕈᒫᕐᐸᓯ; ᐅᐃᒡᒐᕐᓂᐅᓂᑦᓯᓐᓄᑦ ᓇᕐᕈᓇᕈᑎᒋᓚᐅᕐᑕᓯ ᐃᖅᑲᐅᒪᔪᓐᓁᕈᒫᕐᐸᓯ. 5ᐱᓐᖑᕐᑎᑦᑎᔨᓯ ᐅᐃᒋᒐᑦᓯᐅᒃ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓂᒃ ᐊᑎᖃᕐᑐᖅ; ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᑦ ᐃᒻᒥᓄᑦ ᐅᑎᕐᑎᑦᓯᔨᒋᒐᑦᓯᐅᒃ, ᓄᓇᕐᔪᐊᕐᒥᐅᓕᒫᑦ ᒎᑎᖓᓂᒃ ᑍᔭᐅᔪᖅ. 6ᐊᑕᓂᐅᑉ ᐅᑎᖁᓪᓗᓯ ᐃᒻᒥᓄᑦ ᕾᖁᓚᐅᕐᐹᓯ ᐊᕐᓇᑐᑦ ᐊᕕᑕᐅᓯᒪᓪᓗᓂ ᐊᓂᕐᓂᕐᒥᒍᑦ ᐅᖁᒤᒃᓴᕐᑐᑎᑐᑦ, ᐅᕕᒐᕐᑑᓪᓗᓂ ᓄᓕᐊᕐᑖᕆᔭᐅᓚᐅᕐᑐᑎᑐᑦ ᐊᕕᑕᐅᑐᐃᓐᓇᕐᓯᒪᔪᑐᑦ, ᑍᒫᒃ ᒎᑎᓯ ᐅᖃᕐᐳᖅ. 7ᓯᕐᓛᐱᒃ ᕿᒪᑬᓐᓇᓚᐅᕐᐸᑦᓯ, ᑭᓯᐊᓂᓕ ᓇᒡᓕᒋᓗᐊᕋᑦᓯ ᐅᑎᕐᑎᓐᓂᐊᕐᐸᑦᓯ ᐅᕙᓐᓄᑦ. 8ᓂᓐᖓᓗᐊᕐᓂᑯᒧᑦ ᐊᑯᓂᐅᖏᑦᑐᖅ ᑮᓇᕋ ᐃᓕᑦᓯᓐᓂᑦ ᐊᓚᓚᐅᕋᒃᑯ; ᓇᒡᓕᖕᓂᓐᓄᓪᓕ ᓱᖁᓯᔪᐃᑦᑐᒧᑦ ᐱᑦᓯᐊᕐᕕᒋᓂᐊᕐᐸᑦᓯ, ᑍᒫᒃ ᐊᑕᓂᖅ ᐅᖃᕐᐳᖅ, ᑖᓐᓇ ᐃᒻᒥᓄᑦ ᐅᑎᕐᑎᑦᓯᔨᓯ. 9#ᒨᓯᓯ ᓯᕗᓪᓖᑦ 9:8-17.ᑕᒪᓐᓇ ᐊᑦᔨᖃᕐᑎᑉᐸᕋ ᓄᐊ ᐃᓅᑎᓪᓗᒍ ᐱᓚᐅᕐᑐᒥᒃ; ᐅᖃᕕᒃᓗᖓ ᐅᖃᓚᐅᕋᒪ ᓄᐊ ᐃᓅᑎᓪᓗᒍ ᓄᓇᕐᔪᐊᓕᒫᖅ ᐅᓕᕕᒡᔪᐊᒧᑦ ᑎᑭᑕᐅᒃᑲᓐᓂᖁᓇᒍ, ᒫᓐᓇᑦᑕᐅᖅ ᐅᖃᕕᒃᓗᖓ ᐅᖃᕐᐳᖓ ᓂᓐᖓᒡᕕᒋᓂᐊᕈᓐᓃᕐᐸᑦᓯ ᓱᐊᖕᓂᐊᕈᓐᓃᕐᓗᓯᓗ. 10ᖃᖅᑳᓗᐃᑦ ᐱᑕᖃᕈᓐᓃᕈᒫᕐᐳᑦ ᐱᖑᐃᓪᓗ ᐲᔭᕐᑕᐅᔪᒫᕐᓗᑎᒃ, ᓇᒡᓕᒍᓱᖕᓂᕋᓕ ᓱᖁᓯᔪᐃᑦᑐᖅ ᐃᓕᑦᓯᓐᓂᒃ ᕿᒤᓂᐊᓐᖏᓚᖅ, ᓮᒻᒪᕐᑎᑦᓯᓂᕋᓗ ᐊᖏᖃᑎᒌᒍᑎᒐ ᐲᕐᑕᐅᓂᐊᖏᓐᓂᕗᖅ, ᐊᑕᓂᖅ ᐅᖃᕐᐳᖅ, ᐃᓕᑦᓯᓐᓂᒃ ᓇᒡᓕᒍᓱᒃᑐᖅ. 11#ᑕᑯᑎ 21:18-21.ᐋᓐᓂᐊᑎᑕᐅᔪᓯ, ᐊᖅᑯᓇᕐᒧᓪᓗ ᐃᒋᑕᐅᖃᑦᑕᕐᑐᓯ, ᐃᑲᔪᕐᑕᐅᓇᓯᓗ, ᑕᑯᒋᑦ, ᐃᓕᐅᕋᕐᓂᐊᕐᐸᑦᓯ ᐅᔭᖅᑲᓄᑦ ᐱᐅᔪᓄᑦ, ᑐᓐᖓᕕᓕᐅᕐᓗᓯᓗ ᐅᔭᕋᖕᓄᑦ ᑕᑯᒥᓇᕐᑐᕐᔪᐊᓄᑦ. 12ᐊᕙᓗᕐᔪᐊᑦᓯᓗ ᓄᕗᕈᓯᖏᑦ ᐅᔭᖅᑭᕐᑐᕐᓗᒋᑦ ᑕᕐᓴᖃᐅᕐᑐᓂᒃ, ᐃᑎᕐᑕᕐᕕᓯᓗ ᐅᔭᕋᒃᑕᖃᐅᕐᓗᑎᒃ ᕿᓪᓕᕐᑐᓂᒃ ᐊᑦᔨᒌᖏᑦᑐᓂᒃ, ᐊᕙᓗᕐᔪᐊᑦᓯᓗ ᐊᑭᓐᓇᖏᑦ ᐃᓕᐅᕅᕕᒋᓗᒋᑦ ᐅᔭᕋᖕᓂᒃ ᐊᑭᑐᔪᕐᔪᐊᓂᒃ. 13#ᔪᐊᓇᓯ 6:45.ᐃᕐᓂᓕᒫᓯᓗ ᐊᔪᕆᕐᑐᐊᖑᔪᒫᕐᐳᑦ ᐊᑕᓂᕐᒧᑦ, ᐊᔪᕐᓴᖏᑦᑐᕐᔪᐊᖑᔪᒫᕐᓗᑎᒡᓗ ᕿᑐᕐᖓᓯ. 14ᓇᓛᒎᕐᓂᕐᒥᒃ ᐱᐅᓯᕐᑖᕈᒫᕐᐳᓯ; ᐅᖁᒤᒃᓴᕐᑎᑕᐅᔪᒫᓐᖏᓚᓯ ᑲᑉᐱᐊᒋᔭᒃᓴᖃᖏᓪᓗᓯᓗ; ᑲᑉᐱᐊᓇᕐᑐᑦ ᐃᓕᑦᓯᓐᓄᑦ ᑎᑭᐅᑎᔪᓐᓇᕈᒫᖏᒻᒪᑕ. 15ᐱᒋᐊᕐᑕᐅᒐᓗᐊᕈᑦᓯ ᐅᓇᑕᕐᓂᕐᒧᑦ, ᐱᒋᐊᕐᑕᐅᓂᓯ ᐅᕙᓐᓂᑦ ᐱᔪᒫᓐᖏᓚᑦ; ᐃᓕᑦᓯᓐᓂᒃ ᐱᒋᐊᕋᓱᒃᑐᑦ ᐅᕐᕈᖃᑦᑕᕈᒫᕐᐳᑦ ᐃᓕᑦᓯ ᐱᑦᔪᑎᒋᓗᓯ. 16ᑕᑯᒋᑦ, ᐅᕙᖓ ᓴᕕᕋᔭᓕᕆᔨᒥᒃ ᓴᓇᓚᐅᕐᐳᖓ ᐊᐅᒪᓂᒃ ᐃᑯᒪᔪᓂᒃ ᓱᐴᕈᓐᓇᕐᑐᒥᒃ, ᓴᓇᓪᓗᓂᓗ ᓴᓇᕐᕈᑎᒥᓄᑦ; ᐱᓇᓱᐊᕐᑕᖓᓄᑦ ᓈᒻᒪᒃᑐᓂᒃ, ᐅᕙᖓᑦᑕᐅᖅ ᓴᖅᑭᑎᑦᓯᓚᐅᕆᕗᖓ ᑐᖁᑦᓯᓇᓱᐊᕐᑐᒥᒃ ᓄᖑᑎᕆᖁᓪᓗᒍ. 17ᐅᓇᑕᐅᑏᑦ ᐃᓕᑦᓯᓐᓄᑦ ᐊᑐᕐᑕᐅᓇᓱᒃᑐᑦ ᐊᑑᑎᖃᕈᒫᓐᖏᓚᑦ, ᐅᖃᐅᓯᒃᓮᕈᑎᔪᒫᕐᐸᓯ ᐅᖃᓕᒫᑦ ᐃᓕᑦᓯᓐᓂᒃ ᐊᑭᕋᕐᑐᕋᓱᒃᑐᑦ ᐃᖅᑲᕐᑐᐃᕕᖕᓂ, ᑕᒪᓐᓇ ᑕᕝᕙ ᐊᑕᓂᐅᑉ ᐱᔨᖏᑕ ᐱᒋᔪᒫᕐᑕᖓᑦ ᓴᐳᑦᔭᐅᓂᕆᔪᒫᕐᑕᖓᓪᓗ ᐅᕙᓐᓂᑦ, ᐊᑕᓂᖅ ᐅᖃᕐᐳᖅ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 54: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
