ᐂᓮᐊᓯᐅᑉ ᐊᒡᓚᖏᑦ 51
51
ᑐᓐᖓᓇᕐᑐᓂᒃ ᔨᕉᓴᓕᒥᐅᑦ ᐅᖃᐅᑦᔪᕐᑕᐅᓂᖓᑦ
1“ᓈᓚᒃᓯᓐᖓ, ᐃᓕᑦᓯ ᓇᓛᒎᕐᓂᕐᒥᒃ ᒪᓕᒃᑐᓯ, ᐊᑕᓂᕐᒥᒡᓗ ᕿᓂᕐᑐᓯ; ᕾᕐᑐᖅ ᐃᓚᓐᖔᔭᐅᕕᒋᓯᒪᔭᓯ ᓵᕝᕕᒋᓯᐅᒃ, ᐃᑎᕐᓴᓕᐅᕐᓯᒪᔪᕐᓗ ᑕᑯᓗᒍ ᐅᔭᕋᖕᓂᐊᕐᕕᐅᔪᑎᑐᑦ ᐲᕐᓯᕕᐅᕕᒋᓚᐅᕐᑕᓯ. 2ᐂᑉᕋᕼᐋᒻ ᓯᕗᓕᕕᓂᓯ ᐃᖅᑲᕐᓯᐅᒃ, ᓵᕋᓗ ᐊᓂᕕᒋᓯᒪᔭᓯ; ᐂᑉᕋᕼᐋᒻ ᐊᑕᐅᓯᑐᐊᖑᑎᓪᓗᒍ ᕾᖁᓚᐅᕐᐸᕋ, ᓮᒻᒪᕐᑎᓪᓗᒍᓗ ᐃᓄᒋᐊᒃᓯᑎᓚᐅᕐᐸᕋ. 3ᐊᑕᓂᐅᑉ ᓮᒻᒪᕐᓴᕈᒫᕐᐹ ᓮᐅᓂ, ᓯᖁᑦᑎᕐᑕᐅᓯᒪᓂᖏᓪᓗ ᐋᖅᑭᒃᓗᒋᑦ, ᓄᓇᖁᑎᖓ ᓱᓇᖃᕈᓐᓁᓚᐅᕐᑐᖅ ᐱᕈᕐᓰᕕᒃᑐᑦ ᐄᑕᓂᑎᑐᑦ ᑍᒤᑎᑦᓱᒫᕐᐹ, ᓄᓇᖓᑕᓗ ᐃᓚᖓ ᓯᐅᕅᓐᓇᖅ ᐊᑕᓂᐅᑉ ᐱᕈᕐᓰᕕᖁᑎᖓᓄᑦ ᐊᑦᔨᐅᓕᕐᑎᑦᓱᒫᕐᓗᒍ, ᑕᕝᕙᓂ ᖁᕕᐊᓱᖕᓂᖃᕈᒫᕐᐳᑦ ᐊᓕᐊᓁᒍᓱᒡᓗᑎᒡᓗ, ᖁᔭᓕᔪᒫᕐᐳᑦ ᓂᕐᑐᐃᓗᑎᒡᓗ ᐃᓐᖏᕈᒫᕐᐳᑦ. 4ᐃᓄᖁᑎᒃᑲ, ᓈᓚᓚᐅᕐᓯᓐᖓ; ᑐᓴᕐᓗᖓᓗ ᐃᓅᖃᑎᒌᒡᔪᐊᖁᑎᒃᑲ, ᐱᖁᔭᒃᑲ ᐅᕙᓐᓂᑦ ᐊᓂᔪᒫᕐᐳᑦ, ᐊᑦᔨᒌᒃᑎᑦᓯᓂᓐᓄᓪᓗ ᐃᓄᐃᑦ ᖃᐅᒪᒃᓴᕐᑕᐅᔪᒫᕐᓗᑎᒃ. 5ᓇᓛᒎᕐᓂᕋ ᖃᓂᑉᐳᖅ, ᐱᐅᓕᒃᓯᓂᕋᓗ ᑎᑭᓕᕐᐳᖅ, ᐱᔪᓐᓇᕐᓂᓐᓄᑦ ᐃᓄᐃᑦ ᐊᐅᓚᑦᓱᒫᕐᐸᒃᑲ; ᐃᒪᐅᑉ ᑭᒡᓕᖓᓃᑦᑐᑦ ᐅᕙᓐᓂᒃ ᐅᑕᖅᑭᔪᒫᕐᐳᑦ, ᐊᖓᔪᖅᑲᐅᓂᓐᓂᒃ ᑕᑎᖃᕐᓗᑎᒃ. 6ᕿᓚᖕᒧᑦ ᑕᑯᓴᓕᕆᑦᓯ, ᐊᒻᒧᓪᓗ ᕿᕕᐊᕐᓗᓯ ᓄᓇᒧᑦ; ᕿᓔᑦ ᐳᔪᕐᑐᑦ ᐊᓯᐅᔪᒫᕐᐳᑦ, ᓄᓇᕐᔪᐊᕐᓗ ᐱᑐᖃᓐᖑᕈᒫᕐᐳᖅ ᐊᓐᓄᕌᑐᑦ, ᐃᓄᖏᓪᓗ ᐊᓇᓐᖏᕐᑎᑐᑦ ᑐᖁᕋᕈᒫᕐᐳᑦ; ᐱᐅᓕᒃᓯᓂᕋᓕ ᐃᓱᖃᖏᑦᑐᒧᑦ ᐃᓕᖓᕗᖅ, ᓇᓛᒎᕐᓂᕋᓗ ᓄᖑᑎᑕᐅᔪᒫᓐᖏᓚᖅ. 7ᓈᓚᒃᓯᓐᖓ ᓇᓛᒎᕐᓂᕐᒥᒃ ᖃᐅᔨᒪᔪᓯ, ᐱᖁᔭᓐᓂᒡᓗ ᐆᒻᒪᒻᒥᐅᑕᖃᕐᑐᓯ; ᓯᕗᕋᑦᑍᓕᒋᑦᓯ ᐸᓯᒃᓯᕐᑐᓂᒃ, ᕿᒃᓵᒍᑎᖃᕐᓂᐊᕋᓯᓗ ᒥᑕᐅᑎᖃᕐᑐᓂᒃ. 8ᖁᐱᕐᕈᓄᑦ ᖃᓪᓗᓈᕐᑕᓂᒃ ᓂᕆᓲᓄᑦ ᓂᕆᔭᐅᔪᒫᕐᒪᑕ, ᖁᐱᕐᕈᓄᓪᓗ ᓄᕕᕐᓵᒃᓴᓂᒃ ᓂᕆᓲᓄᑦ ᓂᖃᐅᓗᑎᒃ; ᓴᐳᑦᔨᓂᕋᓕ ᐃᓱᖃᖏᑦᑐᒧᑦ ᓱᕐᕋᖕᓂᐊᓐᖏᓚᖅ, ᐱᐅᓕᒃᓯᓂᕋᓗ ᑭᖑᕚᖑᖃᑎᒌᓕᒫᓄᑦ. 9ᑐᐸᓕᕆᑦ, ᑐᐸᓕᕆᑦ, ᐊᓐᓄᕌᕐᓗᑎᓪᓗ ᐱᔪᓐᓇᕐᓂᕐᒥᒃ, ᐊᑕᓂᐅᑉ ᐱᔪᓐᓇᕐᓂᖓᓂᒃ; ᑐᐸᓕᕆᑦ, ᑍᑦᓱᒪᓂᐊᓗᒃᑎᑐᑦ, ᕅᕼᐊᐱᒥᒃ ᐊᒡᒍᐃᓚᐅᕐᓯᒪᓐᖏᓚᑏᑦ, ᐆᒪᔪᕐᔪᐊᒥᒡᓗ ᖁᒡᓗᒋᐊᖑᔮᕐᑐᒥᒃ ᑲᐱᓯᓚᐅᓐᖏᓚᑏᑦ? 10ᐃᕝᕕᓂᓐᓈ ᐃᒪᕐᔪᐊᖅ ᐃᒤᕈᑎᑎᓚᐅᕐᐱᐅᒃ? ᐃᒪᕐᐱᒃ ᐃᑎᔪᖅ; ᐊᖅᑯᑎᓕᐅᕐᓗᑎᑦ ᐃᒪᕐᔪᐊᒃᑯᑦ, ᓂᐅᕕᐊᖑᓪᓗᑎᒃ ᐅᑎᕐᑎᑕᐅᓯᒪᔪᑦ ᐊᖅᑯᑎᖃᕐᓗᑎᒃ ᐃᑳᕈᓐᓇᕐᓯᖁᓪᓗᒋᑦ. 11ᐊᑕᓂᐅᑉ ᐊᑭᓕᕐᓗᒋᑦ ᐱᑖᕆᒃᑲᓐᓂᕐᓯᒪᔭᖏᑦ ᐅᑎᕈᒫᕐᐳᑦ, ᓮᐅᓂᒧᑦ ᐃᑎᓕᕈᒫᕐᐳᑦ ᐃᓐᖏᕐᓗᑎᒃ; ᐃᓱᖃᖏᑦᑐᒧᑦ ᖁᕕᐊᓱᖕᓂᕐᔪᐊᖃᕈᒫᕐᐳᑦ, ᐊᓕᐊᓁᒍᓱᒡᓗᑎᒃ ᖁᕕᐊᓱᖕᓂᐊᓗᖕᒧᑦ, ᕿᒃᓵᖕᓂᖅ ᐊᓂᕐᓴᐅᒥᓂᕐᓗ ᕿᒫᔪᒫᕐᐴᒃ. 12ᐅᕙᖓ, ᑖᓐᓇᐅᕗᖓ ᓮᒻᒪᕐᑎᑦᓯᔪᖅ ᐃᓕᑦᓯᓐᓂᒃ; ᓱᖕᒪᑦ ᓯᕘᕋᕕᑦ ᐃᓄᖕᒥᒃ ᑐᖁᕙᒃᑐᒥᒃ, ᐃᓅᑉ ᐃᕐᓂᖓᓂᒃ ᐃᕕᒃᓱᒐᕐᑎᑐᑦ ᑍᒤᑦᑐᒥᒃ, 13ᐳᐃᒍᕐᓯᒪᓪᓗᑎᑦ ᐊᑕᓂᕐᒥᒃ, ᐃᓕᖕᓂᒃ ᓴᓇᓚᐅᕐᑐᒥᒃ, ᕿᓚᖕᒦᑦᑐᓂᒃ ᐃᓯᕕᑦᓯᓯᒪᔪᖅ ᓄᓇᕐᔪᐊᕐᒥᒡᓗ ᐃᓂᒋᔭᒃᓴᖓᓄᑦ ᐃᓕᓯᓯᒪᔪᖅ, ᓯᕘᕋᖃᑦᑕᕐᐲᑦ ᐅᓪᓗᖅ ᓈᓗᒍ ᐊᑭᕋᕐᑐᕐᑎᕕᑦ ᓂᓐᖓᐅᒪᓂᖓᓂᒃ, ᑐᖁᑦᓯᔪᒪᑎᓪᓗᒍ? ᐊᑭᕋᕐᑐᕐᑎᕖᑦ ᑲᑉᐱᐊᓇᕐᓂᖓ ᓇᓃᒻᒪᑦ? 14ᐊᐅᓪᓚᕈᑦᔭᐅᓯᒪᔪᑦ ᐊᓂᑎᑕᐅᕕᒃᓴᖓᑦ ᖃᒡᓕᕗᖅ; ᑐᖁᓂᐊᓐᖏᓚᑦ ᐃᑎᕐᓴᒧᓪᓗ ᐃᓕᔭᐅᓂᐊᓐᖏᓚᑦ, ᓂᕿᒃᓮᕈᑎᓂᐊᕋᑎᒡᓗ. 15ᐅᕙᖓᐅᕗᖅ ᐊᑕᓂᖅ ᒎᑎᓯ, ᐃᒪᕐᔪᐊᓂᒃ ᒪᓪᓕᕐᑎᑦᓯᔪᓐᓇᕐᑐᖅ ᐃᒃᑑᓕᔮᕐᑎᓪᓗᒋᓪᓗ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓂᒃ ᐊᑎᖃᕐᐳᖅ. 16ᐅᖃᐅᓯᒃᑲ ᐃᓕᕙᒃᑲ ᖃᓂᕐᓄᑦ; ᐃᔨᕐᓯᒪᓪᓗᓯᓗ ᐊᒡᒐᖕᒪ ᑕᕐᕋᖓᓄᑦ, ᕿᓚᖕᓂᒃ ᐃᓯᕕᑦᓯᖁᓪᓗᖓ, ᓄᓇᕐᔪᐊᕐᒥᒡᓗ ᐃᓂᒋᓂᐊᕐᑕᖓᓄᑦ ᐃᓕᓯᖁᓪᓗᖓ, ᓮᐅᓂᒧᓪᓗ ᐅᖃᕐᓗᖓ, ‘ᐃᓄᖁᑎᒋᕙᑦᓯ.’”
ᔨᕉᓴᓕᒥᐅᑦ ᐋᓐᓂᐊᑎᑕᐅᓂᖓᑦᑕ ᐃᓱᓕᓐᓂᖓ
17 #
ᑕᑯᑎ 14:10; 16:19. ᑐᐸᓕᕆᑦ, ᑐᐸᓕᕆᑦ! ᒪᑭᓪᓗᑎᓪᓗ ᔨᕉᓴᓕᒻ. ᐃᓕᑦᓯ ᐃᒥᓚᐅᕐᑐᓯ ᐊᑕᓂᐅᑉ ᐊᑭᓂᐊᕐᓂᖓᑕ ᐃᒥᐅᑎᖓᓂᑦ ᓂᓐᖓᐅᒪᓂᖓᓂᒃ ᐃᒪᓕᖕᒥᒃ. ᐃᒤᕐᓗᒍ ᓄᖑᓚᐅᕐᐸᓯ ᐃᓗᓕᖁᑎᐅᑉ ᐃᒪᖓ ᐋᖓᔮᕈᑎᒋᓕᕐᓗᒍᓗ. 18ᑕᓯᐅᕐᑎᒃᓴᖃᓐᖏᓚᖅ ᕿᑐᕐᖓᖃᐅᕋᓗᐊᕋᒥ ᐅᓄᕐᑐᓂᒃ; ᓱᓕ ᐊᒡᒐᖏᑎᒍᑦ ᑎᒍᔭᐅᓗᓂ ᑕᓯᐅᕐᑎᒃᓴᖃᓐᖏᓚᖅ, ᐃᕐᓂᓂ ᐅᓄᕐᑐᑦ ᐱᕈᐃᓚᐅᕋᓗᐊᕋᒥᒋᑦ. 19ᑖᒃᑯᐊ ᒪᕐᕈᐃᑦ ᐃᓕᖕᓄᑦ ᑎᑭᐅᑎᓯᒪᕘᒃ; ᑭᐊᓕ ᕿᒃᓵᖃᑎᒋᓂᐊᕐᐹᑎᑦ? ᓄᖑᕈᑦᔭᐅᓯᒪᒐᕕᑦ ᐃᒡᓗᒐᓴᒡᔪᐊᓪᓗ ᓯᖁᑦᑎᕐᑕᐅᓪᓗᑎᒃ, ᑳᖕᓇᕐᑐᕐᔪᐊᖃᓕᕐᐳᑦ, ᐅᓇᑕᕐᓃᓪᓗ; ᑭᓇᒧᓕ ᓮᒻᒪᕐᓴᕐᑕᐅᓂᐊᓕᕐᐲ? 20ᐃᕐᓂᑎᑦ ᓄᑮᕈᑎᓯᒪᕗᑦ, ᓇᓚᓪᓗᑎᒡᓗ ᐊᖅᑯᑏᑦ ᓴᖑᒋᐊᕐᕕᖏᓐᓂ, ᑐᒃᑐᖓᔪᑎᑐᑦ ᓄᓗᐊᕐᑎᑕᐅᓯᒪᔪᑎᑐᑦ; ᑖᒃᑯᐊ ᐊᑕᓂᐅᑉ ᓂᓐᖓᐅᒪᓂᖓᓄᑦ ᐊᒃᑐᐊᔭᐅᕗᑦ, ᒎᑎᑦᓯᓗ ᐃᓂᕐᑎᕆᓂᖓᓄᑦ. 21ᑍᒤᒻᒪᑦ ᑐᓴᓕᕆᑦᓯ ᐆᒥᖓ, ᐅᖁᒤᒃᓴᕐᓇᕐᑐᒦᑦᑐᓯ, ᐋᖓᔮᑐᓯᓗ ᕔᓂᒨᖏᑦᑐᖅ. 22ᐊᑕᓂᓯ ᐃᒫᒃ ᐅᖃᕐᐳᖅ, ᑖᓐᓇ ᐊᑕᓂᖅ ᒎᑎᓯ, ᓯᕐᓈᕐᑐᖅ ᐃᓄᖁᑎᒥᓂᒃ: “ᑕᑯᒋᑦᓯ ᐃᒥᐅᑦ ᐅᕐᕈᔮᕈᑎᒋᓚᐅᕐᑕᓯ ᐲᕐᐸᕋ ᐊᒡᒐᑦᓯᓐᓂᑦ, ᐃᒥᐅᑦ ᐃᒪᖃᓚᐅᕐᑐᖅ ᓂᓐᖓᐅᒪᓂᓐᓂᒃ, ᑕᕝᕙᓐᖓᑦ ᐃᒥᒃᑲᓐᓂᕐᓂᐊᕈᓐᓃᕐᐳᓯ. 23ᐃᓕᑦᓯᓐᓂᒡᓗ ᐋᓐᓂᐊᑎᑦᓯᔪᓄᑦ ᐃᓕᖔᕐᓂᐊᓕᕐᐸᕋ, ᑍᒃᑯᐊ ᐃᓕᑦᓯᓐᓄᑦ ᐅᖃᕐᒪᑕ, ‘ᐅᕐᕈᖓᓚᐅᕆᑦᓯ ᖄᑦᓯᒍᑦ ᐱᓱᖕᓂᐊᕋᑦᑕ.’ ᑐᓄᓯᓗ ᓄᓇᑐᑦ ᑍᒤᑎᓚᐅᕐᐸᓯ, ᐊᖅᑯᑎᑎᑐᑦ ᐱᓱᒃᕕᐅᖃᑦᑕᕐᓗᑎᒃ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 51: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
