ᐂᓮᐊᓯᐅᑉ ᐊᒡᓚᖏᑦ 33
33
ᑐᒃᓯᐊᕐᓂᖅ ᐃᑲᔪᕐᑕᐅᔪᒪᓂᕐᒧᑦ
1ᑲᑉᐱᐊᓐᓇᒦᒃ ᐊᓯᕈᐃᔨᐅᔪᑎᑦ, ᐃᕝᕕᑦ ᓇᖕᒥᓂᖅ ᐊᓯᕈᕐᑕᐅᓯᒪᖏᒃᑲᓗᐊᕐᑐᑎᑦ; ᐃᕝᕕᑦ ᐃᕐᓯᓇᕈᒪᔪᑎᑦ, ᑭᓇᒧᓪᓘᓐᓃᑦ ᑲᑉᐱᐊᓱᒃᑎᑕᐅᓚᐅᕐᓯᒪᓇᑎᑦ! ᐊᓯᕈᐃᖃᑦᑕᕈᓐᓃᕈᕕᑦ ᐊᓯᕈᕐᑕᐅᔪᒫᕐᐳᑎᑦ; ᐃᕐᓯᓵᕆᖃᑦᑕᕈᓐᓃᕋᓗᐊᕈᕕᑦ; ᐃᕐᓯᓵᕐᑕᐅᓕᕈᒫᕐᐳᑎᑦ. 2ᐊᑕᓃᖅ ᓈᒃᑭᒋᑎᒍᑦ; ᐃᓕᖕᓂᒃ ᓂᕆᐅᒡᕕᖃᕋᑦᑕ, ᐅᓪᓛᑕᒫᑦ ᓴᐳᑎᓯᒪᓚᐅᕐᑎᒍᑦ ᐱᐅᓕᓗᑕᓗ ᖃᓄᐃᓐᓇᕐᑐᓂᑦ. 3ᐃᒃᑐᓚᐅᕐᓂᖅ#33:3 ᐃᒃᑐᓚᐅᕐᓂᖅ ᐅᕝᕙᓗ ᐃᒃᑐᐊᕙᓪᓚᖕᓂᖅ ᑐᓴᕐᓴᕈᑐᐊᕐᒪᑦ ᐃᓄᐃᑦ ᕿᒫᕙᒃᐳᑦ; ᒪᑭᓕᑐᐊᕋᕕᓪᓗ, ᐃᓅᖃᑎᒌᒡᔪᐊᑦ ᐊᕙᒻᒧᑦ ᓯᐊᒻᒪᒃᐸᒃᐳᑦ. 4ᐱᖁᑎᖏᓪᓗ ᐸᕐᓚᔭᐅᓪᓗᑎᒃ ᑎᒎᖅᑲᕐᑕᐅᕙᒃᐳᑦ ᖁᐱᕐᕈᑎᑐᑦ ᑲᑎᕐᓱᐃᔪᑎᑐᑦ; ᐱᒡᓕᕐᑕᐅᔭᑎᑐᓪᓗ ᐊᕙᒻᒧᑭᑕᒃᑐᑎᑐᑦ, ᑍᒫᒃ ᐊᕙᒻᒧᒃᑎᑦᓱᒫᕐᐸᑎᑦ. 5ᐊᑕᓂᖅ ᐊᖏᔪᕈᕐᑎᑕᐅᕗᖅ, ᖁᑦᓯᒃᑐᒥ ᐃᓂᖃᕐᒪᑦ; ᓮᐅᓂ ᑕᑕᑎᑦᓱᒫᕐᐹ ᐊᑦᔨᒌᒃᑎᑦᓯᓂᕐᒥᒃ ᓇᓛᒎᑦᓯᐊᕐᓂᕐᒥᒡᓗ. 6ᐊᑕᓂᖅ ᐊᐅᓚᑕᐅᔪᓐᓇᖏᑦᑐᒥᒃ ᑐᓐᖓᕕᒃᓴᐅᓂᐊᕐᐳᖅ ᐊᑐᕐᑕᑦᓯᓐᓂ. ᐊᔪᕐᓴᕐᑎᑦᓯᓂᐊᓐᖏᓚᖅ ᐱᐅᓕᔭᐅᓂᕐᒥᒃ ᓯᓚᑐᓂᕐᒥᒡᓗ ᖃᐅᔨᒪᓂᕐᒥᒡᓗ. ᐊᑕᓂᕐᒥᒃ ᓯᕘᕋᒋᔭᖃᕐᓂᖅ ᑕᒪᒃᑯᓂᖓ ᐊᔪᕐᓴᖏᑦᔪᑎᐅᓂᐊᕐᐳᖅ. 7ᐃᓛᒃ ᓯᕘᕋᒋᔭᖃᖏᑦᑐᖁᑎᖏᑦ ᐃᑲᔪᕐᑕᐅᔪᒪᓪᓗᑎᒃ ᕿᓄᕗᑦ ᓯᓚᑖᓂ, ᐃᓅᖃᑎᒌᑦᓯᐊᓕᕈᑎᒃᓴᒥᒃ ᐱᓇᓱᐊᕆᐊᕐᑐᕐᑎᑕᐅᓯᒪᔪᑦ ᕿᐊᕐᔪᐊᓕᕈᒫᕐᐳᑦ. 8ᐊᖅᑯᑎᓪᓚᕆᐅᕙᓚᐅᕐᑐᑦ ᐊᑐᕐᑕᐅᔪᓐᓁᕐᐳᑦ, ᐃᖏᕐᕋᖃᑦᑕᓚᐅᕐᑑᒐᓗᐊᑦ ᓄᖅᑲᖓᓕᕐᒪᑕ. ᐊᖏᖃᑎᒌᒍᑎᕕᓃᑦ ᓯᖁᒥᑕᐅᕙᓕᕐᐳᑦ, ᐊᖏᖃᑎᒌᒍᑎᓕᐅᕐᑐᕕᓃᓪᓗ ᓇᕐᕈᒋᔭᐅᓕᕐᐳᑦ, ᐃᓄᐃᑦ ᐅᐱᒋᔭᐅᓂᖃᕈᓐᓃᕐᒪᑕ. 9ᓄᓇ ᕿᒃᓵᓕᕐᐳᖅ ᓴᓐᖐᓕᓪᓗᓂᓗ; ᓕᐸᓇᓂᐅᑉ ᓇᐹᕐᑐᒐᓴᒃᔪᐊᖏᑦ ᓇᓗᓕᕐᓂᕐᒧᑦ ᑐᖁᓕᕗᑦ; ᓵᕋᓂᐅᑉ ᓇᑎᕐᓇᖓ ᓱᓇᖃᔪᐃᑦᑐᑎᑐᑦ ᑍᒤᓕᕐᐳᖅ; ᐹᓴᓂᒥ ᑳᕐᒥᐅᓪᒥᓗ ᓇᐹᕐᑐᐃᑦ ᐅᖃᐅᔭᖏᑦ ᑲᑕᒐᕐᓯᒪᓕᕐᐳᑦ.
ᐊᑕᓂᐅᑉ ᐊᑭᕋᕐᑐᕐᑎᒥᓂᒃ ᓯᕘᕋᓵᕆᓂᖓ
10ᐊᑕᓂᖅ ᐅᖃᕐᐳᖅ, “ᒫᓐᓇ ᒪᑭᓐᓂᐊᓕᕐᐳᖓ, ᐅᕙᓐᓂᒃ ᖃᐅᔨᔭᐅᑎᓪᓗᖓ, ᒫᓐᓇ ᐊᖏᔪᕈᕐᑎᑕᐅᖁᓪᓗᖓ. 11ᓴᓂᕐᓂᒃ ᐱᕈᕐᑎᑦᓯᕗᓯ, ᐱᕈᕐᑎᑕᓯᓗ ᓁᑦᑑᑕᐅᓪᓗᑎᒃ; ᐊᓂᕐᓵᕐᓂᓯ ᐃᑯᒪᐅᕗᖅ ᐃᓕᑦᓯᓐᓂᒃ ᓄᖒᑦᓯᔪᒫᕐᑐᖅ. 12ᐃᓄᐃᑦ ᕿᔪᒃᑎᑐᑦ ᐃᑯᒪᒧᑦ ᐊᕐᔭᓕᓂᓐᖑᕐᓯᒪᔪᑎᑐᑦ ᑍᒤᑦᓱᒫᕐᐳᑦ, ᑲᑭᓪᓚᐅᑎᓕᒃᑎᑐᑦ ᓇᑲᑎᕐᑕᐅᓗᑎᒃ ᐃᑯᐊᓪᓚᒃᑎᑕᐅᔪᑎᑐᑦ. 13ᑐᓴᕆᑦᓯ, ᐅᖓᓯᒃᑐᒥᐅᖑᔪᓯ ᐱᓇᓱᐊᕐᕆᓚᐅᕐᑕᓐᓂᒃ; ᐃᓕᑦᓯᓗ ᖃᓂᑦᑐᒥᐅᖑᔪᓯ ᐱᔪᓐᓇᕐᓂᕐᔪᐊᓐᓂᒃ ᓇᓗᓁᕐᓯᓕᕆᑦᓯ.”
14ᐊᔪᕐᑐᓕᔪᑦ ᓮᐅᓂᒦᑦᑐᑦ ᑲᑉᐱᐊᓱᓕᕐᐳᑦ; ᒎᑎᖃᖏᑦᑐᓪᓗ ᓴᔪᓕᕐᓗᑎᒃ; ᓇᓕᕐᐳᑦ ᐃᓅᔪᓐᓇᕐᐹ ᐃᑯᐊᓚᔪᒥ ᓄᖒᑦᓯᔪᒥ? ᓇᓕᕐᐳᓪᓗ ᐃᓂᖃᕈᓐᓇᕐᐹ ᐃᓱᖃᖏᑦᑐᒧᑦ ᐃᑯᐊᓚᔪᒥ? 15ᓇᓪᓕᐊᑦ ᓇᓛᒎᕐᑐᒥᒃ ᐃᓅᓯᖃᕐᑐᖅ ᓱᓕᔪᓂᒃ ᐅᖃᐅᓯᖃᕐᐳᖅ, ᐆᒥᓱᒡᓗᓂᓗ ᓵᓚᓯᐊᖃᕐᓂᒃᑯᑦ ᐱᕙᓪᓕᐅᑎᖃᕋᓱᐊᕐᑐᓂᒃ, ᐅᐃᕕᕆᒃᓯᓂᒃᑯᑦ ᐱᓯᒪᔪᓂᒃ ᓱᓇᒥᒃ ᑎᒍᓯᔪᒪᓐᖏᓚᖅ, ᑐᖁᑦᓯᓂᕐᒥᒡᓗ ᑐᓴᕈᒪᓐᖏᓚᖅ ᐊᔪᕐᑐᓕᓂᕐᒥᒃ ᑕᑯᔪᒪᖏᓐᓇᒥ: 16ᑍᒤᑦᑐᖅ ᐃᓂᖃᕐᓂᐊᕐᐳᖅ ᖁᕝᕙᓯᒃᑐᒥ; ᕿᒫᕕᒃᓴᖃᕐᓂᐊᕐᐳᖅ ᐅᔭᖅᑲᓂᒃ ᐊᕙᓗᓕᐅᕐᓯᒪᔪᓂ; ᓂᕿᒃᓴᖃᕐᑎᑕᐅᓂᐊᕐᐳᖅ, ᐃᒥᒃᓴᖃᕐᑎᑕᐅᓗᓂᓗ ᑲᔪᓯᑦᓯᐊᕐᑐᒥᒃ.
ᓯᕗᓂᒃᓴᖃᕐᓂᖅ ᖁᕕᐊᓇᕐᑐᒥᒃ
17ᐃᔨᑦᓯᓐᓄᑦ ᑕᑯᔪᒫᕐᐳᓯ ᐊᖓᔪᖅᑳᕐᔪᐊᑉ ᐃᓂᖁᓇᕐᓂᕐᔪᐊᖓᓂᒃ; ᑕᑯᓗᑎᓪᓗ ᓄᓇᒥᒃ ᐅᖓᓯᒃᑐᒧᑦ ᑕᑯᒃᓴᐅᓇᕐᑐᒥᒃ. 18ᐃᖅᑲᐅᒪᔪᒫᕐᐳᓯᓗ ᑲᑉᐱᐊᓱᖕᓂᐅᓚᐅᕐᑐᓂᒃ, “ᓇᐅᒡᓕ ᑎᑎᕋᕐᐸᓚᐅᕐᑐᑦ? ᓇᐅᒡᓕ ᑖᒃᓰᔭᕐᑎᑦᓯᔨᐅᕙᓚᐅᕐᑐᑦ? ᓇᐅᒡᓕ ᐃᒡᓗᒐᓴᒡᔪᐊᑦ ᐊᕙᓗᖏᑕ ᖃᐅᔨᓴᕐᕕᖏᓐᓂ ᓈᓮᕙᓚᐅᕐᑐᑦ?” 19ᐃᓄᖕᓂᒃ ᓵᓚᓯᐊᖃᕐᑐᓂᒃ ᑕᑯᔪᓐᓃᕈᒫᕐᐳᓯ, ᑐᑭᓯᐊᓐᖏᑕᑦᓯᓐᓂᒡᓗ ᐅᖃᐅᓯᖃᕐᑐᓂᒃ ᑕᑯᔪᓐᓃᕈᒫᕐᐳᓯ, ᐃᒃᑐᕆᒃᑐᓂᒡᓗ#33:19 ᐃᒃᑐᕆᒃᑐᓂᒡᓗ ᐅᖃᕈᓐᓁᓪᓕᖅᑲᓲᓂᒡᓗ ᐅᖃᐅᓯᖃᕐᑐᑦ ᑐᑭᓯᔪᓐᓇᓐᖏᑕᑦᓯᓐᓂᒃ. 20ᓮᐅᓂ ᑕᑯᓐᓈᓕᕐᓯᐅᒃ, ᓇᓪᓕᐅᓐᓂᕐᓯᐅᕕᖕᓂ ᓂᕆᕕᒡᔪᐊᕐᕕᐅᕙᒃᑐᖅ! ᐃᔨᑦᓯᓐᓄᑦ ᑕᑯᔪᒫᕐᐸᓯ ᔨᕉᓴᓕᒻ ᓂᐰᑦᑐᒥᒃ ᐃᓂᓪᓚᖓᑦᓯᐊᕐᓇᓕᕐᑐᖅ, ᑐᐱᕐᓗ ᓅᓚᐅᕐᓯᒪᔪᓐᓃᕐᑐᖅ ᐃᓂᒥᓂᑦ, ᐊᒃᓱᓈᖏᑕᓗ ᐸᐅᒍᐊᖏᑦ ᐊᒧᓚᐅᕐᓯᒪᖏᑦᑐᑦ, ᓄᑦᓲᑎᖏᓪᓗ ᕿᒃᑐᕋᓚᐅᕐᓯᒪᖏᑦᑐᑦ. 21ᑕᕝᕙᓂ ᐊᑕᓂᐅᑉ ᐊᖓᔪᖅᑳᕐᔪᐊᖑᓂᖓᑕ ᐃᓚᒋᔪᒫᕐᐹᑎᒍᑦ, ᑰᖃᕐᑐᖅ ᓯᓕᒃᑐᓂᒃ ᐊᒥᓐᓂᕐᓴᓂᒡᓗ, ᐅᒥᐊᕐᔪᐊᑦ ᑎᖏᕐᕋᐅᑕᓖᑦ ᐃᐳᑎᖃᕐᑐᑦ ᑕᒪᐅᓈᕈᓐᓇᕈᒫᓐᖏᓚᑦ, ᐅᒥᐊᕐᔪᐊᓪᓗ ᐊᖏᓂᕐᓮᑦ ᑕᒪᐅᓈᕈᓐᓇᕈᒫᖏᓐᓂᕗᑦ. 22ᐊᑕᓂᖅ ᐃᖅᑲᕐᑐᐃᔨᒋᒐᑦᑎᒍ, ᐊᑕᓂᖅ ᐊᐅᓚᑦᓯᔨᒋᒐᑦᑎᒍ, ᐊᑕᓂᖅ ᐊᖓᔪᖅᑳᕐᔪᐊᕆᒐᑦᑎᒍ; ᑖᑦᓱᒪ ᐱᐅᓕᓂᐊᕐᐹᑎᒍᑦ. 23ᑎᖏᕐᕋᐅᑕᑦᓯ ᐊᒃᓱᓈᖏᑦ ᖃᓱᖓᓗᐊᕐᐳᑦ, ᓇᐸᕈᑕᓯᓗ ᐊᑦᓱᖏᕐᓯᒪᑦᓯᐊᕋᓂ, ᑎᖏᕐᕋᐅᑕᓯᓗ ᐃᓯᕕᑦᓯᐊᕈᓐᓇᕋᓂ, ᐅᓇᑕᕐᓂᒃᑯᑦ ᑎᒍᔭᐅᔪᑦ ᐱᖁᑎᑦ ᐊᒥᒐᕈᒫᓐᖏᓚᑦ, ᐱᓱᒍᓐᓇᖏᑦᑐᑦ ᐊᒡᓛᑦ ᑎᒍᓯᖃᑕᐅᔪᒫᕐᐳᑦ. 24ᑕᕝᕙᓂᒥᐅᑦ ᓇᓪᓕᐊᑦ ᐅᖃᕈᒫᓐᖏᓚᖅ, “ᐋᓐᓂᐊᒐᒪ,” ᐃᓄᐃᓪᓗ ᑕᕝᕙᓃᑦᑐᑦ ᐊᔪᕐᑐᓕᓂᖏᑦ ᐃᓱᒪᒋᔪᓐᓁᕐᑕᐅᔪᒫᕐᐳᑦ.
Currently Selected:
ᐂᓮᐊᓯᐅᑉ ᐊᒡᓚᖏᑦ 33: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
