ᐂᓮᐊᓯᐅᑉ ᐊᒡᓚᖏᑦ 31
31
ᒎᑎᐅᑉ ᔨᕉᓴᓕᒥᐅᓂᒃ ᓴᐳᑦᔨᓯᒪᔪᒫᕐᓂᖓ
1ᑲᑉᐱᐊᓇᕐᑐᒦᑉᐳᑦ ᐄᑦᔨᑉᑎᒥᐅᓄᑦ ᐂᔪᑦ ᐃᑲᔪᕐᑎᖃᕈᒪᓪᓗᑎᒃ, ᕿᒻᒥᕐᔪᐊᖏᓐᓂᒡᓗ ᑕᑎᖃᕋᓱᒃᑐᑦ, ᕿᒻᒥᕐᔪᐊᖏᑕᓗ ᐅᓂᐊᒐᖏᓐᓂᒃ ᐊᒃᓴᓗᐊᓕᖕᓂᒃ ᑕᑎᖃᕋᓱᒃᑐᑦ, ᑍᒤᑦᑐᖁᑎᖏᑦ ᐅᓄᕐᒪᑕ ᕿᒻᒥᕐᔪᐊᒥᓗ ᐃᑭᒪᔪᑦ ᐱᔪᓐᓇᕐᓂᖃᕐᒪᑕ, ᑕᑯᓐᓇᕋᓱᐊᕋᑎᒃ ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᓂᒃ ᐊᑕᓂᕐᒥᒡᓘᓐᓃᑦ ᐊᐱᕐᓱᕋᑎᒃ! 2ᑖᓐᓇ ᓯᓚᑐᖕᒪᑦ ᐊᓯᕈᕐᓇᕐᑐᒥᒡᓗ ᐱᑎᑦᓯᔪᓐᓇᕐᓗᓂ, ᐅᖃᐅᓯᕐᒥᓂᒃ ᐅᖅᑭᓐᓇᕐᑎᑦᓯᕙᖏᑦᑐᖅ, ᐱᐅᖏᑦᑐᒥᒃ ᐃᓕᖅᑯᓯᓕᖕᓂᒃ, ᐱᐅᖏᑦᑐᓕᔪᓂᒡᓗ ᐃᑲᔪᕐᑐᐃᕙᒃᑐᓂᒃ ᐊᑭᓂᐊᕐᕕᖃᕈᒫᕐᑐᖅ. 3ᐄᑦᔨᑉᑎᒥᐅᑦ ᐃᓄᑐᐃᓐᓇᐅᖕᒪᑕ, ᒎᑎᐅᓇᑎᒃ; ᕿᒻᒥᕐᔪᐊᖁᑎᖏᓪᓗ ᐆᒪᔪᑐᐃᓐᓇᐅᕗᑦ ᐊᓂᕐᓂᐅᓇᑎᒃ, ᐊᑕᓂᕐᓕ ᐱᔪᓐᓇᕐᓂᕐᒥᓄᑦ ᐱᒋᐊᕐᐸᑦ ᐃᑲᔪᕐᑐᕋᓱᐊᕐᑐᑦ ᐅᕐᕈᓂᐊᕐᐳᑦ, ᐃᑲᔪᕐᑕᐅᓇᓱᐊᕐᑐᓪᓗ ᐅᕐᕈᓂᐊᕆᕗᑦ; ᑕᒪᕐᒥᑦ ᓄᖑᑕᐅᓗᑎᒃ. 4ᐃᒫᒃ ᐊᑕᓂᐅᑉ ᐅᖃᕐᕕᒋᓚᐅᕐᐹᖓ, “ᓛᔭ ᐃᕐᓯᓵᕐᐸᑦ ᐅᕝᕙᓗ ᓛᔭ ᐃᓅᓱᒃᑐᖅ ᐃᕐᓯᓵᕐᐸᖕᒪᑦ ᐅᒋᐊᕐᑕᒥᓂᒃ ᓴᐳᓐᓂᐊᕐᓗᑎᒃ, ᓰᐱᓕᕆᔩᓪᓗ ᐅᓄᕐᑐᑦ ᕾᒐᓛᕋᓗᐊᕐᐸᑕ ᓂᐱᒥᖕᓄᑦ ᕿᒫᑎᑦᓯᓂᐊᓐᖏᓚᑦ ᑖᑦᓱᒥᖓ, ᑍᒫᒃᑕᐅᖅ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᑎᑭᓐᓂᐊᕆᕗᖅ ᓴᐳᓐᓂᐊᕆᐊᕐᑐᕐᓗᓂ ᓮᐅᓂᐅᑉ ᖃᖅᑲᖓᓂᒃ ᐱᖑᖏᓐᓂᒡᓗ. 5ᑎᖕᒥᐊᑎᑐᑦ ᓂᕕᐅᕐᓗᓂ ᐊᐅᕐᓵᕋᕐᑐᑎᑐᑦ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᓴᐳᓐᓂᐊᕐᓂᐊᕆᕗᖅ ᔨᕉᓴᓕᒥᐅᓂᒃ; ᓴᐳᓐᓂᐊᕐᓗᓂᒋᑦ ᐱᐅᓕᓂᐊᕐᐰᑦ, ᖁᓚᖏᐊᕐᓗᓂᒋᓪᓗ ᐊᓐᓇᒃᑎᓐᓂᐊᕐᐰᑦ. 6ᐅᑎᕐᕕᒋᓕᕐᓯᐅᒃ ᑖᑦᓱᒥᖓ ᐊᖏᔪᒥᒃ ᐊᑭᕋᕐᑐᓚᐅᕐᑐᓯ, ᐃᓕᑦᓯ ᐃᓴᕆᐊᓕᐅᑉ ᐃᓄᖏᑦ. 7ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐃᓄᓕᒫᑦ ᒎᑎᓐᖑᐊᕆᓚᐅᕐᑕᑎᒃ ᓯᐅᓪᕕᕇᑦ ᒎᓗᐃᓪᓗ ᐃᒋᑦᓱᒫᕐᐰᑦ, ᐊᒡᒐᒥᖕᓄᑦ ᓴᓇᓚᐅᕐᑕᑎᒃ ᐊᔪᕐᑐᓕᓂᒃᑯᑦ. 8ᐊᓯᕆᐊᒥᐅᑦ ᐊᓯᕈᕐᑕᐅᔪᒫᕐᐳᑦ ᐅᓇᑕᕐᓂᕐᔪᐊᕐᒧᑦ, ᐃᓄᒃᑎᒍᑦ ᐱᖏᑦᑐᒧᑦ; ᓴᕕᒡᔪᐊᒧᑦ ᐃᓄᖕᒥᑦ ᐱᖏᑦᑐᒧᑦ, ᓄᖑᑕᐅᔪᒫᕐᐳᑦ; ᓴᕕᒡᔪᐊᒥᑦ ᕿᒫᔪᒫᕐᐳᑦ, ᐅᕕᒐᕐᑐᖁᑎᖏᓪᓗ ᐊᒃᓱᕈᕐᑎᑕᐅᓗᑎᒃ ᐱᓇᓱᐊᕐᑎᒋᔭᐅᓕᕈᒫᕐᐳᑦ. 9ᐃᕐᓯᓂᕐᒧᑦ ᐊᖓᔪᖅᑳᕐᔪᐊᖏᑦ ᕿᒫᔪᒪᕐᐳᑦ ᑲᑉᐱᐊᓱᒡᓗᑎᒃ, ᐅᓇᑕᕐᑎᖁᑎᖏᑕᓗ ᐊᖓᔪᖅᑳᖏᑦ ᐃᕐᓯᓂᕐᒧᑦ ᐅᓇᑕᕐᑏᑦ ᓮᒻᒪᑎᖁᑎᖏᓐᓂᒃ ᕿᒤᓐᓁᔪᒫᕐᐳᑦ.” ᐊᑕᓂᖅ ᐅᖃᕐᐳᖅ, ᐃᑯᒪᖁᑎᖃᕐᑐᖅ ᓮᐅᓂᒥ, ᐃᑯᐊᓚᑦᓯᕕᖁᑎᖃᕐᓗᓂᓗ ᔨᕉᓴᓕᒥ.
Currently Selected:
ᐂᓮᐊᓯᐅᑉ ᐊᒡᓚᖏᑦ 31: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
