ᐂᓮᐊᓯᐅᑉ ᐊᒡᓚᖏᑦ 29
29
ᔨᕉᓴᓕᐅᑉ ᐊᓯᕈᕐᑕᐅᔪᒫᕐᓂᖓ
1ᑕᑯᒋᑦ ᐊᕅᐅᓪ, ᐊᕅᐅᓪ ᐃᒡᓗᒐᓴᒡᔪᐊᑦ ᑍᕕᑎᐅᑉ ᑕᖕᒫᕐᓯᒪᕕᒋᓚᐅᕐᑕᖏᑦ! ᐊᕐᕌᒍ ᐊᕐᕌᒍᒥᒃ ᐃᓚᒃᑲᓐᓂᕐᓕ; ᓇᓪᓕᐅᓐᓂᕐᓯᐅᕐᓂᖏᑦ ᐃᓱᓕᖁᓇᒋᑦ. 2ᐃᓱᐃᓪᓕᐅᕐᑎᑦᓴᕆᐊᖃᕐᐸᕋᓕ ᐊᕅᐅᓪ, ᑕᒪᓐᓇ ᓇᓪᓕᐅᑎᒃᐸᑦ ᕿᒃᓵᖕᓂᖃᕈᒫᕐᐳᖅ ᐅᒡᒍᐊᕐᓂᖃᕐᓗᓂᓗ, ᑕᒪᑐᒪᓕ ᑭᖑᓂᖓᒍᑦ ᐂᕆᐅᓪᓚᕆᐅᓕᕈᒫᕐᐳᖅ ᐅᕙᓐᓄᑦ. 3ᓯᓚᑎᑦᓯᓐᓂ ᑕᖕᒫᕐᓯᒪᔪᒫᕐᐳᖓ ᐊᕙᑕᖏᕐᓯᒪᓗᑎᑦ, ᐃᒡᓗᒐᓴᒡᔪᐊᓂᒃ ᓵᓚᖃᕋᓱᒃᑐᕐᓯᐅᑎᓂᒃ ᓴᓇᔪᒫᕐᐳᖓ ᐳᕐᑐᔪᓂᒡᓗ ᐃᒡᓗᓕᐅᕐᓗᖓ, ᐃᒡᓗᒐᓴᒡᔪᐊᓂᒃ ᓵᓚᖃᕋᓲᑎᓂᒃ ᓴᓇᔪᒪᕗᖓ ᐃᓕᖕᓂᒃ ᐊᑭᕋᕐᑐᕐᓗᖓ. 4ᓄᓇᕐᔪᐊᑉ ᐃᓗᐊᓂᑦ ᐃᑎᔪᒥᑦ ᓂᓪᓕᐊᓕᕈᒫᕐᐳᑎᑦ, ᓂᐱᑭᑦᑑᓗᑎᑦ ᐅᖃᐅᓯᕐᑎᑦ ᑐᓴᕐᓴᐅᔪᒫᕐᐳᑦ ᓄᓇᐅᑉ ᐃᓗᐊᓂᑦ ᐊᓂᕐᓂᑐᐃᓐᓇᐅᑉ ᓂᐱᖓᑐᑦ, ᓂᐲᑦ ᐃᓯᑦᔪᒃᑐᑎᑐᑦ ᓴᓂᕐᓂᑦ ᐱᔪᒫᕐᐳᖅ. 5ᐊᑭᕋᑎᑦ ᐅᓄᕐᑐᕐᔪᐊᑦ ᐳᔪᕐᓗᒃᑎᑐᑦ ᒥᑭᔫᑎᑐᑦ ᑍᒤᑦᓱᒫᕐᐳᑦ, ᐅᓄᕐᑐᕐᔪᐊᑦ ᓂᑲᒍᓱᖃᖏᑦᑐᑦ ᓂᐊᖂᔭᒃᓴᐅᑉ ᓴᓂᖓᑐᑦ ᑎᒃᑕᐅᔪᑐᑦ ᐊᑦᔨᖃᕈᒫᕐᐳᑦ, ᑕᕝᕙᓐᖓᑦᓮᓐᓇᖅ, ᑕᕝᕙᑦᓴᐅᑎᒋᓗ. 6ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᑎᑭᕝᕕᒋᔪᒫᕐᐹᓯ ᑲᓪᓕᕐᒧᑦ, ᓄᓇᐅᓪᓗ ᓴᔪᒃᐱᓗᖕᓂᖓᓄᑦ, ᓂᐱᖅᑯᕐᑐᔪᕐᔪᐊᒧᓪᓗ, ᐊᓄᕆᕐᔪᐊᒧᓪᓗ ᑬᕙᑦᑐᒧᑦ, ᐊᖅᑯᓇᕐᔪᐊᒧᓪᓗ, ᐃᑯᐊᓚᔪᕐᔪᐊᒧᓪᓗ ᓄᖒᑦᓯᔪᒧᑦ. 7ᐃᓅᖃᑎᒌᒡᔪᐊᓂᓪᓗ ᐊᑦᔨᒌᖏᑦᑐᓂᑦ ᐱᓯᒪᓪᓗᑎᒃ ᐅᓇᑕᕆᐊᓚᐅᕐᑐᑦ ᐃᒡᓗᒐᓴᒡᔪᐊᓂᒃ ᐊᕅᐅᓪᒥᒃ, ᒎᑎᐅᑉ ᑐᓂᕐᕈᓯᕐᕕᖁᑎᖓᓂᒃ ᐱᑕᖃᕐᑐᒥᒃ ᐅᓇᑕᐅᑎᖏᑦ ᐊᐅᓚᑦᔪᑎᓕᒫᖏᓪᓗ ᑕᕝᕔᓐᓇᖅ ᐱᑕᖃᓚᐅᕐᓯᒪᖏᑦᑐᑎᑐᑦ ᓄᖑᑕᐅᔪᒫᕐᐳᑦ ᓯᓐᓇᒃᑐᕐᑎᑐᑦ ᐅᓐᓄᐊᒥ ᐃᓱᒪᒋᔭᐅᑐᐃᓐᓇᕐᑐᕕᓂᕐᑎᑐᑦ. 8ᐊᑦᔨᖃᕈᒫᕐᐳᑦ ᐊᖑᒻᒥᒃ ᑳᒃᑐᒥᒃ ᓂᕆᓗᓂ ᓯᓐᓇᒃᑑᒪᔪᒥᒃ ᐃᖅᑯᒻᒪᕋᒥ ᓱᓕ ᑳᒡᓗᓂ ᐃᖅᑯᒻᒪᕐᑐᑐᑦ, ᐅᕝᕙᓘᓐᓃᑦ ᐃᒥᕈᖕᓂᕐᒧᑦ ᖀᓕᕐᑐᑎᑐᑦ ᓯᓐᓇᒃᑑᒪᔪᒥᒃ ᐃᒥᕐᓗᓂ ᐃᖅᑯᒻᒪᕐᐳᖅ ᐃᒡᒋᐊᖓ ᓱᓕ ᓴᓗᐊᖓᑎᓪᓗᒍ ᐃᒥᕈᖕᓂᕐᒧᑦ, ᑍᒤᑦᓱᒫᕐᐳᑦ ᐃᓅᖃᑎᒌᒡᔪᐊᑦ ᓇᑭᑐᐃᓐᓈᕐᓯᒪᔪᑦ ᖃᖅᑲᒥᒃ ᓮᐅᓂᒥᒃ ᐅᓇᑕᖃᑎᖃᕋᓱᐊᕐᑐᑦ.
ᐃᓂᕐᑎᕆᑦᔪᑕᐅᔪᑦ ᐃᓱᒪᒋᔭᐅᖏᓂᖏᑦ
9ᑕᑕᒥᓕᕆᑦᓯ ᑲᒪᓂᐊᕐᓗᓯᓗ, ᐃᓕᑦᓯᓐᓂᒃ ᑕᐅᑐᒍᓐᓃᕐᑎᓕᕆᑦᓯ ᑕᑯᔪᓐᓁᓪᓕᓗᓯᓗ! ᐋᖓᔮᕆᑦᓯ ᕔᓂᒨᖏᑦᑐᖅ ᐅᕐᕈᔮᕆᑦᓯ, ᕔᓂᒥᒃ ᐃᒥᕐᓂᕐᒨᖏᑦᑐᖅ. 10#ᕉᒪᒥᐅᓄᑦ 11:8.ᐊᑕᓂᐅᑉ ᐊᓂᕐᓂᕐᒥᒃ ᑯᕕᓯᕕᒋᖕᒪᓯ ᐃᑎᔪᒥᒃ ᓯᓂᒃᑎᑦᓯᔪᒥᒃ, ᐃᔨᓯᓗ ᐅᐃᑕᔪᓐᓁᓪᓕᑎᓪᓗᒋᑦ, ᒎᑎᐅᓪᓗ ᐱᔪᖃᓛᕐᑐᒥᒃ ᐅᖃᕐᑎᖏᑕ ᓂᐊᖁᓯ ᐅᓕᒃᐰᑦ, ᓯᕗᓂᒃᓴᒥᒃ ᓇᓚᐅᑦᑍᔩᑦ. 11ᑕᑯᑎᑕᐅᓂᖅ ᑕᒪᓐᓇ ᐃᓘᓐᓈᑦ ᐃᓕᑦᓯᓐᓄᑦ ᐱᑎᑕᐅᒐᓗᐊᕐᐳᖅ ᐃᓄᖕᒧᑦ ᐊᒡᓚᓂᒃ ᐊᑐᐊᕐᓯᔪᓐᓇᕐᑐᒧᑦ ᑐᓂᔭᐅᔪᑎᑐᑦ ᓇᕿᑦᔪᓯᕐᓯᒪᓪᓗᑎᒃ, ᐅᖃᐅᑎᓪᓗᒍᓗ, “ᐅᑯᐊ ᐊᑐᐊᒃᑭᑦ,” ᑖᓐᓇᓗ ᐅᖃᕐᐳᖅ, “ᐊᑐᐊᕈᓐᓇᓐᖏᓚᒃᑲ ᓇᕿᑦᔪᓯᕐᓯᒪᖕᒪᑕ.” 12ᑕᕝᕙ ᐊᒡᓔᑦ ᑐᓂᔭᐅᕗᑦ ᐊᑐᐊᕐᓯᔪᓐᓇᖏᑦᑐᒧᑦ, ᐅᖃᐅᑦᔭᐅᓗᓂ, “ᐅᑯᐊ ᐊᑐᐊᒃᑭᑦ.” ᐅᖃᕐᐳᖅ “ᐊᑐᐊᕐᓯᔪᓐᓇᓐᖏᓚᖓ.” 13#ᒫᑎᐅᓯ 15:8,9; ᒫᑯᓯ 7:6,7.ᑍᒤᒻᒪᑦ ᐊᑕᓂᖅ ᐅᖃᕐᐳᖅ, “ᐃᓄᐃᑦ ᐅᑯᐊ ᖃᓂᕐᒥᖕᓄᑦ ᖃᓂᑦᑑᓇᓱᐊᕐᐳᑦ ᐅᐱᒋᓪᓗᖓᓗ ᑲᓂᕐᒥᖕᓄᑦ, ᐆᒻᒪᑎᖏᑕᓕ ᐅᖓᓯᒋᕚᖓ, ᐅᕙᓐᓂᒡᓗ ᐃᓕᕋᓱᖕᓂᖏᑦ ᐃᓄᐃᑦ ᐱᖁᔨᓂᖏᓐᓂᒃ ᒪᓕᒡᓗᑎᒃ. 14#1 ᑯᕆᓐᑎ 1:19.ᑍᒤᒻᒪᑦ ᓱᓕ ᑲᒪᓇᕐᑐᓂᒃ ᐅᑯᐊ ᐃᓄᐃᑦ ᐱᓂᐊᕐᕕᒋᔪᒪᕙᒃᑲ, ᑕᑕᒥᓇᕐᑐᓂᒃ ᖁᐊᕐᓵᖓᓇᕐᑐᓂᒡᓗ; ᓯᓚᑐᔪᖁᑎᖏᓪᓗ ᐊᑐᕈᓐᓃᕈᒫᕐᐳᑦ, ᐃᓄᖏᑕᓗ ᓇᓗᓇᕐᑐᓂᒃ ᖃᐅᔨᔪᓐᓇᕐᓂᖏᑦ ᒪᑐᓯᒪᓕᕈᒫᕐᐳᖅ.”
ᓯᕗᓂᒃᓴᒥ ᓂᕆᐅᒋᔭᒃᓴᖃᕈᒫᕐᓂᖅ
15ᑲᑉᐱᐊᓐᓇᒦᒃ ᐃᑎᔪᒥᒃ ᐃᔨᕐᓯᒪᓇᓱᒃᑐᑦ ᐊᑕᓂᕐᒧᑦ ᐃᓱᒪᓕᐅᕈᑎᒋᔭᒥᖕᓂᒃ, ᐱᓂᐊᕐᓂᖏᑦ ᑖᕐᑐᒦᑦᑐᑦ; ᐅᖃᕐᓗᑎᒃ, “ᑭᐊ ᑕᑯᓐᓇᕐᐹᑎᒍᑦ? ᑭᐊᓗ ᖃᐅᔨᒪᕚᑎᒍᑦ?” 16#ᐂᓮᐊᓯ 45:9; ᕉᒪᒥᐅᓄᑦ 9:20.ᓱᓇᓕᒫᑦ ᒧᒥᒃᑎᑉᐰᑦ! ᐃᓗᓕᖁᑎᓂᒃ ᒪᕐᕋᓕᐅᕐᑎ ᐃᓗᓕᖁᑎᓕᐊᒃᓴᖅ ᒪᕐᕋᐅᑎᓪᓗᒍ ᑕᑯᓐᓇᕐᑕᐅᔪᓐᓇᕐᐹ? ᓴᓇᔭᐅᓯᒪᔪᖅ ᓴᓇᔨᒥᓄᑦ ᐅᖃᕈᓐᓇᕐᐹ? “ᑖᑦᓱᒪ ᓴᓇᓚᐅᓐᖏᓛᖓ”; ᐅᕝᕙᓗ ᑕᐅᑦᑐᓕᐅᕐᑕᐅᔪᖅ ᑕᐅᑦᑐᓕᐅᕐᑎᒥᓂᒃ ᐅᖃᐅᓯᖃᕈᓐᓇᕆᕚ? “ᐅᓇ ᑐᑭᓯᐅᒪᖏᑦᑐᖅ.” 17ᐱᔪᖃᓚᐅᖏᒃᑲᓗᐊᕐᑎᓪᓗᒍ, ᐊᑯᓂᐊᓘᖏᑦᑐᖅ ᓕᐸᓇᓂ ᐱᕈᕐᓰᕕᑦᓯᐊᑐᐃᓐᓇᐅᓕᕈᒫᕐᐳᖅ, ᐱᕈᕐᓰᕕᒃ ᓂᕿᒃᓴᓕᐅᕐᕕᒃ ᓇᐹᕐᑐᓕᒡᔪᐊᖑᔪᓐᓇᕐᐹ? 18ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᑐᓵᖏᑦᑐᖅ ᑐᓵᓕᕈᒫᕐᐳᖅ ᐊᒡᓔᑦ ᐅᖃᐅᓯᖏᓐᓂᒃ ᐅᖃᓕᒫᕐᑐᒥᒃ, ᑕᐅᑐᖏᑦᑐᕐᓗ ᑖᕐᓯᐅᕐᓗᓂ ᐃᓅᔪᖅ, ᑕᐅᑐᓕᕈᒫᕐᐳᖅ. 19ᒥᑭᒡᓕᑎᕐᓯᒪᔪᖅ ᖁᕕᐊᓇᕐᑐᒥᒃ ᓄᑖᒥᒃ ᐱᑎᑕᐅᔪᒫᕐᐳᖅ ᐊᑕᓂᕐᒥᒃ ᖁᕕᐊᓲᑎᖃᓕᕐᓗᓂ, ᐊᒃᓱᔪᓪᓗ ᐃᓄᐃᑦ ᐊᑯᕐᖓᓐᓂ ᖁᕕᐊᓲᑎᖃᓕᕈᒫᕐᐳᑦ ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᓐᓂᒃ. 20ᓂᑲᒍᓱᖃᖏᑦᑐᖅ ᓱᓇᐅᔪᓐᓃᕈᒫᕐᐳᖅ, ᒥᑕᐅᑎᒃᓴᕐᑎᓗ ᒥᑕᐅᑎᖃᕈᓃᕐᓗᓂ, ᐊᔪᕐᑐᓕᔪᒪᓪᓗᑎᒡᓗ ᐅᑕᖅᑭᔪᓕᒫᑦ ᐊᓯᕈᕐᑕᐅᔪᒫᕐᐳᑦ. 21ᓇᓪᓕᐊᑦ ᐅᖃᐅᓯᕐᒧᑦ ᐃᓄᖕᒥᒃ ᐸᓯᔭᒃᓴᓐᖑᕐᑎᑦᓯᔪᓐᓇᕐᐹ, ᐱᔭᐅᑦᔪᑎᒃᓴᖓᓂᒡᓗ ᐋᖅᑭᒃᓯᓗᓂ ᐃᑎᕐᑕᕐᕕᖕᒥ, ᐱᑦᔪᑎᒃᓴᖃᕋᓂᓗ ᐸᓯᔭᒃᓴᐅᑎᑦᓯᓗᓂ ᑕᒻᒪᓚᐅᖏᑦᑐᒥᒃ. 22ᑍᒤᒻᒪᑦ ᐊᑕᓂᖅ ᐅᖃᕐᐳᖅ, ᐱᐅᓕᒃᓯᓚᐅᕐᑐᖅ ᐂᑉᕋᕼᐋᒻᒥᒃ, ᔧᑰᑉ ᑭᖑᕚᖏᑦ ᐱᓪᓗᒋᑦ: “ᔧᑰᑉ ᑭᖑᕚᖏᑦ ᑲᓐᖑᓱᒃᑎᑕᐅᓂᐊᕈᓐᓃᕐᐳᑦ, ᑮᓇᖏᓪᓗ ᐊᐅᖃᕈᓐᓃᖃᑦᑕᕐᓂᐊᕈᓐᓃᕐᓗᑎᒃ ᑲᓐᖑᓱᖕᓂᕐᒧᑦ; 23ᑭᖑᕚᒥᖕᓂᒃ ᑕᑯᓕᕈᑎᒃ, ᐊᒡᒐᓐᓄᑦ ᓴᓇᓚᐅᕐᑕᓐᓂᒃ, ᐊᑯᓐᓂᕐᒥᖕᓂ ᐊᑎᕋ ᐃᑦᔪᕐᓁᑎᑦᓱᒫᕐᐹᑦ; ᔧᑰᑉ ᐃᑦᔪᕐᓁᑦᑐᖁᑎᖓ ᐃᑦᔪᕐᓁᑎᑦᓱᒫᕐᐹᑦ, ᑕᑕᒥᓐᓂᐊᕐᓗᑎᒡᓗ ᐃᓴᕆᐊᓕᒥᐅᑦ ᒎᑎᖓᓐᓂᒃ. 24ᐊᓂᕐᓂᕐᒥᒍᑦ ᓯᓔᑦᑑᒐᓗᐊᑦ ᑐᑭᓯᓂᖃᓕᕈᒫᕐᐳᑦ, ᓈᒻᒪᒃᓴᓐᖏᒐᔪᒃᑑᒐᓗᐊᓪᓗ ᐊᔪᕆᕐᑐᕐᑕᐅᓂᕐᒥᒃ ᖁᕕᐊᒋᔭᖃᓕᕐᓗᑎᒃ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 29: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
