ᐂᓮᐊᓯᐅᑉ ᐊᒡᓚᖏᑦ 26
26
ᒎᑎᐅᑉ ᐃᓄᖁᑎᒥᓂᒃ ᓵᓚᖃᕐᑎᑦᓯᔪᒫᕐᓂᖓ
1ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᔫᑕᒥᐅᑦ ᐃᓐᖏᕈᒫᕐᐳᑦ ᐱᓯᕐᒥᒃ ᐆᒥᖓ:
“ᐱᔪᓐᓇᑦᓯᐊᕐᑐᒥᒃ ᐃᒡᓗᒐᓴᒡᔪᐊᖃᕐᐳᒍᑦ;
ᒎᑎᐅᑉ ᓇᖕᒥᓂᖅ ᐱᐅᓕᔭᐅᕕᒃᓴᐅᑎᒻᒪᒋᑦ
ᐊᕙᓗᕐᔪᐊᖏᑦ ᓴᐴᓗᑕᖏᓪᓗ.
2ᐃᑎᕐᑕᕐᕕᒡᔪᐊᖏᑦ ᐅᒃᑯᐃᕐᑕᐅᓕᕐᓕᑦ
ᐃᓅᖃᑎᒌᒡᔪᐊᑦ ᓱᖁᓯᔪᐃᓪᓗᑎᒃ ᐃᓱᐊᕐᑐᑦ ᐃᑎᕐᑎᑕᐅᖁᓪᓗᒋᑦ.
3ᐊᑕᓃᖅ ᓮᒪᓇᕐᑐᒦᑦᓮᓐᓇᕐᑎᑦᓯᕗᑎᑦ,
ᓱᖁᓯᔪᐃᑦᑑᓪᓗᑎᒃ ᐃᓱᒪᖏᑦ ᐃᓕᖕᓃᑦᓮᓐᓇᕐᑐᓂᒃ,
ᐃᓕᖕᓂᒃ ᑕᑎᖃᕐᓂᕐᒥᖕᓄᑦ.
4ᐊᑕᓂᖅ ᑕᑎᒋᓯᐅᒃ ᐃᓱᖃᖏᑦᑐᒧᑦ,
ᑖᓐᓇ ᐊᑕᓂᖅ ᒎᑎᐅᖕᒪᑦ ᔭᕼᐊ!
ᐃᓱᖃᖏᑦᑐᒧᑦ ᐱᔪᓐᓇᐅᑎᒃᓴᖅ ᕾᕐᑑᔪᖅ.
5ᐱᐅᔪᕆᔪᑦ ᐊᒃᐸᓯᒃᑐᒥ ᐃᓂᑖᕐᑎᑉᐰᑦ,
ᐃᒡᓗᒐᓴᒡᔪᐊᑦ ᖁᕝᕙᓯᒃᑐᒦᑦᑐᑦ
ᐊᒃᐸᓯᒃᑐᒥ ᐃᓂᖃᓕᕐᑎᑉᐰᑦ, ᒪᓂᕋᐅᑉ ᐊᒃᐸᓯᖕᓂᖓᑐᑦ,
ᓴᓂᕐᑎᑐᑦ ᑍᒤᓕᕐᑎᓪᓗᒋᑦ.
6ᐅᖁᒤᒃᓴᕐᑎᓚᐅᕐᑕᖏᓐᓄᑦ ᑐᓪᓕᕋᕐᑕᐅᑎᑉᐰᑦ,
ᐊᒃᓱᔪᑦ ᐃᑎᒐᖏᓐᓄᑦ,
ᐊᔪᕐᓴᕐᑐᓄᑦ ᐱᓱᒡᕕᐅᑎᓪᓗᒋᑦ.”
7ᐃᓱᐊᕐᑐᑦ ᐊᖅᑯᑎᖏᑦ ᒪᓂᕋᕈᕐᑎᑉᐸᑎᑦ;
ᐃᓱᐊᕐᑐᑦ ᐱᓱᒡᕕᒃᓴᖏᑦ ᕾᕋᑦᑑᑎᑉᐸᑎᑦ.
8ᓱᓕᔪᒃᑯᑦ ᐃᖅᑲᕐᑐᐃᓂᕐᐱᑦ ᐊᖅᑯᑎᖓᒍᑦ,
ᐊᑕᓃᖅ ᐅᑕᖅᑭᕙᑦᑎᒋᑦ;
ᐊᑎᕐᓂᒡᓗ ᐃᖅᑲᐅᒪᓂᖅ ᑕᕐᓂᑦᑕ ᐱᔪᒪᔭᑐᐊᕆᕚ.
9ᑕᕐᓂᕋ ᐅᖓᕗᖅ ᐃᓕᖕᓄᑦ ᐅᓐᓄᐊᒃᑯᑦ,
ᐊᓂᕐᓂᕐᒪ ᐃᓗᓐᓃᑦᑑᑉ ᐃᓗᖏᕐᑐᕐᓗᓂ ᕿᓂᕐᐹᑎᑦ;
ᓄᓇᕐᔪᐊᕐᒥᐅᑦ ᐃᓄᖏᑦ ᐃᖅᑲᕐᑐᓕᕌᖓᕕᒋᑦ,
ᑕᕝᕙ ᐃᓕᓐᓂᐊᓕᕐᐸᒃᐳᑦ ᐃᓱᐊᕐᑐᓕᓂᕐᒥᒃ.
10ᐱᐅᖏᑦᑐᓕᔪᑦ ᐱᑦᓯᐊᕐᕕᒋᒐᓗᐊᕋᕕᒋᑦ, ᐃᓱᐊᕐᑐᒥᒃ ᐊᑐᓕᕆᐊᒃᓴᖅ ᐃᓕᑦᓯᔪᓐᓇᓐᖏᓚᑦ;
ᐃᓱᐊᕐᑐᓕᔪᑦ ᓄᓇᖓᓐᓂ ᐊᒡᓛᑦ ᐃᓱᐊᖏᑦᑐᓂᒃ ᓱᓕ ᐱᔪᖃᕐᐸᒃᐳᑦ,
ᐊᑕᓂᐅᑉ ᐊᖓᔪᖅᑳᕐᔪᐊᖑᓂᖓᓂᒃ ᐃᓕᑕᕐᓯᐅᒪᔪᒪᖏᓐᓇᒥᒃ.
11 #
ᐄᑉᕈᐃᓄᑦ 10:27. ᐊᑕᓃᖅ ᐊᒡᒐᑎᑦ ᐅᕐᓕᑐᕐᑐᑦ ᐃᓴᐅᑎᓯᒪᓕᕐᐸᑎᑦ,
ᓱᓕᓕ ᑕᒪᑐᒥᖓ ᖃᐅᔨᓐᖏᓚᑦ.
ᐃᓄᖁᑎᖕᓂᒃ ᓇᒡᓕᒍᓱᒃᑐᐊᓘᓂᕐᓂᒃ ᑕᑯᑎᓚᐅᒃᑭᑦ ᑲᓐᖑᓱᓕᖅᑯᓪᓗᒋᑦ.
ᐊᑭᕋᕐᑐᕐᑎᕕᑦ ᓂᓐᖓᐅᒪᓂᖏᑕ ᐃᑯᐊᓚᓂᖏᓐᓄᑦ ᓄᖑᑕᐅᑎᓚᐅᒃᑭᑦ.
12ᐊᑕᓃᖅ, ᓮᓕᓂᕐᒥᒃ ᐅᕙᑦᑎᓐᓂ ᐱᒋᐊᕐᑎᑦᓯᓚᐅᕐᒥᒋᑦ,
ᐱᓂᐊᕐᓂᕗᑦ ᑕᒪᕐᒥᒃ ᐊᔪᕐᓇᕈᓐᓃᕐᑎᓯᒪᒐᕕᒋᑦ.
13ᐊᑕᓃᖅ ᒎᑎᕗᑦ, ᐊᓯᖕᓄᑦ ᐊᐅᓚᑕᐅᖃᑦᑕᕐᓯᒪᕗᒍᑦ ᐊᑕᓂᐅᑎᔪᓄᑦ,
ᐊᑏᓪᓕ ᑭᓯᒥ ᑖᓐᓇᑐᐊᖅ ᐅᐱᒋᕙᕗᑦ.
14ᑐᖁᖓᓕᕋᒥᒃ ᐆᒻᒪᒃᑲᓐᓂᕐᓂᐊᕈᓐᓃᕐᐳᑦ;
ᐊᓂᕐᓂᐅᓕᕋᒥᒃ ᒪᑭᓐᓂᐊᓐᖏᓚᑦ; ᓱᒋᐊᕐᓯᓂᕐᓄᑦ ᐊᓯᕈᓚᐅᕋᕕᒋᑦ,
ᐃᖅᑲᕐᑕᐅᓂᐊᕈᓐᓃᕐᓗᑎᒡᓗ.
15ᐊᑕᓃᖅ, ᐃᓅᖃᑎᒌᒡᔪᐊᖑᓂᕗᑦ ᐱᕈᕐᑎᓯᒪᕙᑦ,
ᐃᓅᖃᑎᒌᒡᔪᐊᑦ ᐅᓄᕐᓯᑎᑉᐸᑎᑦ, ᑕᒪᓐᓇ ᐅᐱᒋᔭᐅᑦᔪᑎᒋᕙᑦ;
ᓄᓇᖁᑎᕗᓪᓗ ᐃᓚᕙᓪᓕᐊᑎᓪᓗᒋᑦ.
16ᐊᑕᓃᖅ, ᐅᖁᒤᒃᓴᓕᕌᖓᒥᒃ ᐃᓕᖕᓂᒃ ᕿᓂᓕᕐᐸᒃᐳᑦ,
ᐃᓗᖏᕐᑐᕐᓗᑎᒃ ᑐᒃᓯᐊᓕᖃᑦᑕᕐᒪᑕ,
ᐃᓕᖕᓄᑦ ᓱᒋᐊᕐᑕᐅᓕᕌᖓᒥᒃ.
17ᐊᕐᓇᐅᑉ ᐃᕐᓂᓱᒡᓗᓂ ᐋᓐᓂᐊᓂᕐᒧᑦ ᐃᓗᖏᕐᓱᕐᓂᕆᕙᒃᑕᖓᑐᑦ,
ᐊᐅᓚᔪᑐᑦ ᓂᓪᓕᐊᓪᓗᓂᓗ ᐋᓐᓂᐊᓂᕐᒥᓄᑦ,
ᐃᕐᓂᕕᒋᓂᐊᕐᑕᖓ ᓇᓪᓕᐅᑎᓕᕐᑎᓪᓗᒍ,
ᐃᓕᖕᓄᑦ ᑍᒤᑉᐸᒃᑭᕗᒍᑦ, ᐊᑕᓃᖅ.
18ᐃᕐᓂᓱᒃᑐᑎᑐᑦ ᐋᓐᓂᐊᓚᐅᕐᐳᒍᑦ ᓂᒪᒃᓗᑕᓗ,
ᓱᓇᒥᒡᓕ ᓴᖅᑭᑎᑦᓯᓚᐅᓐᖏᓚᒍᑦ,
ᓄᓇᑦᑕᓗ ᓵᓚᒃᓴᕈᑎᒃᓴᖓᓂᒃ ᓴᖅᑭᑦᑐᖃᓚᐅᓐᖏᓚᖅ,
ᐱᕚᓪᓕᕐᓇᕐᑐᒥᒡᓗ ᓴᖅᑭᑎᑦᓯᓚᐅᕐᓇᑕ.
19ᑐᖁᖓᔪᖁᑎᑎᑦ ᐆᒻᒪᒃᑲᓐᓂᕈᒫᕐᐳᑦ,
ᑎᒥᖏᑦ ᒪᑭᑦᓱᒫᕆᕗᑦ, ᑕᒪᕐᒥᒃ ᐃᓗᕕᕐᑕᐅᓯᒪᔪᑦ ᑐᐸᒍᒫᕐᐳᑦ.
ᑐᐸᒡᓗᑎᒃ ᐃᓐᖏᕈᒫᕐᐳᑦ ᖁᕕᐊᓱᖕᓂᕐᒧᑦ,
ᓲᕐᓗ ᐸᑐᒃ ᕿᓪᓕᒐᓛᒃᑎᑦᓯᕙᖕᒪᑦ ᓄᓇᒥᒃ ᖃᐅᓯᓕᕐᑎᑦᓯᓕᕌᖓᒥ
ᑍᒫᒃᑕᐅᖅ ᐊᑕᓂᐅᑉ ᐆᒻᒪᕐᑎᑦᓱᒫᕐᐰᑦ ᑐᖁᓚᐅᕐᑐᕕᓃᑦ.
ᒎᑎᐅᑉ ᐃᖅᑲᕐᑐᐃᓂᖓ ᐱᔪᓐᓇᕐᓯᑎᑦᓯᒃᑲᓐᓂᕐᓂᖓᓗ
20ᐃᒡᓗᑦᓯᓐᓄᑦ ᐃᑎᐅᖅᑲᓕᕆᑦᓯ, ᐃᓄᖁᑎᒃᑲ, ᐃᑎᕈᑦᓯ ᐅᒃᑯᐊᓯ ᐅᒃᑯᐊᕐᓗᒋᑦ; ᐃᔨᕐᓯᒪᑬᓐᓇᕆᑦᓯ ᒎᑎᐅᑉ ᓂᓐᖓᐅᒪᓂᖓ ᐊᓂᒍᕐᓯᐊᕆᓗᒍ. 21ᑕᑯᒋᑦ, ᐊᑕᓂᖅ ᐃᓂᒋᔭᒥᓂᑦ ᑎᑭᓐᓂᐊᕐᒪᑦ ᓄᓇᕐᔪᐊᕐᒥᐅᓂᒃ ᓱᒋᐊᕐᓯᔭᕐᑐᕐᓗᓂ ᐊᔪᕐᑐᓕᓂᖏᑦ ᐱᑦᔪᑎᒋᓗᒋᑦ, ᐃᔨᕋᕐᑐᕐᓗᑎᒃ ᐃᓄᐊᕐᓯᖃᑦᑕᕐᓃᑦ ᓄᓇᕐᔪᐊᕐᒥ ᓴᖅᑭᑎᑕᐅᔪᒫᕐᒪᑕ, ᐃᓄᐊᕐᑕᐅᖃᑦᑕᕐᑐᕕᓃᓪᓗ ᓄᓇᐅᑉ ᐃᔨᕐᓯᒪᓂᐊᕈᓐᓃᕐᐰᑦ.
Currently Selected:
ᐂᓮᐊᓯᐅᑉ ᐊᒡᓚᖏᑦ 26: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
