ᐂᓮᐊᓯᐅᑉ ᐊᒡᓚᖏᑦ 24
24
ᐊᑕᓂᐅᑉ ᓱᒋᐊᕐᓯᔪᒫᕐᓂᖓ ᓄᓇᕐᔪᐊᒥᒃ
1ᐊᑕᓂᐅᑉ ᐊᓯᕈᕐᑕᐅᑎᑦᓱᒫᕐᐹ ᓄᓇᕐᔪᐊᖅ ᑭᓱᐃᕈᑎᓗᓂᓗ, ᓄᓇᐅᑉ ᖄᖓ ᓯᖁᑦᑎᕐᐸᒍ ᐃᓄᖏᑦ ᓇᒧᑐᐃᓐᓇᖅ ᓯᐊᒻᒪᒍᒫᕐᐳᑦ. 2ᐃᓄᓕᒫᓪᓗ ᐊᑦᔨᒌᒃᑐᒥᒃ ᐃᓱᓕᑦᓱᒫᕐᐳᑦ, ᑐᓂᕐᕈᓯᕐᑎᑦᓯᔨᐅᒍᑎᒃ ᐃᓅᑐᐃᓐᓇᐅᒍᑎᒡᓘᓐᓃᑦ, ᓯᐊᓛᖑᒍᑎᒃ, ᐊᖓᔪᖅᑳᖑᒐᓗᐊᕈᑎᒡᓗ, ᓂᐅᕕᕐᑎᐅᒍᑎᒃ, ᓂᐅᕐᕈᓯᕐᑎᐅᒐᓗᐊᕈᑎᒡᓗ, ᐊᑐᕐᑎᑦᓯᔨᐅᒍᑎᒃ ᐊᑐᕐᑐᐊᕐᑎᐅᒐᓗᐊᕈᑎᒡᓘᓐᓃᑦ, ᐊᒃᓱᐃᑦᑑᒍᑎᒃ ᐊᒃᓱᔫᒐᓗᐊᕈᑎᒡᓘᓐᓃᑦ. 3ᓄᓇᕐᔪᐊᖅ ᓯᖁᑦᑎᕐᓯᒪᔪᒫᕐᐳᖅ ᐊᓯᕈᕐᑕᐅᓯᒪᓗᓂᓗ, ᐊᑕᓂᖅ ᐅᖃᕐᓯᒪᖕᒪᑦ ᑍᒫᒃ ᑭᓯᐊᓂᐅᔪᒫᕐᐳᖅ. 4ᓄᓇᕐᔪᐊᖅ ᐸᓂᕐᓂᕐᒧᑦ ᑐᖁᓕᔪᒫᕐᐳᖅ, ᓄᓇᕐᔪᐊᕐᒥᐅᓕᒫᑦ ᓄᑮᕈᑎᓕᕈᒫᕐᐳᑦ: ᓄᓇᓗ ᓯᓚᓗ ᑕᒪᕐᒥᒃ ᐱᐅᔪᓐᓃᕐᐸᓪᓕᐊᔪᒫᕐᐴᒃ. 5ᐃᓄᐃᑦ ᓄᓇᕐᔪᐊᕐᒥᒃ ᐱᐅᔪᓐᓃᕐᑎᑦᓯᓯᒪᖕᒪᑕ ᒎᑎᐅᑉ ᐱᖁᔭᖏᓐᓂᒃ ᓯᖁᒥᑦᓯᖃᑦᑕᕐᓂᕐᒧᑦ, ᐊᖏᖃᑎᒌᖕᓂᐅᓪᓗ ᒪᓕᒐᖏᓐᓂᒃ ᓯᖁᒥᑦᓯᖃᑦᑕᕐᓂᕐᒥᖕᓄᑦ ᐃᓱᖃᖏᑦᑐᒧᑦ ᑐᕌᖓᓚᐅᕐᑐᓂᒃ. 6ᑍᒤᒻᒪᑦ ᒎᑎᐅᑉ ᓄᓇᕐᔪᐊᖅ ᓇᕐᕈᓇᕐᓯᑎᓚᐅᕐᐹ, ᐃᓄᖏᑦ ᑍᒤᑕᐅᔪᒃᓴᓐᖑᕋᒥᒃ ᐸᓯᔭᒃᓴᐅᓕᕐᐳᑦ ᐃᓅᔪᑦ ᖃᑦᓰᓐᓇᓐᖑᕐᐸᓪᓕᐊᓕᕐᐳᑦ. 7ᐅᕐᐲᑦ ᕔᓂᒃᓴᓄᑦ ᐱᕈᕐᕕᐅᕙᒃᑐᑦ ᑐᖁᓕᕙᓪᓕᐊᓕᕐᐳᑦ, ᖁᕕᐊᓱᒃᐸᓚᐅᕐᑑᒐᓗᐊᑦ ᒫᓐᓇᓕ ᖁᕕᐊᓱᒍᓐᓁᓪᓕᕗᑦ. 8ᑐᓴᕐᓂᕐᑐᓂᒃ ᓂᓪᓕᐊᑎᑦᓯᔪᑦ ᑯᑭᑦᑕᐸᐅᑎᓄᑦ ᕿᓚᐅᑎᓄᓪᓗ ᑐᓴᕐᓇᕈᓐᓃᕐᐳᑦ. 9ᕔᓂᒥᒃ ᐃᒥᕐᓗᑎᒃ ᐃᓐᖏᕐᕙᓗᒃᑐᑦ ᖁᕕᐊᓱᒃᓗᑎᒃ ᑐᓴᕐᓴᐅᕙᒍᓐᓃᕐᐳᑦ, ᕔᓂᒥᒡᓗ ᐃᒥᕐᑑᒐᓗᐊᑦ ᒪᒪᕈᓱᒃᑑᔮᕐᐸᒍᓐᓃᕐᐳᑦ ᐃᒥᕐᑕᒥᖕᓂᒃ. 10ᐃᒡᓗᒐᓴᒡᔪᐊᕐᒥᐅᓂ ᐃᓄᖏᑦ ᑐᑮᕈᑎᓕᕐᐳᑦ, ᐃᓄᐃᑦ ᐃᒡᓗᒥᖕᓂ ᑮᒍᑎᓯᒪᕙᓕᕐᐳᑦ ᓴᐳᑎᓯᒪᓇᓱᒃᓗᑎᒃ ᐃᒻᒥᖕᓂᒃ. 11ᐊᖅᑯᑎᓂ ᕾᒐᓛᕐᑐᑦ ᑐᓴᕐᓴᐅᕗᑦ ᕔᓂᒥᒃ ᐃᒥᒐᒃᓴᒥᒃ ᐊᔪᕐᓇᕐᓯᖕᒪᑦ, ᖁᕕᐊᓇᕐᑐᖃᓚᐅᕐᓯᒪᑦᔮᖏᑦᑐᑎᑐᑦ ᑍᒤᓕᕐᐳᖅ, ᓄᓇᕐᔪᐊᕐᒥ ᖁᕕᐊᓇᕐᑐᖃᕈᓐᓃᕐᒪᑦ. 12ᐃᒡᓗᒐᓴᒡᔪᐊᕕᓂᐅᒐᓗᐊᑦ ᓯᖁᒻᒪᑰᓕᕐᐳᑦ, ᐃᑎᕐᑕᕐᕕᒡᔪᐊᖏᑕ ᐅᒃᑯᐊᕐᔪᐊᖏᑦ ᓯᖁᑦᑎᕐᓯᒪᓕᕐᒪᑕ. 13ᓇᓂᑐᐃᓐᓇᖅ ᓄᓇᕐᔪᐊᕐᒥ ᐃᓅᖃᑎᒌᒡᔪᐊᑦ ᑍᒤᑦᑐᒦᓕᕈᒫᕐᐳᑦ, ᑲᑎᕐᓱᐃᕕᐅᑉ ᐃᓱᓕᕋᑖᕐᓂᖓᑐᑦ ᑍᒤᑦᑑᓕᕈᒫᕐᐳᖅ, ᓇᐹᕐᑐᐃᑦ ᐅᕐᓱᒃᓴᕐᑕᓖᑦ ᑲᑕᒐᕐᓯᒪᓕᕐᓗᑎᒃ ᓇᐹᕐᑐᓕᒫᓂᑦ, ᕔᓂᒃᓮᓪᓗ ᑭᖑᓪᓕᕐᐹᖏᑦ ᐅᕐᐱᒐᖏᓐᓂᑦ ᓄᓂᕚᖑᓯᒪᓕᕐᑎᓪᓗᒋᑦ. 14ᐊᒥᐊᒃᑯᑐᐊᖑᔪᑦ ᖁᕕᐊᓱᒡᓗᑎᒃ ᐃᓐᖏᕈᒫᕐᐳᑦ, ᓯᕿᓂᐅᓪᓗ ᓂᐱᕕᐊᑕ ᓇᓛᓃᑦᑐᑦ ᐊᑕᓂᐅᑉ ᐱᔪᓐᓇᕐᓂᕐᔪᐊᖓᓂᒃ ᐅᖃᐅᓯᖃᕈᒫᕐᐳᑦ. 15ᑍᒤᒻᒪᑦ ᓯᕿᓂᐅᑉ ᓄᐃᕕᐊᑕ ᓇᓛᓂᒥᐅᑦ ᐊᑕᓂᕐᒥᒃ ᓂᕐᑐᐃᔪᒫᕐᐳᑦ, ᐃᒪᕐᔪᐃᑦ ᓯᓈᓂ ᓄᓇᖃᕐᑐᑦ ᐊᑕᓂᕐᒥᒃ ᓂᕐᑐᐃᓕᕈᒫᕐᐳᑦ ᐃᓴᕆᐊᓕᒥᐅᑦ ᒎᑎᖓᓐᓂᒃ. 16ᐅᖓᓯᒃᑐᒥ ᓄᓇᖃᕐᑐᒍᑦ ᑐᓵᔪᒫᕐᐳᒍᑦ ᐅᐱᒍᓱᒡᓗᑎᒃ ᐃᓐᖏᕈᑎᖃᕐᑐᓂᒃ ᐃᓴᕆᐊᓕᒥᐅᓂᒃ, ᐃᓅᖃᑎᒌᒡᔪᐊᑦ ᐃᓱᐊᕐᑑᓂᕋᕐᓗᒋᑦ. ᓂᕆᐅᒋᔭᒃᓴᖃᓐᖏᓚᖓᓕ ᐱᐅᔪᓐᓃᕐᐸᓪᓕᐊᑐᐃᓐᓇᕋᑦᑕ, ᐊᑭᕋᕐᑐᕋᓱᒃᑐᑦ ᐊᑭᕋᕐᑐᕐᐸᓪᓕᐊᑐᐃᓐᓇᕐᒪᑕ, ᑎᕐᓕᐊᖃᑦᑍᓂᖓᓪᓗ ᐱᕙᓪᓕᐊᑐᐃᓐᓇᕐᓗᓂ. 17ᐃᓘᓐᓇᓯ ᓈᓚᒃᓯᓐᖓ! ᑲᑉᐱᐊᓇᕐᑐᖃᕐᐳᖅ ᓇᓂᑐᐃᓐᓇᖅ, ᑲᑕᒃᕕᒃᓴᕐᑕᖃᐅᕐᓗᓂᓗ ᐱᔭᐅᕕᒃᓴᕐᑕᖃᐅᕐᐳᖅ ᐃᓕᑦᓯᓐᓂᒃ ᑕᒤᓐᓂᒃ ᐅᑕᖅᑭᔪᓂᒃ. 18ᑲᑉᐱᐊᓇᕐᑐᓂᒃ ᕿᒫᓇᓱᒃᑑᒐᓗᐊᑦ ᐃᑎᕐᓴᓄᑦ ᑲᑕᒍᒫᕐᐳᑦ, ᐃᑎᕐᓴᓂᓪᓗ ᐊᓐᓇᒃᑑᒐᓗᐊᑦ ᑎᒍᓯᑦᔪᑎᒃᓴᓕᐊᕆᔭᐅᓯᒪᔪᓄᑦ ᐱᔭᐅᔪᒫᕐᐳᑦ, ᓯᓚᓗᕐᔪᐊᖃᕈᒫᕐᐳᖅ ᕿᓚᒥᑦ, ᓄᓇᕐᔪᐊᓪᓗ ᑐᓐᖓᓂᖏᑦ ᓴᔪᒃᑎᑕᐅᔪᒫᕐᐳᑦ. 19ᓄᓇᕐᔪᐊᖅ ᖁᓪᓗᕈᒫᕐᐳᖅ ᓴᔪᒃᐱᓗᒡᓗᓂ ᖁᓪᓗᕐᓂᖏᓪᓗ ᐃᕐᐹᑎᕈᒫᕐᐳᑦ. 20ᓄᓇᕐᔪᐊᕐᓗ ᐊᖔᔮᕐᑐᑎᑐᑦ ᐅᕐᕈᔮᕈᒫᕐᐳᖅ, ᐃᒡᓗᑎᑐᓪᓗ ᐊᓄᕆᓯᐅᕐᓗᓂ ᐅᕚᔪᑎᑐᑦ ᐊᐅᓚᔪᒫᕐᐳᖅ, ᓄᓇᕐᔪᐊᖅ ᐊᔪᕐᑐᓕᓂᕐᒥᓄᑦ ᐅᖁᒤᑦᑐᒦᑎᒻᒪᑦ, ᐅᕐᕈᔪᒫᕐᐳᖅ ᒪᑭᒃᑲᓐᓂᕐᓂᐊᕈᓐᓃᕐᓗᓂ. 21ᓇᓪᓕᐅᑎᔪᒫᕐᒪᑦ ᐊᑕᓂᐅᑉ ᓱᒋᐊᕐᓯᓂᕆᔪᒫᕐᑕᖓ ᐱᔪᓐᓇᕐᓂᐅᔪᓂᒃ ᑕᑉᐹᓂ, ᓄᓇᕐᔪᐊᒥᓗ ᐊᐅᓚᑦᓯᔨᐅᔪᓂᒃ. 22ᒎᑎᐅᑉ ᐊᖓᔪᖅᑳᕐᔪᐊᑦ ᑲᑎᑎᑦᓱᒫᕐᐰᑦ ᐃᑎᕐᓴᒦᑦᑐᑎᑐᑦ, ᑎᒍᔭᐅᓯᒪᕕᖕᒧᑦ ᐊᑦᓱᖏᐅᑎᔪᒫᕐᐰᑦ ᓱᒋᐊᕐᑕᐅᕕᒃᓴᖏᑦ ᓇᓪᓕᐅᑎᑦᓯᐊᕆᓗᒋᑦ. 23ᑕᖅᑭᖅ ᑖᕐᓯᔪᒫᕐᐳᖅ ᓯᕿᓂᕐᓗ ᖃᐅᒪᔪᓐᓃᕐᓗᓂ, ᐊᑕᓂᖅ ᐊᔪᒐᖃᖏᑦᑐᖅ ᐊᐅᓚᑦᓯᓕᕈᒫᕐᒪᑦ, ᔨᕉᓴᓕᒥ ᓮᐅᓂᐅᑉ ᖃᖅᑲᖓᓂ, ᐃᓄᐃᓪᓗ ᐊᖓᔪᖅᑳᖏᑕ ᐱᓐᓇᕐᓇᕐᓂᕐᔪᐊᖓ ᑕᑯᔪᒫᕐᐹᑦ.
Currently Selected:
ᐂᓮᐊᓯᐅᑉ ᐊᒡᓚᖏᑦ 24: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
