ᕼᐆᓯᐊᑉ ᐊᒡᓚᖏᑦ 2
2
1ᐃᓴᕆᐊᓕᒥᐅᖑᖃᑎᑎᑦ ᐅᖃᐅᑎᒃᑭᑦ, “ᐊᒥ ᐃᒫᒃ—ᐃᓄᖁᑎᒃᑲ,” ᓇᔧᓪᓗ ᐅᖃᐅᑎᓗᒍ, “ᕈᕼᐋᒪ ᐃᒫᒃ—ᓂᑲᒋᔭᐅᓕᕐᐳᑎᑦ.”
ᒎᒪᐅᑉ ᐊᓯᓐᓂᐊᕐᓂᖓ—ᐃᓴᕆᐊᓕᒥᐅᑦ ᐊᓯᓐᓂᐊᕐᓂᖓᑦ
2“ᐊᓈᓇᓯ ᐊᔪᐃᓐᓈᕆᓯᐅᒃ ᐅᑎᖅᑯᓪᓗᒍ, ᓄᓕᐊᕆᔪᓐᓁᕋᒃᑯ ᑖᑦᓱᒪᓗ ᐅᐃᒋᔪᓐᓁᕐᒪᖓ, ᐊᔪᐃᓐᓈᕆᓯᐅᒃ ᐊᑐᒐᐅᔪᓐᓁᖁᓪᓗᒍ ᐊᑭᓕᕐᑕᐅᓂᕐᒧᑦ, ᐊᓯᓐᓂᐊᕐᑎᐅᔪᓐᓁᖁᓪᓗᒍᓗ. 3ᑐᓴᖏᑉᐸᑦ, ᐊᓐᓄᕅᔭᕐᓂᐊᕐᐸᕋ ᐊᓐᓄᕌᖃᕈᓐᓁᖁᓪᓗᒍ ᐃᓅᓕᓵᕐᓂᕆᓚᐅᕐᑕᒥᑐᑦ, ᐸᓂᕐᑎᓐᓂᐊᕐᐸᕋ ᓄᓇᑐᑦ ᓱᓇᖃᖏᑦᑐᑎᑐᑦ, ᐃᒥᕈᓕᕐᑎᓐᓂᐊᕐᐸᕋᓗ ᓄᓇᑐᑦ ᐸᓂᕐᑐᑐᑦ, ᑐᖁᓂᐊᕐᐳᕐᓗ ᖀᓪᓗᓂ. 4ᕿᑐᕐᖓᖏᑦ ᓂᑲᒋᓂᐊᓐᖏᓐᓂᕙᒃᑲ, ᐊᑭᓕᕐᑕᐅᓂᕐᒧᑦ ᐊᑐᕐᑕᐅᓂᒃᑯᑦ ᕿᑐᕐᖓᕆᔭᐅᖕᒪᑕ. 5ᐊᓈᓇᖓ ᐊᑭᓕᕐᑐᕐᑕᐅᓪᓗᓂ ᐊᖑᓐᓂᐊᕐᑎᐅᓚᐅᕐᒪᑦ; ᑖᒃᑯᐊᓗ ᕿᑐᕐᖓᕐᑖᕆᓚᐅᕐᒪᒋᑦ ᑲᓐᖑᓇᕐᑐᒃᑯᑦ. ᓇᖕᒥᓂᖅ ᐅᖃᓚᐅᕐᒪᑦ, ‘ᐱᖃᑎᒋᖃᑦᑕᕐᑕᓐᓄᐊᕈᒪᓕᕐᐳᖓ, ᑖᒃᑯᓄᖓ ᓂᕿᖃᕐᑎᑕᐅᕙᒃᑲᒪ ᐃᒪᖃᕐᑎᑕᐅᓪᓗᖓᓗ, ᐊᓐᓄᕌᖃᕐᑎᑕᐅᒐᒪ, ᐅᕐᓱᒃᓴᖃᕐᑎᑕᐅᓪᓗᖓᓗ ᕔᓂᖃᕐᑎᑕᐅᒐᒪ.’
6“ᑍᒤᒻᒪᑦ ᐊᕙᓗᓕᐅᕐᓂᐊᕐᐸᕋ ᐅᕐᐱᖕᓄᑦ ᑲᑭᓐᓇᕐᑐᓕᖕᓄᑦ; ᐊᕙᓗᓕᐅᕐᓗᒍ ᐊᑭᓐᓇᓕᐅᕈᑎᓂᐊᕐᐸᕋ ᓴᐴᓗᑦᓯᕐᓗᒍ, ᐊᓂᕕᒃᓴᒥᓂᒃ ᓇᓂᓯᔪᓐᓁᓪᓕᖁᓪᓗᒍ. 7ᐱᖃᑎᒋᕙᒃᑕᒥᓂᒃ ᒪᓕᖕᓂᐊᕋᓗᐊᕐᐳᖅ, ᐊᖑᓂᐊᓐᖏᓔᓪᓕ; ᕿᓂᕐᓂᐊᕋᓗᐊᕐᐰᑦ ᓇᓂᓂᐊᓐᖏᓔᓪᓕ. ᑕᕝᕙ ᐅᖃᓕᕈᒫᕐᐳᖅ, ‘ᐅᑎᕈᒪᓕᕐᐳᖓ ᓯᕗᓪᓕᕐᐹᒥᒃ ᐅᐃᒋᓯᒪᔭᓐᓄᑦ, ᑍᑲᓂ ᐱᑦᓯᐊᕐᑕᐅᓂᕐᓴᐅᓚᐅᕋᒪ ᒫᓐᓇᒥᑦ.’
8“ᖃᐅᔨᒪᓐᖏᓚᕐᓕ ᐅᕙᖓ ᓂᐊᖂᔭᒃᓴᒥᒃ ᑐᓂᓚᐅᕋᒃᑯ, ᕔᓂᒥᒃ, ᐅᕐᓱᒥᒡᓗ, ᓯᐅᓪᕕᕆᓂᒃ ᒎᓗᓂᒡᓗ ᐊᑐᓚᐅᕐᑕᓕᒫᖏᓐᓂᒃ ᑖᒃᑯᐊᓗ ᐱᔨᑦᓯᕈᑎᒋᓚᐅᕐᐰᑦ ᐰᓕᒥᒃ. 9ᑍᒤᒻᒪᑦ ᑲᑎᕐᓱᐃᕕᒃ ᓇᓪᓕᐅᑎᒃᐸᑦ ᑐᓂᕐᕈᑎᒋᓚᐅᕐᑕᒃᑲ ᐅᑎᕐᑎᑦᓱᒫᓕᕐᐸᒃᑲ ᓂᐊᖂᔭᒃᓮᑦ ᕔᓃᓪᓗ; ᐊᕐᓵᕐᓗᒍᓗ ᓄᕕᕐᓵᒃᓴᓂᒃ ᐊᓐᓄᕌᒃᓴᓂᒡᓗ, ᐊᓐᓄᕌᖃᖏᓐᓂᖓᑕ ᐅᓕᒃᓯᒪᑦᔪᑎᒋᓚᐅᕐᑕᖏᓐᓂᒃ. 10ᒫᓐᓇ ᐊᓐᓄᕅᔭᕐᓂᐊᓕᕐᐸᕋ ᑲᓐᖑᒋᔭᖏᑦ ᓴᖅᑭᔮᓕᕐᓗᑎᒃ ᐱᖃᑎᒋᕙᓚᐅᕐᑕᖏᑦ ᑕᑯᓐᓇᕐᑎᓪᓗᒋᑦ, ᑭᓇᒧᓪᓘᓐᓃᑦ ᓴᐳᑎᔭᐅᔪᓐᓇᕐᓂᐊᓐᖏᓚᖅ ᐱᔪᓐᓇᕐᓂᓐᓂᑦ. 11ᓄᖅᑲᕐᑎᑦᓱᒫᕐᐸᒃᑲᓗ ᖁᕕᐊᓱᒡᓗᑎᒃ ᑲᑎᓐᓂᕆᕙᒃᑕᖏᑦ, ᓇᓪᓕᐅᓐᓂᕐᓯᐅᕐᕕᒋᕙᒃᑕᖏᓪᓗ, ᑕᖅᑭᓂᕋᑖᒥ, ᓴᐸᑎᒥᓗ ᑲᑎᓂᕆᕙᒃᑕᖏᑦ, ᓇᓪᓕᐅᓐᓂᕐᓯᐅᕐᓂᕐᒧᓪᓗ ᑲᑎᓐᓂᕆᕙᒃᑕᓕᒫᖏᑦ. 12ᒪᓂᖅᑭᑎᕐᓂᐊᕐᐸᒃᑲᓗ ᕔᓂᓕᒃᓴᓄᑦ ᐸᐅᕐᖓᓄᑦ ᐱᕈᕐᓰᕕᖏᑦ ᐱᕈᕐᑐᓖᓪᓗ ᐱᒋᓕᖕᓂᒃ ᓇᐹᕐᑐᐃᑦ, ᐅᖃᐅᓯᕆᓚᐅᕐᑕᖏᑦ, ‘ᒪᑯᐊ ᐊᑭᓕᕐᑕᐅᑦᔪᑎᒋᓯᒪᔭᒃᑲ ᐱᖃᑎᒋᕙᒃᑕᒪ ᑐᓂᓚᐅᕐᑕᖏᑦ.’ ᑕᒪᒃᑯᐊ ᓇᐹᕐᑐᓕᒡᔪᐊᓐᖑᕐᑎᑦᓱᒫᕐᐸᒃᑲ, ᐆᒪᔪᓄᓪᓗ ᓄᔪᐊᕐᑐᓄᑦ ᓂᕆᔭᐅᔪᒫᕐᐳᑦ. 13ᓱᒋᐊᕐᓂᐊᕐᐸᕋᓗ ᓇᓪᓕᐅᓐᓂᕐᓯᐅᖃᑦᑕᕐᓂᕆᓚᐅᕐᑕᖓᓄᑦ ᐰᓕᒧᑦ ᐃᑭᑦᓯᓂᕆᖃᑦᑕᓚᐅᑕᖓᓄᓪᓗ ᐃᓯᕐᓗᐊᕐᓂᑎᑦᓯᓂᕐᒥᒃ ᑖᒃᑯᓄᖓ ᐱᐅᓴᐅᑎᓂᒡᓗ ᐊᑐᖃᑦᑕᕐᓂᕆᔭᖓ ᓇᒡᒍᐊᕐᒥᖕᓂᒡᓗ, ᐱᖃᑎᒋᕙᒃᑕᒥᓄᓪᓗ ᐅᐸᒍᑎᖃᑦᑕᓚᐅᕐᓂᖓᓄᑦ, ᐅᕙᓐᓂᒡᓗ ᐳᐃᒍᐃᓂᕆᓚᐅᕐᑕᖓᓄᑦ, ᐅᖃᕐᐳᖅ ᐊᑕᓂᖅ.”
ᐊᑕᓂᐅᑉ ᓇᒡᓕᖕᓂᖓ ᐃᓄᖁᑎᒥᓄᑦ
14“ᑍᒤᒻᒪᑦ, ᑕᑯᒋᑦ, ᓇᕆᐊᓕᕐᓯᒪᓗᒍ ᐃᓄᖃᖏᑦᑐᒧᐊᕈᑎᔪᒫᕐᐸᕋ, ᑍᑲᓂᓗ ᐅᖃᕐᕕᒋᔪᒫᕐᐸᕋ ᐅᖃᐅᓯᕐᓄᑦ ᓇᒡᓕᒃᑐᕐᑐᓄᑦ. 15#ᔮᓱᐊ 7:24-26.ᑍᑲᓂᓗ ᐸᐅᕐᖓᓂᒃ ᐱᕈᕐᓰᕕᖁᑎᖏᑦ ᑐᓂᔪᒫᕐᐸᒃᑲ, ᐂᑯᐊᓗ ᓇᕐᓴᖅ ᐅᖁᒤᒃᓴᕐᓇᕐᑐᖅ ᐅᒃᑯᐊᓐᖑᕐᑎᑦᓱᒫᕐᐸᕋ ᓂᕆᐅᖕᓂᕐᒧᑦ. ᑕᕝᕙᓂᓗ ᑭᐅᓕᕈᒫᕐᐳᖅ ᐅᕕᒃᑲᐅᓪᓗᓂ ᐱᓂᐊᕐᓂᕆᓚᐅᕐᑕᒥᑐᑦ, ᑎᑭᕋᑖᕐᓯᒪᓂᕆᓚᐅᕐᑕᒥᑐᑦ ᐄᑦᔨᑉᑎᐅᑉ ᓄᓇᖓᓂᑦ. 16ᑕᒪᓐᓇ ᐅᓪᓗᖅ ᓇᓪᓕᐅᑎᒃᐸᑦ, ᐊᑕᓂᖅ ᐅᖃᕐᐳᖅ, ᐅᖃᐅᑎᓕᕈᒫᕐᐸᕐᒪ ‘ᐅᐃᒋᕙᒋᑦ,’ ᑍᔪᓐᓃᕐᓗᖓᓗ ‘ᐰᓕᖁᑎᒐ.’ 17ᐰᓕᐅᑉ ᐊᑎᖓᓂᒃ ᐅᖃᖃᑦᑕᕈᓐᓃᕐᑎᑦᓱᒫᕐᐸᕋ, ᐊᑎᖓᓗ ᐅᖃᕐᑕᐅᖃᑦᑕᕈᓐᓃᕈᒫᕐᐳᖅ.
18“ᑕᕝᕙᓂᓗ ᐊᖏᖃᑎᒌᖕᓂᖃᕐᑎᑦᓯᔪᒫᕐᐳᖓ ᐃᓕᑦᓯᓐᓂᒃ ᐃᕐᓯᓇᕐᑐᑦ ᐆᒪᔪᓕᒫᑦ ᓇᑎᕐᓇᒦᑦᑐᑦ, ᑎᖕᒥᐊᓪᓗ ᖃᖓᑕᕙᒃᑐᑦ, ᓄᓇᒥᓗ ᐹᕐᖑᕐᐸᒃᑐᑦ ᐃᓚᒋᓗᒋᑦ; ᐅᓇᑕᐅᑏᓪᓗ ᐲᕐᑎᑦᓱᒫᕐᐸᒃᑲ ᓄᓇᒥᑦ, ᐱᑎᒃᓰᑦ, ᓴᕕᒡᔪᐊᓪᓗ, ᐃᓱᒫᓗᓇᖏᑦᑐᒥ ᑲᑉᐱᐊᓇᖏᑦᑐᒥᓗ ᐃᓂᖃᖁᓪᓗᒋᑦ. 19ᐃᓴᕆᐊᓖ, ᓄᓕᐊᕐᑖᕆᔪᒫᕐᐸᒋᑦ ᐃᓱᖃᖏᑦᑐᒧᑦ; ᓄᓕᐊᕐᑖᕆᔪᒫᕐᐸᒋᑦ ᓇᓛᒎᕐᓂᕐᒥ ᐊᑦᔨᒌᒃᑎᑦᓯᓂᕐᒥᓗ, ᓇᒡᓕᖕᓂᕐᒥᓗ ᓱᖁᓯᔪᐃᑦᑐᒥ, ᓈᒃᑭᒍᓱᖕᓂᕐᒥᓗ. 20ᓄᓕᐊᕐᑖᕆᔪᒫᕐᐸᒋᑦ ᓱᑯᓯᔪᐃᑦᑑᓂᕐᒥ; ᖃᐅᔨᔪᒫᕐᐳᑎᓪᓗ ᐊᑕᓂᕐᒥᒃ.
21“ᑕᒪᓐᓇᓗ ᓇᓪᓕᐅᑎᒃᐸᑦ, ᐊᑕᓂᖅ ᐅᖃᕐᐳᖅ, ᕿᓚᒃ ᑭᐅᔪᒫᕐᐸᕋ ᑭᐅᖁᓪᓗᒋᑦ ᓄᓇᕐᔪᐊᕐᒥᒃ.
22“ᓄᓇᕐᔪᐊᕐᓗ ᑭᐅᔪᒫᕐᐳᖅ ᐱᕈᕐᑐᒃᓴᓄᑦ ᓂᐊᖂᔭᒃᓴᓄᑦ, ᕔᓂᒃᓴᓄᑦ, ᐱᕈᕐᑐᓄᓪᓗ ᐅᕐᓱᒃᓴᓄᑦ, ᑖᒃᑯᐊᓗ ᑭᐅᔪᒫᕐᐳᑦ ᔨᔭᕆᐅᓪᒧᑦ.
23 #
ᕉᒪᒥᐅᓄᑦ 9:25; 1 ᐲᑦᑐᕉᓯ 2:10. “ᑖᓐᓇᓗ ᑲᓐᖓᕐᓱᐃᕕᒋᔪᒫᕐᐸᕋ ᓇᖕᒥᓂᓐᓂᒃ ᓄᓇᒥ ᐊᔪᕐᓴᕈᓐᓁᕐᑎᓪᓗᒍ. ᓂᑲᒍᓱᖕᓂᕐᒥᒡᓗ ᓴᖅᑭᑎᑦᓯᕕᒋᔪᒫᕐᐸᕋ ᓇᒡᓕᒋᔭᐅᖏᑦᑑᔪᓐᓃᕐᓗᓂ, ᑍᒃᑯᐊᓗ ᐅᖃᐅᑦᔭᖃᑦᑕᓚᐅᕐᑐᑦ ᐃᓄᖁᑎᒋᓐᖏᑕᒃᑲ, ᐅᖃᐅᑎᔪᒫᕐᐸᒃᑲ ‘ᐃᓄᖁᑎᒋᕙᑦᓯ’; ᑖᒃᑯᐊᓗ ᑭᐅᔪᒫᕐᐳᑦ, ‘ᐃᕝᕕᑦ ᒎᑎᒋᕙᑦᑎᒋᑦ.’”
Currently Selected:
ᕼᐆᓯᐊᑉ ᐊᒡᓚᖏᑦ 2: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
