ᐃᓯᑭᐊᓕᐅᑉ ᐊᒡᓚᖏᑦ 4
4
ᐃᓯᑭᐊᓕᐅᑉ ᐆᒃᑐᕋᐅᑎᖃᕐᓂᖓ ᔨᕉᓴᓕᒥᐅᑦ ᑎᒍᔭᐅᓂᒃᓴᖏᓐᓂᒃ
1“ᐃᓅᑉ ᐃᕐᓂᖓ, ᖁᐊᕐᑎᑕᒐᕐᒥᒃ ᐱᓗᑎᑦ, ᓵᖕᓄᐊᕐᓗᒍ ᑎᑎᕋᐅᔭᕐᕕᒋᒍᒃ ᐃᑎᕐᓴᓕᐅᕐᓗᒍ, ᔨᕉᓴᓕᐅᑉ ᐃᒡᓗᒐᓴᒡᔪᐊᓐᖑᐊᖏᓐᓂᒃ. 2ᐊᑭᕋᖏᓐᓄᑦ ᐊᕙᑕᖏᕐᑕᐅᓯᒪᓂᖓ ᓇᓗᓁᕐᓗᒍ, ᐃᑎᕐᓴᓕᐅᕐᓯᒪᔪᓂᒃ; ᓄᓇᓗ ᖃᓕᕇᒃᓯᓯᒪᓗᒍ; ᐃᑎᕐᑕᕐᕕᖕᓂᒡᓗ ᓯᖁᒥᑦᓯᓇᓲᑎᓂᒃ ᐊᕙᓗᕐᔪᐊᖓᑕ ᓯᓚᑎᓕᒫᖓ ᓈᓗᒍ. 3ᓵᑦᑑᔭᐅᒻᒥᒃ ᓴᕕᕋᔭᖕᒥᒃ ᐱᓗᑎᑦ ᐃᒡᓗᒐᓴᒡᔪᐊᓕᐊᓐᖑᐊᕐᐱᑦ ᐃᕝᕕᓪᓗ ᐊᑯᓐᓂᑦᓯᓐᓄᐊᕐᓗᒍ ᐊᕙᓗᕐᔪᐊᓐᖑᐊᖑᓂᐊᕐᒪᑦ, ᐃᒡᓗᒐᓴᒡᔪᐊᑦ ᓵᓐᖓᓗᒋᑦ, ᐊᕙᓗᓯᓯᒪᔪᓂᒃ ᐃᕝᕕᑦ ᓵᓐᖓᓯᓐᖑᐊᕐᓗᑎᑦ. ᑕᒪᓐᓇ ᐃᓴᕆᐊᓕᐅᑉ ᑭᖑᕚᖏᓐᓄᑦ ᓇᓗᓁᖁᑕᐅᓂᐊᕐᒪᑦ.
4“ᓴᐅᒥᖕᓄᑦ ᐃᓐᓇᖓᓗᑎᑦ, ᐃᓴᕆᐊᓕᐅᑉ ᑭᖑᕚᖏᑕ ᓱᒋᐊᕐᑕᐅᑦᔪᑎᒃᓴᖏᑦ ᐃᓕᖕᓄᑦ ᐃᓕᓂᐊᕐᐸᒃᑲ; ᐅᓪᓗᐃᑦ ᐅᓄᕐᓂᖏᑦ ᓇᓪᓚᖓᓂᕆᔭᑎᑦ, ᑖᒃᑯᐊ ᐃᓴᕆᐊᓕᐅᑉ ᑭᖑᕚᖏᑦ ᓱᒋᐊᕐᑕᐅᓂᖏᑕ ᓯᕕᑐᓂᕆᓂᐊᕐᐰᑦ. 5ᐊᔪᕐᑐᓕᓂᖏᑕ ᓱᒋᐊᕐᑕᐅᑦᔪᑎᒃᓴᖏᓐᓂᒃ ᐅᓪᓗᓂᒃ 390ᓂᒃ ᑐᓂᓯᕕᒋᓂᐊᕐᐸᒋᑦ, ᐊᕐᕌᒍᐃᑦ ᓱᒋᐊᕐᑕᐅᓂᒃᓴᖏᑕ ᓯᕕᑐᓂᖏᑦ ᒪᓕᒡᓗᒋᑦ; ᑍᒫᒃ ᓯᕕᑐᑎᒋᔪᒥᒃ ᓱᒋᐊᕐᑕᐅᔪᒫᕐᐳᑎᑦ ᐃᓴᕆᐊᓕᐅᑉ ᑭᖑᕚᖏᑕ ᓱᒋᐊᕐᑕᐅᓂᒃᓴᖏᓐᓄᑦ. 6ᑍᒤᓕᖓᔭᕆᐊᖃᕐᓃᑦ ᓈᒻᒪᒃᓯᒃᐸᑦ, ᑕᓕᕐᐱᖔᕐᓄᑦ ᓵᓪᓗᑎᑦ ᔫᑕᐅᑉ ᑭᖑᕚᖏᑕ ᐊᔪᕐᑐᓕᓂᖏᑦ ᓱᒋᐊᕐᑕᐅᑦᔪᑎᒃᓴᕆᕙᑎᑦ ᐅᓪᓗᓂᒃ 40ᓂᒃ, ᐊᔪᕐᑐᓕᓂᖏᑕ ᓱᒋᐊᕐᑕᐅᑦᔪᑎᒃᓴᖏᑦ ᒪᓕᒡᓗᒋᑦ, ᐅᓪᓗᖅ ᐊᑕᐅᓯᖅ ᑐᕌᖓᓗᓂ ᐊᕐᕌᒍᒧᑦ ᐊᑕᐅᓯᕐᒧᑦ.
7“ᔨᕉᓴᓕᐅᑉ ᐊᑭᕋᖏᓐᓄᑦ ᐊᕙᓗᔭᐅᓯᒪᓂᖓ ᓵᓐᖓᓗᒍ, ᑕᓖᑦ ᐅᕕᓃᓐᓇᕈᕐᓗᒍ; ᓇᓪᓕᐅᑎᓛᕐᑐᓂᒃ ᐃᒡᓗᒐᓮᑦ ᐅᖃᓪᓚᒡᕕᒋᒃᑭᑦ. 8ᑕᑯᒋᓪᓗ, ᕿᓚᒃᓱᕐᓂᐊᕐᐸᒋᑦ ᓇᓪᓕᐊᓐᓄᑐᐃᓐᓇᖅ ᓵᖃᑦᑕᖁᓇᒃ, ᐊᕙᓗᔭᐅᓯᒪᓂᕐᐱᑦ ᐅᓪᓗᖏᑦ ᐊᓂᒍᓚᐅᖏᓐᓂᖏᓐᓂ.
9“ᓂᐊᖂᔭᒃᓴᒥᒃ ᓯᑎᔪᓂᒡᓗ ᓂᐊᖂᔭᒃᓴᓂᒃ, ᐲᓐᓂᓯᓂᒃ, ᐱᕈᕐᑐᕕᓂᕐᓂᒃ, ᐃᕕᐅᔭᓂᒡᓗ ᓂᐊᖂᔭᒃᓴᓂᒃ, ᐱᕈᕐᓯᐊᒃᓴᓂᒃ, ᑲᑎᓪᓗᒋᑦ ᓂᐊᖂᔭᓕᐊᕆᒃᑭᑦ, ᑍᒤᑦᑐᒥᒃ ᑕᕝᕙ ᓂᕆᖃᑦᑕᕆᐊᖃᕈᒫᕐᐳᑎᑦ ᓴᐅᒥᖔᕐᓄᑦ ᐃᓂᓪᓚᖓᓂᓕᒫᕐᓂ ᐅᓪᓗᓂᒃ 390ᓂᒃ. 10ᑏᑑᑎᑎᑐᑦ ᐊᖏᑎᒋᔪᒥᒃ ᖃᐅᑕᒫᑦ ᓂᕆᖃᑦᑕᕆᐊᖃᕈᒫᕐᐳᑎᑦ ᑖᓐᓇᓗ ᓂᕆᔭᑐᐊᕆᕙᒡᓗᒍ ᐅᓪᓗᖅ ᐊᑕᐅᓯᐊᕐᓗᒍ. 11ᐅᓪᓗᓕᒫᖅ ᐃᒥᖃᑦᑕᕆᐊᖃᕐᓂᐊᕐᐳᑎᑦ ᑏᑑᑏᖕᓂᒃ ᒪᕐᕈᓪᓗᐊᑐᑦ ᐊᖏᑎᒋᔪᒥᒃ. 12ᓂᐊᖂᔭᓕᐅᓕᕈᕕᑦ ᐃᑯᐊᓚᑦᓯᔪᒃᓴᐅᕗᑎᑦ ᐃᓄᐃᑦ ᐊᓇᖏᓐᓂᒃ ᕿᔪᖃᕐᓗᑎᑦ, ᐆᑦᑎᔭᑎᓪᓗ ᐃᓄᐃᑦ ᑕᑯᓐᓇᕐᑎᓪᓗᒋᑦ ᓂᕆᓗᒋᑦ.”
13ᐊᑕᓂᖅ ᐅᖃᕐᐳᖅ, “ᑍᒫᒃᑕᐅᖅ ᑕᕝᕙ ᐃᓴᕆᐊᓕᒥᐅᑦ ᓂᕆᔭᕆᐊᖃᖃᑦᑕᕈᒫᕐᐳᑦ ᐱᖁᔭᑎᒍᑦ ᓴᓗᒪᖏᑦᑐᒥᒃ ᐃᓅᖃᑎᒌᒡᔪᐊᓄᑦ ᐊᐅᓪᓚᕈᑦᔭᐅᑎᒃᑯᒃᑭᑦ.”
14ᑕᕝᕙ ᑭᐅᕙᕋ, “ᐊᑕᓃᖅ ᒎᑏ! ᑕᑯᒋᑦ, ᓇᖕᒥᓂᖅ ᓇᕐᕈᓇᕐᓯᑎᓚᐅᕐᓯᒪᓐᖏᓚᖓ; ᓄᑕᕋᐅᓂᓐᓂᑦ ᐅᓪᓗᒥᒧᑦ ᑎᑭᓪᓗᒍ ᐆᒪᔪᕕᓂᕐᒥᒃ ᐃᒻᒥᓃᓐᓇᖅ ᑐᖁᔪᕕᓂᕐᒥᒃ ᓂᕆᓚᐅᕐᓯᒪᓐᖏᓚᖓ ᐆᒪᔪᓄᓪᓗ ᑐᖁᑕᕕᓂᕐᒥᒃ, ᓂᕿᒥᒡᓗ ᒪᒪᖏᑦᑐᒥᒃ ᐅᖁᒻᒦᓚᐅᕐᓯᒪᓇᖓ.”
15ᑕᕝᕙ ᐅᖃᐅᑎᕚᖓ, “ᑕᑯᒋᑦ, ᐃᒻᒧᒃᓯᐅᒐᐅᑉ ᐊᓇᖏᓐᓂᒃ ᐃᑯᐊᓪᓚᖅᑯᑎᖃᖃᑦᑕᖁᓕᕐᐸᒋᑦ, ᐃᓅᑉ ᐊᓇᖏᓐᓂᐅᖏᑦᑐᖅ, ᓂᐊᖂᔭᓕᐅᓕᕈᕕᑦ.”
16ᐅᖃᐅᑎᒃᑲᓐᓂᕐᐹᖓᓗ, “ᐃᓅᑉ ᐃᕐᓂᖓ, ᑕᑯᒋᑦ ᔨᕉᓴᓕᒥᐅᑦ ᓂᐊᖂᔭᒃᓴᕐᑖᕐᕕᒋᕙᒃᑕᖏᑦ ᓄᖅᑲᕐᑎᓐᓂᐊᕐᐸᒃᑲ; ᓂᕆᖃᑦᑕᓕᕈᒫᕐᐳᑦ ᐆᒃᑑᑎᒧᑦ ᐆᒃᑐᕐᑕᐅᓯᒪᔪᒥᒃ ᑲᑉᐱᐊᓱᒡᓗᑎᒃ; ᐃᒥᖃᑦᑕᕈᒫᕐᐳᓪᓗ ᐆᒃᑐᕋᐅᑦ ᒪᓕᒡᓗᒍ ᐃᓱᒪᔮᕐᓗᑎᒃ. 17ᑍᒤᓕᐅᕐᕕᒋᔪᒫᕐᐸᒃᑲ ᓂᕿᒃᓮᕈᑎᓗᑎᒃ ᐃᒥᒃᓮᕈᑎᓗᑎᒡᓗ, ᐃᓱᒪᔮᕐᓗᑎᒃ ᐃᒻᒥᖕᓄᑦ ᑕᑯᓴᖃᑦᑕᐅᑎᔪᒫᕐᐳᑦ, ᐊᔪᕐᓴᕐᓂᕐᒧᑦ ᓄᖑᑉᐸᓪᓕᐊᓕᕈᒫᕐᐳᑦ ᐊᔪᕐᑐᓕᓯᒪᓂᕐᒥᖕᓄᑦ ᓱᒋᐊᕐᑕᐅᓕᕈᑎᒃ.”
Currently Selected:
ᐃᓯᑭᐊᓕᐅᑉ ᐊᒡᓚᖏᑦ 4: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
