ᐃᔅᑕᐅᑉ ᐊᒡᓚᖏᑦ 2
2
ᐃᔅᑕᐅᑉ ᑯᐃᓐᖑᕐᓂᖓ
1ᑕᒪᒃᑯᐊ ᑭᖑᓂᖓᑦᑎᒍᑦ, ᐊᖓᔪᖅᑳᕐᔪᐊᖅ ᐊᕼᐊᓱᐃᕋᔅ ᓂᓐᖓᐅᒪᔪᓐᓃᕋᒥ, ᐃᖅᑲᐅᒪᓕᓚᐅᕐᐳᖅ ᕚᔅᑎᒥᒃ, ᖃᓄᐃᓕᐅᓚᐅᕐᓂᖓᓂᒡᓗ, ᐱᖁᔨᑦᔪᑎᓕᐅᓚᐅᕐᓂᕐᒥᓂᒡᓗ ᑎᑎᕋᕐᑎᑦᓯᓪᓗᓂ ᑖᑦᓱᒥᖓ ᓈᒻᒪᒃᓴᓐᖏᐅᑎᒥᓂᒃ. 2ᑕᕝᕙ ᐊᖓᔪᖅᑳᕐᔪᐊᑉ ᐃᓱᒪᓕᐅᕐᑎᖏᑕ ᐃᓚᖏᑦ ᑕᕝᕙᓂ ᓇᔫᑎᔪᑦ ᐊᖓᔪᖅᑳᕐᔪᐊᒧᑦ ᐅᖃᕐᐳᑦ, “ᐅᐃᖃᓚᐅᕐᓯᒪᖏᑦᑐᓂᒃ ᐊᕐᓇᑦᓯᐊᕙᖕᓂᒃ ᕿᓂᕐᑎᑦᓯᓚᐅᕆᑦ ᓂᕈᐊᕐᕕᒋᓛᕐᑕᕐᓂᒃ; 3ᓄᓇᓕᖁᑎᖕᓃᑦᑐᓂᒃ ᐊᑐᓂᑦ ᑲᒪᔨᐅᓂᐊᕐᑐᓂᒃ ᑎᓕᓯᓗᑎᑦ, ᑖᒃᑯᐊ ᐊᕐᓇᑦᓯᐊᕙᖕᓂᒃ ᐅᐃᖃᓚᐅᕐᓯᒪᖏᑦᑐᓂᒃ ᑲᑎᑦᓯᓗᑎᒃ ᐅᕗᖓ ᓇᔪᕐᑕᕐᓄᐊᕈᑦᔨᖁᓪᓗᒋᑦ ᐊᖓᔪᖅᑳᕐᔪᐊᒃᑯᕕᖕᒧᑦ ᓄᓇᒧᑦ ᓲᓴᒧᑦ, ᐊᕐᓇᒃᑯᕕᖕᒧᐊᕐᑕᐅᓗᑎᒃ, ᑲᒪᒋᔭᐅᖁᓪᓗᒋᑦ ᐱᔨᖕᓄᑦ ᕼᐃᒊᒧᑦ ᐃᒡᔪᐃᕐᑕᐅᓯᒪᔪᒧᑦ ᐊᕐᓇᓂᒃ ᑲᒪᔨᐅᕙᒃᑐᒧᑦ; ᑕᕝᕙᓂ ᐱᐅᓴᕐᑕᐅᑦᓯᐊᕈᓐᓇᖁᓪᓗᒋᑦ ᐅᐸᓗᖎᔭᕐᑕᐅᓗᑎᒃ. 4ᑖᒃᑯᓇᓐᖓᑦ ᐊᕐᓇᑦᓯᐊᕙᐅᒋᔭᕐᓂᒃ ᓂᕈᐊᕈᓐᓇᖁᓪᓗᑎᑦ ᑯᐃᓐᖑᕐᓂᐊᕐᑐᒥᒃ ᕚᔅᑎᒥᒃ ᐃᓇᖐᔪᒃᓴᐅᖁᓪᓗᒍ.”
ᑕᒪᓐᓇ ᐊᖓᔪᖅᑳᕐᔪᐊᑉ ᐃᓱᒪᓕᐅᕈᑕᐅᔪᖅ ᐊᑲᐅᒋᕚ, ᑍᒫᒡᓗ ᐱᓇᓱᐊᓕᕐᓗᓂ.
5ᑕᕝᕙᓂ ᓲᓴᒥ ᐊᖓᔪᖅᑳᕐᔪᐊᒃᑯᕕᖕᒥ ᔫᑎᑕᖃᓚᐅᕐᐳᖅ ᒧᐊᑎᑬᒥᒃ ᐊᑎᓕᖕᒥᒃ ᔧᕆᐅᑉ ᐃᕐᓂᖓᓂᒃ; ᐊᑖᑕᑦᓯᐊᖃᕐᓗᓂ ᓯᒥᐂᒥᒃ ᑭᓯᐅᑉ ᐃᕐᓂᖓᓂᒃ, ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ. 6#ᐊᑕᓃᑦ ᐂᑉᐸᖏᑦ 24:10-16; ᑯᕉᓂᑲ ᐂᑉᐸᖏᑦ 36:10.ᑖᓐᓇ ᑮᓯ ᔨᕉᓴᓕᒥᑦ ᐊᐅᓪᓚᕈᑦᔭᐅᖃᑕᐅᓯᒪᔪᖅ ᓵᓚᐅᔪᑦ ᐊᐅᓪᓚᕈᑦᔭᐅᓕᕐᑎᓪᓗᒋᑦ ᑎᒍᔭᐅᖃᑕᐅᓪᓗᓂ ᔫᑕᐅᑉ ᐊᖓᔪᖅᑳᕐᔪᐊᖓ ᔨᑯᓁᐊ ᑎᒍᔭᐅᑎᓪᓗᒍ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᓂᐱᑯᓁᓴᒧᑦ ᐊᐅᓪᓚᕈᑦᔭᐅᑎᓪᓗᒋᑦ. 7ᒧᐊᑎᑬᓪᓗ ᓇᒃᓴᓚᐅᕐᐹ ᕼᐊᑖᓴ, ᕼᐄᑉᕉᑎᑐᑦ ᑍᒫᒃ ᐊᑎᓕᒃ, ᑖᓐᓇ ᐃᔅᑕᕐ, ᒧᐊᑎᑬᑉ ᐊᒃᑲᖓᑕ ᐸᓂᖓ, ᑖᓐᓇ ᐊᑖᑕᖃᓚᐅᓐᖏᓚᖅ ᐊᓈᓇᖃᕋᓂᓗ; ᐅᐃᒡᒐᓲᓪᓗᓂ ᐃᓂᖁᓇᕐᐳᖅ ᐊᕐᓇᑦᓯᐊᕙᐅᓪᓗᓂᓗ, ᑖᑦᓱᒪ ᐊᑖᑕᖓ ᐊᓈᓇᖓᓗ ᑐᖁᖕᒪᑎᒃ, ᒧᐊᑎᑬᑉ ᑎᒍᐊᕐᑖᕆᓚᐅᕐᐹ ᓇᖕᒥᓂᖅ ᐸᓂᖕᒥᑐᑦ ᐱᓕᕐᓗᓂᐅᒃ.
8ᑍᒤᒻᒪᑦ, ᐊᖓᔪᖅᑳᕐᔪᐊᑉ ᐱᖁᔨᑦᔪᑎᖓ ᑎᑎᕋᐅᓯᕆᔭᖓᓗ ᑐᓴᕐᑕᐅᒐᒥ, ᐊᕐᓁᑦ ᐅᐃᒡᒐᓱᐃᑦ ᐅᓄᕐᑐᑦ ᑲᑎᕐᓱᕐᑕᐅᓕᕐᒪᑕ ᑕᕝᕗᖓ ᓄᓇᒧᑦ ᓲᓴᒧᑦ ᐊᖓᔪᖅᑳᕐᔪᐊᒃᑯᕕᖕᒧᑦ, ᕼᐃᒊᒧᑦ ᑲᒪᒋᔭᐅᑎᓪᓗᒋᑦ, ᑕᕝᕙ ᐃᔅᑕᕐ ᐊᖓᔪᖅᑳᕐᔪᐊᒃᑯᕕᖕᒧᑦ ᐋᑕᐅᓚᐅᕆᕗᖅ, ᕼᐃᒊᑉ ᑲᒪᒋᔭᖏᓐᓄᑦ ᐊᕐᓇᓄᑦ. 9ᕼᐃᒊᓪᓕ ᐃᔅᑕᕐ ᖁᕕᐊᒋᒐᒥᐅᒃ, ᑍᒤᒻᒪᑦ ᐱᐅᓂᕐᐹᒥ ᐃᓂᖃᕐᑎᓕᕐᐹ, ᑎᒥᖓᓗ ᐱᐅᓴᓯᑦᓴᐅᑎᒋᓪᓗᓂᐅᒃ ᓂᕆᔭᒃᓴᖏᓪᓗ ᐊᑐᐃᓐᓇᐅᑎᓕᕐᐰᑦ ᑖᑦᓱᒧᖓ, ᓂᕈᐊᕐᑕᐅᓯᒪᔪᓂᒡᓗ ᐊᕐᓇᓂᒃ 7ᓂᒃ ᐱᔨᑲᑖᖃᓕᕐᑎᑉᐹ ᐊᖓᔪᖅᑳᕐᔪᐊᖃᕐᕕᖕᒥᑦ ᐱᓯᒪᔪᓂᒃ, ᐃᓂᖃᕐᑎᓕᕐᐹᓗ ᐱᔨᒋᔭᖏᓪᓗ ᐃᓂᒃᓴᑦᓯᐊᕙᐅᓂᕐᐹᒧᑦ ᐊᕐᓁᑦ ᐃᓂᒋᔭᖏᓐᓂ ᐃᓂᖃᓕᓚᐅᕐᐳᖅ.
10ᐃᔅᑕᕐᓕ ᖃᐅᔨᑎᑦᓯᓚᐅᓐᖏᓚᖅ ᐃᓅᖃᑎᒥᓂᒃ ᐃᓚᒥᓂᒡᓗ, ᒧᐊᑎᑬᑉ ᑕᒪᑐᒥᖓ ᖃᐅᔨᑎᑦᓯᖁᓚᐅᖏᒻᒪᒍ. 11ᖃᐅᑕᒫᓪᓕ ᒧᐊᑎᑬ ᐊᕐᓁᑦ ᐃᒡᓗᖏᑕ ᐃᑎᕐᑕᕐᕕᐊᒍᑦ ᐅᑎᕐᑕᕐᓗᓂ ᐱᓱᑲᑕᒃᐸᓚᐅᕐᐳᖅ, ᖃᐅᔨᒪᓇᓱᐊᕐᓗᓂ ᐃᔅᑕᕐ ᖃᓄᐃᑕᐅᕙᓪᓕᐊᖕᒪᖔᑦ ᖃᓄᐃᖏᑦᓯᐊᕋᓗᐊᕐᒪᖔᓪᓗ.
12ᐊᕐᓁᑦ ᐅᐃᒡᒐᓱᐃᑦ ᐊᑐᓂᑦ ᐱᕕᒃᓴᖓᑦ ᓇᓪᓕᐅᑎᔭᕌᖓᑦ ᐊᖓᔪᖅᑳᕐᔪᐊᕐᒧᑦ ᐊᕼᐊᓱᐃᕋᓯᒧᑦ ᐃᑎᕐᑎᑕᐅᕙᓚᐅᕐᐳᑦ ᑕᖅᑭᓂᒃ 12ᓂᒃ ᐅᐸᓗᖎᔭᓚᐅᕐᑎᓪᓗᒋᑦ, ᐊᕐᓁᑦ ᐊᑐᓂᑦ ᐅᐸᓗᖎᔭᕐᑕᐅᔭᕆᐊᖃᕐᑕᖏᑦ ᓈᒻᒪᒃᓯᔭᕌᖓᑕ, ᐅᓪᓗᐃᑦ ᐋᖅᑭᒃᑕᐅᓯᒪᓚᐅᕐᐳᑦ ᐅᐸᓗᖎᔭᕐᑕᐅᓂᕆᔭᒃᓴᖏᑦ, ᑕᖅᑭᓂᒃ ᐱᖓᓲᔪᕐᑐᓂᒃ ᒫᕐᒧᑦ ᐅᕐᓱᕐᑎᕐᑕᐅᖃᑦᑕᓚᐅᕐᐳᑦ, ᐊᒻᒪ ᑕᖅᑭᓂᒃ ᐱᖓᓲᔪᕐᑐᓂᒃ ᑎᐱᑦᓯᐊᕆᒃᑐᒧᑦ ᐅᕐᓱᕐᑎᕐᑕᐅᓕᕆᓪᓗᑎᒃ; ᐊᕐᓁᓪᓗ ᑕᑯᒥᓇᕐᓴᐅᑎᖏᓐᓄᑦ ᐅᐸᓗᖎᔭᕐᑕᐅᓪᓗᑎᒃ. 13ᑍᒫᒃ ᐅᐸᓗᖎᔭᕐᑕᐅᔭᕇᕌᖓᒥᒃ, ᐊᑐᓂᑦ ᐅᐃᒡᒐᓱᐃᑦ ᐊᖓᔪᖅᑳᕐᔪᐊᕐᒧᑦ ᐃᑎᕐᑎᑕᐅᕙᓚᐅᕐᐳᑦ, ᐊᕐᓁᓪᓗ ᐊᑐᓂᑦ ᐃᓱᒪᕐᓱᕐᑎᑕᐅᓚᐅᕐᐳᑦ ᓱᓇᓂᒃ ᐊᑐᕈᒪᔭᒥᖕᓂᒃ ᐊᑐᕈᓐᓇᕐᓗᑎᒃ ᑕᕝᕙᓐᖓᑦ ᐊᕐᓁᑦ ᐃᒡᓗᖓᓂᑦ ᐊᖓᔪᖅᑳᕐᔪᐊᒃᑯᕕᖕᒧᑦ ᐂᓕᑐᐊᕈᑎᒃ. 14ᐅᓐᓄᒃᑯᑦ ᐊᖓᔪᖅᑳᕐᔪᐊᕐᒧᐊᕈᓂ, ᐅᓪᓛᒃᑯᑦ ᖃᐅᑎᓪᓗᒍ ᐊᓂᕙᓚᐅᕐᐳᖅ ᐊᕐᓁᑦ ᐃᒡᓗᖓᑕ ᐂᑉᐸᖓᓄᑦ ᐂᑎᑕᐅᓕᕐᓗᓂ, ᑲᒪᒋᔭᐅᓕᕐᓗᓂ ᓵ-ᐊᔅᒑᔅᒧᑦ, ᐊᖓᔪᖅᑳᕐᔪᐊᑉ ᓄᓕᐊᒃᑲᓐᓂᖏᑕ ᑲᒪᔨᖓᓄᑦ ᐃᒡᔪᐃᕐᑕᐅᓯᒪᔪᒧᑦ; ᐊᕐᓇᖅ ᐊᖓᔪᖅᑳᕐᔪᐊᕐᒦᑦᑐᕕᓂᐅᒍᓂ ᐅᑎᕐᑎᑕᐅᕙᓚᐅᓐᖏᓚᖅ ᐊᖓᔪᖅᑳᕐᔪᐊᕐᒧᑦ, ᑭᓯᐊᓂ ᐊᖓᔪᖅᑳᕐᔪᐊᑉ ᖁᕕᐊᒋᓐᓂᕈᓂᐅᒃ ᐊᑎᖓ ᑍᓗᒍ ᕾᖁᒐᔭᕐᐹ.
15ᐃᔅᑕᕐᐅᓪᓕ ᐊᖓᔪᖅᑳᕐᔪᐊᕐᒧᑦ ᐅᐸᒍᑎᕕᒃᓴᖓ ᓇᓪᓕᐅᑎᖕᒪᑦ, ᑖᓐᓇ ᐊᐱᕼᐂᓕᐅᑉ ᒧᐊᑎᑬᑉ ᐊᒃᑲᖓᑕ ᐸᓂᖓ ᒧᐊᑎᑬᑉ ᑎᒍᐊᕐᑖᕆᓯᒪᓕᕐᑕᖓ ᐸᓂᖕᒥᑐᑦ ᐱᓕᕐᓗᓂᐅᒃ, ᓱᓇᒥᒃ ᑐᒃᓯᕋᓚᐅᓐᖏᓚᖅ ᕼᐃᒊᓪᓕ ᐊᖓᔪᖅᑳᕐᔪᐊᑉ ᐱᔨᖓᑕ ᐃᒡᔪᐃᕐᑕᐅᓯᒪᔫᑉ, ᐊᕐᓇᓂᒃ ᑲᒪᔨᒋᔭᐅᔫᑉ ᐊᑐᖁᔭᖏᓐᓂᒃ ᑭᓯᐊᓂ ᐊᑐᓚᐅᕐᐳᖅ. ᐃᔅᑕᕐᓗ ᑕᑯᔪᓕᒫᓄᑦ ᑖᑦᓱᒥᖓ ᖁᕕᐊᒋᔭᐅᓚᐅᕐᐳᖅ. 16ᑕᕝᕙ ᐃᔅᑕᕐ ᐊᖓᔪᖅᑳᕐᔪᐊᕐᒧᑦ ᐊᕼᐊᓱᐃᕋᔅᒧᑦ ᐂᑎᑕᐅᕗᖅ, ᐊᖓᔪᖅᑳᕐᔪᐊᑉ ᐃᒡᓗᖓᓄᑦ ᑕᖅᑮᑦ 10ᖓᓐᓂ, ᑎᐲᓯᒥᒃ ᑍᔭᐅᔪᒥ, ᐊᖓᔪᖅᑳᕐᔪᐊᑉ ᐊᖓᔪᖅᑳᖑᓂᖓᑕ 7ᒋᓕᕐᑕᖓᓂ. 17ᐊᖓᔪᖅᑳᕐᔪᐊᓪᓗ ᐃᔅᑕᕐ ᓇᒡᓕᒋᓂᕐᐹᕆᓕᕐᐹ ᐊᕐᓇᓕᒫᓂᑦ, ᖁᕕᐊᒋᓪᓗᒍᓗ ᐱᐅᒋᓂᕐᓴᕆᓕᕐᐹ ᐅᐃᒡᒐᓲᖃᑎᓕᒫᖏᓐᓂᑦ; ᑕᕝᕙ ᑯᐃᑉ ᓂᐊᖂᑎᖓᓂᒃ ᐊᑎᑎᑉᐹ ᑯᐃᓐᖑᕐᑎᓪᓗᒍᓗ ᐃᓇᖐᑎᑉᐹ ᕚᔅᑎᒥᒃ. 18ᑕᕝᕙ ᐊᖓᔪᖅᑳᕐᔪᐊᖅ ᓂᕆᕕᒃᔪᐊᕐᑎᑦᓯᓕᕐᐳᖅ ᐊᖓᔪᖅᑳᖁᑎᒥᓂᒃ ᐱᔨᓕᒫᒥᓂᒡᓗ; ᐃᔅᑕᐅᑉ ᓂᕆᕕᒡᔪᐊᕈᑕᐅᓂᖓᓂᒃ ᑍᓪᓗᒍ. ᐅᓪᓗᕐᓗ ᑖᓐᓇ ᑖᒃᓰᔭᕐᕕᐅᖁᓚᐅᓐᖏᓛ ᓄᓇᓂ ᐊᖓᔪᖅᑲᐅᕕᓕᒫᒥᓂ, ᑐᓂᓯᓚᐅᕐᐳᕐᓗ ᐊᖓᔪᖅᑳᕐᔪᐊᑉ ᑐᓂᕐᕈᑎᖏᓐᓂᒃ ᐊᓐᓂᕈᓱᒐᓂ.
ᒧᐊᑎᑬᑉ ᐊᖓᔪᖅᑳᕐᔪᐊᕐᒥᒃ ᓴᐳᑦᔨᓂᖓ
19ᐅᐃᒡᒐᓱᐃᑦ ᐂᑉᐸᖓᓂᒃ ᑲᑎᑕᐅᓕᕐᑎᓪᓗᒋᑦ, ᒧᐊᑎᑬ ᐃᒃᓯᕙᕗᖅ ᐊᖓᔪᖅᑳᕐᔪᐊᑉ ᐃᑎᕐᑕᕐᕕᖓᓂ. 20ᐃᔅᑕᕐᓕ ᖃᐅᔨᔭᐅᑎᑦᓯᓚᐅᓐᖏᓚᖅ ᐃᓚᒥᓂᒃ ᐃᓅᖃᑎᒥᓂᒡᓗ, ᒧᐊᑎᑬᑉ ᖃᐅᔨᔭᐅᑎᑦᓯᖁᔨᖏᓐᓂᖓ ᒪᓕᒡᓗᓂᐅᒃ, ᐃᔅᑕᕐ ᒧᐊᑎᑬᑉ ᐱᖁᔨᓂᖓᓂᒃ ᓈᓚᓚᐅᕐᐳᖅ, ᑍᒪᓐᖓᑦ ᐱᕈᕐᓴᓂᕐᒥᓂᑦ ᓈᓔᓐᓇᕋᒥᐅᒃ.
21ᑍᑦᓱᒪᓂᐅᑎᓪᓗᒍ, ᒧᐊᑎᑬ ᐊᖓᔪᖅᑳᕐᔪᐊᑉ ᐃᑎᕐᑕᕐᕕᖓᓂ ᐃᒃᓯᕙᑎᓪᓗᒍ, ᐊᖓᔪᖅᑳᕐᔪᐊᑉ ᐱᔨᖏᒃ ᒪᕐᕉᒃ ᐃᒡᔪᐃᕐᑕᐅᓯᒪᔫᒃ, ᐱᒡᑖᓇ ᑎᕆᔅᓗ, ᐊᖓᔪᖅᑳᕐᔪᐊᑉ ᐃᒡᓗᕈᓯᖓᑕ ᐃᑎᕐᑕᕐᕕᐊᓂ ᑲᒪᔨᒃ, ᐊᖓᔪᖅᑳᕐᔪᐊᕐᒧᑦ ᐊᕼᐊᓱᐃᕋᔅᒧᑦ ᓂᓐᖓᒡᓗᑎᒃ ᐊᑭᕋᕐᑐᓕᕐᐴᒃ, ᑐᖁᑦᓱᒪᓕᕐᓗᒍᓗ. 22ᒧᐊᑎᑬᓕ ᑕᒪᑐᒥᖓ ᖃᐅᔨᒐᒥ, ᑯᐃᓐ ᐃᔅᑕᕐ ᐅᖃᐅᑎᕚ, ᐃᔅᑕᕐᐅᓪᓗ ᐊᖓᔪᖅᑳᕐᔪᐊᖅ ᑕᒪᑐᒥᖓ ᐅᖃᐅᑎᕚ ᒧᐊᑎᑬᒧᑦ ᖃᐅᔨᑎᑕᐅᓂᕋᕐᓗᓂ. 23ᑕᒪᓐᓇᓕ ᖃᐅᔨᓴᕐᑕᐅᓕᕋᒥ, ᓱᓕᓂᖓ ᖃᐅᔨᔭᐅᕗᖅ, ᑖᒃᑯᐊᒡᓗ ᐊᖑᑏᒃ ᕿᒥᑦᓯᕕᖕᒥ ᕿᒥᑕᐅᕘᒃ; ᑕᒪᓐᓇᓗ ᑎᑎᕋᕐᑕᐅᓚᐅᕐᐳᖅ ᐊᖓᔪᖅᑳᕐᔪᐊᑉ ᐱᕙᓪᓕᐊᔪᖁᑎᖏᓐᓂ ᑯᕉᓂᑲᓂ ᐊᖓᔪᖅᑳᕐᔪᐊᖅ ᓇᔫᑎᑎᓪᓗᒍ.
Currently Selected:
ᐃᔅᑕᐅᑉ ᐊᒡᓚᖏᑦ 2: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
