ᑖᓂᐊᓕᐅᑉ ᐊᒡᓚᖏᑦ 3
3
ᓂᐱᑯᓁᓴᐅᑉ ᑐᒃᓯᐊᖁᔨᓂᖓ ᐃᓄᓕᒫᓂᒃ ᐃᓄᖑᐊᒧᑦ ᒎᓗᒧᑦ
1ᐊᖓᔪᖅᑳᕐᔪᐊᖅ ᓂᐱᑯᓁᓴ ᓴᓇᑎᑦᓯᕗᖅ ᐃᓄᓐᖑᐊᒥᒃ ᒎᓗᒥᒃ, 90ᓂᒃ ᐃᑎᒐᖕᓂᒃ ᐳᕐᑐᑎᒋᔪᒥᒃ ᐃᑎᒐᖕᓂᒡᓗ 9ᓂᒃ ᓴᓂᒧᑐᑎᒋᔪᒥᒃ, ᐃᓕᓪᓗᒍᓗ ᓇᑎᕐᓇᒧᑦ ᑑᕋᒥᒃ ᐊᑎᓕᖕᒧᑦ, ᐹᐱᓘᓂᐅᑉ ᐃᓚᖓᓄᑦ. 2ᐊᖓᔪᖅᑳᕐᔪᐊᕐᓗ ᓂᐱᑯᓁᓴ ᕾᖁᔨᕗᖅ ᕿᑐᕐᖓᒥᓂᒃ ᑐᖓᓕᓕᒫᒥᓂᒃ, ᓄᓇᒥ ᐊᐅᓚᑦᓯᔨᓂᒃ, ᐅᓇᑕᕐᑐᒃᓮᑦ ᐊᖓᔪᖅᑳᖏᓐᓂᒃ, ᐃᖅᑲᕐᑐᐃᔨᓂᒃ, ᑮᓇᐅᔭᓕᕆᔨᓂᒃ, ᐃᓄᓕᕆᔨᓂᒃ, ᐳᓖᓯᓂᒃ, ᐹᐱᓘᓂᐅᓪᓗ ᐊᕕᒃᑐᕐᓯᒪᓂᖏᓐᓄᑦ ᐊᖓᔪᖅᑳᓂᒃ, ᑖᒃᑯᐊ ᐃᓚᐅᖁᓪᓗᒋᑦ ᐃᓄᓐᖑᐊᑉ ᓴᓇᔭᐅᑎᓯᒪᔭᒥ ᓴᖅᑭᑕᐅᓂᖓᓂ. 3ᑕᕝᕙ ᐊᖓᔪᖅᑳᕐᔪᐊᑉ ᑐᖓᓕᖏᑦ, ᓄᓇᒥᓗ ᐊᐅᓚᑦᓯᔩᑦ, ᐅᓇᑕᕐᑐᒃᓮᓪᓗ ᐊᖓᔪᖅᑳᖏᑦ, ᐃᖅᑲᕐᑐᐃᔩᓪᓗ, ᑮᓇᐅᔭᓕᕆᔩᓪᓗ, ᐃᓄᓕᕆᔩᓪᓗ, ᐳᓖᓰᓪᓗ, ᐹᐱᓘᓂᐅᓪᓗ ᐊᕕᒃᑐᕐᓯᒪᓂᖏᑕ ᐊᐅᓚᑦᓯᔨᖏᑦ, ᑲᑎᕗᑦ ᐊᖓᔪᖅᑳᕐᔪᐊᑉ ᓂᐱᑯᓁᓴᐅᑉ ᐃᓄᓐᖑᐊᓕᐊᖓᑕ, ᓵᖓᓂ ᓇᖏᕐᓗᑎᒃ. 4ᑐᓴᕐᑎᑦᓯᔨᓗ ᓂᐱᖅᑯᕐᑐᓪᓗᓂ ᓂᓪᓕᐊᕗᖅ, “ᐃᒫᒃ ᐱᖁᔭᐅᕗᓯ, ᐃᓕᑦᓯ ᐃᓅᔪᓯ, ᓇᑭᑐᐃᓐᓇᕐᓗ ᐱᓯᒪᔪᓯ, ᐅᖃᐅᓯᖃᑎᒌᖏᑦᑐᓯᓗ: 5ᑐᓴᑐᐊᕈᑦᓯ ᑎᑦᑐᓚᐅᑏᑦ ᐊᑦᔨᒌᖏᑦᑐᑦ, ᓱᐴᒊᓪᓗ ᐊᑦᔨᒌᖏᑦᑐᑦ ᓄᖃᕐᓯᕋᓖᓪᓗ, ᑐᓴᕐᓂᕋᐅᑏᓪᓗ ᓱᓇᑐᐃᓐᓁᑦ ᓂᓪᓕᕐᐸᑕ, ᐹᒻᒪᒃᑎᕐᑐᒃᓴᐅᕗᓯ ᑐᒃᓯᐊᕐᓗᓯᓗ ᐊᖓᔪᖅᑳᕐᔪᐊᑉ ᓂᐱᑯᓁᓴᐅᑉ ᓴᓇᔭᐅᑎᓯᒪᔭᖓᑕ ᐃᓄᓐᖑᐊᑉ ᒎᓘᑉ ᓵᖓᓂ. 6ᓇᓪᓕᐊᑦ ᐹᒻᒪᒃᑎᖏᑦᑐᖅ ᑐᒃᓯᐊᕐᓇᓂᓗ, ᑕᕝᕔᓐᓇᖅ ᐃᒋᑕᐅᓂᐊᕐᐳᖅ ᐃᑯᒪᒧᑦ ᐃᑯᐊᓚᔪᒧᑦ.” 7ᑍᒤᒻᒪᑦ ᑖᒃᑯᐊ ᑐᓴᑐᐊᕋᒥᒃ ᑎᑦᑐᓚᐅᑏᑦ ᐊᑦᔨᒌᖏᑦᑐᑦ, ᓱᐴᒊᓪᓗ ᐊᑦᔨᒌᖏᑦᑐᑦ, ᓄᖃᕐᓯᕋᓖᓪᓗ, ᑐᓴᕐᓂᕋᐅᑏᓪᓗ ᓱᓇᑐᐃᓐᓁᑦ, ᓂᓪᓕᕐᑎᑕᐅᖕᒪᑕ, ᐃᓄᐃᑦ ᓇᑭᑐᐃᓐᓇᖅ ᐱᓯᒪᔪᑦ, ᐅᖃᐅᓯᖃᑎᒌᖏᑦᑐᑦ, ᐹᒻᒪᒃᑎᕐᐳᑦ ᑐᒃᓯᐊᕐᓗᑎᒡᓗ ᐃᓄᓐᖑᐊᒧᑦ ᒎᓗᒧᑦ ᐊᖓᔪᖅᑳᕐᔪᐊᑉ ᓂᐱᑯᓁᓴᐅᑉ ᓴᓇᔭᐅᑎᓯᒪᔭᖓᓄᑦ.
ᑖᓂᐊᓕᐅᑉ ᐱᖃᓐᓇᕆᔭᖏᑕ ᐱᖓᓱᑦ ᓈᓚᖏᓐᓂᕋᕐᑕᐅᓂᖓᑦ
8ᑍᑦᓱᒪᓂ ᑲᐅᓪᑎᐊᒥᐅᑦ ᓯᓚᑐᔪᖁᑎᖏᑕ ᐃᓚᖏᑦ ᕾᕗᑦ, ᔫᑎᓂᒡᓗ ᐊᑭᕋᕐᑐᕐᓗᑎᒃ. 9ᐊᖓᔪᖅᑳᕐᔪᐊᒧᓪᓗ ᓂᐱᑯᓁᓴᒧᑦ ᐅᖃᕐᐳᑦ, “ᐊᖓᔪᖅᑳᕐᔪᐊᖅ, ᐃᓅᒋᑦ ᐃᓱᖃᖏᑦᑐᒧᑦ! 10ᐃᕝᕕᑦ ᐊᖓᔪᖅᑳᕐᔪᐊᖅ ᒪᓕᒋᐊᓕᖕᒥᒃ ᓴᖅᑭᑎᑦᓯᓯᒪᒐᕕᑦ, ᓂᓪᓕᕐᐸᑕ ᑎᑦᑐᓚᐅᑏᑦ ᐊᑦᔨᒌᖏᑦᑐᑦ, ᓱᐴᒊᓪᓗ ᐊᑦᔨᒌᖏᑦᑐᑦ, ᓄᖃᕐᓯᕋᓖᓪᓗ ᐊᑦᔨᒌᖏᑦᑐᑦ ᑐᓴᕐᓂᕋᐅᑏᓪᓗ ᓱᓇᑐᐃᓐᓁᑦ, ᑐᓴᕐᑐᓕᒫᑦ ᐹᒻᒪᒃᑎᖁᓪᓗᒋᑦ ᑐᒃᓯᐊᕐᓗᑎᒡᓗ ᐃᓄᓐᖑᐊᑉ ᒎᓘᑉ ᓵᖓᓂ. 11ᓇᓪᓕᐊᓪᓗ ᐹᒻᒪᒃᑎᖏᑦᑐᖅ ᑐᒃᓯᐊᖏᓪᓗᓂᓗ, ᐃᒋᑕᐅᖁᓪᓗᒍ ᐃᒐᐅᑉ ᐃᓗᐊᓄᑦ ᐃᑯᐊᓚᔪᒧᑦ. 12ᑕᕝᕙᓃᑦᑐᖃᕐᒪᑦ ᔫᑎᓂᒃ, ᐹᐱᓘᓂᐅᑉ ᐊᕕᒃᑐᕐᓯᒪᓂᖏᓐᓄᑦ ᐊᖓᔪᖅᑲᐅᑎᑕᕐᓂᒃ; ᓵᑐᕌᑭ, ᒥᓵᑭ, ᐊᐱᓐᑎᒎᓗ; ᐊᖓᔪᖅᑳᕐᔪᐊᖅ ᐃᓕᖕᓂᒃ ᑖᒃᑯᐊ ᓈᓚᓐᖏᓚᑦ, ᐃᕝᕕᓪᓗ ᒎᑎᖏᓐᓂᒃ ᐱᔨᑦᓯᕈᒪᓇᑎᒃ, ᑐᒃᓯᐊᕐᕕᖃᕈᒪᖏᒻᒪᑕ ᐃᓄᓐᖑᐊᒥᒃ ᓴᓇᔭᐅᑎᓚᐅᕐᑕᕐᓂᒃ.”
13ᓂᐱᑯᓁᓴ ᓂᓐᖓᒃᑐᐊᓘᒐᒥ, ᓵᑐᕌᑭ, ᒥᓵᑭᓗ, ᐊᐱᓐᑎᒎᓗ, ᕾᑕᐅᖁᕔᑦ. ᑖᒃᑯᐊᓗ ᐊᖓᔪᖅᑳᕐᔪᐊᑉ ᓵᖓᓄᑦ ᐱᑎᑕᐅᕗᑦ. 14ᓂᐱᑯᓁᓴᐅᓪᓗ ᐅᖃᐅᑎᕔᑦ, “ᓵᑐᕌᑭ, ᒥᓵᑭ, ᐊᐱᓐᑎᒎ, ᓱᓕᕚ? ᒎᑎᒃᑲᒎᖅ ᐱᔨᑦᓯᕈᒪᖏᓐᓇᑦᓯᐅᒃ, ᐃᓄᓐᖑᐊᕐᓗ ᒎᓗ ᓴᓇᔭᐅᑎᓚᐅᕐᑕᕋ ᑐᒃᓯᐊᕐᕕᒋᔪᒪᖏᓐᓇᑦᓯᐅᒃ? 15ᑎᑦᑐᓚᐅᑏᑦ ᐊᑦᔨᒌᖏᑦᑐᑦ, ᓱᐴᒊᓪᓗ ᐊᑦᔨᒌᖏᑦᑐᑦ, ᓄᖃᕐᑎᓖᓪᓗ ᐊᑦᔨᒌᖏᑦᑐᑦ, ᑐᓴᕐᓂᕋᐅᑏᓪᓗ ᓱᓇᑐᐃᓐᓁᑦ, ᓂᓪᓕᕐᑎᑕᐅᔪᑦ ᑐᓴᕈᑦᓯᐅᒃ, ᐹᒻᒪᒃᑎᕐᓂᐊᕈᑦᓯ ᑐᒃᓯᐊᕐᓗᓯᓗ ᐃᓄᓐᖑᐊᒧᑦ ᓴᓇᔭᐅᑎᓚᐅᕐᑕᓐᓄᑦ ᑍᒫᒃ ᓈᒻᒪᒃᐳᖅ: ᑖᑦᓱᒧᖓᓕ ᑐᒃᓯᐊᕐᓂᐊᖏᒍᑦᓯ, ᐃᒋᑕᐅᓂᐊᕐᐳᓯ ᐃᒐᐅᑉ ᐃᑯᐊᓚᔫᑉ ᐃᓗᐊᓄᑦ. ᑭᓇᐅᓪᓗ ᒎᑎᐅᑉ ᓴᐳᑎᔪᓐᓇᕐᐹᓯ ᐊᒡᒐᓐᓂᑦ?”
16ᑕᕝᕙ ᓵᑐᕌᑭ, ᒥᓵᑭᓗ, ᐊᐱᓐᑎᒎᓗ ᐊᖓᔪᖅᑳᕐᔪᐊᕐᒧᑦ ᑭᐅᕗᑦ, “ᓂᐱᑯᓁᓵ, ᐅᕙᑦᑎᓐᓂᒃ ᓵᖕᓂ ᓇᖕᒥᓂᑦᑎᓐᓂᒃ ᓴᐳᑎᓇᓱᐊᕆᐊᖃᓐᖏᓚᒍᑦ. 17ᐃᒐᐅᑉ ᐃᑯᒪᔫᑉ ᐃᓗᐊᓄᑦ ᐃᒋᑕᐅᒍᑦᑕ, ᒎᑎᐅᑉ ᐱᔨᑦᓯᕐᑕᑦᑕ, ᓴᐳᑎᓂᐊᕐᐹᑎᒍᑦ ᑕᕝᕙᓐᖓᑦ, ᐃᕝᕕᓪᓗ ᐊᖓᔪᖅᑳᕐᔪᐊᖅ ᐱᔪᓐᓇᕐᓂᕐᓂᑦ ᓴᐳᑎᓂᐊᕆᕚᑎᒍᑦ. 18ᓴᐳᑎᖏᒃᑲᓗᐊᕐᐸᑎᒍᑦ, ᐊᖓᔪᖅᑳᕐᔪᐊᖅ, ᖃᐅᔨᒪᖁᕙᑦᑎᒋᑦ, ᒎᑎᑎᑦ ᐱᔨᑦᓯᕈᒪᖏᓐᓇᑦᑎᒍ, ᐃᓄᓐᖑᐊᕐᓗ ᒎᓗ ᓴᓇᔭᐅᑎᓚᐅᕐᑍᑦ ᑐᒃᓯᐊᕐᕕᒋᔪᒪᓐᖏᓚᕗᑦ.”
ᑖᓂᐊᓕᐅᑉ ᐱᖃᓐᓇᕆᔭᖏᑕ ᐱᖓᓱᑦ ᑐᖁᑕᒃᓴᓐᖑᕐᑎᑕᐅᓂᖏᑦ
19ᓂᐱᑯᓁᓴᓕ ᓂᓐᖓᒃᑐᒻᒪᕆᐊᓘᒐᒥ, ᓵᑐᕌᑭᒧᑦ, ᒥᓵᑭᒧᓪᓗ, ᐊᐱᓐᑎᒎᒧᓪᓗ, ᑮᓇᖓ ᐊᓯᑦᔨᕐᐳᖅ ᑖᒃᑯᓄᖓ: ᐱᖁᔨᕗᖅ ᐃᒐᐅᑉ ᐃᑯᒪᖓ ᐃᑯᐊᓪᓚᒃᑎᑕᐅᖁᓪᓗᒍ ᐆᓇᕐᓂᕆᕙᒃᑕᖓᓂᑦ 7ᐃᕐᑑᑎᓪᓗᐊᖓᓂᒃ ᐆᓇᕐᓂᕐᓴᐅᓕᖁᓪᓗᒍ. 20ᐱᖁᔨᓪᓗᓂᓗ ᐅᓇᑕᕐᑐᒃᓴᖁᑎᒥ ᓴᓐᖏᓂᕐᐹᖏᓐᓂᒃ ᐊᑦᑐᖏᕐᓱᐃᖁᓪᓗᒋ ᓵᑐᕌᑭᒥᒃ ᒥᓵᑭᒥᒃ, ᐊᐱᓐᑎᒎᒥᒡᓗ, ᐃᒋᓪᓗᒋᓗ ᐃᒐᒧᑦ ᐃᑯᐊᓚᔪᐊᓗᖕᒧᑦ. 21ᑖᒃᑯᐊ ᐊᖑᑎᑦ ᐊᓐᓄᕌᕐᓯᒪᓪᓗᑎᒃ, ᖃᕐᓕᒃᓯᒪᓪᓗᑎᒡᓗ, ᓇᓴᕐᓯᒪᓪᓗᑎᒡᓗ, ᐊᓯᖏᓐᓂᒡᓗ ᐊᑐᕐᓗᑎᒃ ᕿᓚᒃᓱᕐᑕᐅᕗᑦ, ᐃᒋᑕᐅᓪᓗᑎᒡᓗ ᐃᒐᒧᑦ ᐃᑯᐊᓚᔪᕐᔪᐊᒧᑦ. 22ᐊᖓᔪᖅᑳᕐᔪᐊᑉ ᑕᕝᕙᑲᐅᑎᒋ ᐱᖁᔨᓪᓚᕆᖕᓂᖓᓄᑦ ᐃᒐᐅᓪᓗ ᐆᓇᓗᐊᓕᕐᓂᖓᓄᑦ, ᐅᓇᑕᕐᑐᒃᓮᑦ ᑕᕝᕗᖓᐅᑦᔨᔪᑦ ᓵᑐᕌᑭᒥᒃ ᒥᓵᑭᒥᒡᓗ ᐊᐱᓐᑎᒎᒥᒡᓗ, ᐃᑯᒪᐅᑉ ᐊᓂᓪᓚᖃᑦᑕᕐᓂᖓᓄᑦ ᐆᓪᓗᑎᒃ ᑐᖁᕗᑦ. 23ᐊᖑᑎᓪᓕ ᑖᒃᑯᐊ ᐱᖓᓱᑦ ᓵᑐᕌᑭ, ᒥᓵᑭᓗ, ᐊᐱᓐᑎᒎᓗ ᐊᑦᑐᖏᕐᓱᕐᓯᒪᓪᓗᑎᒃ ᑲᑕᒃᐳᑦ ᐃᑯᒪᔪᕐᔪᐊᑉ ᕿᑎᖓᓄᑦ.
24ᑕᕝᕙ ᐊᖓᔪᖅᑳᕐᔪᐊᖅ ᓂᐱᑯᓁᓴ ᑐᐊᕕᕐᓗᓂ ᓂᑯᕕᑉᐳᖅ, ᑕᑕᒥᓯᒪᓪᓗᓂᓗ ᐃᑲᔪᕐᑎᒥᓄᑦ ᐅᖃᕐᐳᖅ, “ᐃᑯᒪᒧᑦ ᐃᒋᑦᓯᖅᑲᐅᓐᖏᓚᒎᑦ? ᐊᑦᑐᖏᕐᓱᕐᓯᒪᔪᓂᒃ ᐊᖑᑎᓂᒃ ᐱᖓᓱᓂᒃ?” ᑖᒃᑯᐊ ᑭᐅᕗᑦ, “ᐊᖓᔪᖅᑳᕐᔪᐊᖅ, ᑍᒫᒃ ᐱᖅᑲᐅᕗᒍᑦ.”
25ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑕᑯᒋᑦ! ᑕᑯᕗᖓ ᐊᖑᑎᓂᒃ ᓯᑕᒪᓂᒃ, ᐃᑯᒪᐅᑉ ᐃᓗᐊᓂ ᐱᓱᑲᑕᒃᑐᓂᒃ ᖃᓄᐃᖏᑦᑐᓂᒃ; ᓯᑕᒪᖓᓪᓗ ᒎᑎᑦ ᐃᕐᓂᖓᑐᑦ ᑕᐅᑦᑐᖃᕐᐳᖅ.”
ᐊᖑᑎᑦ ᐱᖓᓱᑦ ᐃᑯᒪᒥᑦ ᐊᓂᑎᑕᐅᓂᖏᑦ ᐊᖓᔪᖅᑳᓐᖑᕐᑎᑕᐅᓂᖏᓪᓗ
26ᓂᐱᑯᓁᓴᓕ ᐃᒐᐅᑉ ᐃᑯᐊᓚᔫᑉ ᐹᖓ ᖃᒡᓕᓪᓗᓂᐅᒃ ᕾᒐᓛᕐᐳᖅ ᐅᖃᕐᓗᓂ, “ᓵᑐᕌᑭ, ᒥᓵᑭ, ᐊᐱᓐᑎᒎ, ᒎᑎᐅᑉ ᖁᑦᓯᖕᓂᕐᐹᑉ ᐱᔨᖏᑦ, ᐊᓂᓕᕆᑦᓯ! ᕾᓗᓯᓗ!” ᑕᕝᕙ ᓵᑐᕌᑭ ᒥᓵᑭ ᐊᐱᓐᑎᒎᓗ ᐃᑯᒪᒥᑦ ᐊᓂᕗᑦ. 27ᐊᖓᔪᖅᑳᕐᔪᐊᑉ ᑐᖓᓕᖏᑦ, ᓄᓇᒥᓗ ᐊᐅᓚᑦᓯᔩᑦ, ᐊᖓᔪᖅᑳᕐᔪᐊᓪᓗ ᐃᑲᔪᕐᑎᖏᑦ ᑲᑎᒪᔪᑦ ᑕᕝᕗᖓ ᑲᑎᕗᑦ ᑖᒃᑯᓄᖓ. ᑕᑯᓪᓗᑎᒃᓗ ᑎᒥᖏᑦ ᐃᑭᓯᒪᖏᒻᒪᑕ, ᓄᔭᖏᓪᓘᓐᓃᑦ ᐃᑭᓯᒪᔪᖃᓐᖏᓚᑦ, ᐊᓐᓄᕌᖏᓪᓗ ᐃᑭᓯᒪᓇᑎᒃ, ᐳᔪᕐᓱᓐᓂᓐᓇᑎᒡᓘᓐᓃᑦ.
28ᑕᕝᕙ ᓂᐱᑯᓁᓴ ᐅᖃᕐᐳᖅ, “ᓵᑐᕌᑭᐅᑉ ᒥᓵᑭᐅᓪᓗ ᐊᐱᓐᑎᒎᓪᓗ, ᒎᑎᖓᑦ ᓂᕐᑐᕐᑕᐅᓕ, ᐂᖏᓕᖁᑎᓂ ᑎᓕᖕᒪᒍ ᐱᔨᓂᓗ ᓴᐳᑎᓪᓗᒋᑦ, ᑖᑦᓱᒥᖓ ᑕᑎᖃᕐᒪᑕ, ᐊᖓᔪᖅᑳᕐᔪᐊᑉ ᐱᖁᔨᓂᖓ ᐊᑐᕐᓇᒍ ᑎᒥᑎᒃ ᐊᓐᓂᕆᓇᒋᑦ, ᓇᖕᒥᓂᖅ ᒎᑎᑎᒃ ᐱᔨᑦᓯᕈᒪᓪᓗᒍ, ᐊᓯᖏᓐᓂᒃ ᐱᔨᑦᓯᕈᒪᓇᑎᒃ ᑐᒃᓯᐊᕐᕕᖃᕈᒪᓇᑎᒡᓗ.
29“ᑍᒤᒻᒪᑦ ᐱᖁᔭᓕᐅᓕᕐᐳᖓ ᐃᓄᐃᑦ ᓇᑭᑐᐃᓐᓇᖅ ᐱᓯᒪᔪᑦ ᐅᖃᐅᓯᖃᑎᒌᖏᑦᑐᓪᓗ, ᓇᓪᓕᐊᓐᓂᒃ ᐊᑭᕋᕐᑐᕐᓂᕐᒥᒃ ᐅᖃᕐᑐᖃᕐᐸᑦ, ᓵᑐᕌᑭᐅᑉ ᒥᓵᑭᐅᓪᓗ ᐊᐱᓐᑎᒎᓪᓗ ᒎᑎᖓᓐᓄᑦ, ᑍᒤᓕᐅᕐᑑᑉ ᑎᒥᖓ ᐊᕕᒃᑐᕐᑕᐅᔪᒃᓴᐅᕗᖅ ᐃᒡᓗᖓᓗ ᓯᖁᒥᑕᐅᓗᓂ ᓴᓂᑐᐃᓐᓇᐅᓕᕐᓗᓂ: ᒎᑎᑕᖃᖏᒻᒪᑦ ᐊᓯᐊᓂᒃ ᑍᒫᒃ ᓴᐳᑦᔨᔪᓐᓇᕐᑎᒋᔪᒥᒃ.”
30ᐊᖓᔪᖅᑳᕐᔪᐊᑉ ᓵᑐᕌᑭ ᒥᓵᑭᓗ, ᐊᐱᓐᑎᒎᓗ ᐊᖓᔪᖅᑳᓐᖑᕐᑎᒃᑲᓐᓂᕐᐰᑦ ᐹᐱᓘᓂᒥ ᓄᓇᒥ.
Currently Selected:
ᑖᓂᐊᓕᐅᑉ ᐊᒡᓚᖏᑦ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
