ᐋᐴᓯᑕᓖᑦ ᐱᓂᐊᕐᓂᖏᑦ 27

ᐸᐅᓗᓯᐅᑉ ᕉᒪᒧᑦ ᐊᐅᓪᓚᕈᑦᔭᐅᓂᖓ ᐅᒥᐊᕐᔪᐊᒃᑯᑦ

1ᐃᑕᓕᒧᑦ ᐊᐅᓪᓚᕐᓂᐊᕐᓂᕗᑦ ᐋᖅᑭᒃᑕᐅᖕᒪᑦ, ᐸᐅᓗᓯ ᑎᒍᔭᐅᓯᒪᔪᓪᓗ ᐊᓯᖏᑦ ᑲᒪᒋᔭᐅᑎᑕᐅᕗᑦ ᔫᓕᐊᓯᒥᒃ ᐊᑎᓕᖕᒧᑦ, ᐅᓇᑕᕐᑐᒃᓴᓄᑦ 100ᓄᑦ ᐊᖓᔪᖅᑳᖑᔪᒧᑦ, ᑖᒃᑯᓄᖓ ᕉᒪᒥᐅᑦ ᐊᖓᔪᖅᑳᕐᔪᐊᖓᑕ ᐅᓇᑕᕐᑐᒃᓴᖁᑎᖏᓐᓂᒃ ᑍᔭᐅᔪᓄᑦ. 2ᐅᒥᐊᕐᔪᐊᒧᓪᓗ ᐃᑭᕗᒍᑦ ᐊᑐᕋᒤᑎᐊᒥᑦ ᐱᔪᒧᑦ, ᓄᓇᐅᑉ ᐂᓯᐊᑉ ᐅᒥᐊᕐᔪᐊᒃᑯᕕᖏᑎᒍᑦ ᐊᖅᑯᓵᕐᓂᐊᕐᓗᑕ, ᐊᐅᓪᓚᕐᐳᒍᑦ, ᐊᕆᔅᑕᑰᓯᐅᑉ ᐃᓚᒋᕚᑎᒍ, ᑖᓐᓇ ᑎᓴᓗᓁᑲᒥᐅᑕᖅ ᒫᓯᑑᓂᐊᒦᑦᑐᒥ.

3ᖃᐅᑎᓪᓗᒍ ᓮᑐᓂᒧᑦ ᑎᑭᑉᐳᒍᑦ; ᔫᓕᐊᓯ ᐸᐅᓗᓯᒥᒃ ᐱᑦᓯᐊᕋᒥ, ᐃᓚᓐᓈᕆᔭᖏᓐᓄᑦ ᓄᓈᕈᓐᓇᕐᑎᑉᐹ ᑭᓐᖒᒪᔭᖏᓐᓂᒃ ᑐᓂᓯᕕᐅᖁᓪᓗᒍ. 4ᑕᕝᕙᓐᖓᑦ ᐊᐅᓪᓚᕋᑕ ᕿᑭᕐᑕᐅᑉ ᓮᐳᕋᓯᐅᑉ ᐅᖅᑯᐊᒎᕐᐳᒍᑦ, ᐊᒡᒍᕋᕐᑐᐊᓘᒐᑦᑕ. 5ᐃᑳᕋᑦᑕᓗ ᐃᒪᕕᐊᓗᒃᑯᑦ ᓯᓕᓯᐊᑉ ᐸᒻᐱᓕᐊᓪᓗ ᓵᖓᒍᑦ ᒤᕋᒧᑦ ᑎᑭᑉᐳᒍᑦ ᓔᓯᐊᒦᑦᑐᒧᑦ. 6ᑕᕝᕙᓂ ᐅᓇᑕᕐᑐᒃᓴᓄᑦ ᐊᖓᔪᖅᑳᖑᔪᖅ ᑲᑎᓯᒐᒥ ᐅᒥᐊᕐᔪᐊᒥᒃ ᐊᓕᒃᓵᓐᑐᕆᐊᒥᐅᑕᕐᒥᒃ ᐃᑕᓕᒨᕐᐸᓪᓕᐊᔪᒥᒃ, ᑕᕝᕗᖓ ᐃᑭᑎᑉᐹᑎᒍᑦ.

7ᐅᒥᐊᕐᑐᕐᓗᑕ ᓱᒃᑬᑉᐳᒍᑦ ᐊᒡᒍᒧᑦ ᐃᖏᕐᕋᓇᓱᐊᒡᒐᑐᐃᓐᓇᕐᓗᑕ ᐅᓪᓗᓂᒃ ᐊᒥᓱᓂᒃ ᓁᑕᓯᐅᑉ ᖃᓂᒋᔭᖓᓄᑦ ᑎᑭᑍᓐᓇᕐᐳᒍᑦ, ᐊᓄᕆᒧᑦ ᐅᐸᒍᒪᔭᑦᑎᓐᓄᑦ ᑐᕌᕐᑎᑕᐅᔪᓐᓇᖏᓐᓇᑦᑕ ᕿᑭᕐᑕᐅᑉ ᑯᕇᑎᒥᒃ ᐊᑎᓕᐅᑉ ᐅᖅᑯᐊᒍᑦ ᐅᒥᐊᕐᑐᕐᐳᒍᑦ, ᓵᓪᒧᓂᐅᑉ ᓴᓂᐊᒎᕐᓗᑕ. 8ᓄᓇᐅᑉ ᖃᓂᒋᔮᒍᑦ ᓱᒃᑬᑦᑐᒥᒃ ᐃᖏᕐᕋᓇᓱᐊᒡᒐᑐᐃᓐᓇᕐᓗᑕ, ᐅᒥᐊᕐᔪᐊᒃᑯᕕᑦᓯᐊᒥᒃ ᑍᔭᐅᔪᒧᑦ ᑎᑭᑉᐳᒍᑦ, ᓄᓇᓖᑦ ᓚᓯᐊᒥᒃ ᐊᑎᓖᑦ ᖃᓂᒋᔭᖓᓄᑦ.

9ᐊᑯᓂ ᑕᕝᕙᓃᓕᕐᐳᒍᑦ, ᐅᒥᐊᕐᑐᒃᑲᓐᓂᕆᐊᒃᓴᖅ ᐊᒡᓛᑦ ᓇᖏᐊᕐᓇᕐᓯᖕᒪᑦ, ᓂᕆᑦᑍᓕᕕᒃ ᔫᑎᑦ ᓇᓪᓕᐅᓐᓂᕐᓯᐅᕐᕕᖓᑦ#27:9 ᐅᑭᐊᒃᓵᒃᑯᑦ ᓰᑏᐱᕆᒥ ᐆᒃᑑᐱᕆᒥᓗ ᓇᓪᓕᐅᑎᓲᖅ ᖄᖏᕐᓯᒪᓕᕐᒪᑦ, ᐸᐅᓗᓯᐅᑉ ᐅᖃᐅᑎᓕᕐᐰᑦ: 10“ᐃᓕᑦᓯ ᐊᖑᑏᑦ, ᖃᐅᔨᒐᒪ ᐅᒥᐊᕐᑐᕐᓂᕗᑦ ᑕᒪᓐᓇ ᓇᖏᐊᕐᓇᕐᑐᐊᓘᓂᐊᓕᕐᒪᑦ; ᐅᒥᐊᕐᔪᐊᕗᑦ ᐅᓯᖏᑦ ᐊᓯᐅᔨᓂᐊᓕᕋᑦᑎᒍ, ᐃᓅᓯᕗᓪᓘᓐᓃᑦ ᐊᒡᓛᑦ.” 11ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐸᐅᓗᓯᐅᑉ ᐅᖃᐅᓯᖓᓂᒃ ᓈᓚᓐᖏᓚᖅ, ᐅᒥᐊᕐᔪᐊᑉ ᐊᖁᑎᖓ, ᐅᒥᐊᕐᔪᐊᒥᒃ ᓇᖕᒥᓂᓕᒃ ᓈᓚᖔᕈᒪᓪᓗᒋᒃ. 12ᐅᒥᐊᕐᔪᐊᖃᕐᕕᒃ ᑖᓐᓇ ᐅᑭᐅᒥ ᐊᑲᐅᒐᔭᖏᒻᒪᑦ, ᐅᓄᕐᓂᕐᓮᑦ ᐊᐅᓪᓚᕈᒪᓕᕐᐳᑦ, ᕖᓂᒃᓯᒧᑦ ᑎᑭᓐᓇᓱᐊᕈᒪᓪᓗᑎᒃ, ᐅᑭᐅᖑᓂᖓᓂ ᑍᑲᓃᑦᑐᒪᓪᓗᑎᒃ, ᑖᓐᓇ ᕖᓂᒃᓯ ᐅᒥᐊᕐᔪᐊᒃᑯᕕᒃ ᑯᕇᑎᒥ ᓯᕿᓂᐅᑉ ᓂᐱᕕᐊᓄᑦ ᓵᓐᖓᖕᒪᑦ.

ᐃᒫᓂ ᐊᖅᑯᓇᕐᓯᐅᕐᓂᖓᑦ

13ᐅᓪᓗᓪᓗᐊᑉ ᓇᓛᓂᑦ ᐊᓄᕋᔮᓕᕐᒪᑦ, ᐃᖏᕐᕋᕕᒋᔪᒪᔭᒥᖕᓄᑦ ᓈᒻᒪᓈᕐᓯᒪᓇᓱᒋᓕᕐᐹᑦ, ᑭᓴᐅᑏᑦ ᐊᒧᓪᓗᒋᑦ, ᑯᕇᑎᐅᑉ ᖃᓂᒋᔮᒍᑦ ᐅᒥᐊᕐᑐᓕᕐᐳᒍᑦ. 14ᐊᑯᓂᐅᖏᑦᑐᖅ ᐊᓄᕆ ᓴᓐᖏᔪᐊᓗᒃ ᑎᑭᑉᐳᖅ ᑍᔭᐅᔪᖅ ᓯᕘᕋᓇᕐᓂᕐᐹᒥᒃ#27:14 ᔫᕈᑯᐃᓕᒥᒃ ᑍᔭᐅᔪᖅ, ᒍᕇᑭᑎᑐᑦ ᓛᑎᓂᑎᑐᓪᓗ ᕿᑭᕐᑕᐅᑉ ᑯᕇᑎᐅᑉ ᓇᓛᓂᑦ ᐊᓄᕌᕐᑐᖅ. 15ᐅᒥᐊᕐᔪᐊᖅ ᐊᓄᕆᕐᔪᐊᕐᒧᑦ ᑎᑭᑕᐅᕗᖅ, ᐊᒡᒍᕋᕐᕕᒋᔭᕆᐊᖓ ᓴᐱᕐᓇᕐᓯᖕᒪᑦ, ᐊᓄᕆᒧᑦ ᑎᒃᑕᐅᑐᐃᓐᓇᓕᕐᐳᒍᑦ. 16ᕿᑭᕐᑕᐅᑉ ᒥᑭᔫᑉ ᑲᐅᑕᒥᒃ ᑍᔭᐅᔫᑉ ᐅᖅᑯᐊᒎᕋᑦᑕ, ᐅᒥᐊᑯᓗᖁᑎᑦᑎᓐᓂᒃ ᐱᓯᒪᓇᓱᐊᕐᓗᑕ ᓴᐱᓕᑲᓴᒃᐳᒍᑦ; 17ᐊᖑᑎᓂᓪᓕ ᐊᒧᓕᕐᑕᐅᓪᓗᓂ ᐅᒥᐊᕐᔪᐊᕐᒧᑦ ᐅᓯᓕᐅᑦᔭᐅᕗᖅ, ᐊᒃᖢᓈᓄᑦ ᐅᒥᐊᕐᔪᐊᖅ ᐅᖓᑕᖏᕐᓗᒍ ᓂᒥᕐᐹᑦ ᐊᑦᑕᕐᓁᓕᓇᓱᐊᕐᓗᒍ, ᐃᒃᑲᕐᕈᒧᑦ ᐃᒃᑲᕐᕆᓐᓂᐊᕋᓱᒋᓕᕋᒥᒃ ᓲᕐᑎᓯᒥᒃ ᐊᑎᓕᖕᒧᑦ; ᑎᖏᕐᕋᐅᑕᖅ ᑲᑕᒃᑎᓪᓗᒍ ᐅᒥᐊᕐᔪᐊᖅ ᐊᓄᕆᒧᑦ ᑎᒃᑕᐅᑐᐃᓐᓇᕐᑎᓕᕐᐹᑦ. 18ᐊᒃᓱᒻᒪᕆᐊᓗᒃ ᓱᓕ ᐊᖅᑯᓇᕐᓯᐅᕋᑦᑕ, ᖃᐅᑎᓪᓗᒍ ᐅᒥᐊᕐᔪᐊᑉ ᐅᓯᖏᑦ ᐃᒋᐅᖃᕐᑕᐅᓕᕐᐳᑦ; 19ᐅᓪᓗᐃᑦ ᐱᖓᔪᐊᓐᓂ ᐅᒥᐊᕐᔪᐊᑉ ᐃᓚᒃᓴᖏᑕ ᐃᓚᖏᑦ ᓱᓇᒃᑯᑖᖏᑦ ᐃᒋᐅᖅᑲᕐᑕᐅᓕᕆᕗᑦ. 20ᓯᕿᓂᕐᒥᒃ ᐅᓪᓗᕆᐊᓂᒡᓘᓐᓃᑦ ᑕᑯᓚᐅᖏᓐᓇᑦᑕ ᐅᓪᓗᓂᒃ ᐊᒥᓱᓂᒃ, ᐊᒃᓱᒻᒪᕆᐊᓗᒃ ᓱᓕ ᐊᓄᕋᕐᒪᑦ, ᐃᓅᓂᐊᕆᐊᒃᓴᖅ ᖁᓚᓕᕐᐳᒍᑦ.

21ᐃᓄᖏᑦ ᐊᑯᓂ ᓂᕆᔪᓐᓃᕐᒪᑕ, ᐸᐅᓗᓯ ᓂᑯᕕᓪᓗᓂ ᐅᖃᐅᑎᕔᑦ, “ᐅᖃᐅᓯᒃᑲ ᓈᓚᓚᐅᕈᑦᓯᐅᒃ ᑯᕇᑎᒥᑦ ᐊᐅᓪᓚᕈᒪᑎᓐᓇᖓ ᓇᖏᐊᕐᓇᕐᑐᒧᑦ ᑎᑭᒐᔭᓚᐅᓐᖏᓚᒍᑦ ᓱᓇᑐᐃᓐᓇᑦᑎᓐᓂᒡᓘᓐᓃᑦ ᐊᓯᐅᔨᒐᔭᓚᐅᓐᖏᓚᒍᑦ. 22ᓯᕘᕋᖁᓐᖏᓚᑦᓯᓕ; ᓇᓕᑦᓯᓐᓂᒡᓘᓐᓃᑦ ᐊᓯᐅᔪᖃᕐᓂᐊᖏᒻᒪᑦ, ᐅᒥᐊᕐᔪᐊᖅ ᑭᓯᒥ ᐊᓯᕈᕐᓂᐊᕐᐳᖅ. 23ᐅᓐᓄᐊᖅ ᒎᑎᐅᑉ ᐱᔨᑦᓯᕐᑕᒪ ᐂᖏᓕᖓ ᓴᓂᓐᓂ ᓇᖏᓚᐅᕐᐳᖅ, 24ᐅᖃᕐᓗᓂᓗ, ‘ᐸᐅᓗᓰ ᓯᕘᕋᓇᒃ; ᐊᖓᔪᖅᑳᕐᔪᐊᒻᒪᕆᐅᑉ ᓰᓴᕆᐅᑉ ᓵᖓᓂ ᐃᖅᑲᕐᑐᕐᑕᐅᔭᕆᐊᖃᕋᕕᑦ; ᒎᑎᐅᓪᓗ ᐱᑦᓯᐊᕐᓂᕐᒥᓄᑦ ᐅᒥᐊᕐᑐᖃᑎᕕᑦ ᐃᓅᓯᖏᑦ ᓴᐳᑎᓯᒪᓂᐊᕐᐰᑦ ᐱᓪᓗᑎᑦ.’ 25ᑕᒪᓐᓇ ᐱᓪᓗᒍ ᓇᖏᐊᕐᑍᓕᒋᑦᓯ, ᒎᑎ ᐅᒃᐱᕆᒐᒃᑯ, ᐅᖃᐅᓯᕆᔭᖓ ᓱᓕᓂᐊᕐᒪᑦ. 26ᑭᓯᐊᓂᓕ ᐃᒃᑲᕐᕆᓐᓂᐊᕐᐳᒍᑦ ᕿᑭᕐᑍᑦ ᓇᓪᓕᐊᓐᓄᑐᐃᓐᓇᖅ.”

27ᐅᓐᓄᐊᑦ 14ᒋᓕᕐᐹᑦ ᓱᓕ ᐃᒪᕐᕕᖕᒥ ᒥᑎᑐᕇᓂᐊᒥ ᑎᒃᑕᐅᓪᓗᑕ, ᐅᒥᐊᕐᑐᕐᑏᑦ ᐅᓐᓄᐊᑉ ᕿᑎᖓᓂ ᓄᓇᒧᑦ ᖃᒡᓕᓇᓱᒋᓕᕐᐳᑦ. 28ᐃᖅᑲᖓᓂᒃ ᖃᐅᔨᓴᕋᒥᒃ ᐊᒃᓗᓈᒧᑦ ᖃᐅᔨᕗᑦ 120ᓂᒃ ᐃᑎᒐᖕᓂᒃ ᐃᑎᔫᑎᒋᖕᒪᑦ; ᑭᖑᓂᖓᒍᑦ ᐆᒃᑐᒃᑲᓐᓂᕐᒥᒐᒥᒃ 90ᓂᒃ ᐃᑎᒐᖕᓂ ᐃᑎᓂᖃᓕᕐᐳᖅ. 29ᓯᕘᕋᓕᕋᒥᒃ ᐅᒥᐊᕐᔪᐊᖅ ᐃᒃᑲᕐᕆᓐᓂᐊᕋᓱᒋᓪᓗᒍ ᐅᔭᖅᑲᓄᑦ, ᓯᑕᒪᓂᒃ ᑭᓴᐅᑎᓂᒃ ᓂᖏᑎᑦᓯᕗᑦ ᐅᒥᐊᕐᔪᐊᑉ ᐊᖁᐊᒍᑦ, ᕿᓚᓈᕐᓗᑎᒃ ᐅᓪᓛᒃᑯᑦ ᖃᐅᒻᒪᖕᓂᐊᕐᑐᒥᒃ. 30ᐅᒥᐊᕐᑐᕐᑎᑦ ᐃᓚᖏᑦ ᐅᒥᐊᕐᔪᐊᒥᑦ ᕿᒫᓇᓱᐊᓕᕐᐳᑦ, ᐅᒥᐊᒥᒃ ᒥᑭᔪᒥᒃ ᓂᖏᑎᑦᓯᓪᓗᑎᒃ, ᑭᓴᐅᑎᓂᒃ ᓂᖏᑎᑦᓯᒐᓱᓐᖑᐊᕐᓗᑎᒃ ᐅᒥᐊᕐᔪᐊᑉ ᓯᕗᐊᒍᑦ. 31ᐸᐅᓗᓯ ᐅᖃᓕᕐᐳᖅ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓄᑦ ᐅᓇᑕᕐᑐᒃᓴᓄᓪᓗ, “ᐅᑯᐊ ᐅᒥᐊᕐᑐᕐᑏᑦ ᐅᒥᐊᕐᔪᐊᕐᒦᖏᑉᐸᑕ, ᐃᓕᑦᓯᑦᑕᐅᖅ ᐃᓅᓂᐊᓐᖏᓚᓯ.” 32ᐅᓇᑕᕐᑐᒃᓮᑦ ᐊᒃᖢᓈᑦ ᑭᐱᕔᑦ ᐅᒥᐊᑉ ᒥᑭᔫᑉ ᐱᑐᒃᓯᒪᐅᑎᒋᔭᖏᑦ, ᐅᒥᐊᑯᓗᒃ ᑎᒃᑕᐅᓕᕐᐳᖅ, ᐅᒥᐊᕐᔪᐊᒥᑦ.

33ᐅᓪᓛᒃᑯᑦ ᖃᐅᒻᒪᓚᐅᕐᑎᓐᓇᒍ ᓱᓕ ᐸᐅᓗᓯᐅᑉ ᑕᒪᕐᒥᒃ ᓂᕆᖁᓕᕐᐰᑦ, ᐅᖃᕐᓗᓂ, “ᐅᓪᓗᓂᒃ 14ᓂᒃ, ᖃᓄᐃᓕᖓᓂᐊᕆᐊᒃᓴᖅ ᓇᓗᓁᓐᓇᕐᒪᑦ, ᓱᓇᒥᒡᓘᓐᓃᑦ ᓂᕆᓚᐅᖕᒋᓐᓇᑦᓯ. 34ᒫᓐᓇᓕ ᓂᕆᖁᓕᕐᐸᑦᓯ ᓄᑭᖃᑦᓯᐊᖁᓪᓗᓯ; ᓄᔭᕐᒥᒃ ᐊᑕᐅᓯᕐᒥᒡᓘᓐᓃᑦ ᐊᓯᐅᔪᖃᕐᓂᐊᖏᒻᒪᑦ ᐃᓕᑦᓯᓐᓂᑦ.” 35ᑍᒫᒃ ᐅᖃᕇᕋᒥ ᓂᐊᖂᔭᒥᒃ ᑎᒍᓯᓪᓗᓂ ᒎᑎ ᖁᔭᒋᕚ ᐃᓄᐃᑦ ᑕᒃᑯᐊᓂ, ᐊᕕᒡᓗᒍᓗ ᓂᕆᓕᕐᐳᖅ. 36ᑕᒪᕐᒥᒡᓗ ᓯᕘᕋᔪᓐᓃᕐᓗᑎᒃ, ᓂᕆᓕᕐᐳᑦ. 37ᐅᒥᐊᕐᔪᐊᒥ ᐃᑭᒪᔪᒍᑦ ᑕᒪᑦᑕ ᑲᑎᓪᓗᑕ 276ᐅᓚᐅᕐᐳᒍᑦ. 38ᓂᕆᔭᕇᕋᒥᒃ, ᐅᒥᐊᕐᔪᐊᖅ ᐅᕿᒡᓕᒋᐊᕋᓱᐊᓕᕐᐹᑦ ᓂᐊᖂᔭᒃᓮᑦ ᐃᒫᓄᑦ ᐃᒋᐅᖅᑲᕐᓗᒋᑦ.

ᐅᒦᔭᕐᓂᕗᑦ

39ᖃᐅᒻᒪᒃᑎᓪᓗᒍ, ᐅᒥᐊᕐᑐᕐᑏᑦ ᓄᓇ ᐃᓕᑕᕆᓐᖏᓛᑦ, ᑕᑯᓪᓗᑎᒃ ᑲᖏᕐᓱᖕᒥᒃ ᓯᒡᔭᖓ ᓯᐅᕋᔮᒥᒃ, ᑕᕝᕗᖓ ᐅᒥᐊᕐᔪᐊᖅ ᐃᒃᑲᕐᕆᑎᓐᓇᓱᐊᕈᒪᓕᕐᐹᑦ ᐊᔪᖏᒃᑯᑎᒃ. 40ᑕᕝᕙ ᑭᓴᐅᑏᑦ ᐲᕐᐰᑦ ᐃᐱᕅᓐᓇᕐᓗᒋᑦ ᐃᒫᓄᑦ, ᐊᖂᑎᐅᑉ ᐊᑦᑐᖏᕐᓯᒪᐅᑎᖏᑦ ᕿᓚᕈᑦᔮᕐᐰᑦ; ᑎᖏᕐᕋᐅᑕᖅ ᓯᕗᐊᓃᑦᑐᖅ ᐋᖅᑭᒃᐹᑦ ᓯᒡᔭᖅ ᑐᕌᕋᓱᐊᕐᓗᒍ. 41ᐃᒃᑲᕐᕈᕐᒧᓪᓕ ᑎᑭᐅᑎᒐᒥᒃ ᐃᒃᑲᕐᕆᑉᐳᑦ ᐊᕙᑖ ᐃᑎᔫᓪᓗᓂ; ᐅᒥᐊᕐᔪᐊᑉ ᓯᕗᐊ ᐊᐅᓚᔪᓐᓃᕐᓗᓂ, ᐅᒥᐊᕐᔪᐊᓪᓕ ᐊᖁᐊ ᒪᓖᑦ ᒥᕿᑦᑕᕐᓂᖏᓐᓄᑦ ᓱᕋᒃᑕᐅᓕᕐᐳᖅ. 42ᑕᕝᕙ ᐅᓇᑕᕐᑐᒃᓮᑦ ᑎᒍᔭᐅᓯᒪᔪᓂᒃ ᑐᖁᕅᔪᒪᓕᕐᐳᑦ, ᐳᐃᑦᔭᕐᓗᑎᒃ ᕿᒫᓂᐊᕋᓱᒋᓪᓗᒋᑦ; 43ᐅᓇᑕᕐᑐᒃᓮᓪᓕ ᐊᖓᔪᖅᑳᖓᑦᑕ ᐸᐅᓗᓯ ᑐᖁᑕᐅᖁᖏᓐᓇᒥᐅᒃ ᐃᓂᕐᑎᕐᐰᑦ. ᐳᐃᑦᔭᕈᓐᓇᕐᑐᑦ ᓯᕗᓪᓕᐅᓗᑎᒃ ᐃᒫᓄᑦ ᒥᓯᖁᕔᑦ ᓄᓇᒧᑦ ᐳᐃᑦᔭᖁᓪᓗᒋᑦ, 44ᐃᓚᖏᑦ ᓄᓇᒧᐊᓕᕐᐳᑦ, ᕿᔪᖕᓂᒃ ᐳᒃᑕᑦᔪᑎᖃᕐᓗᑎᒃ ᐅᒥᐊᕐᔪᐊᑉ ᐃᓚᕕᓂᖏᓐᓂᒃ. ᑍᒫᒃ ᑕᕝᕙ ᓄᓈᓚᐅᕐᐳᒍᑦ ᑐᖁᔪᖃᕋᑕ.

Currently Selected:

ᐋᐴᓯᑕᓖᑦ ᐱᓂᐊᕐᓂᖏᑦ 27: EAIB

Highlight

Copy

Compare