ᐋᐴᓯᑕᓖᑦ ᐱᓂᐊᕐᓂᖏᑦ 25
25
ᐸᐅᓗᓯᐅᑉ ᐃᖅᑲᕐᑐᕐᑕᐅᔪᒪᓂᖓ ᕉᒪᒥᐅᑦ ᐊᖓᔪᖅᑳᒻᒪᕆᖓᓄᑦ
1ᕕᓯᑕᓯ ᐅᓪᓗᓂᒃ ᐱᖓᓱᓂᒃ ᓄᓇᖁᑎᒥᓃᓕᕋᒥ, ᓯᓴᕆᐊᒥᑦ ᔨᕉᓴᓕᒻᒧᐊᕐᐳᖅ. 2ᑕᕝᕙᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ, ᔫᑎᓪᓗ ᐊᖓᔪᖅᑳᖏᑦ ᐅᖃᕆᐊᕐᑐᕐᐳᑦ ᑖᑦᓱᒧᖓ ᐸᐅᓗᓯᐅᑉ ᑎᒍᔭᐅᓯᒪᑦᔪᑎᖏᓐᓂᒃ; ᐱᑦᔪᑎᖃᕐᓗᑎᒃ. 3ᕕᓯᑕᓯ ᐊᔪᐃᓐᓈᕆᓪᓗᒍ ᐱᖁᓇᓱᐊᕐᐹᑦ ᐊᖏᕐᑕᐅᔪᒪᓪᓗᑎᒃ ᐸᐅᓗᓯ ᔨᕉᓴᓕᒻᒧᐊᕈᑎᔭᐅᖁᓪᓗᒍ, ᑕᕝᕗᓐᖓᐅᑦᔭᐅᓕᕐᐸᑦ ᐅᐸᓗᖕᒊᕐᓯᒪᒐᒥᒃ ᐊᖅᑯᑖᓂ ᑐᖁᑦᓱᒪᓪᓗᒍ. 4ᕕᓯᑕᓯᐅᑉ ᑭᐅᕔᑦ, “ᐸᐅᓗᓯ ᓯᓴᕆᐊᒦᒻᒪᑦ ᑎᒍᔭᐅᓯᒪᓪᓗᓂ, ᐅᕙᖓᓗ ᑍᑯᖓ ᐅᑎᑦᓴᐅᑎᒋᓂᐊᕋᒪ. 5ᐊᖓᔪᖅᑳᓯ ᐃᓚᖏᑦ ᓯᓴᕆᐊᒧᑦ ᐱᖃᑎᒋᓂᐊᓕᕐᐸᒃᑲ, ᑍᑲᓂᓗ ᐸᐅᓗᓯᐅᑉ ᐸᓯᔭᒃᓴᐅᑦᔪᑎᖏᑦ ᓴᖅᑭᑕᐅᓚᐅᕐᓕᑦ, ᓈᒻᒪᖏᑦᑐᒥᒃ ᐱᓇᓱᐊᕐᓯᒪᒃᐸᑦ.”
6ᕕᓯᑕᓯᓕ ᐅᓪᓗᓂᒃ 8ᓂᒃ 10ᓂᒃᓘᓐᓂᑦ ᖃᓂᒋᔮᓂ ᑕᕝᕙᓃᓚᐅᕐᓗᓂ, ᓯᓴᕆᐊᒧᑦ ᐅᑎᕐᐳᖅ; ᖃᐅᑎᓪᓗᒍ ᐃᖅᑲᕐᑐᐃᕕᖕᒥ ᑲᑎᒪᑎᑦᓯᕗᖅ, ᐸᐅᓗᓯ ᑕᕝᕗᓐᖓᐅᑦᔭᐅᖁᕚ. 7ᐸᐅᓗᓯ ᑕᕝᕗᓐᖓᕐᒪᑦ ᔫᑎᑦ ᔨᕉᓴᓕᒻᒥᑦ ᐱᓯᒪᔪᑦ ᐊᕙᑖᓂ ᓇᖏᕐᐳᑦ, ᐊᒥᓱᓂᒃ ᐱᓪᓚᕆᐊᓗᖕᓂᒃ ᐸᓯᔭᐅᑦᔪᑎᖏᓐᓂᒃ ᓴᖅᑭᑎᑦᓯᕗᑦ, ᓇᖕᒥᓂᕐᓘᓐᓃᑦ ᓱᓕᓂᖏᓐᓂᒃ ᓇᓗᓁᕈᓐᓇᓐᖏᑕᒥᖕᓂᒃ. 8ᐸᐅᓗᓯ ᐃᒻᒥᓂᒃ ᓴᐳᓐᓂᐊᕐᓗᓂ ᐅᖃᕐᐳᖅ, “ᓱᕅᓚᐅᓐᖏᓚᖓ ᔫᑎᑦ ᐱᖁᔭᖏᓐᓂᒃ, ᑐᒃᓯᐊᕐᕕᒡᔪᐊᓪᓗ ᐱᖁᔭᖏᓐᓂᒃ, ᓰᓴᕆᐅᑉ ᐱᖁᔭᖏᓐᓂᒡᓘᓐᓃᑦ.”
9ᕕᓯᑕᓯ ᔫᑎᓄᑦ ᐊᑲᐅᒋᔭᐅᔪᒪᓪᓗᓂ, ᐸᐅᓗᓯ ᐊᐱᕆᕚ, “ᖃᓄᐃᒃᓴᕋᔭᓐᖏᓚᑏᑦ ᔨᕉᓴᓕᒻᒧᐊᕐᓗᑎᑦ, ᑕᒪᒃᑯᐊ ᑍᑲᓂ ᐃᓚᐅᑎᓪᓗᖓ ᐃᖅᑲᕐᑐᕐᑕᐅᑦᔪᑎᒋᒐᓗᐊᕈᕕᒋᑦ?”
10ᐸᐅᓗᓯ ᐅᖃᕐᐳᖅ, “ᕉᒪᒥᐅᑦ ᐊᖓᔪᖅᑳᒻᒪᕆᖓᑕ ᓰᓴᕆᐅᑉ ᐃᖅᑲᕐᑐᐃᕕᖁᑎᖓᓂ ᓇᖏᕐᐳᖓ, ᑕᕝᕙᓂᓗ ᐃᖅᑲᕐᑐᕐᑕᐅᔪᒃᓴᐅᕗᖓ; ᔫᑎᓄᑦ ᓈᒻᒪᖏᑦᑐᒥᒃ ᐊᑐᓚᐅᓐᖏᓚᖓ, ᐃᕝᕕᓪᓗ ᓇᖕᒥᓂᖅ ᑕᒪᓐᓇ ᖃᐅᔨᒪᒐᕕᐅᒃ. 11ᐱᐅᖏᑦᑐᐊᓗᖕᒥᒡᓕ ᐊᑐᕐᓯᒪᒍᒪ ᑐᖁᑕᐅᑦᔪᑎᒃᓴᒥᒡᓘᓐᓃᑦ, ᑐᖁᑕᐅᑕᐃᓕᒋᐊᖃᓐᖏᓚᖓ; ᐸᓯᔭᐅᑦᔪᑎᒋᔭᒃᑲ ᔫᑎᓄᑦ ᓱᓕᖏᑉᐸᑕ ᑖᒃᑯᓄᖓ ᑐᓂᔭᐅᔪᒪᓐᖏᓚᖓ. ᓰᓴᕆᒧᑦ ᐃᖅᑲᕐᑐᕐᑕᐅᖔᕈᒪᕗᖓ.”
12ᕕᓯᑕᓯᐅᑉ ᐃᓱᒪᓕᐅᕐᑎᖁᑎᓂ ᐊᐱᕐᓱᓚᐅᕐᓗᒋᑦ, ᐅᖃᕐᐳᖅ: “ᓰᓴᕆᒧᑦ ᐃᖅᑲᕐᑐᕐᑕᐅᔪᒪᒐᕕᑦ, ᓰᓴᕆᒧᑦ ᐂᓂᐊᓕᕐᐳᑎ.”
ᐸᐅᓗᓯᐅᑉ ᐊᐱᕐᓱᕐᑕᐅᓂᖓ ᐊᒍᕆᐸᒧᑦ ᓄᓕᐊᖓᓄᓪᓗ
13ᑕᒪᑐᒪᓕ ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᐊᒍᕆᐸ ᐱᕐᓁᓯᓗ ᓯᓴᕆᐊᒧᐊᕐᐴᒃ ᑐᓐᖓᓱᒃᑎᑦᓯᔭᕐᑐᕐᓗᑎᒃ ᕕᓯᑕᓯᒥᒃ. 14ᐅᓪᓗᒐᓚᖕᓂᒃ ᑕᕝᕙᓃᓕᕋᒥᒃ, ᕕᓯᑕᓯᐅᑉ ᐊᖓᔪᖅᑳᕐᔪᐊᖅ ᐅᖃᖃᑎᒋᓕᕐᐹ ᐸᐅᓗᓯ ᐱᑦᔪᑎᒋᓪᓗᒍ, ᐅᖃᕐᓗᓂ, “ᐅᕙᓃᑦᑐᖃᕐᐳᖅ ᑎᒍᔭᐅᓯᒪᑎᓪᓗᒍ ᕖᓕᒃᓯᐅᑉ ᕿᒪᓚᐅᕐᑕᖓᓂᒃ; 15ᔨᕉᓴᓕᒻᒧᐊᕐᑎᓪᓗᖓ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ, ᔫᑎᓪᓗ ᐊᖓᔪᖅᑳᖏᑦ ᐸᓯᒃᖠᕈᑎᒥᖕᓂᒃ ᓴᖅᑭᑎᑦᓯᓚᐅᕐᐳᑦ, ᐅᖃᕐᓗᑎᒃ ᑐᖁᑕᒃᓴᐅᖁᓪᓗᒍ. 16ᐅᖃᐅᑎᓚᐅᕐᐸᒃᑲᓗ ᕉᒪᒥᐅᑦ ᐱᐅᓯᖃᖏᓐᓂᕋᕐᖢᒋᑦ ᑎᒍᔭᐅᑎᑦᓯᓲᖑᓐᖏᓚᑦ ᐊᓯᒥᖕᓄᑦ ᑎᒍᓯᒪᔭᒥᖕᓂᒃ, ᓇᖕᒥᓂᖅ ᐸᓯᒃᓯᕐᑎᒥ ᑕᒃᑯᐊᓂ ᓴᐳᑎᓇᓱᐊᓚᐅᖅᑳᕐᑎᓐᓇᒋᑦ ᐃᒻᒥᖕᓂᒃ. 17ᔫᑎᓪᓕ ᑕᕝᕗᓐᖓᕐᒪᑕ, ᐅᑕᖅᑭᑎᑦᓯᓚᐅᓐᖏᓚᖓ, ᖃᐅᑐᐊᕐᒪᑦ ᐃᖅᑲᕐᑐᐃᕕᖕᒥ ᑲᑎᒪᑎᑦᓯᓚᐅᕐᐳᖓ, ᐸᐅᓗᓯ ᕾᑕᐅᑎᓪᓗᒍ. 18ᑖᑦᓱᒪ ᐸᓯᒃᓯᕐᑎᖏᑦ ᐅᖃᓕᕐᒪᑕ, ᐱᕋᔭᖕᓂᕐᓂᒃ ᐱᑦᔪᑕᐅᒐᔭᕋᓱᒋᔭᓐᓂᒃ ᐅᖃᐅᓯᖃᓚᐅᓐᖏᓚᑦ. 19ᓈᒻᒪᒃᓴᖏᑦᔪᑎᖃᓚᐅᕐᐳᓪᓕ ᓇᖕᒥᓂᖅ ᐅᒃᐱᕐᓂᕐᒥ ᒥᒃᓵᓄᑦ, ᑐᖁᓯᒪᔪᒥᒃ ᔩᓱᓯᒥᒃ ᐅᖃᐅᓯᖃᕐᓗᑎᒃ; ᐸᐅᓗᓯᐅᓪᓕ ᐆᒪᓂᕋᓚᐅᕐᐹ. 20ᓇᓗᓕᕋᒪ ᖃᓄᖅ ᑍᒤᑦᑐᒥᒃ ᐃᖅᑲᕐᑐᐃᔭᕆᐊᒃᓴᖅ, ᔨᕉᓴᓕᒻᒥ ᐃᖅᑲᕐᑐᕐᑕᐅᓗᓂ ᖃᓄᐃᒃᓴᕋᔭᖏᒻᒪᖔᑦ ᐊᐱᕆᓚᐅᕐᐸᕋ ᑕᒪᒃᑯᓄᖓ ᓵᓐᖓᔭᐅᑦᔪᑎᒋᔭᒥᓄᑦ. 21ᐸᐅᓗᓯᓕ ᐃᖅᑲᕐᑐᕐᑕᐅᔪᒪᓚᐅᕐᐳᖅ ᕉᒪᒥᐅᑦ ᐊᖓᔪᖅᑳᒻᒪᕆᖓᓐᓄᑦ, ᑍᒪᓕ ᑎᒍᔭᐅᓯᒪᑎᓕᕐᐸᕋ ᐊᖓᔪᖅᑳᒻᒪᕆᖕᒧᑦ ᓰᓴᕆᒧᑦ ᐊᐅᓪᓚᓚᐅᖏᓐᓂᖓᓂ.”
22ᐊᒍᕆᐸ ᕕᓯᑕᓯᒧᑦ ᐅᖃᕐᐳᖅ, “ᐅᕙᖓᑦᑕᐅᖅ ᓇᖕᒥᓂᖅ ᑖᑦᓱᒪᓐᖓᑦ ᑐᓴᕈᒪᒋᕗᖓ.” ᕕᓯᑕᓯᐅᑉ ᑭᐅᕙ, “ᖃᐅᒃᐸᑦ ᑐᓵᓛᕐᐸᑦ.”
23ᖃᐅᑎᓪᓗᒍ ᐊᒍᕆᐸ ᐱᕐᓁᓯᓗ ᕾᓕᕆᕘᒃ ᑕᑯᒥᓇᕐᑐᓂᒃ ᐊᓐᓄᕌᕐᓯᒪᓪᓗᑎᒃ ᐅᐱᒋᔭᐅᓪᓗᑎᒡᓗ, ᖃᐅᔨᓇᓱᐊᕐᕕᖕᒧᑦ ᐃᑎᕐᐳᑦ ᐃᓚᖃᕐᓗᑎᒃ ᐅᓇᑕᕐᑐᒃᓴᓄᑦ ᐊᖓᔪᖅᑳᖑᔪᓂᒃ, ᓄᓇᓕᖕᓂᓗ ᐱᓪᓗᐊᑕᕆᔭᐅᔪᓂᒃ. ᕕᓯᑕᓯᓗ ᐱᖁᔨᖕᒪᑦ ᐸᐅᓗᓯ ᐃᑎᕐᑎᑕᐅᕗᖅ ᑕᕝᕗᖓ. 24ᕕᓯᑕᓯᓗ ᐅᖃᕐᐳᖅ, “ᐊᖓᔪᖅᑳᕐᔪᐊᖅ ᐊᒍᕆᐸ, ᐃᓄᐃᓪᓗ ᑕᕝᕗᓐᖓᕐᓯᒪᔪᓕᒫᑦ; ᑕᑯᕗᓯ ᐆᒥᖓ ᐊᖑᒻᒥᒃ ᔫᑎᓕᒫᑦ ᐊᑲᐅᒋᓇᒍ ᐅᖃᐅᑎᒋᓚᐅᕐᑕᖓᓂᒃ ᐅᕙᓐᓄᑦ, ᔨᕉᓴᓕᒻᒥ ᐅᕙᓂᓗ ᓯᓴᕆᐊᒥ, ᕾᒐᓛᓚᐅᕐᐳᓪᓗ ᐃᓅᔪᒃᓴᐅᖏᓐᓂᕋᕐᓗᒍ. 25ᑐᖁᑕᐅᑦᔪᑎᒃᓴᖓᓂᒃ ᐱᓂᐊᕐᓂᖓᓂᑦ ᓇᓂᓯᓚᐅᓐᖏᓚᖓ ᓇᖕᒥᓂᖅ ᐊᖓᔪᖅᑳᒻᒪᕆᖕᒧᑦ ᓰᓴᕆᒧᑦ ᐃᖅᑲᕐᑐᕐᑕᐅᔪᒪᖕᒪᑦ ᑍᑦᓱᒧᖓ ᐊᐅᓪᓚᕐᑎᓛᕈᒪᓕᕐᐸᕋ. 26ᐅᕙᖓ ᐊᖓᔪᖅᑳᒻᒪᕆᖕᒧᑦ ᓰᓴᕆᒧᑦ ᑎᑎᕋᐅᓯᒃᓴᒥᒃ ᑖᑦᓱᒪ ᒥᒃᓵᓄᑦ ᐅᖃᐅᓯᒃᓴᖃᒻᒪᕆᓐᖏᓚᖓ. ᑍᒤᒻᒪᑦ ᐃᓕᑦᓯᓐᓄᑦ ᓴᖅᑭᑎᑉᐸᕋ ᐱᓗᐊᕐᑐᒥ ᐃᓕᖕᓄᑦ ᐊᖓᔪᖅᑳᕐᔪᐊᖅ ᐊᒍᕆᐹ, ᖃᐅᔨᓇᓱᐊᓚᐅᕐᑎᓪᓗᑎᑦ ᑖᑦᓱᒥᖓ, ᐃᒻᒪᖄ ᑎᑎᕋᓕᕈᒪ ᐅᖃᐅᓯᒃᓴᖃᕐᓂᕐᓴᐅᒐᔭᕆᐊᒃᓴᖅ ᐃᓱᒪᓪᓗᖓ. 27ᐊᑲᐅᓇᓱᒋᖏᓐᓇᒃᑯ ᑎᒍᔭᐅᓯᒪᔪᖅ ᐊᐅᓪᓚᕐᑎᓐᓇᓱᒋᐊᒃᓴᖅ ᑎᑎᖅᑲᓂᒃ ᑎᒍᔭᐅᔪᑎᖓᓂᒃ ᓇᒃᓴᕐᑎᖏᓪᓗᒍ.”
Currently Selected:
ᐋᐴᓯᑕᓖᑦ ᐱᓂᐊᕐᓂᖏᑦ 25: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
