ᐋᐴᓯᑕᓖᑦ ᐱᓂᐊᕐᓂᖏᑦ 16

ᑎᒧᑎᐅᑉ ᐃᓚᐅᓕᕐᓂᖓ ᐸᐅᓗᓯᒧᑦ ᓮᓚᓯᒧᓪᓗ

1ᐸᐅᓗᓯ ᑐᕐᐱᒧᑦ ᑎᑭᑉᐳᖅ, ᓕᔅᑐᕋᒧᐊᕆᓪᓗᓂᓗ, ᐃᓕᓐᓂᐊᕐᑎᑕᖃᕐᐳᖅ ᑕᕝᕙᓂ, ᑎᒧᑎᒥᒃ ᐊᑎᓕᖕᒥᒃ, ᐊᕐᓇᐅᑉ ᐅᒃᐱᕐᑑᓪᓗᓂ ᔫᑎᐅᔫᑉ ᐃᕐᓂᖓ, ᐊᑖᑕᖓᓕ ᒍᕇᑭᐅᕗᖅ. 2ᑎᒧᑎ ᐅᓐᓂᕐᓯᐅᑎᒋᔭᐅᑦᓯᐊᕐᐳᖅ ᐅᒃᐱᕐᑑᖃᑎᒌᓄᑦ ᓕᔅᑐᕋᒥ ᐂᑯᓂᐊᒥᓗ. 3ᐸᐅᓗᓯᐅᑉ ᑎᒧᑎ ᐂᑉᐸᕆᔪᒪᒐᒥᐅᒃ, ᑭᐱᕚ ᑍᒤᓕᐅᕐᐳᖅ ᔫᑎᑦ ᖃᐅᔨᒪᖕᒪᑕ ᑎᒧᑎᐅᑉ ᐊᑖᑕᖓ ᒍᕇᑭᐅᖕᒪᑦ. 4ᓄᓇᓕᒃᑎᒍᑦ ᐊᖅᑯᓵᖃᑦᑕᕋᒥᒃ ᐅᖃᐅᑦᔨᖃᑦᑕᕐᐳᑦ ᐋᐴᓯᑕᓖᑦ ᐅᒃᐱᕐᑐᓪᓗ ᓯᕗᓕᕐᑎᖏᑕ ᔨᕉᓴᓕᒻᒦᑦᑐᑦ ᐱᖁᓚᐅᕐᑕᖏᓐᓂᒃ ᒪᓕᖁᔨᓪᓗᑎᒃ. 5ᑕᕝᕙ ᐅᒃᐱᕐᑑᖃᑎᒌᑦ ᐱᕙᓪᓕᕐᑎᑕᐅᕗᑦ ᐅᒃᐱᕐᓂᕐᒥ, ᖃᐅᑕᒫᑦ ᐅᓄᕐᓯᕙᓪᓕᐊᓪᓗᑎᒃ.

ᑐᕈᐊᓯᒥ ᐸᐅᓗᓯᐅᑉ ᑕᑯᑎᑕᐅᓂᖓ

6ᐃᖏᕐᕋᕗᓪᓗ ᐴᕐᒋᐊᒃᑯᑦ ᒐᓔᑎᐊᒃᑯᓪᓗ, ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐃᓂᕐᑎᕐᑕᐅᓚᐅᕋᒥᒃ ᐂᓯᐊᒥ ᐊᔪᕆᕐᑐᐃᖁᔭᐅᓇᑎᒃ. 7ᒦᓯᐊᑉ ᓴᓂᐊᓄᑦ ᑎᑭᓐᓇᒥᒃ, ᐱᑎᓂᐊᒧᑦ ᓄᓇᒧᑦ ᑎᑭᓐᓇᓱᐊᕈᒪᓕᕐᐳᑦ, ᔩᓱᓯᐅᓪᓕ ᐊᓂᕐᓂᖓᑕ ᐃᓂᕐᑎᕐᐹᒃ; 8ᒦᓯᐊ ᐊᖅᑯᓴᕐᓗᒍ ᑐᕈᐊᓯᒧᑦ ᐱᕗᑦ. 9ᐅᓐᓄᐊᖑᓕᕐᑎᓪᓗᒍ ᐸᐅᓗᓯ ᑕᑯᑎᑕᐅᕗᖅ; ᐊᖑᒻᒥᒃ ᒫᓯᑑᓂᐊᒥᐅᑕᕐᒥᒃ ᓴᓂᒥᓂ ᓇᖏᕐᑐᒥᒃ ᕿᓄᕕᒋᓪᓗᒍ ᐅᖃᕐᑐᒥᒃ, “ᒫᓯᑑᓂᐊᒧᑦ ᕾᒋᑦᓯ ᐃᑲᔪᕆᐊᕐᓗᑕ.” 10ᐸᐅᓗᓯᓕ ᑍᒫᒃ ᑕᑯᑎᑕᐅᖕᒪᑦ, ᑕᕝᕔᓐᓇᖅ ᐸᕐᓇᓕᕐᐳᒍᑦ ᒫᓯᑑᓂᐊᒧᑦ, ᒎᑎᒧᑦ ᐅᖃᓪᓚᖁᔭᐅᓂᑦᑎᓐᓂᒃ ᐃᓱᒪᖃᑎᒌᓕᕋᑦᑕ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᑍᒃᑯᓄᖓ.

ᐱᓕᐰᒥ ᓖᑎᐊᑉ ᓵᒋᐊᕐᓂᖓ

11ᐅᒥᐊᕐᔪᐊᒃᑯᑦ ᐊᐅᓪᓚᕐᐳᒍᑦ ᑐᕈᐊᓯᒥᑦ ᓴᒨᑐᕅᓯᒧᑦ ᐃᑳᕐᓗᑕ, ᖃᐅᑎᓪᓗᒍ ᓂᐊᐳᓕᓯᒧᑦ ᑎᑭᓪᓗᑕ, 12ᑕᕝᕙᓐᖓᑦ ᐱᓕᐰᒧᐊᕐᐳᒍᑦ, ᑖᓐᓇ ᒫᓯᑑᓂᐊᒥᐅᓂ ᓄᓇᓕᖕᓂᑦ ᐊᖏᓂᕐᐹᖑᔪᖅ, ᕉᒪᒥᐅᓄᑦ ᓄᓇᖁᑎᒋᔭᐅᓪᓗᓂ. ᐅᓪᓗᓂᒃ ᐊᒥᓱᓂᒃ ᑕᕝᕙᓃᑉᐳᒍᑦ; 13ᓴᐸᑎᐅᓕᕐᑎᓪᓗᒍ ᓄᓇᓖᑦ ᓯᓚᑖᓄᐊᕐᓗᑕ ᑰᑉ ᓯᓈᓄᐊᕐᐳᒍᑦ, ᑕᕝᕙᓂ ᔫᑎᓂᒃ ᑐᒃᓯᐊᕐᑐᖃᕐᓂᐊᕋᓱᒋᓪᓗᒍ; ᐃᒃᓯᕚᕐᓗᑕ ᐅᖃᖃᑎᖃᕐᐳᒍᑦ ᐊᕐᓇᓂᒃ ᑕᒪᐅᖓ ᑲᑎᖃᑎᒋᔭᑦᑎᓐᓂᒃ. 14ᑖᒃᑯᐊ ᐃᓚᖓᑦ ᓈᓚᒃᑐᖅ ᓖᑎᐊᒥ ᐊᑎᓕᒃ ᑍᐊᑍᕋᒥᐅᖅ, ᐊᓐᓄᕌᒃᓴᓂᒃ ᐊᐅᐸᓪᓚᕆᒃᑐᓂᒃ ᐱᐅᔪᓂᒃ ᓂᐅᕕᐊᒃᓴᖁᑎᓕᒃ, ᒎᑎᒧᑦ ᑐᒃᓯᐊᖃᑦᑕᕐᑐᖅ. ᓖᑎᐊᑉ ᐆᒻᒪᑎᖓ ᐊᑕᓂᐅᑉ ᒪᑐᐃᕐᐹ ᐸᐅᓗᓯᐅᑉ ᐅᖃᐅᓯᖏᓐᓂᒃ ᓈᓚᑦᓯᐊᖁᓪᓗᒍ. 15ᑭᖑᓂᖓᒍᑦ ᐹᑉᑎᑕᐅᕗᖅ ᐃᒡᓗᒥᐅᖃᑎᓕᒫᖏᓪᓗ, ᑖᑦᓱᒪ ᑐᓐᖓᓴᕐᐹᑎᒍᑦ ᐅᖃᕐᓗᓂ, “ᕾᒋᑦᓯ, ᐃᒡᓗᓐᓂ ᑐᔪᕐᒥᓚᐅᕆᑦᓯ ᓱᓕᔪᒥᒃ ᐊᑕᓂᕐᒧᑦ ᐅᒃᐱᓕᕋᓱᒋᒍᑦᓯᓐᖓ.” ᐃᓇᒻᒪᑎᒍᑦ ᑕᕝᕙᓃᓕᕐᐳᒍᑦ.

ᐸᐅᓗᓯᐅᑉ ᓮᓚᓯᐅᓪᓗ ᑎᒍᔭᐅᓯᒪᕕᖕᒦᓐᓂᖓᒃ ᐱᓕᐰᒥ

16ᑐᒃᓯᐊᕆᐊᕐᕕᐅᕙᒃᑐᒧᑦ ᐂᓕᕐᑎᓪᓗᑕ, ᑲᑎᓯᕗᒍᑦ ᐊᕐᓇᒥᒃ ᓂᐅᕕᐊᖑᓯᒪᓪᓗᓂ ᐱᔨᐅᔪᒥᒃ, ᑖᓐᓇ ᓵᑖᓇᓯᐅᑉ ᐊᓂᕐᓂᖓᓄᑦ ᓇᓚᐅᑦᑍᔪᓐᓇᕐᑎᑕᐅᔪᖅ ᓯᕗᓂᒃᓴᒥᒃ, ᐊᖓᔪᖅᑳᒥᓂᒃ ᑮᓇᐅᔭᓕᐅᕐᑎᑦᓯᓪᓚᕆᒃᑐᖅ ᓇᓚᐅᑦᑍᖃᑦᑕᕐᓂᕐᒥᓄᑦ. 17ᑖᑦᓱᒪ ᐸᐅᓗᓯ ᐅᕙᒍᓪᓗ ᒪᓕᒃᐹᑎᒍᑦ ᕾᒐᓛᕐᓗᓂᓗ, “ᐅᑯᐊ ᒎᑎᐅᑉ ᖁᑦᓯᖕᓂᕐᐹᑉ ᐱᔨᖏᑦ, ᐊᔪᕆᕐᑐᐃᔪᑦ ᐃᓕᑦᓯᓐᓂᒃ ᖃᓄᖅ ᐱᐅᓕᔭᐅᔪᓐᓇᕐᓂᑦᓯᓐᓂᒃ.” 18ᐅᓪᓗᓂᒃ ᐊᒥᓱᓂᒃ ᑖᓐᓇ ᑍᒤᓕᐅᕐᐳᖅ. ᐸᐅᓗᓯᐅᑉ ᐊᖏᔪᒥᒃ ᐊᑲᐅᒋᔪᓐᓃᕋᒥᐅᒃ, ᓵᕝᕕᒋᓪᓗᒍ ᐊᓂᕐᓂᕐᓗᒃ ᐅᖃᐅᑎᕚ, “ᔩᓱᓯ ᙭ᔅᑑᓯᐅᑉ ᐊᑎᖓᓂ ᐅᖃᐅᑎᕙᒋᑦ ᐆᒪᓐᖓᑦ ᐊᕐᓇᒥᑦ ᐊᓂᒋᑦ.” ᐊᓂᕐᓂᕐᓗᒃ ᑕᕝᕙᑦᓮᓐᓇᖅ ᑖᑦᓱᒪᖓᑦ ᐊᕐᓇᒥᑦ ᐊᓂᕗᖅ. 19ᑖᑦᓱᒥᖓ ᐊᕐᓇᒥᒃ ᐱᖃᕐᑐᑦ ᖃᐅᔨᒐᒥᒃ ᑮᓇᐅᔭᓕᐅᕈᑎᒃᓴᖃᕈᓐᓃᕐᓂᕐᒥᖕᓂᒃ, ᐸᐅᓗᓯ ᓮᓚᓯᓗ ᑎᒍᕚᒃ ᐅᓂᐊᕐᓗᒋᒃ ᑲᑎᕕᐅᕙᒃᑐᒧᑦ ᐊᖓᔪᖅᑳᓄᓪᓗ; 20ᕉᒪᒥᐅᓪᓗ ᐊᖓᔪᖅᑳᖏᓐᓄᑦ ᐱᑎᑉᐰᑦ ᐅᖃᕐᓗᑎᒃ, “ᐅᑯᐊᒃ ᐊᖑᑏᒃ ᔫᑎᐅᔫᒃ, ᐅᐃᒪᔮᕐᑎᑦᓯᖕᒪᑎᒃ ᓄᓇᓕᖕᓂᒃ. 21ᐊᔪᕆᕐᑐᐃᖕᒪᑎᒃ ᐱᖁᔭᑦᑎᓐᓂᒃ ᐊᑭᕋᕐᑐᕐᑐᓂᒃ, ᕉᒪᒥᐅᖑᒐᑦᑕ, ᐃᓕᖅᑯᓯᑦᑎᒍᑦ ᐊᑐᕆᐊᖃᓐᖏᑕᑦᑎᓐᓂᒃ.” 22ᐃᓄᒋᐊᒃᑐᓪᓗ ᐃᓚᐅᓕᕐᐳᑦ ᐊᑭᕋᕐᑐᕐᓗᑎᒃ ᐸᐅᓗᓯᒥᒃ ᓮᓚᓯᒥᒡᓗ.

ᕉᒪᒥᐅᑦ ᐊᖓᔪᖅᑳᖏᑕ ᐸᐅᓗᓯᐅᑉ ᓮᓚᓯᐅᓪᓗ ᐊᓐᓄᕌᖏᑦ ᐲᕐᐰᑦ, ᑏᒐᕐᑐᕐᑕᐅᖁᓪᓗᒋᒃᓗ. 23ᐅᓄᕐᑐᐃᕐᓱᕐᓗᑎᒃ ᑏᒐᕐᑐᕐᑕᐅᖅᑳᕐᓗᑎᒃ ᑎᒍᔭᐅᓯᒪᕕᖕᒧᑦ ᐃᑎᕐᑎᑕᐅᕘᒃ, ᑎᒍᔭᐅᓯᒪᕕᐅᑉ ᑲᒪᔨᖓᓄᑦ ᑲᒪᒋᑦᓯᐊᕐᓗᒋᒃ ᐱᓯᒪᔭᐅᖁᕚᑦ. 24ᑎᒍᔭᐅᓯᒪᕕᐅᑉ ᑲᒪᔨᖓ ᐱᖁᔭᐅᒐᒥ ᑎᒍᔭᐅᓯᒪᕕᐅᑉ ᐃᓗᓪᓕᕐᐹᖓᓄᑦ ᐃᑎᕐᑎᑉᐹᒃ ᐃᑎᒐᖏᑦ ᕿᔪᖕᓄᑦ ᐊᑦᑐᖏᐅᑎᓄᑦ ᐊᑦᑐᖏᕐᓗᒋᒃ.

25ᐅᓐᓄᐊᖅ ᕿᑎᕋᓕᕐᑎᓪᓗᒍ ᐸᐅᓗᓯᒃᑯᒃ ᓮᓚᓯᒃᑯᒃ ᑐᒃᓯᐊᕐᐴᒃ ᐃᓐᖏᕐᓗᑎᒡᓗ ᐱᓯᕐᓂᒃ ᒎᑎᒧᑦ, ᑎᒍᔭᐅᓯᒪᕕᖕᒦᖃᑎᖏᑕ ᑐᓴᕚᑦ, 26ᑕᕝᕔᓐᓇᖅ ᓄᓇ ᓴᔪᒃᐱᓪᓚᒃᑐᐊᓘᕗᖅ, ᑎᒍᔭᐅᓯᒪᕕᐅᑉ ᑐᓐᖓᕕᖏᑦ ᐊᒡᓛᑦ ᐊᐅᓚᑦᔭᒃᓗᑎᒃ; ᒪᑐᓕᒫᖏ ᒪᑐᐃᕐᐳᑦ, ᐊᕐᓵᕐᑑᔧᑦ ᐊᑦᑐᖏᐅᑎᖏᑦ ᑎᒍᔭᐅᓯᒪᔪᓂᑦ ᐲᔭᕐᐳᑦ. 27ᑎᒍᔭᐅᓯᒪᕕᐅᑉ ᑲᒪᔨᖓ ᐃᖅᑯᒻᒪᕋᒥ ᑎᒍᔭᐅᓯᒪᕕᐅᑉ ᒪᑐᖏᑦ ᒪᑐᐃᓐᖔᕐᑐᑦ ᑕᑯᒐᒥᒋᑦ, ᓴᕕᒡᔪᐊᓂ ᐊᒧᕚ, ᐃᒻᒥᓂᒃ ᑐᖁᓐᓇᓱᐊᓕᕐᓗᓂ, ᑎᒍᔭᐅᓯᒪᔪᑦ ᐊᓂᓇᓱᒋᒐᒥᒋᑦ. 28ᐸᐅᓗᓯᓕ ᓂᐱᖅᑯᕐᑐᓪᓗᓂ ᕾᒐᓛᓕᕐᐳᖅ, “ᐃᓕᖕᓂᒃ ᑐᖁᓐᓇᓱᐊᕐᓇᒃ, ᑕᒪᑦᑕ ᐅᕙᓃᒃᑲᑦᑕ.”

29ᑎᒍᔭᐅᓯᒪᕕᐅᑉ ᑲᒪᔨᖓ ᐃᑯᒪᒥᒃ ᕾᑕᐅᖁᔨᕗᖅ, ᑐᐊᕕᕐᓗᓂᓗ ᐃᑎᕐᐳᖅ, ᓴᔪᒡᓗᓂ ᐸᐅᓗᓯᐅᑉ ᓮᓚᓯᐅᓪᓗ ᓵᖓᖕᓄᑦ ᐹᒻᒪᒃᐳᖅ, 30ᐊᓂᑎᓪᓗᒋᒃ ᑕᕝᕙᓐᖓᑦ ᐅᖃᕐᐳᖅ, “ᖃᓄᖅ ᐱᔭᕆᐊᖃᓕᕐᐳᖔ ᐱᐅᓕᔭᐅᖁᓪᓗᖓ?”

31ᑖᒃᑯᐊᒃ ᑭᐅᕚ, “ᐊᑕᓂᕐᒧᑦ ᔩᓱᓯᒧᑦ ᐅᒃᐱᕆᑦ, ᑕᕝᕙ ᐱᐅᓕᔭᐅᓂᐊᕐᐳᑎᑦ, ᐃᒡᓗᒥᐅᖃᑎᑎᓪᓗ.” 32ᐊᑕᓂᐅᑉ ᐅᖃᐅᓯᖏᓐᓂᒃ ᐊᔪᕆᕐᑐᕐᐹᒃ ᐃᒡᓗᒥᐅᖃᑎᖏᓪᓗ ᑕᒪᕐᒥᒃ. 33ᐃᑲᕐᕋᒥ ᑕᕝᕙᓂ ᑎᒍᔭᐅᓯᒪᕕᐅᑉ ᑲᒪᔨᖓᑕ ᐸᐅᓗᓯᒃᑯᒃ ᑭᓪᓕᖏᑦ ᓴᓗᒻᒪᕐᓴᕐᐰᑦ, ᐹᑉᑎᑕᐅᓪᓗᓂᓗ ᐃᒡᓗᒥᐅᖃᑎᓕᒫᓂ ᐃᓚᒋᓪᓗᒋᑦ. 34ᐃᒡᓗᒥᓄᑦ ᐊᖏᕐᕋᐅᑎᓪᓗᒋᒃ ᓂᕆᑎᑉᐹᒃ; ᐃᒡᓗᒥᐅᖃᑎᓂ ᐃᓚᒋᓪᓗᒋᑦ ᖁᕕᐊᓱᒻᒪᕆᓕᕐᐳᑦ, ᒎᑎᒧᑦ ᐅᒃᐱᓕᕋᒥᒃ.

35ᐅᓪᓛᓐᖑᓕᕐᑎᓪᓗᒍ ᕉᒪᒥᐅᑦ ᐊᖓᔪᖅᑳᖏᑦ ᐳᓖᓯᓂᒃ ᑎᓕᓯᕗᑦ ᐅᖃᕐᓗᑎᒃ, “ᐅᑯᐊ ᐊᖑᑎᑦ ᐊᓂᑎᓕᕐᓯᐅᒃ.”

36ᑎᒍᔭᐅᓯᒪᕕᐅᑉ ᑲᒪᔨᖓᑕ ᐸᐅᓗᓯ ᐅᖃᐅᑎᕚ, “ᕉᒪᒥᐅᑦ ᐊᐅᓚᑦᓯᔨᖏᑦ ᑎᓕᓯᖕᒪᑕ ᐊᓂᑎᑕᐅᖁᓪᓗᓯᒃ; ᑍᒤᒻᒪᑦ ᐊᓂᓕᕆᑦᑎᒃ ᖁᕕᐊᓱᒡᓗᓯᒃ.”

37ᐸᐅᓗᓯᐅᑉ ᐅᖃᐅᑎᕔᑦ, “ᐃᓄᐃᑦ ᑕᑯᓐᓈᕐᑎᓪᓗᒋᑦ ᑏᒐᕐᑐᕐᑕᐅᓚᐅᕋᓐᓄᒃ, ᐃᖅᑲᕐᑐᕐᑕᐅᓇᓄᒡᓘᓐᓃᑦ ᑎᒍᔭᐅᓯᒪᕕᖕᒧᑦ ᐃᑎᕐᑎᑕᐅᓚᐅᕐᑐᒍᒃ ᕉᒪᒥᐅᖑᒐᓗᐅᕐᑐᒍᒃ, ᐃᓄᐃᑦ ᖃᐅᔨᑎᓐᓇᒋᑦ ᐊᓂᑎᑕᐅᔪᒪᓕᕐᐱᓅᒃ? ᑍᒤᑦᓴᕆᐊᖃᓐᖏᓚᑦ ᑍᒃᑯᐊ ᐊᐅᓚᑦᓯᔩᑦ ᕾᓕᕐᓕᑦ ᓇᖕᒥᓂᖅ ᐊᓂᑎᓪᓗᓂᑎᒍᑦ.”

38ᑕᕝᕙ ᐳᓖᓰᑦ ᐅᖃᕆᐊᕐᑐᕐᐳᑦ ᐊᐅᓚᑦᓯᔨᓄᑦ; ᐊᐅᓚᑦᓯᔩᓪᓗ ᑐᓴᕋᒥᒃ ᐸᐅᓗᓯᒃᑯᒃ ᓮᓚᓯᒃᑯᒃ ᕉᒪᒥᐅᑕᐅᓂᖏᖕᓂᒃ, ᓯᕘᕋᓕᕐᐳᑦ; 39ᑖᒃᑯᐊ ᑎᒍᔭᐅᓯᒪᕕᖕᒧᐊᕐᓗᑎᒃ ᑖᒃᑯᓄᖓ ᒪᒥᐊᒋᐊᕐᑐᕐᐳᑦ. ᐊᓂᑎᓪᓗᒋᓪᓗ ᑎᒍᔭᐅᓯᒪᕕᖕᒥᑦ, ᕿᓄᕕᒋᕚᑦ ᐃᒡᓗᒐᓴᖕᓂᑦ ᐊᐅᓪᓚᖁᓪᓗᒋᑦ. 40ᐸᐅᓗᓯᒃᑯᒡ ᓮᓚᓯᒃᑯᒃ ᑎᒍᔭᐅᓯᒪᕕᖕᒥᑦ ᐊᓂᒐᒥᒃ ᓖᑎᐊᑉ ᐃᒡᓗᖓᓄᐊᕐᐴᒃ; ᐅᒃᐱᕐᑑᖃᑎᒌᓪᓗ ᑕᑯᒐᒥᒋᑦ, ᐱᕙᓪᓕᕐᓇᕐᑐᓂᒃ ᐅᖃᕐᕕᒋᕔᑦ, ᐊᐅᓪᓚᓕᕐᓗᑎᒡᓗ.

Currently Selected:

ᐋᐴᓯᑕᓖᑦ ᐱᓂᐊᕐᓂᖏᑦ 16: EAIB

Highlight

Copy

Compare