ᐋᐴᓯᑕᓖᑦ ᐱᓂᐊᕐᓂᖏᑦ 11

ᐲᑦᑐᕉᓯᐅᑉ ᐅᓂᒃᑳᕐᓂᖓ ᐅᒃᐱᕐᑑᖃᑎᒌᓄᑦ ᔨᕉᓴᓕᒻᒦᑦᑐᓄᑦ

1ᐋᐴᓯᑕᓖᑦ ᐊᓯᖏᓪᓗ ᐅᒃᐱᕐᑐᑦ ᔫᑎᐊᒥ ᑐᓴᐅᒪᓕᕐᐳᑦ ᔫᑎᐅᖏᑦᑐᑦᑕᐅᖅ ᐃᓚᓕᐅᕐᓯᓕᕐᒪᑕ ᒎᑎᐅᑉ ᐅᖃᐅᓯᖏᓐᓂᒃ. 2ᐲᑦᑐᕉᓯ ᔨᕉᓴᓕᒻᒧᐊᕐᒪᑦ, ᔫᑎᑦ ᑭᐱᔭᐅᓯᒪᔪᑦ ᐊᑭᕋᕐᑐᓕᕐᐹᑦ, 3ᐅᖃᕐᓗᑎᒃ, “ᓱᖕᒪᑦ ᑭᐱᔭᐅᓯᒪᖏᑦᑐᓄᑦ ᐂᓚᐅᕐᐲᑦ ᓂᕆᖃᑎᒋᓪᓗᒋᑦ?” 4ᐲᑦᑐᕉᓯ ᐅᖃᓕᕐᐳᖅ ᓇᓗᓁᕐᓯᑦᓯᐊᕐᓗᓂ ᐱᒋᐊᓕᕐᓂᖓᓂᑦ:

5“ᐃᒡᓗᒐᓴᖕᓂ ᔮᐸᒥ ᑐᒃᓯᐊᕐᑎᓪᓗᖓ; ᐃᓱᒪᒃᑯᑦ ᑎᒥᒦᑦᑐᓐᓃᕐᓗᖓ ᑕᑯᑎᑕᐅᓚᐅᕐᐳᖓ, ᕿᓚᖕᒥᑦ ᐊᖅᑲᕐᑎᑕᐅᔪᒥᒃ ᑎᖏᕐᕋᐅᑕᐅᔮᕐᑐᒥᒃ ᐊᖏᔪᒥᒃ, ᑎᓴᒪᓂᒃ ᑎᕆᖅᑯᓕᖕᒥᒃ ᐅᕙᓐᓄᑦ ᓂᖏᑎᑕᐅᔪᒥᒃ. 6ᐃᓗᐊᓄᑦ ᑕᑯᓴᕋᒪ ᑕᑯᓚᐅᕐᐳᖓ ᐆᒪᔪᓂᒃ ᓄᔪᐃᑦᑐᓂᒃ ᓄᔪᐊᕐᑐᓂᒡᓗ ᐹᕐᖑᕐᑐᓂᒡᓗ ᖃᓄᐃᑦᑐᑐᐃᓐᓇᕐᓂᒃ ᑎᖕᒥᐊᓂᒡᓗ. 7ᓂᐱᒥᒡᓗ ᑐᓴᕐᐳᖓ ᐅᕙᓐᓄᑦ ᐅᖃᕐᑐᒥᒃ, ‘ᐲᑦᑐᕉᓯ, ᒪᑭᓪᓗᑎᑦ ᑐᖁᑦᓯᓕᕆᑦ ᓂᕆᓗᑎᓪᓗ.’ 8ᐅᖃᓚᐅᕐᐳᖓᓕ, ‘ᐊᑕᓃᖅ ᑍᒤᑦᓱᓐᓇᓐᖏᓚᖓ, ᐅᒃᐱᕆᔭᑦᑎᒍᑦ ᓴᓗᒤᓐᓂᕋᕐᑕᐅᔪᓂᒃ ᓇᕐᕈᓇᕐᑐᓂᒡᓗ ᓱᓕ ᓂᕆᓚᐅᕐᓯᒪᖏᓐᓇᒪ.’ 9ᐂᑉᐸᕆᓕᕐᑕᖓᓂᒃ ᓂᓪᓕᒃᑲᓐᓂᕐᐳᖅ ᕿᓚᖕᒥᑦ ᐅᖃᐅᑎᓪᓗᓂᖓ, ‘ᒎᑎᐅᑉ ᓴᓗᒻᒪᓂᕋᕐᑕᖓᓂᒃ ᓇᕐᕈᓇᕐᓂᕅᔪᒃᓴᐅᓐᖏᓚᑎᑦ.’ 10ᑍᒤᓕᐅᓚᐅᕐᐳᖅ ᐱᖓᓱᐃᕐᑐᕐᓗᓂ, ᕿᓚᖕᒧᑦ ᐊᒻᒪ ᐊᒧᔭᐅᓚᐅᕆᕗᖅ. 11ᑍᑦᓱᒪᓂᑦᓮᓐᓇᖅ ᐊᖑᑎᑦ ᐱᖓᓱᑦ ᑎᑭᓚᐅᕐᐳᑦ ᓇᔪᕐᑕᓐᓄᑦ, ᓯᓴᕆᐊᒥᑦ ᐅᕙᓐᓄᑦ ᑎᓕᔭᐅᔪᑦ. 12ᒎᑎᐅᑉ ᐊᓂᕐᓂᖓᑕ ᐅᖃᐅᑎᕚᖓ ᑖᒃᑯᓄᖓ ᐃᓚᐅᖁᓪᓗᓂᖓ ᐃᕿᐊᓱᖕᓇᖓ, ᐊᖑᑎᑦ ᐱᖓᓲᔪᕐᑐᑦ ᐅᒃᐱᕐᑐᑦ ᐃᓚᒋᓚᐅᕐᐸᒃᑲ ᓯᓴᕆᐊᒧᑦ, ᐊᖑᑎᐅᑉ ᑍᑦᓱᒪ ᐃᒡᓗᖓᓄᑦ ᐃᑎᓚᐅᕐᐳᒍᑦ. 13ᑖᓐᓇ ᐅᓂᒃᑳᓚᐅᕐᐳᖅ ᐂᖏᓖᒥᒃ ᑕᑯᑎᑕᐅᓚᐅᕐᓂᕐᒥᓂᒃ ᐃᒡᓗᒥᓂ ᐅᖃᐅᑦᔭᐅᓂᕋᕐᓗᓂ, ‘ᑎᓕᓯᓕᕆᑦ ᔮᐸᒧᑦ ᓮᒨᓂ ᐲᑦᑐᕉᓯᒥᒃ ᑍᔭᐅᔪᖅ ᕾᖁᔭᐅᖁᓗᒍ; 14ᑖᑦᓱᒪ ᓇᓗᓁᕐᓯᕕᒋᓂᐊᕐᐹᑎᑦ ᐱᐅᓕᔭᐅᑦᔪᑎᒋᓂᐊᕐᑕᕐᓂᒃ, ᐃᒡᓗᒥᐅᖃᑎᓕᒫᑎᓪᓗ.’ 15ᐅᖃᓪᓚᓕᕐᑎᓪᓗᖓᓕ ᐊᓂᕐᓂᖅ ᐃᑦᔪᕐᓁᑦᑐᖅ ᑖᒃᑯᓄᖓ ᐊᖅᑲᕐᐳᖅ ᑍᒫᑦᓮᓐᓇᖅ ᐅᕙᑦᑎᓐᓄᑦ ᑎᑭᓚᐅᕐᓂᕐᒥᑐᑦ ᐱᒋᐊᓕᓵᕐᑎᓪᓗᑕ. 16#ᐋᐴᓯᑕᓖᑦ 1:5.ᐃᖅᑬᓕᕐᓗᖓᓗ ᐊᑕᓂᐅᑉ ᐅᖃᐅᓯᖏᓐᓂᒃ ᐅᖃᓚᐅᕐᒪᑦ, ‘ᔪᐊᓇᓯ ᐹᑉᑎᑦᓯᓚᐅᕐᐳᖅ ᐃᒥᕐᒧᑦ, ᐃᓕᑦᓯᓕ ᐹᑉᑎᑕᐅᔪᒫᕐᐳᓯ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ.’ 17ᑕᕝᕙ ᒎᑎ ᑐᓂᓯᒃᐸᑦ ᑖᒃᑯᓄᖓ ᑕᒪᑐᒥᖓᑦᓮᓐᓇᖅ ᐅᕙᑦᑎᓐᓄᑦ ᑐᓂᓚᐅᕐᑕᒥᓂᒃ ᐅᒃᐱᓕᕐᑎᓪᓗᑕ ᐊᑕᓂᕐᒧᑦ ᔩᓱᓯ ᙭ᔅᑑᓯᒧᑦ, ᖃᓄᕐᓕ ᑍᒪ ᒎᑎ ᐊᒡᕕᐊᕋᓱᐊᕋᔭᕐᐸᕋ?”

18ᑖᒃᑯᐊ ᑕᒪᑐᒥᖓ ᑐᓴᕋᒥᒃ ᓂᐱᖃᕈᓐᓃᕐᐳᑦ, ᒎᑎ ᓂᕐᑐᓕᕐᓗᒍ ᐅᖃᕐᐳᑦ, “ᔫᑎᐅᖏᑦᑐᓄᑦᑕᐅᖅ ᒎᑎ ᑐᓂᓯᕗᖅ ᓵᒋᐊᕐᓂᕐᒥᒃ ᐃᓅᓯᖃᕐᓇᕐᑐᒧᑦ.”

ᐃᓚᒌᒃᑐᑦ ᐅᒃᐱᕐᑑᖃᑎᒌᑦ ᐊᓐᑎᐅᑭᐊᒥ

19 # ᐋᐴᓯᑕᓖᑦ 8:1-4. ᐅᒃᐱᕐᑑᖃᑎᒌᑦ ᓇᒧᑐᐃᓐᓇᖅ ᕿᒫᓯᒪᔪᑦ ᐊᑭᕋᕐᑐᕐᑕᐅᓂᕐᒧᑦ, ᓯᑎᐹᓇᓯᐅᑉ ᑐᖁᑕᐅᓂᖓᓂᑦ ᐱᒋᐊᕐᓗᑎᒃ, ᑎᑭᐅᑎᕗᑦ ᐱᓃᓯᐊᒧᑦ ᓮᐳᕋᓯᒧᓪᓗ ᐊᓐᑎᐅᑭᐊᒧᓪᓗ, ᔫᑎᓄᑐᐊᖅ ᐊᔪᕆᕐᑐᐃᓪᓗᑎᒃ. 20ᐃᓚᖏᑦ ᐃᓄᐃᑦ, ᓮᐳᕋᓯᒥᐅᑦ ᓮᕆᓂᒥᐅᓪᓗ, ᐊᓐᑎᐅᑭᐊᒧᐊᕐᑐᑦ ᐅᖃᓪᓚᓕᕐᐳᑦ ᒍᕇᑭᓄᑦ ᐊᔪᕆᕐᑐᐃᑦᔪᑎᖃᕐᓗᑎᒃ ᐊᑕᓂᕐᒥᒃ ᔩᓱᓯᒥᒃ. 21ᐊᑕᓂᐅᑉ ᐊᔪᒐᖃᖏᓐᓂᖓᑕ ᓇᔪᓚᐅᕐᐰᑦ, ᐅᓄᕐᑐᐊᓗᐃᑦ ᐅᒃᐱᓕᕐᐳᑦ ᐊᑕᓂᕐᒧᓪᓗ ᓵᒋᐊᕐᓗᑎᒃ.

22ᑕᒪᓐᓇ ᑐᓴᕐᑕᐅᓚᐅᕐᐳᖅ ᐅᒃᐱᕐᑑᖃᑎᒌᓄᑦ ᔨᕉᓴᓕᒻᒦᑦᑐᓄᑦ, ᐸᕐᓇᐹᓯ ᑎᓕᕚᑦ ᐊᓐᑎᐅᑭᐊᒧᑦ. 23ᑍᑯᖓ ᑎᑭᓐᓇᒥ ᑕᑯᕗᖅ ᒎᑎᐅᑉ ᓮᒻᒪᕐᑎᑦᓯᓂᖓᓂᒃ ᐃᓄᖕᓂᒃ, ᖁᕕᐊᓱᒃᐳᑦ; ᑲᔪᖏᕐᓴᕐᐰᑦ ᑕᒪᕐᒥᒃ ᑲᔪᓯᑦᓯᐊᖁᓪᓗᒋᑦ ᐊᑕᓂᕐᒥᒃ ᐊᑕᕕᖃᑦᓮᓐᓇᖁᓪᓗᒋᑦ. 24ᐸᕐᓇᐹᓯᓕ ᐱᐅᔪᒥᒃ ᐃᓕᖅᑯᓯᖃᓚᐅᕐᐳᖅ, ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᓯᒪᓪᓗᓂ ᐅᒃᐱᕐᓂᖃᑦᓯᐊᕐᓗᓂᓗ. ᐅᓄᕐᑐᐊᓗᐃᑦ ᐃᓚᓕᐅᑎᓚᐅᕐᐳᑦ ᐊᑕᓂᕐᒧᑦ.

25ᑕᕝᕙ ᐸᓇᐹᓯ ᑖᕐᓱᓯᒧᐊᓚᐅᕐᐳᖅ ᓴᐅᓗᓯᒥᒃ ᕿᓂᕆᐊᕐᓗᓂ; 26ᓇᓂᒐᒥᐅᒃ, ᐊᓐᑎᐅᑭᐊᒧᐊᕈᑎᕚ. ᑖᒃᑯᐊᒃ ᐊᕐᕌᒍᓕᒫᖅ ᓈᓪᓗᒍ ᐅᒃᐱᕐᑑᖃᑎᒌᓂᑦ ᑲᑎᒪᖃᑎᖃᖃᑦᑕᓚᐅᕐᐴᒃ, ᐅᓄᕐᑐᒻᒪᕆᐊᓗᖕᓂᒃ ᐃᓕᓐᓂᐊᕐᑎᑦᓯᕘᒃ; ᐊᓐᑎᐅᑭᐊᒥ ᐅᒃᐱᕐᑐᑦ ᑍᔭᐅᓕᓚᐅᕐᐳᑦ ᓯᕗᓪᓕᕐᐹᒥᒃ ᙭ᔅᑑᓯᒥᐅᓂᒃ.

27ᑍᑦᓱᒪᓂ ᓇᓚᐅᑦᑍᔪᑦ ᔨᕉᓴᓕᒻᒥᑦ ᑎᑭᓚᐅᕐᐳᑦ ᐊᓐᑎᐅᑭᐊᒧᑦ. 28#ᐋᐴᓯᑕᓖᑦ 21:10.ᑍᒃᑯᐊ ᐃᓚᖓᑦ ᐋᒐᐹᓯᒥᒃ ᐊᑎᓕᒃ ᓂᑯᕕᓪᓗᓂ ᓇᓚᐅᑦᑍᓕᕐᐳᖅ ᐊᓂᕐᓂᒃᑯᑦ ᐅᖃᕐᑎᑕᐅᓪᓗᓂ ᓄᓇᕐᔪᐊᓕᒫᒥ ᑳᖕᓇᕐᑐᕐᔪᐊᖃᓛᕐᓂᕋᕐᓗᒍ; ᑕᒪᓐᓇ ᓇᓪᓕᐅᑎᓚᐅᕐᐳᖅ ᑲᓚᐅᑎᐊᓯ ᐊᖓᔪᖅᑳᕐᔪᐊᖑᑎᓪᓗᒍ. 29ᐅᒃᐱᕐᑐᑦ ᐋᖅᑭᒃᓯᓚᐅᕐᐳᑦ ᐊᑐᓂᑦ ᑐᔪᐃᔪᒪᓪᓗᑎᒃ ᐊᔪᓐᖏᑕᒥᖕᓂᒃ, ᐃᑲᔫᑎᒋᓂᐊᕐᑕᒥᖕᓂᒃ ᐅᒃᐱᕐᑑᖃᑎᒌᓄᑦ ᔫᑎᐊᒥ ᓄᓇᖃᕐᑐᓄᑦ; 30ᑍᒤᓕᐅᕐᓗᑎᒡ, ᑐᔪᐃᓚᐅᕐᐳᑦ ᓯᕗᓕᕐᑎᐅᔪᓄᑦ ᔨᕉᓴᓕᒻᒥ ᐸᕐᓇᐹᓯᒃᑯᒃ ᓴᐅᓗᓯᒃᑯᒃ ᐊᖅᑯᑎᒋᓪᓗᒋᒃ.

Currently Selected:

ᐋᐴᓯᑕᓖᑦ ᐱᓂᐊᕐᓂᖏᑦ 11: EAIB

Highlight

Copy

Compare