ᓴᒧᐃᓕ ᓯᕗᓪᓖᑦ 13
13
ᐅᓇᑕᕐᓃᑦ ᐱᓕᔅᑏᓂᒥᐅᓂᒃ
1ᓴᐅᓕ ᐊᕐᕌᒍᒥᒃ ᐊᑕᐅᓯᕐᒥᒃ ᐊᐅᓚᑦᓯᓕᕐᑎᓪᓗᒍ; ᐃᓴᕆᐊᓕᒥᐅᓂᒡᓗ ᐊᐅᓚᑦᓯᓕᕐᑎᓪᓗᒍ ᐊᕐᕌᒎᖕᓂᒃ ᒪᕐᕉᖕᓂᒃ.#13:1 ᑖᒃᑯᐊ ᓈᓴᐅᑏᑦ ᑎᑎᕋᕐᓯᒪᔪᑐᖃᑎᒍᑦ ᓇᓗᓇᕐᑐᑦ
2ᓴᐅᓕ ᓂᕈᐊᕐᐳᖅ ᐊᖑᑎᓂᒃ 3,000ᓂᒃ ᐃᓴᕆᐊᓕᒥᐅᓂᑦ; 2,000ᓮᑦ ᓇᔫᑎᓚᐅᕐᐳᑦ ᒥᒃᒫᔅᒥ ᖃᖅᑲᒥ ᐱᑎᓕᐅᑉ ᓄᓇᖓᓂ, 1,000ᓮᑦ ᐃᕐᓂᖓᓂ ᔫᓇᑕᓂᒦᑎᓪᓗᒋᑦ ᒋᐱᐊᒥ ᐱᓐᔭᒥᓂᐅᑉ ᓄᓇᖓᓂ; ᐊᓯᖏᓪᓕ ᓴᐅᓕᐅᑉ ᐊᖏᕐᕋᕐᑎᑉᐰᑦ ᐊᖏᕐᕋᖏᓐᓄᑦ.
3ᔫᓇᑕᓂᐅᑉ ᐱᓕᔅᑍᓂᒥᐅᑦ ᐅᓇᑕᕐᑐᒃᓴᖃᕐᕕᖓ ᐅᓇᑕᕐᓗᒍ ᓵᓚᒋᕚ ᒋᐸᒦᑦᑐᖅ, ᐱᓕᔅᑍᓂᒥᐅᓪᓗ ᑐᓴᓚᐅᕐᐳᑦ ᑕᒪᑐᒥᖓ. ᓴᐅᓕᓗ ᑎᑦᑐᓚᐅᒻᒥᒃ ᓂᓪᓕᐊᑎᑦᓯᓚᐅᕐᐳᖅ ᓄᓇᓕᓕᒫᓄᑦ ᐅᖃᕐᓗᓂ, “ᐄᑉᕈᐃᑦ ᑐᓴᕐᓕᑦ!” 4ᐃᓴᕆᐊᓕᒥᐅᓕᒫᓪᓗ ᑐᓴᕐᐳᑦ ᓴᐅᓕᐅᑉ ᑐᖁᑦᓯᓂᖓᓂᒃ ᐱᓕᔅᑍᓂᒥᐅᑦ ᐅᓇᑕᕐᑐᒃᓴᖃᕐᕕᖓᓂ, ᐃᓴᕆᐊᓕᒥᐅᓪᓗ ᐱᓕᔅᑍᓂᒥᐅᓂᒃ ᓱᒃᑯᐃᓂᖏᓐᓂᒃ. ᐃᓄᐃᓪᓗ ᕾᖁᔭᐅᕗᑦ ᑲᑎᖁᓪᓗᒋᑦ ᓴᐅᓕᒧᑦ ᒋᐅᓪᒐᐅᓪᒥ.
5ᐱᓕᔅᑍᓂᒥᐅᓪᓗ ᑲᑎᕗᑦ ᐃᓴᕆᐊᓕᒥᐅᓂᒃ ᐅᓇᑕᕆᐊᕈᒪᓪᓗᑎᒃ, 30,000ᓂᒃ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ, 6,000ᓂᒡᓗ ᕿᒻᒥᕐᔪᐊᒦᑦᑐᓂᒃ, ᐅᓇᑕᕐᑐᒃᓮᓪᓗ ᐅᓄᕐᑐᕐᔪᐊᑦ ᓯᒡᔭᒥ ᓯᐅᕋᕐᑎᑐᑦ ᐅᓄᕐᑎᒋᔪᑦ ᒥᒃᒫᔅᒧᐊᕐᐳᑦ, ᐱᑦᐂᕕᓐ ᓴᓂᐊᓃᑦᑐᒧᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒧᑦ, ᑍᑯᖓᓗ ᑕᖕᒫᕐᐳᑦ. 6ᐃᓴᕆᐊᓕᒥᐅᑦ ᐃᓄᖏᑦ ᑕᑯᒐᒥᒃ ᑲᑉᐱᐊᓇᕐᑐᒦᓕᕐᓂᕐᒥᖕᓂᒃ, (ᐃᓗᖏᕐᓱᕐᓗᑎᒃ ᐃᓱᒪᔮᓕᕐᐳᑦ,) ᐃᓴᕆᐊᓕᒥᐅᑦ ᐃᓚᖏᑦ ᐃᔨᕐᐳᑦ ᕾᕈᓱᖕᓄᑦ ᐃᑎᕐᓴᓄᓪᓗ ᐅᔭᕅᓪᓗ ᐊᑯᓐᓂᖓᓐᓄᑦ, ᐃᑎᕐᓴᐅᓂᕐᓄᓪᓗ; 7ᐊᓯᖏᑦ ᔪᐊᕐᑕᓂᐅᑉ ᑰᖓᒍᑦ ᐃᑳᕐᐳᑦ ᒑᓪᓗ ᒋᓕᐊᑎᓪᓗ ᓄᓇᖓᓄᑦ.
ᓴᐅᓕᓕ ᓱᓕ ᒋᐅᓪᒐᐅᓪᒦᑉᐳᖅ, ᐃᓚᒋᔭᖏᓪᓗ ᐃᓄᐃᑦ ᑕᕝᕙᓃᑉᐳᑦ ᓯᕘᕋᓂᕐᒧᑦ ᓴᔪᒡᓗᑎᒃ. 8#ᓴᒧᐃᓕ ᓯᕗᓪᓖᑦ 10:8.ᐅᑕᖅᑭᓕᕐᐳᕐᓗ ᓴᒧᐃᓕᒥᒃ ᐅᓪᓗᓂᒃ 7ᓂᒃ, ᑍᒫᒃ ᓴᒧᐃᓕᐅᑉ ᐅᑕᖅᑭᖁᓚᐅᕐᒪᒍ, ᓴᒧᐃᓕ ᕾᓇᓵᓕᕐᒪᑦ ᒋᐅᓪᒐᐅᓪᒧᑦ, ᐃᓄᐃᓪᓗ ᕿᒤᕙᓪᓕᐊᓕᓚᐅᕐᐳᑦ ᓴᐅᓕᒥᒃ. 9ᑕᕝᕙ ᓴᐅᓕ ᐅᖃᕐᐳᖅ, “ᑐᓂᕐᕈᑎᒃᓮᑦ ᐃᑯᐊᓪᓚᑦᓯᓂᕐᒧᑦ ᐃᓚᒌᑦᓯᐊᕐᓂᕐᒧᓪᓗ ᕾᓚᐅᕐᓯᐅᒃ.” ᑕᕝᕙ ᑐᓂᕐᕈᓯᓚᐅᕐᐳᖅ ᐃᑯᐊᓚᒋᐊᓕᖕᒥᒃ ᑐᓂᕐᕈᑎᒥᒃ. 10ᐱᔭᕇᕐᑎᓪᓗᒍᓗ ᑐᓂᕐᕈᓯᕐᓂᕐᒥᒃ ᐆᑕᒃᓴᓂᒃ, ᑕᑯᒋᑦ, ᓴᒧᐃᓕ ᑎᑭᑉᐳᖅ; ᑕᕝᕙ ᓴᐅᓕᐅᑉ ᐸᕐᕆᐊᕐᐹ ᑐᓐᖓᓱᒃᑎᓪᓗᒍᓗ. 11ᓴᒧᐃᓕᓗ ᐅᖃᕐᐳᖅ, “ᖃᓄᐃᓕᐅᕐᑐᐊᓘᓕᕐᐲᑦ?”
ᓴᐅᓕᓗ ᑭᐅᕗᖅ, “ᐃᓄᐃᑦ ᐅᕙᓐᓂᒃ ᕿᒤᕙᓪᓕᐊᓕᕐᒪᑕ, ᐅᓪᓗᓂᓗ ᑎᑭᕝᕕᒋᓂᐊᓚᐅᕐᑕᕐᓂ ᑎᑭᓚᐅᖏᓐᓇᕕᑦ ᐅᖃᐅᓯᕆᓚᐅᕐᑕᕐᓂ, ᐱᓕᔅᑍᓂᒥᐅᓪᓗ ᑲᑎᓚᐅᕐᒪᑕ ᒥᒃᒫᔅᒥ, 12ᐃᓱᒪᓕᓚᐅᕐᐳᖓ, ‘ᐱᓕᔅᑍᓂᒥᐅᑦ ᐅᓇᑕᕆᐊᕐᓂᐊᓕᕐᐹᖓ ᒋᐅᓪᒐᐅᓪᒧᑦ, ᐊᑕᓂᕐᒧᓪᓗ ᑐᒃᓯᐊᕐᓂᒃᑯᑦ ᖃᐅᔨᒋᐊᓚᐅᕐᓇᖓ’; ᑍᒤᒻᒪᑦ ᑐᓂᕐᕈᓯᕆᐊᖃᕋᓱᒋᓕᓚᐅᕐᐳᖓ ᐃᑯᐊᓪᓚᒋᐊᓕᖕᓂᒃ ᑐᓂᕐᕈᑎᓂᒃ.”
13ᓴᒧᐃᓕ ᐅᖃᕐᐳᖅ ᓴᐅᓕᒧᑦ, “ᓯᓔᑦᑐᐊᓗᖕᒥᒃ ᐱᓇᓱᐊᓚᐅᕐᐳᑎᑦ; ᐊᑕᓂᐅᑉ ᒎᑎᕕᑦ ᐱᖁᔭᖏᓐᓂᒃ ᓈᓚᓚᐅᖏᓐᓇᕕᑦ, ᐃᓕᖕᓄᑦ ᐱᖁᔨᑦᔪᑎᒋᓚᐅᕐᑕᖏᓐᓂᒃ; ᐊᑕᓂᐅᑉ ᐋᖅᑭᒃᓱᕋᔭᓚᐅᕐᐹ ᐊᖓᔪᖅᑲᐅᕖᑦ ᐃᓴᕆᐊᓕᒥᐅᓂᒃ ᐃᓱᖃᖏᑦᑐᒧᑦ. 14#ᐋᐴᓯᑕᓖᑦ 13:22.ᒫᓐᓇᓕ ᐊᖓᔪᖅᑲᐅᕖᑦ ᑲᔪᓯᓂᐊᕈᓐᓃᕐᐳᖅ; ᐊᑕᓂᖅ ᕿᓂᕈᒫᓕᕐᐳᖅ ᐃᓄᖕᒥᒃ ᐊᑕᓂᐅᑉ ᐆᒻᒪᑎᖓᓂᒃ ᕿᓂᕐᑐᒥᒃ; ᐊᑕᓂᐅᓪᓗ ᐊᖓᔪᖅᑳᓐᖑᕐᑎᑦᓱᒫᕐᐹ ᐃᓄᖁᑎᒥᓄᑦ, ᐊᑕᓂᐅᑉ ᐱᖁᔭᖓᓂᒃ ᓈᓚᓚᐅᖏᓐᓃᑦ ᐱᑦᔪᑎᒋᓗᒍ.”
15ᓴᒧᐃᓕᓗ ᒪᑭᓪᓗᓂ, ᑲᔪᓯᓪᓗᓂ ᒪᔪᐊᕐᐳᖅ ᒋᐅᓪᒐᐅᓪᒥᑦ ᒋᐱᐊᒧᑦ ᐱᓐᔭᒥᓂᐅᑉ ᓄᓇᖓᓄᑦ.
ᓴᐅᓕᐅᓪᓗ ᐃᓄᐃᑦ ᓇᔪᕐᑎᓂ ᖃᐅᔨᓴᕋᒥᒋᑦ, ᐊᖑᑏᑦ 600ᐅᕗᑦ. 16ᑕᕝᕙ ᓴᐅᓕᒃᑯᒃ ᐃᕐᓂᕇᒃ ᔫᓇᑕᓂᒃᑯᒃ, ᐃᓄᐃᓪᓗ ᒋᐸᒦᖏᓐᓇᕐᐳᑦ ᐱᓐᔭᒥᓂᐅᑉ ᓄᓇᖓᓂ; ᐱᓕᔅᑍᓂᒥᐅᓪᓕ ᑕᖕᒫᕐᓯᒪᑎᓪᓗᒋᑦ ᒥᒃᒫᔅᒥ. 17ᐱᓕᔅᑍᓂᒥᐅᓪᓗ ᑎᒡᓕᒃᑏᑦ ᐅᓇᑕᕆᐊᕐᐳᑦ ᐊᐅᓪᓚᕐᓗᑎᒃ ᑕᖕᒫᕐᓯᒪᕕᖕᒥᓂᑦ ᐱᖓᓲᓕᓪᓗᑎᒃ; ᐱᖓᔪᒋᑦ ᐅᐸᕋᐅᑉ ᓇᓛᓄᑦ ᐂᓕᕐᐳᑦ, ᓴᕼᐅᓕᐅᑉ ᓄᓇᖓᓄᑦ, 18ᐃᓚᖏᑦ ᐱᑦ-ᕼᐅᕋᐅᑉ ᓇᓛᓄᑦ ᐂᓕᕐᐳᑦ, ᐱᖓᔪᖏᑦ ᔨᐳᐃᒻ ᓇᕐᓴᖓᓄᑦ ᐅᔭᐅᒪᔪᒧᑦ ᓄᓇᐅᑉ ᑭᒡᓕᖓᓄᓐᖓᐅᕗᑦ ᐃᓄᖃᔪᐃᑦᑐᒦᑦᑐᒧᑦ.
19ᑭᓯᐊᓂᓕ ᐃᓴᕆᐊᓕᒥᐅᓂ ᓴᕕᕋᔭᓕᐅᕐᑎᖃᓚᐅᖏᒻᒪᑕ; ᑕᕝᕙ ᐱᓕᔅᑍᓂᒥᐅᑦ ᐅᖃᓚᐅᕐᐳᑦ, “ᐄᑉᕈᐃᒥᐅᑦ ᓴᕕᒡᔪᐊᓕᐅᖃᑦᑕᕐᓂᐊᖏᒻᒪᑕ ᖃᓗᒋᐊᓕᐅᖃᑦᑕᖏᓪᓗᑎᒡᓗ.” 20ᐃᓴᕆᐊᓕᒥᐅᓪᓕ ᐱᓕᔅᑍᓂᒥᐅᓄᑦ ᐂᒋᐊᖃᖃᑦᑕᓚᐅᕐᐳᑦ ᓄᓇᓕᕆᑦᔪᑎᖏᑦ ᓄᓇᒥᒃ ᒪᒃᐱᕐᑎᕆᑦᔪᑏᑦ, ᐅᓕᒪᐅᑏᑦ, ᑲᑭᐊᒃᔪᐊᑦ, ᐃᐱᓴᕐᑕᐅᖁᓪᓗᒋᑦ ᑖᒃᑯᓄᖓ; 21ᐊᑭᓖᑎᑕᐅᓪᓗᑎᒃ ᑮᓇᐅᔭᒥᒃ ᐊᑕᐅᓯᕐᒥᒃ ᐃᐱᒃᓮᕙᓚᐅᕐᐳᑦ ᓄᓇᒥᒃ ᒪᒃᐱᕐᑎᕆᑦᔪᑎᓂᒃ ᑲᑭᐊᒃᔪᐊᓄᓪᓗ, ᑮᓇᐅᔮᖕᓂᒃ ᒪᕐᕉᖕᓂᒃ ᐊᑭᓖᕙᒃᓱᑎᒃ ᐅᓕᒪᐅᑎᓄᑦ, ᕿᔪᑯᑖᓄᓪᓗ ᓄᕗᓕᖕᓄᑦ. 22ᑍᑦᓱᒪᓂᓕ ᐅᓪᓗᒥ ᐅᓇᑕᕐᑎᓪᓗᒋᑦ ᐃᓴᕆᐊᓕᒥᐅᑦ ᓴᕕᔪᐊᖃᓚᐅᓐᖏᓚᑦ ᖃᓗᒋᐊᖃᕋᑎᒡᓘᓐᓃᑦ, ᓴᐅᓕᒃᑯᒃ ᐃᕐᓂᕇᒃ ᔫᓇᑕᓂᒃᑯᒃ ᐱᑕᓕᑑᑎᓪᓗᒋᒃ.
23ᑕᕝᕙ ᐱᓕᔅᑍᓂᒥᐅᑦ ᐅᓇᑕᕐᑐᒃᓴᓂᒃ ᐃᓕᓴᕐᕕᖓᑦ ᓅᑕᐅᓚᐅᕐᐳᖅ ᒥᒃᒫᔅ ᐅᖓᑖᓄᑦ.
Currently Selected:
ᓴᒧᐃᓕ ᓯᕗᓪᓖᑦ 13: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
