ᑯᕆᓐᑎᐊᒥᐅᓄᑦ ᓯᕗᓪᓖᑦ 14

ᓱᓕ ᐊᓂᕐᓂᐅᑉ ᑐᓂᕐᕈᑎᖏᑦ

1ᓇᒡᓕᖕᓂᖅ ᐱᓇᓱᐊᕐᓯᐅᒃ ᐊᖏᓂᕐᐸᐅᑎᓪᓗᒍ, ᐊᓂᕐᓂᐅᓪᓗ ᑐᓂᕐᕈᑎᖏᑦ ᐊᔪᐃᓐᓈᕆᓯᒋᒃ, ᐱᓗᐊᕐᑐᒥᒡᓕ ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᐅᖃᕈᓐᓇᕐᑎᑕᐅᓂᖅ. 2ᐅᖃᐅᓯᕐᓄᑦ ᑐᓴᕐᖓᕐᑕᓄᑦ ᐅᖃᓪᓚᕐᑐᖅ ᐃᓄᖕᓄᑦ ᐅᖃᓪᓚᖏᒻᒪᑦ ᒎᑎᒧᓪᓕ ᐅᖃᓪᓚᒃᐳᖅ; ᑭᓇᒧᑦ ᑐᑭᓯᔭᐅᔪᓐᓇᖏᒻᒪᑦ, ᓇᓗᓇᕐᑐᓂᒡᓕ ᐅᖃᐅᓯᖃᕐᐳᖅ ᐊᓂᕐᓂᒃᑯᑦ. 3ᒎᑎᐅᓪᓕ ᐅᖃᐅᓯᕆᖁᔭᖏᓐᓂᒃ ᐅᖃᐅᓯᖃᕐᑐᖅ ᐃᓄᖕᓄᑦ ᐅᖃᓪᓚᒃᐳᖅ, ᑖᒃᑯᐊ ᓲᖑᓯᑎᑕᐅᖁᓪᓗᒋᑦ ᐱᕙᓪᓕᕐᑎᑕᐅᖁᓪᓗᒋᓪᓗ ᓮᒻᒪᕐᓴᕐᓗᒋᓪᓗ. 4ᐅᖃᐅᓯᕐᓄᓪᓕ ᑐᓴᕐᖓᕐᑕᓄᑦ ᐅᖃᓪᓚᒃᑐᖅ ᐃᒻᒥᓂᑐᐊᖅ ᐱᕙᓪᓕᕐᑎᑉᐳᖅ, ᒎᑎᐅᓪᓕ ᐅᖃᐅᓯᕆᖁᔭᖏᓐᓂᒃ ᐅᖃᓪᓚᒃᑐᖅ ᐅᒃᐱᕐᑑᖃᑎᒌᑦ ᐱᕙᓪᓕᕐᑎᑉᐰᑦ.

5ᑕᒪᑦᓯ ᐅᖃᐅᓯᕐᓄᑦ ᑐᓴᕐᖓᕐᑕᓄᑦ ᐅᖃᕈᓐᓇᖁᕙᑦᓯ, ᑭᓯᐊᓂᓕ ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᐅᖃᓪᓚᖁᓂᕐᓴᕆᕙᑦᓯ. ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᐅᖃᓪᓚᒃᑐᖅ ᐊᑑᑎᖃᕐᓂᕐᓴᐅᖕᒪᑦ ᐅᖃᐅᓯᕐᓄᑦ ᑐᓴᕐᖓᕐᑕᓄᑦ ᐅᖃᓪᓚᒃᑐᒥᑦ, ᑭᓯᐊᓂ ᑐᓴᕐᖓᕐᑕᓄᑦ ᐅᖃᓚᕐᑑᑉ ᐅᖃᐅᓯᕆᔭᖏᑦ ᑐᑭᓯᓇᕐᓯᑎᑕᐅᒃᐸᑕ, ᐅᒃᐱᕐᑑᖃᑎᒌᑦ ᐱᕙᓪᓕᕐᑎᑕᐅᒐᔭᕐᐳᑦ. 6ᑕᕝᕙᓕ ᐃᓚᒃᑳ, ᐃᓕᑦᓯᓐᓄᑦ ᑎᑭᓪᓗᖓ ᐅᖃᐅᓯᕐᓄᑦ ᑐᓴᕐᖓᕐᑕᓄᑦ ᐅᖃᕕᒋᓕᕈᑦᓯ, ᓱᓇᒧᑦ ᐊᑐᕐᓇᕋᔭᕐᐹ? ᐊᑐᕐᓇᕋᔭᖏᑦᓯᐊᕐᐳᖅ, ᐅᖃᓪᓚᒡᕕᒋᒍᑦᓯᓕ ᓴᖅᑭᑎᑦᓯᕕᒋᒍᑦᓯᓗ ᒎᑎᒥᑦ ᐱᔪᒥᒃ, ᖃᐅᔨᑎᑦᓯᒍᒪᓘᓐᓃᑦ, ᒎᑎᐅᓪᓘᓐᓃᑦ ᐅᖃᐅᓯᕆᖁᔭᖏᓐᓂᒃ ᐅᖃᓪᓚᒡᕕᒋᒍᑦᓯ, ᐊᔪᕆᕐᑐᐃᒍᒪᓘᓐᓃᑦ ᑭᓯᐊᓂ.

7ᐅᕝᕙᓗ ᒪᑯᐊ ᐆᒪᖏᑦᑐᑦ ᓂᑦᔭᕈᑏᑦ ᓲᕐᓗ ᓱᐴᒐᖅ, ᐅᕝᕙᓗ ᑯᑭᑦᑕᐹᕈᑎᑦ ᐊᑐᕐᑕᐅᑦᓯᐊᖏᑉᐸᑕ ᖃᓄᖅ ᖃᐅᔨᒪᔭᐅᒐᔭᕐᐹᑦ ᖃᓄᐃᓕᐅᕐᒪᖔᑕ? 8ᑎᑦᑐᓚᐅᑎᐅᓪᓗ ᓂᐱᖓ ᓱᖅᑯᐃᓇᖏᑉᐸᑦ, ᑭᓇᓕ ᑍᒪ ᐊᑐᐃᓐᓇᕈᕋᔭᕐᐸ ᐅᓇᑕᕆᐊᕐᓂᕐᒧᑦ? 9ᑍᒤᒃᑭᕗᓯᑦᑕᐅᖅ, ᐅᖃᐅᓰᑦ ᑐᓴᕐᖓᕐᑕᑦ ᐊᑐᕐᓗᒋᑦ ᑐᑭᓯᔭᐅᔪᓐᓇᖏᑦᑐᒥᒃ ᐅᖃᓚᓕᕈᑦᓯ, ᑭᓇᒧᓪᓕ ᖃᓄᐃᓕᐅᕐᒪᖔᑦᓯ ᑐᑭᓯᔭᐅᒐᔭᕐᐱᓰ? ᑕᒪᐅᖎᓐᓇᖅ ᐅᖃᓪᓚᒃᑲᔭᕐᐳᑎᑦ. 10ᓇᓗᓇᓐᖏᓚᖅ ᐅᖃᐅᓰᑦ ᐊᑦᔨᒌᖏᑦᑐᑦ ᐅᓄᕐᑐᐊᓘᖕᒪᑕ ᓯᓚᕐᔪᐊᕐᒥ, ᑕᒪᕐᒥᒡᓕ ᐊᑐᓂᑦ ᑐᑭᖃᖏᑦᑑᓐᖏᓚᑦ. 11ᑐᑭᓯᔪᓐᓇᖏᒃᑯᒪᓕ ᐅᖃᐅᓯᕆᔭᐅᔪᓂᒃ, ᑖᑦᓱᒧᖓ ᐅᖃᓪᓚᒃᑐᒧᑦ ᐅᖃᐅᓯᖃᑎᒋᔭᐅᖏᑦᑐᑎᑐᑦ ᑍᒤᒃᑲᔭᕐᐳᖓ, ᐅᕙᖓᓗ ᑖᑦᓱᒪ ᐅᖃᐅᓯᖃᑎᒋᓐᖏᑕᒥᑐᑦ ᑍᒤᓕᕋᔭᕆᕚᖓ. 12ᑍᒤᒃᑲᔭᕆᕗᓯᑦᑕᐅᖅ, ᐊᓂᕐᓂᐅᑉ ᑐᓂᕐᕈᑎᖏᓐᓂᒃ ᐊᔪᐃᓐᓇᒻᒪᕆᒃᑲᑦᓯ, ᐊᔪᐃᓐᓈᕆᓂᕐᐹᕆᔭᕆᐊᖃᕐᐸᓯᓕ ᐅᒃᐱᕐᑑᖃᑎᒌᑦ ᐱᕙᓪᓕᕈᑎᒃᓴᖏᑦ ᐱᓇᓱᐊᕐᓗᒋᑦ.

13ᑍᒤᒻᒪᑦ ᐃᓄᒃ ᑐᓴᕐᖓᕐᑕᕐᑐᖅ ᑐᒃᓯᐊᕐᑐᒃᓴᐅᕗᖅ ᑐᑭᓯᓇᕐᓯᑎᑦᓯᓂᕐᒥᒃ ᐱᔪᓐᓇᕐᑎᑕᐅᔪᒪᓗᓂ. 14ᑐᓴᕐᖓᕐᑕᕐᓗᖓ ᑐᒃᓯᐊᕈᒪ, ᐊᓂᕐᓂᕋ ᑐᒃᓯᐊᕋᓗᐊᕐᐳᖅ ᐃᓱᒪᒐᓕ ᑐᒃᓯᐊᖃᑕᐅᓐᖏᓚᖅ. 15ᖃᓄᕐᓕ ᑍᒪ ᐱᔪᒃᓴᐅᕗᖔ? ᐊᓂᕐᓂᒃᑯᑦ ᑐᒃᓯᐊᕈᒪᕗᖓ ᐃᓱᒪᒃᑯᓪᓗ ᑐᒃᓯᐊᕈᒪᒋᓪᓗᖓ; ᐊᓂᕐᓂᒃᑯᑦ ᐃᓐᖏᕈᒪᕗᖓ ᐃᓱᒪᒃᑯᓪᓗ ᐃᓐᖏᕈᒪᒋᓪᓗᖓ. 16ᒎᑎᒧᑦ ᖁᔭᓕᒍᕕᑦ ᐊᓂᕐᓂᒃᑯᑦ, ᖃᓄᕐᓕ ᑕᕝᕗᓐᖓᕐᓯᒪᔪᑦ ᐱᖃᑕᐅᕙᖏᑦᑐᑦ “ᐋᒦᓐ” ᕈᓐᓇᕋᔭᕐᐹᑦ ᖁᔭᓕᓂᕆᔭᕐᓄᑦ ᑐᑭᓯᖏᓪᓗᑎᒃ ᖃᓄᐃᓕᐅᕐᒪᖔᕐᐱᑦ? 17ᒎᑎᒧᑦ ᖁᔭᓕᑦᓯᐊᕋᔭᕋᓗᐊᕐᐳᑎᑦ, ᐃᓅᖃᑏᓪᓕ ᑕᒪᑐᒧᖓ ᐱᕚᓪᓕᕐᑎᑕᐅᓐᖏᓚᖅ.

18ᒎᑎ ᖁᔭᒋᕙᕋ ᑐᓴᕐᖓᕐᑕᓄᑦ ᐅᖃᓪᓚᖃᑦᑕᕐᓂᕐᓴᐅᒐᒪ ᐃᓕᑦᓯᓐᓂᓕᒫᖅ; 19ᐅᒃᐱᕐᑑᖃᑎᒌᓂᓕ ᐅᖃᕈᒪᓂᕐᓴᐅᒐᔭᕐᐳᖓ ᐅᖃᐅᓯᕐᓂᒃ ᑕᓪᓕᒪᓂᒃ ᐃᓱᒪᓐᓂᑦ ᐱᔪᓂᒃ ᑐᑭᓯᔭᐅᔪᓐᓇᕐᑐᓂᒃ, ᐊᓯᓐᓂᒃ ᐊᔪᕆᕐᑐᐃᔪᓐᓇᖁᓪᓗᖓ, ᑐᓴᕐᖓᕐᑕᓂᒃ 10,000ᓂᒃ ᐊᑐᓐᖏᖔᕐᓗᖓ.

20ᐃᓚᒃᑳ, ᓄᑕᕋᕐᑎᑐᑦ ᐃᓱᒪᖃᕐᓂᐊᕋᓯ; ᐊᔪᕐᓂᕐᒧᑦ ᓄᑕᕋᕐᑎᑑᕐᓗᓯ, ᐃᓱᒪᑦᓯᒍᓪᓕ ᐱᕈᕇᕐᓯᒪᓗᓯ. 21#ᐂᓮᐊᓯ 28:11,12.ᐱᖁᔭᓂ ᑎᑎᕋᕐᓯᒪᖕᒪᑦ,

“ᐃᓄᐃᑦ ᑐᓴᕐᖓᕐᑕᓂᒃ ᐊᑐᕐᓗᖓ ᐅᖃᐅᓯᖃᕐᕕᒋᔪᒪᕙᒃᑲ

ᐅᖃᐅᓯᖃᑎᒋᔭᐅᖏᑦᑐᓪᓗ ᖃᓂᖏᑎᒍᑦ ᐃᓄᐃᑦ ᑖᒃᑯᐊ ᐅᖃᐅᑎᔪᒪᕙᒃᑲ,

ᑍᒤᓕᐅᕋᓗᐊᕈᒪᓕ ᓱᓕ ᐅᕙᓐᓂᒃ ᓈᓚᖕᓂᐊᓐᖏᓚᑦ, ᐊᑕᓂᖅ ᐅᖃᕐᐳᖅ.”

22ᑍᒤᒻᒪᑦ, ᐅᖃᐅᓰᑦ ᑐᓴᕐᖓᕐᑕᑦ ᓇᓗᓁᒃᑯᑕᐅᕗᑦ ᐅᒃᐱᖏᑦᑐᓄᑦ ᐅᒃᐱᕐᑐᓅᖏᑦᑐᖅ, ᒎᑎᐅᓪᓕ ᐅᖃᐅᓯᕆᖁᔭᖏᓐᓂᒃ ᐅᖃᓪᓚᖕᓂᖅ ᐅᒃᐱᕐᑐᓄᑦ ᓇᓗᓁᒃᑯᑕᐅᕗᖅ ᐅᒃᐱᖏᑦᑐᓅᖏᑦᑐᖅ.

23ᑕᕝᕙᓕ ᐅᒃᐱᕐᑑᖃᑎᒌᑦ ᑲᑎᒪᓗᑎᒃ ᑕᒪᕐᒥᒃ ᐅᖃᐅᓯᕐᓄᑦ ᑐᓴᕐᖓᕐᑕᓄᑦ ᐅᖃᓪᓚᓕᕐᐸᑕ, ᐃᓚᒋᔭᐅᕙᖏᑦᑐᑦ ᐅᕝᕙᓗ ᐅᒃᐱᖏᑦᑐᑦ ᐃᑎᕈᑎᒃ, ᑖᒃᑯᓄᖓ ᐃᓱᒤᕈᑎᓯᒪᓂᕋᕐᑕᐅᒐᔭᓐᖏᓚᓰ? 24ᑕᒪᕐᒥᒡᓕ ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᐅᖃᓕᕐᐸᑕ, ᐅᒃᐱᖏᑦᑐᖅ ᐅᕝᕙᓗ ᐃᓚᐅᕙᖏᑦᑐᖅ ᐃᑎᕈᓂ, ᑖᒃᑯᓇᓐᖓᑦ ᑐᓴᕐᑕᒥᒍᑦ ᑐᑭᓯᑎᑕᐅᒐᔭᕐᐳᖅ ᐊᔪᕐᑐᓕᓂᕐᒥᓂᒃ, ᐃᖅᑲᕐᑐᕐᑕᐅᓗᓂᓗ ᑕᒤᑎᒍᑦ ᑐᓵᔭᒥᒍᑦ, 25ᐃᓱᒪᒥᓂᓗ ᐃᔨᕐᓯᒪᔭᖏᑦ ᓴᖅᑭᑎᑕᐅᒐᔭᕐᐳᑦ; ᐅᑯᓗᓂᓗ, ᒎᑎ ᑐᒃᓯᐊᕐᕕᒋᓕᕋᔭᕐᐹ, ᓇᓗᓁᕐᓯᓗᓂᓗ; ᒎᑎ ᓱᓕᓪᓚᕆᒃᑐᒥᒃ ᐊᑯᓐᓇᑦᓯᓐᓃᓐᓂᖓᓂᒃ.

ᑐᒃᓯᐊᕐᕕᖕᒥ ᐋᖅᑭᒃᓯᒪᑦᓯᐊᕆᐊᖃᕐᓂᖅ

26ᖃᓄᕐᓕ ᐅᖃᕐᓂᐊᓕᕐᐳᖓ ᐃᓚᒃᑳ? ᑲᑎᖃᑎᒌᒑᖓᑦᓯ ᐃᓚᑦᓯ ᐊᑐᓂᑦ ᐃᓐᖏᕈᑎᒃᓴᖃᕐᐳᑦ, ᐃᓚᖓᑦ ᐊᔪᕆᕐᑐᐃᑦᔪᑎᒃᓴᖃᕐᐳᖅ, ᐃᓚᖓᑦ ᒎᑎᒧᑦ ᑕᑯᑎᑕᐅᓯᒪᕗᖅ, ᐃᓚᖓᑦ ᑐᓴᕐᖓᕐᑕᓄᑦ ᐅᖃᐅᓯᒃᓴᖃᕐᐳᖅ, ᐅᕝᕙᓗ ᐃᓚᖓᑦ ᑐᓴᕐᖓᕐᑕᓄᑦ ᐅᖃᐅᓯᐅᔪᓂᒃ ᑐᑭᓯᓇᕐᓯᑎᑦᓯᑦᔪᑎᒃᓴᖃᕐᐳᖅ. ᑕᒪᒃᑯᐊᓕᒫᓪᓕ ᐊᑐᕐᑕᐅᔪᒃᓴᐅᕗᑦ ᐃᓚᒌᒃᑐᑦ ᐱᕙᓪᓕᕐᑎᑕᐅᑦᔪᑎᒃᓴᖏᓐᓄᑦ. 27ᑐᓴᕐᖓᕐᑕᕐᑐᖃᕐᐸᑦ, ᒪᕐᕈᐃᓐᓈᒃ ᐱᖓᓱᓪᓘᓐᓃᑦ ᑐᓴᕐᖓᕐᑕᓄᑦ ᐅᖃᓪᓚᒃᑐᒃᓴᐅᕗᑦ, ᐊᑕᐅᑦᓯᒃᑰᖏᓪᓗᑎᒃ; ᐊᑕᐅᓯᐅᓪᓗ ᑐᑭᓯᓇᕐᓯᑎᓪᓕᒋᑦ. 28ᑐᑭᓯᓇᕐᓯᑎᑦᓯᔪᒃᓴᖃᖏᑉᐸᓪᓕ, ᐃᓚᒌᒃᑐᓂ ᑐᓴᕐᖓᕐᑕᕐᑐᖅ ᓂᐱᖃᕐᑐᒃᓴᐅᓐᖏᓚᖅ, ᓂᐱᖃᖏᓪᓗᓂᓕ ᑐᓴᕐᖓᕐᑕᕐᑐᒃᓴᐅᕗᖅ ᐃᒻᒥᓄᑦ ᒎᑎᒧᓪᓗ. 29ᒪᕐᕉᒃ ᐱᖓᓱᓪᓘᓐᓃᑦ ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᐅᖃᓪᓚᒃᑐᒃᓴᐅᕗᑦ, ᐊᓯᖏᓪᓕ ᖃᐅᔨᓴᕐᑐᒃᓴᐅᕗᑦ ᐅᖃᐅᓯᐅᔪᓂᒃ. 30ᑕᕝᕙᓂᓕ ᐃᒃᓯᕙᖃᑕᐅᔪᒥᒃ ᑕᑯᑎᑕᐅᔪᖃᕐᐸᑦ, ᓯᕗᓪᓕᖅ ᐅᖃᓪᓚᒃᑐᖅ ᓂᐸᖏᕐᑐᒃᓴᐅᕗᖅ. 31ᑕᒪᑦᓯ ᐊᑐᓂᑦ ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᐅᖃᓪᓚᒍᓐᓇᕐᐳᓯ ᐊᑕᐅᓯᐅᓈᕐᑎᕐᓗᓯ, ᑕᒪᕐᒥᒃ ᑕᕝᕙᓃᑦᑐᑦ ᐊᔪᕆᕐᑐᕐᑕᐅᖁᓪᓗᒋᑦ ᐱᕙᓪᓕᕐᑎᑕᐅᖁᓪᓗᒋᓪᓗ; 32ᒎᑎᐅᑉ ᐅᖃᐅᓯᕆᖁᔭᖓᓂᒃ ᐅᖃᓪᓚᖕᓂᖅ ᐅᖃᓪᓚᒃᑑᑉ ᓇᖕᒥᓂᖅ ᐊᐅᓚᑦᓱᓐᓇᕆᐊᖃᕐᒪᒍ. 33ᒎᑎᐅᑉ ᑐᑮᕈᓯᒪᔪᒥᒃ ᐱᖁᖏᒻᒪᑎᒍᑦ ᐋᖅᑭᑦᓯᐊᕐᓯᒪᖁᕚᑎᒍᓪᓕ ᐅᐃᒪᔮᖏᓪᓗᑕ.

ᒎᑎᐅᑉ ᐅᒃᐱᕐᑐᖁᑎᓕᒫᖏᓐᓂ, 34ᐊᕐᓁᑦ ᓂᐱᖃᕐᑐᒃᓴᐅᓐᖏᓚᑦ ᑲᑎᒪᔪᓂ. ᐅᖃᕐᕕᒃᓴᖃᕐᑎᑕᐅᔪᒃᓴᐅᓐᖏᓚᑦ, ᓈᓚᒃᑐᒃᓴᐅᕗᓪᓕ ᑕᓯᐅᕐᑎᐅᔪᓂᒃ ᑕᕝᕙᓂ; ᑍᒫᒃ ᐱᖁᔧᑦ ᐅᖃᕐᓯᒪᖕᒪᑕ. 35ᑐᑭᓯᔪᒪᔭᖃᕈᑎᒡᓕ ᓱᓇᑐᐃᓐᓇᕐᒥᒃ, ᐅᐃᑎᒃ ᐊᐱᕆᔭᒃᓴᕆᕔᑦ ᐊᖏᕐᕋᒥᖕᓂ. ᑕᑯᒥᓇᖏᑦᑐᐊᓘᖕᒪᑦ ᐊᕐᓇᖅ ᐅᖃᓪᓚᒃᑎᓪᓗᒍ ᑲᑎᒪᔪᓂ.

36ᒎᑎᐅᑉ ᐅᖃᐅᓯᖏᑦ ᐃᓕᑦᓯᓐᓂᑦ ᐱᒋᐊᕐᓂᖃᕐᐹᑦ? ᐅᕝᕙᓗ ᐃᓕᑦᓯᓐᓄᑐᐊᖅ ᑎᑭᓯᒪᕙᑦ? 37ᓇᓚᐅᑦᑍᔫᓐᓇᕋᓱᒋᔪᖃᕐᐸᑦ, ᐅᕝᕙᓗ ᐊᓂᕐᓂᐅᑉ ᑐᓂᕐᕈᑎᖏᓐᓂᒃ ᐱᓯᒪᓇᓱᒋᔪᖃᕐᐸᑦ, ᑖᓐᓇ ᑐᑭᓯᑦᓯᐊᓕᕐᓕ ᑎᑎᕋᐅᓯᕆᔭᒃᑲ ᐅᑯᐊ ᐊᑕᓂᐅᑉ ᐱᖁᔨᓂᕆᖕᒪᒋᑦ. 38ᓇᓪᓕᐊᓪᓕ ᐅᑯᓂᖓ ᐅᖃᐅᓯᕆᔭᓐᓂᒃ ᑲᒪᔪᒪᖏᑉᐸᑦ, ᑖᓐᓇ ᑲᒪᒋᔭᐅᔪᒃᓴᐅᖏᓐᓂᕗᖅ.

39ᑍᒤᒻᒪᑦ ᐃᓚᒃᑳ, ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᐅᖃᕈᓐᓇᕈᒪᓗᓯ ᐊᔪᐃᓐᓇᕆᑦᓯ, ᑐᓴᕐᖓᕐᑕᖃᑦᑕᕐᑐᓪᓗ ᐃᓂᕐᑎᕐᓂᐊᕋᓯᒋᒃ. 40ᑕᒪᕐᒥᒡᓕ ᐊᑐᕐᑕᐅᔪᒃᓴᐅᕗᑦ ᑐᑭᖃᑦᓯᐊᕐᑐᒥᒃ ᐋᖅᑭᒃᓯᒪᑦᓯᐊᕐᑐᒥᒡᓗ.

Currently Selected:

ᑯᕆᓐᑎᐊᒥᐅᓄᑦ ᓯᕗᓪᓖᑦ 14: EAIB

Highlight

Copy

Compare