ᑯᕆᓐᑎᐊᒥᐅᓄᑦ ᓯᕗᓪᓖᑦ 12

ᐊᓂᕐᓂᐅᑉ ᐃᑦᔪᕐᓁᑦᑑᑉ ᑐᓂᕐᕈᑎᖏᑦ

1ᐃᓚᒃᑳ, ᒫᓐᓇᓕ ᐊᓂᕐᓂᐅᑉ ᐃᑦᔪᕐᓁᑦᑑᑉ ᑐᓂᕐᕈᑎᖏᓐᓂᒃ ᐅᖃᐅᑦᔭᐅᓯᒪᖏᑦᑑᖁᓐᖏᓚᑦᓯ. 2ᖃᐅᔨᒪᒐᑦᓯ ᒎᑎᒧᑦ ᐅᒃᐱᓕᓚᐅᕐᑎᓐᓇᓯ, ᒎᑎᓐᖑᐊᓄᑦ ᐅᖃᕈᓐᓇᖏᑦᑐᓄᑦ ᐊᐅᓚᑕᐅᓚᐅᕋᑦᓯ, ᑕᒻᒪᕐᑎᑕᐅᓪᓗᓯᓗ. 3ᑍᒤᒻᒪᑦ ᑐᑭᓯᓯᒪᑦᓯᐊᖁᕙᑦᓯ, ᒎᑎᐅᑉ ᐊᓂᕐᓂᖓᓄᑦ ᐅᖃᓪᓚᒃᑎᑕᐅᔪᒥᒃ, ᐃᒤᓕᔪᖃᓚᐅᕐᓯᒪᓐᖏᓚᖅ “ᔩᓱᓯ ᓇᕐᕈᓇᕐᓯᓕ!” ᐃᒫᒡᓗ ᐅᖃᕐᑐᖃᕈᓐᓇᓐᖏᓚᖅ “ᔩᓱᓯ ᐊᑕᓂᐅᕗᖅ” ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐅᖃᕐᑎᑕᐅᖏᒃᑯᓂ.

4 # ᕉᒪᒥᐅᓄᑦ 12:6-8. ᐊᓂᕐᓂᐅᓪᓕ ᑐᓂᕐᕈᑎᖏᑦ ᐊᑦᔨᒌᓐᖏᓚᑦ, ᐊᓂᕐᓂᕐᓕ ᑐᓂᓯᔪᖅ ᑖᓐᓇᑦᓮᓐᓇᐅᕗᖅ; 5ᐱᔨᑦᓯᕐᓃᓪᓗ ᐊᑦᔨᒌᓐᖏᓚᑦ, ᐊᑕᓂᕐᓕ ᐱᔨᑦᓯᕐᑕᐅᔪᖅ ᑖᓐᓇᑦᓮᓐᓇᐅᕗᖅ. 6ᐱᓇᓱᐊᕐᓃᓪᓗ ᐊᑦᔨᒌᓐᖏᓚᑦ, ᒎᑎᓕ ᑖᓐᓇᑦᓮᓐᓇᐅᕗᖅ ᐱᔪᓐᓇᕐᓂᕐᑖᑎᑦᓯᔪᖅ ᐃᓘᓐᓇᖏᓐᓂᒃ ᐊᑐᓂᑦ. 7ᐃᓄᖕᓄᑦ ᐊᑐᓂᑦ ᐊᓂᕐᓂᐅᑉ ᑐᓂᕐᕈᑎᖏᑕ ᐱᓇᓱᐊᕐᑎᑦᓯᓂᖏᑦ ᓴᖅᑭᕐᐳᑦ ᐊᓯᖏᑕ ᐱᕙᓪᓕᕈᑎᒃᓴᖏᓐᓄᑦ. 8ᐃᓚᖓᓐᓄᑦ ᐊᓂᕐᓂᖅ ᑐᓂᓯᕗᖅ ᓯᓚᑐᔪᓂᒃ ᐅᖃᐅᓯᖃᕐᑎᑦᓯᓂᕐᒥᒃ; ᐊᓯᐊᓄᓪᓗ ᐊᓂᕐᓂᖅ ᑖᓐᓇᑦᓮᓐᓇᖅ ᑐᓂᓯᕗᖅ ᖃᐅᔨᒪᓂᕐᑖᕐᑎᑎᓪᓗᓂ ᐅᖃᓪᓚᒃᑎᑦᓯᕗᖅ. 9ᐃᓚᖓᓪᓗ ᐅᒃᐱᕐᓂᕐᒥᒃ ᑐᓂᓯᕕᐅᕗᖅ ᐊᓂᕐᓂᕐᒥᑦ ᑕᕝᕙᓐᖓᑦᓮᓐᓇᖅ; ᐃᓚᖓᓪᓗ ᑎᒥᒃᑯᑦ ᐋᖅᑭᒃᓯᓂᕐᒥᒃ ᑐᓂᓯᕕᐅᕗᖅ ᐊᓂᕐᓂᕐᒥᑦ ᑖᑦᓱᒪᓐᖓᑦᓮᓐᓇᖅ. 10ᐃᓚᖓᑦ ᑲᒪᓇᕐᑐᓕᔪᓐᓇᕐᓂᕐᒥᒃ ᑐᓂᓯᕕᐅᕗᖅ; ᐃᓚᖓᓪᓗ ᒎᑎᐅᑉ ᐅᖃᐅᓯᕆᔭᐅᑯᔭᖏᓐᓂᒃ ᑐᓂᓯᕕᐅᕗᖅ; ᐃᓚᖓᓪᓗ ᐊᓂᕐᓃᑦ ᖃᓄᐃᑦᑑᓂᖏᓐᓂᒃ ᖃᐅᔨᑎᑕᐅᓂᕐᒥᒃ ᑐᓂᓯᕕᐅᕗᖅ; ᐃᓚᖓᓪᓗ ᑐᓴᕐᖓᕐᑕᓂᕐᓄᑦ ᐊᑦᔨᒌᖏᑦᑐᓄᑦ ᐅᖃᕈᓐᓇᕐᓂᕐᒥᒃ ᑐᓂᓯᕕᐅᕗᖅ; ᐃᓚᖓᓪᓗ ᑐᓂᓯᕕᐅᕗᖅ ᑐᓴᕐᖓᕐᑕᕈᑎᐅᔪᓂᒃ ᑐᑭᓯᓇᕐᓯᑎᑦᓯᔪᓐᓇᕐᓂᕐᒥᒃ. 11ᑕᒪᒃᑯᐊᓕᒫᓪᓕ ᐊᓂᕐᓂᐅᑉ ᑖᑦᓱᒪᑦᓮᓐᓇᐅᑉ ᐱᓇᓱᐊᕐᐰᑦ, ᑖᑦᓱᒪᓗ ᐊᑐᓂᑦ ᑐᓂᓯᕕᒋᕔᑦ ᐃᓱᒪᒥᓂᒃ ᐊᑦᔨᒌᖏᑦᑐᓂᒃ ᑐᓂᕐᕈᑎᓂᒃ.

ᑎᒥ ᐊᑕᐅᓯᖅ ᐊᒥᓱᓂᒃ ᐃᓚᖃᕐᑐᖅ

12 # ᕉᒪᒥᐅᓄᑦ 12:4,5. ᓲᕐᓗ ᑎᒥ ᐊᑕᐅᓯᖅ ᐊᒥᓱᓂᒃ ᑭᓱᑐᐃᓐᓇᖃᕐᒪᑦ, ᑕᒪᒃᑯᐊᓗ ᑎᒥᐅᑉ ᐃᓚᒋᖕᒫᖏᑦ ᑎᒥᒧᑦ ᐊᑕᓪᓗᑎᒃ, ᐅᓄᕋᓗᐊᕐᑎᓪᓗᒋᑦ, ᑎᒥ ᐊᑕᐅᓯᐅᖕᒪᑦ, ᙭ᔅᑑᓯᐅᑦᑕᐅᖅ ᑎᒥᖓ ᑍᒤᒃᑭᕗᖅ. 13ᐊᓂᕐᓂᕐᒧᑦ ᐊᑕᐅᓯᕐᒧᑦ ᐹᑉᑎᑕᐅᓯᒪᒐᑦᑕ ᑎᒥᒥ ᐊᑕᐅᓯᐅᖁᓪᓗᑕ; ᔫᑎᑦ ᒍᕇᑭᓪᓗ, ᐱᔨᐅᔪᑦ ᐱᔨᐅᖏᑦᑐᓪᓗ, ᑕᒪᑦᑕᓗ ᐃᒥᕐᑎᑕᐅᕗᒍᑦ ᐊᓂᕐᓂᕐᒥᑦ ᐊᑕᐅᓯᕐᒥᑦ.

14ᑎᒥ ᐊᑕᐅᓯᕐᒥᒃ ᐃᓚᖃᖏᒻᒪᑦ, ᐅᓄᕐᑐᓂᒡᓕ ᐃᓚᖃᕐᐳᖅ. 15ᐃᓯᒊᑦ ᐅᖃᕋᔭᕐᐸᑕ, “ᐊᒡᒐᐅᖏᓐᓇᒪ, ᑎᒥᐅᑉ ᐃᓚᒋᓐᖏᓛᖓ,” ᑍᒤᓕᒐᓗᐊᕐᐸᑕ ᑎᒥᐅᑉ ᐃᓚᒋᔪᓐᓃᕋᔭᓐᖏᓛ. 16ᓯᐅᑎᑦᑕᐅᖅ ᐅᖃᕋᔭᕐᐸᑦ, “ᐃᔨᐅᖏᓐᓇᒪ, ᑎᒥᐅᑉ ᐃᓚᒋᓐᖏᓛᖓ,” ᑍᒤᓕᒐᓗᐊᕐᐸᑦ ᑎᒥᐅᑉ ᐃᓚᒋᔪᓐᓃᕋᔭᓐᖏᓛ. 17ᑎᒥᓕᒫᖅ ᐃᔨᐅᒃᐸᑦ, ᓇᐅᑯᓪᓕ ᑐᓵᒐᔭᕐᐹ? ᑎᒥᓕᒫᕐᓗ ᓯᐅᑕᐅᒃᐸᑦ, ᓇᐅᑯᓪᓕ ᓁᒪᔪᓐᓇᕋᔭᕐᐹ? 18ᑍᒤᒃᑲᓗᐊᕐᑎᓪᓗᒍᓕ, ᒎᑎᐅᑉ ᐊᑐᓂᑦ ᑎᒥᒦᑦᑐᑦ ᐊᑑᑎᖃᕐᑎᑉᐰᑦ, ᐃᓱᒪᒋᔭᒥᓄᑦ ᐃᓂᒃᓴᖏᓐᓄᑦ ᐋᖅᑭᒡᓗᒋᑦ. 19ᑎᒥᐅᓪᓕ ᓱᓇᑐᐃᓐᓇᖏᑦ ᑕᒪᒃᑯᐊᑑᒃᐸᑕ, ᑎᒥᓕ ᓇᓃᒃᑲᔭᕐᐹ? 20ᑍᒤᒻᒪᑦ, ᑎᒥᐅᑉ ᓱᓇᑐᐃᓐᓇᖏᑦ ᐅᓄᕐᑑᕗᑦ, ᑎᒥᓕ ᐊᑕᐅᓯᐅᕗᖅ.

21ᐃᔨ ᐊᒡᒐᖕᓄᑦ ᐅᖃᕈᓐᓇᓐᖏᓚᖅ, “ᐅᕙᓐᓄᑦ ᐊᑑᑎᖃᓐᖏᓚᑎᑦ,” ᓂᐊᖁᕐᓗ ᐃᑎᒐᖕᓄᑦ ᐅᖃᕈᓐᓇᖏᓐᓂᕗᖅ, “ᐅᕙᓐᓄᑦ ᐊᑑᑎᖃᓐᖏᓚᑎᑦ.” 22ᐃᒤᓕᖓᖔᕐᐳᕐᓕ, ᑕᒪᒃᑯᐊ ᑎᒥᐅᑉ ᓱᓇᑐᐃᓐᓇᖏᑦ ᓴᓐᖐᓐᓂᕐᓴᐅᔪᑦ ᑕᒪᒃᑯᐊ ᐊᑐᕆᐊᖃᕐᓂᕐᓴᐅᕗᑦ; 23ᑎᒥᐅᓪᓗ ᓱᓇᑐᐃᓐᓇᖏᑦ ᐅᐱᓐᓇᓗᐊᕋᓱᒋᓐᖏᑕᕗᑦ ᑕᒪᒃᑯᐊ ᑲᒪᒋᑦᓯᐊᕆᐊᖃᕐᐸᕗᑦ, ᑎᒥᐅᓪᓗ ᑭᓱᖓ ᐱᔪᒥᒋᓐᖏᑕᕗᑦ ᑲᒪᒋᑦᓯᐊᕐᐸᒃᑭᕙᕗᑦ, 24ᑎᒥᑦᑕ ᑭᓱᑯᑦᑎᖏᑦ ᐱᔪᒥᓇᕆᔭᕗᑦ ᑍᒫᒃ ᑲᒪᒋᑦᓯᐊᕐᑎᒋᔭᕆᐊᖃᖏᒻᒪᑕ. ᒎᑎᐅᓪᓕ ᑎᒥᕗᑦ ᐋᖅᑭᒃᓯᒪᕔᑦ ᑲᒪᒋᔭᐅᑦᓯᐊᕆᐊᓖᑦ ᑲᒪᒋᔭᐅᑦᓯᐊᕐᓂᕐᓴᐅᑎᓪᓗᒋᑦ. 25ᑎᒥᐅᑉ ᑭᓱᑯᑦᓯᖏᑦ ᐊᑐᓃᖓᓕᖁᓇᒋᑦ, ᐃᒻᒥᖕᓄᓪᓕ ᐃᑲᔪᕐᑎᒌᖁᓪᓗᒋᑦ. 26ᑎᒥᐅᑉ ᑭᓱᑯᑦᑎᖓ ᐋᓐᓂᐊᓕᕐᐸᑦ, ᑕᕝᕙ ᑎᒥᓕᒫᖅ ᐋᓐᓂᐊᖃᑕᐅᓕᕐᐳᖅ; ᑎᒥᐅᓪᓗ ᑭᓱᑯᑦᑎᖓ ᓂᕐᑐᕐᓇᕐᑎᑕᐅᒃᐸᑦ, ᑕᕝᕙ ᑎᒥᐅᑉ ᑭᓱᑯᑦᑎᓕᒫᖏᑦ ᖁᕕᐊᓱᒃᑎᑕᐅᓕᕐᐳᑦ.

27᙭ᔅᑑᓯᐅᑉ ᑎᒥᒋᕚᓯ, ᐊᑐᓂᓪᓗ ᐃᓚᒋᔭᐅᓪᓗᓯ ᑎᒥᖓᓄᑦ. 28#ᐃᐱᓯ 4:11.ᒎᑎᓗ ᐋᖅᑭᒃᓯᓯᒪᕗᖅ ᐃᓚᒌᒃᑐᓂ ᓯᕗᓪᓕᕐᒥᒃ ᐋᐴᓯᑕᓕᖕᓂᒃ, ᐂᑉᐸᖓᓂᒃ ᓇᓚᐅᑦᑍᔪᓂᒃ, ᐱᖓᔪᐊᓐᓂᒃ ᐃᓕᓮᔨᓂᒃ, ᑲᒪᓇᕐᑐᓕᓂᕐᒥᒃ ᐱᓇᓱᐊᕈᓐᓇᕐᑐᓂᒃ, ᐋᓐᓂᐊᕐᑐᓂᒡᓗ ᐋᖅᑭᒃᓯᓂᕐᒥᒃ ᑐᓂᕐᕈᓯᐊᓕᖕᓂᒃ, ᐊᓯᒥᖕᓂᒡᓗ ᐃᑲᔪᕈᓐᓇᕐᑐᓂᒃ, ᐃᓚᒌᒃᑐᓂᒡᓗ ᐊᐅᓚᑦᓯᔨᐅᔪᓐᓇᕐᑐᓂᒃ, ᐅᖃᐅᓯᕐᓄᓪᓗ ᑐᓴᕐᖓᕐᑕᓄᑦ ᐊᑦᔨᒌᖏᑦᑐᓄᑦ ᐅᖃᓪᓚᒍᓐᓇᕐᑐᓂᒃ. 29ᑕᒪᕐᒥᒃ ᐋᐴᓯᑕᓕᐅᕚᑦ? ᑕᒪᕐᒥᒃ ᓇᓚᐅᑦᑍᔫᕚᑦ? ᑕᒪᕐᒥᒃ ᐃᓕᓮᔨᐅᕚᑦ? ᑕᒪᕐᒥᒃ ᑲᒪᓇᕐᑐᓕᔪᓐᓇᕐᐹᑦ? 30ᑕᒪᕐᒥᒃ ᐋᖅᑭᒃᓯᓂᕐᒥᒃ ᑐᓂᕐᕈᓯᐊᕐᓯᒪᕚᑦ, ᐅᕝᕙᓗ ᑕᒪᕐᒥᒃ ᐅᖃᐅᓯᕐᓂᒃ ᑐᓴᕐᖓᕐᑕᓂᒃ ᐅᖃᓪᓚᒍᓐᓇᕐᐹᑦ? ᑕᒪᕐᒥᒃ ᐅᖃᐅᓯᕐᓂᒃ ᑐᓴᕐᖓᕐᑕᓂᒃ ᑐᑭᓯᓇᕐᓯᑎᑦᓯᔪᓐᓇᕐᐹᑦ? 31ᑐᓂᕐᕈᑏᓪᓕ ᐊᑐᕐᓂᕐᐹᖏᓐᓂᒃ ᐱᓇᓱᐊᓕᕆᑦᓯ.

ᒫᓐᓇᓗ ᐊᔪᕆᕐᑑᑎᔪᒪᕙᑦᓯ ᐃᓕᖅᑯᓯᕐᒥᒃ ᐱᐅᓂᕐᐸᐅᔪᒥᒃ.

Currently Selected:

ᑯᕆᓐᑎᐊᒥᐅᓄᑦ ᓯᕗᓪᓖᑦ 12: EAIB

Highlight

Copy

Compare