Matiye 3
3
Zâŋ Batis pamò ani
Mar 1:1-8; Luk 3:1-18; Zâŋ 1:19-28
1Yo̧o̧n ɛnɔ, Zâŋ Batis hən ho̧o̧t talle hɛk Yuuda ɛn o dii pamò paraa o fee: 2«Vo fill kandi von nɛ, ɛnɔ Go̧o̧ge GBɛ̧ɛ̧ an diŋŋi ma!›› 3Zâŋ o wa̧y Go̧o̧ge yaʼyɛɛ an Ezǎy bɔk moo moò an fee: «ha̧a̧ de gbatta wɔɔk ho̧o̧te: Vo wɛʼza GBɛ̧ɛ̧ kɛŋ yanarɛ, vo sɛksa yana za̧a̧ lîkka vɛy!›› 4Zâŋ dɔt sâm Gɛloba waama kə tann vere kanda sȩȩge tin; O za̧a̧n sikka vere dɔŋ mɛk hɔ̧zɔ̧kka. 5Náa kap Zeruzalɛm vɛ, náa Yuuda ve tɛʼ vere náa hɛk lɛk yak Zurdɛŋŋɔ ve tɛʼ ve yaay Zâŋ oppo. 6Ve vuksi hɛn ɓɛɛ von vɛ duʼri sɛɛʼ Zâŋ kə ə̌l vo Batɛm Zurdɛŋŋe. 7Zâŋ hə̧ náa Farize vɛ duʼza̧a̧ vere náa saduse vɛ ve yaay oppo doò ə̌l vo Batɛmma nɔ; O feet vo: «Bek daaa vɛ! hii feet vo doò vo ǎt Go̧o̧ge si̧i̧ zat an de sanii nɔ yɛɛ? 8Vo it o vo kɔm ba ka gaan bo vo fill si̧i̧ von vɛ ma ze nɛy 9Ɛn gaa ka voy vəʼəra fee gɔɔ: “Abaram o aŋ vini nɔ bo liirɛ sɛ.” Ɛnɔ mi feet vora Go̧o̧ge kaà kɔ pîn nɛnɔ vɛ kaa ve bi̧i̧ Abaram luk an vey! 10Koy san de dora tap vere zazak an daŋ: Tap ve leen leet za̧a̧ yɛ nɔ ve tɛʼ vey do gbəl voo vɛre. 11Min, mii ə̌l vora Batɛm vey maàma ka it bo vo fill kandi von ma ze nɛy; Ɛn há̧a̧ de yaay ii piki nɔ de yaa ə̌llin vora fəəm dȩȩta vere vɛɛ̀ tin. O ɛ gɔti ɗəəyrɛ: Mi liin dɔk kaǎy pɔza tɛk an nɛ yɛ. 12O ɛ de mak wɛll hɛn o naʼa de wɛll ɓɛ̧ɛ̧zinna dȩȩtɔ vere ɔkkɔrɛ. Oy sɔŋŋa dȩȩt an nɔ a̧lle, ɛn oy aŋŋa ɔkkɔ vɛɛ̀ nínin yɛ nɔ oppo.››
Yeesu Batɛm ani
Mar 1:9-11; Luk 3:21-22
13Ɛnɔ Yeesu luu hɛk Galile tak Zurdɛŋ. O gbɔ Zâŋ oppo Zâŋ doò ə̌l vo Batɛmma, 14ɛn ɗaa Zâŋ bɔnnɛ. O feeza Yeesu: «Mi hi̧i̧ kaǎm ə̌li Batɛm yɔ te, ɛn mɔy yaa iipo terɛ!›› 15Ɛn ɗaa, Yeesu hi̧i̧za: «Mɔ ɓa kɔ yɛɛ de ɓɔllɛ nɛnɔ oppo nɔrɛ. Ɛnɔ sȩȩ kaa ba kɔ hɛn Go̧o̧ge hi̧i̧ nɔrɛ tɛʼ.›› Ɛn kəzəkkɔ Zâŋ ɓa hi̧i̧rɛ. 16Yeesu fee ka ə̂l Batɛm kəzəkkɔ, o vugi maàme tuurɛ. Yak da̧a̧ ɛn oppo vin bɛltii kulli moò ani: Yeesu hə̧ Go̧o̧ge fəəm an si zo̧o̧y o fɔn too kə̌k vin. 17Ɛn wɛll zɔʼ kini bɛlba tuu fee: «Wa̧y nɛnɔ o tân min mi hí̧í̧i̧ ɓimmɛy; si̧i̧ dȩȩy o fat yɛ#3:17 Vo goozin vere Dɛg 2: 7; Eza 42: 1.››
Currently Selected:
Matiye 3: dae
Highlight
Copy
Compare
Share
Want to have your highlights saved across all your devices? Sign up or sign in
