Matiye 28
28
Yeesu niŋzi vɔɔ yɛɛre
Mar 16:1-10; Luk 24:1-12; Zâŋ 20:1-10
1Yo̧o̧ wə̧ə̧ri nɔ o pikpa, duamas ba yo̧o̧ sǎm ba, Maari waà Mgdala nɔ vere Maari zɔʼɔ ve tak gakkɔ toraa. 2Ɛtuu vin hɛttɔ nammɛ aʼvin; Gbɛ̧ɛ̧ kɛŋ Zə̧ə̧̀ an siy bɛlba, yaa kǐk sa̧y aʼni nɔrɛ kə zɔɔ tin. 3O dȩȩzin too maam yȩʼgii vin ɛn sam an nɔ vɛ buyya too zu̧u̧t hok vin. 4Wa̧a̧ vɛɛ̀ bɔk vey laa gakkɔ vɛ dòo kɔ vorɛ, ve niŋŋɛ ve bi̧i̧ too vɔɔ. 5Zə̧ə̧̀ nɔ iŋ yak moot feeza keppɔ vɛ: «Dòo do kɔ vo sɛ. Mi gaarɛ voy tee de Yeesu, wa̧y bɔk ve gaʼa tap ɓanzinna ba nɛy; 6O paam ɛtɛɛ yɛ, o niŋzi kə̌y vɔɔ yɛɛre za̧a̧na, too bɔk o fee nɔm. Vo yaa to yɛɛ bɔk o ǔt tin nɛy. 7Vo tak nɔmpo vo feeza kamm an verɛ: “O niŋzi vɔɔ yɛɛre ɛn oy laa vora de ɓɔllɛ nɛ hɛk Galile; Vo tak hə̧ʼə̧ə̧ ituu.” Hɛn mi feet vo nɔ de ɛnɔ.» 8Keppɔ ve luu gakpa tuu nɔmpo, yak da̧a̧ nɔ oppo vin dòo kɔ vorɛ si̧i̧ dȩȩ vorɛ vin, ve ǎt tak feeza Yeesu kaam an vɛ moò nɔrɛ. 9An kaʼso Yeesu vuk o ve timba kə feet vo: «Mi moogi vorɛ!» Ve diŋŋi o hɛge ve so dɔʼ an, ve kə ɗiksi o timba. 10Ɛnɔ Yeesu feet vo: «Dòo do kɔ vo sɛ. Vo tak feeza daay vɛ do ve tak Galile. Ve tak hə̧yya̧ ituu.»
Bǐt wa̧a̧ vɛɛ̀ nɔ ve òo nɛy
11Keppɔ vey luu takka nɔ, wa̧a̧ vɛɛ̀ bɔk vey laa gakkɔ, zɔʼ ve luu tak kare ve tak ooza náa kɔ maak ak kɛŋŋɔ vɛ hɛn daa nɔrɛ tɛʼ. 12Náa kɔ maak ak kɛŋŋɔ ve sɔŋŋɛ vere náa kɛŋŋɔ ve daŋ. Ve ta yak von, ka ve po wa̧a̧ vɛɛ̀ nɔ vɛ hella aʼvin 13ve kə feet vo: «Vo fee baa wa̧y ɛnɔ kaam an ke ve yaa iŋ fo̧o̧ an yuǔ ke voy nəmme nɔ oppo. 14Ɛn gɔmna kɛŋ oo ki nɔ, vii oo watzaa vi kə sɔ̌t vora yɔʼrerɛ.» 15Wa̧a̧ vɛɛ̀ nɔ ve ɓa hell waa nɔ, ve kə kɔ too ve feet vo nɔm. Moò ɛnɔ wɛksi náa Yuuda o ve tiŋza̧a̧re nɔ too ɛnɔm gbɔ yo̧o̧ ɛnɔ oppo.
Yeesu iza kaam an ve gbɔyya
Mar 16:14-18; Luk 24:36-39; Zâŋ 20:19-23; Yaʼ 1:6-8
16Kaam boʼ zoo daŋga nɔ ve gbɔ Galile, gbɔk waa Yeesu bɔk feet vo nɔ oppo. 17Ve hə̧ʼə nɔ, ve bɛʼzarɛ; ɛn ɗaa, náa zɔʼ o ve tiŋza̧a̧re tuu ve yǔl moǒ. 18Yeesu diŋ yaa kə feet vo: «Gɔti bɛlba gɔɔ vere hɛtte tɛɛ nɔ tɛʼ de ii naʼa. 19Vo tak náa zik hɛkpa nɔ o ve po sɛw tɛʼ vo bi̧i̧zi vo kaam min vey; vo ə̌l vo Batɛm Baa o niiba, Tân o niiba, vere Fəəm dȩȩt o niiba, 20vo it vo do ve òo hɛn mi feet vo nɔ verɛ tɛʼ. Ɛn vo gaa boy de kangaa voy yo̧o̧ tuŋ, de gbɔra hɛk si̧ʼtum ba.»
Currently Selected:
Matiye 28: dae
Highlight
Copy
Compare
Share
Want to have your highlights saved across all your devices? Sign up or sign in
