Matiye 23
23
Yeesu fee náa doò ve laa wɔɔk von vere náa it Mɔyi̧zə moò buú an vɛ vere náa Farize vɛ moò von nɛ
Mar 12:38-39; Luk 11:43, 46; 20:45-46
1Ɛnɔ Yeesu mooza náa duʼ nɔ vɛ vere kaam an vɛ fee: 2«Náa it Moyi̧i̧zə moò buu an vɛ vere náa Farize vɛ, ve ɛ vo doò ve òo watza náa vɛ Moyi̧i̧zə moò buu an nɛy. 3Ɛnɔ kaà vo kiit vorɛ ɛn kaà vo kə kɔ hɛn vey feet vora nɔrɛ tɛʼ; ɛn ɗaa vo òo hɛn von vey kɔlla nɔ ve sɛ, ɛnɔ ve kɔn hɛn vey izaa náa ve nɛy yɛ. 4Vey vɔlla dɔŋgal aʼni nənna təə gannarɛ vey ganzaa náa ve bə̂ŋgba; ɛn von ve namin naak waga daŋga ka ve maʼat vo dɔŋgal ɛnɔ tin nɔ yɛ. 5Kɔm von vey kɔlla nɔ ve tɛʼ ve hi̧i̧ náa doò ve to vo tin. Ve dɛ̧ɛ̧ yak kɛ̧ɛ̧si von vɛ filaktɛɛr ba nɛɛri za̧a̧ ve tal gbɔ̌y vere naakpa, ve tȩ̀ȩ tuutuwal aʼ nɛɛri ve maʼ o ve sam ba. 6Ve hi̧i̧ zɔɔ yɛɛ zɔɔri za̧a̧ lɛm yɛɛ duʼri nɔ ve oppo vere yɛɛ zɔɔri za̧a̧ tinba náa Yuuda o ve lik faa yakke nɔ ve oppo; 7Ve hi̧i̧ náa doò ve moogi duʼ yɛɛre nɔ vey so̧o̧ta ɛn náa doò ve ya̧a̧ vo “Wa̧y it hɛn”. 8Ɛn vo nuu, vo ɓa gɔɔ do ve ya̧a̧ vo “wa̧y it hɛni sɛ” ɛnɔ vo tɛʼ vo de daaka vo ɛ de wa̧y it hɛn daŋga zaʼ. 9Vo ya̧a̧ há̧a̧ hɛkpa tɛɛ “Baa” voni sɛ, ɛn vo ɛ de Baa daŋga, oy de bɛlba gɔɔ nɛy zaʼ. 10Gaa vo ɓa do ve ya̧a̧ vo “kɛŋŋi” sɛ, ɛnɔ vo ɛ de kɛŋ daŋga de kirisi zaʼ. 11Há̧a̧ kɛŋ o vo tiŋza̧a̧re nɔ do bi̧i̧ kɔm ak voni. 12Há̧a̧ oo gann bɛlba de ɓinn zo̧o̧ hɛge, háa̧ oo ɓinn zo̧o̧ hɛge de gann dɔkka bɛlba.››
Yeesu á náa it Moyi̧i̧zə moò buu an vɛ vere náa Farize vɛ yak yuu von nɛy
Mar 12:40; Luk 11:39-52; 20:45-47
13‹‹Yɔʼ de zee voraa, náa it Moyi̧i̧zə moò buu an vɛ vere náa Farize vɛ, náa yak yuu ɛn voy! vo toʼ de pek lêp gbɛ̧ɛ̧ yɛɛ bɛlba gɔɔ nɔ há̧a̧ o ve timbarɛ; voy vo hakin dɔnna yɛ vo kə ɛzina náa ve hi̧i̧ dɔra nɔ ve yɛ vin. 14Yɔʼ de zee voraa náa it Moyi̧i̧zə moò buu an vɛ vere náa Farize vɛ náa yak yuu ɛn voy! Voy fatta de kuu nɔ ve hɛn von ve ɛ nɔ verɛ, ɛn voy faara yakkɔ vo bittɛ náa doò ve vɔ̌ŋ vorɛ. Moò an oy vey yȩʼ voraa ɗəəsi wɔɔk ɓɛɛza̧a̧ ze! 15Yɔʼ de zee voraa náa it Moyi̧i̧zə moò buu an vɛ vere náa Farize vɛ, náa yak yuu ɛn voy! Voy luura de gay yɛɛ nɔ ve tɛʼ hɛtpa vere lɛkkɔ vɛ oppo ka vo hak há̧a̧ daŋga ɓa moò von nɛy zaʼ, ɛn oò vo hak ma nɔ voy fizaa há̧a̧ lii dɔra vɛɛ̀ va̧a̧ree dɔʼ itto ɗəə vorɛ nɛy. 16Yɔʼ de zee voraa náa yə̧ə̧̀ zǎkka yə̧ə̧̀ nɔ voy! Voy fee de: “Há̧a̧ oò sa̧a̧n gall vere Go̧o̧ge likka nɔ, gall an nɔ bo kannɛ. Ɛn oò sa̧a̧n vere sân zɔ̀ŋ Go̧o̧ge liki tuu nɛy nɔ gall bo karɛ.” 17Náa yak yuu yə̧ə̧̀ ɛn voy! Hɛ̧ɛ̧n sȩȩ ɗəə ɓimmɔ nɛɛ: Sân zɔ̀ŋŋɛyrɛɛ ha̧a̧rɔɔ Go̧o̧ge lik de bi̧i̧zii sân zɔ̀ŋ ɛn maaka hɛnna nɛyrɛ? 18Vo fee de tin ɓɛʼ: “há̧a̧ oò bo sa̧a̧n gall vere yɛɛ kɔ maakɛy nɔ, gall an nɔ bo kannɛ; ɛn oò bo sa̧a̧n vere pori goʼ de ɛpatuu nɛy nɔ, gall an nɔ bo dȩȩrɛ.” 19Vo yə̧ə̧̌! Hɛ̧ɛ̧n sȩȩ ɗəə ɓimmɔ nɛɛ, yɛɛ kɔ maak de dȩȩzii pori nɛyrɛɛ ha̧a̧rɔɔ pori goʼ ɛpatuu nɛyrɛ? 20Há̧a̧ oò sa̧a̧n gall vey yɛɛ kɔ maakɛy, do sa̧a̧n vey yɛɛ kɔ maakɛy, vere hɛn kan de ɛpatuu daŋ sɛw tɛʼ; 21Há̧a̧ oò sa̧a̧n gall vey Go̧o̧ge likkɛy, do sa̧a̧n gall vey Go̧o̧ge likkɛy vere Go̧o̧ge de kanna intuu daŋ; 22Há̧a̧ oò sa̧a̧n gall vey bɛltii ɛn o sa̧a̧n de vey Go̧o̧ge dɔ̂m ani o sa̧a̧n de vey Go̧o̧ge o zɔɔ de dɔ̂m ba tuu nɛy vin. 23Yɔʼ de zee voraa náa it moyi̧i̧zə moò buu an vɛ vere náa Farize vɛ, náa yak yuu vɛ! Voy pora de Go̧o̧ge dîm von verɛ, too sɔ̂ŋ naʼ vin, vere wat lɛra akkɔ vɛ vere kimin nɔ vɛ, ɛn vo ɛ de hɛn âʼni Moyi̧i̧zə o moò buure nɔrɛ, too ya̧à̧ likka vin, za̧a̧ kɔraa, kandi dȩȩte: Hɛn ɛnɔ vɛ kaà voy kɔra de oy, kaà vo zân pəətummɔ ve sɛ. 24Náa yə̧ə̧̀ zǎk yə̧ə̧̀ vɛ! Voy tuura hɛn zɔra von ka vo hə̧ə̧ gbəll zap daŋga ɛn nɛ, ɛn voy kə tənna Gɛloba pə̧ə̧re! 25Yɔʼ de zee voraa náa it Moyi̧i̧zə moò buu an vɛ vere náa Farize vɛ, náa yak yuu vɛ! Voy ha̧tta de mak pik von vɛ vere beleŋke pik von nɔ vey zaʼ ɛn pə̧ə̧re nɔ kan hi̧ʼ de hɛn yuu iŋŋa von nɔ vɛy vere ɗɔk ɓɛɛ von vey. 26Farize yə̧ə̧̀! Mɔ ha̧t mak pə̧ə̧ do dȩȩ doʼ pikkɔ ka dȩȩ ze vin. 27‹‹Yɔʼ de zee vora náa it Moyi̧iczə moò buu an vɛ vere náa Farize vɛ, yak yuu vɛ! Vo liizin de vey gak ve yɔ̧ buy za̧a̧ hənn sȩȩ pikpa nɛy, ɛn pə̧ə̧re nɔ, de vɔɔ nɛŋŋɔ vey vere hɛn bunzi zɔʼ ve tɛʼ 28Voy too ɛnɔm vin, gɔn náa o ve timba nɔ voy kɔra bo ba za̧a̧ Go̧o̧ge oppo yɔ, ɛn o vo pə̧ə̧re nɔ vo hi̧ʼzi de yak yuǔ vere hɛn ɓɛɛ kɔllaa. 29Yɔʼ de zee voraa, náa it Moyi̧i̧zə moò buu an vɛ vere náa Farize, yak yuu von! Voy yo̧o̧zaa Go̧o̧ge yaʼyɛɛ an ve gak za̧a̧ sȩȩ, voy soóra náa za̧a̧ ve gak von verɛ, 30ɛn voy fee de: “Bɔk kaà vi ǎŋ vin o ve vɛll barɛ nɔ kaà vi sɔŋgin voo daŋ ka vi vɔ̌t Go̧o̧ge yaʼyɛɛ an verɛ yɛ.” 31De ɛŋgɔ, vo gaa de vey wɔɔk voni voy de náa bɔk ve vɔ̌t Go̧o̧ge yaʼyɛɛ an ve nɔ luk voni 32Ɛn sȩȩrɛ vo goʼ tak tinba tinba, vo kǔt hɛn ǎŋ von bɔk ve bi̧i̧ nɛy! 33Vo bek vɛy, kpəllum sâm vɛ! Voy vəʼəra de tuubɔgɛ ka vo pek dɔra vɛɛ̀ va̧a̧re ze nɛy? 34Moò an oy, vo kiirɛ: mii yaʼat voyy yaʼyɛɛ, gaa hɛn ak vey vere náa it Moyi̧i̧zə moò buu an za̧a̧ vey. Voy vɔ̌tta zɔʼ verɛ, voy gaʼa zɔʼ ve tap ɓanzinna ba, voy wá̧a̧na zɔʼ ve ɓɛt o vo lik faa yakke voy kə oo voo kap vere kappa. 35Náa bɔk ve kɔ za̧a̧ Go̧o̧ge oppo nɔ vɛ, mɛɛm von bɔk guu hɛkpa tɛɛ, bi̧i̧y wa̧y kɔ za̧a̧ Abɛ̂l mɛɛm an nɔ oppo gbɔ̌y wa̧y kɔ za̧a̧ Zakari o mɛɛm ba, Baraki tân ani, bɔk vo vɔza tiŋza̧a̧ yɛɛ kɔ maakɔ vere sá̧a̧ yɛɛ nɔ oppo. Náa ɛn ve tɛʼ mɛɛm von de kəra o vo fɔn#23:35 Vo to Zənɛɛzə 4:8; 2Kɔ 24:20-22. 36Mi feet vora, de ginu: Go̧o̧ge de wàn kənii yɔ̂ʼ ɛn náa ɓɔllɛ nɛnɔ o ve po!››
Yeesu vere kap Zeruzalɛmmɛ
Luk 13:34-35
37Zeruzalɛm, Zeruzalɛm, mɔy vɔ̂tta Go̧o̧ge yaʼyɛɛ an verɛ, ɛn mɔy kə zunn vɔ̌tta náa Go̧o̧ge yaʼ zumiy verɛ! dɔʼ baʼgɛ mii tee kay sɔŋŋ náa mɔn vɛ too nook naʼ de sɔ̌ŋŋa sâm an vɛ o kuksire nɔm, ɛn vo hi̧i̧nɛ! 38Ɛn sȩȩrɛ, Go̧o̧ge lik von nɔ de kanna hî̧ʼi̧! 39Ɛnuu, mi feet vora, ɓɔllɛ nɛ voy hə̧nira ɓɛ yɛ de gbɔra yɛɛ vo yaa fee: “Go̧o̧ge do su há̧a̧ de yaay gbɛ̧ɛ̧ kɛŋ o nii ba tin nɔ oppo!”››
Currently Selected:
Matiye 23: dae
Highlight
Copy
Compare
Share
Want to have your highlights saved across all your devices? Sign up or sign in
