Matiye 22
22
Yak bɛmm lɛm aʼ duʼ ɓasin yɛɛre
Luk 14:15-24
1Yeesu mooza náa ve yak bɛmm zɔʼɔ ɓɛʼ. O feet vo: 2«Hɛn liizinga Gbɛ̧ɛ̧ bɛlba gɔɔ nɔ de nɛ: Gbɛ̧ɛ̧ zɔʼ hì̧ì̧ tân an duʼ ɓasin ani. 3O yaʼ kɔm ak an ve doò ve ya̧a̧y náa ve lɛmmɔ oppo, ve bɔn yaayrɛ. 4O yaʼ kɔm ak an zɔʼ vey feet vo: “Vo feeza náa mi ya̧a̧ vo nɔ vɛ: Ɓɔllɛ nɛnɔ lɛm min yɔ̧ ma, kii sə̧ə̧ nàà so̧o̧ min vɛ vere hɛn za̧a̧n loksok min vɛ, mi gak ma tɛʼ. Vo yaa lɛ lɛm duʼ ɓasin nɛy!” 5Ɛn náa ve ya̧a̧ vo nɔ ve kǎn vo yɛ ve luu o ve kɔm yɛyɛre: Zɔʼ ve tak o ve hǎn, zɔʼ ve tak makpal von vɛ makkaa; 6náa zɔʼ nɔ ve so kɔm akkɔ vɛ ve ɗeʼen vorɛ ve kə vɔ̌t vorɛ. 7Gbɛ̧ɛ̧ nɔ noʼo zatta: O yaʼ wa̧a̧ vɛɛ̀ an ve tak vɔ̌t náa ke ve vɔ̌t vɔɔ ɛn verɛ ve kə sɛ̌l kap von nɔ vɛre. 8Pik an o feeza kɔm ak an vɛ: “Lɛm duʼ ɓasin nɔ yɔ̧ ma, ɛn náa mi ya̧a̧ vo nɔ ve liin kaà ve lɛ yɔ yɛ. 9Vo tak yana heesummɔ vɛ oppo vo ya̧a̧y há̧a̧ vo kasingi voo nɔ ve tɛʼ do ve yaa lɛ lɛmmɛy.” 10Kɔm akkɔ ve luu tak yana nɔ vɛ oppo ve kə ya̧a̧ sɔŋŋi náa ve zee vo nɔ ve tɛʼ, náa ɓɛɛ nɔ vɛ vere náa za̧a̧ nɔ vɛ; too ɛnɔm, duʼ likkɔ hi̧ʼ há̧a̧ vey tə́l. 11Gbɛ̧ɛ̧ nɔ dɔ ka to náa ke ya̧a̧ voy nɔ vey ɛn o hɛɛ nɔt hə̧ wa̧y zɔʼ tin o dɔ̌zin duʼ sammɔ fɔn yɛ. 12O viʼi: “Gbaare min, lo tuubɔgɛ mɔ dɔy intɛɛ duʼ sam paam fɔn yɛ nɔ moò nɛɛ?” Wa̧y nɔ hi̧i̧zina hɛn zɔʼ yɛ. 13Ɛnɔ Gbɛ̧ɛ̧ nɔ feeza kɔm ak an vɛ: “Vo vɔll naak an nɔ vɛ vere dɔʼ an nɔ vɛ vo kə gbəla tak gɔnn visǎmme tuu. Do wa̧a̧ yak do yəʼ nuut tuu.” 14Ɛnuu, Yeesu ka̧ʼ ɓɛʼ, Go̧o̧ge ya̧a̧ náa ve duʼza̧a̧ ɗaa, ɛn náa o wɛɛ vo nɔ ve ɓoonɛ.»
Zɔmɔgɔl tokka ampərɛll oppo
Mar 12:13-17; Luk 20:20-26
15Náa Farize ve tak sɔŋ visin ka ve kɔ tuubɔgɛ ka ve so Yeesu wəkke vere moò vitpa ze nɛy. 16Ve yaʼ kaam von zɔʼ vɛ vere Helôt náa an zɔʼ vɛ ve feeza Yeesu: «Wa̧y it hɛn, vi gaarɛ mɔy fee de moò za̧ǎ̧: moy òora de moò kandi za̧̧a̧ Go̧o̧ge hi̧i̧ ney; dòo kɔnum hɛn náa zɔʼ vey vəʼəra nɔ ve yɛ ɛn kǎnum vey há̧a̧ ve pəksin voo yɛ. 17Mɔ feet vi hɛn mɔy vəʼəra de hɛn nɛnɔ oppo nɛy: Moò buu ban vo po ya̧a̧ zɔmɔgɔl tokka Ampəərɛll Rɔm opporɛrɛ?» 18Ɛn Yeesu gaa moò vəʼəra ɓɛɛ von ɛn verɛ; O feet vo: «Náa yak yuu ɛn voy, vo toʼzi wə̂k moò nɛɛ? 19Vo izi həl waa vey tokinna zɔmɔgɔllɛy.» Ve iza sann waa daŋga, 20Ɛn Yeesu vi vo: «Gbɔy vere nii daŋ sann waa nɔ oppo nɛnɔ de hii an yɛɛ?» 21Ve hi̧i̧za: «De Ampəərɛll ani.» Ɛnɔ Yeesu feet vo: «Vo tok hɛn lii kaa vo tok Ampəərɛllɔrɛ, vo tok Go̧o̧ge hɛn lii kaà vo tok Go̧o̧ge nɔrɛ.» 22Ve kii Yeesu hi̧i̧t vo ɛn kəzəkɔ, kɔ vo bit ve luu ɛʼɛrɛ.
Moò vit vɔɔ ve niŋzi kəy nɔ oppo
Mar 12:18-27; Luk 20:27-40
23Yo̧o̧ da̧a̧ nɔ oppo vin, náa saduse zɔʼ ve yaa Yeesu oppo. Ve ooza von náa vɛ vɔɔ bo ve niŋzi kəni za̧a̧n yɛ. Ve vi Yeesu 24too nɛnɔm: «Wa̧y it hɛn, hɛn Moyi̧i̧zə bɔk fee nɔ de nɛ: “Há̧a̧ wa̧p oò vɔrɛ oò ha̧a̧n tân yɛ, daak an doò ɓaʼ waà kúu nɔrɛ doò haksa wa̧y vɔ nɔ lukka#22:24 Vo to Dət 25: 5-6.” 25Ɛnɔ, daak zɔʼ bɔk ve gutambe ivi tiŋza̧a̧re. Tân ɓəə timmɔ ɓa waǎ, o vɔrɛ ha̧a̧n tân yɛ ɛza waà kúu nɔ daak an goʼ itto nɛy. 26Wa̧y goʼ itto nɔ sɛw da̧a̧ nɔm, wa̧y goʼ ta̧a̧to nɔ sɛw too ɛnɔm vin ɛn daak gutambe ɛn ve sɛw tɛʼ da̧a̧ nɔm ve ha̧a̧n tân yɛ. 27Pik an ve tɛʼ nɔ waà nɔ vɔrɛ vin. 28Yo̧o̧n vɔɔ̀ vey luu kəy za̧a̧n tin nɔ, waà de bi̧i̧ hii kenaa náa gutambe ɛn o ve tiŋza̧a̧re tuu tin da̧a̧ yɛɛ? Ɛn ve gutambe sɛw bɔk ve ɓaʼarɛ nɛy!» 29Yeesu hi̧i̧t vo: «Vo gîp derɛ, moò vo gaan hɛn ve dɛ̧ɛ̧ de Dɛptɛlle nɔ yɛ, vo gaan Go̧o̧ge gɔti an yɛ vin nɛy. 30Ɛnuu, vɔɔ oò vey luu kə̌y za̧a̧n nɔ, wa̧ppɔ vɛ vere keppɔ vɛ vey ɓasinna yɛ, ɛn vey kanna too Zə̧ə̧̀ nɔ ve vin bɛlba gɔɔ. 31Oò moò vɔɔ vey luu kə̌y za̧a̧n nɛy nɔ, bɔk vo waʼan hɛn Go̧o̧ge feet vo dɛptɛlle nɔ yɛ ɓimmɛ? O fee: 32“Mi Abaram Go̧o̧ge ani, mi Izâk Go̧o̧ge ani, mi Zakôp Go̧o̧ge ani.” Yeesu kaʼ ɓɛʼ Go̧o̧ge o náa za̧à̧n ve Go̧o̧ge voni o paam vɔɔ nɔ ve Go̧o̧ge voni yɛ.» 33Náa ke vey kii Yeesu moò oora an nɔ ve tɛʼ kɔ vo bit.
Moò buu nənn ɗəə nɛy
Mar 12:28-34; Luk 10:25-28
34Náa Farize ve fee ka ve kii Yeesu bo màʼ náa saduse vɛ yakka kəzəkɔ, ve sɔŋŋɛ. 35Ɛn há̧a̧ daŋga o ve tiŋza̧a̧re, o há̧a̧ it Moyi̧i̧zə moò buu ani, hi̧i̧ ka toʼza Yeesu wəkka; o viʼi: 36Wa̧y it hɛn, moò buu nənn ɗəə ɓimmɔ de nɔʼgɛ?» 37Yeesu hi̧i̧za: «“Mɔ hi̧i̧ Gbɛ̧ɛ̧ mɔn Go̧o̧ge vere si̧i̧ mɔn tɛʼ, vere vɔ̂k mɔn tɛʼ vere moò gaa mɔn ve tɛʼ.” 38De ɛnɔ moò buú âʼni nənna ɗəəsi wɔɔk ɓimmɛy. 39Ɛn moò buú nənna ɗəəsi wɔɔk goʼ itto liizinga nɔ de nɛ: “Mɔ hi̧i̧ damza̧a̧ too mɔ hi̧i̧ wɔɔk mɔn nɔm.” 40Moyi̧i̧zə moò buu an nɔ ve tɛʼ vere Go̧o̧ge yaʼyɛɛ an ve moò oora von nɔ vɛ tɛʼ sɔŋ de moò buu itto ɛn oppo.»
Kiris vere Daviti
Mar 12:35-37; Luk 20:41-44
41Náa Farize ve sɔŋŋɔ, ɛn Yeesu vi vo moò vit nɛʼi̧: 42«Voy vəʼəra Kiris oppo nɔ tuubɔgɛ? O hii luk an yɛɛ?» Ve hi̧i̧za: «O Davit luk ani.» 43Yeesu feet vo: «Lɔ tuubɔgɛ Davit ya̧a̧a̧ vere Fəəm dȩȩt gɔti ani, “Gbɛ̧ɛ̧ kɛŋŋi ze nɛy?” Ɛnɔ Davit fee: 44“Gbɛ̧ɛ̧ Go̧o̧ge feeza Gbɛ̧ɛ̧ kɛŋ min: mɔ yaa zɔɔ ii naak za̧a̧ ba, kay hok zo̧o̧ za̧a̧k mɔn ve um dɔʼi.” 45«Ɛn Davit oò ya̧a̧a̧ Gbɛ̧ɛ̧ kɛnŋi nɔ, lɔ tuubɔgɛ Kiris kaà bi̧i̧ Davit luk an ze nɛy?» 46Há̧a̧ daŋga o ve tiŋza̧a̧re tuu lɔn moò vǐnaa ɓɛ yɛ, ɛn bi̧i̧ yo̧o̧ ɛnɔ oppo, dòo kɔ vo moò viʼirɛ.
Currently Selected:
Matiye 22: dae
Highlight
Copy
Compare
Share
Want to have your highlights saved across all your devices? Sign up or sign in
