Matiye 19
19
Yeesu òo moò waà nɛnna moǒ
Mar 10:1-12
1Yeesu òo moò ɛn si̧ʼ kəzəkɔ, o luu hɛk Galile tuurɛ kə tak hɛk Yuuda lɛk Zurdɛŋŋɔ o dən ii nɔ oppo. 2Náa ve duʼza̧a̧ ve òorarɛ o kə poozi vo ho̧o̧ von ve tin. 3Náa Farize zɔʼ ve yaa oppo ka ve toʼoza wəkka ve viʼi: «Moò buu ban vo po ya̧a̧ há̧a̧ wa̧p doò nɛn kenaa kaà hɛ̧ɛ̧n gbo̧o̧kin nɛɛ si̧ʼrɛrɛ?» 4Yeesu hi̧i̧t vo: «Vo waʼan hɛn ve dɛ̧ɛ̧ dɛptɛlle nɔ yɛrɛ? “Bɔk bi̧i̧ ɓimmɔ Go̧o̧ge bɔk yěp wa̧ppa vere keppa#19:4 Zənɛzə 1:27; 5:2”, 5O kə fee: Moò an oy, wa̧p de luu ɛra Baʼ an vere naʼ an nɛ de tak sɔŋgaa kenaǎ, ɛn ve itto sɛw bi̧i̧ fo̧o̧ daŋga zaʼ#19:5 Zənɛzə 2:24. 6Too ɛnɔm, ve paam itto yɛ ɛn vey há̧a̧ daŋga zaʼ. Há̧a̧ do hèèzin hɛn Go̧o̧ge sɔŋ daŋga nɔ sɛ. 7Náa Farize ve viʼi: «Lɔ tuubɔgɛ Moyi̧zə po wa̧p ya̧a̧ doò po kenaa ɗɛɛwal heezin naʼa tin ka bo nɛnaa ze nɛy? 8Yeesu hi̧i̧t vo: «Moyi̧zə bɔk po vo ya̧a̧ waà von vɛ nɛnna nɔ moò si̧i̧ von sennɛ nɛy. Ɛn bɔk bi̧i̧ ɓimmɔ, bɔk paam ɛŋgo yɛ. 9Mii feet vora: há̧a̧ oo nɛn kenaarɛ, oò kɔnn nammate yɛ, oò kə ɓa waà zɔʼɔ, o ya̧a̧ gbaakii.» 10Kaamɔ ve feeza: «Wa̧p vere kep moò von oò de too ɛnɔmmɔ, poo kaà ve ɓasin sɛ ɓim.» 11Yeesu hi̧i̧t vo: «Wa̧ppɔ ve tɛʼ kaà ve ɓann moò oora ɛn yɛ, ɛn náa Go̧o̧ge po vo moò gaa nɔ vey zaʼ. 12Hɛn de kətkət de yaŋzaa wa̧p ve waà ɓararɛ: náa zɔʼ ve ɓɔɔni pə̧ə̧re ɛŋgɔ, zɔʼ vey de tin ve hi̧i̧n tân ha̧a̧na yɛ ve fi sɔ̧ɔ̧̌. Náa zɔʼ ve ɓǎn waà yɛ nɔ moò Gbɛ̧ɛ̧ bɛlba nɛy. Há̧a̧ oo hi̧i̧ moò ɛn ɓararɛ do ɓarɛ!»
Yeesu su sâm waa vey
Mar 10:13-16; Luk 18:15-17
13Náa ve panzay Yeesu sâm vɛ doò goʼot vo naak an o ve wɔɔkpa doò kə faat vo yak tin, ɛn kaamɔ ve yaŋ vorɛ. 14Ɛnɔ Yeesu feet vo: «Vo ɛ sâm waa vɛ do ve yaa iipo ɛn vo yaŋŋin vo sɛ, ɛnɔ Gbɛ̧ɛ̧ bɛlba gɔɔ nɔ de náa vey too vo vin nɔ vɛ voni.» 15Yeesu goʼza sâm waa nɔ ve naak wɔɔkpa. Pik an o luu yɛɛ ɛn opporɛ.
Wa̧y kaam nagate akka
Mar 10:17-31; Luk 18:18-30
16Wa̧y zɔʼ yaa Yeesu oppo kə viʼi: «Wa̧y it hɛn, hɛ̧ɛ̧n za̧a̧n kǎy kɔ tin gɔɔ kay za̧a̧n ha̧ vɛll ze nɔ nɛɛ?» 17Yeesu feeza: moò nɛɛ mɔ vǐy moò za̧a̧ ɛn ze nɛy? Ɛn za̧a̧ de daŋga Go̧o̧gey zaʼ oò mɔ hi̧i̧ kǎm dɔ za̧a̧n ha̧ vɛlle nɔ, mɔ òo moò buu nɔ verɛ.» 18Wa̧y nɔ vi Yeesu: «Moò buu nɔʼɔ tin gɛ?» Yeesu hi̧i̧: «Mɔ vɔ̌t há̧a̧ sɛ, mɔ ya̧a̧ gbaagi sɛ; mɔ iŋ yuu sɛ; mɔ sək moò və̧ə̧k há̧a̧ oppo sɛ; 19mɔ zɛ̌p Baa mɔn vere naʼa mɔn nɛ; mɔ hi̧i̧ dǎmza̧a̧ too mɔ hi̧i̧ wɔɔk mɔn nɔm vin#19:19 Vo to Ɛkz 20:12-16; Dətərə 5:16-20; Lɛv 19:18.» 20Wa̧y kaamɔ feeza: «bɔk mi òo moò buu ɛn ve ma tɛʼ. Hɛ̧ɛ̧n kay kɔ ɓɛ nɔ nɛɛ?» 21Yeesu feeza: «Oǒm hi̧i̧ kǎm kan dȩȩt za̧a̧ nɔ, mɔ tak mak hɛn mɔ ɛ nɔ verɛ tɛʼ mɔ kə po hellɔ gim ak vey, ɛnɔ mɔy hakka nagase bɛlba gɔɔrɛ; pik an mɔ yaa òo mii.» 22Wa̧y kaamɔ fee ka kii ɛn kəzəkɔ, noʼo zatta o luurɛ moò bɔk o nakkɛ kpɛ̌ŋ. 23Ɛnɔ Yeesu feeza kaam an vɛ: «Mi feet voraa de ginu: De təəzaa ha̧a̧ nagate ak dɔra Gbɛ̧ɛ̧re bɛlba gɔɔrɛ. 24Ɛn mi feet vora ɓɛʼ: Təəza gɛloba dɔra ya̧a̧zi miigirɛ, ɛn de təəzaa ɗəəra náa nagate ak ve dɔra Go̧o̧ge o Gbɛ̧ɛ̧re nɔrɛ.» 25Ɛn kaamɔ ve kii moò ɛnɔ, kɔ vo bit ve fee: «Ɛn oò too ɛnɔmmɔ hii kaà de sɔra yɛ?» 26Yeesu to vo kə feet vo: «Há̧a̧ o ve po nɔ, kaa ve kɔnnɛ; ɛnɔ Go̧o̧ge oppo nɔ kaa kɔrɛ sɛw tɛʼ.» 27Ɛnɔ piyɛr iŋ yak moot fee: «Mɔ kiirɛ, vi luu ɛy hɛn nɔ ve sɛw tɛʼ vi oora mɔy. Hɛ̧ɛ̧n de yaa daà vin ivi po nɛɛ?» 28Yeesu feet vo: «Mi feet vora de ginu: Há̧a̧ Tân an oò de yaa zɔɔ o Gbɛ̧ɛ̧ dɔm gbəəm ba hɛk pə̂ŋ ba nɔ oppo nɔ#19:28 Vo goozin vere Dan 7:14, náa boʼ zoo itto bɔk vo òori nɔ vo sɛw, voy zɔɔ Gbɛ̧ɛ̧ dɔmba voy yȩʼȩ zik Islayɛl boʼ zoo itto nɔ vey. 29Ɛn náa ve luu ɛ̂y ka̧a̧ von vɛ, ongɛɛ daak von vɛ, da̧a̧kii vɛ, Baa von vɛ, naʼa von vɛ, sâm von vɛ, haŋ von vɛ tɛʼ ii moòre nɔ, vey hakka yɛɛ wɔɔk saa de ɗəəraa, vey kə hakka za̧a̧n ha̧ vɛll tin. 30Ɛn náa ve duʼza̧a̧ ve ɓəə de tinba ɓɔllɛ nɛnɔ ve yaa si̧ʼina pikka náa ve duʼza̧a̧ ve si̧ʼin de pik ɓɔllɛ nɛnɔ ve yaa ɓəəra tinba.»
Currently Selected:
Matiye 19: dae
Highlight
Copy
Compare
Share
Want to have your highlights saved across all your devices? Sign up or sign in
