Luka 20
20
Yeesu zee gɔti ɛnɔ annɛ?
Mat 21:23-27; Mar 1:27-33
1Yo̧o̧ zɔʼ Yeesu ooza náa ve moò Go̧o̧ge ligi, ɛn o feet vo moò za̧ǎ̧. Náa kɔ maak ak kɛŋŋɔ vɛ vere náa it mɔyi̧zə moò buu an vɛ ve yaay vega náa kɛŋ Go̧o̧ge ligi nɔ ve daŋ 2ɛn ve viʼi: «Mɔ feet virɛ hii pom gɔti hɛn ɛnɔ ve kɔra too ɛnɔmmɔ yɛɛ, hii pom ya̧a̧ too ɛnɔmmɔ yɛɛ?» 3Yeesu hi̧i̧t vo: «Mi sɛw mii vi vora moò daŋga, vo feezirɛ: 4Hii yaʼi Zâŋ doo po Batɛmma nɔ yɛɛ, Go̧o̧geyrɛɛ, haarɔɔ ha̧a̧ veyrɛ?» 5Ɛn ve visin o ve yɛɛ ba ve fee: «Oò bay hi̧i̧ vora: “Go̧o̧ge yaʼay yɔɔ,” de vi ba vora: “Hɛ̧ɛ̧n kɔ vo tu̧u̧n Zâŋ yɛ nɔ nɛɛ?” 6Ɛn ɗaa oò bay fee vora: “Ha̧a̧ ve yaʼay yɔɔ,” ɛn náa ve tɛʼ vey zun vɔzin ba vora pinna, ɛnɔ náa ve tɛʼ ve tu̧u̧ Zâŋ bo o Go̧o̧ge yaʼyɛɛ ani». 7Ve hi̧i̧za: «Vi gaan ha̧a̧ yaʼay Batɛm pora nɔ yɛ». 8Yeesu feet vo: «Oò sȩȩrɛ, mi sɛw mi feezin vo ha̧a̧ poy ya̧a̧ hɛn ɛnɔ ve kɔra nɔ yɛ».
Moò bɛmm náa ɓɛɛ baa vi̧yə̧ vey
Mat 21:33-46; Mar 12:1-12
9Pig an, Yeesu ooza náa ve moò bɛmm zɔʼ nɛʼi̧: Wa̧y zɔʼ ɗak vi̧i̧yə̧ə̧ o hǎn, ɛza náa baa vi̧i̧yə̧ vey, o luu gayya, ka tak ha̧yrɛ. 10Yɛɛ lii vi̧i̧yə̧ hara nɔ, o yaʼ tak kɔm ak an náa baa vi̧i̧yə̧ nɔ o ve po doò ve po voy von dɔm. Náa baa vi̧i̧yə̧ nɔ ve wa̧a̧ wa̧y kɔm akkɔrɛ ve yaʼ kəna naak za̧a̧ vin. 11Wa̧y akkɔ kə yaʼat vo kɔm ak zɔʼɔ ɓɛʼ. Náa baa vi̧i̧yə̧ nɔ ve wa̧a̧a̧rɛ vin sɛw, ve zɛɛrɛ ve yaʼ kəna naak za̧a̧ vin ɓɛʼ ve pona hɛn yɛ. 12O yaʼ kə tak kɔm ak an goʼ ta̧a̧to nɛy ɓɛʼ, wa̧y nɛnɔ ve wa̧a̧a̧rɛ vin sɛw ve yola fo̧ǒ̧ ve gbəla gɔn. 13Wa̧y vi̧i̧yə̧ akkɔ kə fee: “Hɛn ɛn mii kɔra tuubɔgɛɛ? Mii yaʼa tan min mi hi̧i̧ ɓimmɛy; Vey zɛbaa an nɛ.” 14Ɛn náa baa vi̧i̧yə̧ nɔ ve hə̧ʼə̧ nɔ, ve moò o ve yɛɛ ba: “Wa̧y de yaa iŋŋa haŋŋɔ oy ɛnɔ. Ba vɔza vorɛ, haŋŋɔ do bi̧i̧ ban voy.” 15Ɛn ve wɔɔ vuksa han tuurɛ ve kə vɔzarɛ. Yeesu vi: «Wa̧y vi̧yə̧ akkɔ de kɔ voo tuubɔgɛ? 16Oy yaay vɔtta náa baa viyə̧ ɛnɔ verɛ de kə ɛzaa vi̧yə̧ nɔ náa zɔʼ vey». Náa ve fee ka ve kii moò ɛnɔ, ve fee: «Ɛnɔ kaa kɔnnɛ!» 17Ɛn ɗaa Yeesu to vo kə fee: «Yak moot dɛptɛlle nɔ hi̧i̧ fee tuubɔgɛ? “Pîn náa yo̧o̧ ka̧a̧ bɔk ve tosin bo sȩȩnɛ ve gbəllɔ bi̧i̧ de pîn za̧a̧ ka̧a̧ kɔlba ɓimmɔ yɔ.” 18Ha̧a̧ òo wan pîn ɛnɔ oppo nɔ, oy gəllaa; Pîn nɔ òo pɛ ha̧a̧ o fɔn nɔ de nanaa de fira uurumma».
Zɔmɔgɔl tokka Ampərɛl oppo
Mat 22:15-22; Mar 12:13-17
19Náa it Moyi̧zə moò buu an vɛ vere náa kɔ maak ak kɛŋŋɔ vɛ ve tee yana ka ve so Yeesu yo̧o̧ ɛnɔ oppo vin, ɛnɔ bɔk ve gaarɛ boy moò bɛmm ɛnɔ o ve po; Ɛn ɗaa doo kɔ vo náa verɛ. 20Ve bi̧i̧ Yeesu kɛlaaa, ve yaʼzay náa vɛy, ve kɔ too ve náa waa Go̧o̧ge vey nɔm. Náa ɛn ve hi̧i̧ ka ve zee gbo̧o̧k Yeesu o yak mootpa vere hɛn viraa, too ɛnɔm ka ve hak yana panaa gɔmna kɛŋ oppo ze. 21Ve viʼi: «Wa̧y it hɛn, vi gaa hɛn mɔy fee nɔ vɛ vere moò mɔy oora nɔ vɛ de za̧ǎ̧; umpo nɔ ha̧a̧ ve tɛʼ ve liizin da̧a̧ nɛy, mɔy oora moò za̧a̧ kan Go̧o̧ge hi̧i̧ nɛy. 22Ɛnɔ sȩȩrɛ, mɔ feet virɛ, moò buu ban vo po yana zɔmɔgɔl tokka Ampərɛl Rɔm opporɛrɛɛ paamɛrɛ?» 23Ɛn ɗaa Yeesu gaarɛ ɛn bo wək toʼraa, kə feet vo: 24«Vo izi san waa daŋga. Gbɔy vere nii daŋ sann nɔ oppo nɛnɔ hii an yɛɛ?» Ve hi̧i̧za: «Ampərɛl Rɔm ani». 25Ɛnuu Yeesu feet vo: «Ɛn sȩȩrɛ, vo po hɛn sȩȩ kaa vo po Ampərɛllɔrɛ, vo po hɛn sȩȩ kaa vo po Go̧o̧ge nɔrɛ vin». 26Ve zeen gbo̧o̧k yak an ke moò nɔ oppo ka ve sonina náa o ve timba tuu ze nɔ yɛ. Hɛn hi̧i̧ra an nɔ kɔ vo kpadak te ɛn ve kan nikvin.
Náa saduse ve fee von vɔɔ bo ve niŋzi kəni yɛ
Mat 22:23-33; Mar 12:18-27
27Náa saduse zɔʼ ve yaa Yeesu o hɛge. Voy ve fee von vɔɔ bo ve niŋzi kəni za̧a̧n yɛ. Ve vi Yeesu: 28«Wa̧y it hɛn, Mɔyi̧zə bɔk po ba vo moò buu nɛnɔ o dɛ̧ɛ̧rɛ fee: “Wa̧p zɔʼ oò ɓa waǎ, ɛ daak an tin, oò vɔrɛ ve ha̧a̧nga tan yɛ daak an doo ve ɓasinga waa nɔrɛ ke bo ha̧a̧za da̧a̧naa bɔk vɔ nɔ tan marɛ.” 29Náa zɔʼ ve gutambe ve daaka. Wa̧y ɓəə timmɔ ɓa waǎ, o vɔrɛ ɛn tan yɛ. 30Wa̧y goʼ itto nɔ ve ɓasinga waa kuu nɔrɛ vin, 31Pikan wa̧y goʼ ta̧a̧to nɛy. Náa gutambe nɔ ve sɛw tɛʼ ve kun waa keppɔrɛ ve ha̧a̧n tan yɛ. 32Si̧ʼtum an waa nɔ vɔrɛ vin sɛw. 33Yo̧o̧n vɔɔ ve niŋzi kəyy za̧a̧n nɔ, waa nɔ de bi̧i̧ hii kenaa tin daŋga yɛɛ? Ɛnɔ náa gutambe ɛnɔ ve sɛw tɛʼ bɔk ve ɓaʼarɛ vin nɛy!» 34Yeesu feet vo: «Wa̧p vɛ vere kep vɛ hɛk nɛnɔ oppo nɔ vey ɓasinaa; 35Ɛn wa̧p vɛ vere kep vɛ ve lii kaa ve luu kəy vɔɔ yɛɛre za̧a̧na, kaà vey tak kanna hɛk tinba nɔ oppo nɔ, ve ɓasin yɛ. 36Kaà ve vɔn ɓɛ yɛ, vey liizingaa Go̧o̧ge zə̧ə̧ an vey. Ve Go̧o̧ge sâm an vey, bɔk ve daa vɔɔ yɛɛre, Go̧o̧ge niŋzi kən voy za̧a̧na. 37Moyi̧zə ittɛ dȩȩt za̧a̧, vɔɔ bo vey niŋzi kə̌y za̧a̧na. Yak moot bɔk moò sa̧a̧t aŋŋa ba nɔ, o ya̧a̧ Gbɛ̧ɛ̧ kɛŋ, “Abaram Go̧o̧ge an, Izaak Go̧o̧ge an, Zakop Go̧o̧ge an.” 38Yeesu ka̧ʼ: Go̧o̧ge o náa za̧a̧n vɛ Go̧o̧ge voni, o paam vɔɔ nɔ ve Go̧o̧ge voni yɛ, ɛn ve tɛʼ vey za̧a̧ moò ani». 39Náa it Moyi̧zə moò buu an zɔʼ vɛ, ve iŋ yak moot ve fee: «Wa̧y it hɛn, mɔ moò sȩȩrɛ». 40Ɛnɔ ve goon ka ve viʼi moò zɔʼɔ ɓɛ yɛ.
Kiris vere Davitti
Mat 22:41-46; Mar 12:35-37
41Yeesu feet vo: «Lɔ tuubɔgɛ, náa kaa ve fee Kiris, bo Davit luk ani nɛy? 42Ɛnɔ Davit vere wɔɔk ani, fee Dɛptɛl gəəmɔ oppo: “Gbɛ̧ɛ̧ Go̧o̧ge feeza Gbɛ̧ɛ̧ min: Mɔ yaa zɔɔ ii naak za̧a̧ ba, 43Mi kɔra za̧a̧k mɔn do ve bi̧i̧ yɛɛ dii dɔʼ mɔni.” 44Davit de ya̧a̧a̧ bo: “Gbɛ̧ɛ̧ kɛŋ,” lɔ tuubɔgɛ, kiris yaa bi̧i̧ Davit luk ani ze nɛy?»
Vo kɔ too náa it Mɔyi̧zə moò buu an vɛ vin sɛ
Mat 23:1-36; Mar 12:38-40
45Yɛɛ náa bɔk vey kiizaa Yeesu tin nɔ oppo, o feeza kaam an vɛ: 46«Vo laa wɔɔk von vere náa it Mɔyi̧zə moò buu an verɛ! Ve hi̧i̧ emminna sam aʼni, ve hi̧i̧ duʼ yɛɛre nɔ, náa doo moogii vo vere so̧o̧ta; Oò lik faa yakke, ve hi̧i̧ zɔɔ yɛɛ za̧a̧ ɓəə timmɔ vɛ oppo, oò ve ya̧a̧ vo lɛm lɛra duʼre nɔ ve wɛɛ yɛɛ zɔɔri za̧̧a̧ tinba nɔ vɛ ve zɔɔ oppo doo ve hə̧ vo tin. 47Vey fatta kuu nɔ vɛ hɛn von ve ɛ nɔ verɛ tɛʼ, Oò vey faara yakkɔʼ ve bittɛ náa doò ve vɔŋ vo bo ve za̧a̧ yɔ. Go̧o̧ge de yȩʼ voo ɓɛɛza̧a̧».
Currently Selected:
Luka 20: dae
Highlight
Copy
Compare
Share
Want to have your highlights saved across all your devices? Sign up or sign in
