Luka 19
19
Yeesu vere zasey
1Yeesu dɔ zeriko nɔ, pik an o daa vəə kappɔrɛ. 2Wa̧y zɔʼ bɔk tuu nii an zasey, o náa sɔŋ zɔmɔgɔl vɛ kɛŋ voni, ɛn bɔk o nakkɛ. 3O tee ka hə̧ Yeesu nɔ o hii yɛɛ, Ɛn o gəəma nɔ kaa hə̧na yɛ moò duʼ ve ɓoo o timba nɛy. 4O at ɓəə tinba tak hiŋ, dakuse ba, ka to Yeesu de daa ɛtuu nɛy. 5Yeesu fee ka gbɔ yɛɛ nɔ oppo nɔ, to nɔt dɔk bɛlba kə feeza zase: «mɔ siy nɔmpo, zase, ɛnɔ munɛ mii sira um kaa». 6Zase yak siy nɔm kə ɓaʼa vere si̧i̧ bɛllaa. 7Náa ve hə̧ ɛnɔ, ve tɛʼ ve kə̧ə̧za Yeesu moǒ; Ve fee: «Wa̧y ɛnɔ tak si wa̧y kɔl hɛn ɓɛɛ ak ɛn o kaa te foot!» 8Zase dii Gbɛ̧ɛ̧ kɛŋ o timba feeza: «Mɔ kiirɛ, wa̧y it hɛn, mii pora lɛɛta hel min náa gim ak vey, ɛn bɔk ooy iŋ de ha̧a̧ hel an dəə derɛ, mii kənzaa too ɛnɔm yɛɛ natto». 9Yeesu feeza: «Munɛ sɔri dɔy ka̧a̧ nɛnɔ oppo, ɛn mɔ sɛw, mɔ Abaram luk ani vin. 10Ɛnɔ Ha̧a̧ tan an yaay teee, ka sɔt náa bɔk ve ti nɔ vey».
Moò bɛmm san waa zɔŋŋa
Mat 25:14-30
11Yeesu feeza náa ke ve kii yak moot ɛnɔ vɛ, moò bɛmm zɔʼɔ ɓɛʼ. Bɔk oy sanna gbɔra zeruzalɛmmɔ oppo ɛn náa bɔk vey tu̧u̧ nɔ Go̧o̧ge Gbɛ̧ɛ̧ an ka boy yaay ɛtuu ɓɔllɛ. 12Hɛn o fee nɔ de nɛ: «Wa̧y zɔʼ o luk gbɛ̧ɛ̧̌, luu tak hɛk yɛɛ yəəte ka tak dɔ gbɛ̧ɛ̧ tuu; Pig an ka kəy ze. 13Ka luu ze nɔ, o ya̧a̧y kɔm ak an ve boʼ daaa o ve tiŋza̧a̧re, po vo hii yɛɛ san zɔŋ zɛra aʼni daŋga, daŋga kə feet vo: “Vo kɔn makpal vere sann zɔŋ ɛnɛy do gbɔ ii yo̧o̧ kəy ba.” 14Ɛn ɗaa náa an o hɛkpa nɔ ve hi̧i̧na yɛ; Ve yaʼ tak yaʼyɛɛ ve o piki doò ve tak fee: “Vi hi̧i̧n wa̧y ɛnɔ o bo gbɛ̧ɛ̧ vini nɔ yɛ.” 15Wa̧y nɔ tak dɔy gbɛ̧ɛ̧ nɔrɛ, o kəy o hɛkpa. Ɛn kəzəkkɔ o ya̧a̧ kɔm ak an bɔk ɛt vo hel waa doo ve kɔn makpalla nɔ vey, o hi̧i̧ ka gaa hɛn ve hakkɛy. 16Wa̧y ɓəə timmɔ yaa fee: “Wa̧y it hɛn, san zɔŋ bɔk mɔ poy nɔ pani san zɔŋ zɔʼ boʼ.” 17Gbɛ̧ɛ̧ nɔ feeza: “Sȩȩrɛ, mɔ kɔm ak za̧ǎ̧; Mɔ kɔ za̧a̧ vere hɛnaa kaʼsorɛ: Mii ɛmma, mɔ buu kap aʼni ve boʼ.” 18Kɔm ak goʼ itto nɔ yaa fee: “Wa̧y it hɛn, mi hagin san zɔŋ zɔʼ saa vere zɔʼ bɔk mɔ poy nɛy.” 19Ɓbɛ̧ɛ̧ nɔ feeza wa̧y ɛnɔ: “Mɔy, mii ɛmma kɛŋŋa, mɔy buu kap aʼni ve saa.” 20Wa̧y kɔm ak zɔʼ nɔ yaa fee: “Wa̧y it hɛn, san zɔŋ mɔn de nɛ; Bɔk mi go̧o̧o̧ sâm waare mi ɗinnɛ. 21Doo kɔy mɔrɛ, ɛn mɔ wa̧y lokka yoǒ, mɔy iŋŋa hɛn mɔ ɛn yɔ yɛ nɛy, mɔy sɔŋŋa hɛn mɔ ban yɔ yɛ nɛy.” 22Gbɛ̧ɛ̧ nɔ feeza: “Mɔ kɔm ak ɓɛɛ̌, mii yȩʼȩmma um yak mootpa. Bɔk mɔ gaa mi wa̧y lokka yoǒ, mii iŋŋa hɛn mi ɛ̂n yɔ yɛ nɛy, mii sɔŋŋa hɛn mi ban yɔ yɛ nɛy nɔ. 23Ɛnɔ, Hɛ̧ɛ̧n kɔ mɔ ɛn hel waa min baŋkəre yɛ nɔ nɛɛ? Kaay kəy yaa iŋŋa vere goʼtum daake tin.” 24O kə feeza náa ke vey ɛtuu nɔ vɛ: “Vo fat san zɔŋ ɛnɔ vo po ha̧a̧ ɛ de san zɔŋ boʼ nɛy.” 25Ve feeza: “Wa̧y kɛŋ, o ɛ san boʼ ma!” 26Wa̧y kɛŋŋɔ hi̧i̧t vo: “Mii feet vora de ginu, ha̧a̧ òo ɛ de hɛn nɛ, vey poʼo zɔʼ tin; Ɛn ha̧a̧ òo ɛnnɛ biʼ ɓimmɔ vey iŋŋa kaʼso waa an o ɛ nɔrɛ. 27Za̧a̧k min bɔk ve hi̧i̧ dooy dɔ Gbɛ̧ɛ̧ sɛ nɔ, vo pan voy ɛtɛɛ, vo vɔt vo ii timba tɛɛ.”»
Yeesu de takka Zeruzalɛm
Mat 21:1-11; Mar 11:1-11; Zâŋ 12:12-19
28O moò ɛn kəzəkɔ, Yeesu dɔk Zeruzalɛm o ɓəəza naa duʼ nɔ vɛ yana yɔ. 29Ɛnɔ Yeesu de sanna Bɛtfaaze vere Bɛtani, gbɔk waa ve ya̧a̧ bo gbɔk oliviyee nɔ o sɛkpa, o yaʼ ɓəəzi kaam an ve itto tinba. 30O feet vo: «Vo tak kap wagaa de o vo tinba ɛnɔ oppo. Oò vo gbɔ nɔ, voy zee ve ta de gɔy wa̧a̧wa̧a̧ wagaa tuu, ha̧a̧ bi̧i̧ hiŋŋina dee yɛ. Vo bul panay ɛtɛɛ. 31Ɛn ha̧a̧ òo vi vo: “Voy bulaa kɔnna nɛɛ nɔ?” Vo feeza: “Gbɛ̧ɛ̧ kɛŋ hi̧i̧ de yɔ.”» 32Yaʼyɛɛ nɔ ve takkɛ ɛn ve zee hɛn nɔ tɛʼ too Yeesu ke feet vo nɔm. 33Yɛɛ bɔk vey bulla gɔy wa̧a̧wa̧a̧ wagaa nɔ tin nɔ, àk an ve feet vo: «Voy bulla gɔy wa̧a̧wa̧a̧ wagaa ɛnɔ kɔnna nɛɛ?» 34Ve hi̧i̧: «Gbɛ̧ɛ̧ kɛŋ hi̧i̧ de yɔ». 35Pik an ve pani gɔy wa̧a̧wa̧a̧ wagaa nɔ Yeesu oppo; Ve nɛ sâm von hɛn za̧a̧n nɔ o yɛlba ve kə hiŋzi Yeesu patuu. 36Bɔk oy em takka nɔ, náa ve uu sâm von vɛ yanaa deee. 37Yɛɛ bɔk oy sanna gbɔra zeruzalɛm maa, yana si zo̧o̧y gbɔk oliviye ba nɔ oppo, kaam duʼ nɔ ve tɛʼ ve bɛllɛ, ve gbəŋ Go̧o̧ge yak aʼre moò hɛn yel ve hə̧ tɛʼ ɛnɔ vɛy. 38Ve fee: «Go̧o̧ge kaa su Gbɛ̧ɛ̧ de yaay Gbɛ̧ɛ̧ kɛŋ o nii ba nɔrɛ! Za̧a̧ de bɛlba, gbəəm de Go̧o̧ge oppo». 39Náa Farize zɔʼ bɔk ve duʼre tuu tin, ve feeza Yeesu: «Wa̧y it hɛn, mɔ fee kaam mɔn nɔ vɛ, do ve gəttɛ». 40Yeesu hi̧i̧: «Mii feet vora, òo vey gətta nɔ, pîn nɔ vey wa̧a̧ta yakka!»
Yeesu de ba̧a̧ Zeruzalɛm moò ani
41Ɛn Yeesu oy kappɔ o sɛkpa maa, o fee ka hə̧ʼə̧ nɔ, o ba̧a̧za Zeruzalɛmmɔrɛ, 42O fee: «Zeruzalɛm, mɔ sɛw mɔ gaan yo̧o̧ ɛnɔ oppo kam kɔ tuu bɔgɛ kam hak kandi za̧a̧ ze nɔ yɛ! Ɛn de ɓɔllɛ nɛnɔ ɗinum ma, kaǎm həna yɛ 43Ɛnɔ yo̧o̧n de yaagumii tuu, yo̧o̧ ɛnɔ za̧a̧k mɔn vey həmmaa, vey kəguma vere see hɛn von vɛʼ, ɛn vey gba̧ʼa̧mma sɛkkɔ ve tɛʼ. 44Vey tuzummaa tɛʼ, mɔy vere náa mɔn ve daŋ; Vey ɛzin mɔra pîn zɔʼ daŋga doò goʼ daaa zɔʼ oppo yɛ, ɛn mɔ gaan yo̧o̧n Go̧o̧ge yaa maʼzum tin nɔ yɛ nɛy!»
Yeesu nɛn naa mak hɛn ve Go̧o̧ge ligi
Mat 21:12-17; Mar 11:15-19; Zâŋ 2:13-22
45Yeesu dɔ Go̧o̧ge ligi o dii náa mak hɛn vɛ nɛnzi voo, 46o feet vo: «Dɛptɛlle nɔ, Go̧o̧ge fee: “Lik min nɔ de lik faa yakka.” Ɛn von, vo fit de yuu likka». 47Yeesu òo moò Go̧o̧ge ligi yo̧o̧ tuŋ. Náa kɔ maak ak kɛŋŋɔ vɛ, náa it Mɔyi̧zə moò buu an vɛ, vere náa kɛŋ yȩʼ moò kappa tuu nɔ vɛ, ve teee yana ka ve vɔzaarɛ. 48Ɛn ɗaa ve gaan kɛm ka ve sonaa nɔ yɛ, ɛnɔ náa ve tɛʼ bɔk vey kiizaa oy.
Currently Selected:
Luka 19: dae
Highlight
Copy
Compare
Share
Want to have your highlights saved across all your devices? Sign up or sign in
