Luka 18
18
Moò bɛmm waa kuu zɔʼ vere wa̧y yȩʼ moǒ
1Yeesu kə feet vo moò bɛmm nɛʼi̧ ɓɛ, o hi̧i̧ feet voo, doo ve kan yak faara tuŋ gaa ka bo ve yaa vɔtta fo̧o̧ sɛ: 2«Wa̧y yȩʼ moò zɔʼ, bɔk o kan kap aʼre, o waan Go̧o̧ge doo yɛ, kana vey ha̧a̧ yɛ vin. 3Kap ɛnɔ oppo vin, waa kuu zɔʼ kan tuu sɛw o kan pul yaay wa̧y yȩʼ moò ɛnɔ oppo feeza: “Mɔ yȩʼzi moò min vire za̧yrɛ!” 4Bɔk de faaa wa̧y yȩʼ moò nɔ bɔnzarɛ, pik an o vəʼə kə o si̧i̧ba: “Ginu mi waan Go̧o̧ge doo yɛ, òo kani vega há̧a̧ ve yɛ si̧ʼ nɔ; 5Ɛn ɗaa waa kuu ɛnɔ de pulii iipo too ɛnɔmmɔ, mii yȩʼzaa moò annɛ, yɔŋgɔ de kəy golinnira yɛɛ ɛtɛɛ tuŋtuŋ ɓɛ yɛ.”» 6Pik an gbɛ̧ɛ̧ kɛŋ ka̧ʼ ɓɛ: «Vo kii hɛn wa̧y yȩʼ moò ak ɓɛɛ ɛnɔ fee nɛy! 7Ɛn Go̧o̧ge oppo nɔ, kaa, yȩʼzinna náa an vey wa̧a̧zaa yak yo̧o̧ vere vi̧i̧ tɛʼ nɔ moò von yɛrɔɔ, ka dill maʼat voorɛ, doo ve laarɛ kererɛ? 8Mii feet vora: de yȩʼȩt voo moò von nɔmpo. Ɛn ha̧a̧ tan an òo de kəy nɔ, de zee si̧i̧ ɛtta hɛtte tɛɛrɛ ɗaarɛ?»
Moò bɛmm wa̧y faraizee vere wa̧y sɔŋ zɔmɔgɔl akka
9Yeesu fee moò bɛmm zɔʼ nɛnɔ moò náa zɔʼ vey vəʼra bo ba za̧a̧ Go̧o̧ge o nɔre yɔ ɛn ve bɔ̧ɔ̧ náa zɔʼ verɛ nɛy: 10«Wa̧p ve itto ve dɔk Go̧o̧ge ligi ka ve faa yakka; daŋga nɔ o farizee, zɔʼ nɔ o wa̧y sɔŋ zɔmɔgɔlla. 11Wa̧y Farize nɔ dii faa yak o si̧i̧ba: “Go̧o̧ge min, mi dɛnzum naak moò mi paam too náa zɔʼ ve vin yɛ, von ve yuǔ, ve ɓɛɛ̌, ve ya̧a̧ gbaage ak vey; mi dɛnzum naak min mi paam too wa̧y sɔŋ zɔmɔmgɔl ɛnɔ vin yɛ nɛy. 12Mii kɛ̧ɛ̧ hɛn yo̧o̧ dɔʼ itto Dumas daŋga nɔ oppo, mii pomma de Dim hɛn mi hakkɔ ve oppo sɛw tɛʼrɛ.” 13Wa̧y sɔŋ zɔmɔgɔllɔ diiy yɛɛ yəəte, o goon ka gan nɔt bɛlba maaki yɛ, ɛn o fi̧i̧ naak o kəŋŋi kə fee: “Go̧o̧ge min, mɔ tozi gim mini, min mi wa̧y kɔl hɛn ɓɛɛ akka.” 14Yeesu ka̧ʼ ɓɛʼ: mii feet vora, wa̧y ɛnɔ luu o kaa Go̧o̧ge iŋŋa ha̧a̧ za̧a̧ oy, ɛn paam wa̧y Farize nɛy yɛ. Ha̧a̧ òo gan bɛlba de ɓin zo̧o̧ hɛge, ha̧a̧ òo ɓin zo̧o̧ hɛge de gan dɔkka bɛlba».
Yeesu su sam waa vey
Mat 19:13-15; Mar 10:13-16
15Náa ve pani sâm waa nɔ ve sɛw Yeesu oppo doo goʼot vo naak wɔɔkpa. Yeesu kaam an ve hə̧ ɛnɔ, ve kə̧ə̧za náa ke vey panii sâm waa nɔ ve moǒ. 16Ɛn Yeesu diŋŋi sam waa nɔ ve o hɛge kə fee: «vo ɛ sam waa nɔ vɛ do ve yaa iipo! Vo yaŋŋin vo sɛ, ɛnɔ Go̧o̧ge gbɛ̧ɛ̧ an de, náa vey too vo vin nɔ vɛ voni. 17Mii feet vora de moò za̧ǎ̧ ginu, ha̧a̧ òo ɓǎn Go̧o̧ge Gbɛ̧ɛ̧ an too tan waa vin yɛ nɔ, de dɔnna yɛ ɓim».
Wa̧y nagate akka
Mat 19:16-30; Mar 10:17-31
18Wa̧y kɛŋ yuuda zɔʼ vi Yeesu: «Wa̧y it hɛn za̧a̧, mi kɔ tuubɔgɛ kay hak za̧a̧n ha̧ vɛll ze nɛy?» 19Yeesu feeza: «Mɔ ya̧a̧y boy za̧ǎ̧ nɔ moò nɛɛ? Ha̧a̧ zɔʼ o za̧ǎ̧ nɔ paamɛ, òo Go̧o̧gey zaʼ yɛ nɛy. 20Mɔ gaa moò buu: “Mɔ ya̧a̧ ɔɔk sɛ; mɔ vɔt ha̧a̧ sɛ; mɔ iŋ hɛn yuu sɛ; mɔ hɛɛza há̧a̧ və̧ə̧k sɛ; mɔ zɛp Baa mɔn vere naʼa mɔnnɛ.”» 21Wa̧y nɔ hi̧i̧za: «Bɔk mi kiiza moò buu ɛnɔ ve tɛʼ kɔʼ ii kaame zɛɛ». 22Yeesu kii ɛn kəzəkɔ o kə feeza: «Pəəm hɛn zɔʼ daŋga ɓɛ: Mɔ mak hɛn mɔ ɛ nɔ verɛ tɛʼ, mɔ yə̧ʼ hel waa nɔ gim ak vey, ɛnɔ mɔy hakka nagate za̧a̧ bɛlba; Pik an, mɔ yaa òo mii». 23Wa̧y nɔ kii ɛnɔ, luʼurɛ kpɛŋ, ɛnɔ bɔk o nakkɛ yəəmza̧a̧. 24Yeesu hə̧ luʼu nɔ, kə fee: «Təəza nagate ak ve dɔra Go̧o̧ge o Gbɛ̧ɛ̧re nɔrɛ! 25Təəza gɛloba dɔra ya̧a̧zi miigirɛ, ɛn təəzaa ɗəə náa nagate ak vɛ dɔra Go̧o̧ge o Gbɛ̧ɛ̧re nɔrɛ». 26Náa ke ve kiizaa Yeesu nɔ, ve fee: «òo too ɛnɔmmɔ hii kaa de sɔra yɛɛ?» 27Yeesu hi̧i̧t vo: «Hɛn ha̧a̧ kaa lɔn kɔnna yɛ nɔ, Go̧o̧ge de kɔra annɛ». 28Ɛnɔ Piyɛr fee: «mɔ kiirɛ, vin vi luu ɛy hɛn vin ve tɛʼ vii oora mɔy». 29Yeesu feet vo: «Mi feet vora, de ginu: Ha̧a̧ òo luu ɛ ka̧a̧ an, moò Go̧o̧ge Gɓɛ̧ɛ̧ ani, ɛ kenaarɛ, daak an verɛ, kɛŋ an verɛ sam an verɛ nɔ, 30oy hakka de ɓɔllɛ nɛnɔ aʼvin, ɛn vɛll pikpa nɔ de kə hakka za̧a̧n ha̧ vɛll tin».
Yeesu fee kə moò vɔɔ an vere niŋzi kəy an nɔ dɔʼ ta̧a̧to ani
Mat 20:17-19; Mar 10:32-34
31Yeesu iŋŋi kaam boʼzoo itto nɔ vɛ o hɛge kə feet vo: «Vo kiirɛ, ba tak vo Zeruzalɛm hɛn Go̧o̧ge yaʼyɛɛ an bɔk ve dɛ̧ɛ̧ ha̧a̧ tan an oppo nɔ de kɔra ituu. 32Vey heʼe náa gaan Go̧o̧ge yɛ nɔ o ve naʼa, vey zaaa, vey zɛɛɛ, vey tuuzaa sɔt fɔn. 33Vey waanaa ɓɛtta, vey kə vɔzaa. Ɛn yo̧o̧ dɔʼ ta̧a̧to ba nɔ de luu kəy vɔɔ yɛɛrerɛ za̧a̧na». 34Ɛn kaamɔ ve kiin hɛn ɛnɔ yɛ; Yak moot ɛnɔ kɔl an nɔ ɗinnɛ vorɛ, ɛn ve gaan hɛn Yeesu de moò tin nɔ yɛ.
Yeesu poozi yə̧ə̧̌
Mat 20:29-34; Mar 10:46-52
35Yeesu de sanna gbɔra Zeriko nɔ, yə̧ə̧ zɔʼ zɔɔ yana yakpa tuu de haara hɛnna. 36O kii náa vey daa nɔ vi vo hɛn daa nɛy. 37Ve feeza: Yeesu wa̧y nazarɛttɔ de daa ɛtɛɛ yɔ. 38Ɛnɔ o wa̧a̧ yakka: «Yeesu, Davit tan an, mɔ tozi gim mini!» 39Náa ke ve ɛm ɓəə tinba nɔ ve zɛza doo gəttɛ, o wa̧a̧ yak ɗəə wɔɔkka aʼvin: «Davit tan an mɔ tozi gim mini!» 40Yeesu diirɛ kə fee doo ve panayrɛ. Yə̧ə̧ nɔ fee ka diŋŋi nɔ, Yeesu viʼi: 41«Mɔ hi̧i̧ mi kɔzum hɛ̧ɛ̧n o nɛɛ?» O hi̧i̧: «Wa̧y it hɛn mɔ kɛʼzi nɔt min kay hə̧ kə too bɔk de tinba nɔm». 42Ɛn Yeesu kə feeza: «Mɔ hə̧ kə nɔt mɔn bɔ si̧i̧ ɛtta mɔn poozumma». 43Ɛtuu vin, wa̧y nɔ hə̧ kə nɔt an too bɔk de tinba nɔm. O òo Yeesuy, o gbəŋ Go̧o̧gey. Náa duʼ nɔ ve tɛʼ ve hə ɛnɔ ve gbəŋ Go̧o̧gerɛ vin.
Currently Selected:
Luka 18: dae
Highlight
Copy
Compare
Share
Want to have your highlights saved across all your devices? Sign up or sign in
