Luka 17
17
Yeesu pɛɛk ani
Mat 18:6-7, 21-22; Mar 9:42
1Yeesu feeza kaam an vɛ: «Ha̧a̧ kaa pegin hɛn sɔɔtum de yaʼa ha̧a̧ ve hɛn ɓɛɛ kɔlla nɔ ve yɛ. Ɛn ɗaa, yɔʼ de zee ha̧a̧ to̧o̧k ak ɛn nɛ! 2Ka sɔɔ yaʼ náa kaʼso ɛn vɛ ha̧a̧ von daŋga hɛn ɓɛɛ kɔlla nɔ, poo kaa ve səəza pîn naak və̧ə̧ge, kaa ve gbəla maam təəre. 3Vo laa wɔɔk von za̧a̧za̧a̧! «Daam oò kɔzum hɛn gbo̧o̧ka, mɔ mooza vere yak so̧o̧ta. Ɛn oò ogaam hɛn o kɔ nɔrɛ, mɔ hoozarɛ. 4Oò kɔzum hɛn gbo̧o̧k dɔʼ gutambe yo̧o̧ da̧a̧ nɔ oppo, oò pul kəy umpo dɔʼ gutambe yo̧o̧ da̧a̧ nɔ oppo vin, feezum: “Mi o gaama nɔ”, mɔ hoozarɛ».
Si̧i̧ ɛtaa
5Yaʼyɛɛ nɔ ve feeza Gbɛ̧ɛ̧ kɛŋ: «Mɔ ka̧ʼa̧t vi si̧i̧ ɛtta vinnɛ». 6Gbɛ̧ɛ̧ kɛŋ hi̧i̧ vo: «Oò vo ɛ de si̧i̧ ɛtta von kaʼso too saŋnoʼ yen vin nɛ nɔ, kaa vo fee: “Dakuse ɛnɔ, mɔ buk mɔ zo̧o̧ dii lɛk aʼre,” de kiit vora kɔʼrɛ».
Hɛn Kɔm ak kaa de kɔra nɛy
7«Ba tosin vo hɛn nɛʼi̧: Ha̧a̧ von daŋga oò ɛ gbay de baa haŋŋa, ongɛɛ de laa hɛn za̧a̧n nɔ vɛy. Oò hə̧ʼə̧ de kəy han nɔ de feeza: “Mɔ yaa nɔm, mɔ zɔɔ lɛ lɛmmarɛ?” 8Paam ɛŋgɔ yɛ, ongɛɛ za̧a̧ nɔ de feeza: “Mɔ dəəzi lɛm mini te, mɔ pi sâm mɔn mɔ kɔzi kɔmma, kay lɛ, kay zɔ doʼ, pik an ɛnɔ kam lɛ kam zɔ mɔn ze.” 9Wa̧y kɛŋŋɔ kaa dɛnzina gbay an nɔ naak ke boy kɔyy hɛn ke feee nɛy yɛ, paam ɛŋgɔ yɛrɛ? 10De too ɛnɔm vo sɛw, oò vo kɔ hɛn Go̧o̧ge fee vo doo vo kɔ nɔ verɛ tɛʼ nɔ, vo fee: “Vin vi náa kɔ kɔm vɛy zaʼ; Vi kɔ de kɔm vin kaa vi kɔra nɔ vɛy.”»
Yeesu poozi guni ak ve boʼ
11Yeesu de takka yana Zeruzalɛm, o daa yana ɓɛ̧ɛ̧zin samari, vere Galile nɔ oppo. 12O dɔ kap waa zɔʼre guni ak ve boʼ vey yaay kasingarɛ. Ve dii yɛ yəəte 13ve gbat wɔɔk aʼvin ve fee: «Yeesu wa̧y it hɛn, mɔ tot vi gim vini!» 14Yeesu hə̧ vo nɔ, kə feet vo: «Vo tak toy fo̧o̧ von náa kɔ maak ak o ve po». Bɔk vey takka tin nɔ oppo, ho̧o̧ von poo vorɛ. 15Ha̧a̧ daŋga o ve tiŋza̧a̧re hə̧ ho̧o̧ an poo nɔ, ɗɛɛ kəy gbəŋ Go̧o̧ge yak aʼre. 16O ɗiksi zo̧o̧ Yeesu o dɔʼba zu̧ʼ gbɔy an hɛge dɛnza naaka. Wa̧y nɔ o ha̧a̧ samarii. 17Ɛnɔ Yeesu fee: «Náa boʼ nɔ vɛ poo vorɛ sɛw tɛʼ, ɛŋgɔ yɛrɛ? Náa zɔʼ kɛrdaŋga nɔ vey von anɛ? 18Ha̧a̧ zɔʼ vəʼərin o ve tiŋza̧a̧re tuu kay kə dɛnza Go̧o̧ge naaka yɛ, ɛn naŋ gay ɛnɛy zaʼrɛ?» 19Yeesu kə feeza: «Mɔ luu gaŋ, mɔ takpɔ, si̧i̧ ɛtta mɔn sɔzumma».
Go̧o̧ge Gbɛ̧ɛ̧ an yaay ma
Mat 24:23-28, 37-41
20Náa Farize ve vi Yeesu Go̧o̧ge Gbɛ̧ɛ̧ an nɔ de yaay yɛttugɛ? O hi̧i̧t vo: «Go̧o̧ge Gbɛ̧ɛ̧ an nɔ yaan too hɛn kaa bay hə̧ vora nɔm yɛ. 21Vey feena gɔɔ: “Vo torɛ oy nɛ yɛ!” Ongɛɛ: “De ɛtuu yɛ!” Ɛnɔ, vo kiirɛ, Go̧o̧ge Gbɛ̧ɛ̧ an de o vo tiŋza̧a̧re». 22O kə feeza kaamɔ vɛ: «Yo̧o̧ zɔʼ de yaay tuu voy hi̧i̧ra hə̧ra Ha̧a̧ tan an yo̧o̧ daŋga zaʼ, ɛn voy hənaa yɛ. 23Vey feet vora: “Vo to ɛtuu!” Ongɛɛ “vo to ɛtɛɛ!” Ɛn vo tak tuu sɛ, vo at tak tuu sɛ. 24Too maam de yȩʼgii bɛlba dȩȩzin gbɔ sɛk zɔʼba vere sɛk zɔʼɔ o siʼtumba nɔm, Yo̧o̧n ha̧a̧ tan an de kəy tin nɔ de kɔra ɛŋgɔ vin. 25Ɛn do gaa gimm aʼvin kpɛŋ doʼ, náa munɛnɔ vey gbəlaa. 26Hɛn zɛɛ daa Nɔ̀yé o vɛllba nɔ, yo̧o̧n ha̧a̧ tan an de kəy tin nɔ de daa too ɛnɔm vin. 27Náa bɔk vey lɛm lɛra, bɔk vey bum zɔllaa, bɔk vey ɓasinaa, sam von vey ɓasinaa gbɔ yo̧o̧n Nɔ̀yé dɔ kɔmballe tin nɔ oppo: Ɛnɔ maam pɔl aʼni yaa tut náa verɛ tɛʼ.#17:27 Yak moot itto ɛnɔ vɛ nɔ: Vo to Zenɛzə ba 6:9–7:24. 28De kɔra too bɔk Lot o vɛllba nɔm, náa bɔk vey lɛra, bɔk vey zɔra, bɔk vey ɓara, bɔk vey makka, bɔk vey ɗakkaa, bɔk vey yo̧o̧. 29Ɛn yo̧o̧n Lot vuk Sodɔmmɔ, Go̧o̧ge naŋŋi vɛɛ lɛɛt bɛlba too maam naŋŋa vin vere uurum pii daŋ, yaa tut há̧a̧ verɛ tɛʼ.#17:29 Yak moot Ɛn ve nɔ: Vo to Zenɛzə ba 18:20–19:25. 30De yaa daa too ɛnɔm vin yo̧o̧n ha̧a̧ tan an de hənna tin nɔ gɔ. 31«Yo̧o̧n ɛnɔ, há̧a̧ oò de o ka̧a̧ wɔɔkpa hɛn an oò ve de ka̧a̧ pə̧ə̧re tuu, do si ka bo ve iŋŋɛ sɛ. Too ɛnɔm vin há̧a̧ oò de han do kəy kaa sɛ. 32Vo vəʼə hɛn bɔk daa Lot kenaa oppo nɛy! 33Há̧a̧ oò de teee ka laa za̧a̧n annɛ nɔ de titaa; Ɛn oò de teee ka tittɛ nɔ de sɔ̌tta oy te. 34Mii feet vora, vi̧i̧ munɛ ha̧a̧ ve itto vey utta pi̧i̧k da̧a̧ nɔ oppo: Ha̧a̧ daŋga nɔ de iŋaa, ɛn daŋga nɔ de pəə. 35Kep ve itto vey nanna toot daŋ: Daŋga de iŋaa, ɛn daŋga nɔ de pəə. 36Wa̧p ve itto vey haŋ yɛɛ daŋga: daŋga de iŋaa, daŋga de pəə». 37Kaamɔ ve viʼi: «Hɛn ɛnɔ vɛ nɔ de daa tɔŋŋ tin anɛ, Gbɛ̧ɛ̧ kɛŋ?» Ɛn o hi̧i̧: «Yɛɛ hɛn vɔ kan de tin nɔ, dukummɔ vey sɔŋŋa oppo vin».
Currently Selected:
Luka 17: dae
Highlight
Copy
Compare
Share
Want to have your highlights saved across all your devices? Sign up or sign in
