Luka 16
16
Moò bɛmm ha̧a̧ kɔ kɔm ak lawa
1Yeesu feeza kaam an ve: «Ha̧a̧ nagate ak zɔʼ ɛ kɔm ak tin, Ɛn náa ve yaa feeza kɔm ak ɛnɔ boy lella hel an verɛ. 2Kɛŋ an nɔ ya̧a̧y yaa kə feeza: “Hɛ̧ɛ̧n mi kii de umpo too ɛnɔmmɔ nɛɛ? Mɔ sazi ɗari kɔm mɔni, ɛnɔ mɔy paama kɔm ak mini ɓɛ yɛ.” 3Wa̧y kɔm akkɔ fee: “Kɛŋ min de vuksira o kɔmmerɛ. Ɛn mii kɔra tuu bɔgɛ? Mi ɛ̂n gɔti kay baa hɛtta yɛ, ɛn sêm de kɔyya hɛn haararɛ vin. 4Ɛ̧ɛ̧nɔ! Mi gaa hɛn mi kɔra nɔ ma! Ɛn kɛŋ min oò vuksi ii kɔm yɛɛrerɛ, náa ka ve ɓay o ve yɛɛre ze nɔ gɔ.” 5O ya̧a̧y náa kɛŋ an bɔk de oó voo ɓɔllɔ vɛ daŋga, daŋga sɛw tɛʼ. O vi ha̧a̧ ɓəə timmɔ: “Kɛŋ min de oorumma baʼgɛ?” 6O hi̧i̧za: “kum olivə pɛɛk wɔɔk saa,” wa̧y kɔm akkɔ feeza: “ɗɛɛwal ɓɔl mɔn de nɛ; mɔ zɔɔ hɛge nɔmpo mɔ dɛ̧ɛ̧ wɔɔk itto zoo boʼ.” 7Pik an kə vi ha̧a̧ zɔʼ nɔ: “Ɛn mɔ dɔmmɔ, de oorumma baʼgɛ?” Wa̧y nɔ hi̧i̧za: “Bəle saʼa zakaa wɔɔk saa.” Wa̧y kɔm akkɔ feeza: “ɗɛɛwal ɓɔl mɔn de nɛ, mɔ dɛ̧ɛ̧ saʼa zakaa wɔɔk natto.” 8Ɛn wa̧y kɛŋŋɔ vɔŋ wa̧y kɔm akkɔ, moò kɛm an o kɔ nambate za̧a̧ nɛy. De da̧a̧ nɔm náa hɛkpa tɛɛ ve kɔn kɔm vere kɛm o ve yɛɛba ɗəə náa yɛɛ dȩȩte verɛ». 9Yeesu ka̧ʼ ɓɛʼ: «Ɛn min mi feet vora: vo so gbaare vere hel sɔɔtum hɛkpa tɛɛ nɔ verɛ, yo̧o̧n vonaa nɔ oò siʼ̧ nɔ, ka ve ɓa vo yɛɛ zɔɔri ha̧ vɛlllɔ oppo ze. 10Ha̧a̧ oò kɔ za̧a̧ vere hɛn wagaa nɔ verɛ, de kɔra za̧a̧ vere hɛn aʼ nɔ verɛ vin; Ha̧a̧ oò kɔl law vere hɛn wagaa nɔ verɛ, de kɔlla law vere hɛn âʼ nɔ verɛ vin sɛw. 11Oò vo kɔnin za̧a̧ vere hel sɔɔtum hɛkpa tɛɛ nɔ ve yɛ nɔ, hii de po vora hel za̧a̧ ka vo buu ze nɔ ve yɛɛ? 12Ɛn oò vo kɔnin za̧a̧ vere náa zɔʼ ve hel von yɛ nɔ, hii de po vora vonaa nɔ yɛɛ? 13«Ha̧a̧ kaa kɔzinna kɛŋ ve itto kɔm za̧a̧za̧a̧ yak da̧a̧ nɔ oppo yɛ: Ongɛɛ de bɔna ha̧a̧ ɓəə timmɔrɛɛ de hi̧i̧ra ha̧a̧ zɔʼ nɔrɛ, ongɛɛ de sosingaa ha̧a̧ daŋga nɔrɛɛ de sera ha̧a̧ zɔʼ nɔrɛ. Kaa vo lɔn Go̧o̧ge kɔm kɔzaa, kaa vo kə teen hel tin yak da̧a̧ nɔ oppo yɛ».
Yeesu yak moot an zɔʼ kətkə vey
Mat 11:12-13; 5:31-32; Mat 10:11-12
14Náa Farize hi̧i̧ hel ak vɛ ve kii yak moot ɛnɔ ve tɛʼ nɔ, ve zaa Yeesurɛ. 15Yeesu feet vo: «Voy náa vey kɔra, bo ve za̧ǎ̧ ha̧a̧ o ve nɔtpa vey, ɛn Go̧o̧ge gaa si̧i̧ vonnɛ. Ɛn hɛn ha̧a̧ vey hə̧ra too hɛn za̧ǎ̧ vin nɔ de Go̧o̧ge o nɔre nɔ hɛn ɓaʼ. 16«Moyi̧zə moò buu an vere Go̧o̧ge yaʼyɛɛ an ve Dɛptɛl von ha̧ gbɔ anɛɛ Zaŋ Batis o vɛllba. Zɛɛ vɛll an ɛnɔ, moò za̧a̧ Go̧o̧ge o Gbɛ̧ɛ̧re nɔ kin oppo, ɛn hii yɛɛ yoon vere gɔti ka ve dɔrɛ. 17Ɛn ɗaa, bɛlti̧i̧ vere hɛt kaà ve tɛkkɔ təənɛ, Go̧o̧ge moò buu an ɗeʼsowaare kaà tɛgin yɛ. 18«Há̧a̧ oò nɛn kenaarɛ oò kə ɓasinga kep zɔʼɔ nɔ, o kɔ hɛn ɓɛɛ gbaagee, ha̧a̧ oò ɓasinga kep wanaa nɛn vuksaa nɛy, o kɔ hɛn ɓɛɛ gbaagee».
Wa̧y nagate ak vegare Laazari
19Wa̧y nagate ak zɔʼ bɔk tin kan sâm za̧a̧ yɔ̧ɔ̧t, sɛk ak ve dɔtta oy, ɛn yo̧o̧ tuŋ, o kan an za̧a̧re, lɛm za̧a̧ ve lɛra oy. 20O pek lep yakpa tuu nɔ wa̧y gim ak zɔʼ ut tuu, nii an Laazari. Fo̧o̧ an kusin nɔkka. 21O kan za̧a̧n nan puut de pɛlla wa̧y nagate akkɔ o yɛɛ lɛ lɛmba nɔ vɛy. Ɛn iŋŋɔ ve yaa lɛʼgi nɔk an nɔ ve yɔ te. 22Gim akkɔ vɔrɛ, ɛn Go̧o̧ge zə̧ə̧ an ve gan dɔnaa Abaram o sɛkpa. Wa̧y nagate akkɔ vɔrɛ vin sɛw, ɛn ve ləərɛ. 23O gaa gim vɔɔ yɛɛre tuurɛ kpɛŋ; O gan nɔt hə̧ Abaram oy yɛɛ yəəte ɛn Laazar oy o sɛkpa. 24Ɛnɔ wa̧y nagate akkɔ waa yakka: “Baa Abaram, mɔ to gim mini; Mɔ yaʼ Laazar do ɓini naak waa an maàme do ka̧a̧zinni mee mini ɛnɔ mii yȩʼgii de vɛre nɛ kpɛŋ.” 25Ɛn ɗaa Abaram hi̧i̧za: “Tan min, mɔ vəʼə kərɛ bɔk mɔy za̧a̧na kere nɔ, mɔ hak hellɛ aʼvin, ɛn Laazar bɔk o an yɔʼre aʼvin. Ɓɔllɛ nɛ oy za̧a̧re, ɛn mɔn mɔy yȩʼgii dee. 26Hɛn ɗəə ɓimmɔ, va̧a̧ aʼ de o ba vo tiŋza̧a̧re; Náa ve hi̧i̧ luura ivi tɛɛ ka ve tak o vo tuu kaà ve ɗaanɛ, ha̧à̧ kaa luuni yɛɛ mɔy tin ɛnɔ oppo kaà yaan ivi tɛɛ yɛ vin.” 27Wa̧y nagate akkɔ feeza Abaram: “Mi haamɛ baa, mɔ yaʼ tak Laazar Baa min o kaa, 28Mi ɛ daay vey tuu saa. Do tak feet vorɛ, ka ve yaa yaay yɛɛ gaa gim nɛnɔ oppo vin sɛw sɛ.” 29Abaram hi̧i̧za: “Moyi̧zə vere Go̧o̧ge yaʼyɛɛ an vɛ vey tuu vey feet voo: do ve kiit vorɛ!” 30Wa̧y nagate akkɔ fee: “Ɛnɔ liinɛ, Baa Abaram. Ɛn há̧a̧ oò luu vɔɔ yɛɛre tak feet vo ze nɔ, ɛnɔ vey filla kandi vonnɛ.” 31Ɛn Abaram hi̧i̧za: “Oò ve hi̧i̧n kiizinaa Moyi̧zə vere Go̧o̧ge yaʼyɛɛ an vɛ yak von yɛ, ɛn ha̧a̧ kaà luu vɔɔ yɛɛre tak feet vo yɔ si̧ʼ vey ɓanna yɛ.”»
Currently Selected:
Luka 16: dae
Highlight
Copy
Compare
Share
Want to have your highlights saved across all your devices? Sign up or sign in
