Luka 14
14
Yeesu poozi ho̧o̧ naa yuuda o ve yo̧o̧ wə̧ə̧riba
1Náa yuuda o ve yo̧o̧ wə̧ə̧ri zɔʼba ɓɛʼ, Yeesu tak lɛm lɛra náa Farize vɛ kɛŋ von zɔʼ o kaa. Náa kaa intuu nɔ ve kɛllarɛ za̧a̧za̧a̧. 2Wa̧y zɔʼ tin o ho̧ǒ̧ fo̧o̧ an ve tɛʼ hɔ̧llɛ o dii Yeesu o timba. 3Yeesu iŋ yak moot vi náa it Mɔyi̧zə moò buu an vɛ vere náa farize vɛ: Moò buu ban vo po yana, ho̧o̧ poozii náa Yuuda o ve yo̧o̧ wə̧ə̧ribarɛrɛ, paamɛrɛ?» 4Ve hi̧i̧zina yak yɛ. Ɛn kəzəkkɔ Yeesu fil kə ho̧o̧ nɔ oppo, yɔl naak an so̧o̧ ho̧o̧ nɔ poozarɛ kə feeza doo luurɛ. 5Pik an, Yeesu vi vo: Ha̧a̧ zɔʼ o vo tiŋza̧a̧re tuu oò ɛ tanna, ke naa ani teee, òo pɛ va̧a̧re yo̧o̧ wə̧ə̧riba, o hə̧ə̧ kəninay nɔmpo yɛrɛ?» 6Ve gaan hɛn ka ve hi̧i̧zina nɔ yɛ.
Yeesu moò yɛɛ zɔɔri wɛɛ moǒ
7Yeesu hə náa ve ya̧a̧ vo nɔ ve wɛɛ yɛɛ zɔɔri za̧a̧ nɔ vɛy; O moot vo moò bɛmm nɛʼi̧ ve tɛʼ: 8Ha̧a̧ òo ya̧a̧num lɛm duʼ ɓasin yɛɛre nɔ, gaa mɔ tak zɔɔ yɛɛ za̧a̧ ɓəə timmɔ oppo sɛ. Bi̧i̧ tuu ve ya̧a̧ de ha̧a̧ zɔʼ zɛ ɗəəm de tuurɛ. 9Ha̧a̧ ke ya̧a̧ vo nɔ, òo yaa feezum: “Mɔ ɛ̂za yɛɛ ɛnɔrɛ nɔ,” sêm de kɔmma, kam tak zɔɔ yɛɛ si̧ʼin pikkɔ oppo nɔrɛ. 10On za̧a̧ nɔ, òo ve ya̧a̧mmɛ, mɔ tak zɔɔ yɛɛ si̧ʼin pikkɔ oppo, ha̧a̧ ke ya̧a̧mmɔ ka gbɔy yaa feezum: “Gbaare min, mɔ yaa zɔɔ tinba doʼ.” Too Ɛnɔm mɔy zɛɛra náa mɔ lɛgi voo lɛm daŋŋɔ o ve timbarɛ sɛw tɛʼ. 11Too ɛnɔm, ha̧a̧ òo gan wɔɔka Go̧o̧ge de ɓinaa zo̧o̧ hɛge, ha̧a̧ òo ɓin zo̧o̧ hɛge Go̧o̧ge de ganaa bɛlba. 12Pig an Yeesu feeza wa̧y ya̧a̧ ya̧llɔ: ‹‹Yo̧o̧ zɔʼ oò mɔ dəə lɛm kam ya̧a̧n náa ve um kaa, ke yo̧o̧rerɛ, ke mim yakparɛ, gaa mɔ ya̧a̧n gbaare mɔn vɛy, daam vey, naa um eeke nɔ vey, vere náa nagate ak um ka̧a̧ sɛkpa nɔ vey zaʼ sɛ; ɛn yo̧o̧ zɔʼ vey ya̧a̧ kənumma too ɛnɔm, vey tok kənzumma hɛn bɔk mɔ po vo nɔ verɛ. 13Oò mɔ dəə lɛm hi̧i̧ duʼu nɔ, mɔ ya̧a̧n gim akkɔ vey, kpellɔ vey, náa ve kɔkkɔ vey, vere yə̧ə̧ nɔ vey. 14Mɔy kanna za̧a̧re yɔ, ɛn ve ɛ̂n von hɛn ka ve tok in mɔ nɔ yɛ. Go̧o̧ge de kənzumma yo̧o̧n de niŋzii náa kɔ hɛn za̧a̧ ve vɔɔ yɛɛre tin nɔ oppo».
Moò bɛmm lɛm aʼa
Mat 22:1-10
15Ve kii moò ɛn ve kəzəkɔ, ha̧a̧ daŋga yɛɛ lɛ lɛm ba tuu feeza Yeesu: Ha̧a̧ de lɛra lɛm an Go̧o̧ge o Gbɛ̧ɛ̧re nɔ oy za̧a̧re!» 16Yeesu hi̧i̧za vere bɛmm nɛʼi̧: Wa̧y zɔʼ dəə lɛm aʼvin, o yaʼ kɔm ak an vɛ doo ve ya̧a̧y náa ve duʼza̧a̧. 17Yɛɛ lii lɛm lɛra nɔ, o yaʼ kɔm ak an doo feeza náa ke ya̧a̧ vo ɛn verɛ: “Vo yaay bɔ ɓɔllɛ nɛ. Lɛmmɔ yɔ̧ ma.” 18Ɛn ve sɛw tɛʼ, daŋga, daŋga ve bi̧i̧ fee. Ha̧a̧ ɓəə timmɔ fee: “Bɔk mi ɓa haŋŋa mii takka tora oy; Ɛn mi haama kaam hoozirɛ.” 19Zɔʼ feeza: “Bɔk mi ɓa de naa boʼ kay tak goo vorɛ; Mi haama kaam hoozirɛ.” 20Ha̧a̧ zɔʼ fee ɓɛʼ: “Bɔkkɔ mii ɓara waa ɓɔllɛ nɛ, moò an oy mi tan nɛ ze.” 21Ha̧a̧ kɔ kɔm akkɔ ɗɛɛ kəy kɛŋ an o hɛge ooza hɛn náa ve hi̧i̧zay nɔ verɛ tɛʼ. Wa̧y ka̧a̧ akkɔ noʼo zatta, kə feeza kɔm ak an: “Mɔ tak nɔm katinnɔ vɛ vere yana waa kare nɔ vɛ oppo, mɔ pani ɛtɛɛ náa gim akkɔ vey, kpellɔ vey, yəə nɔ vey, vere náa ve kɔkkɔ vey.” 22An kaʼso, kɔm akkɔ yaa fee: “Wa̧y kɛŋ, mi kɔ hɛn kum feey nɔ ma, ɛn ɗaa, yɛɛ ve pəə de za̧a̧mɛ ɓɛʼ.” 23Wa̧y kɛŋŋɔ feeza kɔm ak an: “Mɔ tak haŋ yana nɔ vɛ vere yɛɛ wɛ̧ʼrare nɔ vɛ oppo, náa mɔ kasingi voo nɔ vɛ, mɔ kpɔsi vo do ve dɔyrɛ, ka̧a̧ min do hi̧ʼrɛ. 24Mii feet vora: Náa kii bi̧i̧ ya̧a̧ vo ve bɔn nɔ vɛ vey gokinna lɛm min yɛ!”»
Yeesu kaam an do ve hoo ɛ hɛn nɔ verɛ tɛʼ
Mat 10:37-38
25Náa ve duʼza̧a̧, ve tɔga Yeesu yana daŋ. O fil kə náa duʼ ke vey ooraa nɔ o ve po feet vo ve tɛʼ: 26Ha̧a̧ òo yaay iipo, òo hi̧i̧ni ɗəən baʼan vere naʼ an, kenaa tin, sâm an vɛ, vere daak an vɛ, da̧a̧kii vɛ, vere wɔɔk an sɛw yɛ, ha̧a̧ ɛnɔ o liin kaa bi̧i̧ kaam min yɛ. 27Ha̧a̧ òo ganin tap ɓanzinna an oorinni piki yɛ, ha̧a̧ ɛnɔ o liin kaa bi̧i̧ kaam min yɛ. 28Ha̧a̧ daŋga o vo tiŋza̧a̧re, òo hi̧i̧ ka yo̧o̧ ka̧ǎ̧, de zɔɔ sara ɗari hɛn de tutta nɔ doʼ ka to ke ɛ de hel waa baʼgɛ, ka kuzin kɔmmɔ ze nɛy. 29Ka yaa bi̧i̧ kɔllɔrɛ, ka kǔn ke yɛ, náa ve daa hə̧ra nɔ ka ve yaa zaaa 30ka ve fee: “Ha̧a̧ ɛnɔ bi̧i̧ ka̧a̧ yo̧o̧rɛ, o ɛn gɔti ka kǔzin kɔmmɔ yɛ!” 31De too ɛnɔm vin, gbɛ̧ɛ̧ zɔʼ òo hi̧i̧ ka tak kɔ see vere gbɛ̧ɛ̧ zɔʼɔ nɔ, de zɔɔ vəʼə tosinna, ka tak vere wa̧a̧ vɛɛ ve saʼa boʼ, ka baʼ za̧a̧k an de yaay vere wa̧a̧ vɛɛ ve saʼa gbɛkkɔ verɛ ɗaaʼrɛ? 32Oò tosin de lɔnna yɛ nɔ de yaʼa náa fee moò an vɛ, doò ve tak dɛnza gbɛ̧ɛ̧ zɔʼ nɔ naak oy yɛɛ yəəte kere nɔ oppo doò ve viʼi hɛn o hi̧i̧ ka ve kiizinga ze nɛy. 33Yeesu ka̧ʼ zɔʼ ɓɛ: Vo sɛw, ha̧a̧ kaa bi̧i̧n kaam mini, òo gbəlin hɛn an o ɛ nɔ ve sɛw tɛʼ yɛ nɛy».
Yɔm fi ɓȩkka sɔkum
Mat 5:13; Mar 9:50
34Yɔm o hɛn za̧ǎ̧. Oò tit lakka an nɔrɛ nɔ vey kɔra tuubɔgɛ ka ve kənza lakka an nɔ ze nɛy? 35Yɔm ɛnɔ sȩȩn ɓɛyɛ, sȩȩn too yɛɛ vi̧i̧k hɛtpa vin ɓɛ yɛ. Vey gbəllaa gɔn; Vo kii za̧a̧za̧a̧, òo vo ɛ de kɔʼ kiinarɛ nɛy!»
Currently Selected:
Luka 14: dae
Highlight
Copy
Compare
Share
Want to have your highlights saved across all your devices? Sign up or sign in
