Luka 13
13
Kandi piraa ongɛɛ vɔraa
1Yɛɛ bɔk ɛnɔ, náa zɔʼ ve yaa ooza Yeesu moò, Pilat bɔk po ya̧a̧ doo ve vɔt náa Galile vɛ, yɛɛ bɔk vey kɔzaa Go̧o̧ge maak tin nɔ oppo nɛy. 2Yeesu hi̧i̧t vo: «Voy tu̧u̧ nɔ náa Galile ve vɔt vo ɛnɔ hɛn ɓɛɛ von bo ɗəə náa Galile zɔʼ nɔ ve yɔrɛ? 3Paam ɛŋgɔ yɛ, mii feet vora: oò vo pinn kandi von ve yɛ, voy vɔttaa tɛʼ too vo vin sɛw. 4Ongɛɛ náa maʼraa zoo ta̧a̧to ve ka̧a̧ aʼ silowe, bɔk kə̧ə̧t vo fɔn ve vɔzi nɔ, voy tu̧u̧ bo ve kɔ hɛn ɓɛɛ ɗəə náa kap zeruzalɛm ve yɔrɛ? 5Mii feet vora; paam ɛŋgɔ yɛ: Oò vo pinn kandi von ve yɛ, voy vɔttaa sɛw tɛʼ too náa ɛnɔ ve vin».
Moò bɛmm gbakse zɔʼ ɛn leet yɛ
6Pig an, Yeesu moot vo bɛmm nɛʼi̧: «ha̧a̧ zɔʼ ɗak gbakse o vi̧yə̧ han. O yaay ka ha leetɛy, o zee leenɛ. 7O feeza wa̧y laa haŋŋɔ: “Mɔ torɛ, kɔ vɛll ta̧a̧to mii yaay kay ha gbakse leetɛy mi hakin yɛ. Mɔ vəʼə hɛge! De yaŋŋina yɛɛ ɓaʼ nɔ moò nɛɛ?” 8Ɛn ɗaa Wa̧y laa haŋŋɔ hi̧i̧za: “Wa̧y kɛŋ, vɛll nɛnɔ oppo nɔ, mɔ ɛʼɛ kere; Mii a̧a̧ hɛt o kɔlba nɔrɛ, mi kə kɔzaa hɛn vi̧i̧kɔ vɛ tin. 9Ke kaa lee waʼvɛllɔ ze marɛʼ; Oò paamɛ bɔnɔ kam vəʼə hɛge ze.”»
Yeesu poozi waa kep zɔʼ o kpella náa yuuda o ve yo̧o̧ wə̧ə̧riba
10Yo̧o̧ zɔʼ náa yuuda o ve yo̧o̧ wə̧ə̧riba, Yeesu òo moò náa yuuda o ve lik faa yakke. 11Waa kep zɔʼ o ho̧ǒ̧ bɔk o tuu: vɛll maʼra zoo ta̧a̧to, fəəm ɓɛɛ dɔza fɔn, kɔkgaarɛ, o ɛm boʼozaʼ, o yɔlin yɛ. 12Yeesu fee ka hə̧ waa keppɔ, ya̧a̧a̧ kə feeza: «Ho̧o̧ mɔn poo ma». 13O goʼ naak an waa keppɔ o wɔɔkpa, kaʼso waa keppɔ yɔllɛ, o bi̧i̧ Go̧o̧ge gbəŋŋa. 14Ɛn ɗaa wa̧y kɛŋ náa yuuda o ve lik faa yakke tuu nɔ hə Yeesu poozi ho̧o̧ yo̧o̧ wə̧ə̧riba nɔ noʼo zatta. O feeza náa vɛ: «yo̧o̧ kɔm de guu kaa ba kɔ vo kɔm oppo, vo yaa vo poozi ho̧o̧ von vɛ yo̧o̧ ɛnɔ vɛ oppo, kaa paam yo̧o̧ wə̧ə̧riba yɛ!» 15Gbɛ̧ɛ̧ kɛŋ hi̧i̧za: «Wa̧y yak yuu ɛn mɔy! Von o vo po nɔ ha̧a̧ kaa bullin ke naa ani, ke gɔy wa̧a̧wa̧a̧ ani, paninna maam zɔra yo̧o̧ wə̧ə̧riba yɛrɛ?, 16Waa kep ɛnɔ o Abaram luk ani, sɛɛɗan vɔlla vɛll maʼraa zoo ta̧a̧to, ke sȩȩn kaa bul o ho̧o̧re tuu yo̧o̧ wə̧ə̧riba yɛrɛ?» 17Yeesu hi̧i̧ ɛn kəzəkkɔ, náa ke vey kə̧ə̧za moò nɔ vɛ sem kɔ vorɛ; Ɛn náa duʼ nɔ ve sȩȩt vo hɛn yel, Yeesu de kɔra nɔ verɛ tɛʼ.
Moò bɛmm tap ve ya̧a̧ bo saŋnoʼ nɔ yen ani
Mat 13:31-32; Mar 4:30-32
18Yeesu fee: «Go̧o̧ge Gbɛ̧ɛ̧ an ka liizinga de hɛ̧ɛ̧n o nɛɛ? Kay goozinna vere hɛ̧ɛ̧n tin təppɔ nɛɛ? 19O liizin vere tap yen ve ya̧a̧ bo saŋnoʼ nɛy, ha̧a̧ zɔʼ iŋ tak ba o yɛɛ dəəre: Vukkɛ, o yaa bi̧i̧ tap aʼa ɛn nɔɔk bɛrɛttɔ ve yaa waa puuk von ɓakke tuu».
Moò bɛmm waaka
Mat 13:33
20Yeesu fee zɔʼ ɓɛʼ: «Kay goozin Go̧o̧ge Gbɛ̧ɛ̧ an vere hɛ̧ɛ̧n o nɛɛ? 21O liizinga waaka, kep oò iŋ pukin zûmma ɓooza̧a̧, ɛn zûmmɔ hoʼrɛ».
Pek lep wagaǎ
Mat 7:13-14, 21-23
22Yeesu de takka Zeruzalɛm, o daa kap aʼ nɔ vɛ, vere kap wagaa nɔ vɛ oppo, ooza náa ve moǒ. 23Ha̧a̧ zɔʼ viʼi: «Wa̧y it hɛn ya, ha̧a̧ ve kaʼso vey sɔra yɔ zaʼrɛ?» Yeesu hi̧i̧t vo: 24«Vo yoon dɔ pek lep wagaa nɔ oppo; Mii feet vora, náa ve duʼza̧a̧ vey goora ka ve dɔrɛ, ɛn vey lɔnna yɛ. 25«Yo̧o̧ zɔʼ wa̧y ka̧a̧ akkɔ de luu toʼra samma pek leppɔrɛ. Voy kanna von gɔn, voy dii ya̧a̧ yɛɛ pek leppa voy kə fee: “wa̧y kɛŋ, wa̧y kɛŋ, mɔ kǔl vi leppɔrɛ!” Oy hi̧i̧t vora: “Mi gaan yɛɛ vo vugi tin nɔ yɛ.” 26Ɛnɔ voy feeza: “Bɔk ba lɛ vo yɛɛ daŋ, ba zɔ vo yɛɛ daŋ, bɔk mɔ òo moò yana ivi kare nɔ vɛ oppo.” 27Oy kə hi̧i̧t vora yak da̧a̧ nɛy ɓɛʼ: “Mi gaan yɛɛ vo vugi tin nɔ yɛ. Vo luu yəə ii ɛtɛɛrɛ, vo náa kɔl hɛn ɓɛɛ vey.!” 28Oò voy hə̧ra Abarami, Izakki, Zakoppi vere Go̧o̧ge yaʼyɛɛ an ve tɛʼ Go̧o̧ge o Gbɛ̧ɛ̧re, ɛn von ve gbəl vo gɔn nɔ, ɛtuu voy ba̧a̧ voy yəʼra nuuta! 29Náa vey yaay yo̧o̧ vukkare vere yo̧o̧ tunnare, sɛk gaŋgɔɔ vere sɛk malba. Vey zɔɔ lɛra lɛm Go̧o̧ge o Gbɛ̧ɛ̧re. 30Ɛnɔ náa ve si̧ʼin de pik ɓɔllɛ nɛnɔ vɛ, ve yaa bi̧i̧ náa ɓəə tinba ve yɔ, náa ve ɓəə de tinba ɓɔllɛ nɛnɔ ve yaa bi̧i̧ náa si̧ʼin pik ve dee».
Yeesu de vɔra zeruzalɛm
Mat 23:37-39
31Ɛtuu vin, náa Farize zɔʼ ve diŋ yaa o hɛge ve feeza: «Mɔ luu yəə ɛtɛɛrɛ, mɔ tak tinba, Ɛn Helot de teee ka vɔzummɛ». 32Yeesu hi̧i̧t vo: «Vo tak feeza wall ɛnɔ: “Mii nɛnna fəəm ɓɛɛ nɔ vɛy, mii poozaa náa ve ho̧o̧ munɛ, yɔŋgɔ dɔʼ ta̧a̧to an, mii si̧tta kɔm min nɛ.” 33Ɛn kaay ɛm yana min munɛ, yɔŋgɔ vere yɔk, ɛn sȩȩn Go̧o̧ge yaʼyɛɛ an kaa vɔ zeruzalɛm o gɔn nɔ yɛ. 34«Náa Zeruzalɛm voy, náa Zeruzalɛm voy, voy vɔtta Porofɛtɔ ve yɔ, vo zun vɔt náa Go̧o̧ge yaʼat vo nɔ vɛ, vere pinna! Dɔʼ baʼgɛ mi teee kay sɔŋ vo ii hɛge, too nook naʼ de sɔŋŋa sam an vɛ o guksire nɔm, ɛn vo bɔnnɛ! 35Ɛnɔ sȩȩrɛ, Go̧o̧ge lik von nɔ de kanna hi̧ʼi̧. Mii feet vora: Voy hənira ɓɛ yɛ, de gbɔra yo̧o̧ voy fee: “Go̧o̧ge kaa su ha̧a̧ yaay de Gbɛ̧ɛ̧ kɛŋ o niiba nɔrɛ!”»
Currently Selected:
Luka 13: dae
Highlight
Copy
Compare
Share
Want to have your highlights saved across all your devices? Sign up or sign in
